رحمة الله عليك يا مجدى

[achnaton]

صباح اليوم واثناء التمتع بفنجان قهوة الاحد مع استاذنا اخناتون .. وضع فى يدى دسكا .. لانقل مابه اليكم .. واوصانى ان ابعد بمحتواه عن كل ابواب السياسة .. لأنه عزاء وترحم على قلم ذو ضمير .. مات كما مات الضمير

مع تحياتى ..

م.وائل جار الاستاذ

-------------------------------------------------------------

بسم الله الرحمن الرحيم

فى احد مداخلاتى ذكرت حكايتى مع هذا المنتدى الرائع المحترم وكيف شدنى اليه .. فقد كانت بدايته مع جريدة الوفد قبل تحول حزب الوفد الى حزب نعمانى واختلف اخونا الفاضل الاستاذ عادل ابو زيد صاحب هذا الموقع مع الوفد النعمانى وفضل ان يظل بيته مفتوحا لنا .. حتى عندما اقترحنا عليه المساهمة معه رفض .. وظل فى صبر وثقه يروى هذا البستان بعرقه ودمه وصبرة ونحن من ورائه باقلامنا وافكارنا واحتل هذا المنتدى مركزة المحترم العالى بفضل عمله وصبرة .. وايامها .. كانت تشدنى كتابات العزيز الصريح الامين الذى فقدناه امس المرحوم الاستاذ مجدى مهنا .. واوحت الى ايامها كتابته ومقالاته بقصيدة زجلية كتبتها ايامها سنة 2002 .. وفكرت ان أعيد تسجليها لكم اليوم ليقرأها زملائنا الجدد وشبابنا .. ليعرفوا كيف كانت كتابات المرحوم مجدى محركة للخواطر .. بعد ان مات الضمير .. واقرأوا وترحموا على قلم صريح بناء فقدناها .. وعليك العوض يارب ..

مات الضمير ... !!!

مات الضمير ..! لا تسألونى كيف مات ..

والعزاء نشروه .. فى الصحافة الحرة .. والإحصاءات ؟!

نهبوا فلوس الكفن .. وحطوا بدالــه جرايـــد

والقهوة سادة فى الحوارى .. وفى القصور شربات ؟!

----------------

مات الضمير ..! وكفنــوه بتصريحات وبيان وردى !!

عملوا من الجنازة فرح .. ورقصوا فيه بلــــدى ؟!

ولهطوا الوز والبط والكفيار والدندى

وسابوا للشعب رجلين الفراخ والجناحات ؟!

-----------

مات الضمير ..! وسرقوا ميراث الناس ..؟

ودفنوا معاه القيم .. مفيش دم ولا إحساس ..!!

حتى إنتماء المواطن بالنعال إنـــداس .؟!

وصارت الرشوة من أفضل الحســـنات ..!؟

---------------

مات الضمير.. ! حتى فى البيانات ..!

عبوها كذب .. وتزوير .. وافتراءات ..!

ولبسوا العمة للسادة الأفاضل فى مجلس اللمة

ونهبوا ميراث الشعب .. مصانع معاها شركات ؟؟

----------------

مات الضمير ..! يا مين يلبس عليه السواد معايا ..!!

ويقعد يعيط .. ويلطم ويستغيث بالمولى ويايا ..؟ !

بكرة ولادنا حا تكبر ويأخدوا لنا بالتار ..!!

ونبنى البلد من جديد .. بعزة وكرامة .. ونعيش فى سرايا

--------------------

مات الضمير ..! وشوفوا الوفد نعاه إزاى ..

فى صفحة ستة .. مانشيت اسود كبير ..ياى

الدين العام يصل الى مرحلة الخطر

تلتميت مليار ديون والرايح يقول للجاى

----------------

مات الضمير ..! وياريتهم فى مصر ما دفنوه

ولا بورق جرائد النفاق والرياء والتزوير غطوه

كان الجميع يومها شافوا جثتـــه

ومسكوا كبير الجناة وبالجزمة القديمة ضربوه

----------------

مات الضمير ..! ومجدى مهنا كتب عنه فى الممنوع

قصص غريبة ..دم ..وألم ..ودمــوع

وكمل معاه الأخ طلبه قصه السحل والنهب والتزوير

وكتب فى نص صفحة أصل الحكاية ..فوضح الموضوع

-----------------

مات الضمير ..! ويارتنا كنا عالجنـــاه

قبل ما ياخد ضحايا الطيارة والقطر للعدم وياه

وسابنا نبكى ناس غرقت وناس ولعت

وناس كتير مش لاقية حتى المش يا ولداه

-----------------

مات الضمير ..! وساب الناس كلها فى ازمة

اجدع موظف شريف ..مش قادر يجيب جزمة

ويوم ما يفكر يجيب للولد بدله والمدام فستان

تبقى مصيبة وحطت عليه م الشعر للجزمة

----------------

ما ت الضمير ..! وكنا احنا السبب فى وفاته

لما اصابه المرض وضاعت بعض اعضاءه

وقعدنا نبحث له عن ايد يضرب بيها

أو حتى عين يشوف بيها .. لكن كان الجزام صابه

--------------------

مات الضمير ..! وقبل ما يموت ياما فرفر

فى ايد سراج الدين وعم على قرقر

وكل من صادروا ماله بعد عرق وكفاح

آل إيه قانون اشتراكى والرئيس قرر

--------------------

مات الضمير ..! ويوم ما مات بكينــاه !!

وكل مواطن شريف تمنى يروح ويــاه !!

فبعد الضمير نعيش ازاى ؟..

فى جو فســـدت أرضيتــه وسمـــاه ؟؟؟

--------------------

مات الضمير ..! والشرفا قالوا نعمل للفقيد دا ضريح

ونجيب مؤذن ينادى بالثورة والتصحيح

رفض الموظف المرتشى بعظمة وكبرياء

وقال السفيه المنافق ..لأ ..يلزم لكم تصريح ؟!

---------------------

مات الضمير ..! وماتت معاه الفضائـــل ؟

ورفضوا بناء الضريح .. وحطوا ميت حائل

مادام مفيش لحاليح أو شقة تمليك أو سنيورة

يبقى الجرى والسعى من غير واسطة ..بلا طائل

---------------------

مات الضمير..! والحقيقة دا ماماتشى ..دا تم اغتياله

وراح لرب العباد يشكى ليه حالـــه

لقى غلابا كتير من مصر

على باب الكريم بيبكوا قدامـــه

---------------------

مات الضمير ..! ولما شاف الغلابا بتبكى

بكى تمام زيهم .. وقعد كمــان يحكى

على اللى شافه فى ارض مصر

من نفاق وسرقة ونهب وعنطزة تركى

----------------------

مات الضمير ..! وقالولوله فى الجنة ما تبكيش

اللى بيحصل فى مصر النهارده مش حايعيش

وبكره يعود ولاد مصر الفراعنه

يبنوها من اول و جديد ويسعدوا الحرافيش

----------------------

مات الضمير ..! وعمر الفراعنه ما سرقوا رغيف جارهم

وعمر الصعايده ولادهم .. ما اتقفل دارهم

ولا عاش بناتهم منافق ولا نصاب

ولا مرتشى كذاب .. وبيخافوا من عارهم

-----------------------

مات الضمير .. وليلة العزاء كانت فى ماسبيرو

وحاولوا هناك يجيبوا للعمل رقيب غيـــــــــــــرو

طلع الرقيب الجديد .. مرتشى .. وكذاب

غير الهدايا .. ضايف لحسابه فى البنك كام زيرو

--------------

مات الضمير .. وشارك فى العزاء الرقيب سفوت وتلميذه عثمان

وجمعوا المصايب للوكيل .. ونشــروها فى الجرنان !!

نصبوا كمين للوكيل ..وأتنين من إصحابه

وزقوا عليه الفلوس ..فى لعبة قذرة ..فاهمينا من العميان

---------------

مات الضمير .. وعملوا من الوكيل .. مثال نادر

للموظف المرتشى .. وطلعوا فيه العباير !!

ونسوا أنه لسه فى المدرسة تلميذ !!

والمبنى عامر بالفصول والأساتذة وكبيرهم الناظر

---------------

مات الضمير .. وناظر مدرسة الفساد معروف !!!

والقصر إياه يشهد عليه .. ولسه ياما حنشوف !!

ماهو بس قالب واحد فى مبنى الفساد ينخلع

حتكر كل القوالب .. ويبقى اللعب ع المكشوف

--------------

مات الضمير .. نهبوا فلوس البلد فى مكافآت شهرية !!

بدل حضور لجان ..وإشراف برامج ..واوفرتايم وماهية

يقبضها الوكيل .. زيه زى زمايله فى المبنى العجيب !!

دخل شهرى يكفى 200موظف او خمسميت عامل يومية

--------------

مات الضمير .. طب .. يعنى لما أحنا فى مصر عايشين ع الدين

وخزينة الدولة فاضيه .. وكل يوم نسمع حكاية من غراب البين

مرة يقول شدو الحزام .. ومرة تانية يبيع ميراثنا

وبعزق ياســفوت .. ومص دم الشعب .. وإعطى المرتاحين !!

-------------

مات الضمير .. ستين الف جنيه يا مفترى دخل موظف واحد فى 30 يوم !!

يبنوا دول كام شقه للى نايمين فى العراء وفى المقابر مش جايلهم نوم

هو يعنى الموظف ده حيجيب الديب من ديله ؟؟

ولا هو خبير أجنبى من بتوع الكورة .. ولا رقاصة زى اللى عندنا بالكوم ؟؟

--------------

مات الضمير .. وكل شئ فى الوجود له عمر إفتراضى مكتوب !!

سواء كان دوا .. او طعام او شراب أو حتى المكن والطوب

لكن موظفين الكوسة .. بعد المعاش قاعدين

يعدوا المصارى المكافأة بالآلاف .. أما ثمار للعمل فمش مطلوب

------------------

مات الضمير ..! مش عند كل المصريين ولكن عند البعض

مش كل مصرى وحش .. وبلده بلد الســـعد

ومصر مضيافه وصبورة وولاده

وزى ماجابت احمس واخناتون .. بكرة تكرر سعد

-----------------------

وتحياتى

اخناتون المنيا

تم تعديل 10 فبراير 2008 بواسطة achnaton

[nash]

عجز لساني عن التعبير عن روعه ما قرأت.....

بالفعل مات الضمير عند الكثيرين ...واستمرأوا كل أنواع الخداع والفساد ...وحتي محاسبه النفس علي أخطاءها باتت رفاهيه عند الآخرين..وسذاجه لإخرين...

موت الضمير...ابشع مايمكن من فساد يصل إليه الإنسان...هو الشرارة الأولي لكل شيء قبيح بعد ذلك في الفعل والقول...

لكن وكما تقول الأبيات ...لا يزال هناك أمل في وجود سعد وغيرة من الشرفاء..وكما أنجبت مصر في الماضي الشرفاء...لازالت قادرة حتي الأن بإذن الله علي إنجاب غيرهم....

لا يزال عندي أمل في رحمه الله بنا

[hanzalah]

رحمة الله عليك يا استاذ اخناتون

ورحمة الله عليك يا استاذ مجدي مهنا

ويرحم الله الضمير وصاحبه في كل زمان ومكان