انتخابات الرئاسة الأمريكية و الشيخ إمام

[Scorpion]

أحيانآ نجدنا نفكر في شيء ... تفكير عميق .. و بعد تحليل و آخذ و عطاء مع الذات .. نتوقف للحظات لنتبين من اين بدأت هذه الفكرة ...

عفوآ لتلك المقدمة الهلامية ... و لأشرح بأمثلة واقعية ما أريد أن أقول ....

كنت اتابع أمبارح برنامج حول الأنتخابات الأمريكية ... أوباما ... هيلاري كلينتون ... و التاني ده اللي اسمه ماكدونالد ..و لا ماك مش عارف ايه ... هو ماك حاجة كده ...

ده كان اول الخيط ... و بعدين سرحت في خان الخليلي ...

ليه ... لأني لما كنت آخر مرة في خان الخليلي ... تابعت عالطاير حوار سريع بين اتنين بياعين ... واحد في ايده جرنان و قدامه كوباية شاي و في بقه سيجارة ... قفل الجرنان لحظة و قال للبياع اللي جنبه ... عارف .. لو هيلاري دي كسبت .. كله حيبقي كده ... و رفع ابهامه دليل الأعجاب و الأوكيييه .. اصلها ست كويسة و بتحبنا ....

لم اتمالك نفسي من الضحك و ابتعدت بسرعة حتي لا يعتقد هذا المحلل السياسي الفذ اني اسخر منه ..... و لكن في نفس اللحظة فكرت في الشيخ امام ... و تعجبت كيف مازلنا نفكر بنفس أسلوب الماضي.. دون التعلم ابدآ من تجاربنا ...

فكرت في الشيخ أمام متخيلآ ابي في نفس الوقت عندما وجدته يقرأ مرة ضاحكآ منذ سنوات طويلة جدآ .. كنت صبي 7 أو 8 سنوات .. و عندما سألته عن السبب .. قاللي مش حتفهم انت لسه صغير ... بس اسمع ... و تلا علي ما قرأه ... المعني العام ظل في ذاكرتي حتي لحظة سماعي لتعليق هذا البائع ... فتذكرت ابي و هو يضحك امامي فور قراءته لتلك المقطوعة ... و ما أن عدت بدأت فورآ في البحث عن مكتبة الشيخ أمام حتي وجدتها .. فوددت ان اشارككم تلك الأبتسامة الساخرة التي اجدها فوق وجهي الآن :

ا ب ت ث جح

الف باء

جونسون روح

نيكسون جاء

قولوا هأوأو

أو قولو هاء

على صحافتنا الغير غراء

ذات صباح

يا فتاح

بالجرانين على ريق النوم

جم على سهوة كبسوا القهوة

و ابتدأو ف تضييع اليوم

اللي يقول النصر نميس

ينفع طاكسي

و يمشي رميس

و اللي يقول الفورد يا بيه

أجعص من أجعصها جعيص

واللي يقول جنسن دا احمار

راجل عقله

عقل صغار

من غير حيث

ينصب ألف جنازة بطار

بس أهو راح

و حنرتاح

و حنتبجح بقى و نقول

يخرب بيته

و يدلق زيته

و يعيش نيكسون لنا على طول

نيكسون عال

مش بطال

و اللي يقول غير كدة مقفول

شفت كلامه

الا كلامه

آدي كلام راجل مسؤول

و لاعنيه

يا ختي عليه

فيهم سكس

ما هوش معقول

و اللي يقول يا بقر

يا سراكسة

نيكسون ماله

و مال النكسة

و اللي يقول بلوتنا كبيرة

و اللي يقول مين المسؤول

و اللي يقول........

و اللي يقول........

شوفو بقى يعني

ما تقلقونيش

آدي صحافتنا و غيرها

مفيش

مش عجباكو ؟

ما تلومونيش

قولو هأوأو

أو قولو هاء

على صحافتنا غير الغراء

ابتثجحن

الفن باء

1969

هل تابعتوا معي تسلسل الفكرة ......