فى السنة الجديدة .. عايز إيه لمصر

[الحاج فوزى]

كنت أنوى كتابة مداخلة جادة رصينة تتناول العام الجديد .. وطلبات البسطاء من الحياة ..

لا يطلبون سوى الحياة الكريمة ..

حياة تتناسب مع أدمية بنى أدم

فخرجت مداخلتى كما هى الأن .. على لسان البسطاء ..

يا رب ..

سنة بيضه على الكريم سوده على اللئيم يا رب ..

يا رب ..

ما يغرق فيه غلابة على العبارات

ولايتحرق فيه غلابة فى القطارات

يا رب

لا يتغدى السمك على عاطلين فى مراكب

ولا نشوف فيه وزير ولا رئيس فى مواكب

يا رب

ما يهل علينا العام الجديد بنفس الوشوش

ولا نفطر ونتغدى خضار بالسرطان مرشوش ..

يا رب

العجوز يلاقى معاشه واصل على البيت

ولا يقول م الهم يا ريتك يا عام عليا ما جيت .

يا رب ..

ما تركب على رؤوسنا فى السنة دي جمال

وترحم الغلابة اللى شالوا فوق الإحتمال ..

يا رب ..

تسيخ اللى فى بالى سيخ سيخ

اما يبطل إحتكار أو يجيله تسليخ

يا رب

الفقير يلاقى العشا والنومه والهدمه تستره

وكل من سرق أو مص دم الغلابة.. يلاقى قطر يفرمه .

يا رب ..

لا صحفى يتحبس علشان قال الحق .

ولا خلف الأسواء يترمى واحد قال لاء .

يا رب ..

ولا عمارة تقع ولا اسمع ان حد مات ..

وتنهى بقدرتك فساد المحليات .

يا رب .

أنا خايف على بنتى من اللى جي ..

خليك جنبنا يا رب كل حي .

قولوا أمين ..

يا ترى فى السنة الجديدة .. عايز ايه لمصر ؟!

[Folana]

السلام عليكم ورحمة الله...

قلنا آمين....

ربنا يجعله عام سعيد على الجميع...الحقيقة يا استاذ حسين اجد بداخلى هاجس يؤرقنى...مش عارفة ليه شاعرة انهم لو استبدلوا الدعم العينى بالدعم النقدى...حيفتحوا باب التبرعات للمساهمة ...وتبدأ حملات لجمع التبرعات لرفع المعاناة عن الشعب...ويبقى منه له...يعنى احنا اللى بندعم باسم الحكومة..

يارب ده مايحصل...

ونقول كمان...

يامصر مظلومة من كل اللى عايشينك..

غنى ولا فقير..الكل يامصر ظالمينيك

حيلغوا الدعم ع اللقمة ويدهولنا شحاتة

وهم يامصر من دمنا شافطينها ونهبينك

ونقول يارب..

يارب يامصر ينزاح عنك همك

وتبطل الخفافيش تمص فى دمك

يارب نلاقى لنا مكان فى الزحمة

والغلابة يارب يعرفوا طعم اللحمة

وكتر يارب القمح فى مصر ودقيقها

وازرع فى قلوب الفرانيين الرحمة

يارب مايلغوا الدعم لتبقى مصيبة

بدل ما ناخده حندفعه لصالح الهليبة

ويقولوا لنا تبرعوا لاخوانكم الفقرا

ولو مادفعناش حيقولوا لنا يادى العيبة

يارب فى السنة الجديدة يتصلح المحور

بيضيع عليه عمرنا والكل زهقان و متكدر

يارب سهل على ولادى وولاد كل المصريين

مناهج دراستهم ولا يفتى لهم فيها فاتيين

يلغوا الابتدائية ولا يرجعوها ولا يعدلوا فيها

العيال تايهة وخلاص حيبقوا متخلفين

أنا بادعى يارب وخايقة ليكون الدعا ورطة

صراحة مش عارفة الحقيقة فين

ولا مين اللى حدف الزلطة

:closedeyes:

[مونتى]

امين

السلام عليكــم ورحمـة الله وبركاتــة ،،

كل ماارجوه لمصر الغاليه هو الخير والتقدم والرقى

وان ينعم الله عليها بحكام يراعون الله فيها وفى اهلها

يارب

عاشق بلدى :closedeyes:

[الحاج فوزى]

أنا بادعى يارب وخايقة ليكون الدعا ورطة

صراحة مش عارفة الحقيقة فين

ولا مين اللى حدف الزلطة

:closedeyes: :closedeyes:

الأخت الفاضلة فولانة .. ورطه ليه بس يا أفندم .. ده الدعاء الشىء الوحيد اللى باقى للناس .

بخصوص الدعم .. ألفت نظرك الكريم ، أن بالفعل لو نظرتى حولك ، ستجدى معظم الأسر المقتدرة - التى لا تزال تتمتع بما تبقى من وفاء وشهامة المصرى - تعول أسر فقيرة .. بالفعل واقع ملموس .

لذا بالفعل .. بعض الفئات تدعم فئات أخرى لصالح - مش القطط لاء - الفيلة السمان ..

الأخ الفاضل مونتى ..

تقبل الله الدعاء وجعله عام خير على مصر والمصريين يا رب .

[إيزيس]

عايزين مصر تشيل الوش الخشب اللي مخبي حقيقتها

[الحاج فوزى]

عايزين مصر تشيل الوش الخشب اللي مخبي حقيقتها

أنهى وش خشب ؟

[amani]

آمين ..آمين ..

يارب تكون سنة سعيدة..

:)

ونشوف فيها وشوش جديدة :) .. والغنى يبطل افترى ع الفقير.. ويعطى مما اعطه الله ..

والمدرسين يشتغلوا بزمة وضمير.. والناس ترجع تحب بعض ..منبقاش متحفزين ومتنمرين لبعض..

قولوا آمين :)

:)

[amrelsawy]

بالنسبة لموضوع ما اريده لمصر او اتمناه اتمنى انقاذ البؤساء من فاجعة خصخصة التأمين الصحى و ان كنت لا اعرف كيف و غول الخصخصة قد فتح فاه فعلا و بدأ فى ابتلاع البؤساء المعتادين ضحايا كل كارثة تأتى بها الحكومة و اتمنى ايقاف كارثة التحويل الوهمى المزعوم للدعم العينى لدعم نقدى خدعة اخرى طبعا يدفع ثمنها ابسط البسطاء

ارجو ان تتوقف سرقات الكبار لبعض الوقت و رفع يدهم عن الفقراء

ارجو ان يتوقف السادة الوزراء عن وصلات الاداء المتدنى فى خطابهم للشعب و نوابه طبعا انا اعنى النواب من خارج الحزب الوطنى

اتمنى ان لا اجد مئات اخرين او الاف من الشباب المسكين- الحالم بالسفر للعمل و انقاذ اسرهم من ظلمة الفقر المتقع او تكوين أسر لا يكون مصيرها التشرد المقنع و الضياع- عائدون جثثا فى توابيت

هناك الكثير اتمناه و لا اعرف هل احيا حتى يتحقق ام لا

الحقيقة اخيرا أتسائل ماذا يقصد قرنفل باشا بأن تشيل مصر الوش الخشب اللى مخبى حقيقتها و من هو ليقيم مصر اساسا

مصر أرضا و شعبا( لا حكومة) ليست لكل من يريد التسرية عن نفسه او الكلام للكلام لإفتعال العلم ببواطن الامور و بث اراء مشوهة و فى غير موضعها مصر ليست لمن يريد الطعن غدرا و التلاعب هناك قدر كافى من العابثين و الغادرين فليوفر السيد قرنفل اراؤه تلك لغير مصر

تم تعديل 3 يناير 2008 بواسطة amrelsawy

[ميزو وبس]

انا عايز حاجة واحدة بس من مصر تساعدنى ان اهاجر برة مصر والله ومش حرجعلها تانى

[الحاج فوزى]

انا عايز حاجة واحدة بس من مصر تساعدنى ان اهاجر برة مصر والله ومش حرجعلها تانى

ليه بس يا عم ميزو ..

صدقنى محدش بيقدر ما يرجعش تانى ..

وفرق كبير بين مصر .. وبينهم ..

صدقنى فرق كبير ..