رباعيات الغربة

[مصري جدا]

خرجت طوابير النمل تدور علي لقمة عيش

وسابت أرضها وديارها ….لجل تعيش

ووصلت لآخر الدنيا ….تلملم في الفتافيت

ورجعت بعدها لمكانها ,,, وتعبها......علي مفيش

وعجبي

أحمد جلبي

[مصري جدا]

أرخص حاجة فيكي يا مصر…..الأنسان

بس بشرط… لايكون مسنود!! ويكون غلبان

بيغمس فقره بهمه…..وأخرها بيضيع دمه

إما……. ف حادثة قطر….أو غرقان

وعجبي :sad:

:sad:

أحمد جلبي

إعادة بمناسبة الأحداث الأخيرة بقناة السويس

تم تعديل 25 مارس 2008 بواسطة مصري جدا

[المواطن عكاشه]

اخونا المصرى جدا

اهم حاجه فى الأشعار اللى انت كتبتها ان احساسها صادق جدا ، ولكن اعذر صراحتى .. فنيات السطر الشعرى وصياغة الجمل مش مظبوطه ، وعلى فكره فيه ناس كتير بتقع فى غلطة الخلط بين الشعر و فن كتابة المقامات القديمة وده يربك الموسيقى فى النص

واخيرا

خالص الشكر

اخوك

المستجد جدا

المواطن عكاشه

[مصري جدا]

اخونا المصرى جدا

اهم حاجه فى الأشعار اللى انت كتبتها ان احساسها صادق جدا ، ولكن اعذر صراحتى .. فنيات السطر الشعرى وصياغة الجمل مش مظبوطه ، وعلى فكره فيه ناس كتير بتقع فى غلطة الخلط بين الشعر و فن كتابة المقامات القديمة وده يربك الموسيقى فى النص

واخيرا

خالص الشكر

اخوك

المستجد جدا

المواطن عكاشه

شكرا أخي العزيز علي مرورك وملاحظاتك ....واضح أن حضرتك دارس فياريت تتابع معايا ويسعدني ملاحظاتك

************

مقدرش أقول عن نفسي شاعر

وقلمي بيكتب وكلامي فاعل

أنا شخص عادي ماشي في طريقي

بشوف وأحس وأكتب مشاعر

وعجبي

أحمدجلبي</

تم تعديل 30 مارس 2008 بواسطة مصري جدا

[مصري جدا]

قوم أنفض عن كتوفك تراب الكسل

وأبدأ بحلمك حققه وعيش الآمل

ده بكرة جوانا بيتولد…..وبأيدينا

ممكن نخنقه …..وممكن نكبره بالعمل

وعجبي

أحمد جلبي

:sad: mfb:

[رحاب]

الغربه تابوت مغلق

وارواحنا بداخله حبيسه

فما بالك بغربة وطن :)

[أشرف حسين]

.

نقشايه على خشبة الغربـه

ابوي حسين دوا عينيا

معلمنى...مفهمنى

مفيش اصفى من النيه

و لو قلبك فات احبابه

كأنه حمام بدون غيه

يا ميت بوسه على جبينك

يا مصر يا ضحكه خمريه

بتسكرنى و انا فايق

تلف الدنيا حوليه

مـصري جدا ....

بـصبح عليك :blink:

واحد متغرب جدااااا :)

.

[مصري جدا]

الأخ أشرف حسين

صباح الفل علي عيونك ......يا غريب....لقيت أحباب

نورت ورقي بنقوشك .....أهلا بك وأتمني أن أسعد بكلماتك علي طول......

علي فكره أنا أسكندراني ....بس معرفش أقول كلامك الحلو ده

مـ هو احنا بحرنا جنـه

شوطئ رملها "احساس"

شبكنا ترمي عـ القبله

و اكتفنا لـ غيرنا "مداس"

و عـ الاكتاف

ملوحة العيش و هدمايـه

و خيط صنار

و "عوامه" تطوف ياما

بتغزل من رغاوي البحر

ضــلايـه

و شبكايـه

بترسم بـ العرق آيـه

لهيب الشمس يوشمنا

بـ "ساديـه"

يـ فكرنا بطول يومنا

تندع غيمه ورديـه

بـ حنيه

أشرف حسين

[رحاب]

الله عليك يا استاذ احمد

ياريت تكمل رباعيات الغربه

جميله اوى

[dr gml]

عاد اخى المغترب فى اجازة قصيرة الى ارض الوطن ....وبما انى مغترب سابق دار بيننا حوار عن الغربة والوطن ولقد طُرح هذا السؤال

(الوطن ماذا يعنى اولا.. الناس ام المكان؟ )

ولماذا كثيرا نتغنى بالطبيعة

ولا نتذكر البشرالا قليلا

اجمل مافى رباعيتك اخى مصرى هومخاطبتك لمشاعر الانسان

تحياتى

[مصري جدا]

الأخت رحاب

شكرا لمرورك وكلماتك الرقيقه أن شاء الله أكمل ...وخليكي معانا

الأخ الدكتور جمال

شكرا لمرورك الكريم ....أنا حاسس أن مكتوب علي الغربه الأبديه في مصر وبره مصر وده اقسي شعور

ربنا يخفف عنا جميعا

[badroora]

كل مقرا العنوان رباعيات الغربة اقول لا بلاش غم مش عاوزة حاجة تقلب على المواجع .

لكن لما دخلت لاقيته كلام جميل واينعم عالجرح بس اخف مما كنت متوقعاه .

ماشاء الله عليك اسلوب جميل انا احب الشعر العمى كتير لانه اكثر معبر وسهل الفهم

كمل كمل ربنا يوفقك wst:: wst::

[مصري جدا]

الأخت بدريه

شكرا لمرورك وكلماتك الرقيقه والحمد لله أنك دخلتي وقرأت ولم تندمي ......وكمان نورت الرباعيات بأكتر من مليون وات .....الا أيه سبب أسم الشهرة نجفة ....هل علشان بتنوري كل مكان تتواجدي فيه ..

مره تانيه شكرا لمتابعتك ,,,ومستني نورك مع كل رباعيه جديده i*:

[مصري جدا]

**في لحظة سفر قولتي ما تنسانيش

وعيونك بتقول كلام كتير ما بتخبيش

ياتري قلوبنا علي الحب حتجتمع

ولا حنعيش ذكري ماتتنسيش

وعجبي

في لحظة سفر وعيونك بتودعني

فيها كلام كتير ..في قلبي بيوجعني

وعيوني ترد… بحبك …ولساني بيمنعني

خايف أقولها أضيعك ….وخايف مقولش….. تسمعني

وعجبي

أحمد جلبي

تم تعديل 5 أبريل 2008 بواسطة مصري جدا

[مصري جدا]

**في لحظة سفر قولتيلي ما تنسانيش

وأيديكي تسلم …..وتقول …ماتسبنيش

خليتي قلبي في ورطة..ياتري

……بتحبني ….ولا مابتحبنيش

وعجبي

أحمد جلبي

[shahd]

خرجت طوابير النمل تدور علي لقمة عيش

وسابت أرضها وديارها ….لجل تعيش

ووصلت لآخر الدنيا ….تلملم في الفتافيت

ورجعت بعدها لمكانها ,,, وتعبها......علي مفيش

وعجبي cr((: mf-: cr((:

أحمد جلبي

رباعيات رائعه معبرة .. سلمت اناملك ودام رقي ابداعك اخي الفاضل

[مصري جدا]

الأخت شهد

نورتي وحليتي الرباعيات ...أتمني وجودك معنا دائما.....شكرا لك

[مصري جدا]

ضاق صدري م اللي جواه

ومقدرش أشكي.. اللي بأهواه

سألت… ليه يا قلب حزنك كبير

قال…قتلني اللي بحبه ….وضيعت عمري معاه

وعجبي

سمعت في قلبي صوت…..طنين

سألته يا قلب …راح فين الحنين….!؟

قال …من كتر حبسته جوايا .. أتخنق

ومفضلش فيّ غير الآنين

وعجبي

أحمد جلبي

تم تعديل 13 أبريل 2008 بواسطة مصري جدا

[مصري جدا]

**في لحظة سفر قولتي ما تنسانيش

وعيونك بتقول كلام كتير ما بتخبيش

ياتري قلوبنا علي الحب حتجتمع

ولا حنعيش ذكري ماتتنسيش

وعجبي

في لحظة سفر وعيونك بتودعني

فيها كلام كتير ..في قلبي بيوجعني

وعيوني ترد… بحبك …ولساني بيمنعني

خايف أقولها أضيعك ….وخايف مقولش….. تسمعني

وعجبي

أحمد جلبي

**في لحظة سفر قولتيلي ما تنسانيش

وأيديكي تسلم …..وتقول …ماتسبنيش

خليتي قلبي في ورطة..ياتري

……بتحبني ….ولا مابتحبنيش

وعجبي

أحمد جلبي

بحبك بحبك دي كلمه نفسي تسمعيها

عايشةجوايا و في قلبي كل معانيها

لكن شفايفي مش قادرة تقولها

وعيوني بتفضحني ...ومش عارفة تخبيها

وعجبي

أحمد جلبي

[ابو جيداء]

الأستاذ مصرى جدا

انت فعلا مصرى حتى النخاع

رباعيات رائعة وانا من حظى انى هنا لأستمتع بحروفك فأنا من عشاق العامية

المصرية .

ذكرتنى كنت قد كتبت اثناء تواجدى خارج مصر كلمات تحمل عنوان زمن المال

سأضعها الآن بالمنتدى وشكرا لك لأنك قلبت المواجع

أبو جيداء

تم تعديل 15 أبريل 2008 بواسطة ابو جيداء