س سؤال....حضرتك غشيت قبل كدا؟؟

[semsema]

طول عمري وانا بكره الغش واللي يغشوا.......لاني كنت شايفه ان اللي بينجح بالغش بينجح بمجهود وتعب غيرة

يعني بالعربي كدا اللي بيغش ماعندوش دم..... دي كانت وجهة نظري في الغش واللي بيغشوا :wub:

اما الان فبالطبع اختلف الوضع واختلفت الموازين واتغيرت وجهة نظري (ثانوية عامة بأى )

يوم السبت كان عندي امتحان تفسير يشيب الشعر (يعني يبيض الشعر) بفتح الشين

وبما اني طبعا لسه ف عز شبابي فأبيت ثم ابيت ان شعري يبيض.......ليه يعني؟ هوا انا مستغنية عن شعري يعني والا مستغنية؟!

و كان في سؤال غريب عجيب وعويص مش عارفه جايبينوا منين؟

فأصدرت لنفسي فتوى سريعه.......مادام السؤال دا مش موجود في الكتاب اذن ما المانع يعني اني اغش؟

وبما ان صديقتي العزيزة بيونة غشاشه درجة نمبر وان وحاطينها جانبي (مش قوي يعني) قلت يلا اما اشوف مدى درجة قواها الغشية واجرب حظي معاها

حطيت ايدي على بؤي وقلتها بهمممس السؤال اللي مش عارفه اجابته (بس بصوت واطي خالص طبعا)

لقيتها بتبصلي وتقولي (فارض)

قلتلها نعم clp:: ؟ قالتلي فااااارض

قلت في نفسي ماشاء الله عليها بجد يعني ....... في ثانيه كانت الاجابه عندي

واطمنت خالص اني عرفت اجابة السؤال الغريب ده ولو اني مش فاهمه يعني ايه فارض دي mf-:

لقيت وحده تانيه بس جنبي من الناحية التانية بتسألني على نفس السؤال.......قلتلها : فااااااارض

بصتلي بطريقه غريبه كدا :sad: كانها بتقول يعني ايه فارض؟

انتهى وقت الامتحان الاكتر من مؤرف ده.........واول حاجه عملتها رميت نفسي في حضن صحبتي وانا بقولها "مررررررررررررة شكرا انك ساعدتيني ياقلبي "

قالتلي: انا ساعدتك؟ :sad:

انا :ايوه

هيا :ساعدتك في ايش ان شاء الله؟

انا: في الاجابه اللي اسمها فارض........الا صحيح يعني ايه فارض؟

هيا: انا قلتلك فارض......من وين تجيبي دا الكلام؟

انا: :blink: امال انتي كنتي بتقوليلي ايه؟؟

هيا: كنت بقولك فراغات.........طبعا انتي ماتستحي عشان ماساعتيني في سؤال الفراغات

انا: فراغات :blink: وانا اللي اتوقعتك بتقولي فارض :

هيا ماتت من الضحك وانا مت من الغيظ وحررررررمت اغش بعد كدا......بس طبعا ممكن اتراجع عن القرار ده اذا سمحت الفرصه يعني :P

السؤال ليكوا............غشيتو قبل كدا في الامتحانات.....ابتدائي اعدادي ثانوي اوحتى كليه؟

قولوا ماتخافوش........سركوا في بير

[Scorpion]

اه ... :wub:

في امتحان الكيميا بتاع تالتة ثانوي.. و الا ما كنت حعتب باب اي كلية...

[semsema]

اه ... :wub:

في امتحان الكيميا بتاع تالتة ثانوي.. و الا ما كنت حعتب باب اي كلية...

استاذ سكوب اهلا وسهلا...clp::

الحمد لله اني مش لوحدي يعني اللي غشيت.....ولو اني حاسه انو بعد التعب ده كله مش داخله كليه :sad:

وعلى رأي بابا: شكلي هشتغل بياعة ترمس ع الرصيف mf-:

تم تعديل 30 يناير 2008 بواسطة semsema

[nash]

طبعا أحنا عايشين أيام امتحانات جميله....والنهارده كفااااارة خلصت بس يا يختيكوا يا سمسمه عندكم 10 ايام أجازة ..تخيلي أبني الصغير واخد يومين السبت والأحد فقط ..وهايبدأوا الأثنين...بقر عليكي يا حبيبتي... mf-:

أنا مرة واحده غشيت أسماء خطوط أنابيب البترول في المملكه ومن اين تبدأ وإلي اين تنتهي..في الثانويه العامه...وكأني بقرا البخت لقيته منور والحمدلله ربنا قدرني يعني ودخلت الكليه... :wub:

شدي حيلك يا سمسم هانت وهاتقعدوا عشر أيام بحالها يا عم clp::

[semsema]

طبعا أحنا عايشين أيام امتحانات جميله....والنهارده كفااااارة خلصت

خلصت؟ :sad: خلصت امتى دي؟ :blink: .......دي لسه شغالة ميت فل وعشرة وقدامها لسه اسبوووووووع كامل... للاربع الجاي كدا :P

بس يا يختيكوا يا سمسمه عندكم 10 ايام أجازة ..تخيلي أبني الصغير واخد يومين السبت والأحد فقط ..وهايبدأوا الأثنين...بقر عليكي يا حبيبتي...

بسسسسسس اهو انا كدا عرفت سبب الصداع المفاجئ اللي جالي ده :sad:

بس 10 ايام دول مش حاجة خالص يعني........جاتهم القرف حتى الاجازة قللوها :wub:

أنا مرة واحده غشيت أسماء خطوط أنابيب البترول في المملكه ومن اين تبدأ وإلي اين تنتهي..في الثانويه العامه...وكأني بقرا البخت لقيته منور والحمدلله ربنا قدرني يعني ودخلت الكليه...

طب الحمد لله انك ماتقفشتيش زي بعض الناس clp::

شدي حيلك يا سمسم هانت وهاتقعدوا عشر أيام بحالها يا عم

طب ثواني بقى اما اخد بنادول للصداع اللي هيقتلني ده :blink:

لا والله بهزر......مافيش صداع ولا حاجة....

وعلى فكرة...........وحشتيني:wub:

وعلى فكرة كمان.........اراكم بعد اسبوع ان شاء الله بعد الامتحانات تنتهي عشان الكمبيوتر النهارده اتفتح بالخباثة mf-: ولو حد عرف ممكن يعني اروح فيه

[nash]

يارب تشوفي الرد يا رب قبل ما الإدارة المركزيه لإدراة المعتقلات تكتشف حركتك الشنيعه للتمرد...

شدي حيلك كده علشان تحققي أملي وتدخلي طب....عاي انا كنت أدبي بس مجموعي ما سمحش...

ايون يا ستو سمسم احنا بدأنا قبلكم باسبوعين الشفوي وشويه تحريري وخلصنا النهارده....

انا هاحجز 3 عربيات ترمس ليكوا أنتوا التلاته....من فرحتي بيكم بقول.... :wub:

[قديم]

اهلا وسهلا الموضوع كدا رجعتينا للايام الدراســه اه يا زمن بس

يا زين ذيك الايام ..

انا شاركت بالتصويت بنعم وحصلت علي نسبه 100 % يعني انا اول من شارك لكن النت علق معاي وطلعت . ولما رجعت كان التوصيت ما شاء اللــه شغال ع الاخــر ..اهم شي ما يكون فيه تزويــر بالنتيجــه .......

الغش فن قبل ما يكون برشام . صدقوني الكسول لو غش او مسك الكتاب معاه اتحداه ياخذ النسبه كاملــه ..

بعدين انك تغش والمراقبين فوق راسك ويمين شمال . دا منتهي الذكاء .

اتذكر موقف حصل لي ايام الامتحانات . كنت بكتب البراشيم والمهم ومن كثر ما انا بصغر في الخط واعيد الكتابه مره واثنين حفظت الموضوع . ومااحتجتها لكن كانت موجــوده معاي . مشروع غش

في مره كنت مبرشم براشيم الجدول الدوري بالكيمياء . الصبح نسيتــه . وتركت الكتب . فرحت المدرســه .

اغلب الغش يكون من الزملاء وتبادل اوراق الاجابات فقط .. هل هذا غش ؟؟

[رمضان]

السلام عليكم

انا بصراحة موضوع الغش معايا كان بالصدفة البحتة وغير مرتب له اطلاقا

في يوم عصيب من ايام الامتحانات بالصف الثالث الاعدادي وفي مادة اللغة العربية التي لم اكن احبها مطلقا وبعد مرور ساعة من الامتحان ومازالت ورقة الاجابة بيضاء اللهم موضوع التعبير فقط ، ويبدو انه من كثرة الخوف طلبت معايا دخول الحمام ، وبعد التفتيش من مراقب اللجنة سمحوا لي بالنزول وهناك كانت المفاجأة .

كتاب اللغة العربية بأكمله موجود والله زي ما بقول لكم كده دهب ياقوت مرجان احمدك يارب

غش غش للركب

ومن ساعتها مفيش اي امتحان كان بيعدي عليه الا ولازم .

ودي كانت بداية طالب فاشل مع الغش

[se_ Elsyed]

الغش ده له ناسه

المرتين اللي حاولت أغش فيهم طلعت في منتهى العبط والفشل

أول مرة في ثانية إعدادي وما كنتش اعرف يعني إيه غش وأخدت الكتاب معايا ووضعته في الدرج قبل الإمتحان ... وقبل الإمتحان روحت أشرب ورجعت لقيت الكتاب مسروق .....

المرة الثانية في البكالوريوس وكان بيطلع عيني عشان أعرف افرق بين الرسم البياني لمنحنيي العرض والطلب لإن واحد طالع فوق والتاني نازل تحت .. فقلت يا واد إرسمهم على الديسك قدامك وأهو أبص بصه عليهم وتعدي ... اتاري في مراقب حويط راقمني من قبل الإمتحان وإذ بي أفاجأ إن لأول مرة في تاريخ كليات التجارة ما يجيش أي سؤال عن العرض والطلب .. فقلت الحمد لله الذي عافانا وحفظنا من الغش ... ويادوب ما كملتش الدُعاء - الظاهر ما كنتش كاشف راسي ...- إلا وألاقي الزبون كابس عليه وساحب ورقة الإجابة مني وعامل لي هوليلة ويقولي انا شوفتك وإنت بتكتب على الديسك .. أتاري بقى العيال بتوع سنة تالتة بيمتحنوا في اليوم اللي بعدنا ... والواد أو البت اللي بيقعدوا مكاني - بس هو تقريباً ولد لإن إسم أحمد كان بيبقى عبارة عن لا يقل عن 5 لجان كاملة .. و في كل دفعة بتلاقي لا يقل عن 200 واحد إسمهم احمد - الولا كان عامل الديسك خريطة زي خرائط الكنز بتاعت القراصنة .. فقلت للمراقب أنا بأعترف إني رسمت منحنى العرض والطلب .. لكن باقي خريطة الكنز مش بتاعتي يا قرصان ... وبعدين يا ريس ما فيش سؤال جه من اللي رسمته - يقوم إبن الذين كاتب بخط إيده في أول صفحة من صفحات الإجابة بإن الطالب قد تم إلقاء القبض عليه متلبساً بالجُرم المشهود وراح موقع بإسمه ووظيفته ... المفروض بقى كانت أعصابي تبوظ .. لكن توكلت على الله وكان الإمتحان في منتهى السهولة ... وجيت وأنا بأسلم الورقة روحت منادي عليه وقلت له أنا ما يهمينش إنت كتبت إيه لكن أقسم بالله أنا ما غشيت ودي كانت محاولة فاشلة من شاب فاشل في الغش ... والظاهر إني تأثرت بالأدوار الدرامية للست أمينة رزق وليوسف بك وهبي وصعبت على الرجل وراح شاطب كل الكلام اللي كتبه وموقع ..

والحمد لله رب العالمين دي كانت من ضمن المواد القلائل في سنوات الجامعة اللي حصلت فيها على جيد جداً ... أصلي كنت راسم خطة لنفسي من سنة اولى لا أشيل مادة ولا أجيب مقبول وولا ليه دعوة بالإمتياز والعياذ بالله ... وخلينا في خير الأمور اللي هي الوسط يعني جيد ...

وللحديث بقية ..

شايفك يا بتاع تالتة تاني ياللي بتغش من زميلتك .

[Nonna]

لا ماغشيتش

وانا في ثانوية عامة كانوا مسميني مسمار جحا في اللجنة

مافيش معلومة تعرف تعدي من فوق راسي

وسبحان الله دايماااااااا

كان بيبقى الكرسي بتاعي في النص

كان امتحان انجليزي

و قلبت اللجنة و جبت مشرفة الدور

و ما عملتش حاجة

صوتي علي

لحد ماوصل رئيس اللجان :wub:

فضل واقف لحد ما خلصنا الامتحان

وقاللي

مبسوطة يا ام نص لسان clp::

_ده اول لقب يوصف لساني احصل عليه

اه في القاب اخرى

هتيجي مناسبتها ان شاء الله

ما تستعجلوش_ :blink:

لحد ثانوية عامة وانا ما بغشغش عشان فقط الغش حرام

و سبحان الله لم النية كانت خالصة

دخلت طب

_و بقيت انا اللي خالصة :P _

بيتهيالي كفرت عن كل ذنوبي في الكلية ده :blink:

في تانية كلية

بالتحديد في امتحان الكيمياء الحيوية

وانا لا اكره في حياتي اد الكيميا و الرياضيات

الملازم كانت بتعدي من تحت ديسكي

ومع ذلك مش عارفة اغش

الدكتورة تيجي تقولي اي مساعدة الامتحان واضح انه وحش

وانتى الوحيدة اللي في المربع الاحمر ده اللي ما بتتلكميش و لا بتتفلتيش ولا اي حاجة

_منطقة خطر يعني

متلغمة جدا

ممنوع الاقتراب او التصوير من الاخر_

هنا ما غشيتش

عشان بصراحة اتكسفت mf-:

مش عشان اه حرام _حق ربنا اومال شهادة وهتحاسب عليها _ :sad:

انتهى بيا الحال يوم النتيجة

اربعة امتياز وواحدة مقبول

وطبعا المقبول كانت الكيميا :wub:

دلوقت لو اتسالت لو جاتلت الفرصة و ما اتكسفتيش تغشي

هتغشي؟

لاااااااااااااااااااا

عشان مش هعرف

فعلا الغش له ناسه

:sad:

[Nonna]

أخويا اللي أصغر في كلية تجارة

قبل امتحانه باربع ايام

كان امتحان اخر السنة

لما جه وقاللي

نونا

لخصي ده

_وده كان كتاب حوالي متين صفحة وشوية المفروض الخصهم_

قلتله طيب يعني انا هلخصهم في اربع ايام انت هتقراهم امتى

قاللي بس انتى لخصي وخلاص

تركت الطب

و بدات أذاكر تجارة ومحاسبة :wub:

قبل امتحانه بيوم

اخد الورق اللي كتبته

و بنطلون جينز قديم كان عنده

رجع اخر اليوم و معاه بنطلون جينز جديد

لبسه

البنطلون شكله حلو

يعني

زي البناطيل بتاعت موضة اليومين دول

الليي اوقات تبان بهتانة

واوقات تبان جربانة

مش هيفرق كتير

سالته ليلة امتحانك رايح تجيب بنطلون

بدل ماتذاكر

قاللي عاااااااااااال

يبقى مش واضح

!!!!

هو ايه اللي مش واضح

اتابي ايه

اخويا خد الورق اللي انا كاتباه

و البنطلون الجينز القديم

وراح طبع الورق على البنطلون

من ادام كدة

بحيث وهو قاعد يشوف الكلام

راح الامتحان

و امتحن

وحل كويس جدا

بس عاااااااد السنة clp::

[Modest]

و سيادتك يا سمسمة هانم سايبه المذاكرة و جاية هنا تفضحينا بعد عشرييييييين سنة من كتمان السر :wub:

لو اعتبرنا إن أيام ثانوي كان فيه غش لما كنا بنقعد لازقين في بعض في امتحانات الشهر و بننقل نقل مسطرة من بعضنا البعض على سبيل التعاون يعني بين الأصدقاء يبقى أكيد غشيت و غششت :P

لكن أيام الجامعة بصراحة حاااااولت الغش مرة واحدة clp::

في سنة تانية كان عندنا مادة اسمها جيولوجيا و كان فيها فرع اسمه Minerals و كان لازم نحفظ أسماء المينرالز دي واحدة واحدة بمواصفاتها و توجد فين و على عمق قد إيه في باطن الأرض و بيتعمل بيها إيه و مكوناتها و و و .. طبعاً لو الواحد كان ذاكرها بضمير ماكانش هايبقى فيه وقت لمذاكرة أي مادة تانية.

طنشتها خاااالص زي كل الدفعة تقريباً و فمت كاتب كل حاجة عن المينرالز دي ليلة الامتحان على كمبيوتر صغير أكبر من الكالكيوليتور بحاجة بسيطة كنت لسه شاريه و ماكانش ممنوع في الامتحانات و أيامها محدش من المراقبين كان عارف ده ايه لكن كانوا فاكرينُه calculator و خلاص.

أدخل بقى الامتحان ألاقيه عبارة عن سؤال واحد فقط و كان عن المينرالز .. قلت بس يا واد .. انت اللي فيهم و هاتسوّي الهوايل mf-:

بافتح البتاع علشان أنقل منّه بقى .. أتاريني ما عملتش save لكل البلاوي اللي سهرت أعبيها فيه :sad:

بابص على اللي جنبي و اللي ورايا و الي قدامي و بقية الدفعة لقيتهم ابيض يا ورد و فيهم اللي بيعمل كده :blink: و اللي بيعمل كده :blink: و كده :sad: و طبعاً فيهم اللي كان بيعمل كده :wub:

خرجنا من الامتحان كتبنا شكوى في الدكتور لإننا كده ساقطين ساقطين و حرام يضيع علينا تقديراتنا بسبب امتحان في مادة ممكن ما نستخدمهاش بقية عُمرنا.

كل الدفعة بلا استثناء وقعّت على الشكوى و بعتنا نسخة لعميد الكلية و رئيس الجامعة و نقيب المهندسين و كتبنا عليها نسخة لرئيس الجمهورية (بس ما بعتناهاش علشان ما نعرفش عنوانُه :D ) و الحمد لله جابت نتيجة هايلة و الدكتور اتهز جامد و لقيناه في امتحان آخر السنة جايب لنا امتحان السنة اللي قبلها و حليناه و كله طلع مرتاح البال متهني .. و توته توته فرغت الحدوتة.

باقول لك يا سمسم .. فيه أوكازيون هايل في دبنهامز اللي في التحلية .. بلا مذاكرة بلا وجع قلب إلحقي الأوكازيون قبل ما يخلص.

[semsema]

يارب تشوفي الرد يا رب قبل ما الإدارة المركزيه لإدراة المعتقلات تكتشف حركتك الشنيعه للتمرد...

لا ماهي خلاص كشفتني........مش فاهما ايه الموضوع بالظبط الواحد مايقدرش ياخد راحته في البيت ده.......حاجة تقرف :wub:

شدي حيلك كده علشان تحققي أملي وتدخلي طب....

كان نفسي .....بس للاسف دخلت ادبي

انا هاحجز 3 عربيات ترمس ليكوا أنتوا التلاته....من فرحتي بيكم بقول....

طيب امانه احجزيليهالي بامبي clp::

اغلب الغش يكون من الزملاء وتبادل اوراق الاجابات فقط .. هل هذا غش ؟؟

ازاي يعني تتبادلوا اوراق الاجابات؟......المفروض ان ورقة الاجابة كبيرة وماتقدروش تتبادلوها كدا علني والا كنتوا بتعملوا ايه بالظبط عشان استفيد....... قصدي افهم mf-:

ودي كانت بداية طالب فاشل مع الغش

عادي خالص اذا كان البيج بوس بيغش......مش هنغش احنا؟عادي عادي :blink:

se_ Elsyed مشاركة بتاريخ اليوم, 09:48 AM

الغش ده له ناسه

المرتين اللي حاولت أغش فيهم طلعت في منتهى العبط والفشل

فعلا الغش دا له ناسه........وانا عندي طرق خرافية للغش هقولها ان شاء الله بعد الامتهانات ماتهلص :sad:

بس عاااااااد السنة

ضحكتيني :sad: بس شكلكوا كدا كتبتولوا الاجابات غلط.....او يمكن هوا اللي نقل الاجابات بالعكس :blink:

[amrhoras]

أخويا اللي أصغر في كلية تجارة

قبل امتحانه باربع ايام

كان امتحان اخر السنة

لما جه وقاللي

نونا

لخصي ده

_وده كان كتاب حوالي متين صفحة وشوية المفروض الخصهم_

عرفتك انتى اختى ؟ اده انتى مش كنتى فى هندسه مدنى دخلتى امتى طب يابنتي لا اله الا الله التاريخ بيعيد نفسه

قلتله طيب يعني انا هلخصهم في اربع ايام انت هتقراهم امتى

قاللي بس انتى لخصي وخلاص

علشان تعرفى اننا عقول ذريه خصوصا بتوع تجاره :happy:

تركت الطب

و بدات أذاكر تجارة ومحاسبة :blink:

اهو اتعلمتى واخدتى خبره صح ولا لا هينفعك فى مجالك لما تقطعى الناس الغلابه مش بالمشرط انما بثمن الكشف هتقولى الله يمسيك بالخير ياخويا انت اللى علمتنى اصول التجاره على حق

قبل امتحانه بيوم

اخد الورق اللي كتبته

و بنطلون جينز قديم كان عنده

اومال اخترعوا الورق (البرشام ليه) يخساره البنطلون والله يكون فى عون الوالده هى اللى هتغسله وعون الوالد فلوسه ضاعت هباءا

رجع اخر اليوم و معاه بنطلون جينز جديد

لبسه

البنطلون شكله حلو

يعني

زي البناطيل بتاعت موضة اليومين دول

الليي اوقات تبان بهتانة

واوقات تبان جربانة

مش هيفرق كتير

سالته ليلة امتحانك رايح تجيب بنطلون

بدل ماتذاكر

قاللي عاااااااااااال

يبقى مش واضح

!!!!

هو ايه اللي مش واضح

اتابي ايه

اخويا خد الورق اللي انا كاتباه

و البنطلون الجينز القديم

وراح طبع الورق على البنطلون

من ادام كدة

بحيث وهو قاعد يشوف الكلام

راح الامتحان

و امتحن

وحل كويس جدا

والله فكره حلوه طب قوليله فين المكتب اللى طبع الحاجات دى :blush2:

بصراحه انا هعترف ادام المنتدى كله وربنا شاهد

صراحة انا كنت من اعداء الغش لكن فى سنه تالته تجاره جامعه الزقازيق التيرم الاول جيت اذاكر اقتصاد كان كتاب ممل ومليان نظرى

وانا اكره النظرى جدا

وعملت زى اخوكى وكانت اول مره واخر مره

خليت اختتى تلخص مع انها كانت بتمتحن

المهم لخصت ورحت جايب ورقة كراسه عاديه قطعتها 4 ارباع وهاتك ياكتابة ونزلت لمكتب تصوير

لقيت والله امم

راح الراجل قايل اللى عاوز البرشام الورقة ب 50 قرش تصغير :sad: استغلال وربنا ولوسمحتوا تعالوا اتصفوا فى صف

يادى الفضيحه ام جلاجل يادى الجرصه ام حناجر

المهم صغرت الورق ودفعت الفلوس ورجعت

قومت الصبح طبعا قلقان من الاحلام اللى حلمتها ولقيت الجو هوا وبرد خلو بالكم من هواء دى

المهم رحت اللجنه قعدت ولعت سيجارتى واتكلمت مع صحابي اى حد عاوز حاجه انا ف الخدعه طبعا

جه دكتور الصراحه محدش بيحبه من اعضاتء التدريس او الطلبه لانه رخم

المهم اتخانقت وياه ع السجاير والكلام مع اننا قبل اللجنه

وبقى واخد باله منى جددددداااااا

الامتحان بدأ وبالصدفه الاسئله اللى كتبتها هى اللى جت فى الامتحان زى مايكون غاشينه منى

كتبت رؤووس الاسئله وطبعا اجابات مفيش ( مع ان وربنا كان معايا الاجابات النموذجيه)

جيت فى اخر 30دقيقه قريت الفاتحه والمعوذتين ودعاء اللهم نجعلك فى نحورهم ونعوذ بك من شرورهم

وتوكلت على ربنا وطلعت البرشامتين ووضعتهم تحت ورقة الاسئله :ninja:

وقاعد بقول ياهادى لقيت عم الدكتور اللى كنت اتخانقت معاه جاى

قولت خلاص اول مايعدي نطلع كده تماموز

الحمد لله انه يقترب 3 خطوات 2 خطوه 1خطوه واحده

ويأتى رياح عاتيه فى لحظة التفاته الى العبد لله

لتنقلب ورقة الاسئله

وينكشف المستخبي منورة وسط الديسك

وانا باصص لسيادته وانا مذهول ماهذا انا معرفش حاجه

لقيت البيه بيقولى تعالالى يالمض بالحضن لجنة خاصه وحرمان من الامتحان سنتين

يادكتور يهديك يرضيك

قالى لا ممكن ابدا هدبس البرشام يعنى هدبس البرشام

الى ان واتتنى فكره سريعه

قولتله طيب نتفق اتفاق

قالى قول

قولتله ياسيدى البرشامه فى ايدك وورقة الاجابات فى ايدك صح؟

قال ايون

قولتله طيب قارن بما اننا فى امتحان اقتصاد مابين اجابات البرشام والورقة

لو لقيت حاجه منقوله دبس الورقه واعملى حرمان من 4 سنين مش سنتين

قالى حلو الكلام

افتح اقرا اده يابني انت كدى ساقط وبالثلث مش محتاجه

انت سايب اغلب الصفح فاضيه لا عدى لانك هتشيلها هتشيلها

قولتله طيب قول انشا الله بقى

شكرا يادكتور هات بقى البرشام

قالى قعطه

وحاضر وطبعا اعطانى محاضره فى الاخلاق ازاى اكون لمض وانا غلطان

طبعا شمتان

ويشاء السميع العليم انى اطلع بجيد فى الماده دى

بس الحمد لله لم اطلع بمواد طيلة حياتى او اعيد سنه

شكرا للفضايح بالله عليكي بتفكريني ليه كفاية كمية الضحك اللى اخدته من صحابي والاسره

اصل الصدفه الغريبه العظيمه ان الوالده كانت موصيه الدكتور ده بالذات عليا :lol:

شكرا يا نونا

**********

معلش ياسمسه نشر مكن غير ماقوله قبل ماكمل المداخله ...لانى داخل ع التليفون وكان فى كبسه

المهم

ممكن اقولك على حاجه

الغش عمره مابيجيب حق. ولا باطل لانه بمعنى اصح بدال مانا كنت بكتب البرشام كنت حفظته احسن انما ضيعت وقتى ع الفاضى

انتى توكلى على الله ذاكرى كويس لو حاجه وقفت ادامك اقريها مره واتنين وتلاته هتلاقى نفسك فهمتيها وممكن تجاوبى عن طريق فهمك لها

ربنا ينجحك يارب وتتوفقى وتدخلى كليه اللى انتى عوزاها بس انصحك بلاش تفكرى فى تجاره :rolleyes:

بالتوفيق وموضوع لذيذ ونعتذر عن التأخير

تحياتتى عمرو

تم تعديل 31 يناير 2008 بواسطة amrhoras

[semsema]

و سيادتك يا سمسمة هانم سايبه المذاكرة و جاية هنا تفضحينا بعد عشرييييييين سنة من كتمان السر

مين؟ انكل مودست هنا :blink: فين الكابوتشينو.........بقى ده اسمه كلام ده؟ :sad:

و فمت كاتب كل حاجة عن المينرالز دي ليلة الامتحان على كمبيوتر صغير أكبر من الكالكيوليتور بحاجة بسيطة كنت لسه شاريه و ماكانش ممنوع في الامتحانات و أيامها محدش من المراقبين كان عارف ده ايه لكن كانوا فاكرينُه calculator و خلاص.

أدخل بقى الامتحان ألاقيه عبارة عن سؤال واحد فقط و كان عن المينرالز .. قلت بس يا واد .. انت اللي فيهم و هاتسوّي الهوايل

بافتح البتاع علشان أنقل منّه بقى .. أتاريني ما عملتش save لكل البلاوي اللي سهرت أعبيها فيه

هيا بصراحه حاجة ترفع الضغط..........بس دا مامنعش اني كنت هموت من الضحك اهو دا بقى عقاب اللي يغشوا :D

باقول لك يا سمسم .. فيه أوكازيون هايل في دبنهامز اللي في التحلية .. بلا مذاكرة بلا وجع قلب إلحقي الأوكازيون قبل ما يخلص.

تصدق فكرة.......بس مين دا اللي هيوديني التحلية؟ :happy: خليني بس اخرج من البيت الاول :ninja:

بعد ماشفت ردودكوا......وعرفت ان كلكوا تقريبا كنتوا بتغشوا :blush2: ماشي ماااااااااااااشي

لنا عودة بعد الامتحانات ان شاء الله اقلكوا على بعض اساليب البنات في الغش :lol:

حاجة تفرح :rolleyes:

[vipwithyou]

كدة يا عمورة بتغش وكمان لسانك طويل ههههههههه

انت عارف لو كان مسكك د / طلعت الدمرداش كنت مريح سنتين يا حلو ومحضر غش وكنت اتبهدلت فى الدور كله

حظك حلو بقى

المهم انا فى اولى كليه الفت 3 اسئلة فى مادة القانون التجارى وبعتهم بـ 300 حـ لعشر طلبه كل واحد دفع 30 حـ

ولما دخلنا الامتحان وجدت المتحان بالنص زى ما قلته وفضلت ساعة اضحك فى اللجنه وافتكرت بعد كدة انى ما بأحلش وانى اساسا ً ما ذاكرتش الاسئلة دى لكن ربنا عداها والحمد لله بدعاء الوالدين وأخدت طبعا الـ 300 حـ بعد الامتحان مباشرة والعيال كانوا معتقدين ان الامتحان متسرب ليا

[amrhoras]

كدة يا عمورة بتغش وكمان لسانك طويل ههههههههه

انت عارف لو كان مسكك د / طلعت الدمرداش كنت مريح سنتين يا حلو ومحضر غش وكنت اتبهدلت فى الدور كله

حظك حلو بقى

المهم انا فى اولى كليه الفت 3 اسئلة فى مادة القانون التجارى وبعتهم بـ 300 حـ لعشر طلبه كل واحد دفع 30 حـ

ولما دخلنا الامتحان وجدت المتحان بالنص زى ما قلته وفضلت ساعة اضحك فى اللجنه وافتكرت بعد كدة انى ما بأحلش وانى اساسا ً ما ذاكرتش الاسئلة دى لكن ربنا عداها والحمد لله بدعاء الوالدين وأخدت طبعا الـ 300 حـ بعد الامتحان مباشرة والعيال كانوا معتقدين ان الامتحان متسرب ليا

مين اللى بينكش ف الملفات القديمه :blush2:

تامر حتى انت ياتامر :ninja: :happy:

طلعت الدمرداش يااااه الاسم ده مش غريب عليا دكتور الصفر العالمى (لو المنحنى اترسم غلط صفر لو الديسك مكسور والمنحنى مطلعش مظبوط برده صفر لو سنه زياده او نقاصه صفر)

كان دكتورى فى سنه اولى وتانيه اما تالته كان دكتور جمعه عامر انت كنت فى جامعة الزقازيق :rolleyes: واضح ان مش لوحدى هنا ومتراقب

[ليالي الغربة]

بصراحة انا كنت بغشش ساعات صديقاتي يعني بيطلبوا مني اساعدهم فكنت خجلا بقولهم الاجابة انما انا كنت مش باخد اسئلة من حد يعني كانت الحكاية خجل منهم مع اني كنت عارفة انه غلط بس كانوا بيزعلوا جامد لو رفضت وتقعد تقولي ارجوك بس كلمة او سطر نقليني وساعديني وانا طبعا قلبي حنين وطيب :happy: بس بصراحة كنت بكره اطلب مساعدة حد او اغش لنفسي ومرة في الجامعة كان في سؤال صعب اني احلوا والي حصل اني بالغلط وبالصدفة بصيت لمسابقة زميلتي الي جمبي فشفت الاجابة بالغلط ومن غير قصد واقسم بالله العظيم اني استحرمت اكتبها وانقلها عنها وقلت مش هكتبها وان شاء الله ربنا هينجحني من غيرها وفعلا نجحت والحمدلله .ومرة حصلت معايا حادثة مضحكة في زميلة صاحبتي فضلت تطلب مني اقولها اجابة سؤال وانا رافضة علشان كانت الاجابة طويلة والاستاذ هيعرف ساعتها وهتبقى مشكلة فلقيتها فجاءة واخدة الورقة مني وانا مت رعب :lol: وربنا ستر ورجعتها بسرعة لما لاقيتني عصبت وزعلت :lol: .

[semsema]

اخـيرا خــــــــــــــــلـــــــــــــــصـــــــــــــــت الامتحانات

000000000000000000000

في طريقة كنا بنعتمدها في الـغش انا والبنات صراحة ماكنتش بغش معاهم بس كنت بساعدهم واغششهم على اساس ان احنا اصحاب يعني

كنا نحاول نشغل المراقبة عشان ماتاخدش بالها باللي يـغشوا

يعني لو التكييف مفتوح واحنا هنمووووت من الحر نقولها تقفلة

او مثلا لو التكييف مقفول واحنا اصلا هنمووووووووت من البرد نقولها تفتحه وهكذا

في مرة كان عندنا امتحان دوري صعب طحن وكانت المراقبة علينا اخت اللاعب السعودي "مالك معاذ"

واذ فجاة عدت من قدامي واذ فجاة بردو وقفت جنبي تقرا اجاباتي

قلت فرصتي واعمل جميل في البنات قلتلها: ابلة ممكن اطلب منك طلب؟

_ خير ان شاء الله؟

_ لا هوا خير بس طلب سخيف شوية :)

_ ايش في؟

_ اممممممممم :blush2: ممكن يعني لو سمحتي تجيبيلي توقيع مالك؟ :blush2:

وحدة من البنات حبت تستهبل قالتلها: وانا وانا وياريت بالمرة تسلميلي عليه؟

شكلها ماصدقت وقعدت تتكلم عنه وعن فضائله وانشغاله بالدوري ومش عارفة ايه :blink:

ومحدش فينا كان معها وهيا تتكلم wst::

وفي هذه الاثناء كله اغتنمها فرصة اللي فتحت الكتاب واللي نقلت الاجابة من زميلتها واللي واللي

وعدى الامتحان على خير بفضل ذكائي الخارق wst::

دي طريقة مثالية وخاصة في فصل كله مشاغبين :unsure:

[أسد]

طول عمري وإلى الآن أكره الغش ..

جداً .. جداً .. جداً ..

ولكني أثناء الكلية . كان لي صديقان أقرباء لي جداً ..

كنا بنذاكر مع بعض ...

وكان مستوانا متفاوت في بعض المواد ...

فكان أحدنا متفوق مثلاً في مواد الإدارة .. وآخر متفوق في الكمبيوتر .. وآخر متفوق في الرياضيات أو المحاسبة مثلاً ...

وكنا في الإمتحانات تحين لنا الفرصة لنجلس جوار بعضنا ...

ونتعاون .. في الإجابة ..

كان بمثابة تعاون ..

ولازلت أسميه تعاون وليس غش ..

طبعاً هو غش ...

بس علشان ضميري مايتعبش قوي