فيه ايه مضايقك؟ فضفض

[إبن مصر]

سبحان الله مافيش حد ابدا راضى بالى هو فيه ..

يا ابويوسف احمد ربنا امال تعمل ايه لو حصلك الى بيحصلى ..

انا بنت مصر كل 25 دقيقه تتصل بيا على المحمول وبغض النظر انا بابقى بعمل ايه او مع مين او فين او مدى اهميه ما اقوم به ليدور الحديث التالى :

-الو ..

-ايوه يا ماما .. معلش اصلى فى اجتماع دلوقتى ( باقولها بصوت واطى قوى وانا بابعد عنيا عن البشوات الى امامى )

-طيب يا حبيبى المهم .. ضربوا بغداد بالعنقودى العيال بتموت وانت قاعد تجتمع معاهم !!!!!!!! ماشى ماشى .

-يا ماما حقك عليا .. حد من العيال حصله حاجه ؟؟

-باقولك البصرهبتضرب بالمدفعيه الثقيله ووقعوا طيارتين اباتشى !!

-طيب ممكن نكمل بعدين ..

-اوكى اوكى بس افتكر تطبع لى معاك ال CNN كاتبه ايه علشان الكمبيوتر الى فى البيت هنج ..لا اله الا الله

-محمد رسول الله .. سورى يا جماعه ..كن بنقول ايه .

ترن ترن

وزى ما نت شايف كل نص ساعه لحد ما اروح ..

انا باسأل ونفسى هى تقولى طنط فلانه وعلانه .. انما الاقى وليد العمرى بيكلمنى .. اسأل عن الاولاد تقولى بغداد..

اسأل عن طنط كريمه تقولى ما عنديش عزيمه

اقولها اتعشى .. تقولى تعالى نتمشى ونتكلم ..

الحمد لله على كل شىء .. واهى ها تقرا كلامى واستر يا رب لما ارجع البيت ..

ابن مصر

[بنت مصر]

:twisted: :twisted:

ماشى ..

المفروض ان الانسان ينفصل عن واقعه علشان يبقى كويس؟

طب مانت وكل الرجاله طول اليوم فى الشغل بتكلم ده وتقرا ده تخش على النت تعرف الاخبار

تتكلم فيها تخش هنا تروح هناك.

واحنا طول اليوم فى البيت بنجاهد برضه مش معنى كلامى الاعتراض بس فى حدود المتاح نتابع القضايا الهامه الى بتشلنا كلنا والا بغداد فجأه بقت فى موزمبيق وكفايه الى انت عرفته فى الشغل؟

ثم هو لو حسينا بانكم تعابنين طول اليوم فى العمل واردنا ان نغير من حده الضغط عليكم بعدم الكلام فيما يثركم بقينا خلاص نمطيين واعتياديين

ثم هو انا بكلمك كل 25 دقيقه برضه؟

ماشى لما تروح

:D :cry: :cry: :oops: بهزر ياحبيبى

[ابو يوسف]

و الله يا ابن مصر انت ابن حلال ...

لانك مسيت وتر حساس جداً ...

طبعا انت عارف الواحد مننا فى الشغل بيبقى مودو ازاى

و ازاى ان مشاكل الشغل بتبقى هى اللى مسيطرة على كل عقله ... و تلاقى فجأة - و انت غرقان فى معمعة الشغل - السؤال الفلكوروى الشهير ...:

- تحب تاكل ايه النهاردة ؟؟

- يا ماما أى حاجة ... انا مشغول جداً ..

- يعنى اى حاجة ايه ...؟

- يا روحى اعملى اى حاجة و انا راضى بس سيبينى اكمل شغلى ..

- حاضر يا حبيبى ما تنرفزش نفسك !!!! مع السلامة

و بعد 5 دقايق ....

- الو ... ايوة يا ماما خير ؟؟؟

- انا ح اعمل سمك ... ايه رأيك ؟؟

- يا ماما اعملى أى حاجة ....... اى حاجة و سيبينى اشتغل ..

- حاضر ...حاضر ... يعنى انا غلطانة انى عاوزة اعمل حاجة انت بتحبها . انا عارفة انك بتحب السمك ..

- معلش يا روحى انا اسف ...اعملى سمك . ممكن بقى ... تسيبينى اكمل شغل ...

و هكذا دواليك ...

ده غير التليفون اللى قبل ما اتحرك من الشغل و فيه لستة الطلبات ..

الغريب انى اروح بعد كل ده الاقى فراخ مش سمك !!!!!! :? :?

-

[Salwa]

التمسوا الاعذار للناس الطيبة.

مش يمكن البحر كان قافل؟

والا محل معدات الصيد قافل...حايشتروا سنارة منين؟

أكيد مكانش فيه كمون وثوم...

طيب الحمدلله أن الناس بتتصرف....هو انتم مايعجبكوش العجب.؟

آدى آخرتها.

خير تعمل...شر تلقى.

بطلوا تلاكيك...ده انتم فى نعمه.

والله نعمه

.سلامى.

[crossfield]

الحمد لله و شهد شاهد من أهلها ؛ أهو الرجالة اللى مبيعجبهاش العجب دى هيه اللى محببااااااااااااااااااااانى مووووووووووت فى الرجل المصرى :twisted: :twisted: :twisted: :twisted: :twisted: طيب ايه الحال بقى لو روحت و ملقتش أكل أصلاً . البطر وحش احمدوا ربنا الستات برة بتعامل اجوازها واحدة بواحدة و أعلى ما فى خيله يركبه و كليو تحكيلكوا موقف حصل قدام عنيها.يا ناسسسسسسسسسسسسس مين ينصف الزوجة المصرية؟؟؟؟؟؟ :?

[ابو يوسف]

يعنى يا كروس فيلد ....

مافيش وسط ؟؟؟؟؟

مافيش عقل ...

مافيش مخ ....

مافيش ساندوتش كبدة ؟؟؟ :lol: :lol: :lol:

[الطفشان]

يا ست كروسفيلد

الست في الغرب حاطة راسها براس الراجل لانها متوقعة انها تتعامل زيه

- يعني تشتغل (مش فاكر مين اللي قالت "مين اللي قال الستات تشتغل؟")

- و تصرف على البيت زيها زيه

- و تعمل المشاوير و الشوبنج و تودي العيال للهوايات

- و لو بطل هو شغل تبقى هي المورد الوحيد

- و ممكن يقعد في البيت نهائي ياخذ باله من العيال و يغسل و يطبخ و ينظف (عندي اثنين زميلات في العمل من العينة دي، واحد ساب شغله من سنة و نص، و مش بيدور، و بيودي العيال حضانة كمان، و هي تدفع! و هو بيسرح مع صحابه، و الثانية بتقول على جوزها House husband زوج منزلي من غير أي مشاكل!)

توزيع الادوار اللي عندنا في اضمحلال هنا

[crossfield]

يعنى يا كروس فيلد .... 

مافيش وسط ؟؟؟؟؟

مافيش عقل ...

مافيش مخ ....

مافيش ساندوتش كبدة ؟؟؟ :D  :D  :D

:lol: :lol: :lol:

:lol: :lol: :lol:

أخ أبو يوسف : أكيد طبعاً فيه عقل لكن حضرتك اللى مش عايز أو يمكن مش عارف توصل له ؛بس بجد أنا حبيت المدام بتاعة حضرتك من غير ما أشوفها :) .

يا ست كروسفيلد

الست في الغرب حاطة راسها براس الراجل لانها متوقعة انها تتعامل زيه

- يعني تشتغل (مش فاكر مين اللي قالت "مين اللي قال الستات تشتغل؟")

- و تصرف على البيت زيها زيه

- و تعمل المشاوير و الشوبنج و تودي العيال للهوايات

- و لو بطل هو شغل تبقى هي المورد الوحيد

- و ممكن يقعد في البيت نهائي ياخذ باله من العيال و يغسل و يطبخ و ينظف (عندي اثنين زميلات في العمل من العينة دي، واحد ساب شغله من سنة و نص، و مش بيدور، و بيودي العيال حضانة كمان، و هي تدفع! و هو بيسرح مع صحابه، و الثانية بتقول على جوزها House husband زوج منزلي من غير أي مشاكل!)

توزيع الادوار اللي عندنا في اضمحلال هنا

طيب يا أستاذ طفشان حضرتك دلوقتى عايش برة من امته؟ أنا أعتقد ان بقالك فترة طويييييييلة فى الخارج . الست المصرية دلوقتى بتشيل أعباء أكتر بكتيييييير قوى من أعباء الرجل لأنها بتشتغل زيه برضو و يمكن شغلها يكون مرهق أكتر من شغله و فى نفس الوقت مسئولة عن الأولاد و مذاكرتهم و تنظيف البيت و الأكل ده غير المجاملات الاجتماعية اللى أغلب الرجال مبيشغلوش بالهم بيها . الست المصرية هيه أساس البيت و الدليل على كده شوف حضرتك فيه كام ست مصرية مطلقة أو أرملة و بتربى أولادها و البيه ممكن يكون مسافر أو متجوز واحدة تانية أو مش فى دماغه الأسرة أصلاً. أنا فى كل النماذج اللى شفتها فى حياتى( الأسرة؛ الأقارب؛ الأصدقاء؛ الجيران) الزوجة هيه اللى شايلة العبء الأكبر و مع ذلك مش عاجب . و فيه ستات برضو هنا بيشتغلوا و بيصرفوا على أزواجهم .يعنى لو هنتكلم على مبدأ الراس بالراس يبقى الست المصرية و محدش يزعل منى فى أوقات كتير قوى بتبقى بميت راجل وممكن تعيش من غير راجل أصلاً بس المجتمع مش هيسيبها فى حالها .

صحيح فى الغرب فيه توزيع أدوار بشكل أفضل لكن هل لان توزيع الأدوار فى أغلب البيوت المصرية غير منصف بالمرة للمرأة و بيبقى على حساب صحتها و أعصابها يبقى معنى كده ان الرجل المصرى يستمر فى انه ميقدرش الضغوط اللى عليها و تبقى نظرته لأى حاجة هيه بتعملها نظرة تحقيرية أو يعتبرها تحصيل حاصل؟؟؟؟؟؟؟؟؟؟ أنا أؤمن تماماً بإن مسئولية المرأة الأولى زوجهاو بيتها و أولادها و ما عدا ذلك يمكن -ان اضطرت إلى ذلك- التخلى عنه؛ لكن أنا باتكلم عن أغلب البيوت المصرية اللى فيها راجل و فيها ست مطلوب منها انها تبقى ست و راجل فى نفس الوقت .

معلش عندى سؤال : الرجل المصرى بيعمل ايه فى حياته غير انه بيشتغل؟؟؟؟؟؟؟؟؟؟؟

و عشان كلامى ميتفهمش غلط أنا مش نوال السعداوى و لا بأقول ان مفيش قوامة ولا ان الست لازم تبقى راسها براس جوزها. كل ما أطلبه هو العدل .

[الطفشان]

شوفي يا ستي

الراجل اللي يخللي مراته تشتغل و بعدين عليها عبء البيت كله يبقى مش منصف

انا باتكلم عن واحدة ما بتشتغلش

انا اعرف مآسي في مصر

يعني واحدة بتشتغل و جوزها بيقعد على القهوة مع صحابه

و عايز يتجوز عليها كمان!!!

دة طبعا استثناء و مش الغالب

اما النظرة التحقيرية اللي بتقولي عليها، فتخميني انها نظرة ان عمل المرأة فيه طعن في رجولته، فما زال هو يريد ان يكون راجل البيت

لو مش محتاجة، يبقى ليه اصلا؟

في جزء من عمل الستات في مصر (و هنا برضه) اجتماعي

يعني عايزة تحس بقيمة نفسها، و تقضي وقت، و تتسلى

مش فلوس بس

معلش عندى سؤال : الرجل المصرى بيعمل ايه فى حياته غير انه بيشتغل؟؟؟؟؟؟؟؟؟؟؟

اظن الاجابة في موضوع الويك اند المصري

و الخلاصة اننا شعب لا يعرف ان يستمتع بالحياة

و الرد: هي الست بتعمل ايه غير البيت؟ نفس الشئ

[se_ Elsyed]

أبو يوسف كتب

-

تحب تاكل ايه النهاردة ؟؟

- يا ماما أى حاجة ... انا مشغول جداً ..

- يعنى اى حاجة ايه ...؟

- يا روحى اعملى اى حاجة و انا راضى بس سيبينى اكمل شغلى ..

- حاضر يا حبيبى ما تنرفزش نفسك !!!! مع السلامة 

و بعد 5 دقايق ....

- الو ... ايوة يا ماما خير ؟؟؟

- انا ح اعمل سمك ... ايه رأيك ؟؟

- يا ماما اعملى أى حاجة ....... اى حاجة و سيبينى اشتغل ..

- حاضر ...حاضر ... يعنى انا غلطانة انى عاوزة اعمل حاجة انت بتحبها . انا عارفة انك بتحب السمك ..

- معلش يا روحى انا اسف ...اعملى سمك . ممكن بقى ... تسيبينى اكمل شغل ...

و هكذا دواليك ...

ده غير التليفون اللى قبل ما اتحرك من الشغل و فيه لستة الطلبات .. 

الغريب انى اروح بعد كل ده الاقى فراخ مش سمك !!!!!!  :?  :?

- حبيب قلبي يابو يوسف ... تعالى اما أبوسك ، أنت كده طمنتينا إن مش أنا بس اللى بأعاني من المشكلة دي .... أحمدك يارب .

على فكره ، أنا شكلي بأتعرض لمؤامرة لأن والدتي كانت بتعمل معايا كده بالظبط أيام العزوبية ، وأكون مبرمج نفسي على السمك أروح الاقي سبانخ :mad:

وأنا حلاً للمشكلة دي أتفاهمت مع زوجتي وقولتلها أطبخي أي حاجة تخطر على بالك طالما سخنة وفي طبق ... تبقى هاتتاكل هاتتاكل... ولا حول ولا قوة إلا بالله والنصر لنا :lol:

[إبن مصر]

:twisted:  :twisted: 

ماشى ..

ثم هو انا بكلمك كل 25 دقيقه برضه؟

ماشى لما تروح

:oops:  :D  :D  :D بهزر ياحبيبى

دا انتم طلعتم عيال بشكل ؟؟؟ ما فيش واحد يسال عليا او يطمن بعد المصيبه الى حطتونى فيها :lol: :lol:

كله منك يا ابو يوسف ..ز

ماله لما تتصل بيك هه.. وفيها ايه لما تسالك على الاكل ....

ناس مايعجبهاش العجب .

وعلى رأى سى السيد .... النصر لنا ... ان شاء الله ..

انا نفسى يا ابويوسف اتسأل الاسئله دى والله ... والله

حصل خير .....

[ابو يوسف]

كلنا لها يا ابن مصر ......

:lol: :lol: :oops: :D :D :D

[بنت شعنونة]

كنت سبباا في حزن اغلى الناس الى قلبي اليوم :(

بسبب خطأ غير مقصود...

نظرات العتاب من اخواتي تحاصرني

وضميري يكاد يقتلني

ولا استطيع ان اقول سامحني :(

اففففففففففففف

انا اغبى انساااااااانة على الكوكببببببببب :(

[الطفشان]

ليه بس يا شعنونة

عملتي ايه تاني........

زعلتي بابا؟

اتكلمتي في السياسة تاني؟

و الا اكتئاب تاني و خلاص؟

[بنت شعنونة]

في اخر انفجاراتي النفسية ومحاولاتي الأنتحارية

ويأسي التام ان اصبح طبيبة وانه لو انطبقت السما على الأرض لا اريد ان اككون طبيبة فانا اكره هذه المهنة من كل قلبي ولا استطيع تحمل مسؤوليتها

وفي وصلة من البكاء لآكثر من 3 ساعات مع والدي وهوا يحاول ان يقنعني باني غير فاشلة

وانه البنت اللي كانت ناجحة لمدة 18 سنة و الأولى على فصلها طول هذه المدة

استحالة يكون الفشل لها طبع

وانا اقنعه ان البنت اللي ضيعت من عمرها 8 سنين لحد دلوقتي ما عرفش ضاعت ازاي ومعلوماتي منهم عن الطب زي معلومات اي قاريء للجرايد..:(

اكيد اكون فاشلة

حاولت الاقي في ال 3 سنين الأخيرة اي عمل اخر ممكن "احبه"

لكن مافيش

جربت الف حاجا وحاجا

ودلوقت بدور في كل حاجا على حاجا اكون بحبها

مش لاقيا

قلتلهم انا مش عاوزا اعمل مشروع... عشان ما عنديش استعداد ارهق والدي ماديا اكتر من كدا

عاوزا اعمل شغل يجيبلي عائد اصرف بيه على نفسي

هوا دا هدفي دلوقتي

انه اجيب فلوس اصرف بيها على نفسي من غير ما اعتمد على حد

ماعنديش استعداد ادرس حاجا لآني تشبعت من الكتب

حتى دراسة كمبيوتر لا

انتساب لفنون قسم ديكور لا

عاوزا انطلق من مطرح ما انا

ف قدرتي كا انسانة على البداية بعد 8 سنين ضغط نفسي في كلية لا اقبلها ومع ناس لا احبهم صعبببببببة اوييييي

اعترف الأن امام نفسي قبل الجميع

ودموع القهر تملؤني

اني فاشلة

وان كل اللي اقل مني نجحوا واحسن مني حتى لو بيكرهوا المادة دي

اتمنى الموت

اتمننننننننننننىىىىى الموووووووت

من كل قلبي بتمنى الكوووووووت

لكن

لو ربنا سالني عملتي ايه في 8 سنين دول

مش هلاقي حاجا

اقولها

اااااااااااااااااااااااااااااااه

:(

[Set_Amina]

النجاح والفشل أشياء نسبية جدا ياشعنونة، وقد يكون ما يراه انسان فشلا في حياته هو قمة النجاح في حياة آخرين كثيرين، عموما كونك ابنة عطوفة ومطيعة فده في حد ذاته نجاح حتى وان لم يكن نجاح في حياتك العملية فهو نجاح في حياتك الاسرية، كفاية حب الناس ليكي وحبك ليهم وده برضه نجاح كبير، كفاية حبك للخالق وخوفك منه وحبه ليكي بدليل حاجات حلوة كتير في حياتك وده اسمى نجاح، تفائلي ياشقيقتي وربنا سيزيدك باذن الله

[Lancelot]

شعنونة ... أنا بأجي المنتدي مخصوص علشان أهرب من مشكلتي الأزلية ... تقومي إنتي تفكرني بيها ... :? :?

أنا طالب في كهربا هندسة حلوان .... و بأكره الكهربا مووووووووت ... لأني ببساطة لا أفهم فيها شئ ... و أنا طول عمري – والحمد لله – معروف عني إني بأفهمها و هي طايرة .. صحيح ذاكرتي ضعيفة و بأنسي اللي أنا فهمته بسرعة لكني قادر علي إستيعاب أي موضوع في أي حاجة ..... لحد لما جت الكهربا و أثبتت إن لكل قاعدة إستثناء ... و الكهربا هي الإستثناء .... مش فاهم أي حاجة .. رغم إن زملائي فاهمين إلا أنا أقف متيس أمام الكهربا و قواعدها و قوانينها ... :w:

لحد كده مشكلتنا واحدة .. إلا إني في موقف أكثر بؤسا . :( :( .. فأنا عارف أنا عايز إيه .. و كويس فيه كمان ... لكن نظام التعليم مشكورا تكفل بالإطاحة بأحلامي في الإلتحاق بكلية الحاسبات و المعلومات حتي أصل إلي مرادي في أن أصبح مطور برمجيات .... و إستسلمت للواقع قليلا و حاولت مع الكهربا مرة و إتنين ... لكن النتيجة Big Zero.... :(

في الإجتماع الأخير مع الأعضاء الكرام ... تعرضنا لهذا الموضوع بسرعة أنا و هشام عبد الوهاب و إبن مصر .... إبن مصر – مشكورا – تقدم بالنصيحة "حب ما تعمل .. تعمل ما تحب" ... لكني – و أنا أسف علي كده – مش مقتنع ... مش قادر أقتنع .... لأن العمل بالنصيحة صعب جدا ... خاصة و أنا مزجانجي جدا .. يعني لازم أكون في حالة مزاجية جيدة علشان أظهر بمستواي الحقيقي و أقدم اللي أقدر أقدمه ...

مش عارف أعمل إيه ... أطنش و أتخلي عن أمالي اللي أقدر بيها إني أحقق نفسي و أستسلم للأمر الواقع و أمشي حالي و خلاص ... و لا أستمر متمسك بالأمل في إني أحقق اللي أنا عايزه ... مش عارف ... أنا تعبت خالص من الموضوع ده ...

المعذب

ل.ا.ن.س.ل.و.ت

أنا مش بأحب أشكي حاجة لحد لكن إنتوا فعلا جرجرتوني في الكلام ...

[بنت شعنونة]

ست امينة

الفشل شيء نسبي لو بقارن نفسي بغيري

انما لو بقارن نفسي بنفسي يبقى ثوابت :(..

لانسولت..

اتعظ مني يا ابني

حتى لا تكره نفسك كما اكرهها انا وانت تعرف انك افضل بمليون مرة مما تبدو عليه

حتى لاتشعر بالاكتئاب اكتر مع كل سنة تمر من عمرك بدون تحقيق خطوة واحدا للامام

حتى لا تنظر حولك فترى الشعب المتخلف ككالقطيع ماشي وشكله ناجح بينما هوا في لحقيقة نجح في التكيف بس والتبلد

حتى لا تحاول ان تنتحر كل مرة تفتح وتشوف فيها نفسك واقفا فين وبتعمل ايه :(

لانسلوت

ولع في الدنيا كلها المهم تعمل للي انت بتحبه وبس

واحمد ربنا الففففف مرة انك بتحب حاجا

انا بتمنى احب شغلة واحدا ان شالله زبالة

بس احبها واتمناها :(

اتعظ مني..

[Lancelot]

ست امينة

الفشل شيء نسبي لو بقارن نفسي بغيري

انما لو بقارن نفسي بنفسي يبقى ثوابت :(..

لانسولت..

اتعظ مني يا ابني

حتى لا تكره نفسك كما اكرهها انا وانت تعرف انك افضل بمليون مرة مما تبدو عليه

حتى لاتشعر بالاكتئاب اكتر مع كل سنة تمر من عمرك بدون تحقيق خطوة واحدا للامام

حتى لا تنظر حولك فترى الشعب المتخلف ككالقطيع ماشي وشكله ناجح بينما هوا في لحقيقة نجح في التكيف بس والتبلد

حتى لا تحاول ان تنتحر كل مرة تفتح وتشوف فيها نفسك واقفا فين وبتعمل ايه :(

لانسلوت

ولع في الدنيا كلها المهم تعمل للي انت بتحبه وبس

واحمد ربنا الففففف مرة انك بتحب حاجا

انا بتمنى احب شغلة واحدا ان شالله زبالة

بس احبها واتمناها :(

اتعظ مني..

عارفة .. لما بأسأل حد أعمل إيه .. بأكون محتار أنا عايزه يقولي أني إجابة ... أعمل اللي أنا عايزه ... أكيد هأفرح بالإجابة ديه لأنها أسهل ... و لا أكمل في اللي بأعمله و أتكيف ... يبقي هو بيحسبها بالقل و بس و هو ده المظبوط تقريبا ... بأكون محتار فعلا ... لكن أنا دلوقتي فرحان بإجابتك يا شعنونة ... أنا هأولع في الدنيا ... و بأحمد و هأحمد ربنا دايما علي كل حاجة إدهاني ... شعنونة شكرا ...

لكن إسمحي لي أخد دور الواعظ شوية ... شوفي حاجة واحدة عارفها و متأكد منها أوي ... هي إن كل واحد عنده special gift موهبة خاصة مش عند حد تاني بنفس الجودة و الكمية .. مهما كان الإنسان ده ناجح أو فاشل .. عنده الموهبة ديه ... إذن فالنجاح أو الفشل يبدأ في التعرف علي الموهبة ديه و إستثمارها علي أكمل وجه ...

لازم تتدوري يا شعنونة علي الموهبة ديه جواكي ... لازم يكوني عارفة إنتي عايزة إيه و قادرة علي إيه ... شوفي إنتي بتحبي إيه .. بتحبي تعملي إيه .. أحيانا الموهبة بتكون في حاجات أقل من إننا نلاحظها .. أو نعتبرها موهبة ... في ناس قادرة علي إنها تساعد ناس .. تسمع مشاكلها و تحلها ... حاجة ممكن تبان مش موهبة ... لكنها في الحقيقة كل ما يملكه هؤلاء الناس ... دوري كده يمين و شمال .. و ربنا إن شاء الله يهديك للي بتدوري عليه ... فقط never give up .... لأن يوم ما تستسلمي يوم ما تبقي فاشلة فعلا .... و طول ما تبحثي و تدوري و تتعبي يفضل فيه أمل ...

[se_ Elsyed]

لازم تتدوري يا شعنونة علي الموهبة ديه جواكي ... لازم يكوني عارفة إنتي عايزة إيه و قادرة علي إيه ... شوفي إنتي بتحبي إيه .. بتحبي تعملي إيه .. أحيانا الموهبة بتكون في حاجات أقل من إننا نلاحظها .. أو نعتبرها موهبة ... في ناس قادرة علي إنها تساعد ناس .. تسمع مشاكلها و تحلها ... حاجة ممكن تبان مش موهبة ... لكنها في الحقيقة كل ما يملكه هؤلاء الناس ... دوري كده يمين و شمال .. و ربنا إن شاء الله يهديك للي بتدوري عليه ... فقط never give up .... لأن يوم ما تستسلمي يوم ما تبقي فاشلة فعلا .... و طول ما تبحثي و تدوري و تتعبي يفضل فيه أمل

أسمحيلي يا شنشن أكمل على كلام الراجل الكبارة العاقل لانسلوت ده وأقولك أن فعلاً مش شرط علشان يبقى الأنسان ناجح أنه يشتغل فى مجال دراسته بالعكس فيه نماذج ناجحة جداً جداً فى الحياه فى غير مجال دراستها ، وده علشان هو قدر يكتشف مواهبه ويسخرها فى المجال اللى هو بيحبه .

وممكن كل واحد مننا هنا فى المنتدى يحكي عن تجربته الشخصية بحلوها ومرها علشان تشوفي أمثلة حية قدامك ، انا عن نفسي درست المحاسبة 4 سنين لكن كنت حاسس أنى هابقى محاسب فاشل ولما جيت أشتغل أتخصصت فى الهيومن ريسورسيس والحمد لله لقيت نفسي فيها لأن عندي مواهب إدارية وقيادية .

أنتِ برضوا عندنا أحساس من كلامك أن عندك طاقات ومواهب متفجرة لو وجهتيها صح هاتكسري الدنيا ومش بالضروري تكون فى مجال الطب .

وكلمة لأونكل أبو شعنونة .... خلاص يا عمو ماتضغطش علي شنشن وسيبها تشتغل اللى هي عايزاه  علشان تبقى بعد كده متحملة لنتيجة أى قرار تأخذه.  :lol: