سؤال طفله محرج

[م.سامح المصرى]

السلام عليكم ورحمه الله وبركاتة

بنت اختى كانت بتتفرج على كرتون تويتي على سبيس تون

قام عمونا سلفستر وقع وسط شوية كلاب قامو هوهو على سيلفستر

قامت بنت اختى الناصحة سألتها قالتلها : ماما هيا الكلاب بتهوهو بأنهى لغة العربى ولا الانجليزي ولا الحساب

عندها خمس سنين ونص اختى ما عرفتش طبعا تجاوب

وأل اية جاية بتسالنى انا قلتلها لما ابقى اشوفك ابقى اقولك اقول لها اية

ما عرفتش اساسا اجاوب عليها

فلو عرفتو هيا الكلاب بتهوهو بأنهى لغة قولولى بأنهى لغة العربى ولا الانجليزي ولا الحساب

ولكم جزيل الشكر وربنا ما يوقعكمش فى اسأله اطفال محرجة

[إيزيس]

باللغة الكلابي............. بنت أختك عسل أنا أموت في أسئلة الأطفال دي فيها إبداااااااع

فهميها إن كل حيوان له لغة بيفهمها الحيوانات بس

[م.سامح المصرى]

تصدقى يا استاذة قرنفل اجابة مقنعه

شوية بس ممكن تغلس وتقول يعنى اللغة الكلابى دى بتتقال بالعربى ولا بالانجليزي ولا بالحساب

لحسن دى رخمة اوى

دا غير سؤال ازاى القمر واقف من غير عمود يمسكة

محرجة اوى البنت دى

يلة انا هافهمها اللغة الكلابى عقبال ما اشوف طريقة اعرف اوصلهالها للقمر الى متشعلق فوق

بس تشكرى

اة على فكرة انا سامح

[إيزيس]

سوري يا سامح صباح الفل ......... الحقيقة البنت عندها حق إيه اللي مشعلق القمر كده !!!! دي محتاجة تفكير عميق

[م.سامح المصرى]

اة عيزالها تفكير عميق بس البنت اساسا لمضة لو قولتيلها اجابة كدة والسلام

تصبيرة يعنى لغاية ما تكبر

لاء

دى بقى لازم تسال وتستفسر واسالتها من النوع دا

[amrhoras]

ياعم قولها ده السبوت بتاع الدنيا

الصبح كشاف قوى شويه وبالليل لمبه سهارى عشان ننام والاتنين فىالسقف متعلقين :blush2:

[م.سامح المصرى]

يااااااااااااااة يا عمورى

تصدق بحسبك زعلان منى

بس على فكرة انا ما نسيتش معادنا بتاع يوم 5 بجد اعزرنى

اصل انا فى حركه تنقلات من الشركة الى كنت فيها ورايح مكان تانى فدا والله الى خلانى اقصر معلش يا عمورى

المهم بقي ان انا قلتلك البت دى لمضة

وتتوقع منها اي سؤال رخم كدة فجأتاً ولو ما ردتش فى الحال تقولك :اية دا انتا مش عارفها ولا اية

مش انتا كبير وتعرف

يعنى كمان مش اساله محرجة وبس دى كسفة ادام طفلة لمضة

[zizetta]

السلام عليكم ورحمة الله وبركاته،،،

الطفل في هذا السن بيبتدي يتعرف علي ما حوله من أشياء وعلي الظواهر الكونية والطبيعية .. وبيسأل أسئلة كتير أكثر إحراجاً من لغة الكلاب أو ما شابه .. لكن أنا شايفة إننا لازم نحترم عقلية الطفل وما نجاوبش عليه كده والسلام .. يعني لازم نستغل الفرصة ونحاول ندربه علي التفكير والتأمل وفيما بعد التحليل والوصول للحقيقة .. وأرى أنها فرصة أكبر نعرفه فيها من هو الله وذلك من خلال الظواهر الكونية مثل القمر والشمش ولغة الحيوانات والطير ..

يعني مثلا .. نحكي لها حكاية سيدنا سليمان في أن الله سبحانه وتعالى علمه لغة الطير ونقص حكاية الهدهد .. وعلمه لغة الحشرات ونقص حكاية النملة اللي كلنا طبعا عارفينهم..

بالنسبة للقمر اللي متشعلق من غير عواميد فهذه آية من آيات خلق الله سبحانه وتعالى ونحكي حكاية القمر والشمس وإزاي هما يتعاقبان واحد بالنهار والثاني بالليل وأنه لا ينبغي لأحدهما أن يدرك الآخر الا إذا شاء الله ..يعني نوصل لهم هذه المعلومات في شكل حكايات جميلة مسلية ونربطها بالعلم زي مثلا القمر كان زمان محدش يعرف عنه حاجة .. لكن دلوقتي نقدر نروح القمر .. ومحدش عارف يمكن لما تكبري تروحي رحلة سياحية للقمر .. ايه رأيك تحبي تروحي القمر .. وهكذا مثل تلك الحكاوي ينمي روح التخيل ويخلق روح الإبداع عند الطفل .. لكن حذاري ان تعطي الطفل معلومات خاطئة لأن مخ الطفل في السن ده زي السفنجة يمتص المعلومات ويخزنها وتؤثر في شخصيته .. هذا بالإضافة إلي انهم وديعة الله وأمانة عندنا ينبغي أن نحافظ عليها ونحمد الله أنا خصنا بهم .. ولانستهين بعقلية الطفل أبداً بل نحاول أن نزرع ثقته بنفسه وبمن حوله ..

أنا مش خبيرة في علم الأطفال لكن أنا بتكلم عن تجربة شخصية ..

عالم الأطفال ده عالم جميل كله سحر وألوان وخيال .. تخيل اني بحب أتفرج علي الكرتون لحد دلوقتي وبستمتع جدا بالمقالب اللي بيعملها جيري في توم .. هو صحيح يا سولي انت مين فيهم (حسب اللوجو بتاعك يعني :blush2: )

تحياتي

زيزيتا

[م.سامح المصرى]

استاذة زيزيتا

نورتى موضوعى المتواضع

هوا فعلا اختى بتعمل زى ما حضرتك بتقولى كدة بتحاول تخليهم يتأملو فى خلق الله تعالى

بس ساعات بتحصل حاجات كدة واساله بتكون غريبة شوية وما بتجاوبش عليها فى وقتها

اما بالنسبة للقصص الديني هما بياخدوها واختى كمان بتجيبلهم قصص مصورة دينيه

وبسنت دى حافظة جزئين فى القرأن

وأخوها احمد اكبر منها بسنه حافظ ثلاثة اجزاء

وهما من نفسهم يجوا بيسألو امهم على حاجات دينية ويستفسروا على قصص فى القرأن من الى بيحفظوة

بس زى ما قلت انها بتبقي اسالة عابرة ممكن تكون معقدة حبتين بس بتاخد وقت شوية

بالنسبة للصورة بقي الى انا حاطتها دى مش عارف انا مين فيهم بس كل واحد بيسال التانى وانا مستنى حد يرد اهوة

سلامى لكى استاذتى ودومتى بكل خير

تم تعديل 13 يناير 2008 بواسطة Solee

[nash]

عارفين أنا مرة ابني الصغير..قصدي لما كان صغير كان بيتسلي عليه ويسألني أسئله من هذا القبيل..وكنت بجاوب عليه بهدوء وبحاول أكون تربويه...

بس الحقيقه مرة زهقت وقولتله بهدوء برضه ...عارف يا ماما ( بدلعه ) أنا شكلي هارميك من البلكونه..قال يعني صغير ومش بيفهم...رد وقالي ..وأيه يعني أنتي ( ماكانش يعرف حضرتك لسه ) اللي هاتقعدي تعيطي وتقولي فين أحمد حبيبي بجد ماتوقعتش رده وأنه فاهم نيتي السيئه تجاهه...

ربنا يحفظهم يارب

طيب لما واحد يسألك عن ( البليدج ) بتاع التلميع بكام؟؟ وتجاوبيه ...يرجع يقولك ليه؟؟ ساعتها بأة مش أحسن حل تحدفيه بغطا حله؟؟ علي أساس أن البليدج في المطبخ وأكيد أنا مش فاضيه للاسئله دي؟؟؟ :blush2:

[amrhoras]

انا اقولكم حاجه كل عيل يسال سؤال علطول بالألم ع وشه ان قلوبكم طواعتكم

لما يجوا انشا الله مجهزلهم اجابات نموذجيه

اومال ياره حبيبتي مش بتسالنى ليه طالعه واعيه لخالها

فصيحه وناصحه متحبش تسال كتيير تروح تستكشف علطول

وايديها تتحط فى اى لعبه زى حلاتى تمام تصلحها بس كل شيء لوحده مستقل بذاته

حقيقى الاطفال دول نعمه واجمل دنيا واحلى ابتسامه وارق صوت لما يقولوا وااااء واااء :blush2: بس باللنهار فقط

ربنا يرزق كل محتاج ويبارك فى كل طفل ويخليه لوالديه وتعيشوا ف سعاده كلكم ييارب

تحياتى

[م.سامح المصرى]

استاذة ناش

نورتى موضوعى

الحمد لله مش مشكله اختى لوحدها دى كل الناس اهوة

بس بأختلاف الأسئلة

انتى هديتي شوية وانتى بتكلميه انما هيا طول اليوم اسالة من دى

على فكرة هيا اشتركت فى المنتدى

وهاتلاقوها قريب بس لما ازبطلها البروفيل

واسيبلها الجهاز شوية

مشكورة استاذة ودمتى بكل خير

[م.سامح المصرى]

عمورى مين بس الى يلطشهم

بوسى تضرب دا انا كنت ازلزل الزلازيل

هما فعلا نعمه جميلة اوى بس لما يبقو صغيرين

لزاز وعساسيل اوى

[zizetta]

إنتي مشكلة يا ناش .. تخيلي قعدت أضحك بصوت عالي علي حكاية البليدج دي... :blush2: .. وبصراحة أنا عازرة أولادك (من التوقيع بتاعك بس عرفت مصيرهم يا عيني .. ربنا يبارك لك في أولادك يارب ...

فكرتيني بجارتي مرة بعتتلي إبنها الرضييع علشان هي جاية تزورني قال إيه يعني باعتالي الهدية الأول .. والولد قعد يعيط ويصرخ لمده ثلث ساعة متواصل .. والحقيقة يا نوشة أنا خلاص نسيت الحاجات دي وخلقى ضاق .. فقلت لبنتي خدي الولد ده إرميه في الزبالة .. :roseop:

سولي .. ما شاء الله إن ولاد أختك حافظين للقرآن .. ربنا يحميهم .. ياللا شجعهم بقى .. ما هو الخال والد .. والا أيه ..

تحياتي لكم جميعا

زيزيتا

[Tafshan]

اة عيزالها تفكير عميق بس البنت اساسا لمضة لو قولتيلها اجابة كدة والسلام

تصبيرة يعنى لغاية ما تكبر

لاء

دى بقى لازم تسال وتستفسر واسالتها من النوع دا

اغلب الاطفال بيكتفوا بالاجابه القصيره .. لكن دائماً حاولى ما تكذبيش لانهم ما بينسوش ..

اسهل اجابه هى " معرفش" ... و انا كثير باتبع الموضوع ده مع بنتِ .. مش لازم الكبار يعرفوا كل حاجه ... باكرر .. ما بينسوش ! و الثقه في ان الاباء لا يكذبون اهم من الاجابه اي كانت ..

من الاسئله الصعبه والد ابن صديق سأل مامته : هم في امريكا بيدرسوا عربي ؟؟

مامته : لأ

الولد : طب احنا ليه بندرس انجليزي طالما هم ما بيدرسوش عربي ؟؟

انا باعتبر السؤال ده اصعب سؤال ممكن اي حد يسأله ..

[nash]

والله يا زيزي أنا اللي وقعت من الضحك...حسيتها كانت عفويه منك جدا....

فكرتيني بصديقتي وأولادها ومن ضمنهم طفل شربات ( من ورا قلبي ) هلكنا في اليوم ده أنا ومامته..وهما مروحين اخر اليوم بقولها عارفه يا ****أنا أسعد لحظه في حياتي أن الولد ده مش هايبات عندي يعني مش أبني وملزمه بيه ...اللهم لك الحمد... :blush2:

قالتلي لاااااااا أنتي تطولي ده زي العسل...كنت هاقفل الباب في وشها...بس دلوقتي زي العسل...وحبيب قلبي( من قلبي )

.....................................

مرسي يا سامح علي ترحيبك بمشاركتي المتواضعه في التوبيك الجميل..ونقول لأختك العزيزة أهلا ومرحبا بكي ..وإن شاء الله تنيم الولاد وتدخل معانا في المحاورات ..هنا كل واحد بيسيب ولاده في الحضانه اللي علي الشمال إذا كان داخل الصبح ضروري...

[م.سامح المصرى]

أستاذى طفشان

نورت موضوعى بجد

هوا انا ساعات لما يبقو عندنا ويسألو اساله كبيرة شوية لاقولهم اسالو مامتكم لا اقولهم مش عارف ولما بجاوب ببقي فى حدود الصدق

مش بدحك عليهم بس بحاول اصلهم المعلومة على اد عقلهم

وبجد نورت موضوعى سلامى لك

-------------------------------------------------------------

تصدقى يا مدام ناش انا موت من الضحك من حضرتك ومدام زيزيتا

واختى ما قدرتش تمسك نفسها

دى طلعت قضيه رأى عام

وما تقوليش رحبت بحضرتك دا انتى اساسا شمعه موضوعى واحنا الدباديب الجيلاتين الى حواليكي :blush2:

واختى بتقولك هاتيجي بس تنيم الولاد زى ما حضرتك قولتى

سلامى لكى

[امانى]

موضوعك رائع يا سول فكرنا بأسئلة اولادنا المحرجة مش بسنت بس اللى عليها اسئلة كل الاطفال فى سن معين يبقوا عندهم

حب استطلاع لكل شئ

ابنى احمد كان من هذا النوع اللى ميبطلش يسال . بخصوص القمر سألنى مرة ليه يا ماما كل ما نروح حته نلاقى القمر جاى معانا حتى

لما بنسافر بعيد هو انتم بتقولو له احنا مسافرين طيب بتقلولو ازاى هو عنده تليفون جاوب بقى يا سولى

مرة سألنى انت ليه بتخلينى اقولك ماما واقول لبابا بابا مش باسمه وأنا بتندهونى بأسمى طيب ليه متندهيش عليا زى بابا وتقولى بابا

احمد هو مش انا زى بابا راجل

ده غير بقى حب استطلاع اللعب معمولة ازاى وحلها وتخريبها لما بقى عندى انقاض لعب لا حصر لها

اطمنى يا ام بسنت ده دليل على ان بنتك بتفكر وده معناه انها مخها نضيف وهتبقى زكيه زى الوسيم اللى عندى بس اه من ذكاؤه

ده مغلبنى ومخلينى ساعات ابقى صغيرة ادامه

فى انتظار مشاركاتك واهلا بيكى فى اى وقت عندكم او عندى فى الورشة تنورى :P :P

امانى

[م.سامح المصرى]

نورتى موضوعى يا استاذة امانى

والحمد لله انها طلعت مشكلة رأى عام

موضوعك رائع يا سول فكرنا بأسئلة اولادنا المحرجة مش بسنت بس اللى عليها اسئلة كل الاطفال فى سن معين يبقوا عندهم

حب استطلاع لكل شئ

ابنى احمد كان من هذا النوع اللى ميبطلش يسال . بخصوص القمر سألنى مرة ليه يا ماما كل ما نروح حته نلاقى القمر جاى معانا حتى

لما بنسافر بعيد هو انتم بتقولو له احنا مسافرين طيب بتقلولو ازاى هو عنده تليفون جاوب بقى يا سولى

مرة سألنى انت ليه بتخلينى اقولك ماما واقول لبابا بابا مش باسمه وأنا بتندهونى بأسمى طيب ليه متندهيش عليا زى بابا وتقولى بابا

احمد هو مش انا زى بابا راجل

ده غير بقى حب استطلاع اللعب معمولة ازاى وحلها وتخريبها لما بقى عندى انقاض لعب لا حصر لها

اطمنى يا ام بسنت ده دليل على ان بنتك بتفكر وده معناه انها مخها نضيف وهتبقى زكيه زى الوسيم اللى عندى بس اه من ذكاؤه

ده مغلبنى ومخلينى ساعات ابقى صغيرة ادامه

فى انتظار مشاركاتك واهلا بيكى فى اى وقت عندكم او عندى فى الورشة تنورى :blush2:

امانى

يااااااة دا احمد عليه شوية أسألة

جمال ما شاء الله

طب القمر دا صحيح الواحد يرد يقولة اية

ممكن تقوليلة اصلة طالع بمنظرين منظر عندنا ومنظر لما نسافر

ويمكن المخرج يحبه ويديلة 3 ادوار بدل دورين (انا بهزر طبعا )

بس زى ما مدام زيزيتا قالت لازم نجاوب عليهم بصدق طبعا

بس فى اساله ما بنلاقيلهاش اجابة تنفع لعقلهم الصغير او ما بتكونش موجودة فى الوقت نفسه

يلة ربنا يستر معايا لما ربنا يكرمنى بطفول كدة صغنن العب بيه f((:

سلامى لكى ودومتى بكل خير

[TotaFunny]

السلام عليكم و رحمه الله و براكاته

استاذة امانى اشكرك على ردك الرقيق

على فكرة مش بس احمد ابنك اللى بيسأل سؤال القمر ده و احمد ابنى كمان { 6 سنيين و نصف }

القمر ماشى معانا ليه و بيكبر ازاى و بيقف لما نقف وبابا عنده شنب و انا لأ ليه و :blush2:

مرة قالى ارسمى قطه : رسمتها على اد ما عرفت

قال: ارسمى الاكل بتعها : رسمت طبق ال يعنى فيه لبن .

قال لى : خليها تقول : النو النو

طبعا قعدت اضحك و قلت ليه مش ممكن تقول كده و هى مرسومه

و مره تانى شاف بيضه مرسومه فى الكتاب ازاى الكتكوت هيخرج منها

طبعا برد اقول ده رسم مش حقيقى زى صورة احمد هو احمد بيتكلم فى الصورة

و مقدرش اكذب عليهم صعب بحس انهم هيعرفو انى بكذب هيبقى كشلى وحش و مش هيبقى فيه ثقه بينا

اما بسنت و اههههههها من بسنت

كل حاجه ماما بتعملها عوزة تعمل زيها و لما اقول لما تكبرى تقول لى امتى

مش سؤال الكلاب بس ده كان واحد من مجموعه اسئله فى نفس الوقت مع بعض و عوزة اجابه على كل سؤال

زى الكلاب بتتكلم و العفصافير بتتكلم و لو قلت فى الكرتون بس طيب

تقول طيب اللى فى الكرتون عرفو ازاى

لما اكبر انا هبقى ماما كبيرة و انتى هتبقى بنتى و تبقى صغيرة و بابا هيبقى صغير و احمد هيكبر و يبقى بابا

و اذا كان فيه سؤال و سكت او اخد وقت افكر فيه تقول { هو انتى مش عارفة يا ماما ازاى تبقى كبيرة ومش عارف }

و هو ده الاحراج طبعا !!!! f((:

بحاول نبقى اصحاب انا و هما و مفيش كذب و نشترك مع بعض فى اللعب فى المذاكرة و لازم حدوته قبل النوم

و اليوم اللى هما ينامو بدرى تانى يوم احكى حدوتييين

على فكرة سبب اساسى ان الشيخ بتاع بسنت هيعتزل التحفيظ هى بنتى انا عارفة مش اى سبب تانى

:)

اشكركم على سعه صدركم ليه و يارب متكنش زهقتكم منى

ماما الطيبه على رأى بسنت لما تكون عوزة حاجه

و السلام عليكم