عزبة الهجانة

[zizetta]

آلمني الحظ عندما حضرت في جمعية خيرية مع بعض أهل الخير لتوزيع بعض من فضل الله على بعض الأسر الفقيرة في منطقة عزبة الهجانة – وهي من العشوائيات التي تقع في الكيلو 4.5 من طريق القاهرة السويس ..

خلصت من هذا اللقاء في هذه العينة إلي ما يلي:

1-حوالي 90% من الأسر تعولها النساء – إما لوفاة الزوج أو لمرضه

2-رب الأسرة يعمل (أرزقي) .. يعني عامل باليومية يشيل تراب ينزل أثاث .. عامل مناولة يعني ورزقه حسب التساهيل.

3-متوسط دخل الأسرة( 7 أفراد) 300 – 400 جنيه في الشهر.

4-القليل منهم بالتعليم ومعظم الذين بالتعليم في التعليم الأزهري

5-معظم الأسر تسكن بالإيجار الذي يصل الي 100 جنيه و150 جنيه في الشهر لحجرتين على الأكثر. معظم المساكن عبارة عن عشش ..بعض الحجرات ليس لها سقف .. ويختبيء الأطفال تحت الأسرة وقت المطرة .. وبعض الحجرات ليس لها أبواب .. ومعظم الحجرات ليس بها أسرة بل يفترشون الأرض..

6-كلهم مرضي .. معظم النساء تعاني من الغدة الدرقية أو السكر أو الضغط أو كلهم .. والرجال ظاهرة غريبة ان كلهم عندهم الكبد والعديد منهم يعاني من أمراض القلب – وبعضهم مشلول لا يقدر على الكسب.

7-بعض النساء هجرها زوجها نتيجة مرضها وبعضهم تزوج عليها وتركها هي وأبنائها ..

8-متوسط عدد أفراد الأسرة الواحدة 7 أفراد .

9-هناك حالات إنسانية عن مسنين يعيشون بمفردهم ولا يجدون ثمن الدواء منهم رجل مسن يقارب الثمانين آتي وقال بالحرف الواحد .. أنا مش عايز آكل ولا أشرب أنا عايز بس العلاج ده ( وكان أوجمنتين وبروفين ) وطبعا معروف ثمن الأوجمنتين في مصر شكله ايه ..

10- معظم الفتيات والأولاد تركوا المدارس لعدم قدرة الأسرة على الإنفاق عليهم ..

11-حضرت سيدة عجوز لا تستطيع أن تعد عدد خطوط التجاعيد في وجهها وهي تحمل كرنبة – تعيش بمفردها وكل ما تطلبه هو شوية رز لأن لها شهور لم تذق الأرز ونفسها تطبخ محشي كرنب ..

12-سيدة أخرى حضرت بصحبة أولادها الصغار وقالت انا نفسي في مكرونة عايزة أطبخ للعيال مكرونة .

13-حضرت فتاة في العشرينات تقول انها تعيش مع اختها بمفردهم وان اختها تعاني من الصرع .. وكل مشكلتها انها تريد دواء الصرع لأختها التي طلقها زوجها بسبب هذا المرض وهم لا يجدون ثمن الدواء ..

14-سيدة أخرى تحدثت وهي تبكي .. كل مشكلتها ان الناس بيزاحموها علي علب الزبالة .. لأنها هي العائل للأسرة وكل شغلتها انها تجمع بقايا الخبز والبلاستيكات من القمامة وتفرزها وتبيعها – الخبز يستخدم علف للحيوان والبلاستيك يباع لمصانع البلاستيك التي تعيد تصنيعه..

15-الحقيقة حالات كثيرة جدا يصل عددها لما يزيد عن خمسين حالة حضرت اللقاء بهم جميعا

هذه الحالات ليست عشوائية بل لها بحث إجتماعي قامت به الجمعية الخيرية التي لها مقر هناك .. ومعظم الأسر هذه تحصل على معاش شهري ضئيل من هذه الجمعية يتم تمويله من أهل الخير .

الحقيقة الواحد قيمته قلت أوي في نظر نفسه لما شفت هذه النماذج .. يعني بنعمل دليفري كسل يعني في الشهر بكام – فيها ايه لو بطلنا الدليفري شهر مثلاً والناس دي استفادت بالفلوس في العلاج أو الحصول علي المواد التموينية الأساسية لمعيشتها ومعيشة أولادها.

تأملت هذا الوضع ووجدت أن معظمهم من الأقاليم الذين نزحوا الي القاهرة من عشرات السنين طلباً للرزق .. الحكومة مقصرة اوي في حق الناس دول .. واحنا كمان .. كمان ليه الحكومة ما تفننش الهجرة الداخلية .. يعني توفر فرص عمل ومعيشة كريمة في البلاد اللي بينزح أهلها للحضر ..

علمت من البعض أن هناك عشرات الشباب المصري الذي يتزوج إسرائيليات .. وطبعا أولاده جنسيتهم لأمهاتهم يعني ولاد المصريين حيكونوا إسرائيليين .. ايه السبب في كده .. أكيد بيوفروا لهم الدخل والمعيشة (الكريمة) اللي بيحلموا بيها ..

قارنت بين هؤلاء الناس وبين أهل غزة الذين أنفقوا الملايين في شراء الأطعمة والوقود من رفح ..

قارنت بينهم وبين سكان النهضة المعمارية الباهظة التي تجتاح كل مكان تذهب اليه الآن في مصر ...

مشكلة الناس دول الأكل ..والعلاج .. بس

طبعا من الجانب الآخر .. هم يعتبروا مؤخرين لمسيرة التقدم فقد يعتبرهم البعض عالة علي المجتمع .. لأنهم غير منتجين .. أو أنهم أوكار للفساد كا لمخدرات أو السرقة .. ولكن هذا حصاد الفقر والجهل والمرض..

سمعت الدكتور أحمد زويل في أحد اللقاءات يقول أن الإصرار والرغبة هي دافع للنجاح ..ولكن لا يوجد نبوغ أو تفوق بدون رعاية .. وإن لم يكن وجد هذه الرعاية في أمريكا لما وصل الي ما وصل اليه لو كان في مصر ..

لذلك فإنني هنا أدعو إخواننا وأخواتنا للتكافل في مساعدة مثل هؤلاء الناس .. وما نستناش رمضان .. الناس دي بتحتاج تاكل وتتعالج طول السنة ..

بالمناسبة الناس دول كان فيهم مسلمين ومسيحين .. يعني المساعدة للمحتاج دون النظر لجنسيته او ديانته .

ساعات بنكون عايزين نعمل خير بس منعرفش حد أو منعرفش نعمل ايه .. ياريت ندور ونشوف الناس دي بنفسنا علشان نحس ان أي شيء عندنا هو فضل من الله ونعمة .. والحمد لله رب العالمين

تحياتي

زيزيتا

[Folana]

السلام عليكم ورحمة الله....

الاخت الفاضلة زيزيتا.....أعلم جيدا ماتتحدثين عنه....ولا أخفى عليك مدى ألمى عند قراءة موضوعك هذا.....

.وقد وصفت ماتفضلتى بعرضه علينا...فى هذه الكلمات...

http://www.egyptiantalks.org/invb/index.ph...15&start=15

برجاء اضافة اسم الجمعية وعنوانها من اجل تيسير الاتصال بهم لمن يرغب بالمساعدة

تقبل الله منا ومنك صالح الاعمال..... :lol:

[zizetta]

قرأت كلامك يا مدام فولانة والله كأنك بتوصفي الصورة اللي شفتها بالظبط ..

عموما هو تم التعرف علي الجمعية من خلال حالة معينة عرفتها من مندوب " مساعدة " وهي جمعية برضة للمساعدة عنوانها علي النت www.mosaada.com

لكن الجمعية اللي رحناها هي جمعية ابي حامد الغزالي ومقرها الرئيسي بمصر الجديدة- المحكمة .. لكن احنا رحنا الفرع اللي في عزبة الهجانة ..

ممكن تتصلوا بالأستاذ/ وائل هو رئيس الجمعية في عزبة الهجانة (وهو أصلا بيشتغل في بنك سوسيته جينيرال) وتليفونه :

0101782061

وممكن الإتصال مباشرة بالأستاذ/ شحاته .. هو مندوب الجمعية في عزبة الهجانة ويسكن هناك ويعلم الحالات جيداً ويعرف السكان وظروفهم وهو الذي كان بصحبتنا في الزيارة لمقر الجمعية وليس لديه مانع في الإتصال به لأي عمل خيري .. وتليفونه هو :

0106267408

جزاكم الله خيرا ً

زيزيتا

[إيزيس]

مدام زيزيتا

أسجل محبتي وتقديري لشخصك ومش هاخبي عليك غبطتي لك لأني أتمنى لما أستقر في مصر أشتغل في الجمعيات الخيرية ولحين يتحقق الأمل نعتمد على والدتي الحبيبة التي تطوعت لهذا المجال بعد المعاش

ولكن لا اعرف لماذا تذكرت النقاش الذي احتدم منذ فترة عن الكرة وقارنت بين أماني هؤلاء الناس اللي بصراحة ذنبهم في رقبتنا كلنا لأن الحكومة كفاية عليها قوي الكورة والفنانين والملايين المهدرة والمنهوبة والناس يا عيني عليهم كل أملهم رز و مكرونة

لو كل واحد فينا عود أولاده إن حتى المصروف البسيط لما يحرم نفسه منه يومين في الأسبوع ويروح بنفسه يشتري بيه حاجة لأسرة من الاسر الفقيرة ويعرف إن الفلوس اللي بيصرفها ببساطة على حاجة مش مهمة ممكن تفيد ناس محتاجينه هيتعلم يحس بالناس دي ويمكن يكون ده أملنا في مسيقبل أحسن وربنا يوفق الجميع

والله وجعني قلبي الله يسامحك ياللي في بالي .

[امانى]

اختى الفاضلة زيزيتا

اتقدم لكى بكل احترامى وشكرى وتقديرى لما تفضلتى به من توضيحات نحو اهل هذه العزبة وانا متأكدة ان فى زيها كتير فى مصر

ربنا يقدر كل واحد على فعل الخير قدر استطاعته وده بيكون فى ميزان حسناته عند الله

اما بالنسبة للمسؤليين فيا ريت ينظرون لهذه الاسر بعين الرحمة التى سبقت العدل ولا استطع ان ان اقول لهم على لسان حال

هؤلاء الاسر غير حسبنا الله ونعم الوكيل

اشكرك اختى الفاضلة وربنا يقدرنا على فعل الخير دائما امين يا رب العالمين

امانى

[رورة]

زيزيتا موضوعك بجد رائع.. ربنا يرزق الناس دي ويرزقنا برزقهم ..

ممكن أنقل موضوعك دة على الإيميلات عشان بس صوتك يوصل لأكتر من منتدى..

دة بعد إذنك طبعا

[zizetta]

قرنفل .. أشكرك علي تواجدك في مواضيعي المتواضعة .. جزاكي الله كل الخير لمتابعتك لهذا الموضوع بالذات .. لأنه والله دعوة للخير .. جزا الله والدتك الخير لهذا الاتجاه الذي سلكته .. وتقدري عن طريقها برضة تتعرفي علي حالات حقيقية محتاجة ..

عنك حق والله .. المشكلة مش مشكلة الكرة والفنانين وبس .. لو بتسمعي علي حاجة اسمها ستار أكاديمي علي القناة اللبنانية LBC حاجة بصراحة عجيبة .. وشادة كل الشباب والبنات اللي في سن المراهقة .. بصراحة مش عارفة المشتركين فيها دول مالهمش أهل .. ربنا يستر علي ولادنا..

عارفة يا قرنفل أجمل شيء في الصدقات ايه .. انك تتصدقي وانتي مش معاكي .. يعني ما تتخيليش لما الأشياء خلصت وكان فيه ناس جت علي السمع مرضيناش نرجعهم بدون شيء فبدأنا نديهم فلوس لآخر جنيه معانا .. وكم كان إحساسنا بالسعادة واحنا راجعين مفلسين مالاً أغنياءً رضاً وحباً وإيماناً ...

وسلامة قلبك يا قرنفل ..:sad:

العزيزة أماني.. طبعا فيه أماكن كتير في مصر .. وفيه حالات فردية نعرفها تدمي القلوب ..فقر بعد عز ومرض بعد صحة كفانا الله وكفاكم وكفي الجميع سوء تغير الأحوال .. وفقك الله وجزاكي كل الخير ...

روزة .. أنا معنديش مانع طبعا تبعتيها ايميل وخاصة اني استأذنت الأخوة وائل وشحاته علي عرض أرقام تليفوناتهم علي النت ولم يكن لديهم مانع ..

بس يا ريت لمن تتوسمي فيهم الأستجابة ..حتى لا يكون مجرد معلومات أو حدوته ناس غلابة بنحكيها..

تحياتي لكم جميعاً وجزاكم الله خيراً

زيزيتا

[إيزيس]

الله عليكي يا زيزيتا فعلا والله أعرف واحدة كانت تروح بيتها من غير ولا جنيه في جيبها لما تقابل حد محتاج وربنا بيكرمه أكتر مما تتصوروا

[رورة]

أختي زيزيتا.. صعب إني أتوسم في حد الاستجابة وخاصة ان الي بيعمل اعمال الخير مش هيروح يقول للناس انا بعمل اعمال خير. لكن انا عارفة ان بيكون في استجابة أكيد لما بنعمل الإيميلات فوروارد من شخص لشخص مش يمكن يقع الإيميل فإيد وواحد إبن حلال.

دي نقطة

النقطة التانية إيه المانع لما أنقله حتى لو مفيش استجابة يبأة مجرد العلم بالشيء.. انا مثلا اول مرة أعرف ان في منطقة عندنا فمصر اسمها عزبة الهجانة.. وأول مرة أعرف ان في ناس عايشين في الحضيض كدة ..

خلي الناس تعرف عشان لما تشوف حال غيرها تقول الحمدلله .. وانتي الي هتخدي ثواب الكلمة دي من فم كل واحد بيقولها لأنك كنتي السبب في إنه يقولها..

[zizetta]

رورة .. جو أهيد .. جزانا وجزاكم الله الخير.

زيزيتا

[أسد]

جمعية رسالة الخيرية

http://www.resala.org/

أقترحها لمن يريد أن يساعم في أعمال إنسانية في مصر

وأيضاً جمعية دار الأورمان

http://www.dar-alorman.com/

[se_ Elsyed]

.. المشكلة مش مشكلة الكرة والفنانين وبس .. لو بتسمعي علي حاجة اسمها ستار أكاديمي علي القناة اللبنانية LBC حاجة بصراحة عجيبة .. وشادة كل الشباب والبنات اللي في سن المراهقة .. بصراحة مش عارفة المشتركين فيها دول مالهمش أهل .. ربنا يستر علي ولادنا..

عارفه يا زيزي لو جت على الكام عيل والبت البايظين دول .. هانقول ماشي أهم قلة منحرفة ما تربوش في بيوتهم نص ساعة واعتبريهم يا ست شغالين في ملهى ليلي ...

لكن المصيبة الكُبرى إن أقل عدد مكالمات ترشيح وتأييد وتبويظ بتيجي لأرقام البرنامج اللي هي خطوط متأجرة من القناة بمبالغ زهيدة والبرنامج اللي بيلم الهُبر الكبيرة لا تقل عن 20 مليون مكالمة من جميع انحاء بلاد العروبة ... بلاد النشامى عشان يكتروا التصوويت على فلانه أو فلانه من العيال الهيبيز دول

عارفه إن أقل مكالمة لا تقل تكلفتها يمكن عن 10 دولار ؟!!!!!

طلعي ألة حاسبة كده وأحسبي المبالغ الخرافية دي عشان تعرفي المأساة اللي الشعوب فيها

ده غير مسابقات القمار بتاعت : لو عرفت إسمك إيه وإسم أبوك إيه ... إتصل على زيرو مش عارف كام عشان تكسب سلطانية زبادي تلبسها على راسك وتمش تتعايق بيها