يا حكومة لا تلسعيني و لا عايزة تأمينات منك

[Nina Hussien]

" أنا إتسرقت يا ناس، إتنهبت يا حكومة، إلحاقوني يا عالم" يعني أنا أفضل طول عمري أدفع تأمينات على كل مليم بخده، لأ و مش أي تأمينات، 40% من الدخل يعني أعلى من أي حتة في الدنيا، يقوم شوية عباقرة من وزارة المالية ياخدوهم، و قال إيه يستثمروهم، و يخسروا استثمارات بـ 210 مليار جنيه. ملياااار مش مليون، من فلوسي و فلوس غيري !! ليه ؟ هما كانوا بيتاجروا في قشر الفول السوداني و لا بيضاربوا في بورصة وكالة البلح !! ثم هو مال سايب مالهوش صاحب ولا إحنا كنا سرقينه. يا وقعة سودة، ده مش كده و بس، دول كمان جوزوهم لبعض !! وزارة المالية و التأمينات. طيب أروح فين و أشكيكي لمين يا حكومة؟ أكشف راسي و أكنس عليهم السيدة زينب و المرسي أبو العباس؟ و لا أمشي أهتف في الشوارع في مظاهرة غير سلمية جواز عتريس من فؤادة بااااطلللل. أقصد جواز التأمينات من وزارة المالية باااطل. أصله أشبه بزواج المغتصب من ضحيته اللي مابقاش عندها إختيار. يا الجواز يا الفضيحة و العار.

في عز قهرتي لاقيت واحد لابس جلابية بيضه مرقعة و رابط حزام أخضر على وسطه و جارر في إيده شوية عيال حالق لهم شعرهم و داهن راسهم بمرهم كبريت بيخبط على كتفي و بيسألني:

-مالك يا شابة؟ هدي أعصابك ده إنت لسة صغيرة، فلوس إيه اللي بتتكلمي عليها يا بنت إمبارح. أمال لو بقالك سنين في التأمينات زي حالاتي كنت عملتي إيه؟

-" زيك ؟! ليه؟ إنت مين يا حاج و مين العيال دي، و مالك أنت و مال التأمينات؟!! يا عم الله يساهلك"

-يا بنتي أنا موظف قطاع خاص. بس قررت أعلم العيال صنعة تنفعهم للزمن لو جرى لي حاجة. هو إنت مادريتيش؟ مش بيفكروا يغيروا نظام التأمينات و يخلوها تشمل العامل خلال حياته فقط لا غير. إنما مراته و عياله ياكلوا طوب، يشحتوا، يسرقوا، مش مشكلتهم. بس كتر خيرهم هايخففوا الأقساط. فقولت من أصيره أخد العيال أدور بيهم في الشوارع و على القهاوي بشوية سبح و بخور، أهو يتعلموا حاجة للزمن، ماحدش ضامن حاجة.

يا دي الحوسة !! و طبعا هيمرروا القانون على بتوع مجلس الشعب اللي مابيطلعش من ذمتهم غير موافقة على الفاضية و المليانة. يعني روحنا بلاش. هو مش الدستور بتاع زمان الله يمسيه بالخير قال إن أسرة المواطن مستفيدة بالمعاش لإنها أحد روافد التضامن الإجتماعي؟ و لا هما لاقوا مافيش فايدة من تعليم العيال، قالوا يشجعوا أهلهم يعلموهم صنعة. طيب بلاش دي. كان فيه زمان بنك إسمه الإستثمار القومي. فيه 90% من فلوس التأمينات. أخباره إيه؟ أوعوا يكون هرب على برة هو كمان؟! طيب أنا عندي حل يرضي جميع الأطراف. أنا عايزة القرشين بتوعي اللي دفعتهم، و يبطلوا يخصموا مني تأمينات و مش عايزة منهم بعد كده لا أبيض و لا إسود. و يا نحلة لا تلسعيني و لا عايزة عسل منك. ده أنا أحطهم تحت البلاطة كل شهر و يفضلوا قصاد عيني، و لا إني أتلطم بين ده و ده علشان أخد حقي. هو يبقى إبني على كتفي و أمشي أدور عليه ؟! دي أي شركة تأمين تستمنى إن الواحد يعمل معاها عقد.

ثم بناقص الشعب خالص. هي الحكومة عايزاه في إيه؟ ده بتاع وجع قلب و مشاكل و بس.

يعني ماوراهوش غير الهم و الغم و حرق الدم. يعني الحكومة ممكن تصدره لبلاد برة أو جوة أو حتى بلاد الواق الواق. بس لحين ذلك أنا هاقول نصيحة لوجه الله، كل واحد يلحق يعمل عيال سبوبة لإن فعلا ما حدش بقى ضامن الموت من الحياة، و لا التأمينات من الشحاتة على البوابات.