فيه امل يا جماعه

[Farida]

رأيت حوار مع محافظ قنا اللواء سعد لبيب و الذى استطاع فى 3 سنوات ان يغير من وجه محافظه قنا تماما و قرات عنه لكتاب احترمهم مثل سلامه احمد سلامه و غيره ... و احنا معتادين دايما ان الصعيد بناسه و عاداته هو منبع التخلف و عدم التحضر لإنه ببساطه بعيد عن العاصمه و بعيد عن الخدمات و الصحه و اى حد مقصر فى عمله او ضبط فى جريمه ينقل للصعيد و كانه عقاب ....

الجميل ان الصعايده ضربوا مثل فى النظافه و التحضر و المحافظه على محافظتهم حتى الأسر الصعيديه اصبح الرجل فيها يخرج بصحبه أسرته امنا عليهم للكورنيش و الأماكن المفتوحه ..مخالفه القانون بغرامه الف جنيه و اللى بيجيب واسطه بيدفع الفين جنيه !!!. الواسطه اتلغت تماما مع ان المعروف ان العائلات الكبيره فى الصعيد لها وزنها و قبليتها و عصبيتها ..... البطاله انخفضت ... الثأر و الجرائم قلت بنسبه 95 % و الكل اجمع على ان الناس اصبحت تشارك فى التنميه و لا تبخل بفلوسها طالما تاكدت انها تذهب فى اماكنها و انه ليس هناك واسطه او فساد أو كبار بياكلوا اموال الفقراء ......

مش عارفه حبيت تشاركونى هذا الموضوع و ان نتأكد أن الناس فب بلدى مش متخلفين بطبيعتهم بس محتاجين قياده عادله و عدم محسوبيه و قوانين تطبق على الكبير قبل الصغير و هم سيلتفون حول هذه القياده و يدعموها و ينتجوا و يمارسوا انسانيتهم .....أنا دلوقتى بقه عندى امل

[Khiber]

يا أخت فريده حرام عليكى سيبى الراجل فى حاله .... كل ما نسلط الضوء عليه وعمل كم أغنيه حوليه كل ما يكون عمره القيادى فى خطر

:( :( :( :(

طبعا أنا موافقك فى الكلام ده.....

[elbana]

الموضوع ده يا أخت فريدة من المواضيع اللي بتهمني جداً ، وأنا قلته في مداخلة في موضوع (إيه اللي عاجبك في مصر) ، فعلاً فيه بعض المحافظين اللي بدأت مجهوداتهم تظهر وتؤتي ثمارها ، وعلى رأسهم قنا والإسكندرية ، الروح دي البلد افتقدتها من زمان والواحد فرحان بالمسؤولين دول ، مافيش مسؤول كبير بيتحرك بأمانة ونشاط ونزاهة ، بقى لنا زمان مشتاقين لحد من النوع ده ، سمعت كتير عن الل عمله الراجل في قنا ، وبأحييه أكبر تحية عليه ، يا جماعة لما تظهر نوعيات زي المحافظين دول بتكون النتيجة إن النماذج المغايرة أمرها بيفتضح أكثر وأكثر ، لأن الضد يظهر نقيضه الضد ، والأسود بيان سواده أكثر لما نقربه من ألبيض الناصع .

برضه محافظ المنيا باين عليه نشيط ، ومحافظ أسوان بيحاول ، ربنا يقويهم ويكثر من أمثالهم ، وأعتقد إن أفضل مكافأة لهم إنهم يسمعوا الناس العاديين زينا بيشهدوا بظهر الغيب من غير مال تكون لنا عندهم مصلحة .

[عادل أبوزيد]

قمت الآن بالإتصال بأحد أصدقائى فى مدينة الأقصر و التى كانت الى عهد قريب جزء من محافظة قنا و هو ينتمى الى قرية العديسات أحد قرى محافظة قنا.

و قد أكد لى عطالله - و هذا اسمه - كل ما ذكرتيه عن الإنجاز الرائع الذى حدث فى مدينة قنا و عن رد فعل الناس فى المحافظة كلها و شعورهم بالولاء و الإنتماء كما ان كل من فى المحافظة يشعر بحب شخصى للمحافظ.

بقت معلومة أخرى لم تذكريها الا و هى أن محافظ قنا الحالى هو نفسه - و امسكوا انفاسكم - سكرتير عام محافظة الإسكندرية السابق

أى أن مدرسة عبد السلام المحجوب أفرخت و أنتجت ووصل تأثير القدوة الحسنة الى قنا.

أتفق مع الفاضلة فريدة فى أن هناك أمل

[مصرى]

نعم لازال هناك فرصة للنهوض إذا ما توافرت إدارة جيدة

مع ملاحظة أن ما تتحدثون عنه فى قنا أو الاسكندرية أو غيرهما هى مجرد مبادرات فردية وليست نظام أو قاعدة .. وهناك فرق ..

سلطات المحافظ جرى إختزالها فى سلطات رئيس البلدية زمان وأصبح عمل المحافظ هو نظافة الشوارع وتجميل المدينة .. فالمحافظ لا يملك حتى مجرد نقل رئيس حى فى محافظته الا بعد الرجوع الى رئيس الوزراء .. وليس للادارة المحلية بجناحيها الشعبى والتنفيذى أى ولاية على الجامعات أو المشروعات أو المدن الجديدة التى تقع فى نطاقها .. وتنحصر ولايتها على مديريات الخدمات برفع توصيات الى الوزراء المختصين بالعاصمة ..

[مصرى]

مخالفه القانون بغرامه الف جنيه و اللى بيجيب واسطه بيدفع الفين جنيه !!!.

هذا لا يمكن .. وإلا كان مصيره السجن !! فلا جريمة ولا عقاب بدون نص .. ولابد أن يصدر بالغرامة أو الرسوم قانون من مجلس الشعب حتى ولو كانت رسوما محلية طالما زادت قيمتها عن 25 قرشا .

وفعلا محافظ قنا من نماذج المحافظين والمسئولين الذين يرفضون الاستسلام لشرنقة القوانين واللوائح والروتين ويكافح من أجل أن يصنع شيئا فى حدود ما هو متاح له .. وهو بالدرجة الأولى رفع أكوام القمامة من شوارع مدينة قنا وتجميل الكورنيش والتدخل بشخصه وبثقل مسمى وظيفته فى تحفيز من حوله من العاملين وفى محاولات إنهاء الخصومات الثأرية بين العائلات ..

لكن كما أسلفت بمبادرة شخصية من جانبه وليس وفق نظام أو قواعد أداء وضعتها أو أتاحتها له أنظمة الدولة .

[مصرى]

الناس فب بلدى مش متخلفين بطبيعتهم

هذا غير مطروح بالمرة .. فلا يوجد شعب متخلف ولكن هناك ظروف ونظم إدارية متخلفة .. والصعيد كان يوما عاصمة الحضارة فى العالم

[se_ Elsyed]

أنا متفق مع الأخ / مصري ، أن فعلاً العملية فى مصر بتدار من قِبل أفراد على حسب أهواءهم ومزاجهم وليس طبقاً لسياسة موحدة لا يؤثر فيها تغير الأشخاص القائمين على تنفيذها بدليل أن ممكن محافظ تاني ييجي بكره فى قنا أو الأسكندرية ويمسك المعول الفرعوني المعتاد ويشوه كل أشكال الجمال والتحضر اللى الناس تعبوا فيها .

ولكن برضوا تحية من القلب لمحافظ الأسكندرية الحالي والأسماعيلية السابق السيد / عبد السلام محجوب والى محافظ قنا أيضاً السيد / سعد لبيب ... اللذان أعتبرهما أخر الرجال المحترمين من السادة المسئولين وفعلاً سيرتهم سوف تظل عطره حتى بعد أن يتركا منصبهما .

وقد كتبت فى آحدى مداخلاتى من قبل إن الأنسان الشريف الأمين أصبح هو العملة النادرة التى نبحث عنها فلا نجدها.

[ali]

بسم الله الرحمن الرحيم

الحقيقه الموضوع ده ادخل السرور الى قلبى بس نفسى اشوف القاهره نظيفه بجد حاسس ان ده حلم كبير حد عنده فكرة عن اى مجهود حقيقى لنظافة القاهره

سؤال للاستاذ عادل هل يمكن تنظيم و استخدام الجهود الذاتيه فى هذا الموضوع

القاهرة بقت المدينة رقم واحد فى التلوث فى العالم مش ده حرام

[الطفشان]

ان يجتهد البعض من اولي الامر و يسبحوا عكس تيار الفساد و الاحباط، فهذا مجهود يشكروا عليه

و لكن المشكلة ان الموضوع مرتبط بالاشخاص، يعني شخصيتهم، كفاءتهم و حسن (او سوء) نياتهم!

المفترض في كل الدول "العادية" ان هناك نظام و صلاحيات و حقوق و مسئوليات وواجبات و قوانين و لوائح

و مش مهم مين اللي يطبقها

العجلة ماشية لوحدها

مش محتاجة ملهم او مهيب او نبي او مهدي !

هو دة الاشكال الاساسي عندنا!

كل شئ مرتبط بالاشخاص

[دكتور بطري]

السلام عليكم ياجماعه انا النهارضه لسه عارف كليه هتبقي ايه والحمد الله كانت طب بطري جامعه قنا

وانا من محافظات الوجه البحري ومش عارف اي حاجه عن قنا ياريت اي حد يبعتلي صور ليها او اي معلومات عن الجامعه

moze2006@yahoo.com

[hopsan]

طيب طالما بنتكلم عن الصور المشرفه اقول لكم عن واقعه اشوفها كل يوم

محافظ الإسكندريه و هنا اتحدث عن رؤيا العين و ليس إجتهاد شخصى

يخرج من منزله صباحا فى سياره عاديه جدا و ليست سياره التشريفه و بجانبه السائق فقط و بدون حرس و خلى بالك من كلمه جانيه . ينتظره و على كوبرى استنلى كونستابل ليسبقه و بدون سارينه

.....و هو ماشى و شباك السياره مفتوح تتسابق السيارت لتحيته طوال الطريق و هو على ابتسامه واحده و يلوح للجماهير

لا توجد سياره حراسه من اى نوع طوال تنقلاته فى خلال اليوم و احيانا يكون بجواره سكرتير عام المحافظه ضغطا للمصاريف و يكون الموكب فى حاله الإفتتاح حوالى 3 سيارات و الباقى رجال اعمال مرافقين

لو طلبت مقابله المحافظ فإنك تمر على اثنين من الموظفين فقط قبل مقابلته و ذلك بعد تحديد ميعاد للمقابله

اقول هذا و سيرته بالخير لدى الصغير قبل الكبير ....

نبذه صغيره عن المحافظ السابق و المسمى بالجوسقى ...كان يخرج من نفس المنزل المقرر للمحافظين بعد صرف ميزانيه البلد فى تحديث و تجديد الفيلا كان يخرج من منزله فى موكب ضخم يتقدمه سياره حراسه كامله العدد بالعساكر و باب سياره لحراسه مفتوح على مصراعيه و السلاح المشهور فى وجه العامه و الماره و سياره اخرى بنفس المنظر فى آخر طابور السيارات ...الشارع الذى يمر به موكب المحافظ السايق يغلق قبل مروره بعشر دقائق ...لا اتحدث عن الرشاوه لأنى فقط كنت اسمع و غير متأكد و لكن شائعات كثيره تتحدث فى نفس الموضوع و منها شركه كيروسيز التى اخذت ارض البيبسى كولا و مقاولين كبار كان يأخذ منهم الفرده او المعلوم عنوه و قسرا و ما فى بنى آدم فى الإسكندريه ذكر هذا الشخص بكلمه شكر فى حقه و عندما غار و غادر الإسكندريه ليلا و هروبا من بطش الناس قامت زوجته بحرق الفيلا و محتوياتها نكايه فى زوجه المحافظ الحالى ...صحيح الطيور على اشكالها تقع