فيه ايه مضايقك؟ فضفض

[homer]

عندى خطأ متكرر أحاول دائما التغلب عليه ولكنى دائما أقع فيه. أصمد ولكن الصمود لا يدوم فأعود ثم أصدم ثم أندم ثم أقلع ثم أصمد وهكدا دوالى سعادتك.

بصراحة زهقت من نفسى. هو الواحد هيتعلم امتى؟ بس أرجع واقول لسة الناس كويسة والثقة فيهم ليست خطأ بالعكس هى فضيلة وتكرار الفضيلة فضيلة.

وكمان متضايق من النسر الكبييييير اللى حاطينه على الفضائية المصرية واللى واكل نص الشاشة مع انى ما عنديش الفضائية المصرية بس اتفرجت على الماتش برة وفوجئت بالنسر المصرى اللى ملا السما قصدى ملا الشاشة.

[c'est la vie]

حالة وفاه ..

تساؤلات وخواطر ..

لماذا نعيش اذا كنا سنموت...

.فقدت البصيرة..لا اري الحياه كما كانت ..

ربى اسالك الا تجعل مصيبتنا في ديننا واسالك الرحمة والمغفره لكل اموات المسلمين ياربى انت أرحم الراحمين..

أسألكم الدعاء..

تم تعديل 5 ديسمبر 2004 بواسطة c'est la vie

[Katamando]

هذا موضوع قديم أعتقد أننا بحاجة لفتحه مرة أخرى لعله يكون متنفساً لبعضنا

ممكن

هيا نحاول

[بنت شعنونة]

انا متضايقة من الأدارة mfb:

[وليد صفوت]

انا متضايقة من الأدارة mfb:

h): rs: لـــــــــــيه ؟؟

[عصام]

انا متضايقة من الأدارة rs:

lo:: lo:: لـــــــــــيه ؟؟

;) clp:: ha)

ليه صحيح؟

وانت يا عم ياللى بتضحك .. :blink: ما تضحكنا معاك B)

[بنت شعنونة]

الا صحيح بيضحك على ايه!!! rs:

استاذ عصام

عشان موضوع احتجااااااااااااج

اللي محدش عبرني فيه

والا هوا لازم اسيب المنتدى وامشي يعني! :P

[عصام]

الا صحيح بيضحك على ايه!!!

استاذ عصام

عشان موضوع احتجااااااااااااج

اللي محدش عبرني فيه

والا هوا لازم اسيب المنتدى وامشي يعني! rs:

أولا: أنا سعيد لأن بمداخلتى كنت باستفزك انتى مش فايولين وقد حدث :P

ثانيا: أنا مش أستاذ cr((: أنا عصام بس .. وإلا هاضطر أقولك أستاذة بنت شعنونة smk:

ثالثا بقى وهو الأهم .. طبعا عندك حق تزعلى .. لكن علشان يكون حكمك عادل يبقى لازم تزعلى من "الجميع" أعضاء وإدارة .. :P ليه أقولك ..

لأن الإدارة غير متواجدة بنفس كثافة تواجد الأعضاء .. بمعنى إن على طول فيه أعضاء .. لكن مش على طول فيه حد من الإدارة .. صح؟ (فكرى بالراحة)

غير دا ودا أنا "إداريا" ممكن أوضح لك أنا ما رديتش ليه مع إنى قريت المداخلة ..

أولا : لأنى اعتقدت (وقد أكون مخطئا طبعا) إنها ليست إهانة لصاحبة الإسم على الإطلاق

ثانيا : لأن كان لازم كل الزملاء يشوفوا مداخلة العضو الزميل والتعرف على أسلوبه وطريقته فى التعبير عن رأيه وبيتهيألى النتيجة واضحة تماما من ردودهم بعد كدا ..

ثالثا : بقى ودا من باب العلم بالشيء فقط أن الزميل للأسف تمادى فى أسلوبه حتى تم وضع مداخلاته رهن مراجعة من الإدارة قبل النشر ..

أخيرا وليس آخرا .. أنا يا شعنونة قد لا أشاركك فى الموضوعات التى تكتبينها .. لكنى أقرأها كلها ومتابعها أولا بأول .. وأنا من هذا الكلام بس كنت عايز أثبت لك أنك لا تقلين إهمية بالنسبة لى عن أهميتك واخترامك لدى باقى الزملاء ..

ما تزعليش وحقك عليا .. والله العظيم يا ستى حقك عليا .. ودا اعتبريه تفسير واعتذار من الإدارة .. لأننا فعلا بنعتز بيكى وبنحترمك et:( B) :D

لسه بقى تفسير الأعضاء :D

[بنت شعنونة]

اول ما قريت كلامك...

جالي انطباع واحد يا عصام

انك بتهدي النفوووووووووووووووووس rs: cr((: smk:

بس مين قال اني مش زعلانة من الأعضاء

زدا اللي كتبته هناك انه ما حدش رد غيبتي :P

عموما لينا رب اسمه الكريم

انا ها اسيب المنتدىىىىىىىىىىىىىىى وامشششششششششششييييييييييييي vmp:

[مهيب]

"جو لزج ... وكآبة عامة تتخلل خيوط قميصك .. بل وروحك ذاتها .. كيف تواجه العالم بروح مبللة بالعرق ... "

بيضايقنى الصيف ... بسماجته و لزوجته ... بيضايقنى بهواه و روحه ... بالألوان الغريبة اللى الحاجات بدأت تكتسبها .. مش عارف ليه .. يمكن علشان الصيف واضح زيادة عن اللزوم ... يمكن لأن مفيهوش غموض و شاعرية الشتا ... الناس كلها بتحب الصيف ... يمكن علشان بيفكرهم بالأجازة .. أو بالمصيف ... لكن أنا الصيف بيخنقنى ... بقاله يومين عمال يتقدم ببطء ... بثقة ... بثقل دم ...

وداعا يا شتائى الحبيب ...

[عصام]

ياااااااااا شعنونة

يااااااااااااا شعنونة

هوا انتى بتتلكى؟ :P

والله المسألة مش مسالة اهدى النفوس .. كنت باهزر والله لكن مشكلة النت ان تعبير وشك وانت بتكتب ما بيوصلش للى بيقرا ..

حقك عليا ما تزعليش لو كنتى فهمنتينى غلط ..

المسألة ما تستاهلش كل دا .. حاولى تاخديها لوحدها بمعزل عن أى مؤثرات أو ضغوط خارجية..

يعنى من مداخلتى كلها ما خدتيش غير جزء واحد .. طيب فين الباقى؟

روقى كدا واهدى عشان المسألة بسيطة وانتهت خلاص ..

كلمة بقى أخيرة بالمرة .. بخصوص الأعضاء مش المفروض تزعلى منهم لأنهم هما مش هما .. واخدالى بالك؟

rs:

[وليد صفوت]

ياااه ؟؟

كل ده عشان الموضوع ده ؟

طب انا أسف جدا يا شانا ......

اسف بجد .......

بس العملية مش قفش بالمنظر ده يا شعنونة !

عموماً اعتذر عن انى مارديتش غيبتك ...

سلام :P

[ابو خليل]

ايوة فيه حاجة مضايقاني جدا !!

فشلت في التعامل مع الأخوة المصريين !

ومفيش داعي نتكلم في التفاصيل علشا سي السيد بيزعل مني لما (اعمم ) صفات المصريين علي بعض الأشخاص .

ودعنا نأخذ الأمور من ناحية الشخصية وليست الجنسية ..

فأغلبهم يناقضوني في التفكير من ناحية الحقد الموجود بينهم علي بعضهم ..

وكثرة النميمة والغيبة .. ( الواحد يقعد مع الثاني ويقول فيه شعر .. يا حبيب ، يا مهون عليه الغربة .. ,لما يمشي يلعن اهله وبلده وعيلته !!!)

والتناحر علي الفلوس ..

واهمال الصلاة

والإقتراض الدائم ، ثم المماطلة لشهور !!

والكذب والمبالغة والهجس (" مثل انا عندي في بلدنا خمسين فدان" .. طيب ايه اللي جابك هنا لما انت في مصر مليونير ) !!

وأنا عيبي اني صريح ..وأقول الحق قدام كل واحد ..

وعلشان كده خسرتهم كلهم ..

اصحابي بيقولولي .. كبر دماغك وساير الأمور وخذ كل واحد علي قد عقله ..

سهل قوي اني اكون زيهم بس انا مش قادر !!

والحل ؟؟

[Katamando]

أبو خليل

في الغربة تجتمع مع ناس تختلف وتتباين تركيباتهم الاجتماعية وذلك لأنهم أتوا من أماكن وبيئات اجتماعية وخلفيات مختلفة ومتباينة وقد تكون متضاضة

فإذا وضعت هذه الفكرة أمامك قد ترتاح

بالإضافة أن بعض الشخصيات المريضة و النفوس الضعيفة تتأثر سلوكياً بسبب المادة وربنا يعينك عليهم.

كتاماندو متغرب سابق

[se_ Elsyed]

والحل ؟؟

إطلع لي من ورا الترابيزة علشان اعرف اكلمك

الحل الوحيد والفعال هو إنك تدور لك على جنسية تانية وتقدم عليها ... بنجلاديشي مثلاً أو كوالامبوري ...

تعرف يابو خليل إنت بكلامك ده عامل زي إيه ؟..

زي اللي مش قادر يتجوز لأي ظروف بقى مادية ولا نفسية ... فبيحاول يطلع القطط الفاطسة في البنات والجنس اللطيف وفي العيش والعيشه واللي عايشينها ..

كذلك إنت وانا هاقولك الحقيقة المُره التي قد تكون صحيحة وقد تكون غير ذلك ...

وهي إن ليه العيب ما يبقاش فيك إنت ؟...

يعني هما اللي مش عارفين يتأقلموا معاك مش إنت اللي مش عارف تتأقلم معاهم ( طبق طبقنا طبق على طبقكم )

يا عم ما هي الدنيا حوالينا مليانه مصريين زي الفُل والواحد بيفتخر إنه يعرفهم ويجلس معهم ويتشرف بهم ... يبقى إيه مشكلتك إنت ؟

هل في ترزي بيفصلك مصريين فيهم عِبر الدنيا مخصوص عشانك ؟

ولا انت ماشي بمبدأ قليل البخت يلاقي العضم في الجبنه وما بيقعش في طريقك غير الأشرار ؟

يابو خليل كن جميلاً ترى الوجود جميلاً ..

والتناحر علي الفلوس ..

واهمال الصلاة

والإقتراض الدائم ، ثم المماطلة لشهور !!

والكذب والمبالغة والهجس

مش قولت لك ... هو الترزي ...

اصحابي بيقولولي .. كبر دماغك وساير الأمور وخذ كل واحد علي قد عقله

عين العقل ... يعني عاملهم في حدود العلاقة التي تربطك بهم فقط

يعني لو علاقة زمالة عمل ... يبقى علاقتك بهؤلاء تنتهي بنهاية ساعات العمل ..

لو علاقة صداقة يبقى إتحمل وإشرب بقى لإنك إنت اخترته صديق ولم يُفرض عليك ..

لو علاقة زواج يبقى طلقها وإرمي لها مؤخر الصداق والنفقة cr((:

اعمل لك يا أخي ما أنت محسسني إنك عايش في غابة مليئة بالوحوش الكاسرة ...

[mb14]

عزيزى ابو خليل

ممكن تكون مشكلتك مع المصريين بسيطة قوى والسبب واضح انك كنت (منطوى) قبل ما تسافر للخارج يعنى اية كانت تعاملاتك بسيطة جدا فى مصر فى حدود الأسرة والأصدقاء ومش كل الزملاء طبعا فى الجامعة وواضح انك ما دخلتش الجيش .

وما كنتش بتعمل فى عمل حرفى لكى يعطيك فرصة للتعامل مع ناس كتير من كل الطبقات .

ببساطة كانت نفس مشكلتى انى بمجرد انى دخلت الجيش وبدأت اعيش برا بيتنا فوجئت بحاجات زى اللى انتى بتقولها لأنى كنت ضابط احتياط اتعاملت مع كل الناس وكل مستويات التعليم وغصب عنى لازم اتعامل معاهم من اول الضباط العاملين للضباط الشرف للصف ضباط والعساكر كل المؤهلات والعادة من كل مكان فى مصر طبعا كل الأطياف دى والطباع كنت بأستغرب ليها .بس كان فى حاجة واحدة مصبرانى انى كنت بأتعامل معاهم وعارف ان دى فترة مؤقته ولازم تمر وحاتعدى وما كانش مطلوب منى اتعامل معاهم كصديق .

بعد كدى فى الشغل اغلب الناس كويسة بس احيانا بتلاقى حاجة شاذه طبيعى انك بتتجنبه وخلاص يا اما هو يصلح نفسه معاك .

[Salwa]

مش بحب القلق ...

وانا انهاردة بدأت اشعر بيه .....لالا...لى 12 يوم حاسة بيه ..وبقاوح نفسى ..

.بقيت اخاف على اولادى بجنون ..يعنى حاحبسهم ؟؟

بكلم نفسى ...بكلم نفسى بصوت مسموع وبصوت بسمعه انا لوحدى ....يمكن بس صدى الصوت هو اللى بيرن جامد جوايا ..يعنى انا فاضية من جوة ؟؟؟.والا بفضى نفسى ومخى وكل شئ وبس بركز وافكر فى اولادى ؟؟؟ طيب ليه الرعب ده ؟؟

كل ده علشان اللى حصل من اتناشر يوم ؟؟ طيب ماهى جت سليمة !!...بس بقول لنفسى ولهم لابد من الحذر وارجع واقول الحذر لايمنع قدر ...

جربت كل شئ .....جربت امثل انى مش مهتمة وان حصل خير ( قدامهم يعنى )

وضبتونى ( كل ساعة اتكلم معاهم لو كانوا برة البيت ) ..اختى قالت لى سلامتك ......سلامتك انتى ...انا خايفة عليكى مش على بنتك ...هى كويسة لكن انتى خلاص طالما مسكك القلق قولى على نفسك السلام ...

اصلى كثيرا ....واحاول اعيش حياتى عادى لكن ؟؟؟ بضبط نفسى سرحانة كتير ...بنزل كتيرواشتغل كتيرواقرأ كتير ...واشوف المحاورات كتير ..وحاسة انى مش قادرة اسيطر على مشاعرى ..

يارب ..اعد لى هدوء نفسى ..

وامنحنى ايمان اعمق ..

رسبت فى اختبار صغير ...

انا انسان ....انا ام.

[Sherief AbdelWahab]

بدأت الآن فقط أشعر بمعاناة الإنسان الحساس ، المغضوب عليه ..

فالواضح أن الإنسان الحساس بدأ ينظر إليه في زمن أصالة وفيفي عبده ومصطفى بكري على أنه ينتمي إلى فصيلة الشمبانزي .. فهو يتكلم لغة مختلفة تماماً عن لغة الكثير من البشر .. لغة يحكمها الارتياح النفسي قبل المصالح ، ويمكن التعامل معه بالاحتواء وبالحسنى وبالتفاهم ، لا بالاستخفاف والسخرية المبالغ فيها ..

يبدو أن من "عنده دم" يعامل كما لو كان "عنده إيدز"!

الشخص الحساس يحتاج للفهم وللتفهم .. وليس للعكس كما يرى أغبياء هذا الزمن ..

خلص الكلام

[إبن مصر]

اول مره اتخانق معايا..

امبارح جلست جلسه نادرا ما تحدث .... منذ مده طويله لم امسك بقلم واجلس اتحدث معى...

و للمفلجأه وجدتنى غاضب منى الى درجه كبيره بل لقد رفضت ان استرسل فى الحديث معى كما كنا فى الماضى..

واجهتنى بما اشعر ولم اقبل اعذارى الى الى قدمتها الى .....

حاولت ان ابرر لى كثيرا من الاخفاقات والمواقف التى لم اتنبه فيها الى انى قد جرحتنى بلا قصد..

اعترفت بالخطأ ولكن هذا لم يشفع لى عندى..

وتركتنى وذهبت ...... ساحاول مجددا فى وقت اخر ربما اقبل ان اسامحنى وابدأ صفحه جديده معى.....

[se_ Elsyed]

الشخص الحساس يحتاج للفهم وللتفهم .. وليس للعكس كما يرى أغبياء هذا الزمن ..

للكاتب الكبير - في السن - س س كلمة مأثورة يقول فيها " الإنسان هو المُطالب بأن يتكيف مع المجتمع ... وليس العكس "

سواءً كان حساس ولا حشاش فلابد له ان يحاول التكيف مع الآخرين ولا يضع نفسه في كفه والمجتمع في كفه آخرى على أساس إنهم مش قادرين يفهموه وهو الوحيد اللي حساس والباقي لأ ...

فمن هنا يا عزيز تأتي الأمراض النفسية والإكتئاب والإستبحس .