مش كتير شويتين!!!!!

[إيزيس]

ملايين و ملايين وملايين

برامج واحتفالات وجلسة في مجلس الشوري و الريس وأولاد الريس

احنا أكيد فرحانين بالمنتخب جدا جدا جدا

لكن ده كتييييييييير ماهتميناش بأي حدث سعيد أو بمصيبة كبيرة مثل هذا الاهتمام

وخد عندك مقابلات وأسئلة والناس لعيبة و كويسين في اللعب وجدعان وأبطال لكن علشان يستضيفهم معتز الدمرداش ساعة كاملة ومفيش كلام يقولوه ويوجه سماجته

وأسئلته الذكية من نوعية

مين بيختار لك لبسك ؟

وإيه قصة الشعر؟؟

وليه شديت شورت اللاعب الفلاني وإيه اللي بان لما شديته ؟؟

وتبدأ اللعيبة تفتي وتفتي وتفتي

إيه رأيكم مش زودناها شوية

والملايين دي في مكانها الصحيح

هو كل واحد في مصر بيبدع ويخلص في عمله بياخد ملايين..مليون..ألف..

واللا بياخد

شهادة ورق وأغنية وسلامات يا صاحبي

وأحيانا ولا حتى دول

تم تعديل 19 فبراير 2008 بواسطة قرنفل

[إيزيس]

يا جماعة ده أنا عرفت من المحاورات إن حتى اللي ما لعبوش أخدوا ملايين

لا حول و لا قوة إلا بالله

[لخبطه]

نقل لي احد المتابعين أن أحدهم اتصل ببرنامج في خضم الاحتفالات ليهنء الفريق فقال ( أحنا عملنا زي اللى بنها رسب في كل المواد ونجح في التربية البدنية فملت الدنيا شربات وزراغيط ) وأنا فعلا شايف أن دا أنسب تعبير للموضوع الموضوع حلو وجمال وانجاز ( رغم عدم مناسبة الكلمة )إلا انه مش بالدرجة دي ،، اللى بيحصل دا هبل الناس مبسوطه لانها لقت حاجه تفرح في بلد عز فيه الفرح والحكومه فرحانه بهبل الناس وتلاهيهم - على الاقل خبر مظاهره زي بتاع المحله مش هيلاقي حد يسمع له -

الله المستعان

شكرا على إثاره الموضوع

[se_ Elsyed]

يا جماعة ده أنا عرفت من المحاورات إن حتى اللي ما لعبوش أخدوا ملايين

لا حول و لا قوة إلا بالله

ده أكيد يا قرنفلة .... ما هوش مش معقول الفريق يبقى 11 بس ... لإن في إحتياطيين كمان والفرقة بيوصل عددها إلى 23

بس عندك حق والله في إن المبالغة في أي شيء غير مطلوب ..

واللي يحز في نفسنا أكثر من الملايين هو إننا ما نستثمرش النجاح ده والإنجاز في إصلاح احوال الرياضة والحياة في مصر بشكل عام ....

زي بالظبط ما أستثمرناش إنتصار اكتوبر في تغيير وجه الحياة في مصر

لكن يا عزيزتي أم سمسم نرجع وندور على القيادة

ما فيش شعب بيتغيير منه لنفسه كده

أول إمبارح أحمد المسلماني في برنامجه الشيق وتعليقاته المتزنة في برنامج أول طبعة اللي بيذاع على قناة دريم 2 تقريباً الساعة 8:30 بتوقيت مصر ضرب مثل بمناسبة بمؤتمر إسلامي منعقد في كوالامبور بماليزيا وحضره فضيلة الإمام الاكبر سيد طنطاوي طيب الله ثراه وادام ظله ... مش ده موضوعنا فكان بيتكلم على إن كلمة كوالامبور من 20 سنة بالتمام والكمال - يعني إنتي كان عندك 4 سنين ساعتها - كان بيُضرب بها المثل في التخلف والبُعد عن الحضارة

وكنتي تسمعي واحد يقولك ... يــــــــــاه ده كإنه رايح كوالامبور زي كإنه راح في طوكر كده - طوكر دي كانت منفى في السودان

الان ماليزيا تقف جنباً إلى جنب مع الدول المتقدمة في الصف الأول مش التاني كمان وده عشان شخص إسمه مهاتير محمد قاد شعبه إلى بر الأمان واكمل الباقون من بعده البناء وده في خلال 20 سنة فقط وقبلها كوريا الجنوبية اللي كانت لحد سنة 65 من الدول المتخلفة زي بنجلاديش كده مع إحترامنا

اما نحن فربنا واعدنا بقيادات ديكتاتورية تعمل لنفسها فقط وتقريباً يُصنفوا على إنهم هليبه ومصاصي دماء ... ويُكمل الحلقة بقى شعب ساكت وخانع وبيمصمص شفايفه وبيمشي جنب الحيط وبيقول يالله نفسي ...

مع إننا نملك كل مقومات النجاح

شعب زي الفُل لو أخلص في عمله .

موارد طبيعية لا بئس بها .. فيها حاجات مش كتير زي المعادن الطبيعية مثلاً لكن موجود عندنا اللي يكفينا

مُناخ رباني نادراً ما تجديه في بلد من البلدان ..

أراضي مترامية الأطرف لكن غير مستغلة وسايبين الشقة بحالها ومتكومين فوق بعض في أوضة واحده

لكن على رأي نجيب الريحاني في فيلم سي عُمر وده من المشاهد اللي يموت على نفسي من الضحك لإنه بيعبر عن حالنا .. لما كان بيعاتب ناظر عزبة الألفي الحرامي ويقوله : إييييييييييييييييييييييييه عزبة وزمام طويل عريض ومئات الأبقار .. ما يصبحش يوم نلاقي فيه بؤ لبن ؟ ..... مناحل ونحل يسد عين الشمس وطول النهار إوعى النحل حوش النحل ... ومع ذلك ما فيش لحسة عسل ؟ .... فررررراخ طول النهار كاك كاك كاك ومع ذلك ما فيش بيضاية واحده ؟ ....

أهو إحنا كده .. اهم حاجه الريس واللي حواليه يصبحوا الصبح يضربوا شوب اللبن التمام ... مع طبق البيض الأومليت اللي سايح في السمن البلدي ... ويحلي بعسل نحل مشبع بطعم زهرة البرسيم .... وإحنا بقى الرعايا وفلاحي العزبة ان شالله نموت من الجوع ونشم جبس او نشم في رجول بعضينا يمكن نموت من الادمان بس اهم حاجه يفضلوا هما بصحة وعافية ويعمروا إلى ما بعد الثمانين ...

هو مش ده برضوا موضوع رياضة ... يبقى إيه اللي جابني هنا ؟

أمانة عليكي لو إتقفشت في يوم من الأيام إبقي زوريني بعيش ولانشون يا قرنفلة أو عندما يغيب قرص العجه قصدي الشمس الدامي ساعة الغروب ... أذكريني وقولي الله يرحمه كان لسانه متبري منه وما سمعش الكلام ومش جنب الحيط ..

تحياتي ،،،،

[إيزيس]

فضيلة الإمام الاكبر سيد طنطاوي طيب الله ثراه وادام ظله

صحيح مش موضوعنا بس دي جملة عبقرية انت واحد فناااااااااااان

هو مش ده برضوا موضوع رياضة ... يبقى إيه اللي جابني هنا ؟

مشرف يا سيدي على راحتك

أمانة عليكي لو إتقفشت في يوم من الأيام إبقي زوريني بعيش ولانشون يا قرنفلة أو عندما يغيب قرص العجه قصدي الشمس الدامي ساعة الغروب ... أذكريني وقولي الله يرحمه كان لسانه متبري منه وما سمعش الكلام ومش جنب الحيط ..

عيش ولانشون مااوعدكش

اذكريني ..سهلة

والحكومه فرحانه بهبل الناس وتلاهيهم

أصبت كبد الحقيقة يا لخبطة يا خويا

[إيزيس]

كلمة كوالامبور من 20 سنة بالتمام والكمال - يعني إنتي كان عندك 4 سنين ساعتها

لااااااا ماحبش الكذب ماطيقهوش ماتصوروش

كان عندي 3 سنين و6 شهور ويومين وكنت أسال ماما

ماما يا ماما يعني إيه كولالامبور تقوللي لما تكبري شويه هأقولك :baby:

[ابو محمود]

صباح الفل

ياعم سى السيد هما ما بيخدوش المشرفين وبعدين هما اليومين دول مش فاضيين ليك ولا ليا دول بيعدو الفلوس اللى خدوها من علب الهدايا بتاعت اللعيبة الغلابة وبعدين لية انتا عايز عيش ولانشن

ممكن نعرف لية يا سى السيد أفندى ؟

[ابو محمود]

صباح الخير ياست قرنفل (قرنفلة ) دى بقى عادتنا ومن موروثاتنا وعلامة من علامات العصر اللمباركى يعنى ماركة مسجلة بأسمة زى الطلعة الجوية كدة يعنى مافيش فايدة والناس خدت على كدة طب ممكن اسأل حضرتك سؤال بعد ما الناس خرجت يوم الماتش فى الشارع بالملايين فى انحاء المحروسة لو الناس دى عندها مشاكل صحيح أزاى تتحل وكل همها انها فرحت لحد تانى أكيدفية حاجة غلط فبعد كل انتصار لنا نعيش بعدة فى توابع انكسارات بدليل ان اكتوبر كان يوم سعيد وعيد ومن بعدة بقالنا كام سنة فى حضيض ×حضيض

يعنى مفروض اننا مانفرحش أوى ونشوف مين بيستغل مكاسبنا ليية ويترك لنا التعاسة والهم

[لؤلؤة]

تصوري النجاح في الرياضة ده بيثبت حاجة

أن هما لما بيحبوا يعملوا حاجة صح بيعملوها

قمة في التخطيط و الجهود و النظام

و مكالمات يومية لتشجيع اللاعبين

ده كدة معناه ان اللخبطة اللي حاصلة في كل حاجة تانية دي بأة مقصودة

[إيزيس]

ده كدة معناه ان اللخبطة اللي حاصلة في كل حاجة تانية دي بأة مقصودة

واحد اتصل بالعاشرة مساء وقال نفس الفكرة إنه فين نفس الريس اللي جاب الفوز فينه في الأمور الأخرى

مفروض اننا مانفرحش أوى ونشوف مين بيستغل مكاسبنا ليية ويترك لنا التعاسة

تمام ومفروض كمان إن الشيء إن زاد عن حده ......

[التونسى]

تصوري النجاح في الرياضة ده بيثبت حاجة

أن هما لما بيحبوا يعملوا حاجة صح بيعملوها

قمة في التخطيط و الجهود و النظام

و مكالمات يومية لتشجيع اللاعبين

ده كدة معناه ان اللخبطة اللي حاصلة في كل حاجة تانية دي بأة مقصودة

كلام كتير يتقال حول المداخله دى ... المثيرة للتفكر فى الشأن المصرى .. بشكل اعمق ...وجهة نظر ترتقى عاليا فوق المشهد الكلى