شكلها باظت..!

[واحد تاني]

موضوع جميل مدام zizetta تسلم ايدك على التلخيص الجميل ...

وشكرا س س على الاضافات القيمة :lol:

في انتظار البقية من مدام zizetta ... (مفيش كراسي ولا كلوبات ولا حاجة)

ايه رأيك لو تهدي النفوس بين س س و مدام zizetta ....

لأ أقولك ... أحسن ابعت SMS لزهيري يجي هو يقوم بالطلعة دي :blink:

[zizetta]

سين سين حبيب الملايين محدش يزعل منه .. وبجد المهم توصيل المعلومة أو الموضوع مش مهم مين يقول إيه لكن المهم إن يحصل إستفادة من أي موضوع أو أي مناقشة ..

وعموماً أنا ممكن أسامحك لو جبت لي ورد في الفالنتين زي ده :

والا أقولك أنا نقيت الحاجات دي وإنت هات اللي تقدر تشيله :

وماتنساش تغطي العربية .

علشان تعرف بس إني طيبة وقلبي أبيض ومش عايزة أكلفك كتير .. كفاية تعبك وشقاك .. ولفك على المكتبات الألكترونية لما لقيت كتب عمر طاهر .. :blink:

الأخ واحد تاني .. أشكرك علي مداخلتك وماتقلقش ... أمال يعني حغلس علي سي السيد إزاي .. أحسن حل ليه اني استمر في تلخيص الكتاب كأن شيئاً لم يكن .. وأظن ده خير رد عليه.. زوهيري ده حبيبنا بس أنا عارفة ان له ميول في الخييييير كتيييير

قرنفل.. طيب هو (عمناول) يعني إيه.. لو قلتي لي يعني إيه حقولك ديك النهار يعني ايه..

تحياتي .. وإنتظروني ..

زيزيتا

[Nina Hussien]

نقل جيد للكتاب و مجهود رائع أحييكي عليه :blink:

عمر طاهر شخص رائع و زميل عزيز غريب الأطوار أحيانا لكنه يدخل القلب بسهولة

ولد في جيل السبعينات و عاش ذكراياتعشناها معه لكنه سجلها بقلمه المميز بطريقة شيقة

و أحب أن أنتهز الفرصة لأرسل له ألف تحية عطرة

و أهنيه بصدور كتابه الثاني :lol:

[إيزيس]

سي السيد شكله راح يشتري الهدايا لمدام زيزيتا و الله تستاهلي وألف مبروك عليكي

يارب حد يزعلني يارب يا رب يا رب

عامنول دي سهلة جدا دي لعبتي معناها العام الأول أي المنقضي وفي رواية أخرى المنصرم

ديك النهار؟؟؟؟؟؟؟ :blink:

تم تعديل 12 فبراير 2008 بواسطة قرنفل

[se_ Elsyed]

ديك النهار؟؟؟؟؟؟؟ :)

مانتي لو بتبصي بصه على مختار الصحاح ... كنتي فتحتي صفحة الديوك وعرفتي إن ديك النهار =هاديك النهار ... بس تم إختصارها لحاجه ترم البدن مع شوية شوربة .

--------

أما أنتي يا زوزو ... فتستالي الألماظ واللولو وإيديكي هي اللي هاتزينه مش هو اللي هايزين إيدك

قشطه ... كده ثبتت زوزو

عن إذنك أروح أرهن البيت ودهب مراتي عند الخواجه صروف بتاع الموسكي عشان أشتري لك فص خاتم من دول .

[se_ Elsyed]

بالمناسبة

تخيلوا إن معظم فصول الكتاب قراتها هنا في المنتدى من خلال مواضيع لبعض الأخوة الزملاء الأافضل ... واكتشفت إنها منقوله نقل مسطرة من الكتاب ......!!!!!!!!!!!!!!

تخاطر توارد أو توارد خواطر مش كده ؟ :)

طب على الأقل ندي الناس حقها يا جماعة ونقول العنوان او الجُمل التالية منجولة من الكتاب الفلاني عشان الامانة بس ....

ما علينا .....

عايز أقولك يا زوز إنك رجعتيني 33 سنة ورا - شوفتي فيلم التايم ماشين ؟- وإمبارح كان عندي مذاكرة للرُكب ... وقلت يا واد يا سين سين هما اللي ذاكروا خدوا إيه ... أقعد إضرب شوية من الكتاب الفقري ده وبرضوا إعمل نفسك بذاكر قدام مراتك عشان البرستيج ..

بس نظراً لإننا في القرن الواحد والعشرون فالدنيا إتطورت ... وبدل ما كنت باحط مجلة ميكي في الكتاب وأقعد مندمج معاها - والله لحد ثانوي- وماما تفتح عليه الأوضة وهي جايبه لي ساندوتشات البطاطس المقلية مع كوباية شاي بلبن قل اللبن ام يغلا ويبقى الكيلو بأربعة جنيه ...

بقيت أفتح اللاب توب وأقعد أنا أعيش اللحظة مع الكتاب ومراتي داخله خارجة عليه بإشي ساندوتشات بيض بالبسطرمة على كوبايات سحلب بالأناناس والحاجات اللي بتخلي الطالب متوفق ، وهي يا عيني عماله تهش العيال من حواليه عشان ما يعملوش إزعاج لأبوهم اللي داخل على الاعدادية ...

[Toronto]

شكلها باظت

إذا كنت مصري و أحد أبناء جيلي فستعي ما أكتبه...

أنا إبن الجيل الذي تفتح وعيه على ماما نجوى وبقلظ وبابا ماجد عبد الرازق " السندباد" و"سينما الأطفال سينما" مع ماما عفاف الهلاوي .. وكانت الموسيقى المميزة لبرنامج " العلم والإيمان" مع د. مصطفى محمود تثير بداخلنا رهبة غير مفهومة .. سهرات التليفزيون نعرفها جيداً .. الأربعاء "اخترنا لك" والخميس مسرحية والجمعة فيلم أجنبي علي القناة الثانية والسبت" نادي السينما" والأثنين "تاكسي السهرة" وبعدها "فكر ثوان واكسب دقايق" .. يوم الجمعة "عالم الحيوان" يليه لقاء الشيخ الشعراواي يليه مباراة أو فيلم ومساء "العالم يغني" و"نافذة علي العالم" ..

لالا برنامج العالم يغني يوم الاحد بعد فيلم السهرة تقديم حمدية حمدي و اخراج سمير روبيل و ماما نجوي وبقلظ و ارنوب و نسيتي برنامج حباتي يوم الجمعة الساعة خمسة و ربع :blink: :blink:

[Toronto]

سولي .. أشكرك لكلماتك الرقيقة..شموع إنتظري للنهاية يمكن نلاقي شوية أمل علي ضوء الشموع..سييم منور موضوعي..أستاذ/ أسد تشريفك لموضوعي فخر لي .. والكتاب ان شاء الله سيتم تلخيصه تباعا بما لا يخل ولا يمل.. تحياتي للجميع..

---------------------------------------------------------------------------------------------------------------------------------------------

الحلقة الثالثة

إزاي تعرف إنك إتربيت في بيت مصري

أشهر 55 جملة ببيقولها الأب والأم في مصر (الحقيقة هم اكثر شوية)

أصبحنا بمرور الوقت نحفظ الجمل التي نسمعها في بيت الأسرة بإستمرار بل نتوقعها (وأهالينا يقولوا وإحنا نكمل لهم) .. وإسترجاع هذه المقولات يبعث في الوجدان قشعريرة مصحوبة بالكوميديا ويعمق محبة أهالينا في القلوب لأنهم تحملوا الكثير في سبيل أن تقف وأنت كبير فخوراً برأي الناس فيك " شكله إبن ناس.. ومتربي"..

هذه الجمل التي لا تقال الا في البيت المصري هي:

1. مش عايزة أسمع صوت (تدريب مبكر علي تقبل القمع والديكتاتورية اللذين ستواجههما طوال حياتك).

2. ماتردش عليا (نصيحة إذا التزمت بها ستكسب مديرك في العمل).

3. تقعد في أول صف قدام السبورة ( تعودك علي أن تكون في المقدمة دائماً).

4. لو مش فاهم حاجة .. إرفع إيدك وقول للأستاذ مش فاهم – ما تتكسفش (فاكرين المدرسين زي اللي كانوا أيامهم).

5. اللي بيشيل قربة مخرومة بتخر عليه لوحده.

6. ومالها الكتب بتاعة الوزارة.

7. بص كويس وانت بتعدي الشارع.

8. متأخرش بعد المدرسة وتقعد تصيع مع أصحابك (نصيحة ستحقق لك قدراً من السعادة الزوجية فيما بعد إذا تعودت أن تكون

رجلاً من الشغل للبيت ).

9. إفرد ضهرك.

10. ما تعليش صوتك.

11. بلاش لعب في الشارع

12. يا إبني اللي ذاكر ذاكر خلاص.. قوم نام.

13. بلاش لعب بالمقص .. بيجيب الفقر.

14. يا بني كلم خالتك العيانة إسأل عليها.

15. إوعى حد غريب يديلك حاجة تاكلها ولا تشربها وتاخدها منه.

16. النوم لحد الضهر بيجيب الفقر.

17. اوعي تكدب عليا تاني مرة

18. لازم تاكل سلطة..

19. لو شفت خناقة مالكش دعوة بيها.

20. عيب .. لازم تحترم اللي أكبر منك..

21. كلمنا لما توصل..

22. مافيش مذاكرة علي المزيكا.. أو .. بتذاكر إزاي والبتاع ده شغال جنبك.

23. ما تمشيش حافي في السقعة دي.

24. صليت العصر؟.

25. ربنا يهديك ..

26. اطفيء التليفزيون وقوم ذاكر

27. اوعي تقول لحد هات لي حاجة.

28. أقفل صدرك.

29. بلاش وقفة الشبابيك والبلكونات.

30. كل علي مهلك وأمضع كويس وماتاكلش وانت واقف وكل من قدامك وما تحفش .

31. كفاية رغي في التليفونات.

32. ما تقعدش قدام المروحة وانت مستحمي.

33. المسلسل مش هينفعك .. قوم.

34. وانت فاكر احنا مستنيك منك حاجة ؟.

35. لو فلحت ابقي تعالي اعمل بي بي علي قبري (إيه الخيال ده؟)

36. ما تلبسش القميص علي اللحم زي العيال الصايعه.

37. يا ابني انت مسطول والا ايه.

38. انت فاكرنا نايمين علي وداننا؟.

39. وطي المدعوق ده شوية.

40. قوم إقرا لك كلمتين ينفعوك.

41. ايه اللامبالاه والإستهتار اللي انت عايش فيهم دول.

42. انت فاكرنا لاقيين الفلوس دي في الشارع.

43. والله ما انت فالح .. وأدي دقني اهي.

44. ما تتكلمش بصوت عالي في الحمام.

45. ما تنامش الا لما تغسل سنانك.

46. ما تلزقش في التليفزيون كده .. نظرك حيضيع.

47. ضرب أمثلة تشجع علي الكفاح وأشهرها " أحد الأقارب اللي كان بيذاكر علي لمبة جاز أو علي نور العامود في الشارع ونجح

وخد الدكتوراه وسافر أمريكا".

48. سلم علي عمك كويس يا ولد.

49. يابني ما حدش بينفع حد.

50. ما تطلعش ايدك من شباك العربية.

51. قصة الغريق الكاذب اللي كل مرة يقول الحقوني .. لما غرق بجد.

52. التهديدات المخيفة شكلاً والكارتونية مضموناً .. حقطم رقبتك أو هاقطع ايك أو حقطع لك لسانك أو هادبحك دبح.

53. ربنا يرزقك بعيل يوريك اللي ورتهولي.

54. ما تطلعش علي الملاية النضيفة ورجليك متوسخة كده.

55. ما تقعدش عريان كده قدام اخواتك البنات.

56. حول القناة دي بلاش مسخرة وقلة أدب.

57. نسيت تشرب؟ نسيت تاكل؟ نسيت تقول هاتوا مصروفي ..نسيت تعكنن عليا؟.

58. طلع إيدك من جيبك وانت بتكلمني.

59. ياللا يابو كحكة حمرا.. إنت فاكر نفسك هتقعد تاكل معانا.

60. عايزة أبص ألاقيك قدامي دلوقتي فوراً .

61. ما تتشقاش في الفسحة وكل سندوتشاتك كلها.

62. أدي اللي انت فالح فيه.

وللحديث بقية ...

زيزيتا

:blink:

بكرة نعض الحيطة و نسمع الزيطة و امسك صباعك صحيح لاياب و لا ياييح و لسانك حصانك ان صنتواصانك وان هيتتوا هانك

[عصام أبوالفتح]

الأخت الفاضلة زيزتنا

سعدت جدا حين طالعت بداية الموضوع لانها ذكرتنى بالكتاب الذى قلبت عليه الدنيا هنا بالرياض منذ سمعت عنه ولم اجده .. لكن اعتقد انك اسهبت فى التلخيص حبتين .. خلى الراجل يبيع الكتاب لانه فعلا يستحق الاقتناء . وشكرا على العموم على التلخيص والمجهود الكبير

اللى يعرف مكان بيبيعه فى الرياض ياربت يقولى

[عصام أبوالفتح]

30 حاجة من اللى قالهم وهما 45 حاجة بتفرحنى .. اكثرهم اصلاح الاشياء بنفسى !!

بس مجبش سيرة الهوانم خالص ...

اكتر حاجة تفرح الست المصرية انك تقولها مش هاتطبخى النهاردة .. هناكل بره .. او تجيبلها دليفرى

كمان لمة صاحباتها ... دى بالدنيا

مسلسل حلو .. ياسلام على التركيز .. ولما تسألها تقعد تديلك الملخصات الفورية للاحداث الدرامية ...

طبعا الهدايا بمناسبة ومن غير

الحاجة دى لها تأثير ساحر على النساء - تقبيل اناملها بعد اكله حلوة وتقولها تسلم ايدك ... طبعا مش اى واحدة

امك اختك بنتك مراتك ومحارمك بس ... محدش يتهور لا بعدين يتعور

تبتسم فى وشها وانت داخل البيت .

تلعب معاها ومع العيال اى حاجة مشتركة

تسألها على اهلها وتطمئن عليهم ...

وغيره بس كفاية كده دلوقتى

[zizetta]

أحمد عرب .. أشكر مداخلتك والكتاب ممتع جداً .. ( الله يجازيك يا للي في بالي)..

Nina .. جميل انك تعرفي هذا الكاتب اللي من الواضح أنه يتمتع بخجل شديد والقدرة علي التعبير كتابة اكثر منها تحدثاً ..

قرنفل .. أنا أعرف ديك الليل لكن ديك النهار ممكن تسألي نينة فولانة لأن عندها قاموس عم صبحي (بيتهيألي ده كان إسمه حسب معدلات الزهايمر عندي).. أما عن ديك الليل فهو عبد الحليم حافظ لأنه قال وأراعيك وأصحي من الليل أنا ديك وأبعت روحي تصحيك ...

تورونتو .. يظهر أن كل الجيل اللي بيتكلم عنه الكاتب (وأنا منهم طبعا) .. كلامهم واحد .. هيييه ذكريات..

عصام بك أبو الفتح .. الإسهاب في التلخيص مطلوب أحيانا لما تلاقي نفسك كل اللي بتقراه لازم يتنقل .. وعموما انت مش محتاج تشتري الكتاب من الرياض .. فيه فاعل خير نزله هو كتاب تاني لنفس الكاتب سوفت كوبي .. والكتاب حيتباع متخافش لأن متعة قراءة الكتاب في إيدك أحلى كتير من قراءته علي الكمبيوتر..

تحياتي للجميع وتمنياتي بالإستمتاع بقراءة سلسلة أعمال الكاتب عمر طاهر.. وإلى لقاء في كتب أخرى ..

زيزيتا

[لؤلؤة]

لم يذكر السجن في القرآن الكريم إلا في مصر في سورة " يوسف "..

إزاي تعرف إنك إتربيت في بيت مصري

أشهر 55 جملة ببيقولها الأب والأم في مصر (الحقيقة هم اكثر شوية)

أنا مش عارفة أزاي الكاتب ده عرف كلام أمي اللي كانت بتقوللهولي و نقله بالحرف

[sailor ah]

يبقى انت أكيد فى مصر

وأنا مبسوط اوى من موضوع الـ 50% ههههههههههههههه

ورجاله وطول عمر ولادك يابلدنا ............؟