الحاسبات اليدوية ممنوعة

[Proud Muslim]

أنا بقول نناقشه هناك في موضوع التفتيش الجامعي ..

علشان متكنش المواضيع زي بعضها ..

و لا ايه ؟؟

و ربنا يكرم حضرتك و تحصل على الدكتوراه .. و نشوفك أستاذ و رئيس قسم باذن الله تعالى . :D

[Masrawy]

أيه يا جماعه ...

هتقلبوا علينا المواجع ليه بس ...

و الله يا عم براود .. أنا فعلا في نفس وضعك و بعاني من نفس المشكله .. معادلات غبيه و أسلوب دراسه غبي و متخلف و امتحانات كل الهدف منها أرهاب الطلبه أو كسبهم و خاصه في السنين المتقدمه اللي زي تانيه وتالته عشان الدكاتره يعرفوا يلموا اكبر عدد من الطلبه معاهم في المشاريع بتاعه البكالوريوس ..

و طبعا أي طالب أو مهندس في قسم الأتصالات يعرف مأساه الطلبه مع القوانين ... ال Microwave و ال Antenna ... و خاصه لو مع دكتور من عينه الأخ بتاعنا ..

ده غير مهازل خناقات الدكاتره العلنيه و خلافاتهم و و و ...

موال طويل ... و يجيوا بعد كده يتشطروا علي الألات الحاسبه ..

طب أنا واحد في بكالوريوس السنادي ... و طول فتره الكليه متعود علي أستخدام الأله الحاسبه المبرمجه .. أزاي أجي في اخر سنه و أرجع أتعود علي نظام الأله الحاسبه العقيمه من الأول .. و الله امتحانات التيرم الأول كانت عذاب بالأله الحاسبه ده ..

و طبعا بما أننا هنبتدي موسم نتايج هندسه .. فأدعو الله أنه يوفقنا كلنا يا جماعه .. و ننجح كلنا و نطلع من المخروبه ده علي خير ...

مع تحياتي ..

مصراوي ...

[drmsaber]

الأخ الطالب (الزميل المهندس-عن قريب- ) مصراوى

أولاً دعواتى لك بالنجاح و التفوق على الدوام فى الكلية و ما بعدها (الحياة العملية).

ثانياً : وددت لو أنك راجعت نفسك ثانية و قرأت ما كتبت عن الأله المبرمجه و قوانين الإتصالات .

فطالب الهندسة مطلوب منه الإلمام بالقوانين و المعادلات -و حفظ بعضها - و ليس إجادة إستخدام أله مساعدة لو لم تتوافر لديه غابت قدرته على حل المشاكل .

والدليل ما فعلته فى إمتحانات التيرم الأول ...نعم كانت تجربه مرهقة ذهنياً لك ..و لكن تأكد أنها مفيدة جداً لتدريب ذاكرتك و معالجتك الذهنية للمشاكل الهندسية .

مرة أخرى المهندس الناجح يحل مشاكله بعقله أولاً و مساعدة الأله الحاسبه أو برنامج سوفت وير ثانياً .

أرجو أن أقرأ أخبار حلوة عن النتائج قريباً .

[Masrawy]

أخي و صديقي العزيز دكتور صابر ..

فطالب الهندسة مطلوب منه الإلمام بالقوانين و المعادلات -و حفظ بعضها - و ليس إجادة إستخدام أله مساعدة لو لم تتوافر لديه غابت قدرته على حل المشاكل .

و الله أنا متفق معاك تماما في كل كلمه .. كل الكلام ده صحيح و لكن .. ألم بالقوانين و أعرف أزاي أستخدمها أو زي ما قلت حضرتك " أحفظ بعضها " شيء .. وأني أطبقها في كل مشكله تواجهني أو مسأله عايز أحلها شيء تاني ..

يعني مثلا هضرب لحضرتك مثال بسيط .. حل المعادلات و بالذات في ثلاث مجاهيل و أكثر ... طبعا في طرق كتير لحلها بالتعويض أو المصفوفات او أو .... كتير ... لكن حل المسأله ده يدويا بياخد وقت قد أيه ؟؟ و الأمتحان زمنه قد أيه ؟؟ و أصلا فقره حل المعادلات ده مبتبقاش هي المسأله لا ده حاجه في وسط خطوات الحل ... طبعا أكيد حضرتك عارف الأمتحانات و نظامها عندنا ..

و بعدين مافيش داعي أني أقارن نفسي بطلبه زمان اللي مكانش عندهم الألأت الحاسبه اللي زي ده و اللي كانوا بيعتمدوا علي نفسهم و كل الكلام ده .. و الأ بلامثل .. يلاش كمبيوتر كمان عشان طلبه زمان مكنوش يعرفوا الكمبيوتر و ما أشتغلوش عليه و ما الي ذلك ..

النقطه اللي أنا عايز أوصلها .. مش عيب أني أستخدم اله حاسبه مبرمجه .. أو أني أعمل سوفت وير علي كمبيوتر يحللي مشكله .. لان ده من سمات و متطلبات العصر اللي أنا فيه دلوقتي .. بالعكس .. أذا كان الناتج هيطلع صح - و ده شيء أكيد - مع توفير في الوقت يمكن أستغلاله في حل مشاكل تانيه .. يبقي انا الكسبان ..

و لا ايه ..

عموما شكرا يا دكتور علي النقاش الجميل .. و بأنتظار ردك .. ده غير أني عشامان في دعواتك لي و لزمايلي و أخواني الطلبه اللي منتظريين نتايجهم ..

مع خالص تحياتي ..

مصراوي ..

[drmsaber]

الأخ المهندس مصراوى

النقطه اللي أنا عايز أوصلها .. مش عيب أني أستخدم اله حاسبه مبرمجه .. أو أني أعمل سوفت وير علي كمبيوتر يحللي مشكله .. لان ده من سمات و متطلبات العصر اللي أنا فيه دلوقتي .. بالعكس .. أذا كان الناتج هيطلع صح - و ده شيء أكيد - مع توفير في الوقت يمكن أستغلاله في حل مشاكل تانيه .. يبقي انا الكسبان .. 

متفقين على ضرورة تعلم إستخدام ما يتوافر لك من تكنولوجيا.

أما المنع فى الإمتحانات كان بسبب الغش المنتشر بإستخدام ذاكرة الحاسبات اليدوية القابلة للبرمجه وليس حجراً و رده و إستسهال.

و الأستاذ واضع الإمتحان -القاعده و ليس الإستثناء - بيقدر وقت الحل قبل و بعد الإمتحان و ممكن يعيد توزيع درجات الأسئلة إذا وجد أن هذا فى صالح نسبة كبيرة من الطلاب و أن الطلاب أشتكوا من طول سؤال معين.

الملخص : لا عليك من طول خطوات حل المعادلات فالمهم محصلة الأسئلة كلها و مستواك بالنسبه للدفعه .