يا ريس انت الامل

[تيتو]

ذهبت مع احد اصدقائى الى مقر للحزب الوطنى لانه يريد ان يكون عضوا فى الحزب الوطنى الديمقراطى فوجدت شعر معلق على الحائط فقمت بتصويره بكاميرا الموبايل لكن للأسف الصورة لم توضح كل الابيات فهذه بعض الابيات التى استطعت نقلها من الصورة :

ياريــس

انت الامل

يا ريس إنت الأمـــل بعد الأمـــل فى الله

الشمل بيـك اكتمــل واللى اتوعد ياهناه

يا حزب مصر الوطنى يا درة فى جبين وطنى

فكرك جديد وتملى اللى يحبك ... وطنى

*****************

يا ريس الملايين الشعب مختارك

[daktara]

طيب؟!

[daktara]

على فين مودينا يا ريس

بحكومه مش قادره تسيِّس

وازاى تسيبهم يفتروا

مع إن فيه غيرهم كويس

ماشيين على خطه قعدتم ترسموها

وتقولوا حالنا بيتعدل وتروّجوها

مع إن كل الناس حتطفش م الغلا

والحاله زى الزفت.. طيب فسَّروها

فين الغلط .. يا موصلينّا للخراب

فى الشعب يمكن؟ ولا فى الحظ الهباب؟

لسه ما زلتى يا حكومه بتكدبى

ع الناس ودافنه لسه راسك فى التراب؟

يا فرحتى بالصبغه والكرافته لما

مسؤول بيدلى ع الهوا وبكل هِمّه

يحكى لنا عن حال البلد والانجازات

بعد الإله ما تولى وازاى فك غُمّه

ولا امّا يطلع لك على سهوه فى برنامج وزير

مجعوص وهات يا فشر عن حلمه الكبير

وف ظرف شهرين تلاقيه مفارقنا بفضيحه

وساعات و يبقى اللى جرى فى قعر بير

اللى علينا بندفعه من غير نَفَس

واللى عليكم ليه تملى بيتنفِس

وكأننا بقرة حكومه بتتحلب

دا مفيش فى كل الدنيا غيرنا اللى اتوكس

اللى مشَرَّف فى البلد ما بيدّه حيله

العين بصيره وايده يا ولداه قصيره

واللى يهجّ حكايته ويّاكم طويله

بتكرّهوه فى الدنيا وان كانت جميله

بدءًا بتصريح العمل بتدوخوه

وبيستلف ويكُع لما تفلسوه

غير الإهانه فى جوازات المطار

وكأنكم بالشكل ده بتكرّموه

حتى قرايبنا العرب ليهم زِبان

يلسع كما الدبور فى جلدك مهما كان

أما حقوقك فمن غير شك منسيه

مسكين يا مصرى جوه أو بره مهان

***

على فكرة دى كتبتها من زمان بس مازالت صالحة للنشر او على الاقل للرد علي الكلام اللى فوق

تم تعديل 8 يناير 2008 بواسطة daktara

[تيتو]

حلوة اوى.............