ترتيب الثلاجة

[ام الفوز]

الثلاجة هي عنوان المطبخ النظر للثلاجة يعطي انطباع كامل عن ست البيت لو بدانا بالفريزر تقسيم الرفوف مابين اللحوم والسمك والفراخ والخضار المفرزة فيى البيت والجاهزة والعيش البيني والجاهز والمكسرات و الخماير والمشروبات والصلصات الكمية وشكل العبوة ولون الحاجة المتفرزة ياريت لو حد بيقدر يعرض صور احب اشوف افكاركم اكيد ثلاجاتكم عامرة وكملوا الثلاجة انتم

[إيزيس]

التلاجة دي عورة وخاصة آخر الشهر

لكن حنا إخوات في المحاورات يعني يجوز مع الكراهة خشوا باليمين يا حبايب

ده طبق فاصوليا من الشهر اللي فات

دي علبة جبنة نشفت فيها بقايا الجبنة بفعل الهجر و الإهمال

دي نص بطيخة قرعة ما حدش هاين عليه يرميها

وده طبق رز بالخلطة بعتتهولي جارتي اللي ما بتعرفش تطبخ بتجرب فينا

و في الركن البعيد الهادي سندوتشات مخبيينها العيال راجعين بيهم م المدرسة علشان ما يسمعوش الموشح بتاع أصحى الصبح واعمل السندوتشات عارفينه؟

ودي سمكة من أول امبارح بافكر أرميها لكن قلبي مش مطاوعني

وده طبق محشي من آخر عزومة عملته سايباه يفكرني بالحبايب

عجبتكم الفضيحة !!

هاقوم أولع في الثلاجة وراجعة

تم تعديل 14 فبراير 2008 بواسطة قرنفل

[zizetta]

إيه يا قرنفل المواهب المدفونة دي .. ده إنتي حكاية .. وفعلاً عندك حق الثلاجة عورة .. مش آخر الشهر بس لكن طول الشهر .. وطبعا للأسباب اللي ذكرتيها كلها .. هو ليه صحيح ما بيهونش علينا نرمي بواقي الأكل الا لما تصرخ وتقول ارحموني وارموني ...

عموما أنا ثلاجتي أهي ...

(ياسلام لو يسيبوني أنام شوية كمان...)

دي بقى الثلاجة اللي بتجيني في الكوابيس آخر الشهر:

بتبقى جاية الأول علي شكل...

وبعدين تتحول بقدرة قادر كده..

تحياتي

زيزيتا

[إيزيس]

هو ليه صحيح ما بيهونش علينا نرمي بواقي الأكل الا لما تصرخ وتقول ارحموني وارموني ...

لا لا حرام خليها يمكن حد يحب ياكلها في العشا

لا خليها جنب الغدا بكرة

حراام دي بالسمنة البلدي

خليها جوزي بيحبها

هاديها للشغالة بكرة

ده شكل حاجة الواحد يديها لحد والله عيب

راحت فين

الغالة نضفت التلاجة ورمتها

الحمد لله ماليش دعوة هي تشيل ذنبها دي نعمة دي كانت بالسمنة البلدي

نسيت أصبح يا ززة ممكن أقوللك ززة بما إن إسمنا الحقيقي واحد أدلعك بدلعي كل مرة دلع غير ..صباح الورد أنا شايفة عنك عصير مانجة منكن نشربه سوا بعد الفطار اللي عملتيه دلوقت

تم تعديل 14 فبراير 2008 بواسطة قرنفل

[zizetta]

صباحو يا قرنفل... والله با بنتي ما فطرت فعلاً .. والشاي بلبن ده عندي ادمان أول ما أفتح عيني ..لكن بعد ادمان المحاورات بقيت أنسي اشربه الا لما أحس بصداع ..

المهم أني عرفت السر دلوقتي يا زوزو .. وصباحك فل..

تحياتي

زيزيتا

[Modest]

يعني يعني .. إذا سمحتوا لي يعني .. عندي اعتراف خطير يا مدام زيزيتا و مدام قرنفل ;)

بقيت أدخل أدوّر على مداخلاتكم و مواضيعكم علشان أبتسم و ساعات بتقلب معايا فجأة بضحكة مطرقعة ماقدرش اكتمها :sad:

و لا أنسى من مقامي هذا رأس المثلث المتوازي الأضلاع نينة الحاجة فولانة ربنا يكرمها :)

شوفوا لنا بقى حاجة من التلاجة حق البؤين الحلوين دول :beee: .. بس تكون حاجة صابحة الله يكرمكم بلاش من الحاجات اللي بتدُّوها للدادة :P

[إيزيس]

بجد والله يا موديست والله فرحتني مانحرمش من دخلتك على مداخلاتي

بس سؤال يعني دي دخلة أرديحي إيد ورا وإيد أدام وباصص لنا في الثلاجة كمان

إقفلي التلاجة يا ززة

[رورة]

الأخت زيزيتا وقرنفل.. ممكن أدخل معاكو في الموضوع

بعد إذنكو

بالنسبة لتلاجتي .. ;) ربنا ما يوريكو..

كل ما اقول هغسلها ميكونش عندي وقت واعمل حاجة تانية اهم

مع إن أهم حاجة في الشقة هي نظافة التلاجة.. هي مش وحشة اوي بس لازم تتغسل عالأقل مرة في الشهر

اما عن الترتيب فأنا ساعات برتبها مرة في الشهر لما بروح السوبر ماركت ااجيب حاجة البيت كلها

او كل اسبوع لما بنظف المطبخ

بخرج كل بواقي الأكل وبلم الخبز كله في كيس واحد

بس دة مش عشان انا نشيطة.. لا لا سمح الله، دة عشان انا اصلا بأرف ومبحبش بواقي الأكل وبرمي اول بأول ربنا يسامحني بأة

انا عندي تلاجتي كبيرة الحمدلله

عاملة الرف الي تحت خالص صيدلية للأدوية..ههههههههههههههههه

عيزة اعمل صيدلية خشب لأن الأدوية كترت اوي اوي في التلاجة..

المهم عاملة ثلثه للأدوية وثلثه للخضر والفاكهة وثلثه للمكسرات والزبيب

اما الرف الي فوقه لزجاجات الماء والعصائر إلي بحطها بالعرض عشان الرفوف الجانبية مش بتسمح إنها تشيلهم

الرف الي فوقه عملاه للأجبان والزبادي ومنتجان الألبان كلها. والزيتون والمخللات

وأول رف فوق خالص بسيبه دايما فاضي .. عشان احط فيه بقايا الأكل ووأواني الطعام وبحط فيه كمان الخبز الي بطلعه من الفريزر

اما الرفوف الجانبية بحط فيها زجاجات الكاتشب والمسطرد والصويا صوص والباكنج بودر والفانيليا والخميرة والبيض والماورد والحاجات الرفيعة دي.

وبس..

يلا خلينا نشوف بقية الأخوات هيقولو ايه .. عيزين نستفيد

[se_ Elsyed]

انا عندي تلاجتي كبيرة الحمدلله

عاملة الرف الي تحت خالص صيدلية للأدوية..ههههههههههههههههه

عيزة اعمل صيدلية خشب لأن الأدوية كترت اوي اوي في التلاجة..

نفسي ومونا عيني أمسك مطواة قرن غزال وأشرح مخ أي واحده ست الستات في الدنيا يقوم حزب النسوة المتوحشة بترشيحها لهذه التجربة عشان أعرف إنتو إزاي بتفكروا كلكوووووووووووووووووووو بنفس التفكير

أقسم بالله مراتي يمكن مع إختلاف الجيل والسن - إنتو مش كبار أنا عارف وأكبركو عندها 24 سنة - لها انفس التفكير وكل كام شهر ألاقيها مفضية شنطة زي شُنط السفر كده مليانه أدوية عشان أروح أتبرع بها لمنظمات الإغاثة ... وساعات بأنسى الشنطة في شنطة العربية الخلفية لحد ما الادوية تتفاعل من الحر وترجع لأصلها لما كانت بودرة ...

طب ليه ؟

ليه كل الأدوية دي ؟

وليه عشان ما هو في تأمين طبي والست من دول تبقى عارفه إن دوا الإستيترومايسين والأسيتوكروموزوم موجود عندها وبوفرة في التلاجة ليه بنصرفه من الصيدلية تاني وأهو زيادة الخير تلات خيارات ؟

وعايز أسمع اغنية جبببببببببببببببببببببببببببببببببببببببببببببببببار

وبعدها طقطوقة " إنت القوي على كل قوي يارب "

[ebtihal]

;)

صباح الفل عليكم ربنا يكرمكم

انا دلوقتى لما بادخل المحاورات بادور على اسمكم :sad:

ضحكت كتيير لان ده حال كل ستات الدنيا وان اختلفت درجة النطام والترتيب واحنا المصرييات ورثينه فى دمنا

فيه كتير من الامثال الشعبية حضرانى ( حلوة حضرانى )

زى خسارتك يابطنى ولا كب الطبيخ

اللى ما يرضاش بالخوخ يرضه بشرابه :)

[zizetta]

ياه ه ه أخيراً عمنا الكبير موديست وصل .. وسع يا جدع إنت وهو .. يا للا يا قرنفل ضايفي عمك موديست بأحلى طبق أم علي بالمكسرات من التلت الأخير من الرف الثاني من ثلاجة رورة ( مش عارفة ليه يا رورة حسيت وانتي بتوصفي تلاجتك إني في سوبر ماركت مترو) .. عموماً أنا قلبي حبك لله في لله كده .. هو إنتي في مصر.. علشان بس ببقي حاسة بزهق شوية آخر الشهر وقلت يمكن أزورك..

أنا شايفة أن الأدوية دي لها قصة تانية .. يعني أنا حاطاهم جنبي في علبة كبيرة .. وكل شوية أفحصهم علشان تواريح الصلاحية .. وبعدين أقع علي علبة مسكنات كده .. حقنة فيتامين مستخبية كده أخدها علشان الدوخة اللي بتجيني آخر الشهر .. دوا كحة قرب ينتهي أقول أخد منه إحتياط أحسن أكح كمان يومين ..

إبتهال .. المشكلة مش في وجع البطن ولا في الخوخ .. المشكلة إن الشغالة عندي ما بترضاش تاكد ا لأكل البايت .. يا من مخزونات الفريزر يا بلاش .. علشان كده بطلت أطبخ خالص ومقضياها دليفري .. مرة أطلب جبنة بيضة مرة أعمل أوردر تونة .. ومرة اتغدي في أي ريستوران واطلب سردين مغربي مشطشط .. ياللا هما عملوا الفلوس ليه مش علشان الواحد يصرفها وينبسط ..

ياتري فين الضلغ الثالث لمثلث برمودا .. نينا فولانة (حاولوا تقولوا نينا كده بطريقة عماد حمدي وهو بيكسر الياء بعد مافرق شعره التلت والتلتين ....)

كلمونا شوية بقى عن الدفايات أحسن الدنيا بررررررررررررررررررررررررررررررررد.

تحياتي

زيزيتا

[إيزيس]

ياه ه ه أخيراً عمنا الكبير موديست وصل .. وسع يا جدع إنت وهو .. يا للا يا قرنفل ضايفي عمك موديست بأحلى طبق أم علي بالمكسرات من التلت الأخير من الرف الثاني من ثلاجة رورة

قشطة يا ززة هو ده الشغل

أهلا رورة انتي اللي جيتي برجليكي و فتحتي الدولاب بتاعك 00 قصدي التلاجة اطلعي بطبق أم علي اللي كنتي شايلاه لعشا مولد النبي

ولا يغلى عليك يا موديست أهه من ثلاجة رورة وضايف موديست

[ebtihal]

وانا والنبى واقفة فى الدور وعايزة من طبق ام على

لحسة اواتنين :roseop: :unsure:

ينوبكم ثواب

[Folana]

السلام عليكم ورحمة الله.....

:unsure: ....ياسنة سوخة ياولالالالاد....ايه كل ده...ياواش ياواش ده زمان ام الفوز ندمت على سؤالها

أنا خيفة صراحة انى اتكلم على جناب حضرة الثلاجة بتاعتى أحسن ماحدش يسدكنى....لكن خلونى أرجع بكم للايام الخوالى فى بداية زواجى...

طبعا انا سيدة زى كل السيدات فى بداية الزواج...طالعة من بيت ابوها ..داخلة بيت الجيران ..يعنى خارجة من بيت الاسرة كل اللى اعرفه انى أملأ كوب ماء...

كانت الثلاجة اللى عندى ايديال ببابين كبيرة جدا..اعتقد المصنع عمل الثلاجات دى مرة واحدة وخلاص...وطبعا الفريزر كان بيكّون ثلج كتير...واليوم اللى اقرر فيه انى اذوب الثلج بقى ..كان بيبقى يوم كوميدى جدا...الثلج يذوب ويظهر معاه كل شىء مستخبى...ومن حظى النحس..كنت دايما الاقى زوجى سابقنى بخطوة...ويقولى الحقى ياحاجة...ارنب من العصر الجليدى تاه عندنا ومش عارف يرجع لامه...ومرة من ذوات المرارير بافتح الثلاجة لقيت خوخة جار عليها الزمن ونشفت وعليها ورقة مكتوب عليها " خوخ عنخ أمون "....وفى نهاية المطاف تلقيت تحذير رسمى من زوجى بأنه حيبلغ عنى هيئة الاثار ويقولهم انى محتفظة بحفريات فى الثلاجة من العصور البائدة ...:)

ومع مرور الزمن ياولادى...البلية لعبت والآشية بقت معدن...وبقى عندى تلاجة نوفروست وايس ميكر وديب فريزر وحركات كده ...وطبعا علشان انا نينة الحاجة العصرية فكان لازمن حتمن ومن كل بُد..أتماشى مع هذه الثورة التكنولوجيّا وأجارى العصر....

ومن يومها ياحضرات...بدأت أهتم بالثلاجة...وأنشط دورى فى المجتمع المطبخى واكون على قدر المسئولية الملقاة على كاهلى...

واليكم هذه النصائح اللى بعضها بأطبقها والبعض الاخر نقلته لحضراتكم :P

أهم حاجة فعلا النظافة الدورية للثلاجة......يعنى نحاول ننظفها مرة كل أسبوع...

نفرغ محتوياتها...ونغسلها من الداخل كويس جدا بعد نزع الارفف والادراج..وبعد كده نمسحها بقطعة قماش مبللة بالماء والخل ...والكلام ده بينطبق على بابها ايضا ونحرص اننا ننضف الكاوتش اللى فى الباب ..ونرشه كل فترة ببودرة تلك للحفاظ على مرونته...ولو الثلاجة مقفولة بقالها فترة ولاحظنا ان الكاوتش اصبح اكثر صلابة...ممكن نغسله بماء ساخن لاستعادة مرونته...

نحرص على عدم تكدس الثلاجة علشان الهواء البارد يقدر يتحرك فى المكان ولا يجد عوائق تحد من حركته..وبالتالى نحافظ على كفاءة التبريد داخل الثلاجة...ويفضل عدم تغطية الارفف بالمفارش او ممكن تكون مفارش لها ثقوب واسعة لعدم اعاقة تيار الهواء البارد ...

طبعا كلنا عارفين ان وضع قطع من الفحم داخل الثلاجة بيمتص الروائح الغير مرغوبة....

وبرضه عارفين اننا لازم نغطى الاطعمة والالبان والماء لان السوائل بتمتص الروائح الموجودة فى الثلاجة وده بيؤثر بالطبع على مذاقها

ونعرف ايضا ان توزيع درجات البرودة داخل الثلاجة بيختلف من مكان لاخر....بمعنى ان درجة الحرارة اسفل الثلاجة تختلف عن وسطها ..تختلف عن الارفف العليا..تختلف ايضا عن حرارة باب الثلاجة...

الجزء الاسفل بيكون اكثر الاماكن انخفاضا لدرجة الحرارة...ويزيد فى الارفف العليا...كده نقدر نوزع الطعام داخل الثلاجة حسب احتياج نوع الطعام لدرجة البرودة المناسبة للحفاظ عليه..

نتجنب وضع مأكولات ساخنة فى الثلاجة....الطبيعى اننا نسيبها تبرد الاول ..

وطبعا يفضل اننا نتخلص من بقايا الطعام اول بأول (وبلاش كسل )...ولو فكرنا ان ممكن الطعام ده يكون حيشبع اسرة مثلا...مش حسيبه فى الثلاجة الى ان يلقى مصيره المحتوم فى الزبالة (عفوا )

شوفوا بقى ياولادى...لازم نراعى اننا نقسم الاطعمة الى كميات صغيرة حسب استخدامنا ...ولو حبينا نعيد تسخين الطعام يبقى نسخن على قدر ما حنستهلك فقط ...

مع مراعاة تغليف باقى الطعام جيدا...

ممكن جدا لو لقينا عندنا انواع جبن ماحدش حياكلها ..او قاربت على انتهاء الصلاحية...نجمعها مع بعض...فى وعاء ونقطع عليها فلفل وخيار ..نعيد تصنيعها يعنى...صدقونى حتتاكل فورا ومش حنحتاج نرميها ...

اهم حاجة اننا نتذكر دائما ان دى تلاجة ومش دولاب خزين.:).ولا نعتمد على ان درجة البرودة بداخلها حتقينا اخطار تلوث الاطعمة او فسادها....

كفاية كده النهاردة...عن قذنكم اما اقوم اغسل الثلاجة علشان ده ميعاد نظافتها السنوى... -_-

صباحكم جميل....

[badroora]

انا كل يوم بقرا العنوان دا وكنتش فاهمة ايه المقصود بترتيب التلاجة فكرت تلاجة اللهم ماحفظنا بس طلعت تلاجة تانية خالص غير اللى اعرفها .

بصى بقي يا ام الفوز ياختى على فكرة انا بحب اسمك اوى عشان صحبتى كان اسمها فوزية وكنت بناديها بام الفوز مع انها كانت بتشيل مواد كتير بس ماعلينا المهم

انا بقي باجيب الحاجة من السوبر ماركت بكياسها وافتح باب التلاجة وارمى الكياس فيها ولا بافكر افتحها غير بس الشهادة لله الايس كريم اللى باهتم به ولازم يبقي فى الفريزير لدرجة انى مرة اشتريت شامبوا وادور عليه ومش لاقياه قولت تلاقينى نسيته فى السوبر ماركت وفى يوم جوعت روحت اطلع تفاحة من الكيس ولاقيت االشامبوا فى التلاجة مع باقي الاكياس متتصوريش فرحت قد ايه .

مرة تانية حطيت المحفظة والموبايل فى شنطة من شنط الاكل وطبعا كالعادة افتح التلاجة وارمى ونمت بتاع 3 او 4 ساعات وصاحية ادور على موبايلي وجبته من التلاجة

الاقصد ان ترتيب التلاجة بصراحة معرفش اذا كان مهم ولا ء انا عن نفسي طريقتى دى عايشة بها بقالى 10 سنين ومريحانى خالص وعند امى تقريبا مبفتحش التلاجة ولا لى اى شغل بها لانى باعتبر نفسي ضيفة وغير مسئولة .

بس مش عارف يمكن فى يوم من الايام لو فكرت ارتب تلاجتى ممكن ابقي استشيرك

بوركتى على الموضوع دا

يا ام الغلا والفوز

تم تعديل 15 فبراير 2008 بواسطة Badria Mekkawy

[badroora]

الابلة الحاجة فولانة ناصيحك دة جميلة جدا ومهمة بس عاوزة حد فاضي موراهوش حاجة غير التلاجة :unsure:

انا قرات كلامك كرهت نفسي انا باطبخ الاكل دا يعنى لو طبخت وباكل وانا باطبخ وادز الاكل فى التلاجة على طول عشان منساش احنا بعيد عنك فى الخليج لو تركتى الاكل خارج التلاجة لحد ما يبرض هتكون دورة التحميض بدات والاكل هيبقي حماض بعد ساعة من تاريخة قصدي طبيخة ى فاحسن شيء ا نك تصدمى الميكروبات من السخن اللى بيغلى الى البارد على طول .

المهم لى سؤال فنى ودا اللى مش عرفاله حل ولا حتى حد من اصحابي عارفله حل

انا الخضار واى شيء فى التلاجة بيجمد ومش عارفة اظبطة نهائي

السؤال هنا بقي

علل

لو مثلا المؤشر مدرج من 1 الى 6

يا ترى انهى الاكثر برودة 1 ولا 6 ؟ -_-

يصعب على الجرجير والنعناع اطلعة من كيسة مجمد والجبنة بتنشف

بنجيب الجبينة الرومى :) مقطعة وناكل منها او يوم وبعد كام ساعة نلاقيها نشفت خالص

اللهى يسترك الاقيش عندك طريقة لحفظ تمن كليو الجبنة الرومى القديمة اللى بالفلفل الاسود عشان منخصرهاش

ترى يا اختى الحياة غالية والزمن غدار :P

كفاية كدا بقي عشان عارفة ان مشاغلك كتير ومش عاوزين نعتلك

:) صباجك ابيض من بياض التلاجة بعد غسيلها

[نانو]

السؤال هنا بقي

لو مثلا المؤشر مدرج من 1 الى 6

يا ترى انهى الاكثر برودة 1 ولا 6 ؟ :unsure:

يصعب على الجرجير والنعناع اطلعة من كيسة مجمد والجبنة بتنشف

بعد إذن نينه فولانه ما قدرتش أسكت علي سؤال بدريه

يا نهار مش فايت يا بدريه . :) دول إخترعوا التلاجات من عصر و لسه مش عارفه 1 ولا 6 اللي أعلي ؟؟؟

علشان كده الجبنه بتنشف والخضره بتتجمد :)

بصي يا ستي هو التدريج من 1 إلي 6 تدريج قوه التبريد

يعني 1 أقل قوه تبريد و 6 أعلي قوه تبريد وممكن تتسبب في تجمد الأكل في التلاجه

اليومين دول خليها علي 2 إلي 3 كده ...إنتي في البحرين وأنا في الكويت يعني درجه حراره الجو بتكون متقاربه

و في عز الصيف حتي بالكتير بتوصل الي 4 ....بس ده لو عندك تكيف مركزي طبعا

الجبنه الرومي طبيعي جدا أنها لازم تتحط في علبه جبنه محكمه الغلق هاتفضل زي ما هي لمده اسبوع علي الاكتر

و أظن ده كافي إنك تخلصي فيه تمن كيلو ولا إيه ؟؟؟؟

في حاجه بقي بالنسبه لبواقي الاكل ...الأفضل دايما إني اشيلها في علبه مغلقه أو ورق فويل و أدلق في الفريزر حتي لو كنت هأكلها تاني يوم

لإن حفظها في التلاجه العاديه غالبا بيغير طعمها

وتفضل التلاجه من تحت شكلها نظيف ومرتب وما يجيبش إكتئاب

اللذيذ في الموضوع إن إحنا أحيانا بيكون عندنا بواقي أكل و إحنا بنشيلها متأكدين في مكنون ضميرنا إن مصيرها النهائي الزباله و مع ذلك بنشيلها ..و في الأخر نرميها....أنا بقي صحيت ضميري وبطلت أعمل الحركه السوده ديه إللي بتملالي التلاجه علي الفاضي وبقيت أرمي أول بأول طالما متأكده إنه مش هيتأكل ...و ربنا يستر وما تجريش ورايا في الأخر -_-

[ام الفوز]

مساء الخير جميعا اشكركم على الرد المتاخر ولكن انا بافتح باب المحاورات بعد مااكون مريت على جرايد بره وجوه واتهريت سياسة وفي النهاية النفق مظلم مالهوشش نهاية حبيت اسحبكم بعيد شوية في اي موضوع خصوصا واسلوبكم لذيذ وانا عارفة من محاوراتكم انو اغلبكم عايش في الخارج والبيوت عمار مش طعن في مصر لاسمح الله ولكن في مصر هناك اهتمامات اكثر اهمية من المطبخ تشد الستات والرجالة لكن في دول الخليج المطبخ للمغتربين بيبقى ركن مهم جدا ولسه عارفة الان انه سن اغلبكم صغير فيظهر اني كنت ضيف ممل لااستطيع الكتابة بالهزلية بتعتكم ولكن بحبها ولسه مشطبة على مدونات في غاية الجمال والمتعة بس مايعلوش على محاوراتكم فاالست فولانة وزميلاتها بالمحاورات منتهى خفة الدم والظرف والجراة ياريت نعرف عملهم مستواهم التعليمي اسرهم حتى نبقى نتواصل على نور بدل التخبيص انا بعد فترة بقيت مكسوفة اني دخلت بجد مع بنات في سن بنتي اسلوبهم واهتماماتهم مختلفة

اشكركم جميعا مرة اخرى

[Folana]

السلام عليكم ورحمة الله...

الاخت الفاضلة ام الفوز......بأشكرك على ثناءك علينا...

وان كنت اريد من حضرتك تفسير بعض معانى الكلمات التى وردت بمداخلتك...مثل السؤال عن السن والمستوى التعليمى وعلاقتهما بالنقاش حول ترتيب الثلاجة... وايضا كلمة التخبيص والجرأة التى تفضلتى واضافيتهم لصفات المشتركات وان كنت حددتى اسمى بصفة خاصة...

عدلت مداخلتى التى كتبتها بالامس ولا استنكف ان اعلن هذا ايمانا منى أن اعطى الطرف الاخر فرصة لتوضيح معانى كلماته ...

شكرا لك مرة اخرى..وفى انتظار ردك سيدتى الفاضلة...

صباحك جميل.... :unsure:

تم تعديل 16 فبراير 2008 بواسطة Folana

[badroora]

الاستاذة الفاضلة : أم الفوز .

لا اعتقد سيدتى ان يوجد ما يدعى كسوف حضرتك من الموضوع ,حضرتك كتبتى موضوع وكلنا شاركنا فيه وكل واحد بيتكلم عن تجربته وله اسلوبه الخاص .

من خلال بيانات حضرتك انك لست مصرية ولذلك لكى العذر انك لا تعلمى الكثير عن الثقافة المصرية وطريقة كتاباتهم وكلامهم .

سيدتى نحن هنا نتعامل مع كل الموضوع على حسب الموضوع بمعنى حضرتك مفتحتيش موضوع تناقشي فيه القضية الفلسطينية مثلا ولاقتينا داخلين نهرج او بنستظرف.

نحن نعى جيدا ان لكل مقال مقام. انا اتكلم بصفة الجمع لان كل المشاركين فى موضوع حضرتك لو لديك ما يتسع من الوقت وقراتى عنهم فى مواضيع مختلفة هتلاقيهم ناس تانية لان كما كتبت لحضرتك نحن لا نخلط الامور وبنتعامل مع كل موضوع على حسب اهميتة والغرض منه .

هذا لا يعنى عدم اهمية موضوع حضرتك حشي لله ان لن اعنى هذا ولكن من الطبيعي ان لكل منا ظروفة الخاصة مع التلاجة معظمنا عاملات يعنى لا يوجد الوقت الكافي لاعتناء بالتلاجة ولذلك اللى حضرتك لاقتية وافتكرتية خفة دم دى حقيقة وبتحصل , وكل كلمة لاقيتها بتكرر فى كل بيت يعنى انا مثلا عندى اكل فى تلاجتى من رمضان ومعنديش حد غيري يهتم بالتلاجة لو انا نسيته يبقي خلاص اتنسي مين اللى هيشله طالما عايشة لوحدى دا مثال اذن اللى حضرتك قراتية وحسيت انه ازعججك دا واقع كتير من التلاجات سواء المصرية داخل مصر او المصرية خارجة .

موضوع السن ومستوى التعليم.

اولا حضرتك لن تذكرى سنك واسمك ومستوى تعليمك ؟ وانا لن اطالبك لانها ملكيتك الخاصة ولكى مطلق الحرية ان تعلنى عنها ام لا.

وثانيا نحن هنا نتعامل مع اقلام وليس مستوى تعليمى وسنى ,وهذا لا يعنى اننا اقل من مستوى حضرتك او اننا غير قادرين على ذكر هذا .

لا طبعا انا شايفة انى زى ما بتعامل مع الاخرين دون اعتبار لاى شيء اتوقع من الاخرين نفس المعاملة .

والا وجب على التنبية قبل كتابة اى موضوع بليز يا جماعة اققل من سن كذا ممنوع الدخول والمشاركة وااقل من مستوى التعليم كذا ممنوع المشاركة حفاظا على المستوى الثقافي للموضوع .

شوفتى الامور اصبحت معقدة ازاى , واننا اخترنا اسهل طريقة وابسطها للتعامل مع حضرتك والموضوع .

وعموما هنا فى المحاورات اكبر نخبة من مثقفى مصر اصغرنا وليس اقلنا طلبة فى ثانوى واكبرنا استاذة جامعة ومستشارين .

واخيرا سيدتى

اهلا وسهلا بك فى بيتك الشقبق واتمنى ان تتواصلي معنا فى مواضيع متنوعة لكى تتعرفي علينا كما لو يهمك ونتعرف عليكي ودا شء يشرفنا طبعا .

تحياتى واحترامى الشديدين لحضرتك .

بدرية مكاوى