إحنا وعيالنا .... مين بيربي مين ؟

[se_ Elsyed]

ما شاء الله عليه .. عبقري والله

أصل إحنا عقولنا اخدت على الإجابات النمطية والإستريو تايب ...

هادي ده بيفكرني بعالم الرياضيات الدنماركي اللي فاز بجائزة نوبل من كام سنة ... وكان طول عمره يسقطوه في المدرسة لإنه كان كان بيجاوب إجابات غير نمطية ومبتكرة

[كوابرية]

انا ماما طول عمرها بتقولى طول ما بيتضيقينى وما تسمعيش الكلام عيالك باذن الله حيوركى الويل

بس انا مش دايما كدة...بس الحقيقة بقى سمعت الكلام ما سمعتش العيال لسة ياما حيورونا

دة اولاد خالى بيتكلموا ويردواعلينا كانهم اية نلقص يقوموا يضربونا ..ولما سمعهم بقول دة احنا ما كناش عيال

[زعلان]

md2: :lol: موضوع حلو وعجبني بجد قرأت مداخلاتكم بلا ملل ربنا يستر انا خايف :waf:

[لماضة مصرية جدا]

السلام عليكم و رحمة الله و بركاته

انا فاكرة زمان لما تانت قلب ابيض كان عندها استفسار عن ابنها نور لما سألها عن الاغاني و كده و قالت ارد عليه ااقول ايه

قولتلها يا تانت....في وقت كتير بحس ان ولادنا هما اللي بيربونا مش احنا اللي بنربيهم

هتضحكوا عليا و تقولولي يا بنتي انتي ايه اللي هيشيلك هم الاولاد و تربيتهم اصلا...ااقولكم في وقت بيبقي دور العمة.....او الخالة...او صديقة الام...بيبقي مهم اوي لانه بيبقي طرف بعيد عن التعليمات المباشرة اللي بتيجي من الاب و الام...و اللي عادة بتتقابل بالرفض لو في مرحلة المراهقة.....او بتتقابل بالطاعة المصحوبة بالبرطمة

ببساطة بحس ان محدش فينا بيتولد و بيتجوز و بيقول لنفسه انا خلاص كده بقيت اب كويس....او ام كويسة.....كل الدايرة دي هي محاولات و اجتهادات.....احيانا الاباء بيتصرفوا اللي بيشفوه في الوقت ده صح.....و احيانا تانية يراجعوا نفسهم بعد شوية و يحسوا ان الكائن الصغير ده اللي يشبهم حد التماثل....مبقاش شبهم خلاص....ده كبر لدرجة انه هو نفسه اللي ممكن نقول عليه مجازا "هو اللي بيربي والديه"

دي مساحة عائلية جدا...نحط فيها مشاهد من حياتنا مع ولادنا....او من اللي بنشوفه في الحياة......مش عشان نقول ان اي اب او ام مقصرين...ابدا.....بس عشان نتعلم و نفكر و نشوف يا تري اللي بنعدي عليه في تعاملتنا مع ولادنا.....و مرة ناخده ضحك و مرة ناخدة بعصبية.....بيغير في شخصيتهم....بيغير في شخصيتنا....مساحة اكتشاف كؤوس كريستال تنور جوانا و مع ولادنا....او ناس قريبين مننا جدا

و يا رب ان شاء الله تكون دي خطوة لتحقيق الاية القرآنية

"ربنا هب لنا من أزواجنا و ذرياتنا قرة أعين و اجعلنا للمتقين إماما"

مسااااااكم عائلي جدا

[mekkawy]

نقول سلام عليكم

و نقول كمان برافو و سقفتين لبنتنا البارة لماضة على الموضوع الجميل الهايل اللي نتمنى يكون منارة لتعليم التربية

الصراحة و من تجربتي كأب (مع إيقاف التنفيذ مؤقتاً) لسة ما تفاعلتش أوي مع الأوسة عشان أنا سبتها و هي 9 شهور و حتة .. هي دلوقتي عندها سنة ما شاء الله .. أنا تقريباً عايش معاهم على التليفون و اللي أقدر أقوله ... إن مش أم سلمى اللي بتربي سلمى .. لأ .. بالعكس .. أبسولوتلي .. سلمى هي اللي بتربى أم سلمى ... بتربيها و بتطلع عليها عرق الشعوب .. البت يا اخواتي أتصل ألاقي أمها بتصوط و دي عمالة تضحك .. مش عارف جايبة البرود و الجبلنة منين :wub: .. أتصل 8 الصبح .. صاحية و بتقرد في أمها .. أتصل 2 بالليل .. شرحه ... عندكيش يا أختنا لماضة حل للموضوع ده ؟؟!!

مكاوى .. و لنا عودة

[pink rose]

من موقعي هذا كأم من 4 سنين و 7 شهور

احب اعترف و اقول ان مريم هي اللي بتربني و بتربي باباها ساعات كمان لما بتشوفه يعني

باحاول على اد ما اقدر اني احافظ على تصرفاتي قدامها لسببين

الاول اني المفروض قدوة كويسة ليها

ثانيا عشان لو شافتني باعمل حاجه ما تقومش راميالي كلمتين يحرقوا دمي و انا في سني دا

عيب اوي لما اتهزأ بالادب من عيلة صغيرة مفعوصة يعني مش منظر

النهاردة مثلا هاحكيلكم موقف صغير جدا بس و الله فرحت منه اوي

انا معلماها اننا لازم نلبس اي حاجه باليمين الاول لان الرسول محمد عليه الصلاة و السلام قال كده هي طبعا فاهمة دا تمام

المهم كنا عند عمها و عاوزين ننزل و هي عمالة تتدلع قام باباها جاب السابو بتاعها و بيلبسها عشان الانجاز يعني

قام غلط غلطة عمره المسكين لبسها الشمال الاول و يا ولاداه على اللي حصله اخد درس محترم في ان كده غلط و ما ينفعش الكلام دا وهو انت مش عارفه ان اليمين الاول زي الرسول محمد ما قال :sad:

الاطفال دول هاقول ايه غير ربنا يحفظهم و يبارك فيهم

اللهم آمين

[لونا]

مين بيربي مين؟؟ :wub:

في الواقع إحنا بنربيهم أول أربع خمس سنين من عمرهم

يعني ما قبل دخولهم المدرسة

و لغاية تانية إبتدائي بيفضل تأثير البيت عليهم قوي جداً

لو الطفل في الفترة دي ما إتعلمش الأساسيات اللي الوالدين عايزين يزرعوها فيهم

بيكون أصعب بعد كدة ... لأن الطفل بيكون واقع تحت تأثيرات خارجية كتيرة

أكثر من مدرس أو مدرسة .. كلهم ينفعوا يكونوا قدوة له

عدد كبير من الزملاء في المدرسة .. ممكن يختار أي واحد فيهم قدوة له

بالإضافة إن الطفل في المدرسة بيكون بعيد عن الأهل .. فصعب معرفة كل ما يحدث لهم و توجيهم

عشان كدة مهم أوي نعلم الولاد يحكوا لنا بعد عودتهم من المدرسة على ما مروا به من أحداث

أما بأه إنهم بيربونا .. فده بيحصل طول الوقت

لأن مش ممكن أقول لإبني ما تكذبش و أكذب

أو قوم صلي أول ما تسمع الآذان و أنا ما أصليش في أول الوقت

عشان كدة لازم الآباء طول الوقت يراقبوا تصرفاتهم .. لأن أولادهم بيراقبوهم طول الوقت

هو المفروض نقول لازم نراقب الله في كل تصرفاتنا .. لأنه سبحانه و تعالى يراقبنا طوال الوقت

[Howayda Ismail]

عزيزتى لونا ارسلت لك رسالة على الخاص لكن الواضح انها لم تصلك ولااعرف السبب

بالنسبة لتربية الاولاد انا باحاول اتربى من جديد معاهم عشان اعرف اتعامل معاهم خصوصا انهم فى مرحلة المراهقة وانا دقة قديمة

مش ماشية اليومين دول

[se_ Elsyed]

طنط لماظه

بابي بيسلم عليكي وبيقول لك إقري الموضوع ده

http://www.egyptiantalks.org/invb/?showtopic=50163

[لماضة مصرية جدا]

طنط لماظه

بابي بيسلم عليكي وبيقول لك إقري الموضوع ده

http://www.egyptiantalks.org/invb/?showtopic=50163

السلام عليكم و رحمة الله و بركاته

تصدق استاذي اني قعدت يمكن اضحك نص ساعة.......بجد انبسطت اوي

حسيت يعني يجي مني

يوم ما فكرت في توبيك كدهوت.....طلع توراد و تلاحم و تماثل و .....و ....و .....و حاجات كتير فوق بعضها مع موضوع حضرتك

بجد ابا الحاج ابويا اكيد هيبقي فخور بيا...اخير دماغي هتنظبط

و بناءا عليه

شمعلنا بقي التوبيك دهوت...او حطه مع التوبيك دهوات.....عشان عندي كام سؤال كده و عايزة احطهم

صباح حضرتك تواصل بدون انقطاع.....و بدون تكرار برضه

تحياتي استاذي

[لماضة مصرية جدا]

السلام عليكم و رحمة الله و بركاته

نسيت ااقول حاجة صحيح

ليه ميبقاش عندنا خاصية كده فلترة قبل ما اي حد يضيف توبيك جديد....يعني مثلا لو الواحد بيكتب كلمات معينة كعنوان موجود....يطلعلوه مرب بحث و يقوله "ان الموضوع ده موجود مثلا بعنوان مقارب" هل تقصد ده و لا ايه

زي السيرش انجين كده يعني

طبعا اوعي حد يهرش في دماغه و يقولي و ده يتعمل ازاي....انا ضايعة اصلا في التكنولوجيا المتقدمة دي

هو ينفع يعني و لا لا

و خصوصا الاجيال الجاية...محدش فيه خولق يقعد يفر الموضوعات و كده...فبيروح رازع توبيك جديد....

بس خلاص

صباحكم حوارات.......منتديات.....صباحكم ونس

[se_ Elsyed]

شوفتي مش قلت لك

إنك من ساعة ما بقيتي ضمن شبكة الزغاليل الحائرة ودماغك أختلفت تماماً

يا خوفي يا لماظه يطلع لك بدل الضفاير دي " ريش "

[اغابي]

اول مرة اخد بالى من الموضوع smk:

ازاى موضوع مهم وجبار زى داه ما اخدش بالى منه bv:- شكرا يا س س - على الموضوع المفترى داه :lol: اللى بيقلب المواجع

وشكرا يا ايزيس امتعتنى حلقة كلامك عن اولادك وخاصة ابنك - الشورت لاء - مفهوم :lol:

انا عن نفسي وبالاصالة عن زوجى نقر ونعترف - اعتراف اول واخير وعلى راى جوزى يعنى

- اتارينا ما اتربناش قبل كدا - اتارى كل التربية اللى شفناها على ايد اهالينا واجدادنا والغربة والجامعة والجيش

ما كنتش تربية يا جدعان - دى كانت حاجة اسمها دلــــــع × دلــــع

المعادلة ان :

ابنى الصغير الجبار - العصبي المصراخاتى المزعج الزنان المجرم ( ممكن يحدف باى حاجة فى ايده انشالله سكينة يحدف اى حد لو هو متعصب داه فى كى جى 1 + ابنى السوسة السهتان الفنان فى التمثيل والمبدع وفاهم كل شيء حواليه - ابنى الكبير 3 أبتدائي ) = عصابة = مسيطرة على البيت mfb:

من اول الكمبيوترات والتلفزيونات لغاية التحكم فينا فى اللبس وطريقتنا فى الكلام وانواع الاكل فى التلاجة والمطبخ وايه اللى مش بيحبوه ومش عاوزينا نجيبه فى البيت اصلا من انواع الاكل والفاكهة - سيطرة تامة - دى اختصارة كل اللى ممكن اقوله ...

احنا بنتربي منهم - بس برضوه بنربيهم - على اد معلوماتنا من اهالينا زمان عن التربية :lol: لان اطفال اليومين دول غيرنا :blink:

احنا على ايامنا كان حظنا كويس لو جيرانى بقوا معايا فى الفصل - واروح كل يوم معاهم المدرسة - واعرفهم على اصحابي اللى مش من منطقتى

لكن اولادى فصلهم فيه 7 او 8 جنسيات مختلفة ومفيش واحد منهم انا اعرفه او اعرف اهله - و اكيد اختلاف الجنسيات - حتفرق فى حاجات كتير ..... ( ؟ )

ربنا يستر

اغابي

[لماضة مصرية جدا]

السلام عليكم و رحمة الله و بركاته

اسمعوا المكالمة دي

ميكو "بنت اخويا عندها 7 سنين": وحشتيني موت يا عمتو

انا "ما هو انا بعد الضهر ببقي عمتو": و انتي يا ميكو آد الديناصور........بتعملي ايه دلوقتي؟

ميكو: بتفرج علي الجاسوسات....و بعديهم فيه فلة....متعرفيش يا عمتو انا بحبهم آد إيه؟؟؟

أنا...(انا كنت هعيط لان اخر حاجة افتكرها عن برامج الطفولة كان سامية شرابي و كرمبة): دول حلوين يا بت يا ميكو

ميكو: مووووت يا عمتو.....عمتو تصدقي انا بدعي ربنا بايه؟؟؟

انا...(هزغرط....البت طالعة تقية احمدك يا رب): ايه يا ميكانو قلبي

ميكو: بدعي ربنا من كل قلبي...اوي انه يبعتلي عربية فلة؟؟

أنا: مين يا اختي؟؟؟ (العرق البيئة بقي هيفط)

ميكو: ايوه يا عمتو دي عربية بلاستيك كده لكن فيها فرامل و عداد سرعة و مرايات و ممكن ااقعد فيها و اسوق و اخبط في العيال

أنا...(الله يرحم البلي): طب ادعي ربنا و ابقي اتوضي يا حياتي قبل ما تدعي عشان ان شاء الله انا عارفة ان ربنا كريم (ببص علي محفظتي و اشوف هتنفع نجيب عربية الست قولة دي و لا ايه...و انا عارفة نفسي هجيبها هجيبها)

نفس اليوم

بالليل

حوار انا و امي

أنا: ازيك يا مامتي....وحشتيني موووووووووووت

امي:....و انتي كمان

أنا: انا راحية اوصل واحدة صاحبتي يا ماما المطار...اصلها رايحة كندا.....

ماما: و ماله يا بنتي ربنا يوصلها بالسلامة

أنا:ياه يا ماما متتخيليش آد ايه ربنا كريم...ده بيقولوا كنكا دي حاجة كده ايشي خيال يا ناس

أنا بدعي ربنا من كل قلبي يا ماما ان ربنا يكرمها اوي....و.....سكتت...(عايزة احدف القنبلة اني انا كمان عايزة احصلها)

ماما:ادعي يا حبيبتي و ماله.....بس يا ريت و انت بتدعي متبقيش تهرشي في دماغك و تفكري تسافري هناك.....مافيش سفر تاني

طبعا حسيت اني انكب عليا جردل ميه ساقعة مووووووووت....مش عشاان ان امي فقستني و لميت الليلة بدري بدري

تؤتؤ

عشان البت المفعوصة عرفت تطبق نظرية "دحلبيني و كوليني و لبسيني السلطانية"......و انا فشلت فشل ذريع اني اعمل حتي نصها

تفتكروا فيه امل نتعلم منهم حاجة

ربنا كريم

صباحكم شقاوة عربية فلة.....لونها بمبي و حكاااااااااااااااية

فوتكم بعافية

[لماضة مصرية جدا]

شوفتي مش قلت لك

إنك من ساعة ما بقيتي ضمن شبكة الزغاليل الحائرة ودماغك أختلفت تماماً

يا خوفي يا لماظه يطلع لك بدل الضفاير دي " ريش "

صباح حضرتك زعارير

اسمهم زعارير يا استاذي.....جمع زعرورة....حسب القاموس اللمضاوي....الزعرورة هي هجوم غاشم علي مساحات الشعر المنطلق الغجري و قمع الثورة المنكوشة في شكل فريقين...و شق قناة بينهما بتبين صلعة الراس

اي خدمة

لزم التسريح.........قصدي التنويه

[mekkawy]

شوفتي مش قلت لك

إنك من ساعة ما بقيتي ضمن شبكة الزغاليل الحائرة ودماغك أختلفت تماماً

يا خوفي يا لماظه يطلع لك بدل الضفاير دي " ريش "

صباح حضرتك زعارير

اسمهم زعارير يا استاذي.....جمع زعرورة....حسب القاموس اللمضاوي....الزعرورة هي هجوم غاشم علي مساحات الشعر المنطلق الغجري و قمع الثورة المنكوشة في شكل فريقين...و شق قناة بينهما بتبين صلعة الراس

اي خدمة

لزم التسريح.........قصدي التنويه

أيها الشعب

شفتوا باة تأثير اتباع التنظيم الحقاني الزغاليلي اللي بنتنا لماضة أثبتت تفوقه و عدم انحيازه للكتلة المحلية الشرقية بكتابتها المثيرة للجدل من خلال البوتقة الصحفية في الامارات العربية؟

سنتننضنوا أيها الشعب للتنظيم الجليل الجميل لتصبحوا على اهبة الاستعداد زي بنتنا لماضة

تأثير بليغ جداً أوي خالص للتنظيم على مجريات ضفاير بنتنا لماضة .. و زي ما اخونا س س قالها .. الحذر الحذر من تبدل الكسوة الخارجية للجسم البشري بالريش الزغلولي الحقاني.

و دمتم

مكاوى

[mekkawy]

حبيت أفيد و أستفيد

الدكتور ياسر نصر

أستااااااااذ رائع في علم التربية .. شهاداته و مؤهلاته غير عادية و إمكانياته غير عادية فيما يخص التربية و ايقاظ الأمة

هو بيجي في قنوات كتير زي الناس و الحافظ و أكيد قنوات تانية

أنا حضرتله زماااان قبل ما يطلع في التلفزيون خالص لما كان الدرس بيبقى صف واحد زي أول أيام عمرو خالد كدة .. استاذ رائع

و ده الموقع الرسمي بتاعه

الموقع الرسمي للدكتور ياسر نصر

و أنصح إخواني بأة بسلسلة صلاح الدين الأيوبي .. متعة و هتضيف ليكم كتير أوي جداً خالص

مكاوى

[عنبو]

يانهار ابيض يعنى انا ابنى هيعمل فيا اللى عملته مع ابوياااااااااا

لا لا ده كده هتبقى مشكله كبيره بس انا بقول ان دى مش قاعده يعنى والا يبقى انا هشوف ايام صعبه بجد لان مقدتمش لا سبت ولا حد ولا اتنين ولا اى يوم فى ايام الاسبوع

[mekkawy]

يانهار ابيض يعنى انا ابنى هيعمل فيا اللى عملته مع ابوياااااااااا

لا لا ده كده هتبقى مشكله كبيره بس انا بقول ان دى مش قاعده يعنى والا يبقى انا هشوف ايام صعبه بجد لان مقدتمش لا سبت ولا حد ولا اتنين ولا اى يوم فى ايام الاسبوع

لا يا عنبو طبعاً .. متخفش يا أخي .. ابنك عمره ما هيعمل فيك اللي انت عملته في أبوك

مع تطور الأجيال و تطور الأفكار و كدة .. لا يا أخي عمره

ده أنت هتتمنى يعمل فيك اللي انت عملته في أبوك :cry1: ... هتقوله يا ابني طب بص .. اضربني بالكرباج و بلاش مش عارف ايه .. قال يعمل فيه اللي عمله في أبوه قال :cry1: هههههههههاي ... يا ابني بالتطور المنيل ده اللي هيتعمل فينا أضعاف مضاعفة من االي عملناه في اهالينا

اصحى يا عم الحج .. انت داخل على 2020 ...

مكاوى

[Howayda Ismail]

والله ياريت يعاملونا زى مااتعملنا مع اهالينا على الاقل يترحموا علينا لما نموت