الى كل مصرى مغترب

[Abotrika]

لو سمحتوا يا مصريين يا مغتربين فى الخارج انا عايز اعرف الطريق اللى اتبعه علشان اقدر اشتغل فى الخارج مع العلم بانى لسه متخرج السنه دى من كليه التجاره و معنديش اى خبره.

ويا ريت تعطونا نصايحكوا فى الموضوع ده

أنقذونا من البطاله

تم تعديل 16 فبراير 2008 بواسطة Abotrika

[إيزيس]

أولا أهلا بيك في المحاورات وألف مبروك التخرج

نصيحتي لك أن تعمل في كل الاتجاهات والله يعينك ويقويك أقصد إنك تعمل كورسات لغة وكمبيوتر وتبحث عن أي شغل داخل مصر

وفي نفس الوقت خارج مصر ما تنتظرش حد يوفر لك شغل ولا تأمن شركات التوظيف أبدا انت إبدأ بعمل في مصر تعمل بيه خبرة

كويسة حتى لو تبدأ بعمل بسيط أنا من خلال تجربتي والله شفت نوعين من الناس الأول اتكالي ينتظر عمل مريح وراتب جيد وفي

وقت فراغه اللي هو 24 ساعة يلعن الظروف و يشتكي الظلم ولم يصل إلى أي شيء محلك سر

و نوع تاني أتمنى تكون مثلة وربي يفتحها عليك زيه تمام لم ينتظر

معونة من أحد ولا واسطة اشتغل في أشغال كنا نشفق عليه من صعوبتها وتطور في عمله و ربك فتحها عليه من حيث لايدري

أنا حاسة من كلامك رغبة في السفر لكن نصيحة مني ماتسافرش وانت بدون خبرة هتتبهدل وتاخد راتب يادوب يكفيك أكل وشرب

لازم تكون عندك الكفاءة اللي تخليك مطلوب وفي النهاية على المرء أن يسعى وليس عليه إدراك النجاح وربنا يوفقك ويفتح لك أبواب الرزق

[الحازم حسن]

أنا حاسة من كلامك رغبة في السفر لكن نصيحة مني ماتسافرش وانت بدون خبرة هتتبهدل وتاخد راتب يادوب يكفيك أكل وشرب

لازم تكون عندك الكفاءة اللي تخليك مطلوب وفي النهاية على المرء أن يسعى وليس عليه إدراك النجاح وربنا يوفقك ويفتح لك أبواب الرزق

كنت حقولها :closedeyes:

[هشام الكندي ان شاء الله]

لا تسافر بدون خبره و اتقان للغه الانجليزيه الي اي مكان في العالم خاصه الدول العربيه

الدول العربيه فيها نظام الكفيل و هو استعباد العصر الحديث

ياخد باسبورك و يقبضلك و مش بعيد يدخل معاك التواليت!

ممنوع ان تتملك عقار او ما شابه في دوله عربيه, فقط مستاجر

لذلك لا تخرج من بلدك مصر الي بلد عربي الا اذا كانوا عايزينك فعلا بدل ما تروح انتا برجليك و تستحمل اي حاجه

اصبر ان الله مع الصابرين لكن اتعلم لغه و كمبيوتر من علي الانترنت ببلاش من غير فلوس زي ما بعمل لحد ما هتلاقي شغل تبدا تشوف بقا دماغك فيها ايه؟

ناس بتبقي عايزة تتجوز و ناس بتسافر و ما الي هذا

اتعلم بس لغه انجليزيه و شويه كمبيوتر و ربنا هيكرمك باذن الله, لو عايز اي مساعده في الشغل فيا ريت تقولي انتا بتعرف ايه بالظبط غير بكالوريوس التجارة, بمعني بتجيد ايه من لغات او كمبيوتر و يمكن الاقي حاجه ليك فعلا

علي فكرة دي اصعب و اكتر فترة ممله في حياتك انا جربت و عارف

لكن اكتر فترة فيها وقت فراغ

لو انسان سلبي هتقضيها نوم و تلعن الظلام و هتتنسي تماما و هتضيع مقدما

لو بدات تتعلم حاجه صدقني العمليه هتحلو و ربنا هيكرمك جدا لان الله لا يضيع اجر من احسن عملا

صدقني هتلاقي مجهودك سواء في الدنيا او في الاخرة او في الاتنين سوا

ربنا معاك و يعينك و يعين كل شباب الخريجين

[muslim4ever]

هشام احب اصحح لك معلومة

لك الحق ان تمتلك اى شىء فى الدول العربية بما فيها الشقة وتاخذ عليها اقامة كمان الا فى السعودية فتمتلك فقط

المشكلة فينا احنا اننا لا نشترى شقق فى الدول العربية الا ما ندر نحن نشترى فى مصر ودى مشكلتنا مش مشكلتهم

اما الكفيل والعبودية والرق والكلام الكبير دة لن اتكلم فى هذا الجدل العقيم ولكن احيلك الى قانون العمل المصرى وراجع شروط استقدام وعمل الاجانب ستجد بدلاً من

كلمة الكفيل كلمة الضامن ويمكن ان ترجع الى اى شخص عندة عاملة من دول شرق اسيا ليخبرك عن الشروط وهم كثر الان

هشام دعنى اهمس فى اذنك

ان شاء الله تحصل على الهجرة كم تريد ولن تسطيع ان تغادر مصر قبل ما كفلائك يوافقوا على ذلك

تصريح العمل ..... كفيلك

تصريح الجيش ...... كفيلك

وياسلام لو عندك شعرتين فى ذقنك .. تصريح امن الدولة .... كفيلك

تحياتى لك

[لخبطه]

ياريت تقول لنا الكلية اللى انته متخرج منها علشان لو فيه حد فينا في نفس المجال يدلك على أول خطوات الطريق .

لكن طبعا بشكل مبدأي أويد كلام الاخوه في كسب الخبرة أولا ودي حاجه مهمه ومعناها أنك لو هتسافر دلوقتي بدون خبره من الإفضل أنك تتأخر في السفر سنه او سنتين وتسافر بخبره هيكون وضع افضل من السفر بلا خبره وطالما دماغك في السفر فبلاش تشغل بالك بالوضع عندك يعني اشتغل من أجل الحصول على الخبرة حتى لو اشتغلت ببلاش هتكون انته الكسبان

[Abotrika]

والله يا جماعه انا مش عارف اشكركم ازاى على اهتمامكم ده وردكم عليا بالسرعه دى وكلامكم بجد افادنى وادانى دفعه قويه انى ادور على شغل فى مصر الاول واخد خبره . بس انا عايز اعرف دلوقتى انهى خبره بتبقى احسن للشغل بره هل مثلا الخبره فى البنوك( اللى من الصعب جدا ان الواحد يشتغل فيها من غير واسطه) ولا فى الشركات والمصانع كمحاسب ولا فى مكاتب المراجعه والمحاسبه ولا حتى مجال الساليز (مندوب مبيعات) فى الشركات والبنوك ياريت تفيدونى فى الموضوع ده وتقولولى انهى مجال فى دول بيبقى احسن

ولو حد يعرف مجالات تانيه يقولى عليها علشان اقدم فى الشركات بتاعتها

اما بالنسبه ل (لخبطه) فأنا خريج تجاره عربى وتقديرى جيد وتدربت 3 شهور فى البنك الاهلى وانا بدرس

وبالنسبه ل (هشام الكندى) ربنا يكرمك وتبقى كندى كدا انشاء الله . انا جيد جدا فى اللغه الانجليزيه وواخد كورسات فى الجامعه الامريكيه وواصل للمستوى العاشر وواخد دوره icdl

وشكرا ليكى يا (قرنفل) على الترحيب والله يبارك فيكى

أنقذونا من البطاله