هل هي خزعبلات أم ماذا؟

[Set_Amina]

أريد رأيكم فيما حدث:

كان يوم عزومة لأصدقائي وجائتني احداهن المطبخ فرأت أني لا أرمي الماء المغلي في الحوض مباشرة ولكني اترك الماء البارد ينزل أولا ثم أرمي الماء المغلي بعد ذلك، وعندما سألتني عن سبب فعلي ذلك لم أجد ردا، لأنني أفعل ذلك دون أن أعلم السبب الحقيقي، ده اذا كان فيه سبب فعلا، ولكن طالما أنا حريصة أن أفعل ذلك فهذا معناه اني قد رأيت أحدا من عائلتي يفعله وفعلته أنا بالتبعية. المهم خرجت صديقتي لباقي الشلة مهللة : تعالوا شوفوا صاحبتكم المتعلمة بتعمل ايه!! كان الموضوع مثار جدل للجميع وانقلب الى ضحك وسخرية من الخزعبلات التي تعيش بداخلي،

ياترى هل هي خزعبلات فعلا والا معتقدات قديمة ولا ايه بالضبط؟

طبعا مش قصدي على عدم رمي الماء المغلي في الحوض فقط ولكن على تصرفات كثيرة نفعلها ونحن لا نعلم مدى صحتها، كدخول العتبة الجديدة بالرجل اليمين مثلا وغيره وغيره.

ياريت لو حد عنده معلومة عن مصدر هذه المعتقدات يفيدنا، وشكرا

[Proud Muslim]

بخصوص الخزعبلات ..موضوع جميل جدا ..

خزعبلات كثير جدا ممكن تكون عاشية جوانا و نحن نعتقد أنها حقائق ..

يعني انا جدتي من زماااااااااان جدا .. قالت لي ..

اوعى تنماو انت لابس الشراب ..قلت لها ليه ؟؟

قالت بيضعف النظر ؟؟؟؟؟؟؟؟

أنا قلت أكيد بتضحك علي و دي أكيد أساطير الأولين .. من كام يوم ..بكلم صديق لي ..بيقولي أنا مستحيل أنام بالشراب ( مع ان الجو برد جدا ) ..فقلت له ليه ؟؟؟ ( لم يكن يخطر ببالي أن الاجابة ستكون نفس اجابة جدتي ) ..فقل ..بيضعف النظر ؟؟؟

بصراحة أنا حاسس ان الكلام ده .. خزعبلات جدا جدا .

[se_ Elsyed]

أعتقد يا أمونة أن كل هذا خزعبلات ولا أساس له فى الدين ولا دليل عليه فى القرآن أو السنة ، فخدى عندك مثلاً ما كانت تفعله وتحكيه لنا والدتنا وهى أمرأة طيبة كمعظم أمهات مصر - بتوع زمان :D - :

1- أوعى حد يرمي شعر فى البالوعه بعد مايسرح شعره .. علشان ده غلط.

2- ماحدش من البنات يكنس الشقة بالليل ... حرام.

3- برضوا حكايات الميه السخنة دى اللى ماترموهاش فى البالوعه.

4- أكرمكم الله ، أعدل الشبشب لما تلاقيه مقلوب .. حرام يبقى كده فى وش السما.

5- اوعى تضرب أو تأذى قطه ... علشان الملايكه بتبقى متمثلة فى صورة قطط. .. لدرجة خلتنى عايز أضرب تعظيم سلام لما أشوف أى قطة معدية أو أبقى قاعد على الكرسي ونفسي أقوملها وهى تقعد مكاني. :D

6- أوعى تنام وأنت لابس شراب ،،،، طيب ده الدنيا بتبقى زمهرير وبأقوم من النوم الاقى صوابع رجلي مزرقة من البرد .. يابني أسمع الكلام نظرك هاينسحب .. طيب حتى لو الشراب جديد ونظيف يا ماما . أيوه أسمع الكلام ....

7- وخدي عندك بأه من العادات اللى فى مصر من أربعين الميت والخميس ومش عارف أيه .. وهلما جره من عادات بعضها فرعوني وبعضها هندي وبعضها مالوش أصل كله بينضرب فى الخلاط وبنطلع حاجة جديدة صناعة مصرية.

[abofasad]

أعتقد انها ليست خزعبلات بالمعنى المفهوم ولا بد أن يكون لها أساس علمي

ومثال على ذلك وضع خرزة زرقاء على صدر الطفل لحمايته من الحسد

والسبب أن أي شخص بمجرد ما ينظر للطفل يلفت نظره اللون الأزرق الذي يمتص النظرة الاولى ومعها الحسد قبل أن ينظر للطفل%0ة جووالله أعلم

[الطفشان]

لو بصيت لمعظم الحاجات دي حتلاقي اساس منطقي وراها

الغلط اننا نتبعها اتباع اعمى عشان "هي كدة"

و الغلط الاكبر اننا ننسبها للدين

مثلا

1- أوعى حد يرمي شعر فى البالوعه بعد مايسرح شعره .. علشان ده غلط.

عشان حتنسد و حندفع الشئ الفلاني للسباك

3- برضوا حكايات الميه السخنة دى اللى ماترموهاش فى البالوعه.

لو كان الكلام دة اليومين دول، كنا قلنا ان المية السخنة بتبوظ المواسير البلاستيك مثلا

5- اوعى تضرب أو تأذى قطه ... علشان الملايكه بتبقى متمثلة فى صورة قطط. .. لدرجة خلتنى عايز أضرب تعظيم سلام لما أشوف أى قطة معدية أو أبقى قاعد على الكرسي ونفسي أقوملها وهى تقعد مكاني.  :D

عشان الاطفال بيحبوا يؤذوا الحيوانات، و دي حجة انهم ما يعملوش كدة

زي : لو ماخلصتش طبقك، الاكل حيجري وراك يوم القيامة

و هناك بعض الاعتقادات الفارغة التي لا تمت بصلة للدين، و لكنها فولكلور شعبي

- ما تفتحش و تقفل المقص كثير، هشان بيجيب الكلام

- لازم تشهقي و انتي بتعملي الملوخية

و هناك بعض الاعتقادات دينية خاطئة

- مثل نظر الزوج الى فرج المرأة يسبب العمى، او اطفال ضعيفي البصر، و ناقشنا هذا و اثبتنا عدم صحته

الحاجات دي موجودة كثير للاسف

[se_ Elsyed]

ماهي الخرزه الزرقا وخمية وخميسة والماشاء الله برضوا خزغبلات يا عم أبو فصاد والتمائم والأحجبة فيها حديث عن الرسول بينهى فيه عن ذلك ويدعو على من يتخذ تميمة أو حجاب او ما يعتقد أنه يجلب البركه.

[Proud Muslim]

إفتكرت حاجة سمعتها و أنا صغير ..في مرة شيخ قالي و اأنا طفل ..ان الجن بيكون قاعد في الحوض .. فالمفروض مترميش حاجة مش نظيفة في الحوض على طول ..بعدين يزعل منك .. و هم زعلهم وحش !!

على فكرة الموضوع ده جميل جدا جدا ..

في حاجات كثير كده عاملة زي urban legends لازم الناس تتكلم فيها ..علشان تختفي الأساطير دي من حياتنا ..خصوصا في منها مخالف للدين .. زي موضوع الخرز و الحاجات دي ..زي كا قال الأستاذ se-elsayed إن في نهي عن لبس التمائم و الحاجات دي .

[بنت شعنونة]

كتير من المعتقدات اصلها ديني او علمي

لكن مع الوقت فضل المعتقد وراح السبب

كويس برضه

موضوع المية السخنة دا حقيقي فعلا وان شاء الله احاول اجيبلكم وصلة من النت عنه او اقولكم اسم الكتاب

المياه السخنة لا ترمى في البالوعات وذلك لآنه معظمها بيكون مقر للجان

ولو حبكت تسمي بالله وترميها عشان تامني على نفسك من اي اذي باذن الله...:D

ندخل مكان برجلنا اليمين.........سنة الرسول عليه السلام التيامن في كل حاجا الا لبس الحذاء ودخول الحمام "اكرمكم الله"

في السعودية المولد يلف بفوطة ويتكتف وهوا نايم من رقبته لحد رجليه بيقولوا عشان ما يكبر يبقى طويل

على اساس انه بيفضل متكتف كدا ومفرود جواها من يوم ما يتولد لحد 6 شهور او اكتر

ولا اعرف صحة الموضوع دا

رمي الملح عشان الحسد...... غير ذكر ايات الله سمعت مقولة انه لما تلهي الحسود ما يحسدش

يعني تخضيه

تصوتي في وشه فجاة

تخرمي عينه :D ما يضرش برضه المهم يتلهي عشان ما يحسدش

:D

وكمان يقولك تاتش وود عشان ما احسدكش

قال يعني بقى الحسد كهربا وها تتصرف ارضي ان شاء الله لو مسك الخشب؟ :?

والبنت ما تلبسش هدوم من حد تاني عشان النحس

انا قريت انه دينيا غير مستحب ........انما لييييييييييه مش عارفا :lol:

اللي اعرفه انه حرام الست تغير هدومها في غير بيت زوجها.. :roll:

وكله كوووووووووووم وانهم يطبعوا وايديهم ماليااااااانا دم على حيطة بيت جديد او عربية جديد

ياااااااااااااااااااااااااعععععععع

:mad: :mad: :mad: :twisted: :twisted: :twisted:

طب ماهوا الاصل الدبح عشان الفدوة و الحسد وكدا

انما اخمس واطبع كفوف على الحاجا دا احدااااااااااااث

وغيره وغيره وغيره :? :?

[wahed_masry]

السلام عليكم

بمناسبة موضوع الماء الساخن

ما هو الرأي الفولكلوري في فتح صنبور الماء الساخن

(في حال استخدام سخان كهربي يمكن أن تصل درجة حرارة الماء إلى 80 مئوية)

أيضا لدي سؤال عام في هذا الموضوع ونسب هذه العادات إلى الجن،

يلاحظ أن كثير منها ينسب إلى الاسلام دون دليل واضح ، رغم التناقض مع عادات الشعوب الاخرى مما يوخى أن الجن لا يوجد إلا في بلادنا ولا يعيش إلا في بلاليعنا!!!!!!!!!!!!!!!!!

فما هو تفسير ذلك؟؟؟؟

خالص تحياتي

[ابو يوسف]

عندنا خزعبلات غريبة فى الولادة و السبوع

مثلا..... ما تخشش على الوالدة (اللى لسة مخلفة مش الست الوالدة :) )بلحمة

و ما تخشش عليها و انت حالق دقنك ... لكن تفضل ملطوع برة و هى تقوم و تخرج عليك - حسب ما تسمح ليها حالتها الصحية طبعاً

و تبيت سكينة مع صينية البياتة بتاعة العيل ... ده غير السبع حبات فول و السبع فتل اللى لازم تتربط على ايد الام .

و مرة شفت ام ماسكة سكينة و بتخبط على الارض بيها قدام ابنها اللى لسة بيتعلم المشى و بتقول (اتسد يا بير ..... اتسد يا بير !!!)

و لما سألتها ... بصتلى شذراً كانى اجهل انسان على الارض و قالت لى تفسير منطقى جداًً

الطفل و هو بيتعلم المشى بيخاف يحرك رجليه على قدام لانه بيشوف بير قدامه و هى بالسكينة بتسد البير ....

ايه رأيكوا فى التفسير المنطقى ده

[MuslimaEgyptian]

أعدل الشبشب لما تلاقيه مقلوب .. حرام يبقى كده فى وش السما.

نعمممممم؟ قلب الشبشب خزعبلات؟؟؟ :shock: :shock:

(*هذه الكاتبه اصيبت بصدمه هائله* :):))

(لذيذ الإيموشن ده :shock: ، اول مره أستعمله) :)

فعلا تعلمنا إنه غلط لأنه فى وش ربنا...لدرجه ان ساعات الشوبينج

على الاحذيه بيكون مشقه..لأن هناك محلات تعرض احذيه تسمحلك بتجربتها ثم وضعها براحتك فى مكانها ان لم تعجبك...فتخيلوا بقى كم الاحذيه اللى الناس بتكون مرجعاها غلط :)

يا ريت حد يوضحلنا الامر علشان لو كده، هتسهلوا عليه الحذاء شوبينج

:)

موضوع الشراب والنوم والمقص عندنا برضه..وان الواحد لما يقص شعره، لازم يرميه فى التوا...إحم إحم...علشان كده الشعر يطول أسرع عن رميه فى الزباله أنا مش مصدقه انى كنت بعمل كده..لما الواحد كتب الموضوع ده على الورق...حس أكتر بقدر عدم قيمه هذه الافعال..واتكسف اوى :) :)

[Cleo]

مزيد من الخزعبلات :

- إلقاء اللبن أو الطعام فى التواليت يستحضر الجان

- الناس بتطول عشان الملايكة بيشدوهم من رجلهم

- خبط فردتى شبشب أو حذاء على بعض عدة مرات يجيب النحس

- صوت "شخللة" المفاتيح يجيب النحس

- فتح المقص و قفله عدة مرات يجيب النحس

- إلقاء كمية كبيرة من الملح على الأرض يجيب النحس

- لاقطة السوداء تجيب النحس

- الكلب الأسود جن متخفى

لو افتكرت حاجة تانية هابقى أقولكم... (حابس حابس... :) :) )

[MuslimaEgyptian]

هناك قصه شهيره تقول ان كانت هناك أم كلما طبخت لحمه روست، كانت دائما بعدما يستوى، تقطع حته من الصينيه وتضعها فى طبق صغير وحدها...فمره، سألت الأبنه امها...ليه دايما بتعملى كده يا ماما، قالت ...همممم...معرفش، لقيت والدتى بتعملها كده...فقرروا يسألوا الجده..فراحت قايله...هممم...معرفش، لقيت والدتى بتعملها كده...فقرروا يروحوا يسألوا الجده الكبرى (متسألونيش هى إزاى لسه عايشه، الاعمار بيد الله) :) فراحت الجده الكبرى قايله...أبدا..انا مره كنت عاوزه أقدم اللحمه للضيوف، فلقيت الكميه اللى انا طبخاها

كبيره على الصينيه اللى هقدمها فيها، فقطعت شويه وحطتهم فى طبق على جنب وقدمت الباقى :)

هذه القصه تدل على ان بالطبع كان هذا نفس مصدر الخزعبلات والعادات الباليه، فحد عملها مره لسبب ما وتوارثت بعد ذلك...علشان كده نعمه "التفكر" جميله حيث دائما نراجع ما نفعله ونترك ما ليس له معنى وقيمه...هرجعلكم إن شاء الله بعد ما اروح أقلب الحذاء المقلوب :)

[وسام]

الخوف على الاولاد من الحسد........ لدرجة ان الاهل يشيعوا بين الاهل و الاقارب ان المولود بنت فى البداية وقد يتمادوا بعض الشىء و يطول الامر سنتين تلاتة ........حصلت :)

[Cleo]

الخوف على الاولاد من الحسد........ لدرجة ان الاهل يشيعوا بين الاهل و الاقارب ان المولود بنت فى البداية وقد يتمادوا بعض الشىء و يطول الامر سنتين تلاتة ........حصلت :)

عندى صورة أثرية لجدى الله يرحمه و هو عمره 3 سنوات وكان شعره طويل و فيه شرايط ..!!! سألت والدى ليه كانوا عاملين فيه كدة قاللى لأن كان ليه أخوات أكبر منه بيموتوا فخافوا عليه من الحسد فلبسوه بنوته لحد ما بقى عنده 5 سنين...!! الغريب أن والدة جدى الله يرحمهم جميعا لم تكن مصرية...!!!!!!

و كذلك أتذكر أن أحد دكاترة الآثار الإسلامى لفت نظرنا لأن أعلى السور الذى يحيط بجامع أحمد بن طولون شرافات (نوع من أنواع الزينة لتزيين أعلى الأسوار على شكل عرائس و هو ما يتفرد به جامع ابن طولون بين كل المساجد... و فسر ذلك بأن ابن طولون كان تركى و أن هذه العرائس تشبه ما يصنعه العامة من الورق لحرقه و وخزه بإبر فى أعمال السحر و الغرض من وجودها هو حماية الجامع من الحسد...!!! (سأحاول البحث عن صورة للجامع لتوصيل الفكرة)

[Cleo]

الصورة هنا مش طالعة كاملة... عموما ده الموقع اللى عليه الصورة...

http://www.angelfire.com/ab2/sameharab/2EgOverv2.html

[وسام]

اه والله فعلا :shock: كأنها الحركة بتاعت عين الحسود فيها عود

عندى صورة أثرية لجدى الله يرحمه و هو عمره 3 سنوات وكان شعره طويل و فيه شرايط ..!!! سألت والدى ليه كانوا عاملين فيه كدة قاللى لأن كان ليه أخوات أكبر منه بيموتوا فخافوا عليه من الحسد فلبسوه بنوته لحد ما بقى عنده 5 سنين...!! الغريب أن والدة جدى الله يرحمهم جميعا لم تكن مصرية...!!!!!! 

ونروح بعيد ليه يا كليو قدامك حالة حقيقية حصل فيها الفيلم دة :)

[Cleo]

ونروح بعيد ليه يا كليو قدامك حالة حقيقية حصل فيها الفيلم دة 

:) :) :) :)

:wink:

[MuslimaEgyptian]

واو يا كليو موضوع المسجد ده والعرائس...; Interesting خالص يا مؤرخه المنتدى..:)

ومعلش يا أخ وسام، بتحصل فى احسن العائلات :):)

أتذكر أيضا لدى عائلتى صور قديمه لأفراد حصلهم نفس الشئ...

يا رب يكون مجتمعنا تخلص من الافكار دى علشان كده نصنع النووى وندخل عصر العولمه قريبببببب :(

[se_ Elsyed]

إستنوا إستنوا أفتكرت حاجة كمان

- أن المولود سواء ولد أو بنت - وخاصة ولد - لازم يطلقوا عليه أسم غير أسمه الحقيقي اللى فى شهادة الميلاد علشان لما الناس تيجي تحسد تحسد أسم الشهره مش الاسم الحقيقي ........... ياسلام يا سلام وجون وجون وجون هأ هأ :D

العبد لله اللى قدامكم ده لسه أسم الدلع والشهره لازق فيه وقلة قليلة من قرايبنا ومعارفنا هما اللى يعرفوا إسمي اللى في شهادة الميلاد ، فتصوروا شحط طويل عريض ومتجوز ومخلف ولسه الناس بتقولوا يا حماده مع إن إسم أحمد مش بطال برضوا ... حسبنا الله ونعم الوكيل .

وهذه العادة متأصلة فى الأرياف وأقسم بالله أن اللى هاقولك ده حصل وهو أن أولاد خالي - من زمان الكلام ده - لم يعرفوا أساميهم الحقيقية اللى في شهادة الميلاد اللى ساعة المأذون ما كان بيكتب كتابهم .