هل هي خزعبلات أم ماذا؟

[وسام]

:) :) ولا يمكن كانت علبة فول من بتاعت كاليفورنيا :D ...عارف الاعلان اكيد

المهم.......من اول الكلام دة حضراتكم نسيتوا او تناسيتوا قاعدة مهمة جدا لازم نكون كلنا اتربينا عليها و مهما اختلف المكان او الزمان فهى واحدة بحذافيرها لاتفنى ولاتستحدث ولا تتحول لصورة اخرى

اكيد عارفينها طبعا :cool:

[بنت شعنونة]

البخور

اكبر خزعبلة؟؟؟؟؟؟؟

وارتباطه العجيب بالدين والسحر

نفسي افهم ليه؟

:cry: :cry: :cry: :shock: :shock: :shock: :shock: :? :? :roll: :roll: :roll:

[Cleo]

البخور

اكبر خزعبلة؟؟؟؟؟؟؟

وارتباطه العجيب بالدين والسحر

نفسي افهم ليه؟

:cry:  :cry:  :cry:  :shock:  :shock:  :shock:  :shock:  :?  :?  :roll:  :roll:  :roll:

لأن البخور يسبب حالة من تخدير بعض الحواس مثل حاسة الشم و التسبب فى حالة استرخاء و شعور بالراحة النفسية. عشان كدة مثلا تلاقى الجزارين و محلات الكباب دايما يولعوا بخور عشان يغطوا على ريحة اللحمة الفاسدة. أيضا جو الغموض الذى يفشيه دخان البخور مع حالة التخدير للحواس و حالة الاسترخاء مع الرائحة الذكية مع شوية مؤثرات و إيحاءات يقوم بها الساحر أو الدجال فيعيش الناس فى الوهم.

أما ارتباطه بالدين، فربما يرجع ذلك لعدة أسباب

- ارتباط الدين بالسحر ارتباطا وثيقا منذ عهد الفراعنة، فكان الكهنة يقومون بأعمال السحر. و بعد انهيار الكهنوت الفرعونى و تغيير المصريين لملتهم ظل البخور مرتبطا بالدين بعد اندحار السحر

- ربما لأن الله جميل يحب الجمال و الرسول عليه الصلاة و السلام أمر المسلمين بالتطيب و ما أطيب من رائحة البخور

والله أعلم

[الطفشان]

البخور لها تطبيق عملي جدا

زمان، لما كان المعابد فيها قرابين للالهة، كان في روايح كريهة طبعا

و كانت البخور تستخدم لتحسين الرائحة في المعابد

و ما زال هذا الاستخدام موجودا ايضا، تبخير البيت و المسجد و الكنيسة ايضا

و هذا طبعا بالاضافة الى لزوم الشعوذة بتاعة الكهنة، و عمل "جو" في المعبد للسذج (زي الدخان بتاع حفلات المغنين كدة، جو)

و مشعوذين اليوم يستخدمون نفس الاسلوب ايضا

[ســيد مرزوق]

كلامكم عن لف العيل المولود وتكتيفه فكرني بواقعة حصلت معايا شخصيا أول ما ربنا رزقني بأول طفل لي وكانت طفلة زغنطوطة خالص ... المهم كانت في تاني يوم وكنت راجع آخر النهار من شغلي لقيت جارتنا الفلسطينية طالعة من عندنا كانت يعني بتهني ..... المهم لما دخلت أبوس الكتكوتة بتاعتي ( أول مرة أبقى أب وفرحان بقا ) اتخضيت حتة خضة .... لقيت البنت عاملة زي صابع المحشي بالظبط .... ملفوفة حتة لفة ... مش باين لها ايد من رجل من أي تضاريس .... عبارة عن صابع محشي أو سيجار من النوع الكوبي بتاع عمنا كاسترو .... المهم حصل فزع جامد وزعقت .... إيه ده ؟؟؟؟؟ فين باقي البنت ؟؟؟؟؟ فين الإيدين ؟؟؟؟؟ عملتوا ايه فيها ؟؟؟؟؟ راحت زوجتي وهي ترتجف رعبا مني تقول لي بكلمات مقطقة مرتعشة .... جارتنا أم هاني هي اللي عملت كده ... بتقول عشان عضمها ينشف ويطلع عودها حلو وممشوق .... اه والله ياخويا هي قالت لي كده وانا زي مانتا عارف ..... أول مرة أتعامل مع عيل صغير ومش عارفة حاجة .....

قولتلها .... فكي فكي بلا عود بلا نيلة ..... وروحنا فاكين البنت من التكتيفة المهببة دي وقعدت أحرك أطرافها عشان أتأكد إنهم شغالين ...

شوفتوا بقا الخزعبلات والتخلفات ....

برضه حكاية الميه السخنة في الحمام .... أعتقد شخصيا إنها صح .... عشان الجن بيسكن في البلاليع والذي منه .... ففي مرة كنت بارمي مية مغلية في الحمام .... ,مش عارف إيه اللي يتقال في الحالات دي .... فقعدت أزعق وأقول قبل مارمي الميه : هارمي ميه سخنة مولعة .... كل واحدة تلم عيالها وتتكل ... مش عايز مشاكل ... أنا باحذركم أهوه ..... الميه مولعة نار ..... ياللا بسرعة اجروا بعيد .... لمي عيالك انتي وهيا ....

المهم مراتي جت على الصوت تشوف ايه الحكاية بتحسبني باكلم حد بجد ..... لقيتني لوحدي عمال باكلم أمهات العفاريت الصغيرين عشان ما يتلسعوش من المياه السخنة .... ماتت على روحها من الضحك وكانت هاتسورق مني .... قلتلها ياولية بجد .... لو عيل من العفاريت دول اتحرق من الميه السخنة مش هانخلص من أمه ..... ممكن تنتقم مننا في أي حد من العيال أو مني شخصيا ..... إعملي معروف الله لا يسيئك .

أما البخور فله حكاية .... كانت واحدة جارتنا زمان يوم الجمعة تولع بخور وتحط فيه حاجات معينة زي الشبة والفاسوخة .... ولما البخور يولع والفاسوخة دي تتحول إلى شكل عشوائي بعد ماتسيح وتتحرق وتاخد شكل أي كلام تقعد الست دي وتستنتج منه شكل اللي حسدتها وتصرخ وتقول ..... هيا بعينها .... أم سلوى .... هو دا وشها وعينيها .... منك لله يا وليه يا مفترية ياأم سلوى .... وتروح دابة خناقة لرب السما مع الست أم سلوى .

وكتير من الحكايات المتنوعة عن الخزعبلات اللي بعضها له جذور فرعونية أو يهودية أو ملوخية .....

[Cleo]

كانت واحدة جارتنا زمان يوم الجمعة تولع بخور وتحط فيه حاجات معينة زي الشبة والفاسوخة .... ولما البخور يولع والفاسوخة دي تتحول إلى شكل عشوائي بعد ماتسيح و

يعنى ايه فاسوخة؟؟

[ســيد مرزوق]

الفاسوخة دي حاجة كده لونها أسود عاملة زي قطعة الزفت الجامدة , ولما تتحرق مع البخور تأخذ في التحول إلى أشكال عشوائية نتيجة الإحتراق إلى أن تثبت على أي شكل غير محدد يتخيله العامة شكل الحاسد , وذلك حسب الإستعداد النفسي لقبول الفكرة من قبل الشخص الذي يقوم بهذا العمل , والشبة أيضا عند إحتراقها تؤدي إلى أغراض مشابهة , والفاسوخة وجودها في مكونات البخور تعتبر من الإضافات المبالغ فيها , لذا تجد التعبير الشائع ( ليه ؟؟؟ هو أنا جاي هنا فاسوخة ؟؟؟؟ ) .

مش عارف هل الحاجات دي لسه موجودة وللا خلاص ..... ساحت ؟

[se_ Elsyed]

لم أتمالك نفسي من الضحك على تعليقات عم سيد مرزوق وأسلوبه الساخر ويومًا بعد يوم نكتشف أن لدينا فى المنتدى كتاب ساخرين فشر محمود السعدني أو عمنا أحمد رجب .. وسبب ذلك يرجع إلى التلقائية فى السرد وأضفاء بعض اللمسات السحرية على القصص الواقعية.

بس عندي سؤال يا عم سيد ، هو الفاسوخه دى غير عين العفريت أنا فاكرها زمان هي حاجاة صغيرة ودائرية وألوانها جذابة أحمر على أسود كده ... هي دي ؟ لأني لحد ما قرأت تعليقك كنت بأحسب الفاسوخة دى حاجة خيالية بتجيب الحظ.

[ســيد مرزوق]

لأ يا سي السيد باشا .... عين العفريت حاجة تانية عاملة زي اللوبياية كده ... وملونة فعلا وهي عبارة عن بذور لنبات مش عارف اسمه ايه .... وبيحطوها عشان لما بتفرقع من الحرارة بتعمل صوت يقوموا يفتكروا إن العين خلاص فرقعت وراحت .... واتفك الحسد !!!!! شوفت الخيبة بعيد عنك ؟؟؟؟

وكله كوم وحكاية العروسة الورق دي كوم تاني .... لما العيل يعيا وللا يقريف شوية تقوم الجارة الحبيبة تقول للأم : الواد باين عليه محسود ياختي .... ماترقيه .... وتقوم الأم جايبة حتة ورقة بيضا وتقصها على هيئة عروسة وتجيب الإبرة وهاتك يا تخزييء في الورقة وتقول بصوت : من عين أم ابراهيم اللي شافتك ولا صليتش عالنبي ... من عين الولية عطيات اللي شافتك وللا صليتش عالنبي .... من عين الولية فتحية مرات البقال اللي شافتك ولا صليتش عالنبي ....... وهكذا تجيب الشارع كله والآخر تقول على نفسها هي كمان ... من عين أمك اللي شافتك ولا صليتش عالنبي .... بعد ماتكون الورقة خلاص اتبهدلت وبقت عاملة زي المصفاة ... تقوم ماسكاها في ايدها وتقعد تقول شوية حاجات ملخبطة كدة قال يعني بترقيه .... وبعد كده تقوم حارقة العروسة الورق دي وعاجناها بريقها لغاية ماتبقى زي البوهية السودة ..... تقوم راسمة بيها صليب على قورة الواد الغلبان اللي مش فاهم حاجة .... وتفضل على كده لغاية اليوم التاني تقوم غاسلاها .... وغالبا بيحصل ده صباح يوم الجمعة .....

شوفتوا بقى اللي جايبنا لورا ؟؟؟؟؟

وتقولوا لي ... تورا بورا ؟؟؟؟؟ وابن لادن ؟؟؟؟ وتعويم الجنيه ؟؟؟؟؟

[ســيد مرزوق]

وعلى فكرة أنا قرأت عن الحاجات دي وعرفت إنها شغل يهود أيام ما كانوا عايشين في مصر .... ومعظم العادات اللي فاكرينها ذات جذور إسلامية أو فرعونية أصلها عادات يهودية زي مثلا إشعال النار والإلتفاف حولها على هيئة دائرة والرقص حولها والدوران .... بتحصل كتير في المخيمات والرحلات .... صح ؟؟؟؟

[ســيد مرزوق]

ياريت تكون فرصة وكل اللي عنده حكاية أو معلومة عن الحاجات دي يقولها ....... ومنك نستفيد حتى نقضي على الاباطيل والخزعبلات اللي هرت تاريخنا من أيام القائد الملهم .... خوفو

[amir]

ذكريات

[فــيــروز]

أنا عندى عاده وحشه أوى

بس يا ريت محدش يضحك

أنا اما باكون جعانه اوى .. اوى اوى يعنى .. اما آجى آكل بتكون ايدى بترتعش "ايوه فيلم الحرمان" بس اظن التفسير العلمى للموضوع انى بيكون البنزين خلص عندى فى الوقت ده لانى احيان اما باتضايق جامد الاقى ايدى بترتعش

المهم يعنى من فتره بسيطه كده منت بامر بحاله من الجوع القارص دى .. فكل ما آجى آكل الاكل يقع على الارض .. وبدات اتنرفز يعنى فلقيت ماما بتقول لى اصل الناس اللى معاكى جعانين "مش فاكره الكلمه بالظبط بس هو تلميح على موضوع القرين ده .. الا الموضوع ده جد ولا تخاريف؟" :rolleyes:

[yasovinas]

على فكرة موضوع لف المولود ده موضوع حقيقي وفعلا بتلاقي الاطفال اللي اتلفوا وهم صغيرين عودهم ناشف وممشوقين القوام

موضوع القرين ده مش حقيقي طبعاً

فاكرة نكتة الصعيدي اللي قالو له ما تاكلش بايدك الشمال الشيطان بياكل معاك

قام حاطط سم في الاكل

والتاني اللي كل يوم ياكل بصارة ومش

طلع له ابليس قال له يا اخي حرام عليك سمي بالله نشفت دمي

[Farida]

ازاى ما قريتش الموضوع ده زمان ...انا كمان سمعت حكايه الشراب ده بس انا لازم البس شراب وانا نايمه و الحمد لله النظر كويس و شغاله ميه سخنه على طول و الحمد لله ما فيش مشاكل ...طب حد سمع حكايه لما واحده تكون والده تؤام يقولوا لها خدى بالك احسن بيطلعوا بالليل و يخرجوا على شكل قطط و الناس نايمه و يسرحوا خصوصا لو شموا ريحة سمك

[yasovinas]

ممكن اقول حاجه

وجود الجن او العفاريت بالبيت اوبالخلاء امر واقع وصحيح ولا يمكن ان ننكرة والدليل

اننا يجب لما ندخل البيت او اي مكان نلقي السلام على من فيه حتى ولو كان فاضي

ودي اظن انها سنة

ايضاً عند دخول الخلاء يجب ان تدعي اللهم نجنا من الخبث والخبائث برضه بتستعيز بالله مما هو موجود في الخلاء

الشيء المرفوض هو طريقتنا في التعامل مع الموضوع

طيب انا سمعت قصه وكانت منتشرةجدا في اسكندريه ايام ثانوي عن واحد كان راكب سيارته بعد منتصف الليل ومعاه عائلته وهو مار على مدافن الشاطبي وجد عند المدافن سيدة شبه عاريه فماكان منه غير انه توقف وغطاها بجاكيتته ووصلها لبيتها وتاني يوم راح المكان اللي وصلها فيه ياخد الجاكيت قالو له ان السيده بهذه المواصفات متوفيه من مده كبيرة

وعندما عاد الى المدافن وجد جاكيتته على شاهد قبرها

غير طبعا عمارة رشدي المسكونه مشهوره جدا قصتها

[egyptforever]

اعجب حاجه شفتها بصراحه و حيرتني جدا هي السبحه

السبحه كنت فاكر انها اختراع اسلامي علشان تسبيح الله

و خصوصا حسب علمي الاسلام نص على التسبيح و كيفيه التسبيح

المفاجاه اللي انا شفتها هنا في الكويت نتيجه انتشار بتاع 10 الاف دين

هو ان السبحه موجوده في كل الديانات

لقيت المسيحي معاه سبحه

اليهودي معاه سبحه

الهندوسي معاه سبحه

البوذي معاه سبحه

حتى الزارداشتي معاه سبحه

بصراحه مفهمتش

[المهندس]

طمعا فى حضن جدتى ...والشعور الدافئ بالإسترخاء والسيادة والأمان .....أدعى المرض وأهرع إليها ملقيا رأسى فى حجرها متقوقعا بجسدى كجنين عاد للرحم .....مغمضا عينى هاربا من كل عالمى الصغير الذى مازال ينمو ويتشكل....ومستعدا لتلقى فيوضات الحب الصافى والحنان السخى المشبع بالأحاسيس التى لا يمكن وصفها:

أنا دايخ يا تيتا إرقينى الرقوة بتاعتك.......

تبتسم ستو فى حنان صادق إبتسامة رائقة وتشرع فى آداء دورها

المحفوظ فى تؤدة ودقة وحب وكأنها لم تخلق إلا لترقينى...!

وتبدأ برفق بالغ فى تعديل رأسى على حجرها حتى تتمكن من وضع يدها اليمنى على جبهتى وتبدا فى المســــح مـن الجبهة إلى أعلى الرأس فى حركة دائرية نافضة إلى الخارج كل الهموم والأوجاع والشرور مقطبة جبينها فى غضب مصطنع ويعلو صوتها الحبيب على القلب والأذن فى ترتيل منغم يصاحبه إهتزاز إيقاعى منضبط كتأرجح الصوفية عند الذكر:

الأوله بسمله ... والتانية بسملة .... والتالتة رقوة محمد بن عبدالله

رقيتك من عين أبوك ورقيتك من عين أمك ورقيتك من عين عمك رقيتك من عين عمتك ورقيتك من عين أم فاتن ورقيتك من عين أم أمال ورقيتك من عين أم عبد الحميد ورقيتك من عين نعيمة وعين سوسو وعين سكرة وعين فاريت ومن عين أم بشرى ومن عيـــن إخوالك وخالاتك ورقيتك من عين الجيران ومن عين الأساتذة ومن عين المدرسات.....

ومن عين كل اللى شافوك ولا صلوش عالنبى .....

ترتد عنيهم عليهم .....ترتد عنيهم عليهم

أنا راقيك والله شافيك .... من كل عين تشوفك .......ومن كل عين ترائيك.

حددت عليكى ياعين تآتى ......لم تباتى

حددت عليكى ياعين تآتى ......لم تباتى

ترتد عنيهم عليهم .....ترتد عنيهم عليهم

أنا رأيته يا دياب .... بيعيا عيا الكلاب

يا نخل بلا ورق ...والنفس عنك تفترق ..... كما أفترق الندى عن الورق.....

ترتد عنيهم عليهم .....ترتد عنيهم عليهم ......ترتد عنيهم عليهم

تربت ستى على رأسى مؤذنة بإنتهاء طقوس الرقية وتستمر فى المسح على رأسى بحنان آسر لذيذ ولا تنسى أن ترفع صوتها منبهة على كل من يسمع:

- محدش يبوس الوله....أنا لسه رقياه

وتربت على خدى منبهه ومؤكدة وهى فى غاية الجدية:

- ما تخليش حد يبوسك يا وله لحسن الرقية تبوظ.

أنتفض فجأة جالسا بجوارها بحركة بهلوانية وأطوقها بقوة حتى لا تفلت وانهال عليها بالقبلات وهى تصطنع التذمر وتهز رأسها يمينا وشمالا ضاحكة ومقطبة فى نفس الوقت وهى تقول لا يواد لأ ...حازعل منك ......و بعد أن أرتوى من تقبيلها ....تبدأ فى تسوية طرحتها ولملمة خصلات شعرها الأبيض تحت الطرحة ....وتنظر لى وانا غارق فى الضحك وقد وقفت أمامها كأنى أغيظها ...ثم تقول فى تشكى مصطنع:

- كده بوظت الرقية .... أنا زعلانة منك...

ألقى برأسى فورا فى حجرها وأقول لها فى إلحاح لا داعى له أصلا حيث أنها أبدا لا تمانع :

إرقينى تانى والنبى ياستو ...والنبى والنبى.....

وتبتسم ستو ......ثم .........

تبدأ بتؤدة وعلى مهل وبرفق بالغ فى تعديل رأسى على حجرها حتى تتمكن من وضع يدها اليمنى على جبهتى ......وتبدأ طقوس الرقية من جديد.

ــــــــــــــــــــــــــــــــــــــــــــــــــــــــــــــــــــــــــــــــ

ــــــــــــ

ورغم السياحة الفكرية فى عوالم شتى لم ترد على بال ورغم حياة حافلة بشتى المتناقضات والأفكار والعلوم والقراءات والــرؤى والتحولات والمعتقدات ....إلا إن وعيى الظاهر والباطن

قد تشربا بهذا المشهد الذى أصبح جزءا لا يتجزأ من تكوينى

ووعت الذاكرة كلمات الرقية كما تعى إسمى .

وبرغم معرفتى اليقينية وإدراكى التام أن كلام هذه الرقية لا معنى له تقريبا وأنه مخالف لدينى ومعتقداتى تماما من كل الجوانب ومن كل الزوايا......وأن الطقس كله عبث فى عبث.

إلا أن الحنين لهذا المشهد وممارسته من حين لآخر لم يفارق أبدا جوانحى ومهما كانت المعتقدات والآراء فكنت وما زلت عند أول فرصة متاحة أهرع لألقى برأسى فى حجر ستى أو حجر أمى طالبا الرقية !!!!

فما المعنى؟

المعنى أنه برغم إدراك الإنسان – وأنا هنا أعنى أى إنسان على كل مستوى وأى مستوى - لعدم جدوى هذه المعتقدات والطقوس - بل وسخافتها وعبثيتها - إلا أنه مرتبط بها إرتباط وثيقا فى اللاوعى ..وهنا تأتى خطورة هذه العادات والطقوس .....فهى تعطى إحساسا وقتيا بالأمان من المجهول وإشباعا زائفا لحاجة الروح المستمرة والملحة للإرتواء من الغيب وتفريغا نفسيا للضغوط المادية دون أى إلتزام حقيقى تجاه النفس أو الآخرين أو حتى المعتقد .

وهناك قول ظريف وموحى جدا يروى عن الكاتبة الأيرلندية " جورج صاند " عندما سئلت مرة :

- هل تؤمنين بوجود الأشباح ؟؟؟؟

فردت على الفور:

- كلا بالطبع .......ولكنى أخاف منها !!!!

ــــــــــــــــــــــــــــــــــــــــــــــــــــــــــــــــــــــــــــــــ

ـــــــ

وفى عجالة

وبأدلة شرعية وعقلية محكمة لا مجال فيها للبس أو تأويل وعن تجارب شخصية عايشتها .....فإن قناعتى الإيمانية والفكرية

التى توصلت إليها هى أنه لا مجال إطلاقا لتأثير الجن أو السحر أو الشياطين أو الأعمال على إرادة الإنسان وأن التأثير الوحيد هو

تأثير الغواية أو بمعنى أوضح تأثير الوسوسة المستمرة له و التى تكون من التسلط بحيث أنها تبدأ فتشكل فكرا ثم رأيا ثم بإراده حرة

تحدث عملا ما ينسب زورا لقوى خفية يزعم أنها قهرت إرادة الإنسان وأثرت على أفعاله وإختياره دون إرادة منه.

وهذا لا ينفى بالتأكيد إيمانى بعالم الغيب - الذى هو شرط إسلامى -

ولا تنفى أيضا إقرارى بأن هناك كثير من الظواهر لم يتم إيجاد تفسير لها بعد.

والله أعلى وأعلم .

[yasovinas]

يا سلام عليك

سرد اديب مش مهندس

تحياتي :rolleyes:

[المهندس]

العزيز ياسوفيناس

أشكر لك هذا الفضل......