رباعيات الغربة

[مصري جدا]

حبيبتي يا ست الكل يا مصر

محتار بسؤال في كل عصر

ليه اللي يحبك يسكن كوخ

واللي يخونك تديله قصر

وعجبي

**ليه يا مصر تقسي علي ولادك

وتخلي شبابك يخرجوا من بابك

وبعيد عنك هناك في الغربة

يعيشوا في عز … وذل بعادك

وعجبي

**أه من الغربة آه ياني

دي سجن وفلوسها سجاني

ولما تعبت من الغربة …رجعت

لبلدي …لقتني غريب من تاني

وعجبي

أرخص حاجة فيكي يا مصر…..الأنسان

بس بشرط… لايكون مسنود!! ويكون غلبان

بيغمس فقره بهمه…..وأخرها بيضيع دمه

إما……. ف حادثة قطر….أو غرقان

وعجبي

علمك يا مصر مرفرف وفي الهوا طاير

وبيقولنا ياولادي معاكم أنا ساير

خليكوا أيد واحدة في وش اعدائي

لاني تعبت وخايف أقع ……من كتر ماأنا شايل

وعجبي

:rolleyes:

**أيام الغربة تقيله يادوب بتمر

نحايلها لجل تعدي ..يوم حلو ويوم مر

وتعدي…..ونشوفها علينا بتضحك

……. ماهي سرقت منا العمر…

وعجبي

رجعت ليكي يا مصر وبصيت ع الوشوش

ملقتش ولا وش فيهم ضاحك بشوش

الحزن ع الجبين مرسوم

والهم ع الكتوف مرشوش

وعجبي

أحمد جلبي

:blush2:

[مصري جدا]

ايه الحكاية يا جماعة ...وأيه الطناش ده كله...أنا قلت لنفسي يمكن مشغولين بكأس أفريقيا لكن حتي بعده ولا كلمة ..وكأنني قاعد في صحرا ...يعني... :unsure:

لاحد خبط علي بابي ....................... ولا حد قال لي أتفضل

ولاحتي كلمة قولتوهالي................. ولاخط علي الشاشة أتسطر وهيييييييه

{والله تنفع مطلع أغنية لشعبولا}

ليه الطناش لو مش عاجبكم العنوان نغيره ...لو مش عاجبكم الكلام نبطله...... المهم......... ضحكنا كتير ولعبنا كتير.... نرجع للموضوع..لو زعلانين قولوا لو كلامي مش حلو نبطل نكتب ونفضها سيرة بلا رباعيات ولا خماسيات ...ولا أيه

[ahmedarab]

الله عليك يا استاذ مصرى جدا

بصراحة قريتها ودمعت عينى كثيراً ... يمكن لاحساسى الكبير قوىىى بالمعانى اللى فيها

يمكن لانها صحت فيا مخاوف كتير من الوطن بعد الغربة ..... والغربة جوا الوطن ......

تحياتى لك ويسعدنى انى اكون اول واحد يرد عليك ......

وبعدين يعنى بعد الكلام الهيال اللى فوق دة تقولى شعبولا ؟؟؟؟ يلا اهو برضة حاجة من ريحة مصر :unsure:

ارجوك استمر ...الى الامام

تحياتى

ملحوظة : العنوان جميل جدا ...بس لو كنت عملت الموضوع فى ركن المغتربيين ...افتكر كنت لقيت رد اسعر وحماس كبيرررررر

تم تعديل 14 فبراير 2008 بواسطة ahmedarab

[شموع]

السلام عليكم

الكلام جميل جدا وجاي ع الوجيعة تمام

ماشاء الله عليك

وانا مع رأي الاخ احمد لو كنت تعرضها في ركن المغتربين

كنت هتلاقي كتير مصوتين

والى الامام

[مصري جدا]

:roseop

:

شكرا للأخت شموع والأستاذ أحمد علي كلماتهم الجميلة ...ونزولا علي رغبة الجماهير.. :unsure: .مش عارف أيه رأي الأخوة المشرفين ...هل ممكن نقل الموضوع لركن المغتربين ؟...ولا أفتح الموضوع من جديد هناك؟

شكرا

[kokomen]

    كلمات جميلة جدا  ومعبرة عن مشاعرنا في الغربة

   الظاهر إن أتكتبت علينا  الغربة خارج مصر الحبيبة

   وكمان  داخل مصر المحروسة

 قلبت علينا الأوجاع ... لكن كلمات جميلة تعبر عما يجيش في صدورنا

 تقبل خالص تحياتي  ... يا  مصري  جدا

:unsure: -_-

[مصري جدا]

**غامت الدنيا وبعدين مطرت

والحلوة علي البحر طلعت أتمخطرت

ياحلاوتك يا إسكندرية في الشتا

وبعد الشتا …نسايمك في كل مكان أتعطرت

وعجبي

**عيني عليكم يا عرب في العسل نايمين

والكل حواليكم بيرسم لكم خطط ملاعين

وأنتم بسذاجة وعبط تنفذوا….مش حأقول خاينين!!!

يا خوفي لماتصحوا تلقوا بني صهيون حاكمين

وعجبي

**ضربوا لبنان و من قبلها فلسطين

والعرب عاملين ودان من طين وعجين

تسلم لنا يا بوعلي حققت وعودك

وبنصر الله….. أدبت المعتدين …ومن قبلهم كل الخايفين والمرعوبين

وعجبي

أحمد جلبي

[مصري جدا]

مقدرش أقول عن نفسي شاعر

وقلمي بيكتب ..وكلامي فاعل

أنا شخص عادي ماشي في طريقي

بأشوف وأحس وأكتب مشاعر

أحمد جلبي

:rolleyes:

[ahmedarab]

اية الحلاوة دى ؟؟

كلام جميل ..انا حبيت بس اسجل متابعة

وفى انتظار المزيد

تحياتى

[yasovinas]

الاخ احمد الجلبي

كلامك حلو على قلبي

كنت فين متداري ومتخبي

قول يا سيدي وقشر بصل

على قلبي

[مصري جدا]

الأخ احمد عرب شكرا علي المتابعة الجميلة

الأخ ياسو ... انا خايف كلامي يبقي كشري بعد تقطيع البصل

شكرا لكم وأتمني اللي جاي يحوذ رضائكم :rolleyes: :rolleyes:

[مصري جدا]

بصيت علي خريطة العرب وفركت العيون

أدور علي بلد ممكن أعيش فيها …بدون

ظلم أوقهر أوفقر…..ملقيتش

وساعتها أفتكرت….. برتوكولات صهيون

وعجبي

**في بلادنا العربية أنا شفت تمثيلية

أبطالها…….. شعوبنا العربيه ….

ملابسهم حسب القضية …..أدوارهم

يا تعيش أراجوز وتعدي السور

يا أما حتموت تحت السور

وعجبي

حلم كل عربي

غار المخفي وياريته ماغار

أنا كان نفسي يتكوي بنار

الظلم اللي سقاه لناسه وشعبه

اللي كان نفسه ياخد التار وعجبي

أحمد جلبي

:lol: md2:

[مصري جدا]

غريب في بلد نص أهلها متغربين

والباقي عايشين علي أرضها مغتربين

سألتهم مش هي دي بلدكم ؟!قالوا

كانت…قبل ما يصبح العقل واللسان مسجونين

وعجبي

أحمد جلبي

:) :ninja: :ninja:

[ahmedarab]

الله عليك

حلوة قوى الاخيرة دى وجات على الجرح

فى انتظار المزيد دائما

تحياتى يا عزيزى

[مصري جدا]

علمك يامصر مدلدل ومش عاوز يطير

وف وسط الهوا راكد ومالوش تأثير

من كتر ماشيلوه من طين …تقل

ومستني أيدينا تنضفه..وساعتها من غير هوا بيطير

وعجبي

:) :wub: :lol: wst::

أحمد جلبي

[مصري جدا]

**جوايا حزن وشجن ودموع

وكلمة مخنوقة ونفس بترفض الخضوع

لواقع مزيف بيتحكم فينا ومستني

يضحك علينا بعد الوقوع

وعجبي

أحمد جلبي

تم تعديل 19 مارس 2008 بواسطة مصري جدا

[رحاب]

استاذى العزيز مصرى جدا

ابكيتنا واوجعتنا

ولكنك

ايقظتنا

وبرضه

عجبى

:lol: بس كلام جميل

[مصري جدا]

الأخت رحاب

أسف لو كانت كلاماتي حزينه ........لكني أكتب ما أحسه

أتمني أن تتغير نبرة الشجن والحزن في كلامي

شكرا لمتابعاتك الجميله [/] : -_-

[التونسى]

أصبحنا ...جميعنا .. غرباء .. نحيا بلا حياة ... ونعيش تعساء ... الأغنياء منا .. والفقراء .. كلنا تعساء .. يجتمع بنا الهم والحزن .. فى أطول واقسى واصعب لقاء ... ولا رحمة .. ولامواساة .. ولا عزاء .. فجميعنا يحتضر ... حتى لو بدينا اصحاء .. أحياء

خاطرة وجدتها تتلاحق بقريحتى ..بعد ان فرغت من رباعياتك المعبره .. فأثرت تدوينها سريعا فى مكانها المناسب .. وحتى لا يطويها النسيان .. كما يطوى خواطرى المتلاحقه كل يوم والتى لا استطيع تدوينها جميعا بفعل مشاغل الحياة واشياء اخرى

لن أتحدث عن الشكل والصياغه والوزن الشعري للرباعيات .. ساتجنب هذا .. فلست ذاك المتخصص .. فقط انا اتعامل مع الشعر والادب ((كتابة وتعليقا)) بروح الهاوى ... أما عن المضمون ... فالمفارقات منحت رباعياتك القوه . ومصر بها من المتناقضات ما يلهم الادباء باعظم القصائد واورع الملاحم .. وهذا الثراء الدرامى قد اتاح لك الفرصه لتكتب هذا القدر من الرباعيات والتى من الممكن ان تزيدها الكثير والكثير .. حتى لو كان الموضوع الرئيسى والمحورى لها هو الغربه

أعجبتنى الرباعية الاخيره جدا

رجعت ليكي يا مصر وبصيت ع الوشوش

ملقتش ولا وش فيهم ضاحك بشوش

الحزن ع الجبين مرسوم

والهم ع الكتوف مرشوش

.. أتعلم لماذا .. أجيبك سريعا .. لأنك قد تقمصتنى فيها .. وقد تكون قد تقمصت الكثيرين

وفى انتظار مزيدك ان شاء الله

تم تعديل 22 مارس 2008 بواسطة التونسى

[مصري جدا]

استاذي العزيز ...واسمح لي بهذا ...لانك تذكرني بأستاذنا بيرم التونسي

سعدت بمرورك الكريم علي رباعياتي .... وأضافة تعليقك الذي أثري الموضوع وزاده بهاءأً.....شكرا لك

العام الماضي كنت في مشوار عمل بالقاهرة....لأني سكندري......وركبت المترو ....وانا واقف لقيتني بتفحص وجوه الناس ولقيتني بقول الرباعيه دي

مرة أخري شكرا لمرورك الكريم

رجعت ليكي يا مصر وبصيت ع الوشوش

ملقتش ولا وش فيهم ضاحك بشوش

الحزن ع الجبين مرسوم

والهم ع الكتوف مرشوش

أحمدجلبي

تم تعديل 22 مارس 2008 بواسطة مصري جدا