تحب تعمل إيه لما تنزل مصر

[شموع]

الله عليكم

انا قلت لما اكتب ان نفسي افرح

ولكن لما قرأت اخبار اهل المنتدى كلها تفرح ماشاء الله تبارك الله

مبروك للجميع وربنا يبارك

انا نفسي لما انزل مصر احضر فرح وافرح مع الاهل

ادعو لاخي ربنا يتم له على خير مع بنت الحلال اللي ربنا اختارها له

ويسهل لماما تعمل العمليه لعينها ويمتعها بنظرها امين يارب

[badroora]

انا بقي روحت فى نوفمبر اللى طاف الاقصر واسوان وكانت رحلة جميلة

المرة دى نزلت اسبوعين على غفلة كدا مكنوش مترتبين بس اللى نفسي اعمله بجد فى الاسبوع اللى باقي

اروح القناطر الخيرية لانى بينها وبينى تقريبا 10 دقايق ومع ذلك مش باروح واول ماسافر اقعد طول اللليل احلم بيها وبذكرياتى الجميلة ايام ركوب العجل والحصان والترمس والمشي عالكبري بس للاسف الجو برد .

اهم شيء بقي نفسي اروح لدكتور اسنان بردوا يحشيلي كدا قيمة 9 ضروس ويظبطلى كام طربوش غير ترميم وتلميع واضرب وش بلاستيك ابيض على اسنانى منظرة يعنى :closedeyes:

الخروج فى الشتا اعتقد انه ممل شوية الجو يقلب فى ثانية وكمان اليوم قصير اوى .

يا دوب الواحد يصحى يفطر يقراله كلمتين يلاقي ميعاد العشاء جه .

بس عموما لو اى حد عنده مكان شتوى كدا ويكون كويس يدلنا عليه لسه باقيلي 10 ايام بحالهم فى اجازتى ممكن اروح اتفسح فيهم قبل ماروح للشقي .

ونفسي ان شاء الله لو نزلت فى شهر 8 اعمل زيارة للاماكن الراقية للتصييف

زى راس البر

جمصة

فايد

بالطين

ترعة المحمودية :happy:

يلا ربنا يدينا ويديكم طولة العمر

[م.سامح المصرى]

استاذولحد تاني الف الف الف مبرووووووووووووووووووووووك

وان شاء الله يكون الذرية الصالحة الى بتتمناها ......

ويتربى في عزك ونعملة اعياد ميلاد :happy:

يلة بقي روح اعمل اللازم والى لابد منه

شوية كفولات على كام كادليز وحاجات من دى لزوم الزروظة يعنى ......

سلامى لك

[Scorpion]

ناوي اشتري شقة في شبرا .....

و خلاص لقيتها ....... المشكلة ان مقلة اللب اللي تحت ما بتقفلش خالص ....

[iloveegypt]

ناوي اشتري شقة في شبرا .....

و خلاص لقيتها ....... المشكلة ان مقلة اللب اللي تحت ما بتقفلش خالص ....

ايوة ياعم هتهيص لب وسودانى

ما تنساش اخوك فى كيلو لب ونصف مقشر :rolleyes:

[iloveegypt]

ناوي اشتري شقة في شبرا .....

و خلاص لقيتها ....... المشكلة ان مقلة اللب اللي تحت ما بتقفلش خالص ....

يا بختك يا عم هتهيص لب وسودانى

متنساش اخوك بكيلو لب وكيلو مقشر :rolleyes:

[galaxy]

رغم اني مش اسكندرانيه لكن مصر او نزول مصر عندي والصيف يعني اسكندريه.

.رغم ان المصايف كتير وبروح اماكن تانيه بس برضه هي اسكندريه ماريا........بعد اللف علي القرايب والاصحاب والزيارات وصله الرحم والذي منه .............. نطلع علي البركه علي اسكندريه.........نزول الاجازة عندي يعني تمشيه مع الاهل ع الكورنيش ....يعني لب وترمس وغزل البنات :wub: ............يعني سينما مترو وريو وخروب امال وساندوتشات جاد رغم انها بقت مش قد كدا وصغرت اوي :blink: .................حتي ولو في الشتا البطاطا ع الكورنيش او عند القلعه مالهاش حل بجد :rolleyes: .........بجد بيبقي احلي صيف :D

[لولا]

نفسي أمشي فى وسط البلد بالليل..

ونفسي أقف على كوبرى قصر النيل بالليل ...

ونفسي اركب مركب فى النيل بالليل ..

ونفسي أدخل فيلم سينما رومانسي حفلة الساعة 10 واخرج

بالليل الاقى الهوا سااااائع وبيخبط فى وشي .

ونفسي فى حاجات كتييييييييييييير .. بس انا انزل مصر الأول.

[الباشمهندس ياسر]

...

ناصية الشارع اللي كنت بتقابل عندها مع شلة الأصحاب .. قبل ما يهاجروا كلهم ...

بيت الحب الأول ... نفسي اشوفها بقت ازاي

بيت الحب التاني ... نفسي اشفها بقت ازاي

بيت الحب التالت ... نفسي اشوفها بقت ازاي

و مستوصف السبع بنات اللي رحت اعالج فيه صباع رجلي المدوحس ...

بيت الحب الرابع ... نفسي اشوفها بقت ازاي

بيت الحب الخامس ... نفسي اشوفها بقت ازاي

بيت الحب السادس ... نفسي اشوفها بقت ازاي

بيت الحب السابع ... نفسي اشفها بقت ازاي.. لأ دي ماتت في حادثة ...

بيت الحب التامن ... نفسي اشوفها بقت ازاي

بيت الحب التاسع ... نفسي اشوفها بقت ازاي

بيت الحب العاشر ... نفسي اشوفها بقت ازاي

بيت الحب الحداشر ... نفسي اشوفها بقت ازاي

و لو فضل وقت و كنت لسه ما اترفدتش ... حبقي اروح المتحف ....

كل ده يا عمنا سكوب

دانتا مخلتش حاجه لبقية شباب الحتة

ياااااااااااااااااااااااااااااااااااااااااااه

دانت فلبك كبير بشكل

[قاهرى]

عجبنى الموضوع وحبيت اقول انا نفسى اروح فين لما انزل مصر النزلة الجاية انشاء الله

اسف طبعا مقرتش ردود جميع الاعضاء

بس حبيت اقول انى انشاء الله لما انزل مصر ناوى اروح مستشفى سرطان الاطفال باذن الله نويها اعملها السنة دى .....

ونفسى اروح اسكندرية ...

تحياتى لجميع الاعضاء بس انا السنة دى منزلتش ومش عارف هنزل امتى احتمال فى العيد الكبير باء

يلا خير انشاء الله

اخوكم قاهرى