الوحش

[حازم كمال]

هي قصة من الصين ولكنها صالحة للانتاج المحلي وهي ان كانت خارج نطاق الخدمة بالصين لانها من الادب القديم الا انها مازالت تخدم داخل الحدود مع مراعاة فروق التوقيت...تقول القصة بتصرف ان قرية آمنة مطمئنة يعمل اهلها بالزراعة يذهبون صباحا للحقول ويعودون عند الغروب للمساكن والدور...وبعد اكلة هنية مع الولية يخلد الجميع للنوم لا تليفزيون ولا فضائية...الخير في القرية كتير ...طيور ومواشي وخرفان وبعير....ويوم واحد في الاسبوع اجازة يتبادل فيه اهل القرية الزيارات والحلوى وكل اسبوعين كدة يبقى في سوق في القرية ...والتجار بتيجي تبيع وتشتري والتجارة رايجة.

وفجأة اقتحم المكان وحش ولا في الحسبان ضخم فتاك بيحصد الارواح لا يفرق بين انسان وحيوان حتى النبات مسلمش منه كمان...وهرب الناس للبيوت وورا كل باب متراس ومزلاج وحديد وكل شيء ثقيل...احتياطات امنية ولا الزيارات الرئاسية..وطال المدة والناس خايفين وتموين البيوت بينضب وبدأت الناس تموت من الجوع....رجل عاقل قال في نفسه ايه اللي هيجرى لو صارعت الوحش ...هيموتني ...طيب ما انا كدة ميت وكدة ميت وبدل ما اموت من الجوع ذليل زي الارامل والمساكين...اموت في عزة...... وان هزمته هفرح اهل بلدي وافك عنهم الحصار...واستجمع الشجاعة ووسط الميدان نادى بأعلى صوته ...يااااااوحش

الرد رهيب وصوت الزئير زلزل القرية ومن وراء الثقوب الناس بتنظر وتقول ...مسكين الفتى ..راح بلاش...لحظات وبدأ النزال... الفتى بصراحة جدع وثابت لا همه صوت ولا تهويش وبضربة حديد رقد العنتيد...وبضربة تانية خر الوحش صريع ...وجز الرقبة ورفعها بأيده....ونادى يااااهل القرية انتهى الحصار...وعاد الأمان...اخرجوا للحقول والوديان...مارسوا نشاطكم وتجارتكم كما كان....اهل القرية لسة في بيوتهم قاعدين وعلى الخروج مش ناويين......ومرة اخرى صاح الفتى اخرجوا يااهل قريتي..السكة امان والوحش ذبحته ذبح الخرفان...فلماذا لا تخرجوا ؟؟؟ الجواب عجيب ولا يخطر على بال اللبيب....لن نخرج لانك اصبحت اقوى من الوحش ..واحنا كنا بنخاف من الوحش ودلوقتي انت اكبر من الوحش...وهنا علم الفتى ان المشكلة في الخوف اللي معشش في النفوس هو اللي عامل قفلة ومخلي الناس في غفلة ...ياليت قومي يعلم ان المشكلة في النفوس اللي محتاجة دروس تحررها من الغفلة وتفك القفلة وتعيش حياتها في عزة.

[Nina Hussien]

نعم المشكلة في الخوف الذي أصبح يعصف بالقلوب

مرة في المكتب كنت اتكلم عن حركة كفاية و محاربة الخوف

و اذا بزميلين يحاولان باي طريقة اسكاتي و ارهابي و تذكيري بامن الدولة اللي لا يعرفوا عدو من حبيب !!!!

نظرتم اليهما و انا ارى الخوف يطل من عينيهم

خوف أشبه بالخوف من امنا الغولة و ابو رجل مسلوخة

خوف من الخرافات و زوار الليل و مستقبل العيال

ربنا يستر

[شموع]

طريقة السرد رائعة جدا وتشد للقراءة بجد

القصة فكرتني بالمثل الي بيقول اللي مالوش كبير بيدور له على كبير

بس بصراحه انا فكرت فيه مش عشان الكبير ولكن عشان الخوف

يعني اللي مش بيخاف لازم يدور على الخوف وفعلا المشكله في الناس

خاف تسلم ... وغيره

ربنا يهدينا جميعا

[القلم الحر]

قصة رائعة جدا ومعبرة لواقعنا الأليم الدي نعيشه كعرب ومسلمين

نعم الخوف هو الشماعة اللي بنعلق عليها حجتنا في عدم خوض المعارك لاسترجاع اي حق من حقوقنا للاسف!!