مش فيزا دخول !! فيزا عدم دخول !!

[magdyit]

السلام عليكم - اخواني

هذه مشكله مع اخي وارجو منك اتستع الصدر لقرائتها والتعقيب عليها

اخي سافر الكويت من 2 سنتين وعمل عند كفيل سئ جدا وكان بيديله الراتب كل شهرين - المهم عقده خلص هناك وجاتله فرصه في وزارة الدفاع هناك وخلص معاهم وكان وضع احسن طبعا بكتير فراح لكفيله وقاله باللفظ ( انا الكويت ) ومفيش غيري عاجبك عاجبك مش عاجبك مع السلامه - المهم اخويا حاول معاه بكل الطرق الفلوس - العلاقات - كل شئ ولكن بلا جدوي - فرجع اخويا مصر

وقعد يراسل الشركات هناك لغايه ما لقي شركه محترمه واتفقو علي كل حاجة من اسبوع بالظبط - وبعت لهم صورة الباسبور بتاعه علشان يطلعلوا الفيزا .

المفاجاه : ان الشركه راحت الجوزات تطلع الفيزا لقيت علي اخويا فيزا باشم الشركه القديمه وبكده هو معلق اسم اخويا علي الكمبيوتر ومش هاينفع يطلعلوا فيزا تانية !!!!

ايه الحل ؟ هو عايز يلغي الفيزا دي - مش عايزها !! معقول مفيش حل والشركه التانية الجديدة مستنياه يحل الموضوع وطبعا مش هيستنوة كتير

[se_ Elsyed]

الموضوع كان في منتهى السهولة ..

ومازال

يطلع جواز جديد ولا من شاف ولا من دري

خصوصاً يعني إنه لا عليه قضية ولا حاجه مخلة في الكويت ..

[magdyit]

لا طبعا لان جوزا جديد - حتي لو الرقم هيتغير - من خلال البصمات هينكشف !!! ويبقي ما عملناش حاجه ويترحل من هناك

[أسد]

بالفعل في الكويت مطبق نظام البصمات منذ زمن بعيد ...

الحل ..

إنه يسأل في السفارة الكويتية .. أكيد فيه فترة بعدها يمكن أن يرفع من عليه هذا الحظر ..

أو إنه يفكر في بلد تاني غير الكويت ...

وأعتقد إن ده الحل الأفضل

[se_ Elsyed]

لا طبعا لان جوزا جديد - حتي لو الرقم هيتغير - من خلال البصمات هينكشف !!! ويبقي ما عملناش حاجه ويترحل من هناك

طب يا عم ما تنقطناش بالمعلومات وقول إن نظام البصمة مُطبق هناك وهو عكس السعودية ...

[أسد]

طب يا عم ما تنقطناش بالمعلومات وقول إن نظام البصمة مُطبق هناك وهو عكس السعودية ...

من عشرين سنة سافرت للعمل بالكويت ..

ووقتها كان عند وصولك من ضمن إجراءات عمل الإقامةوالذي منه إنك تروح تعمل بصمات

مش متأكد دلوقت طبقوا نظام البصمة في المطار أم لا ...

في السعودية حيطبقوه قريب .. بطريقة متطورة

يعني اللي حيسافر مش حيعرف يرجع إلا بشكل نظامي حتى لو غير الجواز وغير اسمه زي ما الهنود بيعملوا

[قاهرى]

لو مطبق فى السعودية نظام البصمة بالايد يبقى يدلق شوية مية نار على صوبعوا ويعمل بسبور جديد زى ما سى السيد قال ويدخل البلد ومحدش هيرف شخصيتو

اما باء لو فى الكويت مطبق نظام البصمة بالعين زى ما فى الامارات هنا يبقى (لا تعليق)

[أسد]

لو مطبق فى السعودية نظام البصمة بالايد يبقى يدلق شوية مية نار على صوبعوا ويعمل بسبور جديد زى ما سى السيد قال ويدخل البلد ومحدش هيرف شخصيتو

اما باء لو فى الكويت مطبق نظام البصمة بالعين زى ما فى الامارات هنا يبقى (لا تعليق)

يدلق شوية مية نار على صوابعه !!!!

والتاني يخرم عينيه علشان بصمة العين ..

ايه الكلام ده

فيه كده؟؟؟؟

[واحد تاني]

مش متأكد دلوقت طبقوا نظام البصمة في المطار أم لا ...

في السعودية حيطبقوه قريب .. بطريقة متطورة

يعني اللي حيسافر مش حيعرف يرجع إلا بشكل نظامي حتى لو غير الجواز وغير اسمه زي ما الهنود بيعملوا

في آخر شهرين شفت النظام ده أكتر من مرة مطبق في مطار الملك فهد ...

لكن فقط على ال Line بتاع الاخوة الاسيويين ...

ومش كل واحد بيطلبوا منه انه يضع ايده فوق الجهاز ... أعتقد بياخدوا عينات فقط منهم ...

والجهاز يشبه الى حد كبير ال Scanner و له لمبة كده من فوق زي الاباجورة ...

[قاهرى]

ياعم انا بهزر طبعا اصل الموضوع ملوش حل اساسا .... ولو حتى فرضنا انو دلق مية نار على ايدوا مهو الاسم كفاية معمول علية BLOCK مش محتاج انوا يكشف على البصمات

بس حبيت اعرف اية النظام المتبع فى الكويت هل بصمة الايد فقط ام بصمة العين ؟

سورى انا كونت نفسى القى حل للموضوع بس هو مقفول قفلة وحشة

[رمضان]

نظام البصمة مطبق في الكويت لكن ليس مطبق في المطار بدليل ان فيه مشكلة البنغال اللي يترحلوا في جرائم ويرجعوا تاني يوم بجواز جديد وباسم جديد ولا من شاف ولا من دري زي سي السيد ما قال بس هيطبقوه قريب جدا ( نظام البصمة في المطار ) .

عموما كل مشكلة وليها حل خليني اسألك واشوف ايه ممكن يحصل بالظبط في الحكاية دي

[مزاميزو]

لو أخوك مر عليه 6 أشهر متواصلة خارج الكويت تسقط الإقامة تلقائيا

لو هو داخل الكويت ممكن يشتكي في الشئون عشان يلغي الإقامة ويخرج بره الكويت ويرجع تاني بورق استقدام من الشركة الجديدة

وفي الشئون هيجبوا له حقه واجراءات كنسلة الإقامة بتاخد من 10 أيام لأسبوعين

ودا حسب معلوماتي لما كنت في الكويت حيث إني رجعت نهائي من 3 شهور بس

[magdyit]

السلام عليكم

الف شكر يا استاذ / رمضان علي التعقيب الموضوعي وعلي السؤال وارجو الأفادة

بالنسبة للاخ / زاميرو - الموضوع انه سافر والكفيل القديم علق اسمه علي الكمبيوتر بفيزا لمجرد ان مفيش حد جديد يقدر يعمله فيزا جديده يدخل بيها البلد -

2- موضوع البصمة مش في المطار في الكويت ولكن عند الأقامة ولذلك في حالة تغيير الجواز هيلاقي اسم واحد ليه 2 باسبور في حاله تغييرة و2 فيزا والله اعلم ايه اللي ممكن يحصل !!

وشكرا ومستني الحل من عند ربنا وبعدين ا/رمضان

[vipwithyou]

يا استاذ مجدى ارجوا عمل جواز بدل فاقد اعمل محضر فقدان الأول ثم تابع مدة 15 يوم تقريبا ً حتى تتمكن من عمل جواز جديد ومن ثم تغيير الرقم

[magdyit]

فينك يا رمضان باشا

[رمضان]

الاخ الكريم انا لم انسى الموضوع ولكن الان لدينا بالكويت اجازة رسمية تمتد ليوم الثلاثاء وطبعا خلال هذه الفترة لن استطيع عمل شيء او مراجعة اي جهة للاستفسار وحتى الاصدقاء كله مشغول في العيد الوطني

ان شاء الله بعد انتهاء الاجازة يتم الموضوع وابشر خير باذن الله

[رمضان]

الاخ الكريم

ما عرفته بالنسبة لموضوعك هو ان اخاك سافر الى مصر دون ان يلغي الاقامة وبالتالي من الطبيعي ان تظهر على الجهاز

والحل اما ان يعود للكويت ليلغي الاقامة ويوقع اقرار في الشؤون بأنه استلم كافة مستحقاته او ان يعمل توكيل لاي شخص بالكويت ليقوم بالغائها له او ينتظر 6 اشهر من تاريخ مغادرته الكويت حتى تلغى الاقامة تلقائي

[magdyit]

ا/ رمضان للاسف لم تقراء موضوعي جيدا

اخي كانسل اقامته نهائيا قبل السفر ولكن بعد السفر بساعات والخروج من مطار الكويت قام نفس الكفيل باستخراج تاشيرة جديدة لاخي حتي لايتمكن اي شخص اخر من استخراج فيزا جديده له ؟؟؟ وطبعا هو مش عامل الفيزا علشان يبعتهاله لالالالا علشان يوقف اسمه علي الكمبيونر وده اللي حصل بالظبط

راحت شركه تستخرج فيزا لاخويا لقيت عليه فيزا صالحه باسم الكفيل القديم وكلمه وقاله ابقي فرجني هتدخل الكويت تاني ازاي وانا عايش

حسبنا الله ونعم الوكيل

[رمضان]

معلش ما قرأت الموضوع بالتفصيل انا بصيت علىه بسرعة علشان كده ما عرفت التفاصيل دي كلها

خليني اسأل على الموضوع واشوف له حل بعد الابعاد دي

بس مبدئيا اخ مجدي الحل هيكون بالتراضي مع الكفيل طالما حطه في دماغه هيكون واقف له عقبة حتى لو رجع الكويت

على العموم خلينا نشوف طريقة وياريت لو تبعت لي بيانات اخوك في رسالة خاصة وانا اشوفه على الكمبيوتر تاني واتاكد

[magdyit]

ا/ رمضان مرسل لكم رساله علي الخاص ارجو قرائتها والرد علي في اقرب وقت