عن "الواسطة"

[shawshank]

كم مرة استفدت من "الواسطة" ؟ سواء في عمل أو تعليم أو الحصول على خدمات أو امتيازات لم تكن لتحصل عليها بدون "الواسطة" . سواء كنت أنت شخصيًا المستفيد أو أي شخص من طرفك أو كنت مانحًا للامتياز .

تم تعديل 8 فبراير 2008 بواسطة shawshank

[nash]

قمت بالتصويت وبمنتهي الأمانه...

أمور كثيرة ماكانت لتتم بدون وجود الواسطه..للأسف هذه حقيقه ..

وللاسف أيضا..غالبا مايكون حق لنا ولا نحتاج للواسطه لإنجازة..ومع ذلك نستعين بها لإنهاء أمور ضروريه في الحياة...

[vipwithyou]

قمت بالتصويت وبمنتهي الأمانه...

أمور كثيرة ماكانت لتتم بدون وجود الواسطه..للأسف هذه حقيقه ..

وللاسف أيضا..غالبا مايكون حق لنا ولا نحتاج للواسطه لإنجازة..ومع ذلك نستعين بها لإنهاء أمور ضروريه في الحياة...

فعلت ذلك انا ايضاً واعلن توصيتى هنا علما باننى لا اتذكر الرقم تحديدا ً لكن وضعت التصويت على 6-15 مرة واحتمال يكونوا اكتر دا اذا اعتبرت اى حاجة فيها مكالمة تليفون علشان تمشى الموضوع داخل مجال الواسطة

والله اعلم انها كانت حقوق لكن فعلا لا تسير الا بالواسطة او لا تسيرة بسهوله ويسر الا بالواسطة

وهذا ما تكلمت عنه فى قسم محاربة الفساد ان الحكومة لم تضع القوانين لكى يرتشى الموظف لكن الموظف نفسه هو ضعيف النفس

تم تعديل 8 فبراير 2008 بواسطة vipwithyou

[shawshank]

ما أذكره مما استفدت فيه بـ "الواسطة" كان :

- في الجيش . كنت أكره وأمقت الواسطة لحد ما دخلت الجيش . الجيش يضعك أمام أمرين : البهدلة والإهانة من غير واسطة ، أو بهدلة بس مش قوي في وجود واسطة :rolleyes: فجبت واسطة لكن كان بعد مركز التدريب . لأ كنت جبت برضه واسطة في مركز التدريب عشان أنزل أجازة . واسطة الجيش هكررها تاني لو رجع بي الزمن ودخلت تاني الجيش .

- في المطار . دي اللي ندمان إني عملتها . الموضوع إن كان فيه واسطة ساعدتني في المرور على الجمارك والجوازات بسهولة جدًا دون الوقوف في الطابور . رغم إن الموضوع بسيط جدًا وكنت بقف في الطابور قبل كده عادي ، بس مش عارف ليه فكرت في الواسطة . لكن ندمت بعدها وإن شاء الله مش هعملها تاني .

- في الجامعة . كنت أدرس لابن أحد الزملاء في إحدى الجامعات الخاصة . واتصل بي الزميل أكثر من مرة يوصي على ابنه . وكنت في غاية الإحراج . واضطررت أن أرفعه ، وكل الدفعة . دي ندمت عليها ولم أكررها ولن إن شاء الله .

- الأمن . جبت واسطة عشان أخلص استطلاع رأي الأمن عشان أسافر . الواسطة سهلت الاستطلاع فأخذ حوالي 10 أيام بدل شهر . هكررها تاني لو اتكرر الموقف لأنه إجراء روتيني مالوش أي لازمة ولا أهمية .

ولنا عودة إن شاء الله .

[إيزيس]

أحاول وأجاهد للبعد عن الواسطة لكي لا أندم ولكن هناك أمور لا خيار فيها لازم كوسة زي إجراءات الأجازة وحتى الواسطة يعني بتحول زمن الإجراءات من شهر إلى 29 يوم

كدت أتسبب في مشكلة أسرية عويصة بسبب عدم رضوخي للواسطة لكي ينجح أحد الأقارب وفعلاً رسب بجدارة و قامت الدنيا

بس ما تخافوش قعدت المرة دي

[امانى]

للاسف الواسطة لها دور كبير فى حل مشاكل معظمنا فى مجتمعنا الذى نعيش فيه

تعرضت للواسطة مرتين وكانو من اجل موضوعين حيويين

الاول عندما الادارة التعليمية امرت بدخول ابنى مدرسة بعيدة عن محل اقامتنا ويضطر ابنى علشان يروح المدرسة

يحتاج نصف ساعة بالعربيه وطرقنا جميع الابواب الرسمية دون جدوى وتحايل مع الرؤساء فى هذه الادارات مفيش فايدة

وبمجرد تأشيرة الواسطة اتنقل ابنى لمدرسة جنبنا فى نفس يوم وصول التأشيرة

الواسطة التانيه كانت من اجل زوجى عندما تعرض لجلطة بالقلب واحتاج الى عملية تغيير شرايين شفنا المرار من اجل

انتهاء اجراءات العملية حوالى سته شهور نجرى من اجل انتهاء الاجراءات دون جدوى الا ان تصدر لنا واحد ابن حلال

وجاب واسطة انهت المشكلة واجبر مدير المستشفى على حضور الدكتور اللى مخصص لعملية زوجى وتمت العملية

بنجاح

للاسف فى امثلة من دى كتير ولكن امتى المواطن يأخذ حقه دون اللجوء الى الواسطة ؟ الله اعلم

ومن لا يستطع ان يحصل على هذه الواسطة ما مصيره اذا تعرض لموقف من هذه المواقف؟ طبعا عارفين

امانى

[Nina Hussien]

بصراحة لم أحسب يوما كم مرة استخدمت الواسطة

لاني لا اذكر انه يوجد شيء في بلدنا يسير من تلقاء نفسه

هل تذكر فيلم لعبة الست حين كان صاحب الشركة يتمنى ان يأتي له أحد بدون واسطة و حين اتاه جيب الرحاني المسكين فاز بالفظيفة !!!

هذا هو تاريخ الواسطة في بلدنا

أعتقد لو راجعنا برديات الفراعنة لوجدناهم يناقشون تلك المشكلة من ايامها

[شموع]

مشكلتي بأه اني بتحرج اطلب من حد حاجه حتى لو كان اخي

مع ذلك استخدمت الواسطه مرات عديده وكان عن طريق زوجي عشان انا صعب اطلب من حد حاجه

لكن في مواقف استغنينا فيها عن الواسطه وعينك ماتشوف الا النور وخصوصا لو نازل بالبر عن طريق نويبع هيحتفلوا بيك بدون واسطه فعلا, وعند عمل البطاقة الشخصية دفعت فيها فلوس عشان تخلص ده غير مكالمة تليفون قضت على الكارت ده عشان ابعد عن الواسطه يعني من الواسطه للرشويه الاجباريه يا قلبي هلل00000

[zizetta]

أكيد إحنا في مناقشتنا للمواضيع بنقصد نضع أيدينا علي المشكلة علشان نستوعبها وبعدين نحاول حلها بقدر إستطاعتنا .. وزي ما تفضل الأخوة والأخوات بالمنتدى فإن موضوع الواسطة ده موضوع قديم .. وأنا لي فيه رأي .. أنا شايفة أن الواسطة دي نوع من أنواع التسهيلات في الإجراءات المعقدة في ظل الإنفجار السكاني الرهيب .. وقلة الفرص أو الإستحواذ عليها لمن بيدهم الأمر..

الواسطة بستخدمها حتى مع السوبر ماركت ..والصيدلية مش بس في الشغل أو الدراسة أو غيره .. لكن بما يرضي الله ..

يعني مثلاً .. إحتاج أحد الأفراد غير المقتدرين مادياً للبن أطفال من المدعم اللي بتتباع العلبة منه بـ 3 جنيه واللي بيتباع قرينه بدون دعم بـ 32 جنيه العلبة .. فما كان علي الا أن وصيت بعض معارفي ممن لهم صلات وثيقة بصيدليات وكذلك فعلت أنا .. واستطعنا أن نوفر عدد جيد لهذا الرجل الذي لا يجد قوت ابنه الرضيع الذي يعتمد أساسا علي اللبن الصناعي .. هذه واسطة للصيدلية ( وقد قالها لي أحد أصحاب الصيدليات إحنا يا مدام بنشيل اللبن ده لحبايبنا .. وآخر قال ده لزبايننا العزاز .. ) وطبعا العزاز والحبايب دول اللي بينفعوا الصيدلية .. يعني نفع وإستنفع...

واحد بيصرف على أهله ودخل الجيش وحيبعتوه ورا الشمس وكان عايز يكون قريب من سكنه علشان يقدر يروح نفس اليوم يشتغل بعد الظهر .. ده ما نتوسطلوش ؟..

واحد تخرج وحصل علي تقدير ممتاز مع مرتبة الشرف الأولي من أحدى كليات القمة وجاله جواب ترشيح ليعمل معيد في أحد الجامعات الأجنبية العاملة بمصر .. وفي نفس الوقت جاله جواب التكليف للجيش .. طلب يدخل عسكري مش ضابط علشان العقد مدته تنتهي لو دخل ظابط ويقدر يأجل استلام العمل سنة واحدة فقط لآداء الجيش .. ده ما نتوسطلوش ... مادام سيفيد في مكان آخر ويأدي واجبة العسكري برضة..

مثال آخر .. منذ 5 شهور توفى أحد العاملين الغلابة في شركة قطاع خاص .. وترك 7 عيال وأمهم ..حتى الآن لم تنتهي إجراءات المعاش لتلك الأسرة وعايشين علي مساعدات أهل الخير. علي النقيض تماماً .. أحد الموظفين في نفس الشركة اللي له علاقات بالتأمينات والمعاشات .. أنهي تسويه معاشه في ظرف شهر أو يزيد قليلاً ..

إحتجت أنا لشيء وكان هناك من يسهله دون أن أخد حق حد ولي معارف يستطيعون تسهيله لماذا لا أقدم علي الواسطة ..

المشكلة بقى .. لو أنا ماليش واسطة أو أنا مش واسطة حد .. الناس حتخلص مصالحها إزاي .. إذن المشكلة مش فينا المشكلة في القائمين علي النظام .. يعني النهاردة مثل اللي مالوش ظهر ينضرب علي بطنه ووشه وعينه كمان ..

أعرف بعض الشخصيات لا تذهب لأي مكان لا شغل ولا مصلحة ولا حتى ورشة ميكانيكي الا لو كان متوصي عليهم وتبريرهم علشان يخلصوا بسرعة المهمة ويحصلوا علي الإحترام الكافي من المطلوب منه تنفيذ المهمة طالما هناك واسطة .. وكل ما كانت الواسطة جبارة كل ما كان طلباتك أوامر ...

وعشان نحكم صح خلينا نسترجع مواقف كنا فيها لحاجة ماسة لإستخدام الواسطة لنا أو لغيرنا .. لأننا وصلنا لمرحلة أنك علشان تحصل علي حقك أو توصل صوتك أو تحصل علي ميزة انت تستحقها .. فلابد من الواسطة..

وفي النهاية أقول أن الواسطة لها جوانب إيجابية وجوانب سلبية لكن يجب أن نفصل بين الواسطة والرشوة أو زي ما بيسموها إكراميات أو في قول آخر تسهيل المهمة ..

وطالما لم تأخذ حقوق الآخرين أو تحصل علي ميزة من حق غيرك إذن كان الله في عون العبد ما دام العبد في عون أخيه ..

وربنا يصلح أحوال البلاد والعباد..ولنتذكر قول الله تعالى :" ومن يتقي الله يجعل له مخرجا ويرزقه من حيث لا يحتسب"

تحياتي

زيزيتا

تم تعديل 16 فبراير 2008 بواسطة zizetta