هل ترغبن بتبادل الادوار

[Horus]

عاوز افتح موصوع ظريف شويه .. نخفف بيه منجو التوتر اللى بيحصل

من شهر تقريبا كنا بنتكلم عن رفضنا جميعا لتبادل الادوار بين الست و الراجل ( فى موضوع تجهيزات الجواز و الإنفاق على البيت ...الخ)

هل تقبل/تقبلي بتبادل الأدوار؟ ( موش عارف اجيب اللنك)

المهم و كان اتفاق الجميع و انا معاكم على ان ده ما يصحش و موش مقبول طبعا..

( لان الراجل راجل و ده دوره فى الحياه )

و انا واحد من الناس اللى اتفقت مع زوجتى من ايام الخطوبه ان لو لابد و هتشتغل فيبقى مرتبها ليها و بس و موش ملزمه تساهم فى البيت باى مليم ( لان دى مسئوليتى كراجل البيت)

و طبعا دخل فى الحوار سؤال عن ليه شغل البيت يبقى فقط على الست و الراجل ما ياخدش نصيب من العمل فى البيت زى ما بيشتغل بره...

و كان بيننا مناقشات عديده عن ان ليه يبقى فيه فرق و الراجل و الست زى بعض .... و الكلام ده بتاع عم قاسم امين اللى ما يعجبنيش.

( انا عارف ان فيه ناس كتير هتهاجمنى على الكلام ده بس هو ده اللى مؤمن بيه و رزقى على الله ... )

و كنت بأرد على كلامها ده بسؤال ..

ليه انا يطلع عين اهلى و اشتغل و اشقى عشان احوش و اجى اخطبها و اجيب لها هدايا و شبكه و مهر و كمان اعمل فرح و شهر عسل على حسابى

عشان هاتجوز ..؟

الاجابه خطأ .....

طيب ما هى كمان هتتجوز

الاجابه الصح ..

عشان انت الراجل ...

الله ...سبحان الله

و من ناحيه تانيه انا كراجل برضه مؤمن انى ماليش دعوه بشغل البيت .. لان انا الراجل ...

الراااااجل.. اللى مهمتى الكفاح -بره البيت - عشان ارجع لاسرتى بما يكفل لهم معيشه كريمه و اعتقد ان ده واجبى و على الاضطلاع بيه على اكمل وجه ...

و فيه سبب تانى شخصى و هو ان انا طبيعه عملى كمهندس موقع فى تلك الفتره .. كانت كافيه جدا بارهاقى التام و لما اروح البيت انا عاوز راحه و هدوء.

طبعا كأى حواء .. الابتسامه و الموافقه ... و كل الدنيا وردى

لكن بعد الجواز و شهر العسل رجعنا للخلاف تانى على الموضوع ده

هى عايزانى اساعدها و انا رافض ... حتى لما قعدت زوجتى فى البيت و جاء الاولاد و سافرنا للغربه ...

برضه لسه بتحصل مناوشات من وقت للتانى على نفس الموضوع

كلمه مناوشات دى بتفكرنا بجو المعارك و دى حقيقه لانى حاسس ان فيه حرب دايما بين الراجل و الست .. الغرض منها ان الستات ياخدوا حقوقهم تالته و متلته من الرجاله و كمان عند الواجبات اللى عليهن مافيش مانع برضوا يباصوا جزء من تلك المهام على الراجل تحت مسميات مثل المساواه و مش عارف ايه .

ف أنا سؤالى موجه اولا للستات الفاضلات

انتوا عاوزين فى مساله الدفع ...

يبقى المبدأ: كله على الراجل طبعا لانه راجل و ده المفروض عليه

و تيجوا فى حكايه اى مشكله تانيه زى الاعمال المنزليه ...

يصبح المبدأ:

لييييههههه ما تساعدش الست بتاعتك ...

عشان انت راجل يعنى ... طب و ايه يعنى

مافيش فرق بين الراجل و الست ؟؟؟

حيرتونا معاكم و الله

نفتح الشباك و لا نقفله.

[Cleo]

فى رأى المتواضع أنه كما يقول الإعلان "حياة الأسرة مشاركة" و متطلبات الحياة الحديثة أصبحت أكثر تعقيدا من أن تكون الضروريات هى الطعام و الشراب و الكساء فقط.

و لذلك حرام إن الفرد يتولى الإنفاق على الجماعة وحده و خصوصا فى ظل الظروف الاقتصادية المتردية التى يعانى منها الأغلبية. و لذلك فإنه يجب على المرأة أن تساعد زوجها فى الإنفاق على الأسرة، ليس واجبا شرعيا أو قانونيا، ولكن فقط من باب الرحمة.

فإذا اضطرت المرأة للعمل لمساعدة زوجها فى تحمل نفقات المعيشة، فيجب على زوجها أيضا من باب الرحمة أن يساعدها فى عمل المنزل ليس لأنها كاسرة عينه بمساعدتها المادية لأنه عندئذ سيكون هو متحمل عبء الإنفاق، أما هى فستتحمل وحدها جزء من عبء الإنفاق مع كل عبء الواجبات المنزلية

بسم الله الرحمن الرحيم "ومن آياته أن خلق لكم من أنفسكم أزواجا لتسكنوا إليها و جعل بينكم مودة و رحمة" صدق الله العظيم

[se_ Elsyed]

لأ كده بأه دخلنا لحد البراميل وممكن نغرق ، قولتوا تشتغلوا قاضية وقولنا ماشي وشجعناكوا بكام بؤ حلوين لكن شغل البيت على جثتي ، أمبارح يا حورس ياخويا مخلص شغل الساعة 9 بالليل ومروح لقيت الجماعة مفرفرين من التعب من شغل البيت طول اليوم وطبعاً انتوا عارفين سي السيد لما يدخل البيت مافيش صرييخ ابن يومين يقدر يتكلم ، فين العشا يا أمينة قالتلي أنا تعبانة لو سمحت أعملنا أنتَ العشا النهارده ( ما هي عارفه الماضي الأسود بتاعي وأني لهلوبة فى طبخ جميع أنواع المأكولات الشرقية والغربية ) روحت عامل شو جامد قوي وسايب البيت وروحت أتعشيت فى مطعم فاخر وبعدين رجعت حبست بشاي ... بس بيني وبينكم أستنقصت نفسي قوي .. الحق لازم يتقال .. ووالله العظيم ياخوانا مش أنا سي السيد أهو اللى هو رمز الديكتاتورية لكن بأساعد من حين لأخر لما تكون الغزالة رايقة والمزاج عالي.

خلاصة الموضوع : الراجل يساعد فى شغل البيت جدعنه وتطوع لكن إجبار ومهام محددة أنت عليك غسيل المواعين أو تسايأ البلاط وتنشر الغسيل والكلام ده فده غير مقبول بالمره لأن فعلاً الواحد بيرجع برضوا تعبان ومرهق .. فالرحمة شوية يا ناس بالراجل أحنا هانلاقيها من الستات ولا من أمريكا.

[Set_Amina]

الشعور بالمشاركة يوجد الاحساس بالحب ويبقيه دائما.. ولا أقصد المشاركة المشروطة زي سي السيد ما بيقول انت عليك كذا وانا عليا كذا.. بصراحة الراجل لو ساعد في البيت بتكون كارثة على الست ومش هاتخلص من معايرته لها ولو بعد سنين عن فاكرة انا عملت معاكي ايه وفاكرة كنت باشيل عنك ايه وكده.. ماهو من منطلق انه بيساعد ومش واجبه فبيفضل جواه ان ده جميل لازم الست تشيله فوق راسها مدى الحياة..

ياسيدي بناقص المساعدة دي ولو مش من قلبك حبا لها وعطفا عليها .. يبقى بالاها..

انا لست من أنصار ان الراجل يساعد الست في شغل البيت .. لأن زي ما قالت كيلو الموضوع مش كنس ومسح وطبيخ.. الموضوع اعمق من كده والهدف من المشاركة أو المساعدة كما سبق وقلت في سطوري الأولى .. أي هي لفتة حب من راجل صعبانة عليه مراته الهلكانة..

بس صدقوني انا لسه لحد دلوقتي ماشفتش راجل رافض مساعدة مراته المادية اذا كانت تعمل.. يمكن انا بقى عايشة في زمن آخر والله أعلم. :roll:

[Excellence]

كل ميسر لما خلق له

[Katamando]

ما فيش حد قانع بحاله ابداً

حاجة تفرس :s2: :D :mad:

[بنت شعنونة]

معلش يقى اصلي مبقوقة..

استحملوني.. :mad:

قال

اطبخيييييييي يا جاااااااااارية كللللللللللللللللف يا سيدي..

يعني ماعلش بقى ما يبقاش "شحات" ويحلم بسوق العيش يعني؟؟ :?

يعني هوا عايزاها هانم وستوتة يبقى قد المسؤولية

ولو هيا راضية بيه زي ما هوا كدا قبل الجواز يبقى تحط طحين في بقها وتستحمل

انما مش يفرشلها البحر طحينة قبل الجواز وبعده يقولها العين بصيرة واليد قصيرة؟

وبعدين انتوا حسستواني زي ما يكون ما فيش اختراع اسمه دادا؟؟؟؟

دا انا 99ز99999% من اللي انا اعرفهم عندهم خادمات..."اكرمكم الله"

واللي ما عندهاش مرات البواب بتطلعلها يومين او 3 قي الأسبوع عشان تنضفلها؟؟؟؟؟ :? :?

يعني مافيش واحدا فاضية لجوزها

الا لو ماعندهاش فعلا بقى..

هنا بقى لازم الراجل "يتلحلح"

الست كلمتين حلوين ياكلوا بعقلها حلاوة والله يا اخوانا

وتشيلك على راسها من فوووووووووق

يعني لما كل شوية تقل لمراتك

تسلم ايدك

تعبتك معايا

ربنا يخليكي ليا

شوية جمل بسييييييطة جدا تخليها تستحمل القرف زي ما حضارتكم بتستحملوا قرف الشغل برا :twisted:

خلووا بالكم انها لو كانت ست بيت

يبقى بتستحمل قرفك وقرف شغلك سعدتك

لآن حضرتك بترجعلها بقرفكوا انتوا الأتنين

وياريتك بتسيب قرف شغلك برا

الا ترجع ترميه في وشها

يا اما كلضمة

يا اما مكشر

يا اما مصدع

يعني هيا حمالة اسية معاك

ماتستخسرش فيها بقى كلمتين حلوين

او حتى تلاقيها بتشيل حاجا تقيلة تقوم تشيلها عنها

سجادة او كرسي فوتيه

شوية حاجات بسيطة و المركب تمشي

اشوووووووووووف فيكوا يوم يا رجالة مصصصصصصصر

صدق من سمااااااااااكم

كجلموووووووود صخر

:twisted: :twisted: :twisted: :twisted:

:D :lol:

[1_Nadim]

انا فعلا مستغرب حكايات ان الزوجه تشتغل لكن فلوسها ما تدخلش البيت يعني تشتري بيهم مونيكير ومصاصه ولب بالذمه ده كلام

طيب ازاي؟ وايه معني انها تشتغل عياقه

ولا انا اللي نسيت الي بيحصل في مصر

[kokowawa1979]

الشعنونة كتبت :

اشوووووووووووف فيكوا يوم يا رجالة مصصصصصصصر 

صدق من سمااااااااااكم 

كجلموووووووود صخر

فعلا إن كيدهن عظيم يعملوها ويخيلوا :D :D :D :D :lol:

[شيكو المصري]

رأيي الشخصي ان الراجل يجب ان يتكلف بمصاريف الاسرة تماما حتى لو كان مرتبة على قدة

انما بمبدأ انة يقبل بعمل مراتة فهو يقبل انة يشاركها في شغل البيت في نفس الوقت .

الراجل مهمتة الانفاق على الاسرة و الهانم مهمتها ومملكتها هو بيتها .

الانسةشعنونة كتبت:

وبعدين انتوا حسستواني زي ما يكون ما فيش اختراع اسمه دادا؟؟؟؟ 

دا انا 99ز99999% من اللي انا اعرفهم عندهم خادمات..."اكرمكم الله" 

واللي ما عندهاش مرات البواب بتطلعلها يومين او 3 قي الأسبوع عشان تنضفلها؟؟؟؟؟   

يا ريت حضرتك تنزلي تشوفي الشعب الحقيقي مش اللي في التمثيليات وبيضحكوا بيها على الناس معظم الشعب ما عندوش فكرة عن الحاجات اللي قولتيها دية.

[بنت شعنونة]

انا قصدي الطبقى المتوسطة وما فوقها

ولم اقصد الطبقة المعدمة.. :?

وااللي ببقوله اظن انه مش غريب يعني؟

كل بيت فيه كدا :? :roll:

اخ كوكو

:D

بقى احنا برضه اللي بنعملها؟؟ :D

مرة كنت مخطوبة وخطيبي لم يكن عنده عربية

لك ان تتخيل اني يكون راكب جنبي زي الكتكوت في عربيتي

وخارجين لمكان اقوم اطلع فلوس وادفع حسابي واحيانا حسابه كمان والله

ولو عاوزا اروح مكان كمان يبقى لازم يبقى على حسابي

و انا اللي بشتريله هدايا

وفي الاخر عاوز يبقى راجل عليا؟؟؟؟؟

بصفة ايه والنبي؟

:twisted: :twisted:

سلامات يا رجالة.. :cool: :D

[وسام]

مرة كنت مخطوبة وخطيبي لم يكن عنده عربية

لك ان تتخيل اني يكون راكب جنبي زي الكتكوت في عربيتي

وخارجين لمكان اقوم اطلع فلوس وادفع حسابي واحيانا حسابه كمان والله

ولو عاوزا اروح مكان كمان يبقى لازم يبقى على حسابي

و انا اللي بشتريله هدايا

وفي الاخر عاوز يبقى راجل عليا؟؟؟؟؟

بصفة ايه والنبي؟

:twisted:  :twisted: 

سلامات يا رجالة.. :cool:  :D

العينة اللى قولتيها لا تصلح للتحليل اساسا عشان تحليليها و تحطى كلمة ( سلامات يا رجالة ) كنتيجة فى الاخر :D

[ســيد مرزوق]

ياجماعة ... الموضوع مش كده أبدا ... مش بالعافية ... ولا بالإستكراد ..

صدقوني لو فيه بين الزوجين حب حقيقي وإحترام ودين ورحمة ومودة وحنان وفهم وانسجام .... عمر الحاجات دي ما هايكون لها تأثير ولا ذكر من أصله .

الحياة الزوجية شراكة ... وتعاون وتوحد بكل المعنى ماديا ونفسيا وعاطفيا .... حاضرا ومستقبلا ... خاصة لو كان هناك ثمار لهذ الزواج .

أما الطرف الذي يستقوى على الآخر ويستقطعه ماديا وعاطفيا ونفسيا وجسديا .... فهذا يدل على خلل عظيم في العلاقة وفهمها الفهم الصحيح .

وبعيدا عن المهاترات والمزايدات والهزار .... لنا في الرسول الكريم أسوة حسنة .. إقرأوا عن كيفية تعامله مع زوجاته لتتعلموا الأسس الحقيقية للسعادة الزوجية .

[Faro]

مرة كنت مخطوبة وخطيبي لم يكن عنده عربية

لك ان تتخيل اني يكون راكب جنبي زي الكتكوت في عربيتي

وخارجين لمكان اقوم اطلع فلوس وادفع حسابي واحيانا حسابه كمان والله

ولو عاوزا اروح مكان كمان يبقى لازم يبقى على حسابي

و انا اللي بشتريله هدايا

وفي الاخر عاوز يبقى راجل عليا؟؟؟؟؟

بصفة ايه والنبي؟

:twisted:  :twisted: 

سلامات يا رجالة.. :cool:  :D

هذه هي المساواة الحقيقية ... لكن مين إللي خطب مين ؟؟؟

[ragab2]

كتبت شعنونة

يعني لما كل شوية تقل لمراتك 

تسلم ايدك 

تعبتك معايا 

ربنا يخليكي ليا

لو

حصل الكلام دة تفتكره سخن أو عامل عملة وبيحاول يخبيها

[maksoof]

مرة واحد قال لى إنه لما إتجوز إتفق هو و مراته على إنه هو يتخذ كل القرارات المهمة فى حياتهم الزوجية و يسيب لها تقرر إيه اللى يتعمل فى المواضيع اللى مالهلش أهمية.

و بعدين قال إن فى خلال الخمسة و تلاتين سنة الماضية (من يوم ما إتجوزو) ما ظهرش فى حياتهم و لا حتى موضوع واحد مهم.

مكسوف

[Cleo]

مرة واحد قال لى إنه لما إتجوز إتفق هو و مراته على إنه هو يتخذ كل القرارات المهمة فى حياتهم الزوجية و يسيب لها تقرر إيه اللى يتعمل فى المواضيع اللى مالهلش أهمية.

و بعدين قال إن فى خلال الخمسة و تلاتين سنة الماضية (من يوم ما إتجوزو) ما ظهرش فى حياتهم و لا حتى موضوع واحد مهم.

مكسوف

هاهاهاهاهاهاهاهاهاها : :D :D :D :D

[أسامة الكباريتي]

بسم الله الرحمن الرحيم

"الرجال قوامون على النساء"

وللقوامة أسباب وتبعات ..

مش فشخرة يعني ..

والإنفاق .. والريادة .. من أسباب القوامة الرئيسة ..

الرجل مكلف بإيجاد لوازم الحياة وفق استطاعته ..

واللوازم تشمل المسكن والمأكل والملبس ..

المرأة "غير مكلفة" بالإنفاق .. ولا حتى بعمل البيت .. فمن واجب الرجل أن يوفر ما ذكر أعلاه بما في ذلك المأكل "جاهزا للأكل" ..

حتى ولو كانت المرأة غنية فإن لها شخصيتها "المادية" المستقلة .. وهذا مما أعز به الإسلام المرأة بعدما كانت تورث قبله كالمتاع ..

فإذا ما أنفقت عن طيب خاطر فإن ذلك يعد صدقة على الزوج ...

هكذا يقول الشرع .............

والآن ..

ما موقفنا - رجالا ونساءا - من كل هذا؟!!!!

عندما تطيب الحياة للطرفين .. ويكون الرجل والمرأة كل منهما لباس للآخر .. فإننا لن نسمع عن تفاصيل كهذه في حياتهما ..

والعكس !!!

تظهر كل المنغصات مع اشتداد حرارة الجو في البيت ..

وكل منهما يتلكك للآخر ...

وكما أن الرجال أنواع .. منهم الكريم في بيته .. ومنهم الشحيح حتى على نفسه .. فإن النساء أنواع أيضا ..

فمنهن "الأنانة" .. ومنهن "الحنانة" .. ومنهن "اللوامة" .. كما وصف الرسول الكريم ..

فمن وقع نصيبها مع رجل كريم .. كانت حياتهما كريمة ..

ومن وقع مع واحدة ممن اتصفن بما ورد أعلاه .. !!!!!!!!!!!

والمرأة الكيسة هي التي تعرف كيف تسير دفة منزلها إلى بر الأمان .. والرجل الكيس أيضا يعرف كيف يكون الربان الحاذق دون ان يفرض الأحكام العرفية .. ويلوح بقانون الطوارئ في كل مناسبة ..

فالبيت المستور هو الذ ستر بأهله .. ومن أصر/أصرت على الفضيحة .. فذلك من صنع يده/يدها ..

بعد ربع قرن زواج .. مازالت تعايره بموقف حدث في أيام شهر العسل الأولى ..

وكثير من الأزواج (ذكورا وإناثا) الذين تمكنوا من النجاة ببيوتهم من الدمار هم ممن استطاعوا تجاوز مشاكل السنة الأولى من الزواج .. ولم يستخدموا سلاح الحرية بأكثر مما شرع له .. فلم يسبق السيف.......

[Horus]

ايه يا اخواننا

اغيب يوم واحد ارجع الاقى 17 رد ... و الله ده كلام جميل

بس مافيش ولا واحده من الاخوات الفاضلات ردت على سؤالى

انتوا عايزين مساواه ولا عايزين ان الراجل راجل و الست ست

و الكلام ده طبعا يبقى مدأ واحد عام و سارى فى كل الاوقات و على كل الظروف موش زى ماما أمريكا يعنى " أزدواجيه فى المعايير"

عايز اعرف رأى الستات بجد

و بعدين تعالى هنا يا شعنونه .. ايه اللى جاب سيره المحترم خطيبك "الكتكوت" و ما دخل اسلوبه الغير سوى معاكى فى اللى احنا بنقوله هنا

و كمان بتقوللى

معلش يقى اصلي مبقوقة.. 

استحملوني..

قال 

اطبخيييييييي يا جاااااااااارية كللللللللللللللللف يا سيدي.. 

يعني ماعلش بقى ما يبقاش "شحات" ويحلم بسوق العيش يعني؟؟

يعني هوا عايزاها هانم وستوتة يبقى قد المسؤولية 

ولو هيا راضية بيه زي ما هوا كدا قبل الجواز يبقى تحط طحين في بقها وتستحمل 

انما مش يفرشلها البحر طحينة قبل الجواز وبعده يقولها العين بصيرة واليد قصيرة؟ 

وبعدين انتوا حسستواني زي ما يكون ما فيش اختراع اسمه دادا؟؟؟؟ 

دا انا 99ز99999% من اللي انا اعرفهم عندهم خادمات..."اكرمكم الله" 

واللي ما عندهاش مرات البواب بتطلعلها يومين او 3 قي الأسبوع عشان تنضفلها؟؟؟؟؟   

يعني مافيش واحدا فاضية لجوزها 

الحقيقه موش فاهم قصدك ايه

الشيخه أم صباح بتسلم عليكى و بتقوللك واحده واحده على و النبى.

يعنى انت شايفه الشباب قادر يتجوز أصلا عشان كمان هتبقى من متطلبات الجواز زى التليفزيون و الفيديو

عدد واحد شغاله و الافضل تكون فلبينيه

عدد واحد طباخ و ياريت كمان سفرجى

عدد واحد داده للاولاد - و بالمره كمان تاخد بالها من ابو الاولاد :)

يا شييييخه .. حرام عليكوا هو الشباب هيلاحق على ايه و لا ايه

و ال ايه رجاله مصر هما اللى مفتريين ...

:( :(

ربنا ع الظالم :)

[Horus]

ملحوظه هامه

لا تنسوا ان 30 فى المائه تقريبا من الشعب تحت خط الفقر :? :?

الطبقه المتوسطه اللى بتقولى عليها يا شعنونه .. اندثرت تقريبا و بتنزل بسرعه الصاروخ الى ما تحت خط الفقر نفسه ... :( :(

خصوصا بعد قفزه الدولار الاخيره و ارتفاع الاسعار و انعدام فرص العمل

أما الناس اللى اشتغلت فى الخليج و عملت قرشين و نزلت مصر و عايشيين الى حد ما فى ظروف معقوله ( اللهم لا حسد... النهارده الخميس) :) :) :D

ف دول نسبه كام من الشعب المصرى ؟؟!

خلليكوا حنينيين على الشباب لحسن الناس هتفرقع خلاص. :(