محتاج الي نصيحتكم

[البرنس]

السلام عليكم

هذه اول مشاركه اكتبها في المنتدي بعد ما تاكدت انه منتدي اكثر من ممتاز و ممكن ان الواحد يستفيد منه ويفيد الاخرين

انا شاب عمري 23 سنه خريج تجاره الاسكندريه دفعه 2006

تقريبا قدمت الcv في كل مكاتب المحاسبه في الاسكندريه (يعني عملت اللعليا)

و لحد النهارده مشتغلتش ولا حتي ليوم واحد و الاسباب مختلفه بس مش ده موضوعنا

الموضوع الي عايز رايكو فيه

جايلي فرصه عمل في الامارات (الشارقه-دبي) ك محاسب في شركه مقاولات طبيعه العمل علي الكويك بوكس

و تكاليف المقاولات هاخد فتره تدريب في الاول وبعدين ابدا العمل

في شويه اسئله ضروري محتاج اجابتها

1- ما هي التكاليف المتوقعه للسكن و الاكل والمواصلات ؟

2-ما هو الراتب المتوقع مع الاخذ في الاعتبار اني بدون خبره ؟

3-ادرس حاليا للحصول علي الزماله البريطانيه ACCA . فهل ممكن الدراسه مع العمل ام الامر مستحيل ؟

4- بالنسبه لرخصه القياده المصريه او الدوليه هل هي ساريه ؟

5- انا كنت عايش في الكويت حوالي 15 سنه الوالد كان بيشتغل مدير مالي بس بصراحه العيشه و العمل في الكويت مش اد كده فهل الامارات تختلف عن الكويت ولا الخليج كله حاجه واحده ؟

انا متاكد اني كاتب موضوعي في منتدي كل اعضائه ناس محترمين مش ممكن يبخلو علي اخوهم بالنصيحه ...

[إيزيس]

السلام عليكم و رحمة الله وبركاته سأحاول ان أجيب عل أسئلتك وأدعو لك بالتوفيق للقرار الصائب

- ما هي التكاليف المتوقعه للسكن و الاكل والمواصلات ؟

السكن في دبي أو الشارقة لا يقل عن 600 درهم شهريا في سكن مشترك مع على الأقل 6 أشخاص ( غرفة وحمام ومطبخ ) مع الأخذ في الاعتبار أن دبي أغلى أما تكاليف الأكل وخلافه على أقل تقدير 1000 درهم ولاحظ أن بعض الأعمال توفر السكن

2-ما هو الراتب المتوقع مع الاخذ في الاعتبار اني بدون خبره ؟

لا يمكن التوقع حسب الشركة وبما إنك بدون خبرة إذن شركة صغيرة وراتب لا يزيد عن 2000

3-ادرس حاليا للحصول علي الزماله البريطانيه ACCA . فهل ممكن الدراسه مع العمل ام الامر مستحيل ؟

لو العمل فترتين مستحيل

4- بالنسبه لرخصه القياده المصريه او الدوليه هل هي ساريه ؟

لا

5- انا كنت عايش في الكويت حوالي 15 سنه الوالد كان بيشتغل مدير مالي بس بصراحه العيشه و العمل في الكويت مش اد كده فهل الامارات تختلف عن الكويت ولا الخليج كله حاجه واحده

العيشة في الإمارات كويسة والناس طيبين لكن الأوضاع المادية والغلاء غير طبيعي الشارقة ممتازة في الإلتزام والهدوء النسبي عن دبي

نصيحة إذا ممكن تأخر الدراسة شوية بدون خسائر على مستقبلك وبما إنك بدون عمل مش هتخسر حاجة لو جربت يمكن ربنا يوفقك وتكون الظروف أحسن لكن لازم يكون الكلام مضمون لان القوانين حاسمة و لو هتسافر اليومين دول الجو تحفة برد شويه لكن معقول والله يوفقك للخيار السليم

[amrhoras]

اخى برنس مرحبا بيك وسطنا اخ جديد . وان شاء الله نقدر نفيدك ونستفيد منك

الصراحه مدام قرنفل كفت ووفت بس فى حاجه عاوزاضيفها

بس حاجه بسيطه

موضوع الدراسه ممكن فى اى وقت اعتقد انك بتدرس عن طريق المراسلات وتذاكر مع نفسك

نظم وقتك حتى ولو بتشتغل 12 ساعه يوميا ممكن تنظم وقتك

ان فى عمر ربنا يعطيك الصحه يارب ويبارك فى شبابك .. ده العمر الاساسى للكفاح Be or not to be تنافس مع نفسك وتقدر تواجه وتتغلب ع التعب فممكن جدا تلاقى الوقت

لو ساعتين او 4ساعات يوميا مذاكره وساعتين للاكل (3 وجبات) هيكون عندك 6 ساعات نوم اعتقد كافيين جدااا حتى انت هتنام وانت مرتاح ان مش وراك حاجه

وانشا الله ربنا يوفقك وتقدر انشا الله انت بس شوف ظروف العقد ده وهل يستحق غربه ام لا

ربنا معاك انشا الله وبصراحه مقدرش افيدك فى حاجه تانيه لان خارج الامارات خالص بس جيران mfb:

تحياتى

اخوك عمرو

[زعلان]

نصيحة ما تقبلش بمرتب اقل من 4 الاف زائد سكن خاص توفره الشركة يعني استديو بمطبخ وحمام حتى تشعر بانك انسان تستطيع الحياة او 7 الاف بدون سكن

طبعا كل ده بالاضافة الى تذكرة طيران سنوية و تأمين صحي شامل

وربنا يوفقك

اقل من كده ما تستهلش انك تغلب روحك وتتمرمط

[vipwithyou]

يا أستاذ زعلان هو لسة فى بداية حياته ومعندوش خبرة يجي له ازاى مرتب زى دة ؟

اللى بتتكلم عنه دة مرتب مدير مالى مثلا او واحد خبرة 7 سنين على الأقل

المهم

يا أخ بزنس

لازم توضح الاول العقد اللى جالك دة ظروفه ايه

وتقريباً بيكون السكن عليهم

فكام المرتب متيألى اذا 2500 ريال توافق جدا دا فى رأيي ودى حرية شخصية

بس يابنى انت لسة فى بداية حياتك وبرضوا ما تبدأهاش غلط

فقولنا ظروف العقد ايه يمكن حد يفيدك اكتر وخصوصا اللى بيعملوا فى الامارات نفسها

وانت قلت كلمة مفهمتهاش ان المعيشة فى الكويت كانت مش ولا بد ياريت تقول تقصد من ناحية ايه علشان نعرف اذا كانت تختلف فى الامارات ولا اللى مش عجبك فى الكويت دة موجود فى الدول العربية كلها ؟

كدة يعنى

شكرا واكيد هتلاقى هنا اخوات ليك كتير يساعدوك اطمئن

اخوك

تامر السيد

[إيزيس]

الجماعة على اختلاف رأيهم كلامهم كله صح لأن القرار يرجع لطبيعة شخصيتك لو بتحب تجرب أو لأ ممكن ما تكسبش فلوس لأن الرواتب مش كبيرة بالنسبة للأحوال المعيشية وبنود الإنفاق هنا كتير وتصرف وانت زي الباشا مرتاح الضمير لكن دي مشكلتنا لأن الأولاد والأسرة غير أما الشباب اللي لسة في البداية الجميلة زيك بيقضوها وبيكونوا مبسوطين و اعتبرها تجربة وخبرة يا صابت يا صابت جدا إن شاء الله وقول يارب أما فكرة ما تقبلش براتب أقل من كذا ده وضع انتهى لأن هنا آلاف بخبرات ومنتظرين أي شغل وللأسف شباب متعلم وجامعي وبيشتغل ب 1700 درهم في ظل غلاء فاحش ظروفهم كده لكن إنت لسه خفيف واللي ما يعجبكش ما تستحملوش يعني خالي من المسئوليات والضغوط وربنا يوفقك واحنا هنا في الخدمة.

[البرنس]

السلام عليكم

لا استطيع التعبير عن مدي السعاده التي اشعر بها الان بسبب اهتمامكم بالموضوع

وعلي نصائحكم الصادقه جعلها الله في ميزان حسناتكم.

بالنسبه للسكن لو ناوي اسكن لوحدي في مكان معقول ممكن يتكلف كام ؟

شركه المقاولات ملك لشخص انا طبعا معرفهوش بس الناس الي تعرفه بيقوله انو شخص كويس

عايز شخص جد يتحمل مسؤليه و يمكن الاعتماد عليه المرتب في الاول ضعيف بس لو اثبت كفائه المرتب و الامتيازات هتزيد

لدرجه ان قال ان في شغل جديد هكون مسؤل عنه انا لوحدي ؟؟؟؟ و المفروض انو يبعت الفيزا اليومين دول

طبعا قلتلهم اني زيرو خبره قالولي احنا عندنا ناس هتعلمك كل حاجه

كل ده كلام جميل

لو حسبنا الموضوع من الناحيه الماديه

معنديش حاجه اخسرها لا شغل ولا حاجه لما اروح هناك هشتغل و اتعلم الفلوس في الاول مش مشكله

المهم انها تغطي التكاليف وحتي لو زادت شويه انا هنا بدفع ب الدولار و الاسترليني عشان اتعلم و برده مش لاقي شغل كويس يعني ماديا السفر مجدي

لو حسبنا الموضوع من الناحيه الاجتماعيه

الكلام الي جاي كتير اوي هيتريقو و يقولو دا انسان مدلع ولسه عايش في دور الطفوله و في ناس كتير بتتمني الفرصه دي

بس انا هقول الي بفكر فيه وخلاص

الوالد و الوالده بعد التضحيات الي الكل عرفها و في الوقت الي هما هيحتاجو فيه ليا اسبهم و اسافر ؟؟

بصراحه انا لما ببعد عنهم بحس انهم وحشوني اوي بحس ان مفيش في الدنيا ديه حاجه تستاهل

الانسان بيعيش كام سنه عشان يعشهم بعيد عن امه و ابوه

كل سنه لما كنا بننزل اجازه الصيف وحنا مشين مسافرين تاني كنت بحس ان جدي و جدتي زعلانين وقتها كنت انا طفل ومكنش بيجي في بالي اني اكون في مكانهم في يوم من الايام بجد خايف ان الشعور ده اكرره مع امي و ابويا

انا طبعا عارف ان الكل بيحب امه و ابوه وان دي تضحيه من ضمن التضحيات

فهل العائد المتوقع يستحق تلك التضحيه ؟و السؤال ده موجه للناس اللي مره بالتجربه دي

في حاجات تانيه كتير بس دي اكتر حاجه بفكر فيها دلوقتي

انا عارف اني طولت عليكم بس خبراتكم و نصائحكم هتفرق معايا كتير

[البرنس]

السلام عليكم

اولا

بالنسبه للاستاذه قرنفل انا معاكي تماما في موضوع الحد الادني للمرتب لانه الموضوع عرض و طلب و مفيش اكتر من العماله الاسيويه خصوصا في مجال المحاسبه و المهم عندي دلوقتي الخبره لان الACCA محتاجه 3 سنوات خبره علي الاقل وزي ما حضرتك قولتي انا مش خسر حاجه لوجربت بالعكس انا هكسب خبره التعامل مع ناس جديده و انا مقدرلك اهتمامك بالموضوع و شكرا علي كلامك الجميل اللي طمني جعله الله في ميزان حسناتك

ثانيا

بالنسبه لاخي الاستاذ عمرو شكرا جدا علي كلامك الجميل و ان شاء الله ربنا يسهل و يتوفر وقت للمذاكره لانها اهم حاجه بالنسبه ليا في الفتره الحاليه

ثالثا

بالنسبه للاستاذ زعلان انا متاكد ان حضرتك بتقول الكلام ده عن تجربه و انا شخصيا شايف ان ال7 الاف غير كافيه خصوصا في ظل الغلاء بس المشكله اني بدون خبره و الشهاده اللي ناوي اخدها محتاجه الخبره دي و عشان احصل علي خبره في مكتب محترم في مصر انا الي هدفعله فلوس ف بالنسبه للفتره الحاليه ولمده سنتين 2 فقط انا عيز عمل يغطي التكاليف الاساسيه . ده راي و لو لحضرتك راي اخر يا ريت متبخلش بي عليا

رابعا

اخويا الاستاذ تامر السيد انا لسه موصلنيش عقد عمل حتي الان و الموضوع باختصار ان واحد صاحب الوالد يعمل مهندس في الامارات يعرف شخص عنده شركه مقاولات صديقه طبعا محتاج محاسبين . فاتصل المهندس واخبرني انها فرصه و طلب مني الاوراق لاستخراج الفيزا و انا مستني الفيزا . اول ما يوصلني العقد ان شاء الله هوضحه بالتفصيل

و انا متاكد من ان الاخوه في المنتدي مش هيبخلو علي اخوهم بتجاربهم او نصائحهم الغاليه

و لو في اي نقطه مهمه اخري بخلاف ما تم ذكره ارجو التكرم بذكرها

و لكم مني كل الشكر

[إيزيس]

الكلام الي جاي كتير اوي هيتريقو و يقولو دا انسان مدلع ولسه عايش في دور الطفوله و في ناس كتير بتتمني الفرصه دي

بس انا هقول الي بفكر فيه وخلاص

الوالد و الوالده بعد التضحيات الي الكل عرفها و في الوقت الي هما هيحتاجو فيه ليا اسبهم و اسافر ؟؟

بصراحه انا لما ببعد عنهم بحس انهم وحشوني اوي بحس ان مفيش في الدنيا ديه حاجه تستاهل

الانسان بيعيش كام سنه عشان يعشهم بعيد عن امه و ابوه

كل سنه لما كنا بننزل اجازه الصيف وحنا مشين مسافرين تاني كنت بحس ان جدي و جدتي زعلانين وقتها كنت انا طفل ومكنش بيجي في بالي اني اكون في مكانهم في يوم من الايام بجد خايف ان الشعور ده اكرره مع امي و ابويا

انت مش مدلع ولا حاجة انت شاب محترم ومقدر والدك ووالدتك وعن تجربة أنا إحساسي بالذنب من ناحية أمي بيعذبني رغم وجود إخوتي معاها ومطمنه عليها لكن مش بإيدي ويمكن تتطور وربنا يكرمك وتجيبهم معاك وعامة إسأل نفسك عن مدى احتياجهم لوجودك وقدرتك على التحمل والله يوفقك