لماذا لا توجد مدارس مصرية في الخليج

[amani]

السلام عليكم ورحمة الله وبركاته

مش عارفة انتوا مصريين على وجود مدارس مصرية فى الخليج ليه؟؟؟؟؟

حد يرد عليا والنبى

انا ام لطفلين 5 ابتدائى

2 ابتدائى

وللعلم مدارس لغاتتتتتتتتتتتتتتتتتتتتتتتتتتت

بس عايزة اقول حاجة صغننة

التعليم فى بلدنا ملهوش عازة

لا تقولى مدارس عربى ولا لغاتتتتتتتت

اكبر مقلب بناخدة فى حياتنا هو اننا نتعلم فى البلد دى

وبعدين مناهج ايه اللى انتوا عايزينها برة

دى مناهج مملة جدا وعقيمة موت ولا تنفع باى حاجة خاااااااااالص

بالعكس دى بتحول الاطفال الى مكن للحفظ ومغيش اى شىء يدعوا الطفل للابداع او حتى التفكييييييييير

الحاجة اللى احنا محتاجينها جدا جدا جدا من هنا لحد 100 سنة قدام

وياريت محدش يقول انى متشائمة لا سمح الله

بالعكس انا واقعية جدا جدا واتخنقت من التعليم فى بلدنا

اكتر من 30 سنة مش عارفين يعدلوا المناهج ويطوروها

بس عاملين يشيلوا سنة6

ويحطوها

حاجة تجنن

معلش محدش يزعل يا جماعة

[مصري أصيل]

السلام عليكم ورحمة الله وبركاته

مش عارفة انتوا مصريين على وجود مدارس مصرية فى الخليج ليه؟؟؟؟؟

حد يرد عليا والنبى

انا ام لطفلين 5 ابتدائى

2 ابتدائى

وللعلم مدارس لغاتتتتتتتتتتتتتتتتتتتتتتتتتتت

بس عايزة اقول حاجة صغننة

التعليم فى بلدنا ملهوش عازة

لا تقولى مدارس عربى ولا لغاتتتتتتتت

اكبر مقلب بناخدة فى حياتنا هو اننا نتعلم فى البلد دى

وبعدين مناهج ايه اللى انتوا عايزينها برة

دى مناهج مملة جدا وعقيمة موت ولا تنفع باى حاجة خاااااااااالص

بالعكس دى بتحول الاطفال الى مكن للحفظ ومغيش اى شىء يدعوا الطفل للابداع او حتى التفكييييييييير

الحاجة اللى احنا محتاجينها جدا جدا جدا من هنا لحد 100 سنة قدام

وياريت محدش يقول انى متشائمة لا سمح الله

بالعكس انا واقعية جدا جدا واتخنقت من التعليم فى بلدنا

اكتر من 30 سنة مش عارفين يعدلوا المناهج ويطوروها

بس عاملين يشيلوا سنة6

ويحطوها

حاجة تجنن

معلش محدش يزعل يا جماعة

لأ مش زعلانين ولا حاجه يا أخت أماني بس لو كنتي قرأتي المداخلات اللي فاتت وعرفتي أنواع المدارس اللي موجوده في الخليج والفرص المتاحه للدراسه هناك كنتي عرفتي أننا مش عاشقين التعليم والمناهج المصريه ولا حاجه بس علي الأقل تدريس المناهج المصريه هيكون أرحم لأولادنا من المتاح حالياً . لو كان فيه مدارس في الخليج لغات كالمدارس الخاصة المصرية وهي التي تقوم بتريس اللغه بجانب اللغه العربيه والدين بنفس القوه كان مبقاش فيه مشكله. ولكن المشكله في الخليج أما مدارس انجليزي صرف والقليل اللي بيقدر يجاريها لأن حتي الطالب اللي والدته أو والده مدرس أنجليزي لا يستطيع الا اكمال المرحلة الابتدائيه بالكاد فيها وذلك لصعوبتها . والأختيار الثاني هو المدارس العربيه الخاصة أيضاً والتي تقوم بتدريس المناهج الخليجيه . أما الأختيار الثالث فهو المدارس ثنائية اللغه والتي قليل منا هو القادر علي ألحاق أبنائه بها لأنها كما ذكرت تتكلف للطالب الواحد ما يعادل 25 الف جنيه سنوياً . طيب اللي عنده أكتر من طفل يعمل ايه في الحاله دي ؟؟؟؟؟ أما كون المناهج المصريه ممله وعقيمه فهذه حقيقه للأسف بس عند حضرتك حل تالت؟؟؟؟؟؟؟؟؟؟؟؟؟؟؟؟؟

[amani]

الاخ مصرى

انا عارفة ان المناهج هناك صعبة واعرف ناس كانوا هنا فى لغات وراحوا السعودية ودخلوا ولادهم مدارس اللغات

اى نعم تعبانبن وطلعت عنيهم

بس هى دى اللغات والتعليم الاجنبى

انت لو بصيت على مناهج اللغات هنا فعلا هتحس انك بترمى فلوسك وصحتك فى سابع ارض

طبعا هنا المناهج سهلة جدا بالمقارنة بيكوا

بس صدقنى لو حاولنا وجينا على تفسنا شوية فى المذاكرة هتلاقى النتايج افضل

متبصش انا المنهج صهب مع الوقت الاولاد بيتعودوا على الصعب ويبقى عادى

المهم ان دة انا بعتبرة استثمار

يعنى اعلم ولادى كويس يبقى بستثمر فيهم على اللونج ران

مش عارفة دة رأى

[osaimi]

المشكلة ياأخت أماني ان احنا راجعين مصر راجعين وده طبعا غصب عننا لأن عتد وصول أولادنا لسن معين لن يسمح لهم بالتواجد للعمل أو خلافة ، وعناش فلوس بصراحة نكملهم تعليمهم فى أوربا أو أمريكا حتي لو اشتغلنا هنا 100 سنه كمان ، المشكلة الكبرى ان التنسيق الغبي اللي بيعملوه فى مصر للحاصلين علي الثانوية من خارج مصر غير منصف بالمرة لأنهم بيحددوا نسبة قليلة جدا فى التنسيق لكل كلية وده بيقلل فرص الإلتحاق بكلية محترمه حتي لو هما من المتفوقين ، أي نعم فيه طرق تانية للبعد عن سكة الثانوية العامه لكنها صعبة جدا ومكلفة جدا جدا ، عشان كده عاوزين يكون فيه مدارس تتبع المنهج المصري ويكون التنسيق لهم بطريقة عادلة وليس بالطبع حبا منا فى التعليم المصري المتخلف جدا جدا وماتنسوش التعليم شئ والثقافة شئ آخر وماحدش للأسف بيشغلوه عشان هو مثقف فى الآخر الشهادة هي المقياس ، مع تحياتى وإحترامي وشكرى للجميع

[ايهاب سالم]

المشكلة ياأخت أماني ان احنا راجعين مصر راجعين وده طبعا غصب عننا لأن عتد وصول أولادنا لسن معين لن يسمح لهم بالتواجد للعمل أو خلافة ، وعناش فلوس بصراحة نكملهم تعليمهم فى أوربا أو أمريكا

فيه حل تاني

الهجره

ولادك هيعيشوا في بلد نظيفه و هيتعلموا تعليم على أعلى مستوى ببلاش

و هتبقى بلدهم .. مش مقيمين أو مغتربين أو مكفولين أو المسميات الغريبه دي

[هشام الكندي ان شاء الله]

هوا دا اللي الواحد عايزه يا استاذ ايهاب سالم

الواحد طالع علشان اولاده يطلعوا بني ادميين بكل ما تحمله الكلمه من معاني

و كفايه ان الواحد يعيش بقيه حياته بني ادم مع اولاده

ارجو عدم الرد علي مشاركتي هذه حتي لا يخرج الموضوع عن سياقه ككل مره

[لؤلؤة]

الأخ مصري

والله دي نعمة تحمد ربنا عليها

المناهج بتاعتنا معظمها كدب و عيني عينك كدة من غير كسوف

و العيل المسيكين يحفظ الكلام ده و يسمعه

و المدرس يا عيني مش مقتنع بالكلام ده بس يعمل ايه

[أسد]

الأخ أسد أشكر لك مجهود وشرحك بأستفاضه لموضوع الدراسة داخل المملكة العربية السعودية . ولكن حضرتك تقول أن قرار جامعة الدول العربية غير ملزم ومن حق كل دولة تطبيقة أو عدم تطبيقة . إذا من هي الجهة التي نستطيع مخاطبتها لكي ننقل لها رغبة المصريين في أنشاء مدارس تقوم بتدريس المنهج المصري . إن كان عند حضرتك أجابة فأرجوا مشكوراً التفضل بها.

الحقيقةمش عارف ممكن الناس تكلم مين ..

لكن ده ممكن يكون مطلب لوزارة الخارجية المصرية والتي تعني بمثل هذا الأمر عن طريق الملحق الثقافي ...

ولكن أعتقد أن الأجدى .. ألا نهدر الوقت والجهد في مثل هذا الأمر ..

يمكن انك تدخل ابناؤك في مدارس عالمية . يحثلون فيها على مستوى عالي من التعليم ..

وفي المنزل .. تعلمه تاريخ وجغرافية بلاده إذا كنت ترى أن لها الأمر أهمية قصوى لديك ...

تحياتي

[nash]

نتيجه خبرة كبيرة في المنهج الدولي ...أستطيع ان أقول أن منهج الرياضيات ( الماث ) في مصر قوي جدا ولكن المشكله تكمن في كم المعلومات التي ياخذها الطفل وهو صغير في الوقت الذي يدرس فيه طلبه المدارس الدوليه المعلومات نفسها ولكن بإستفاضه وعلي مدار الشهور الدراسيه...منهج ( الساينس ) العلوم يعني في المنهج المصري ايضا قوي وفيه ميزة جميله أن الطالب يبحث عن المعلومه بنفسه في الكتب الخارجيه أو علي النت المجهود يقع في الغالب علي الطالب وحده ويحتاج إجابات مطوله أما في المنهج الدولي فالكتب ايضا تشرح بإستفاضه وغالبا الاسئله تاتي لإكتشاف قدرة ذكاء الطالب علي مدي فهمه للمادة بدون ( دش ) كتير...

الماده الثالثه وهي الإنجليزيه ...يختلف تديسها تماما عن المنهج المصري...فهي تدخل في صميم القاعده نفسها وليس بطريقه تمارين وصحح وإملأ الفراغات والنمط الذي اعتدنا عليه في الإمتحانات...بجانب كتب الأدب والروايات العالميه والشعر والدراما...

كتب ال( السوشال ) بها معلومات عن كل الحضارات القديمه ..من الفرعونيه مرورا بالأنجلو ساكسون وغيرها....حتي أن هناك موضوع طويل عريض عن أنور السادات كرجل السلام....

يعني يختلف المنهج الدولي عن المصري ولكن إختلافات في طريقه التناول وميعاد بدأ المعلومه للطفل....

في مصر يتم التعامل مع الأطفال علي انهم كائنات عبقريه لا تشكو ولا تأن ...أما في الدولي ..فالطفل يعيش حياته ويكتسب المعلومه بهدوء وعلي مدار السنه

نسيت أن أضيف أن منهج العربي المصري قوي جدا ...يقابله المنهج اللبناني ..وفي المنهج اللبناني ممكن ببساطه جلب مقاله من اي جريده أو مجله ثقافيه مشهورة ومحاوله تحليلها والإطلاع علي أفكار الكاتب ...

تم تعديل 24 فبراير 2008 بواسطة nash

[Folana]

السلام عليكم ورحمة الله....

أستطيع ان أقول أن منهج الرياضيات ( الماث ) في مصر قوي جدا ولكن المشكله تكمن في كم المعلومات التي ياخذها الطفل وهو صغير في الوقت الذي يدرس فيه طلبه المدارس الدوليه المعلومات نفسها ولكن بإستفاضه وعلي مدار الشهور الدراسيه...منهج ( الساينس ) العلوم يعني في المنهج المصري ايضا قوي وفيه ميزة جميله أن الطالب يبحث عن المعلومه بنفسه في الكتب الخارجيه أو علي النت المجهود يقع في الغالب علي الطالب وحده ويحتاج إجابات مطوله أما في المنهج الدولي فالكتب ايضا تشرح بإستفاضه وغالبا الاسئله تاتي لإكتشاف قدرة ذكاء الطالب علي مدي فهمه للمادة بدون ( دش ) كتير...

الحقيقة المناهج المصرية لا يوجد بها اى مكان لاعتماد الطالب على نفسه والقيام بالبحث بمفرده...على جميع مستويات المدارس المختلفة...

كله بعتمد على الحفظ...واجبار الطالب على اجابة الاسئلة كما تأتى فى كتاب الوزارة...مش نتيجة فهمه وابحاثه...ومنهج العربى المصرى مش قوى بالفعل...يكفى مستوى الطلبة فى قواعد النحو والصرف....وتذوقهم لنصوص الشعر ...مستوى اقل بكثير من مستوى طلبة الدول العربية مثلا...

ولان ابنتى تدرسى منهج الاى جى...وسجلت مادة العربى الكلاسيك...مستواها ارتفع فيه ..غير كده لم ارى اى تفوق او قوة فى المنهج....

وبالفعل المناهج مكدسة..ويادوب المدرسين بالكاد يقدروا يخلصوا المنهج اللى فى ايدهم...

....

هناك اسر مغتربة تدرس لاولادها المنهجين..المصرى ومنهج البلد المقيمين فيه...(السعودية على سبيل المثال)...ويمتحنوا الاولاد فى السفارة تبعا للمنهج المصرى...تحسبا لاى ظروف عودة...

اتمنى ان أقرأ قريبا عن حل لهذه المشكلة....

[se_ Elsyed]

ارجو عدم الرد علي مشاركتي هذه حتي لا يخرج الموضوع عن سياقه ككل مره

ده إنذار اخر وأخير لك يا أخ كندي وتكرار لإنذار موضوع مواقف في الغُربة

ما شاء الله تبارك الله

أنا شايف إن بقى لك فترة نازل توجيه وهندسة وإصدار أوامر تنظيمية في المنتدى بالرغم من إن مالكش أي صفة تنظيمية .

ولذلك توجب تنبيهك بهذا الامر وياريت لو عندك حاجه مفيدة تكبتها من سكات ومن غير توجيهات ....

ومش من حقك إنك تطلب عدم التعقيب على كلامك .. وإلا فمن الأفضل إن تكتفي بالقراءة فقط أما حق التعليق والمناقشة فهو مكفول لكل عضو محترم

وده إنذار أخير لك يا اخ كندي إن شاء الله وبعد ذلك سيتم وضع مداخلاتك تحت المراقية .

سي السيد

الإدارة

[مصري أصيل]

الأخ أيهاب سالم

أنا شاكر جداً لأقتراحك بس موضوع الهجرة ده مش في بالي نهائي

الأخ الكريم أسد والأخت الكريمة ناش

للأسف لا يوجد بالكويت المدارس الدولية أو المدارس العالمية أحنا عندنا هنا أما المدارس الخاصة الباكستانية أو الهندية أو المدارس الخاصة العربية أو المدارس ثنائية اللغة ويمكن تكون هي دي المدارس المقصوده بالعالمية أو الدولية مش عارف بس حتي لو كانت هيه فأن كما ذكرت قبل ذلك مصاريف هذه المدارس مبالغ فيها الي حد كبير وغير ممكنه بالنسبة لي علي الاقل في الوقت الحالي.

[مصري جدا]

السلام عليكم

أنشاء مدارس مصريه في الدول المختلفه أعتقد أنه طلب كل المصريين .....بالنسبه لنا هنا المصريين في ليبيا

رغم أن عدد المصريين كتير لكن النوعية مختلفة عن دول الخليج....يعني معظمهم عمالة بدون عائلاتهم ... المهم مشكلة المدرسة اللغات والعاديه مازالت صداع في رؤوسنا والحل اللي عملناه او بمعني أصح لقيناه هو مدرسة خاصة تقوم بتدريس المنهج المصري بمدريسين مصريين {نسبه كبيرة منهم أولياء أمور الطلبه} طبعا والأمتحانات بتكون في السفارة {أبناؤنا في الخارج} ....وتقابلنا عدة مرات مع السفير القنصل العام عندنا في بنغازي لبحث أنشاء مدرسة تحت أشراف السفارة ووزارة التربيه والتعليم لكن للأسف لم نصل لشئ حتي الأن ولازلنا نحاول.....

أتمني يكون لنا صوت كمصريين مغتربين ......صوت عالي يوصل لوزارة التربيه والتعليم واتمني أن نبدأ من هنا ...من محاورات المصريين ....نبدأ بانشاء جمعيه أو رابطة للمغتربين ونوصل صوتنا لمصر

من حوالي شهرين زارنا مساعد وزير الخارجيه السفير أحمد القويسني...وقال أنهم بيفكروا ينشئوا هيئه أو جمعية لرعاية المصريين في الخارج وهو حيكون رئيسها وكلمناه في موضوع المدرسة بس للأسف الموضوع مش من الخارجيه فقط ..لازم وزارة التربية والتعليم ...يعني عاوزة قصة طويلة ...بس أنا ناوي أبدأها وياريت نبدا سوا وتكون البدايه من هنا :rolleyes:

والله يا أستاذ مصري جداً فعلاً بحييك علي رغبتك دي وأنا بكل تأكيد معاك بس البداية تكون أزاي ممكن أعرف بداية الخيط اللي ممكن يوصلنا ؟

منين اليدايه

أعتقد أن البدايه هي أن يكون لنا {كمصريين مغتربين } صوت مسموع وعلشان ده يحصل لازم يكون لنا كيان واحد يمثلنا ويوصل صوتنا لأي مكان

شوف مثلاً موضوع المدرسة عندكم في الكويت عمل لكم مشكلة ,,,وعندنا في ليبيا عمل لنا نفس المشكلة واكيد في معظم الدول .....و لكن كل واحد بيحاول من ناحيته... ولوحده ...وعلشان كده مفيش نتيجة.

تاني حاجة وهي المهمةاننا منستناش أن الحكومة تعمل لنا حاجة

لازم أحنا نبدأ ونطلب من الحكومه تعمل لنا دعم معنوي {لأن الدعم المادي صعب...أو مستحيل}

يبقي نشوف أزاي ممكن نكون رابطة أو أتحاد للمغتربين {وياريت لو في حد عنده خلفيه قانونيه يقول لنا نبدأ منين}ومن خلال الرابطة ممكن نوصل ونعمل اللي احنا عاوزينه

أنا كلي أمل أننا نقدر ولكن مش متفائل ....ليه .....علشان أحنا كمصريين بنبعد عن بعض في الغربة مش بنقرب زي بعض الجاليات الأخري ....تصوروا أخوة السودانين هنا في ليبيا لهم أكتر من رابطة {حوالي 13} وأحنا ولا واحدة .. لكن أنا عندي أمل أننا نقدر نعملها......اتمني أن الموضوع لاينتهي ولا يكون{فش خلق}علي رأي الأخوة اللبنانيين ..... :unsure: :happy:

[om marawan]

الاستاذ الفاضل مصرى أصيل

بالنسبة للمدارس الباكستانى فاعتقد انها اختيار معقول حاليا لن مصروفاتها مناسبة الى جانب ان الدراسة بها على مستوى جيد

اما عن موضوع التدريس للا ولاد بالانجليزية فده فى رأيى حاليا ميزة لأن اللغة بتقوى عند الاطفال من الصغر والدراسة مابتكونش صعبة ولا حاجة لما الاطفال بتتعود عليها

ده زى مدارس اللغات العادية فى مصر او فى اى مكان وكل شىء بالتعود بيبقى مناسب

طبعا فيه مدارس عربى كويسة جدا لكن اعتقد ان ترسيخ اللغة الثانية هاااااااام جدا فى الزمن اللى احنا فيه

يعنى حضرتك فكر فيها للمستقبل الاولاد هيتعبوا شوية لما ياخدوا على اللغة لكنها هتسهل لهم حاجات كتير فى المستقبل ان شاء الله

وبدل مايعملوا زينا ويرجعوا ياخدوا كورسات لغة على كبر بمبالغ وقدرها الى جانب انه ان شاء الله ربنا يوسع رزقك فى المستقبل وساعتها لو فكرت تنقلهم مدرسة امريكى او انجليزى هيكون موضوع اللغة مش عائق قدام الاولاد

يعنى انا قصدى ان اختيار المرسة اللى بتدرس باللغة الانجليزية بيوسع قدامهم مجالات الحياة مع الوقت ان شاء الله

وزى ماتفضل الفاضل أسد وقال لحضرتك الجغرافيا والتاريخ خليه هواية للاولاد وهيحبوها اكتر وهيفهموها احسن من مالو ذاكروها فى مصر بالاجبار

ودى حاجات حضرتك تقدر توصلها لهم بسهولة بعكس اللغة الانجليزية اللى هيكون دور المدرسة فيها افضل كتيييير

اعتذر للاطالة وتفضل سيادتكم بقبول خالص تحياتى

[أسد]

لا أعرف الوضع بالنسبة للكويت ...

ولكن لي صديق أبناؤه في مدرسة باكستانية في الكويت ..

ومستواهم التعليمي جيد جداً ... ويتكلم برضا عن المدرسة ونظامها ..

ورسومها قال لي انها معقولة جداً ..

وأبناؤه مستواهم ممتاز في اللغة الإنجليزية ...

أعتقد أن هذا هو أفضل الإقتراحات ..

مع تمنياتي بالتوفيق

[مصري أصيل]

منين اليدايه

أعتقد أن البدايه هي أن يكون لنا {كمصريين مغتربين } صوت مسموع وعلشان ده يحصل لازم يكون لنا كيان واحد يمثلنا ويوصل صوتنا لأي مكان

شوف مثلاً موضوع المدرسة عندكم في الكويت عمل لكم مشكلة ,,,وعندنا في ليبيا عمل لنا نفس المشكلة واكيد في معظم الدول .....و لكن كل واحد بيحاول من ناحيته... ولوحده ...وعلشان كده مفيش نتيجة.

تاني حاجة وهي المهمةاننا منستناش أن الحكومة تعمل لنا حاجة

لازم أحنا نبدأ ونطلب من الحكومه تعمل لنا دعم معنوي {لأن الدعم المادي صعب...أو مستحيل}

يبقي نشوف أزاي ممكن نكون رابطة أو أتحاد للمغتربين {وياريت لو في حد عنده خلفيه قانونيه يقول لنا نبدأ منين}ومن خلال الرابطة ممكن نوصل ونعمل اللي احنا عاوزينه

أنا كلي أمل أننا نقدر ولكن مش متفائل ....ليه .....علشان أحنا كمصريين بنبعد عن بعض في الغربة مش بنقرب زي بعض الجاليات الأخري ....تصوروا أخوة السودانين هنا في ليبيا لهم أكتر من رابطة {حوالي 13} وأحنا ولا واحدة .. لكن أنا عندي أمل أننا نقدر نعملها......اتمني أن الموضوع لاينتهي ولا يكون{فش خلق}علي رأي الأخوة اللبنانيين ..... :happy: :lol:

تحقق أملنا

والله أنا أتمني زيك تمام أن يكون لينا صوت مسموع لأننا كمغتربين نمثل نسبة غير بسيطة من المجتمع المصري ويجب أن نسعي لايجاد الحلول المناسبة لمشاكلنا ومحاولة أيصال أصواتنا للمسؤولين في مصر ويمكن يتحقق أملنا ده في يوم من الأيام وان لم يتحقق يكفينا أننا قد حاولنا .

[مصري أصيل]

الأخت أم مروان المحترمة وأخي الكريم أسد

أولاً أنا شاكر جداً لأهتمامكم . أنا بالفعل كنت مقدم لأبنتي في مدرسة باكستانية و أخدت أول وثانية روضة في الباكستانية ولكن البنت لم تستطيع أن تجاري زملائها وكانت شكوتها دائما أن المدرسات لا تتحدث الا بالأنجليزية أو باللغة البكستانية . يعني مافيش شرح أبدا باللغة العربية . وطبيعي أن البنت مش هتقدر تستوعب الشرح باللغة الأنجليزية أو الباكستانية . وأيضاً لا تستطيع البنت سؤال المدرسه أي سؤال لأن المدرسة لن تفهمها . يمكن سؤ حظ لبنتي أن مدرستها لا تتكلم العربية أي لا تستطيع الشرح بالعربية للطلاب المصريين . ده غير أن معظم المصريين اللي سألتهم قالوا أن في وقت من الأوقات لن تستطيع تحمل صعوبة المدرسة وأقصي فترة ممكن تحملها حتي الصف الخامس في أفضل الحالات . ولهذا فضلت الا أخوض التجربة وأكتفيت بفترة الروضة و أدخلت البنت في مدرسة عربية . وبالنسبة لتكاليف الباكستانية هي نفس تكاليف المدرسة العربية بالظبط و أن شاء الله أنوي تقديم أوراق أبني في الباكستانية ربما يكون حظه أوفر من حظ أخته ويستطيع أن يكمل فيها أتمني ذلك . تقبلوا تحياتي ولكم جميعاً الشكر

تم تعديل 25 فبراير 2008 بواسطة مصري أصيل

[nash]

خسارة والله هذا التغيير...

لإن علي الصف الخامس هايكونوا أنطلقوا في اللغه والام كمان اتعودت علي المواد ...وفي النهايه سيتم التأقلم علي المدسه والمدرسين

ياريت تصبر مع الولد الصغنن....وإن شاء الله يكون حظه أوفر

[نور مصر]

واللهي مشكلة صاحب الموضوع نفس مشكلتي وانا مثله اتمنى يكون فيه مدرسة في الكويت مصرية والسفارة تهتم بابناؤنا

[أسد]

الأخ / مصري أصيل ..

كون المدرسين لا يتكلمون العربية إطلاقاً في المدرسة.. هذه تعتبر ميزة وليست عيب ... لأن هذا يدعم تطورهم في اللغة بشكل أسرع ...

حاول مع إبنك وابدأ معه من سن صغير ...

تجربتي الشخصية ..

إبني دخل مدرسة عالمية هنا في الرياض .. وكان عمرة عامين ونصف .. المدرسات كانوا إنجليزيات واستراليات ... لم يكن قد بدأ الكلام عندما بدأ في تلك المدرسة ..

الآن هو في الصف الأول .. يتحدث الإنجليزية والعربية بنفس المستوى ...

وفي تلك المدرسة ممنوع على التلاميذ والطلاب التحدث حتى في أوقات اللعب مع بعضهم بالعربي ..

المسألة صعبة ولكنها تحتاج متابعة في المنزل ..

من عيوب المدارس التي بها مدرسين يتحدثون عربي .. ويدعون الأولاد يتحدثون بالعربي ... أن مستوى اللغة بها يكون أقل ..