تعذيب لكل الاسرة مش عقبالكم

[shoshosho]

**************

العضو الفاضل

مرحبا بك فى المحاورات

برجاء ايراد الوصله الخاصه بنشر هذا الخبر لبيان صحته .

ونعتذر عن حذفه لحين ايراد الوصله الخاصه بالنبأ كى لا نكون سببا فى نشر معلومه ربما تكون خاطئه .

شكرا لتعاونك

الاداره

أحمد محمود

[shoshosho]

http://tortureinegypt.net/

التعذيب للجميع: للطفل.. للمرأة .. للاسرة

Submitted by تعذيب on Thu, 2007/12/13 - 18:18.

عاطف طفل صغير ، فى أسرة تتكون من ثلاثة عشر فردا ، تتراوح أعمارهم بين الشهور الست والخامسة والسبعين عاما، وقد تم القبض على الأسرة بأكملها واحتجازا، ذلك عام 1994 , والسبب هو الاشتباه، فقد حدثت جريمة قتل فى نفس المنطقة التى تقطنها الاسرة، ولم يستدل على الجانى .وتردد أن الجانى لديه وشما على أحد ذراعيه،فقبض على الأخوين جمعة ورمضان ،لان بذراع أحدهما وشما .كما قبضواعلى باقى افراد الأسرة لاخذ المعلومات منهم، وحملهم على الاعتراف .

شهادة عاطف (9 سنوات وقت وقوع الجريمة)

"فاكر كويس كل اللى عملوه فيا وفى اهلى ، فاكر أسمائهم وأماكنهم . علقونى بحلق الباب من ايديا المربوطين ورا ضهرى،يعلقونى خمس دقايق ، وبعدين ينزلونى علشان يضربونى .ضرب بأيديهم ورجليهم وبالكرابيح ، لحد ما كسروا سنانى.وبعد كده يعلقونى تانى وينزلونى للضرب .عايزنى اقول ان ابويا وهمى همه اللى قتلوا الراجل اللى لقوه ميت فى الحتة اللى ساكنين فيها ، ويأمرونى الم شعر أمى وسنانها من على الارض.

أما الضرب فى الفلكة فكنا كلنا، أنا وبوسى وحمادة يربطونا مع بعض ويحطونا فى الفلكة ، ويضربونا بالكرابيج ، ده كان فى مينا البصل .بعد كده شفت قسم اللبان وكرموز والجمرك ومعسكر العامرية ، وكل مكان من دول كانوا بيعذبونا فيه.

لما النيابة جت عشان تفتش على القسم ، خافوا وراحوا مهربينا .جه المخبر ، وحط عمى رمضان فى تاكسى ومعانا كمان ضابط لوفا بينا على لاقسام، كل قسم كان بيرفض يستلمنا..فاكر كويس قسم العامرية والجنبه التدريب..قعدونا ،أنا واخواتى فى أوضه وعمى رمضان فى أوضة تانية .بدات ادخل لعمى أأكله لما يبقى فيه أكل واشربه، ولما يحتاج الحماما أجيب له الجردل ، أصله ما كنش بيقدر يقف ولا يستخدم ايديه بعد التعذيب.

فى يوم وقفة العيد قالوا لنا حتخرجوا، رمضان طلب شبشب ولبستوهوله ، فكرت انه حيخرج معانا، لكن دى كانت آخر مرة اشوف فيها عمى ، ومش عارفين طريقه.سمعت أنهم ودوه مستشفى المجانين، ومش عارفين ده صحيح ولا لأ ، ولا ارفين ان كان عايش ولا مات..لسه بندور عليه".

دعاء

"علقونى على الباب.حطونى على البلاط وغموا عينيا وضربونى على وشى، سنانى كلها ملخلخة لحد دلوقت ، وشدونى من شعرى، شعرى جاله قمل شان ما استحمتش ، كانوا بيجيبوا جاز ويدلقوه على دماغى ، عمل لى حروق فى جسمى وكل وشى".

عايدة

"قبضوا على من 6/10الى 6/12/94 خرجت من النيابة لقسم المفروزة.قلعونى كل هدومى ما عدا الكلوت ،وجه عسكرى هددنى بالاعتداء على وانه حيخلينى حامل، كل ده فى وجود 3 ضباط ، واستلمنى اتنين ومن اليمن والشمال بالبوكس فى وشى زى الكورة ، لحد ما طرشت دم. منعت الأكل نهائى ، أصلا ما كنش فيه اكل ، كل 4 أيام شوية فول ورغيفين،حتى فى شهر رمضان.علقونى 5 دقايق، شىء مرعب مش قادرة اتصور ايه اللى حصل لباقى اخواتى اللى اتعلقوا شهور ,

بعد خروجنا بعتزا مخبر يستدعينى ، مارضيتش وبلغت النيابة ،وكيل النيابة قالى ما اروحش .تانى يوم جه الضابط بنفسه ، وضربنى فى الشارع وشد شعرى وهددنى اذا رفضت الاستدعاء مرة تانية .أولادى حنان

(9سنوات) ومحمد(6 سنوات) كانوا مرعوبين وانكمشوا فى ركن الاوضة، من يومها وهما عندهم وفزع وتبول لا ارادى".

فتحية (75 سنة)

"قعدت معاهم شهرين، ضربونى فى صدرى، طول الفترة دى ولا باغير هدومى ولا باستحمى ، كانت آية (ابنة رمضان) معانا، عندها 6 شهور ، لما ىخد هدومها أغسلها يقعدوا يتريقوا عليا وينكتوا".

فوزية

"أخدونا فى البوكس على قسم مينا البصل ، وهناك بدأت كا أشكال التعذيب ، تقييد بالايدين منورا، تعليق من الشعر ، ضرب بالكرابيج على الوش والجسم، طفى سجاير فى جسمى، كهربا من تحت باطى ،وفى صدرى وورا ودنى وبين رجليا، وضرب بالبوكس، تكسير سنان، ضرب بالبيادة على الوش، ضرب بالشلاليت من تحت منى ، ضرب بالكرابيج على بطن رجلى لحد ماتورم ، بعدها يأمرنى الضابط بالنط !.

قصوا شعرى وكسروا سنانى، وطلبوا من ابنى عاطف يلم الشعر والسنان من على الارض .دخلونى على جوزى جمعة وهو متعلق عريان ، وهددونى انهم هيعلوقنى عريانة ، وعصروا صدرى بشدة، وعذبونى بالمرجيحة (المرجيحة طريقة تعليق مؤلمة هى ربط اليدين معا خلف الضهر وتمرير عصا بين اليدين والفخدين ثم تعليق العصا من طرفيها وضرب الضحية ولفها فى هذا الوضع).

الاكل كان كل 4 ايام ،كنت باهرب بالليل اشوف ولادى فى الاوضة التانية ، لو ظبطنى الضابط كان يعذبنى ويربط ايديه فى الترابيزة .صحتى بقت صعب اوى، كنت حاموت ، نقلونى مستشفى المبرة، ونقلوا لى هناك 6 اكياس دم.

يوم ما جه تفتيش النيابة وشافوا جمعةهربونى أنا ورمضان ةالعيال.قعدونا يومين فى البوكس نلف على الاقسام ومافيش حد عايز يستلمنا، بعدين سلمونا لمستشفى المعمورة للأمراض النفسية .وانفصلنا فى المستشفى ، وما شفتش رمضان بعد كده، وبعد شهرين نقلنا لمعسكر العامرية قابلت جمعة والعيال ..فى العامرية كانوا بيطفوا كل النور ويولعوا نار، ويرموا فيها دفاتر عشان تزيد .واحد من الضباط كان بيقول"اوعوا يا عيال"افتكرهم بيحرقوا ولادى ،أجرى عليهم يقابلونى بالضرب .

أما ولادى ..فبوسى لما تكلميها تصرخ ، وتقعد تكلم نفسها، وتبول على نفسها وه نايمة ، وتقوم من النوم تصرخ .ما تلعبش مع أخواتها نهائى أو عيال الشارع.وعاطف بينازع وهو نايم ،وبيكلم نفسه ويقوم مفزوع ..وحمادة بيتخلق ويتعصب ويعيط، ولو شاف عسكرى فى الشارع يجرى".

جمعة

"قبضوا علينا كلنا بعد ما لقوا قتيل بالمنطقة ، وابتدى البوليس يقبض على كل اللى على ايديه وشم، قبضوا عليا فى الفجر،قلعونى هدومى، وربطوا عنيا بالفانلة الداخلية ، وايديه ورا ضهرى بالكلوت ..63 يوم من التعذيب ماشفتش رمضان ، لكن سامع صوته وهو بيصرخ ، وهو سامع صوتى .شفت العيال وهما بيضربوهم فى الفلكة عشان يعترفوا ويوقولوا"أبويا وعمى هما اللى قتلوا" ..علقونى من ورا ، وربطوا أنبوبة بوتاجاز فى رجلى عشان تعمل تقل ، ربطوا عينيا وتحت الرباط زلط على مناخيرى ووشى،وبشد الرباط ساب علامات فى وشى ، حطوا قطن مبلول جوه ودنى، كهربونى فى أماكن حساسة من جسمى ، وربطو المناطق الحساسة بحبل ، وبقوا يشدوا الحبل ، حطوا تلج على صدرى وحطوا مراوح ناحية التلج.

قعدت أتعلق كل يوم لمدة 45 يوم، حتى الحمام، أحيانا عملته وأنا متعلق .وطول المدن كنت عريان تماما .كانوا بيحطوا ايديا فى مية مغلية لحد ما تسلخ الجلد ، بعدين يحطوها فى ميه باردة ، ويفهمونى أن اخويا اعترف عشان اعترف.

لما جت النيابة كنت قربت أموت ، وكانوا بدأوا يقللوا التعذيب شوية لما لقونى حاموت .بقى عندى ضعف فى عضلات الذراعين وضعف الاحساس فيهم .وجالى حساسية فى صدرى".

التقرير الطبى ل"جمعة":

ضعف شديد بالقدرة الحركية والحسية للذراعين ..آثار لرح قطعى ، وتدخل جراحة بخياطة ثمانى غرز بأعلى الظهر .آثار لجروح متعددة بأعلى الأنف وجانبى الوجه ..حساسية ربوية. <div align='center'></div>

العضو الفاضل

تم اعاده المداخله مع الشكر لايرادك وصله مصدر الموضوع

شكرا لتعاونك

الاداره

أحمد محمود

[amani]

السلام عليكم

طبعا مش عقبال اى حد مننا

ده ايه اللى اتعمل فى الناس ده ... دول وقعوا تحت ايد من لا يرحم ..

وربنا يتولاهم ويتولانا جميعا..

ويارب ابعدهم عننا ....

[~Heba~]

اشكر المشرف على تدخله لانى مش مصدقة الكلام ده احنا عايشين فى غابة

[shoshosho]

اشكر المشرف

[إيزيس]

مش قادرة أستوعب مش ممكن دول بشر

[هشام عباس]

انا بصراحه مش مصدق ان الكلام ده ممكن يحصل ابدا