شارك بشعار أو أغنية... علشان تبقى حياتنا هنية ...!!!!

[kokomen]

الأخوة والأخوات الأعزاء

دعوة للجميع للمشاركة بكلمات أوشعر أو أغنية

تعبر عن وصف لأحولنا المعيشية من جميع الجوانب

وسوف أبدأ بكلمات جميلة قرأتها وأعجبتني وهي

******************************************

قلنا حنبني وادي احنا بنينا.. الساحل الشمالي

( مع الإعتذار للأغنية)

كل يوم ياناس أقابله ****** دايما أسود من اللى قبله

( سعد الصغير )

الناس بتختشي *** ولا حد بيرتشي *** الله على الحياة *** بقى لونها شيفتشي

( مدحت صالح )

لقد ساد الفساد ..... وساد فينا

فلم ينفع بوليس أو نيابة

قفلنا الباب وأحبطنا شبابا

فأدمن أو تطرف أو تغابى

والمليارات هُربت لسويسرا

ونشحت من الخواجات الديابة

زمان يطحن الناس الغلابة

ويحيا اللص محترما مهابا

( للشاعر سيد حجاب)

:blush2: :unsure: :happy:

تم تعديل 20 ديسمبر 2007 بواسطة kokomen

[amrhoras]

:blush2: اول طلعة جوية .... قفلت باب الحريه

يا اغلى اسم فى الوجود يـــــا جمال نعيش لجمال ونموت لجمال :ninja:

مع احترامى للاغانى الوطنيه برده :unsure:

موضوع جميل يا ا/كوكمن وفكره مفتكسه الصراحه

عيدك سعيد :happy:

عمرو

[kokomen]

اول طلعة جوية .... قفلت باب الحريه

يا اغلى اسم فى الوجود يـــــا جمال نعيش لجمال ونموت لجمال

مع احترامى للاغانى الوطنيه برده

موضوع جميل يا ا/كوكمن وفكره مفتكسه الصراحه

عيدك سعيد

عمرو

 

 شكرا يا أستاذ عمرو

 ونتمنى أن يشارك الأعضاء في التعليق

[امانى]

تسجيل متابعة اخى احمد وموضوع رائع

صورة صورة صورة كلنا عايزين صورة

صورة للشعب الغلبان اللى ارادته مكسورة

مع الاعتزار للاغنيه

امانى

[م.سامح المصرى]

جميل الموضوع

تفضل استاذى

انا م البدايااااااااااااااااااا يا مصر بتألم

وخلاااص كفايااااااااااااا صعب ان انا اكمل

مع العتذار لاسماعيل

[nash]

وطني حبيبي الوطن الأصغر

يوم ورا يوم أمجاده بتصغر

وإنكساراته ..ماليه حياته

وطني بيصغر وبيدحدر

وطني وطني

مع الإعتذار للأغنيه

[zizetta]

إليكم الشاعرة إيمان بكري في هذه الأبيات .. اللينك أيضاً به الكثير من أشعار إيمان بكري .. أسيبكم تستمتعوا ...

هو فيه حاجة!

وخدوا دي كمان : (منقول)

على باب سفارة كندا ..لمحت ابليس وفي ايده استماره

بقول له على فين ..قاللي بص ..يا هجره يا اعاره

يا عم زهقت كفرت ..الاقيش معاك سيجاره

انا انتهيت خلاص ..لا نافع وسواس ولا خناس

ولا ليا عيش وسط الناس

دي عالم مجرمين ..عندكوا فائض ف الفساد

في كل البلاد

ومش محتاجين شياطين .. مليش عيش ف البلد دي

بقالي سنين عاطل..

و انتوا بتعرفوا تقلبوا الحق باطل

و تسلكوا القاتل

و تمشوا ف جنازة المقتول

ومفيش مشاكل

يا عم ده انا بقيت أوسوس بالمقلوب

و أقول للحرامي كفايه بقى توب

انت هاتعمل كل الذنوب لوحدك

و أنا ابليس

أشتغل واعظ

ولا كمساري ف اتوبيس..يا عم ده انا زمان

كنت استنى حد ينسى يسمي..وهو بياكل لقمته

دلوقتي كل اكلكم ملوث..و بصراحه الواحد خايف على صحته

ده مفيش ضمير اساسا..عشان اموته

و كل واحد بمزاجه..خربانه ذمته

يا عم ده كل حاجه اتسرقت

وكده الاجيال الجديده..م الحراميه اتظلمت

يا راجل ده من كتر ما لطشت معايا

خرجت ف مظاهره

مع الناس اللي بتقول كفايه

و برضه مفيش فايده!!

تحياتي

زيزيتا

تم تعديل 12 يناير 2008 بواسطة zizetta

[Folana]

السلام عليكم ورحمة الله....

أحسنتى الاختيار يا زيزيتا...الشاعرة ايمان البكرى شااعرة جميلة..بتذكرنى بأحمد فؤاد نجم...

خصوصا قصيدة هو فيه حاجة...فيها روح قصيدة البتاع..وايضا قصيدة "بيان هام"..لنجم..

اذكر منها:

سلام عليكم وسلمون وموز

وأما المسائل فهنجف ولوز

فيا أخوتى ويا أخوات

اليكم بيانى كما هو آت

جميع المسائل تمام التمام

وكل الكلام ده مجرد كلام

فصبرا جميلا ولا تقلقوش

وشغل الضغاين أنا ما أقبلوش

مافيش أى حاجة

علّى الطلاق والعتاق بالتلاتة

مافيه أى حاجة

وقدر كمان أن فيه أى حاجة

مافيش أى حاجة

مالوش أى لزمة الكلام واللجاجة

وعيب ان عيل يسوق السماجة

ويعمل لى باللو ويعمل ديباجة

.

.

.

.

أنا بأقول انزلها فى ديوان نجم فى منتدى الشعر افضل ..لانها طويلة..بس قصيدة ايمان البكرى فكرتنى بها...

[م.سامح المصرى]

شكرا يا استاذة زيزيتا شعر جميل

شعر استاذة ايمان البكرى

بتفكرنى بشعر استاذ /على سلامه

الى بيلقيه فى ساقيه عبد المنعم الصاوى

ودا قصيدة هوا كان عاملها

اسمها خايف أصحى مالاقيش مصر

-------------------------- ----

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي..

وأفتح الشباك..

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت..

تعبت..

إتخنقت

أصلنا زودناها..

أكننا استعمرناها..

ورثناها

مصر البنوتةالحلوة

اللي زي القمر

بقت عجوزة وشايبة

وبان عليها الكبر

خايف يوم أصحي..

وأفتح الشباك..

مالاقيش مصر

_________________________________

مش أنا امبارح

رحت من بيتنا في السيدة

للشغل في حلون

في سبع دقايق

لا شوفت حد زعلان

ولا حد متضايق

والورد إنسان

والنخل متعايق

والناس جميلة مؤدبة

والجو رايق

والدنيا ماشية لوحدها

ولا حد سايق

ومش انا

امبارح برضه

رجعت من الشغل في حلوان

لبيتنا في السيدة

في خمس دقايق

لا حاسس بغربة

ولا شايف غريب

وقلبي ابيض حليب

عندليب

كروان فرحان

شايل ف قلبي وف جيوبي

الفرح أشكال وألوان

وزعت ع الشوارع

والبيوت والجيران

وطلعت البيت

ضربت الجرس

فتحت مراتي وبالأحضان

والعيال كمان فرحانين

ناجحين وجايبين

الدرجات النهائية

من غير دروس خصوصية

قمنا رقصنا وغنينا

واحتفلنا واتغدينا

فضلة خيرك

سمك واستاكوزا

وجمبري م الكبير

وحلينا ب مهلبية

وشربنا الشاي كمان

وفجأة

لقيتني بردان بردان

بصيت لقيت

الشباك مفتوح

ومفيش بطانية

ومراتي جنبي وزي ما هيه

لسة بتعاني من آلام المفاصل

وده اللي حاصل

والحمد لله

على كل شيء

بيعجبنى جدا

وبيقولها بأسلوب جميل

[zizetta]

مدام فولانة تتميز بالثقافة العالية .. صحيح متعلمة ومتنورة وبتجول كلام يمس الجلب .. تحياتي لك ..

سولي القصيدة حلوة أوي .. هو انت كمان من رواد ساقية الصاوي زي بنتي .. على فكرة هي ليها موقع علي النت .. بس بنتي بتحب تروحها لسماع الموسيقي وحضور الندوات الدينية بس حبقى أقولها بقي علي الأمسيات الشعرية الجميلة اللي بيتقال فيها الأشعار دي ..تحياتي لك

زيزيتا

[Tafshan]

خلونى اقول كلمتين قدام قلتهم زمان ..

انا مصري ... و متغرب

شايلها حمل فوق كتفى

و بأستغرب

بكسر صخر بسنانى

و بأتقرب

لحضن ترابها من تانى

و تتهرب

يأخذنى غريب في احضانه

ابنى و اعلى اوطانه

ابيع له العمر يدينى

رغيف بالشهد متشرب

... تمر ايامى و سنيني

تزيد من حيرتى و حنيني

يفر الدمع من عينى

و ان جابوا سيرتها

باتكهرب

.. اقول ملعون ابو الغربه

و الجاه و فلوسهم ع الصرمه

انا راجع بكره للغالية

ان جعت اعض في ترابها

.. اتاريها قافلة ابوابها

.. و ارجع تانى للغربه

و سنين العمر تتسرب

.. و الف و ادور في موالى

.. مانا اصلى مصري

... و متغرب

********

مصري انا و متغرب

بأعيد و ازيد موال

سنين تفوت و تعدى

و اهو حالنا هو الحال

نقول سنين و بتقضى

.. بتضرب .. و تقلب

نرضى ..

نستنى طينك ينطق

.. وما فيش كلام ينقال

...اسكت و اروح للصبر

ابنى لي هناك فيه بيت

ضيق و زى القبر

حيطانه ميه و زيت

ادفن هناك العمر

و احلف بعمرى ما جيت

قلبى هناك جنبها

رغم الهموم حمال

عاشق تراب ارضها

مش فارقة عنده المال

ميت هنا ..و عندها

.. بيحلا له راحت البال

لكن قراض ارضها

خلى قعادى محال

جينا بلاد الصبر

نأكل في لقمه حلال

و لما يأخذنا الشوق

نبكى نقول موال

نحلم نعيش لو يوم

معاه السكه بتقرب

بس الفراق محتوم

... و ح افضل مصري

... و متغرب

تم تعديل 13 يناير 2008 بواسطة Tafshan

[م.سامح المصرى]

سولي القصيدة حلوة أوي .. هو انت كمان من رواد ساقية الصاوي زي بنتي .. على فكرة هي ليها موقع علي النت .. بس بنتي بتحب تروحها لسماع الموسيقي وحضور الندوات الدينية بس حبقى أقولها بقي علي الأمسيات الشعرية الجميلة اللي بيتقال فيها الأشعار دي ..تحياتي لك

زيزيتا

استاذتى زبزبتا

انا بحضر اة فى الساقية

بحضر فى المعارض الفنيه والموسيقى برضو والندوات الدينيه طبعا والأدب والشعر

بس هوا حضرتك مش متروحى هناك لو بتروحى الساقية

سلامى لكى

[amrhoras]

السلام عليكم ورحمة الله وبركاته،

بصراجه وانا بسمع انغام الموسيقى مع شيرين

حبت انقل الاغنيه هنا زى ماهى لانى اعجبت بيها جدا

واستخسرت احرف فيها كلمه واحده

حبيته بيني وبين نفسي ومقلتلوش عن اللى فى نفسي معرفش ايه بيحصلى لما بشوف عنيه

مبقتش عارفه اقوله ايه معرفش ليه خبيت عليه بضعف اوى وانا جنبه وبسلم عليه

كل حب الدنيا دى ف قلبي ليه ده انتاغلى الناس عليا روحى فيه ده انت لو ادام عنيا بشتاق اليه

على بالى ولا انت دارى باللى جرالى والليالى سنين طويله سيبتها وانشغال بكل كلمه قولتهالى

حبيته بيني وبين نفسي ومقلتلوش عن اللى فى نفسي معرفش ايه بيحصلى لما بشوف عنيه

مبقتش عارفه اقوله ايه معرفش ليه خبيت عليه بضعف اوى وانا جنبه وبسلم عليه

الكلام لوكان يعبر عن الحنان كنت قولت انى بحبك من زمان كل يوم الشوق بيكبر على بالى

على بالى ولا انت دارى باللى جرالى والليالى سنين طويله سيبتها وانشغال بكل كلمه قولتهالى

ارجو انها تحوذ اعجابكم مع انها غير معدله ولا تشير الى اى شيء لكن كلامتها بسيطه جدا وجميله

تحياتى

عمرو

[nash]

انا مصري ... و متغرب

شايلها حمل فوق كتفى

و بأستغرب

بكسر صخر بسنانى

و بأتقرب

لحضن ترابها من تانى

و تتهرب

يأخذنى غريب في احضانه

ابنى و اعلى اوطانه

ابيع له العمر يدينى

رغيف بالشهد متشرب

... تمر ايامى و سنيني

تزيد من حيرتى و حنيني

يفر الدمع من عينى

و ان جابوا سيرتها

باتكهرب

إبداع ..مابعده إبداع...وربي أرتجف قلبي...

حسبي الله ونعم الوكيل

[amrhoras]

جميله فعلا يمدام ناش

:P بتجيبوا الحاجات الحلوه دى منينينينين :P حنبدأ نحقد

[Folana]

جميله فعلا يمدام ناش

:P بتجيبوا الحاجات الحلوه دى منينينينين :P حنبدأ نحقد

السلام عليكم ورحمة الله...

انظر حولك ياعمرو او ارجع مداخلتين حتلاقى القصيدة كاملة بقلم اخونا الفاضل طفشان swar::

وردا على المصرى المغترب..نسمع رأى اللى عايش على ترابها....

أنا مصرى ...وبأعــــــــــــــــانى

حأقول كلام له معنى

وماهوش كلام فى أغــــــــــــانى

لكن بالهم يتغنى

وبرضه حأقوله من تـــــــــــــــــانى

...........

لا حيلتى لقمة بتشبع..

ولاهدمة بها أتأمع

ولا سقف يغطينى

...........

وأسمع كلام عن الاهتمام

ونصايح كتير بالالتـــــزام

واستنى بلدى تراضينى

...........

وأقول حتفرج وألاقى حيطان

وضله حلوه وسط غيطان

أنا والعيال تأوينى

...........

وفى برد الشتا وشمس الصيف

ودفا الغطا وطعم رغيف

ضحكه عيالى تكفينى

...........

وصار حلمى سرير بمستشفى

بضم عضمى من العيا واتدفى

واخد علاج يداوينى

...........

وأستنى....وبأستنى

وألاقى الحال بيتغير...

ونظره خوف بتحيـــــــر!!!

ولا من حقى أتكلم ...ولا أتخيــــر

ولا حد بيسمع لى..ولا حد بينظر لى

ولا بكلمة بأتصبر...

ولسه بحبك يابلدى.....

ولا حأقسى...ولا أتغير

...........

أنا مصرى...وباهاتـــــــــى

وبأحمل همى ليلاتــــــــــى

وبأكتم آلمى وآهاتــــــــــى

لا حد دارى بحياتى...

ولا حيلبى حاجاتـى..

وأناجى ربى هو اللى سا مع

آنَــــــــــــــــاتى

عايش ومستنى وعده....

"للصابرين جناتى "

[nash]

أيه ده هو عمرو فاكر أن أنا اللي كتبت الكلام ه؟؟؟؟ :P

ده أنا كبيري بيتين شعر مسروقين من مجله قديمه وأقول أنا اللي كتبتهم وبرضه بتكشف.....

.............................................

فولانه الغاليه ..مين اللي كتب الأبيات السابقه ؟؟

من عفويتها تدخل إلي القلب مباشرة....

ولسه بحبك يابلدى.....ولا حأقسى...ولا أتغير

[Folana]

السلام عليكم ورحمة الله.....

أيه ده هو عمرو فاكر أن أنا اللي كتبت الكلام ه؟؟؟؟ f((:

ده أنا كبيري بيتين شعر مسروقين من مجله قديمه وأقول أنا اللي كتبتهم وبرضه بتكشف.....

ايه الكلام ده يانيشو ....ده انت كل كلامك جميل...بلاش تواضع ...

هو اللى لفت نظرى ان مداخلة الاستاذ طفشان فى نفس الصفحة بس...لكن عمرو ما اخدش باله منها...:)

فولانه الغاليه ..مين اللي كتب الأبيات السابقه ؟؟

من عفويتها تدخل إلي القلب مباشرة....

:blush2:

ولو انى ما احبش اذكر نفسى فى حاجة....لكن انا اللى كاتبة الكلام ده...اه والله والله والله ...ده كلامى انا...

ربنا يخليك لى...شجعتينى ورفعتى معنوياتى....حتخلينى كده كل يوم بعد الفجر اكتب...(اصل ده الوقت الوحيد اللى باكون فيه مع نفسى )

وعندك حق الكلام فعلا طالع من جوايا...لانى كنت متأثرة بزيارة كده احزنتنى على احوال البلد....

اهو امشى ايدى شوية على ما اعمل ورود السيراميك....ادعى لى اتشجع بقى وابدأ

[امانى]

انا قاعدة من ساعتها مستنية اعرف صاحب الكلام الجميل ده لحد ما عرفت ان اللى كتبه انت يا فوفو

فعلا الكلام اللى يطلع من القلب لازم يدخل قلوب غيره والله يا فوفو كنت مفكرة انه لشاعر ما بس بصراحة

رائع رائع بيعبر عن اللى جوانا وحسينه عليكى بقى وعلى باب الادب وشعر وقراءات واتحفينا بكلامك الرائع

ده جواكى شاعر بيفصح عن نفسه متبخليش علينا بكلماتك الرائعة هناك

امانى :blush2: f((:

[ebtihal]

سعيدة انى باشترك معكم وهذه ابيات من قصيدة الرائع صلاح عبد الصبور ( الناس فى بلادى )

ربما تعبر عن الحال حاليا

الناس فى بلادى جارحون كالصقور

غناؤهم كرجفة الشتاء في ذؤابة المطر

وضحكهم يئزّ كاللهيب في الحطب

خطاهم تريد أن تسوخ في التراب

ويقتلون ، يسرقون، يشربون، يجشأون

لكنهم بشر

وطيبون حين يملكون قبضتي نقود

ومؤمنون بالقدر )