ممكن نقع من البلكونة ...او نتحدف حدف !!!

[mohameddessouki]

سنين ماشين على العلاج

لا حد فينا مات....ولا حد خف

زي الهدوم القديمة ..اللي في الدولاب

فوق خالص في آخر رف

تسأل على في العيد...و أزورك و أنت مريض

بسرعة بسرعة خطف

وأهي أيام...يا دوب نحافظ على النظام

الطويل ورا....والقصير قدام

ونعدل الصف

طابور يسلمنا لطابور

والعفاريت مش زي زمان

بتخاف من النور

لأ

ده إحنا ممكن في عز الظهر

نقع من البلكونة...أو نتحدف حدف

عشان كده فنخاف من بعضنا

ومن الصور ومن الأسامى

نعمل باب حديد للشقة..وتوكيل للمحامى

وعقبال ما نقول:..امسك حرامى

يكون النهر جف

على فكرة

التعويرة اللي في راسى...دى غلطة الحلاق

قلت له خللى عندك ذوق...و أخلاق

راح شالها بالموس وحف

خلاني أحس بالبرد في عز أغسطس

البس طاقية.. أتكلفت في ميت بطانية

واتلف لف

شوف

مش مهم راسى ..لكن اللي جرح إحساس

واحد قليل الأدب..بص على التعويرة

وقال إيه القرف ده ... وتف

بس أنا جريت وراه

وقلت له ورحمة أمي

ما حا سيبك

وصعب على نفسي...فضلت اعيط

واضرب كف على كف

لكن بعد كده نسيت..وقبل كده نسيت

اصل أنا قلبي ابيض..ولو مش مصدق

أقرا حضرت الملف