اخباركم عاملين ايه ؟

[justtrying]

السلام عليكم ورحمه الله وبركاته،،

طبعا غيبة طويلة عن المنتدى لكن الظروف تحكم

انا الآن اتكلم من الكويت والحمد لله بقالي دلوقتي اكتر من شهر ونص في الكويت والعملية الحمد لله ماشية كويس

البلد فعلا منظمة جدا ونضيفة ومفيش زحمة .. وبصراحة عجباني

بالنسبة للكوايته من وجهه نظري المتواضعة والي لسه مكملتشي طبعا نظرا لقلة الخبرة في البلد زي اي مكان فيه الكويسيين وفيه الي مش كويسيين بس الصفة الغالبة عليهم التكبر شوية لكن مقدرشي بردو اعمم لأنه فيه ناس فعلا متواضعة وخدومة جدا جدا

الواحد شاف اشكال محترمة واشكال ما يعلم بيها إلا ربنا في الفترة الصغيرة دي ولسه لما يعيش ياما هيشوف

ناس ظروفها صعبة جدا ربنا يهون عليها وناس مستريحة ربنا يزيدها

الشركة الي انا فيها بصراحة محترمة موفرة فعلا كل الي اتقالي عليه .. سكن ومواصلات بس لسه مش اعرف نظام الاجازات بصراحة ولسه كتير على الاسئلة دي

الي لاحظته في الشركة ان فيه فرق مستوى كبير ولله الحمد لصالحي بيني وبين الناس الي شغاله في الشركة وطبعا يعني مش عاوز اتكلم في حساسيات لكن للاسف وكل الأسف ان بعض الأخوة المصريين فيهم حته الحقد للاسف ربنا يهديهم ويهدينا وانا مديهم شوية عذر الصراحة بس ربنا يهدي الجميع والأسوء من كدة أن الفلبنيين هما الي بيدوني المعلومة ويوقفوا جنبي يعلموني الشغل والمصريين بصراحة نادرا

انا حاليا بدرب في اكبر فرع للشركة لأني همسك فرع جديد هيتم افتتاحه للشركة عن قريب دعواتكم لي بالتوفيق والسداد

بصراحة مسئولية كبيرة قوي وصعبة لكن أسئل الله أن يهيئ لي من امري رشدا

اللهم آمين

تم تعديل 12 يناير 2008 بواسطة justtrying

[nash]

ألف حمدلله علي السلامه..ويارب تتوفق في كل حياتك...

وإن شاء الله رب العالمين سيسخر لك ناس تأخذ بيدك وترشدك إلي الطريق الصحيح..

أخي الكريم ..أمضي في حياتك وتوكل علي الله ولا تلتفت إلي حاقد أو حاسد فهم كالنار إن لم تجد ما تأكلها أكلت نفسها...

وثق في رب العالمين فهو حسبك ...وثق في قدراتك...

وإن شاء الله لا تنقطع ثانيه عن المحاورات

ألف ألف حمدلله علي السلامه

[amrhoras]

حمد الله على سلامتك ياعم جست ترايينج

الف مبروك ع العمل الجديد وبالتوفيق ياسيدى

زى ما انت قولت شهر ونص لسه معرفتش حد او مين حلو مين وحش

انا بسمى الفترة دى فترة التحور والاختبار اول تلت شهور بكون منصت جدا لا اتدخل لا اضحك لا اتكلم الا فى نطاق العمل

لغاية لما تعرف اللى ادامك ده بيفكر ازاى يا اما تكتسب ثقتهم ياما متعرفهمش وده اللى انا بفضله فى مواقف زى دى اذا كان الكلام كتيير حوليك فاعرف انه حيجي اليوم تلاقيهم بيتكلموا عليك

فلبيني هندى مصرى انشالله هنولولولى اهم حاجه انت عاوز تفهم الشغل وبصراحه ربنا بيحبك

قولتلى ليه

اقولك ياسيدى الشعب الفلبيني شعب مدلع نفسه نظامى جدا ودقيق فى مواعيده الراحه راحه والشغل شغل دقيقه واحده فى وقت راحتهم ممنوع منعا باتا ولو جابوا رئيسة الفلبين نفسها

تانى حاجه اللغه بيجيدوا اللغة الانجليزيه وده ميزه اخرى تقدر تزود بيها قدرتك اللغويه

انظر للحكاية من الجانب المشرق قدامك لسه فتره عشان تنزل اجازه فاتعةج على العيشه ونمطها . واللى يمدلك ايده شبر مد ايدك متر واللى يبعد عنك خطوه اركب صاروخ عشان تبعد عنه صباح الخير ياجارى انت فحالك وانا فى حالى

دى بقى اقل حاجه اقدر اقولهالك حاليا

وحمد الله ع سلامتك يافندم وانشا الله بالتوفيق ف الفرع الجديدبس افتكرنا باى حاجه

لو مهندس بلاش تفتكرنى عشان معندكمش الا الزلط والخرسانه والطوب

لومحاسب انسانى ومتخدش عنوانى لانى مخنوق من المحاسبين

لودكتور ربنا يبعدنا عنك ياعم انت وروشتاتك ان مجالناش ازمه قلبية طبيعى يبقى يتمن الدوا

اوعى تاخد المقطوعه الاخيره ع انها جد بهزر معاك طبعا حمد الله ع سلامتك يا جست ترايينج