الحضري هرب يا رجالة

[أبو محمد]

أتصور أن خروج الحضرى عمل عادى جدا من لاعب محترف و لا ينتقص هذا بأى شكل من وطنية الرجل.

هذا كلام حق يا أستاذ عادل .. ولكن هذا الحق تنظمه قوانين ولوائح .. لا أحد يعترض على مبدأ حرية التنقل .. فهو حق من حقوق الإنسان التى لا يعرفها الكثيرون .. ولكن التنقل له قوانينه وقواعده ..

والقياس بين العقد الذى أمرنا الله باحترامه "يَا أَيُّهَا الَّذِينَ آمَنُواْ أَوْفُواْ بِالْعُقُودِ " وبين نظام الكفيل هو قياس مع الفارق .. وعقود اللاعبين تنطبق عليها قوانين الاتحادات الإقليمية والاتحاد الدولى وتعتبر جزء مكمل ولا يتجزأ عن تلك العقود .. وقوانين ونظم الاتحاد الدولى تعطيه الحق فى فسخ عقده ولكن بشروط معينة نصت عليها تلك القوانين .. يدعى النادى الأهلى أن الحضرى لم يلتزم بتلك النصوص ، ويدعى الحضرى أنه التزم وأوفى بتلك النصوص

ومن متابعتى لهذه الحادثة تأكدت من أن معظم وقتنا مهدر نتيجة تفاسير مُعوجَّة للنصوص التى تحكم حياتنا وسلوكنا .. لذلك دعوت جميع الأخوة (وياريت تكون من اللى حيلبوا دعوتى ) إلى متابعة تلك القضية ، ليس من باب الاهتمام بالكرة ولكن من باب تحليل نموذج صارخ (يسترعى انتباه الكثيرين) للعشوائية والاندفاع والفهلوة التى تحكمنا

[om marawan]

أوافق الاخت فيروز على رأيها

ليه صحيح الأهلى مايدربش واحد او تنين تانيين زى الحضرى كويسين

اعتقد يا أستاذ ابو محمد ده جزء من العشوائية انى اقعد 10 سنين عندى حارس مرمى واحد

ولما تجيله فرصة وهو خلاص 35 سنة اقوم اقوله لأ شكرا انت هتفضل معانا

صحيح فيه قوانين لكن اعتقد من ضمن القوانين دى ان من حق الحضرى بعد مدة معينة من العقد انه ينضم لاى نادى تانى

ويبقا هو بكده مش العشوائى فى تصرفه

ولكن العشوائية انى اعتم على شخص واحد 10 او 12 سنة بدون ايجاد بدايل

[waleedss88]

بصو للموضوع الموضوع من زاويه اخرى

انا بصراحة سعيد جدا لان الاهلي محترف تسليك لعيبه من الفرق بطرق ملتويه الان يشرب من نفس الكاس

بالنسبه لعصام انا اعتقد ان ماخفي كان اعظم

بلد زي مصر ممكن يحصل فيها الذل لاي حد نتيجة الـ ......... والـ .........

وكلنا شفنا المهاترات بتاعت شوبير مع حسن شحاته تخلي شحاته يهاجر كوالا لمبور اكاد اجزم ان عصام تعرض لضغط سواء من جوزيه او من الادراه والبوادر تظهر انا المبلغ لم يكن 400 الف دولار بل اكثر ولكن مكفي عليه ماجور ولما العرض زاد ل 50% من ثمن اعادة البيع ابتدأ لعاب الاهلي يظهر

شخص يرمي كل هذا وراء ظهره اكيد هناك سبب اقوى صحيح الاسلوب مش لطيف على طريقة مش لاعب بقه لكنها ربما تكون الطريقه الوحيده للخروج من كماشة الاهلي

[MZohairy]

اعتقد ان ظهور هذا الموضوع و بروزته بهذا الشكل في الوقت الحالي خاصة بعد انتهاء انشغال الناس بالفوز الأفريقي قد يسفر عن رفع اسعار سلع معينه او ما شابه!! والله اعلم

[Modest]

الأهلي الذي لولاه، بعد الله سبحانه و تعالى، ما كان لعصام الحضري إسم في عالم الكرة.

أنا باعترض بصراحه على المنطق ده !!

"الحضرى" ظهر نجمه بسبب إجادته ولو كان الفضل ينسب فيها للأهلى و دعم الأهلى و عون الأهلى يبقى الأهلى يزعل ليه من رحيل "الحضرى" !! ما يوجّه كل هذا للاعب آخر و محدّش بيبات من غير عشا !! منطق الاحتراف بيقول أن محدّش يبقى غير من يثبت أحقيّته فى الوجود بما يقدّمه للنادى من إنجاز و طالما الأهلى أبقى على الحضرى كل هذا الوقت و طالما "مقهور" على رحيله بهذه الدرجه يبقى الموضوع له علاقه بكفاءة اللاعب و ليس بما يقدّمه النادى له !! ليست هذه محاوله لتقليل دور النادى لكن ليس من العدل كذلك أن ينسب الفضل للنادى وحده كأنّه "اخترع" الحضرى من عدم !!

و أنا أوافقك على اعتراضك على هذا المنطق و بالتأكيد موقف الأهلي له علاقة بكفاءة اللاعب الذي لا يتخلف الكثيرون على أنه من أفضل حراس المرمى الذين أنجبتهم مصر .. إن لم يكن بالفعل أفضلهم جميعاً.

و لكن عندي تبرير لما قلتُه.

قبل كل شيء، ما قلته ليس دفاعاً عن الأهلي أو انحيازاً له على حساب اللاعب ... لأنني أحب النادي الأهلي زي ما باحب الحزب الوطني بالضبط :D

و لكن السبب الرئيسي ( في رأيي ) في تألُّق الحضري و استمراره في الملاعب هو وجوده في الأهلي .. أمامنا دليل صارخ هو محمد أبو تريكة

لم نكن نعلم عنه شيء و لم يكن يُختار في المنتخب أثناء وجوده في الترسانة و ذلك حتى انتقاله إلى الأهلي في سن متأخر ... منذ ذلك التاريخ و نحن نسمع عن حلاوة أبو تريكة و جمال أبو تريكة و بركة مولانا الحاج أبو تريكة و أنه أمير الشباب و بقية الألقاب التي أطلقتها عليه الماكينة الإعلامية إياها.. و أنا أشهد له بمهارته و لكن أن نستمريء الإشادة بلاعب حتى نصل إلى العلاقة بينه و بين ربّه فهذا ما لا أستسيغه و لكن ده سلو منظومتنا الإعلامية أو منظومة الأهلي الإعلامية التي تستحل دم الحضري الآن.

الأهلي ليس استثناء من منظومة الفساد بل من أكبر التروس فيها و لكن ما يميّزه إن إدراته بيلعبوها صح .. ::: تبريري لموقفي مبني على مبدأ احترام التعاقد بين طرفين أياً كان الطرفان :::... بيني و بينك بدأت أتعاطف مع الحضري لاحساسي بوجود شيء خفي في الموضوع أو تعنت من جهة إدارة الأهلي .. و الآن ذهولها لعدم تخيلها أن يتركها لاعب و هي من اعتاد أي لاعب أن يتمنى المرور أمام بوابة النادي حسب تصورها.

لن يقف الأهلي عند لاعب و كان الأولى أن يقوم بتجهيز بدائل للحضري من زمان و ليس بديل واحد .. لكن كما قلت أن اعتراضي هو على عدم احترام التعاقد ليس إلا.

شوية ورد كده على ما أوسوم :D :hi: :closedeyes: :rolleyes: :blink:

[Modest]

أرجو من الجميع متابعة هذا الموضوع فى وسائل الإعلام متابعة واعية ومتفحصة

فهو نموذج للعشوائية التى نعيشها فى كافة المجالات .. التى هى السبب فى أن إنجازاتنا عبارة عن طفرات .. بمعنى أن الإنجاز يحدث عندما ينجو من شبكة العشوائية ... بالصدفة

أنا سمعت الكلام يا أبو محمد و تابعت الموضوع و ندمت ( مش على إني سمعت كلامك :closedeyes: .. لكن على الوقت الي ضاع في استمرار المتابعة مع إن كل البرامج شبه بعضها)

تابعت بعض البرامج التي استفاضت في تناول الموضوع و استضافت الخبراء (أو المفترض أن يكونوا خبراء) و حتى وكلاء اللاعبين و كل من هب للحديث عن الموضوع ، و لم أخرج من هذه المتابعة إلا بقناعة أن كل هؤلاء اتخذوا الكرة سبوبة (بلغة الفهلوة) و لم نفهم من أي منهم من الجاني و من المجني عليه.. من له الحق في كذا و من عليه الحق في كذا .. أي من هؤلاء ""الخبراء"" لم يستطع أن يأتي بنص صريح من القانون و يستنتج منه أن عقوبة اللاعب كذا أو على النادي أن يفعل كذا أو أو .. كلها حكاوي قهاوي.

تم تعديل 24 فبراير 2008 بواسطة Modest

[MZohairy]

أرجو من الجميع متابعة هذا الموضوع فى وسائل الإعلام متابعة واعية ومتفحصة

فهو نموذج للعشوائية التى نعيشها فى كافة المجالات .. التى هى السبب فى أن إنجازاتنا عبارة عن طفرات .. بمعنى أن الإنجاز يحدث عندما ينجو من شبكة العشوائية ... بالصدفة

أنا سمعت الكلام يا أبو محمد و تابعت الموضوع و ندمت ( مش على إني سمعت كلامك :rolleyes: .. لكن على الوقت الي ضاع في استمرار المتابعة مع إن كل البرامج شبه بعضها)

تابعت بعض البرامج التي استفاضت في تناول الموضوع و استضافت الخبراء (أو المفترض أن يكونوا خبراء) و حتى وكلاء اللاعبين و كل من هب للحديث عن الموضوع ، و لم أخرج من هذه المتابعة إلا بقناعة أن كل هؤلاء اتخذوا الكرة سبوبة (بلغة الفهلوة) و لم نفهم من أي منهم من الجاني و من المجني عليه.. من له الحق في كذا و من عليه الحق في كذا .. أي من هؤلاء ""الخبراء"" لم يستطع أن يأتي بنص صريح من القانون و يستنتج منه أن عقوبة اللاعب كذا أو على النادي أن يفعل كذا أو أو .. كلها حكاوي قهاوي.

نأمل من الأخوه الزمالكاويه الشمييته الإبتعاد عن القلعه الحمراء :closedeyes:

[se_ Elsyed]

للاسف هذا الموضوع فسره الكثيرون كما يفسرون الأية الكريمة " يا أيها الذين أمنوا لا تقربوا الصلاة "

وسكت المفسر لحد كده ولم يُكمل قوله تعالى " وأنتم سُكارى "

- فالمتابع للرياضة وخصوصاً لاخبار النادي الاهلي سيجد أنه في خلال نصف موسم وافق على احتراف 3 من أفضل اللاعبين لديه وهم :

- وائل جمعه ( نادي السلية القطري إعارة لمدة 6 شهور )

- حسن مصطفى ( نادي الوحدة السعودية إعارة لمدة 6 شهور )

- محمد شوقي ( بيع لنادي ميدلسبرو الإنجليزي مقابل شرط جزائي في عقد محمد شوقي يحق له فسخ عقده مع الاهلي للإحتراف الخارجي )

وتناسى الجيع أيضاً إن الإنتقال في جميع أنحاء العالم له شروط

لكن تناسى الجميع ذلك وأصبحوا يرددون كالببغاوات المادة رقم 17 في قوانين الفيفا التي تنص على إن " من حق اللاعب الذي وصل 28 سنة وله أكثر من 8 سنوات مع نادية وأكمل عامين متواصلين من عقده فمن حقه أن يفسخ عقده مع نادية "

وهو تفسير وتأويل على حسب الهوى

فالمادة ليست كذلك لإنهم أخذوا منها جزء وتركوا الجزء المهم

فالمادة تقول كذلك بالفعل لكنها تؤكد على إن اللاعب من حقه فسخ العقد مع غرامة مالية وهي رده جميع ما حصل عليه وما كان المفروض أن يحصل عليه خلال هذا العقد من مبالغ إلى ناديه الأصلي كغرامة فسخ للعقد . ، وفي حالة إن اللاعب كان اقل من 28 عاماً فيكون العقاب مضاعف ... فيشمل وقتها الإيقاف والغرامة واحياناً ممكن يصل الإيقاف إلى سنوات .... وهناك شرط هام جداً أغفله الجميع أيضاً لتبرير ما فعله الحضري وهو ُن اللاعب لابد ان يُخطر ناديه بتلك الرغبة

نخلي بالنا من الكلام الجاي ده

يُخطر نادية برغبته في فسخ العقد رسمياً على الأقل بـ 15 يوماً قبل

قبل إيه بقى ؟

قبل نهاية الموسم !!!!!!!!!!!

وتعريف الموسم هنا في كرة القدم له شقين :

1- قبل بداية موسم الدوري في بلده . زي إحنا كده في شهر 8 أو شهر 9

2- أو موسم الأنتقالات الشتوية ... واللي في مصر بينتهي في 31 يناير من كل عام

الشيء الخطير بقى واللي الببغاوات أغفلوه إن المادة 16 من نفس القانون جت ولغت الكلام ده كله بجُملة في منتهى الخطورة وقالت " لا يُمكن ولا يحق لأي طرف - نعني هنا النادي أو اللاعب - فسخ العلاقة التعاقدية خلال الموسم - "

تخيلوا ؟

يعني ما ينفعش الاهلي ييجي في شهر أكتوبر ويقول للاعب : إمشي يالا مالكش حاجه عندي

كذلك اللاعب ما ينفعش ييجي في شهر فبراير زي ما عمل الاخ عصام ويقول نفس الكلام

كذلك هناك قوانين في الفيفا تحظر على أي لاعب إنه يلعب لناديين مختلفين خلال نفس الموسم

يعني إيه ؟

يعني الاخ عصام لعب مع الاهلي مبارة أمام المصري البروسعيدي من حوالي 5 أيام وهي كانت في بداية الراوند التاني من الدوري ... يبقى إزاي يتركه ويروح يلعب لنادي أخر في نفس الموسم ويقولك إنه هايلعب مباراة مع نادي سيون يوم 24 فبراير يعني النهاردة ؟

- كذلك الأخ عصام لم يخطر ناديه حتى شفوياً برغبته في ترك النادي

- كذلك الاخ عصام وقع على عقد الإحتراف الأصلي مع هذا النادي السويسري منذ فترة لا تقل عن شهر ( يمكن قبل حتى كأس الأمم ما تبدأ ) والدليل على هذا إن الإسبوع الماضي وصل خطاب لإتحاد البطيخ المصري اللي عندنا من الإتحاد السويسري بيطلبوا فيه البطاقة الدولية لعصام وهذا أمر يتطلب دراسة ووقت للعقد يعني النادي السويسري كان معاه العقد وراح للإتحاد السويسري اللي درسه وإبتدا يراسل الإتحاد المصري اللي ما بلغ الاهلي إلا بعد 3 أيام لإنهم جميعاً كانوا مشغولين في التحضير لحفلة نانسي عجرم وكل واحد كان بيحلم إنه يسلم على نانسي وليذهب إتحاد الكرة والاندية جميعاً إلى الجحيم وحتى اليوم لم يفسروا لماذا ظل هذا الفاكس الغريبة لديهم 3 أيام وبالمناسبة الفاكس وصلهم في نفس اليوم اللي وصل فيه رئيس النادي السويسري للتعاقد مع الاهلي وكإن ما فيش حاجه وكإنهم يعني جايين يدخلوا البيت من بابه وهما أساساً متجوزين عُرفي من ورا أهاليهم :closedeyes: ..

كل ده والاخ عصام عامل فيها عبدو العبيط وبيقول إن فيي نادي سويسري طالبوه للإحتراف .... وهو اساساً موقع معاهم ومخلص كل شيء وده فيلم هابط بيعمله وأول شيء إستغربت له هو إن عصام الحضري راح بنفسه أستقبل رئيس النادي في المطار الليي كان جاي بطائرتة الخاصة لعدة ساعات معدودة ياخد عصام ويمشي وكإنه جاي يشتري علبة صلصة ...

المفاجأة بقى إن الاخ عصام موقع على عقد مع الاهلي بكامل إرادته وحالته العقلية السليمة لمدة 3 سنوات ونصف تبدأ من تاريخ يناير 2007 ... يعني حتى ما اكملش سنتين من عقده ..

الشيء الأخر اللي بيقولوا ده عصام عايز يأمن مستقبله !!!!!

فهل تعلمون إن عقد الحضري السنوي هو اكبر تعاقد لأي لاعب في مصر ؟!!!

وهل تعلمون إن متوسط ما يحصل عليه الحضري من تعاقد ومكافآت ودخل إعلانات - بالهبل وأرقص يا حضري مع فودافون - لا يقل عن 5 مليون ج سنوياً .

وأخيراً مكافات الفوز بكأس الأمم اللي لسه ما بردتش ولم يحصل عليها والتي قد تتخطى الأ 2 مليون جنيه

كذلك نسي الحضري إن كثير من اللاعبين بيبقى عايز يلزق في أي نادي كبير ويختم حياته فيه عشان يبدأ حياته بعد الإعتزال في سلك التدريب، ما بالك بالأهلي اللي كل لعيب فيه اليومين لما بيعتزل بيروح يدير له أكاديمية للكرة من اكاديميات الاهلي .. ما بالنا بموضوع تدريب حُراس المرمى اللي فيه نفص في مصر كلها ... وهو الحضري قد بلغ عامه الـ 36 عاماً يعني ناقص له سنتين بالكتير قوي قوي ويعتزل ... فلما يرجع مظفراً من سويسرا إن شاء الله مين النادي اللي هايستقبله ؟

كذلك مصر داخلة تصفيات كأس العالم اللي بإن الله بمستوانا ده املنا كبير في ربنا إننا نوصل .... فهل عصام الحضري عنده أمل أن يلعب للمنتخب في ظل هذا الموقف الزبالة اللي عمله وأثر في كل جماهير مصر وبالتالي تلاقيه اليومين الجايين دول واقف بيحرس مرمى مصر في احد المباريات بأستاد القاهرة ؟

الخلاصة يا سادة : الحضري لم ولن يكون أخر لاعب يحترف .. لكن العملية لها أصول ولها توقيتات ولها بروتوكلات وهو لم يراعي أياً منها بهذه الحركات الصبيانية التي لا تُتوقع من لاعب عنده 36 سنة .... اومال ساب إيه للأطفال واللاعبين الناشئين ؟

[se_ Elsyed]

أرجو من الجميع متابعة هذا الموضوع فى وسائل الإعلام متابعة واعية ومتفحصة

فهو نموذج للعشوائية التى نعيشها فى كافة المجالات .. التى هى السبب فى أن إنجازاتنا عبارة عن طفرات .. بمعنى أن الإنجاز يحدث عندما ينجو من شبكة العشوائية ... بالصدفة

أنا سمعت الكلام يا أبو محمد و تابعت الموضوع و ندمت ( مش على إني سمعت كلامك :closedeyes: .. لكن على الوقت الي ضاع في استمرار المتابعة مع إن كل البرامج شبه بعضها)

تابعت بعض البرامج التي استفاضت في تناول الموضوع و استضافت الخبراء (أو المفترض أن يكونوا خبراء) و حتى وكلاء اللاعبين و كل من هب للحديث عن الموضوع ، و لم أخرج من هذه المتابعة إلا بقناعة أن كل هؤلاء اتخذوا الكرة سبوبة (بلغة الفهلوة) و لم نفهم من أي منهم من الجاني و من المجني عليه.. من له الحق في كذا و من عليه الحق في كذا .. أي من هؤلاء ""الخبراء"" لم يستطع أن يأتي بنص صريح من القانون و يستنتج منه أن عقوبة اللاعب كذا أو على النادي أن يفعل كذا أو أو .. كلها حكاوي قهاوي.

حاسب على كلامك يا موديست وما تجرحش في حد

عايز تقول يا لئيم إن إتحاد الكورة عندنا هم شوية كفتجية وهليبة وبضمجية ؟

ولا عايز تقول إن إتحاد كرة أكبر دولة في أفريقيا وأكثرها بطولات على مستوى المنتخبات أو الاندية ما فيهوش حد شاف موضوع لسين سين في باب التعليم والعمل والعمال ودخل إمتحان تحديد مستوى إنجليزي عشان كده ما بيعرفوش يترجموا أي فاكس بيوصلهم

والدليل على ذلك الفاكسات اللي وصلت بخصوص حُسني عبد ربه أو شيكابالا اللي ضربوا أخماس في أسداس ومش عارفين الناس دي بتتكلم بأنهي لغة أو عايزين يقولوا إيه ؟

فالنتيجة إن الأندية هي اللي بتدفع الثمن

يا راجل بلا قرف

[se_ Elsyed]

بلصدفة

هذا ما كتبة حسن المستكاوي في الاهرام اليوم

في المادة‏17‏ من لوائح الفيفا

ماذا يترتب علي إنهاء اللاعب تعاقده دون إخطار ناديه ؟‏!‏

سيون السويسري والحضري يدفعان متضامنين تعويضا للأهلي

كتب: حسن المستكاوي

الحضرى داخل النادى السويسرى

وقع عصام الحضري عقدا رسميا مع نادي سيون‏,‏ والتقطت له الصور وهو يوقع العقد‏..‏ فهل حسب كل شيء جيدا و يعتبر توقيعه قانونيا‏..‏ أم تري هل غامر عصام الحضري برحيله المفاجيء إلي سويسرا ؟ وهل يمكن أن يتعرض لعقوبات وفقا للوائح الإتحاد الدولي لكرة القدم ؟ وهل لاتدرك إدارة نادي سيون السويسري مايترتب علي التعاقد مع اللاعب بتلك الطريقة ؟

لقد وقع عصام الحضري عقدا جديدا مع النادي الأهلي في يناير‏2007‏ لمدة ثلاثة أعوام ونصف العام تنتهي في نهاية موسم‏2009‏ ـ ووثق في اتحاد الكرة المصري بتاريخ‏25‏ يناير‏2007..‏ ووفقا للوائح الفيفا المنظمة لانتقالات اللاعبين المعدلة في عام‏2008,‏ هناك مايسمي بفترة الحماية للطرفين النادي واللاعب‏,‏ وتعريفها كما جاء في الصفحة الخامسة من لوائح الإتحاد الدولي كما يلي‏:‏

‏

'‏ هناك فترة حماية مدتها ثلاث سنوات أو ثلاثة مواسم أيهما أسبق‏,‏ بالنسبة للاعب الذي يقل عمره عن‏28‏ سنة‏,‏ وهناك فترة حماية مدتها عامان أو موسمان أيهما أسبق للاعب الذي يزيد عمره علي‏28‏ سنة‏..'.‏

وبذلك يكون عصام الحضري خاضعا لفترة الحماية الثانية ومدتها عامان‏,‏ أو موسمان‏,‏ وفي المادة‏17‏ من قواعد تنظيم انتقالات اللاعبين‏,‏ وتحت عنوان مايترتب علي فسخ اللاعب لعقده بدون سبب جاء مايلي‏:‏

‏1‏ ـ‏-‏ في جميع الأحوال يلزم اللاعب بدفع تعويض إلي ناديه علي المخالفة‏,‏ وتقدر الخسارة التي تلحق بالنادي علي فترة العقد المتبقية بحد أقصي خمس سنوات‏.‏ وفي حالة الحضري يكون متبقيا من العقد عامان ونصف العام‏.‏

‏2‏ ـ‏-‏ يتحمل اللاعب والنادي الجديد الذي انتقل إليه قيمة التعويض‏.‏

‏3‏ ـ‏-‏ سداد التعويض لايلغي العقوبة إذا كان العقد الجديد خلال فترة الحماية‏,‏ والعقوبة تصل إلي الإيقاف أربعة أشهر عن المباريات الرسمية ويمكن أن تمتد إلي ستة أشهر بدءا من الموسم الجديد للفريق الذي انتقل إليه اللاعب‏.‏

‏4-‏ ـ اللاعب عليه أن يبلغ ناديه الأصلي رسميا برغبته في فسخ العقد قبل مرور‏15‏ يوما من آخر مباراة رسمية لعبها مع الفريق‏.‏ وفي تلك الحالة يكون الحضري مخالفا لأنه لعب مباراة المصري الأخيرة‏.‏

تلك باختصار شديد اللوائح المنظمة لانتقالات اللاعبين ومايترتب علي فسخ اللاعب لتعاقده مع ناديه الأصلي خلال فترة الحماية للطرفين‏,‏ ووفقا للوائح الفيفا يكون عصام الحضري مخالفا ومعرضا للإيقاف الرسمي وسداد التعويض للأهلي‏..‏ لكن يبقي السؤال‏:‏

هل هناك أمر خفي في هذا الرحيل المفاجيء تعرفه إدارة سيون ومحامي النادي السويسري يمكن أن يصبغ انتقاله بصبغة قانونية لانعرفها‏..‏ الله أعلم ؟‏!‏

[أبو محمد]

إستمرارا لمسلسل العشوائية .. وتأكيدا لما قاله العزيز موديست ، شاهدت بالأمس برنامج القاهرة اليوم .. عمرو أديب وأحمد موسى وأحمد سليمان (مدرب حراس المنتخب) ومحمود صبرى (الأهرام) .. والقيعى ومجدى عبد الغنى .. طبعا كلام عمرو أديب فى هذا الموضوع لا يختلف عن كلامه فى فقرة (إسألوا رجاء) .. أما ما قيل فى الجلسة العشوائية فهو كلام عشوائى يبدأ دائما بكلمات "هو صحيح الحضرى أخطأ ولكن ... " ثم تظهر الانتماءات والعشوائية من الزعلانين ومن الفرحانين ..

أما الخبر الوحيد الذى استرعى انتباهى فقد جاء عشوائيا أيضا (إتضح أن القيعى يعلمه ولكنه لم يتكلم عنه) من الكابتن خالد الغندور .. حيث أفاد أنه "منذ قليل" علم أن الوسيط المغربى سمسار الصفقة ، قد فعل نفس الشئ مع اثنين من لاعبى الإمارات وأخذهم إلى "نادى سيون السويسرى" ... ولكن الشيوخ هناك تدخلوا وأعادوا اللآعبين !!!!! .. القيعى صحح المعلومة وقال إن من تدخل هو "محامى" إتصل بالنادى الأهلى وعرض عليهم أن يقوم بنفس ما قام به بالنسبة لللاعبى الإمارات ....

مش عارف ليه افتكرت زماااااااان وانا واقف فى شباك غرفتى فى بيتنا القديم بمحرم بك بين فترات المذاكرة ... كنت أشاهد لعبة "التلات ورقات" على الرصيف المقابل .. وكنت أرى كيف يختارون الزبون من المارة .. واحد يقفل عليه (دون أن يكلمه) وينظر باهتمام إلى اللعبة ، يلتفت نظر "الضحية" إلى اللعبة .. يقف ليتفرج .. يجد أناسا يكسبون ، يبدأ الشخص اللى قفِّل على الزبون باللعب .. يسقط صاحب اللعبة أحد الكروت على الأرض .. بسرعة يتناول "المقفلاتى" الصورة ويثنى الصورة .. ثم يراهن عليها ويكسب .. وهنا يقتنع "الضحية" إنه وجد فرصة عمره ليكسب من هؤلاء اللاعبين (الهبل) ويبدأ فى اللعب ثم خسارة الجلد والسقط ........

كانت هناك فكرة سائدة إن "الخواجات" على نياتهم وممكن الضحك عليهم ... أثبتت الأيام عكس النظرية .. ولا أريد أن أسبق الأحداث .. فقط لننتظر .. لنرى

[الحازم حسن]

يا جماعة الكل أخطأ الأهلى والحضري واتحاد الكرة

الأهلى والزمالك والاسماعيلي أنا بعتبرهم مقبرة لأفضل لاعبي مصر " الداخل مفقود والخارج مولود " يستحيل للاندية الكبيرة في مصر انها تسمح للاعب بانه يخرج من النادي إلا على قبره عدل هنا خطأ الأهلى انه يولد احساس عند لاعبيه بانه دخل سجن كبير ومش حيقدر يخرج منه والوضع ده بطبيعة الحال بيخلق حالة قرف قوية جدا عند اللاعب.

الحضري أخطأ في انه تطوع وفسر قانون اللعبة الدولي بنفسه وعلى مزاجه ودي طبعا مش شغلته خالص واحنا لسه فاكرين اللي حصل مع سيد معوض .. عدلي القيعي قال ان عصام اعلن انه ماضي مع الجماعة بتوع سيون عقد من يوم الأحد وفي نفس الوقت لعب ماتش مع النادي الاهلي يوم الأربعاء يبقى ازاي انت على ذمة الفريق السويسري من يوم الأحد وبعدين تروح تلعب ماتش مع الاهلى يوم الأربعاء

اتحاد الكرة بتاعنا بئه أنا بحس أنهم ملهمش في اي حاجة غير برامجهم اللي مغرقة الفضائيات امبارح في مودرن سبورت مدحت شلبي بيسأل ضيوفه بيقول لهم يعني نبعت البطاقة الدولية لسيون ولا منبعتهاش :closedeyes: اصل النادي السويسري كل شوية يبعت فاكس والاهلى مش عايزنا نبعتها

الراجل نسى انه واحد من أهم أعضاء اتحاد كرة القدم .. لما انتا مش عارف مين اللي حيعرف وكمل كلامه وقال في مشكلة حسنى عبد ربه بعتنا للاتحاد الدولي قام باعت لنا فاكس من 17 ورقة وجبنا خبراء لغة انجليزية وعشان نطلع جملة واحد مفيدة قاطعة تقول اللاعب يلعب فين مفيش.

يبقى التخبط مش من جانب اللاعبين بس لا ده من الجهات المفروض انها رسمية كمان

[ابو محمود]

رغم ان الموضوع يأخذ مسارآ أراة مختلف عن أحداثة فأنى أقول لكاتبة

لو كنت تمتلك شركة وبها موظفون لهم عقود أبرمت بينك وبينهم وعند اتمام عمل ما قام الموظف المختص بهذا العمل بترك الشركة وتعرضت الشركة الى الأهتزاز هل تسمح لتلك الموظف بالهروب ام تأخذ حقق القانونى ؟

فى مجتمع مثل مجتمعنا يحب ويعشق ثقافة الشماتة ويحب ويهوى ثقافة الفهلوة ويموت فى ثقافة اكسب بدون تعب ومثابرة لا نستغرب ان يضرب بالقانون والتعاقدات عرض الحائط فأنظرو الى الشارع وسير العربات والمشاة والأرصفة ستجدون عليهم مجاميع من الحضرى فى كل زاوية الكل يريد نفسة فقط ولا يحترم مواثيق او عقود ....

فرأس الدولة ودوائرها تتصرف معنا كما تصرف الحضرى

ومعلمى اولاادنا فى المدارس والمعاهد يتصرفون معنا كما تصرف الحضرى

فلا يوجد قانون أو عقد يلزمنا الا السياط مادمنا نجهل كيف نتعامل بأحترام مع مشاكلنا وكيف نبتعد عن لغة الشماتة بيننا ونحن نتكلم عن فضيحة ينظر لها العالم كيف نتصرف خلالها وكيف ان الرائحة الكريهة بدت تظهر بين جنبات وأروقة من يديرون تلك الرياضة والأيام القادمة ستثبت ان من يدير شؤونة بحكمة وحنكة لن يخسر رغم وجودة فى بؤرة فساد كبيرة تسمى الرياضة المصرية ...... فتذكرو تلك الكلمات عندما ينتهى الموضوع الفضيحة ......محمود مصطفى

[فــيــروز]

تعليق مجمّع

لا أدرى لماذا يتوقّع الجميع من "الحضرى" الالتزام بالقانون و العقود فى بلد حكومتها لا تحترم هذه القوانين و العقود و مبدؤها الغير معلن القانون للضعفاء فقط !!

أنا شخصيا لا أحاول إطلاقا أن أدافع عن "الحضرى" لا من منطلق قانونى ولا من منطلق أخلاقى بس الحقيقه لا أستطيع أن أتغاضى عن انتهاك القانون الصارخ فى أمور أهم كثيرا من موضوعه ثم أطلب من "الحضرى" فقط أن يكون مثال للشاب الملتزم بالقانون !! أمّال الشروط الجزائيه بتتعمل ليه !! بتتعمل عشان مواقف زى دى ..

فى "الأهرام" اليوم خبر عن "تمسّك" الأهلى بالحضرى حتى نهاية تعاقده فى عام 2010 و إذا لم يكن هذا تعسّف قميئ فى استخدام الحق يبقى إيه !! وهل متوقّع من لاعب ترك ناديه بهذه الطريقه حتى لو فشل فى تحقيق حلمه فى الخارج و اضطر مجبرا للعوده لناديه فى مصر أن يقدّم أى شئ !! إذا لم يكن هذا استعبادا للناس فماذا يكون .. و ما الذى سيستفيده الأهلى أو تستفيده مصر من لاعب غير راغب أساسا فى اللعب إلاّ إذلاله و كسر أنفه و جعله عبره لغيره !! لو سنتكلّم عن المبادئ و الأخلاقيات أظن هذا موقف يستحق التعقيب عليه بالمثل ..

أمّا إذا كنّا سنتحدّث عن الاحتراف فقواعده بالتأكيد لا تقول اعتمد على "حضرى" فقط بحيث لو السر الإلهى طلع بكره أقع فى حيص بيص !! وبعدين لو المشكله مشكلة منتخب مصر و ليست مشكلة النادى الأهلى -على طريقة مش عشانى ده عشان مصر- يبقى الأهلى مزعّل نفسه ليه ما المنتخب يحل مشاكله بنفسه ..

الغريب إن الناس تتحدّث عن مصلحة "الحضرى" و قيمته الماديّه التى تفوق ما حصل عليه -المبلغ المعلن- فى استمرار غريب للتعامل مع رجل تعدّى الثلاثين من عمره كأنّه طفل برياله ليس له حريّة اختيار أين يذهب و لصالح من يعمل !! زى كده ما أنا بافكّر أسيب شغلى لمكان عمل آخر ولو بمقابل مادّى أقلّ فأجد من يتدخّل دون اعتبار لأن هذه رغبتى و اختيارى و أكيد أنا أدرى بهم .. طيب يا ترى لو ظهر أن هناك خطّه ما لدى "الحضرى" للانتقال لنادى أكبر بمقابل مناسب سنعطيه الحق فيما فعل ولاّ سنعود لحديث المبادئ و الوطنيه اللىّ مابتأكّلش عيش !! وما أعنيه من هذه الجمله الأخيره أن كل شئ تقريبا صار له ثمنه و مقابله المادّى وما المكافآت التى حصل عليها المنتخب بعد فوزه الأخير سوى دليل واحد على هذا فمش هنيجى على "حضرى" و نقول له مانت بتقبض كويّس عاوز إيه أكتر من كده و "مصر" أمانه بين إيديك يا "حضرى" إلى آخره ..

لو صحّ أن سبب تألّق "الحضرى" و غيره هو وجوده فى النادى الأهلى فهذا يؤكّد أن هناك خللا شديدا إذ أن المفترض أن صاحب المهاره يظهر من خلال أى نادى .. حريّة العرض و الطلب التى يمثّلها نظام الاحتراف تتعارض مع فكرة الاحتكار التى يمثّلها توحّد فرصة اللاعب فى الظهور من خلال نادى واحد !!

تم تعديل 24 فبراير 2008 بواسطة فــيــروز

[yasser6666]

ايه ياجماعة انتوا مكبرين الموضوع قوي كده ليه

وبتقولوا ان الراجل خان بلده ووطنه وجمهوره وعار عليه عار عار عار

هو الحضري ده لامؤخذه كان جندي بيحرس الحدود مع الاسرائيلين ونام اثناء الخدمة بتاعته والا حاجة

دي مجرد لعبة رياضية لا اكثر

وبعدين احنا عاطفيين جدا قوي كده ليه

بصراحة الحضري قام بواجبه كما ينبغي وعلي اتم وجه وكان سبب رئيسي لحصول مصر علي كأس الأمم الافريقية للمرة التانية علي التوالي في 2006 و 2008 ....

لايجب ان ننسي تفانيه في حراسة المرمي وكأنه يحرس بيته الشخصي من المعتدين

ودلوقتي بقي لابد ان نسانده بدون تكلف في اخر مشواره

ونفترض ان الاهلي اعاده لصفوفه مرة تانية هل سيلعب بنفس الروح والحب كما كان طبعا لا....

اكيد لازم نشجعه ونشكره كمان عما قام به خلال البطولة في غانا

ونقوله تصحبك السلامة وبالتوفيق طالما ده اختيارك الشخصي

[~Heba~]

اؤيدك يا استاذ ياسر6666 و انا من زمان اسمع ان الاهلى بيتعسف فى معاملة اللاعبين وبيمنع احترافهم خصوصا الجيدين منهم رغم ان اكبر الاندية العالمية لا تفعل ذلك

[مسافر زاده الخيال]

اذا اعتبرنا ان الموضوع عام وليس (شئنا مصريا خالصا)

اقول انكم ظلمتم (الحضري) تماما

ويكفيه وطنية انه (ادى امانة اللعب للمنتخب والاهلي على اكمل وجه) ولم يجعل عقد اللعب في اوربا يؤثر على مستواه

طالما لم (يخالف قانون FIFA)

هل نعتبر دكتور احمد زويل (هاربا وخائنا) لانه بحث عن مصلحته (بما لا يضر وطنه -مصر) في اميركا ؟؟؟؟؟؟؟؟؟؟؟؟؟؟

رغم انه ترك بعثة جامعته التى ابتعثه (وتركها مرغما لبيروقراطيتهم)

نعود للحضري (المظلوم)

انه لم يسافر الا والمنتخب (في القمة) والاهلي (في القمة) ولو هرب في وقت ناديه ومنتخبه في ((((امس الحاجة)))) له لكان لكم الحق

انظروا لللاعبي البرازيل وجنوب اميركا

هل اتهموا بالهرب والخيانه لتركهم انديتهم بحثا عن المال؟؟؟؟؟؟؟؟؟؟؟؟؟؟؟؟؟

اخيرا...........ليكن الحضري سفيرا (لتسويق الاعب المصري) واستغلوه اعلاميا بدلا من التخوين (وهذا ما نجيده في بلادنا للاسف)

[أبو محمد]

دعوت الإخوة الأعضاء لمتابعة هذه القضية فى وسائل الإعلام بوعى ليكتشفوا ثقافة العشوائية التى تغطى جميع نواحى حياتنا .. ولنكتشف لماذا إنجازاتنا عبارة عن طفرات ، عندما تنجو من شراك العشوائية ..

أدعوكم أيضا قبل الشروع فى أى مشاركة .. إلى مراجعة المشاركات فى موضوعنا هذا .. لنكتشف صحة ما دعوتكم لاكتشافه

ثم .. فلنتابع

[osaimi]

الحضري أو ناديه الجديد مفروض يدفع الشرط الجزائي لفسخ العقد وخلاص يسيبوه فى حالة لأن مصر لسه محتاجاله فى تصفيات كأس العالم ، بلاش نقضي عليه ونعمل له مشنقه

سيبكم من العاطفة دي اللي موديانا فى داهيه وفكروا بشكل عملي ، وبعدين هو الأهلي خلاص يعني اللعيبه عنده لازم ياخدوا تأبيده - دا حاجة تجنن

[se_ Elsyed]

من الواضح والاكيد والجديد والعتيد والشديد غن في زملاء بيكتبوا ردود من غير ما يكلفوا نفسهم ويقراوا ابعاد الموضوع من مصادرها ..

مجرد ما يقرا العنوان هوب يقوم داخل شمال

نقول كمان

يا جدعان يا خلق هو .... يا اهل الله ياللي هنا

الأهلي في خلال 6 شهور سمح لأربع او خمس لاعبين مرتبطين معاه بعقود في الإحتراف الخارجي اللعيبة دول منهم كبار ونائشين

لكن للإحتراف أصووووووووووووووووووووول

أصول

فما تجيش تمضي حضرتك معايا عقد بكامل إرادتك وتهبر الملايين وتقولي تاني يوم سلامو عليكم من غير حساب أو شرط جزائي

وما تجيش تسيب النادي في غير موسم الإنتقالات وتقولي مستقبلي

كل ده يا جماعة بعد ما الاهلي بعث لغتحاد الكرة المصري وإتحاد الكرة الأفريقي قائمة لاعبيه وفيها إسم اللعب والقامئة دي سارية لحد أغسطسط القادم وما ينفعش لا يشيلوه منها ولا يضح حد بداله

هو احنا إعترضنا إنه يحترف ؟!!!!

يا خلق هوووووووووووووووووووووووووووووووه

يا ناس

الاهلي إعترض على المقابل الهزيل ( 400 ألف دولار ) اللي عرضهم النادي السويسري مقابل إحتراف أحسن حارس مرمى في أفريقيا ودول لا مؤخذه ما يجوش قيمة إحتراف عيل صغير بيلم كور في سويسرا ... ويرجعوا يكذبوا ويقولوا لأ عرضنا مليون دولار ... وهو كذب في كذب

الأهلي إعترض يا ناس لما الحضري بيه كان مربط معاهم وماضي وعمل نفسه أول مره يشوفهم في مصر وخلاهم يضربوا السعر الهايف ده مع نسبة إعادة بيع تصل إل 50 % .. والكلام ده في عرف كرة القدم عمروا ما بيحصل ...

الاهلي إعترض لإن البيه - واخده بالك يا فريوز - مرتبط بعقد قابض مقابله ملايين مقدماً والعقد لمدة 3 سنوات ونصف مستمرة لحد عام 2010 وفجأة يختفي من النادي ويضرب الأهلي دماغه في الحيط بقى مش مهم

اللي بيقولوا الأهلي بيتعنت

طب بالله عليكم لو الاهلي عنده 11 لعيب صف أول وجم كلهم عايزين يمشوا ... وهما مرتبطين بعقود .. هل نقولهم مع السلامه واجيب غيركو من السوبر ماركت ؟

يا ناس كل حاجه لها أصول واللي يتعدى الأصول يستاهل اللي يجرى له

إقرأوا بقى الحته الطازه دي وقولوا رأيكم بعد النادي السويسري والحضري بيه حسوا إنهم إتورطوا وهايفتحوا على أنفسهم ابواب جهنم

جردية المسا ولا ادري صحة الكلام من عدمه

من جهة أخري تدور أحاديث داخل جدران النادي حول طلب الحضري من أحمد شوبير نائب رئيس اتحاد الكرة للتوسط وعودته مرة أخري إلي القلعة الحمراء من تلقاء نفسه.

بدوره قام شوبير بنقل رغبة الحضري إلي الدكتور محمود باجنيد أمين صندوق النادي حتي ينقلها إلي لجنة الكرة ويستطلع الموقف.

وعلى موقع النادي السويسري ... خاطبوا الاهلي رسمياً بتسوية الموضوع ودياً وعدم تصعيده للفيفا

يعني نشال ينشل محفظتك ويقولك تعالى نتفاهم ودياً بعيد عن الشرطة

الأمر لا هو إستعباد ولا حُب بالعافية

ولكنه عقود ومواثيق لابد من إحترامها .. وكما تقول القاعدة القانونية " الكاره ... غارم "

يعني بتكرهني ... يبقى إبريني من الحق والمُستحق .. وهاجيب عربية وأخد العفش والنجف

مش أجي أفتح الشقة ألاقيها منفضه ونرجع نتكلم عن الحرية :happy: