ما هي أفضل المدارس في الرياض؟

[se_ Elsyed]

السلام عليكم ، كل سنه وانتو طيبين انا كنت حابه أضيف تعليقي على الموضوع ليه يا جماعه محدش بيتكلم عن مدرسة الرمال العالمية انا اولادي مسجلين فيها وبيدرسوا فيها والله انها ممتازه من ناحية التعليم ومن ناحية الأقساط اما اذا كان في حد عندو رأي تاني ياريت ياريت يقولي لأني مسمعتش حد اتكلم عنها

طب ما تدينا فكرة عنها يمكن حد يستفيد يا فندم

[Al Sewaify]

السلام عليكم ورحمة الله وبركاته .........

أنا هنتقل إن شاء الله للرياض بعد شهرين وأنا مقيم حاليا في الإمارات - الشارقة وكنت عايز أستفسر عن مدرسة دلتا العالمية فلو أي حد عنده فكره عن المدرسة و المنهج فياريت لو يفيدني أفادكم الله وأخر موعد للقبول في هذه المدرسة إمتى.

ولكم جزيل الشكر ......

[se_ Elsyed]

عن مدرسة العروبة الأن اتكلم ( مع الإعتذار لمذكرات خالد مُحي الدين ) :lol:

انا عارف إن موضوع المدارس في الغربة بيهم ناس كتير ويُمثل لهم صداع مزمن ما بينفعش معاه البنادول ...

وبما إننا أغلبية في السعودية وتحديداً في الرياض ... إذن فمن واجبي إن بعد خبرة 7 سنين في مدرسة العروبة إني اقول رأيي بكل امانة عشان الجميع يستفيد

وإن كانت طبعاً هي رؤية شخصية قد تكون خاطئة أو صائبة

- إبني في الصف الرابع هذا العام ... وبقى له 7 سنين في المدرسة .. لإنه دخل بري كي جي .. وبعدين سنتين كي جي .. و4 في الصفوف الدراسية الرسمية .. يبقى كله 7 ..

- طبعاً عامل مصروفات المدرسة بيبقى مهم في إختيار المدرسة لكنه مش كل حاجه .. خصوصاً لو كان الواحد عنده أكتر من طفل .. فبتفرق كتير لإن نادراً ما تجد شركة أو مؤسسة تتحمل مصاريف مدارس أولاد الموظفين .. وبالتالي هي عبيء مباشر علينا ....

- لكن إحنا من البداية إخترنا مدرسة العروبة بناء على نصائح مغتربين أقدم مننا .. كمان عشان عامل مهم اخر وهو الجو المصري هناك اللي لا يُفقد الأولاد هويتهم وكمان زي ما بنقول بالبلدي بيتونسوا بأولاد بلدهم .. وده واضح من التاثير على سلوكهم وحبهم للمدرسه . الان .

- وتُعتبر العروبة من مدارس المستوى المتوسط في الرياض .. فلا هي في مستوى منخفض زي مدارس الصقر مثلاً أم 4000 أو 5000 ريال .. ولا هي زي المنارات أو الملك عبد العزيز اللي بتتعدى مصروفاتها 20 الف سنوياً ...

لكن بشكل عام ومن وجة نظر إقتصادية بحته .. لو جيت أقيس مدى رضائي وأستفادتي من خدمة او سلعة ما .. بأقيس أنا دفعت فيها قد إيه .. وأستفدت منها قد إيه مقارنة بمثيلاتها ...

يعني لو أنا بادفع 10 الاف في العروبة .. لكن جيت لقيت إستفادتي منها زي إستفادة ناس أخرين كثيرين في مدرسة من أم 5 الاف مثلاً .. يبقى كده أنا أنضحك عليه .. لكن لما أشوف إن اللي دفعته أستفدت منه زي مثيلاتها من نفس المستوى يبقى كده كويس..

وهو ما يحدث في مدرسة العروبة بصراحة حيث أن أستفادتنا موجوده على قدر ما ندفعه بها ..

- نيجي للمنهج اللي بيدرسوه .. هما بيدرسوا منهج أمريكي " هاركورت " وهو منهج كويس .... وبصراحة الأولاد عندي وزملاءهم اللي نعرفهم مستواهم جيد جداً ...

- ندخل في المفيد ... المختصر المفيد انا شخصياً مش راضي عن المستوى في حاجه واحده وهي ... طريقة نُطق اللغة الأنجليزية .. بما إنها مدرسة إنترناشونال وكل المواد تُدرس باللغة الانجليزية فالمفروض إن بعد 3 سنوات على الأقل يكون التلميذ بيتكلم أنجليزي بطلاقة وبلكنة محترمة ... وهذا ما لم يحدث حتى الأن لإن ببساطة المدرسين لكنتهم مش مظبوطة اساساً وأغلب من يدرسون اللغة الانجليزية هناك هم من الفلبين ... والأهم من ذلك إنهم لا يحرصوا على أن الطلبة يتكلموا لغة أنجليزية فيما بينهم في كل الاوقا ت . وبالتالي أصبح عندنا وضع مش مظبوط .. فلما نعرف إن اللغة الانجليزية من السنة الأولى تتكون من ما لا يقل عن 5 مواد وبمعدل على الأقل حصة كل يوم إن لم يكونوا حصتين ما بين قراءة وقواعد ونطق و و و و و .. يبقى في حاجه غلط ...

- فبقى الوضع عندي إن الولد عنده حصيلة لغوية هائلة تماثل حصيلة طالب في ثانوي . ويمكن بدون مبالغة تفوق حصيلتي أنا ياللي أبوه أهو وإلى حد كبير كويس في اللغة نطقاً وكتابة وخبرة ... ويمكن والدته كمان اللي متخصصة في اللغة الانجليزية ودي لعبتها أساساً ... وكمان القواعد عنده سليمة ... لكن النطق مش سليم .. وبقينا عاملين زي اللي عنده لعبة الـ Puzzle عبارة عن قِطع مفككة المفروض إنها لو إترصت بشكل صحيح بجنب بعضها البعض فتكون شكل سليم وجميل ... لكن هنا في حالتنا الموضوع لسه مفكك ولم تتوصل المدرسة إلى طريقة لتجميع هذا كله في لهجة سليمة ولن تتوصل إلى ذلك لأن كل شيء بثمنه ..

- زي ما قلت لكم في الاول إن دي وجهة نظر شخصية بحته قد تكون خاطئة .. لأن ناس كتير جداً ما يفرقش معاها الموضوع ده وأهم حاجه إن إبنها يبقى متفوق أو إنه يبقى ماشي كويس في المدرسة ومش فارقه موضوع النطق طالما بيكتب كويس كمان .

- لكن حتى الأن أنا راضي عن مستوى الأولاد لكن عاوز أوجههم توجيه صحيح يظبط المشكلة دي .. فهاكمل السنة دي هناك وأساساً جت من عند ربنا .. فعل نصف السنة دي هايكون المقر الجديد لمدارس العروبة في أقصى غرب الرياض بعد الناصرية كده هايكون إكتمل وإن ما نقلوش بعد العيد الكبير كما علمت يبقى هاينقلوا مع بداية العام الدراسي الجديد .. يعني يا معلم هاتتحمل مصروفات الأتوبيس في التوصيل لكل طفل 2500 ريال سنوياً ده إن ما زودوش التكلفة لأن المدرسة بعيدة مش زي المقر الحالي اللي مأجرينه ويعتبر في وسط الرياض وقريب من جميع المناطق .... بالإضافة إلى شيء مهم وهو إن عندي عقدة نفسية من موضوعات باصات المدرسة اللي بيفضل واخد الطفل يلففه الدنيا بحالها وعلى ما يروحه البيت يكون العيل فرفر من الحر واللف بالإضافة إلى إنه بيصحى بدري جداً تقريباً مع أذان الفجر .... وبالتأكيد تكلفة بناء المدرسة .. أنا شوفتها على فكرة وهي تحفه بجد ... هايطلعوها طبعاً من دم الناس

- .. لكن من دلوقت إبتديت أعمل دراسة جدوى عن مدارس إنترناشونال ويكون سعرها مناسب مش عالي قوي لأن في الطريق عندي طفل ثالث داخل هو كمان وأدفع يا زكي قدره .. يدفع زكي قدره ... بحيث أقدر أخد قرار أخر السنة .

- وأول مدرسة وقع عليها إختياري هي " مدرسة غانا العالمية " أنا عارفها كويس لأني من نفس المنطقة هي في السلميانية أمام مدارس نافذة المستقبل قرب شارع الضباب ومطعم ماما نورا ... فعرفت إنها بتدرس المنهج البريطاني .... ومصروفاتها فارقه عن العروبة 3 الاف ريال .. يعني تقريباً 11 الف سنوياً ... والمدرسين كلهم أجانب ... وبالتأكيد مش هايجيبوا أمريكان أصليين .. لكن ممكن يجيبوا أمريكان أو أوروبيين من اصل أفريقي أو أسيوي مثلاً ... وبيدرسوا برضوا عربي ... وتربية إسلامية بالأنجليزي زي العروبة .. لكن ما عندهمش مادة قرآن .. ودي سهله لأن الواحد ممكن يحفظهم في البيت أو أي مسجد قريب ومتوفره هنا بكثرة ومجاناً كمان في حلقات تحفيظ القرآن ..

- المدام كانت متحفظة على إن المدرسة فيها إختلاط بين البنات والأولاد ... وبالنسبة لي مش فارقه .. لكن الظاهر من وجودنا هنا الواحد بقى يكش من النقطة دي .. لدرجة عُمر بيقول لي " أنا أتكسف لو درستي لي تيتشر ست !!!!!!!!!!!!! " كنت عاوز اقول له " حد طايل يا بني " لكن قلت أحسن يفهمني صح ... فقلت له وفيها إيه ؟ يا بني إنت في مدرسة مش في حديقة ولا مكان ترفيه ... والظاهر إن المدام نسيت إن فترة الإبتدائي في مصر كنا مختلطين ... والجامعة كمان ... والدنيا كانت حلوه طالما في رقابة والأولاد متربيين .. بل بالعكس .. الطفل اللي من صغره في مدرسة أولاد بس .. وده بنشوفه هنا في السعودية . لما بيكبر بيبقى في حاجه غلط عنده ولو واحده قالت له صباح الخير ممكن يغم عليه ... والعكس صحيح للبنات ... فالمجتمع الاحادي بيبقى في شيء مش مظبوط .... والثقة بالنفس والتعامل الصحيح مع الأخر يؤدي إلى نفسيه سويه مش معقدة ولا منغلقة .... على فكرة في السعودية سمحوا للسيدات إنهم يدرسوا للأولاد السنة دي تقريباً حتى الصف الرابع الإبتدائي

- كان هناك مشكلة أخرى ... وهو إن في طلبة كتير أفارقة .. والثقافة ممكن تكون مختلفة ... لكن ده عادي برضوا طالما الإنسان منفتح وبيعرف يتعامل مع الناس .

- يعني إحنا لسه في مرحلة تجميع المعلومات ودرساتها وتحليلها ...

ولو حد عنده كلمه حلوه يقولها وينفعنا .. ومن قدم شيء بيداه إلتقاه .. وهنيالك يا فاعل الخير والثواب ..

كان معكم .. خميس أبو العافية .. قطاع الاخبار المدرسية

[se_ Elsyed]

نسيت أقول لكم إن لي صديق قديم أعرفه أولاده الأتنين كانوا في مدارس غانا .... ما شاء الله إبنه وبنته الأن في كلية الهندسة بالجامعة الأمريكية في مصر .. ولما كنت أقعد معاهم لما كانوا هنا كنت بأندهش من اللكنة الأنجليزي اللي مش من السهل توصل لها ...

وكمان لي زميل في العمل باكستاني أولاده هناك وبيشكر فيها ...

وصديقة لزوجتي أولادها هناك في الصف السادس وبرضوا راضية تماماُ عن مستوى المدرسة ...

ومازال تجميع الداتا مستمر

[Diab]

http://www.gis.edu.gh/

[doha]

المدام كانت متحفظة على إن المدرسة فيها إختلاط بين البنات والأولاد ... وبالنسبة لي مش فارقه .. لكن الظاهر من وجودنا هنا الواحد بقى يكش من النقطة دي .. لدرجة عُمر بيقول لي " أنا أتكسف لو درستي لي تيتشر ست !!!!!!!!!!!!! " كنت عاوز اقول له " حد طايل يا بني " لكن قلت أحسن يفهمني صح ... فقلت له وفيها إيه ؟ يا بني إنت في مدرسة مش في حديقة ولا مكان ترفيه ... والظاهر إن المدام نسيت إن فترة الإبتدائي في مصر كنا مختلطين ... والجامعة كمان ... والدنيا كانت حلوه طالما في رقابة والأولاد متربيين .

تحفظ المدام في محله تماما ..

الوضع في السعودية مختلف تماما عن الوضع في مصر .. في مصر الطفل بيشوف بنات اقاربه او جيرانه او حتى بنات معدية في الشارع صدفة.. في السعودية مش هيشوف ولا يختلط ببنات خالص غير في المدرسة وده مش هيكون في صالحه خاصه في بدايات المراهقة يعني من اواخر الابتدائي وانت طالع ..

اذكر لما كنت في الرياض كنت محتاجه اكلم ادارة المدرسة في امر ما فكنت بروح وارجع مع بنتي في الباص ..ركبت معاهم مرة او مرتين .. مش عاوزه اقولك ان كان في شبه ( خناقة ) مابين الطلبة الكبار في السن ( كانوا حوالي ثلاثة في سادس ابتدائي تقريبا او اعدادي ) كل واحد فيهم بيقاطع التاني وعاوز بس هو الي يتكلم معايا ويثبت لي انه هو بس الي افضل من زملائه وياسلام بقى لو اثنيت على حد فيهم ولا قلت له برافوا عليك تعال اتفرج وهو يكاد يرمي نفسه من شباك الباص طربا ..

ده شيء طبيعي جدا في السن ده . .

اذكر مرة من زمان اوي كنت بتفرج على برنامج زي صباح الخير يامصر كده بس على قناه سعودية .. وكانت المتصلة وحده ست مصرية وقالت ان عندها ولد في اعدادي في مدرسة السفارة ( قبل مايقفلوها ) وان الولد حب بنت زميلته مصرية برضه وان الاهل من الطرفين راضيين وان ( الطفلين ) متعلقين ببعض جدا وان الاهل معندهمش مانع يجوزوهم لما يكبروا .. طبعا هي كانت بتستشير الاخصائيه هل كده تصرف الاهل صح ولا ايه .. فاكره ان وقتها المذيعه والضيفه ( طرمخوا ) على الموضوع ومجاوبوهاش عن وضع بالتاكيد هم شايفينه غلط وانا شخصيا مش عارفه لو لاقدر الله مكان الاهل دول هعمل ايه لما اشوف ( طفل ) بيحب طفلة ومصر يتجوزها .. مش عارفه هل هيبقى من الحكمه اجاريه وانا شبه متاكده من تبدل مشاعره ناحيتها لما ينضج اكتر ولا امنعه وبكده اخليه يتعلق بيها اكتر ..

احسن حاجه في وضع زي ده خليك ماشي على السستم الي عندك.. السعودية مفيهاش اختلاط يبقى كمل على كده ومتحطش البنزين جنب النار وترجع تقول ياريت ..

[se_ Elsyed]

موضوع كل سنة ..

ده الواحد لما جه يتجوز يا جدعان ما أحترش حيرة الأرملة دي ..

نشنت على واحده .. روحنا قرينا فاتحه وشيلت ومشيت ..

وألف مبروك

----------

إنما المدارس بصراحة بقت حاجه تزهق وتجيب هوسهوس

------------

اخر التطورات مع مراسلكم التعليمي سين سين أبو العافية

- حبايبنا بتوع العروبة إتنفوا إلى اسفل السافلين وبدل ما كانوا في السليمانية وجنبنا وفي متناول إيدنا .. نقلوا لمباني خاصة بهم مش إيجار .. وبقت في أخر طريق المعذر بجوار مركز الملك فهد الثقافي ..

بدون مبالغة من وسط البلد الملز أو السليمانية رايح جاي حوالي ساعة ونص يومياً في المشوار الواحد

واحد فلحوس هايقول لي ما تشترك لهم في باص وبطل بخل ..

أقول له كان غيرك أشطر

الباصات كلها بقت 26 راكب .. قول الأطفال بيحشروهم حوالي 35 في كل علبة ... إحسبها كده .. هاتلاقي الطفل بيقضي كل حياته في الباص .. وبالتالي وإنت سايب إيدك توقع يعدوا عليك الصبح الساعة 5 ونص .. والولد يرجع لك معزز مكرم مبهدل على الساعة 3 أقل حاجه بعد ما يكون إتفرهد وطلع عينه

زائد إنها تكاليف زيادة خصوصاً لما يكون عندك 3 أطفال زي حالاتي .. يعني بتتكلم في 7500 باصات بس سنوياً

وتقريباً 80 % من اللي أعرفهم في المدرسة هايسحبوا ملفات أولادهم وينقلوهم بعد الإمتحانات دي

بالرغم من إن مباني وتجهيزات المدرسة بقت تحفه وحمامات سباحة وملاعب كبيرة ومعامل وعلى رأي علي إبني بيقول لي : بقى عندنا حمامات كتيررررررررررر ونضيفة يا بابا ..

لكن المسافة بصراحة قتلت الناس

المفاجأة بقى ...

وسمعوني زغروطة

رضينا بالهم والهم مش راضي بينا

زودوا المصروفات حوالي 20 % - خلال 4 سنوات يمكن قربت على 100 زيادة -

يعني من G1 - G 5 من 8100 إلى 10000 مقفولة دلوقت .. غير الحبشتكنات التانية ومنها ملازم ويونيفورم وحاجات تانية غريبة تعدي 1000 ريال . والكُتب مع نفسك من المكتبات وما بتقلش عن 2000 ريال هي كمان

----------

عملت دراسات جدول - جدوى يعني

- عن الحاجات اللي قريبة من وسط الرياض

سليمانية ملز عُليا واللي طالع قبل الأتوبيس ما يتزحم يا حضرات

لقيت كل المدارس بقت ناررررررررررررررررررررررر

على سبيل المثال

بسم الله الرحمن الرحيم

1- مدرسة الرمال - المتحركة - في شارع التحلية ....

كي جي 1 .. 10 بواكي ... و 850 كتب من عندهم

كي جي 2 ... 11 باكو .. و 850 كتب

من G1 إلى 3 .... 11 باكو .. 1800 كُتب من عندهم ... 1000 تسجيل ..

G5 .... عُمر إبني .. 12 باكو ... 1800 كتب .. 1000 تسجيل

--------

2- مدارس إيديكوشن

- أول رقم هو رسوم التسجيل .. والتاني المصروفات السنوية

K.G. 1-2-3

1,000

9,000

Grades 1-2-3

1,000

11,000

Grades 4-5-6

1,000

12,000

Grades 7-8-9

1,000

13,000

Grade 10

1,000

14,000

Grade 11

1,000

15,000

Grade 12

1,000

16,000

-------------

سألت في مدرسة سُمعتها كويسة إسمها " واحة العلم " دي على طريق الملك عبد العزيز مقابل طريق النهضة ... بس في الناحية التانية وإنت جاي على دوار الإحساء بجوار مسجد على طريق خريص شكله بيضاوي

دي بحوالي 10500 .. بس عندهم ميزه إنهم بيحفظوا قرآن من 1 لحد جريد 12 ....

---------------

سألت في الألسن برضوا اللي ورا الجوازات في طريق الملك فهد

برضوا 8 و 9 الاف وإنت طالع ...

-------------

جواهر الرياض دي جنب بيتي خلف مركز الشعلة بطريق الملك عبد العزيز ... تقريباً 7 الاف شاملة كل شيء ما عدا الكتب ..

-----

قولت افيدكم بمعلومات طازة وحلوه

[raouf]

زودوا مدرسة العيال عندى السنة 3000 ريال دفعة واخدة

بالصلاة على النبى كى جى 1 بقت ب 23000

لا وزودوا تبرع اجبارى لبناء المبنى الجديد

حاجة هبل فى الهبل

بدون اى سبب يوضح اسباب الزيادة

وهاتتنقل السنة الجاية بره خالص ب20 كم مرة واحدة

امتى بلدنا ترحمتا ويفتحوا مدارس مصرية

كان فيه خبر الاسبوع اللى فات ان فيه مدرستين مصرييتبن هايفتحوا فى الرياض والدمام يا بختهم

[saqr el arab]

السلام عليكم ورحمة الله وبركاته . أنا محاسب مصرى خبرة سنتين وجالى عرض فيزا حرا على كفيل مصرى (مثتسمر مصرى)صاحب شركة سياحة بالمدينة المنورة وثمن الفيزا 16000 جنيه والاقامة على المدينة المنورة ومسمى الفيزا (عامل نظافة عامة)ومعايا عرض اخر فيزا حرا على كفيل سعودى صاحب مؤسسة مقاولات بجدة وثمن الفيزا 14000 جنيه والاقامة على جدة ومسمى الفيزا (عامل نظافة عامة)رجاء من فضلكم عايز اعرف المقارنة بين الفيزا من وجه نظركم وهل من السهل الواحد يحصل على شغل محاسب او مندوب رغم مسمى الفيزا حيث الفيزا على كفالة شركات وليست فردية وياريت اعرف طبيعة الرواتب لمهنة المحاسب او مندوب مبيعات فى جدة او فى المدينة المنورة مع العلم انى حاصل على بكالريوس تجارة جامعة القاهرة شعبة محاسبة بتقدير عام جيد حاصل على شهادة ICDL الدولية فى الكمبيوتر حاصل على دبلومة فى المحاسبة الاكترونية جامعة القاهرة حاصل على دبلومة فى التجارة الاكترونية والتسويق الاكترونى والاستراد والتصدير جامعة القاهرة مع العلم كل هذه الشهادات معتمدة من وزارة الخارجية والملحق الثقافى السعودى والقنصلية السعودية رجاء الرد سريعا وشكرا لسعة صدركم.

[se_ Elsyed]

طب مداخلتك دي لازمتها إيه في موضوع المدارس يا أخ صقر العرب ؟

[saqr el arab]

انا بعتذر للاخ سى السيد لانى فعلا ما اخدتش بالى من الموضوع

وبعتذر كمان لصاحب الموضوع

[noortamer]

السلام عليكم وعلى كل المصريين اخيرا لقيت منتدى للمصريين دخت جدا

انا ابنى حاليا 3 سنين و3 شهور وعايزه ادخله تمهيدى على السنه الجديده 2011-2012...بس المشكلة ان اى مدرسة عالميه بعيده جدا عننا ...احنا بأقصى شرق الرياض حى النسيم الغربى ...نفسى فى مدرسة عالميه تكون محترمة ومصاريفها معقوله مش اكتر من 10000 ...وبجد مش معقول ادفه له وهو لسه ماكملش 4 سنين 10000 فى السنه عشان يتعلم حروف وارقام ماهو انا علمته بالبيت.....انا مش بفكر فى شكل المبنى وكده خالص اللى يهمنى المعاملة والتربيةفى المدرسة وانه يكون مع مكان فيه مصريين والمعلمات يكونو كويسين معاه...لا بفكر فى رحلات ولا غيره.... وهل ممكن اقدم له واشتغل فى نفس المدرسة مع العلم انى خريجه كلية العلوم كيمياء ومعايا خبرة بالتدريس من مصر...بس للاسف مش من هنا فى السعودية...اتمنى انكم تفيدونى وارجو الرد....وشكرا لكم جزيلا :egyflag:

)

الاختيارات هى...(العروبه - الصقر العالمية- الرواد..- النهضة العالمية-النور-المدرسة الهندية على خريص-الرمال العالميه-

وجزاكم الله خيرا

[noortamer]

خير يا جماعة...هو السؤال صعب ومالوش رد...أرجو الرد وشكرا

[se_ Elsyed]

للأسف يا مدام نور .. إنتي ساكنه بعيد شويتين ... فشرق الرياض لها طبيعة خاصة في إن مافيش مدارس عالمية كثيرة على اساس إن أغلب سكانها سعوديين وتحديداً من شمال السعودية ( قبيلة عنيزة وشمر ) بيحبوا يسكنوا جنب بعض هناك .. وما بيدخلوش ولادهم مدارس عالمية بالتأكيد الا ما ندر ..

فهاتضطري تلجأي إلى أقرب منطقة ليكي وهاتبقى الروضة والنهضة ... ودول فيهم مدارس كويسة ...

يعني عندك مدرسة قريبة في حي الملك عبد الله بعد الحرس الوطني وبعد مخرج 13 - على طريق خريص - إسمها " مدينة العلوم " ... مدرسة كويسة بصراحة ومصاريف الكي جي فيها 9000 ريال .. ده تليفونهم 2544375

وهايبقى عندك في حي النهضة .. مدارس الأقبال ... برضوا سعرها معقول ومش هايتعدى 7000 الاف

وفي عندك مدارسة النهضة العالمية

بلاش المدرسة الهندية لإن دي تبع السفارة الهندية وبيدرسوا المنهج الهندي فقط

كل ما تدخلي بقى على وسط الرياض والسليمانية والملز .. المشوار هايبقى بعيد عليكم خصوصاً أن طريق خريص في أوقات المدارس بيبقى مميت وزحام رهيبببب

أما موضوع شغلك في المدرسة .. فده بالتأكيد بيتوقف على حاجه المدرسة لتخصصك .. لكن لو ربنا وفقك ولقيتي شغل في المدرسة اللي هايبقى فيها إبنك .. يبقى يا سعدك يا هناكي لأن هنا معروف إن أبناء المدرسين بياخدوا خصم 50 على مصروفات أولادهم ...

تحياتي

[yono]

طيب يا جماعة اية رايكم في مدارس الرواد العالمية؟ انا سمعة انها مدرسة قوية

بس معجبنيش المبني ولا طريقة تعاملهم

وبالنسبة لمدارس واحة العلم ومدينة العلوم جنسيات المدرسين اية؟ ومين افضل فيهم

[المهندسه]

السلام عليكم وعلى كل المصريين اخيرا لقيت منتدى للمصريين دخت جدا

انا ابنى حاليا 3 سنين و3 شهور وعايزه ادخله تمهيدى على السنه الجديده 2011-2012...بس المشكلة ان اى مدرسة عالميه بعيده جدا عننا ...احنا بأقصى شرق الرياض حى النسيم الغربى ...نفسى فى مدرسة عالميه تكون محترمة ومصاريفها معقوله مش اكتر من 10000 ...وبجد مش معقول ادفه له وهو لسه ماكملش 4 سنين 10000 فى السنه عشان يتعلم حروف وارقام ماهو انا علمته بالبيت.....انا مش بفكر فى شكل المبنى وكده خالص اللى يهمنى المعاملة والتربيةفى المدرسة وانه يكون مع مكان فيه مصريين والمعلمات يكونو كويسين معاه...لا بفكر فى رحلات ولا غيره.... وهل ممكن اقدم له واشتغل فى نفس المدرسة مع العلم انى خريجه كلية العلوم كيمياء ومعايا خبرة بالتدريس من مصر...بس للاسف مش من هنا فى السعودية...اتمنى انكم تفيدونى وارجو الرد....وشكرا لكم جزيلا :egyflag:

)

الاختيارات هى...(العروبه - الصقر العالمية- الرواد..- النهضة العالمية-النور-المدرسة الهندية على خريص-الرمال العالميه-

وجزاكم الله خيرا

شوفى يا حبيبتى انا كنت ساكنه فى النسيم و نقلت الروضه ...يعنى فى شرق الرياض برضه...اطريت انقل فى وسط الدراسه مجبره لان بنتى كان الباص بيجيلها 5:10 و بترجع 2:35 و كنت بترجع مفرهضه خااالص..نقلت فى الروضه لان اغلب زمايلها ساكنين هناك.مشكله النسيم انه بعيد جدااا

انا مدخله بنتى مدرسه الاماكن العالميه دى خلف الجوازات بجوار مدرسه الالسن و دى الفرع التانى لمدرسه الاقبال العالميه...و بعد ما سكنت فى الروضه الباص بقه يجى 6 و ترجع 1:30 و نشاطها زاد..المدرسه كويسه بس عندى نفس شكوى استاذ سى السيد ...ان حصيلتها اللغويه هايله جدا جدا لكن مش شايفه طلاقه فى الحديث بس بديها عذرها لانها لسه عنده 4 سنين و دى اول سنه ليها و بالنسبه للقرأن بيخدوا قرأن و دين بالعربى و كمان المنهج كويس و بنتى حافظه لا يقل عن 20 سوره و 10 احاديث و ادعيه و دى اكتر حاجه بسطانى.

انتى حطيتى حد 10000 و ده رقم كويس مش وحش ..مصروفات بنتى فى مدرسه الماكن 6000 و 2000 باص و 1000 كتب و يونيفورم ...بس سعرها كويس لانها لسه فاتحه السنه دى

شوفى انا سمعت ان مدرسه النهضه ال فى الروضه هنا كويسه جداا و هتبقى قريبه منك كتير و مصاريفه حوالى كله توتال بالباص و الكتب 11000 بس اسألى تانى و كمان مدرسه واحه العلم و مدينه العلوم ...لسه سامعه ان سمعتها كويسه ...انا بأذن الله من السنه الجايه هكون مع بنتى فى المدرسه كمدرسه لغه فرنسيه و هكون موجوده بقرب و اشوف اكتر..و على فكره هما طالبين مدرسه science بشده ..يعنى روحى امتحنى لو الانجليزى بتاعك كويس و هتقبلى ان شاء الله و خدى ابنك معاكى ....هتفرق كتير فكرى و شوفى

وربنا يوفق الجميع

[المهندسه]

طيب يا جماعة اية رايكم في مدارس الرواد العالمية؟ انا سمعة انها مدرسة قوية

بس معجبنيش المبني ولا طريقة تعاملهم

وبالنسبة لمدارس واحة العلم ومدينة العلوم جنسيات المدرسين اية؟ ومين افضل فيهم

دول اغلبهم مصريين و الاداره مصريه برضه ...بس انا لسه سامعه امبارح من اكتر من حد ان سمعتهم كويسه جداا

[SolimanyGolf]

يا جماعة الخير انا منقول الرياض حديثا و بدور علي سكن ومدارس ---قالولي مدرسة غانا كويسه الي عنده معلومات يلحقني بيها علما بان بنتي في جريد10 ig

و لوحد ينجدني بسكن في حدود 20الف في السليمانيه او قريب من المدرسه ------او في الملز قريب من الستين----اوحتي في اي مكان في الرياض بس يكون عائلي و محترم---و للجميع خالص شكري

[se_ Elsyed]

يا جماعة الخير انا منقول الرياض حديثا و بدور علي سكن ومدارس ---قالولي مدرسة غانا كويسه الي عنده معلومات يلحقني بيها علما بان بنتي في جريد10 ig

و لوحد ينجدني بسكن في حدود 20الف في السليمانيه او قريب من المدرسه ------او في الملز قريب من الستين----اوحتي في اي مكان في الرياض بس يكون عائلي و محترم---و للجميع خالص شكري

بالنسبة للمدارس ... حاول تقرأ شويه في الموضوع ده وهاتلاقي فيه معلومات قيمة مش هاتلاقيها في منتدى اخر

20 الف سكن في السليمانية أو الملز .. صعب ولازم تدور كويس من خلال مكاتب العقار ... وده هايعتمد على مكان شغلك .. لأني ممكن أقول لك أبحث في منطقة الروضة في شرق الرياض وهاتلاقي فيها لكن بعيده شوية عن وسط الرياض

[المهندسه]

يا جماعة الخير انا منقول الرياض حديثا و بدور علي سكن ومدارس ---قالولي مدرسة غانا كويسه الي عنده معلومات يلحقني بيها علما بان بنتي في جريد10 ig

و لوحد ينجدني بسكن في حدود 20الف في السليمانيه او قريب من المدرسه ------او في الملز قريب من الستين----اوحتي في اي مكان في الرياض بس يكون عائلي و محترم---و للجميع خالص شكري

بالنسبة للمدارس ... حاول تقرأ شويه في الموضوع ده وهاتلاقي فيه معلومات قيمة مش هاتلاقيها في منتدى اخر

20 الف سكن في السليمانية أو الملز .. صعب ولازم تدور كويس من خلال مكاتب العقار ... وده هايعتمد على مكان شغلك .. لأني ممكن أقول لك أبحث في منطقة الروضة في شرق الرياض وهاتلاقي فيها لكن بعيده شوية عن وسط الرياض

انا ساكنه فى الروضه من 6 شهور و قعدنا كتير ندور على سكن مناسب و الاسعار عليت كتير ...اقل حاجه فى الروضه فى شارع الحسن بن على او خالد بن الوليد

20 ملحق فى فيلا فووووق معزول

...بصراحه انا مش بفضل الملاحق خالص... بس ده لو لقيت ..الروضه صعب تلاقى فيها لازم تتابع مع المكاتب كتير و كمان لو شغلك فى السليمانيه يبقى هتبقى بعيد عليك جدا

و طريق خريص الصبح بيبقى فى زحمه ميدان رمسيس و اكتر شويتين