هيثم وتامر ووليد

[freefreer]

فعلا بعض الإخوة النقاد لم يكونوا على مستوى الفهم الكامل للقصة .. لأن الأجزاء التى اسقطها حشيش مقصودة .. و ذلك لأثارة خيال القارئ و التشوق .. فعلى سبيل المثال حادثة وفاة البطل بالمستردة .. غاب معناها عن أكثر المنتقدين .. لأن المستردة تصنع من الخردل .. الذى يصنع منه الغازات السامة .. افه حروب العصر الحديث .. و سبب رئيس من اسباب حرب العراق المزمعة هو لنزع اسلحة الدمار الشامل و الغازات السامة من النظام العراقى .. يااااااااااااااااااه .. القصة بترمى لبعييييد أوى يا ولاد .. برافو عليك و الله يا حشيش .. كنتاكى رمز لأمريكا .. فرايد شكن .. رمز لشعب العراق .. الكتشب رمز للدم المراق .. السم رمز للغدر .. تامر ووليد .. العراق و الكويت .. هيثم ايران .. اما البانيو .. فهو السر الكبييييييير قوى .. اللى لسة بفكر فيه ..

:D :D :D :lol: :lol: :lol: :lol: :lol: :lol: :lol:

[ragab2]

حشيش

قرأنا لك القصص الطويلة

نأمل أن تبدأ القصص القصيرة المعبرة كما عهدناك

[Rabso]

انا البانيو .. فهو السر الكبييييييير قوى .. اللى لسة بفكر فيه ..

تاهت و لقيناها يا ناقدنا الكبير freefreer

أعتقد أن المعلم "قصدي الأستاذ" حشيش كان يرمز للعولمة على حد التعريف الأمريكي بالبانيو اللي ظاهره النظافة و باطنه إراقة الدماء يعني اللي هايغرق فيه كل من قال لأ يا ماما مش هاعمل الواجب. :shock:

:D :D :? :? :D :lol:

[Spider]

وأنا رأيى إن برضه ده مد و تطويل مالوش لازمة أنا متهيألى كفايه وليد

اه..... هنا تبدأ المشاكل..... فيه خط رفيع بين عدم التطويل و بين الإخلال بالبناء الدرامي و المنطقي و التسلسلي للقصة و الذي يقوم علي بناء متماسك من الأحداث المتتالية و المتسلسلة بناء علي بعضها البعض و يعتمد علي شخصيات حاضرة قوية الوجود و منطقية في تصرفاتها و ردود أفعالها و التي تأتي بناء علي تجاربها التي مرت بها في زمن الوعي و اللاوعي و الحضور التفاعلي للشخصيات المؤئرة و المتأثرة بالتفاعلات الكيميائية ... قصدي التبادلية بين أطراف القصة و شخصياتها المختلفة .......

.....

الأخ لانسلوت

لقد أفحمتنى من نقدك العقلانى للموضوع وان كنت أختلف معك بأن النظرة الوجودية للحياة المغربية هى هى لم تتغير مش كده ولا أنا غلطان... وفعلا التفاعلات الكيماوية التى تمثلها المسطردة أضافت نكهة الى القصة

وأعتقد ان البانيو يا أستاذ فرى هو الذى سيغرق فيه كل حكام العرب أن شاء الله وهذا أن دل على شىء فانما يدل على العمق القومى فى القصة ومعاصرة مشاكلنا اليومية العربية القومية والهيروغليفية...

والسلام عليكم

[se_ Elsyed]

أنا مش مصدّق أهتمامكم بهذأ الموضوع . حتّى و لو كان دعوه للأبتســــــــــــــــام!!!!!!

هوّ فيـــه حاجه أنا مش واخد بالى منها ؟ أرجو أيضاح سبب هذا الأهتمام بمثل هذا الموضوع .

هو فعلاً يا أخ أهنو دعوة للإبتسام فى ظل الظروف والاحداث المحيطة بنا هذه الأيام والتى إن أصبح تفكير الواحد منا محصوراً فقط فيها سوف يصاب بكل أمراض الدنيا ، فبالتالي فإننا ننتهز فرصة وجود موضوع ظريف من شخص محبوب زي أخونا حشيش ( أبو إنذار ) ونعلق عليه بدون إبتذال أو خروج عن النص ..... هي دى كل الحكاية من البداية للنهاية.

[MuslimaEgyptian]

مش ممكن يا جماعه.. إنتم تححححفففههه :D

والأخ حشيش، كان نفسى جدا أضيفك للمرحوم "لازمات ومشاهير" كأكثر عضو يضيف مذاق خاص للإيموشن :shock: :shock: (متهيألى حضرتك قربت تخلص كل اللى فى الخزانه والوفد هيحتاج يعمل طلبيه جديده :D) ولكن ما باليد حيله، ربنا يفك أسره قريب إن شاء الله. كان برضه نفسى أضيفك كصاحب أطول عرض قصصى مميز، ولكن لن أفعل الى ان نتأكد من حقيقه الاقتباس الذى تحدث عنه الأخوه..فمن يضاف إسمه للموسوعه لازم يكون مبدع أوريجينال :D

-----------------

اللى قاله الاخ سى السيد مضبوط يا أخ أهانو

تم تعديل 25 مارس 2004 بواسطة MuslimaEgyptian

[nora]

اية ده كلة مش ممكن الموهبة الفظيعة دي انت بجد عبقري لاه لازم تاخد جائزة نوبل للدقن اصدي للشعر لاه بجد خطير خطير القصة مؤثرة ورمانسية لابعد الحدود بس كان ينقصها بعض الاشياء

1. يا تري كان المسترده الي حطها في انفة منتهية الصلاحية ولذلك سببت الوفاة

2. هل كان البانيو مملوء بالماء

3. طب لو كان فيه مية با نري استعمل مية سخنة ام بارده

4. وكان في صيف ولا شتا علشان لو كان في شتاء واستعمل مية ساقعة يبقى تفنن في الموتة ويدل على مدي شعورة بالذنب

5. لو كان صيف واستعمل ميه سخنة جدا كان نوع السخان اية

6. لم تذكر في القصة شعور الفتاه وهل ذهبت الي المطعم مرة اخري ام لا لانها لو بتحب حد فيهم مش معقوله تروح تاني هناك تجنبا لذكرى المأساه الفظيعة

7.هل باه بدأت الفتاه بمقاطعت الفراخ بأنواعها والكاتشب والمسترده ؟

كفاية لحد كده لما افتكر حاجة هبأه اقولها بس انا اهديك وسام الشجاعة لهذة القصة العظيمة :D :D

[ragab2]

حشيش

تعرف حد اسمه نجيب محفوظ

أكيد ماتخدش بالك

بس هو يعرفك

[إبن مصر]

رد ابو الريش فيما ادعاه حشيش . :shock: .

كتبت قصه وكلام جميل المعنى :shock:

لكنه منقول من مطعم مشبعنا :shock:

والبطل كان جعان ومات مجوعنا :shock:

والبت وقعت الجدع واحنا اتوجعنا :shock:

قتل صحابه الوله وجه يصدعنا :shock:

وفى الاخر شم صلصه وبقعنا :twisted:

واقلك منقوله يا حشيش تقولى ...... مافهمتش المعنى :lol:

ابو الريش :lol: :lol: :lol: :lol: :D :D :D

[Khiber]

بعد يومين عثر على هيثم جثة هامدة فى البانيو بعد أن ملئ فتحتى أنفه بالمسطردة وانتحر :shock:  :shock:  :shock: 

تمت

طب ماتنفسشى من بقه ليه ... مايكونش كان بيشد نفس من الشيشه وهو بينتحر .... دا حاجه آخر سلطنه :lol: :lol: :lol: :lol: :lol: :lol: :lol: :lol: :lol: :lol:

على فكره ياحشيش إنت بتفكرنى بزميل كان معى فى الجيش من الإسكندريه كان بصراحه له نفس إسلوبك ده فى الحوار ياما ضحكنا وسمرنا وياما لعبنا طاوله وشطرنج .... كانت آيام :( :( :( :( :( :lol: :) :) :) :) :roll: :D :D :D

[Lancelot]

ما تنساش طبعاً تعمل مسابقة تليفزيونية هادفة بالإتصال على 0900123456900 (سعر الدقيقة 25 جنيه) لمعرفة من القاتل

رابسو .... فكرة هايلة .... لكن سعر الدقيقة غالي شوية ... خليها 24.99 أحسن ...

أعتقد أن النظرة المتعمقة لمثل هذا النوع من القصص ينبغي بل من الأفضل للإحساس بها من منظور ثقافي لوزعي إرتوازي أن تتم بطريقة الفلاش باك لزيادة الساسبنس

ماشاء الله يا رابسو تفوقت عليا .... أنا إتعلمت كل الكلام ده من القناة الأولي في التليفزيون ... واضح إنك بتتفرج علي القناة التانية كمان ....

فعلا بعض الإخوة النقاد لم يكونوا على مستوى الفهم الكامل للقصة .. لأن الأجزاء التى اسقطها حشيش مقصودة ..

الأخ فري .... إسقاطاتك رائعة – خصوصا علاقة المسطردة بأسلحة الدمار الشامل - و محكمة جدا و تحليلك منطقي للغاية .... لكن لا يجب أن تكون نظرتنا للأمور تأمرية بهذا الشكل يمكن الراجل نيته سليمة و مش قاصد ماما أمريكا بحاجة ... لل يجب تأويل القصة بهذه الطريقة إلا إذا ذكر الكاتب - أو ألمح – لذلك مباشرة .... ديه من قواعد أمريكا في الخليج ..... قصدي قواعد النقد القصصي .....

و طبعاً المط و التطويل ده بناء على نصيحة الناقد الأدبي المتميز السيد Lanclot.

يا رابسو أنا التطويل أنصح بيه لأن في التأني السلامة و في العجلة الندامة و العجلة من الشيطان .... و شكرا علي المجاملة (هأشوفك في القصة اللي جاية يا سيدي)....

اما البانيو .. فهو السر الكبييييييير قوى .. اللى لسة بفكر فيه ..

أعتقد أن المعلم "قصدي الأستاذ" حشيش كان يرمز للعولمة على حد التعريف الأمريكي بالبانيو

ممكن جدا .... و يتطابق مع تفسير الأحلام علي الطريقة الأمريكية .... لكنه لا ينطبق علي التفسير المصري للعولمة التي تعني في القاموس المصري ..... رسم العالم علي طريقة فيفي عبده .... العالمة و العولمة ... واضحة أظن .....

الأخ لانسلوت 

لقد أفحمتنى من نقدك العقلانى للموضوع

يا سبايدر بيه ... ربنا يخليك ... و العملية بسيطة و الله .... سيب التليفزيون شغال علي القناة الأولي أو التانية لمدة تتراوح بين 6 أشهر إلي سنة حسب رغبتك في التخصص و حبك للحياة الأدبية .... و تجنب الدش تماما لأنه بيأثر علي إستيعابك للمنهج ....

وان كنت أختلف معك بأن النظرة الوجودية للحياة المغربية هى هى لم تتغير مش كده ولا أنا غلطان...

شوف سيادتك من الحاجات اللي هتتعلمها .... إن إحنا مش ممكن نختلف أبدا ....

فانما يدل على العمق القومى فى القصة ومعاصرة مشاكلنا اليومية العربية القومية والهيروغليفية...

إسقاط أخر منطقي من سبايدر .... و منعا للتشويش علي القارئ رجاء التوضيح من الكاتب .....

أنا مش مصدّق أهتمامكم بهذأ الموضوع . حتّى و لو كان دعوه للأبتســــــــــــــــام!!!!!! 

هوّ فيـــه حاجه أنا مش واخد بالى منها ؟ أرجو أيضاح سبب هذا الأهتمام بمثل هذا الموضوع .

ده يا سيد أهنوه ..... الذي يطلق عليه الشباب اللي زي حلاتي.... كلمة "هرتلة" ... و هو مصطلح شبابي روش يطلق علي الكلام الفاضي اللي لا بيودي و لا يجيب و يجعلك في حالة من النشوة و الضحك الهيستيري المتواصل لدرجة إن الواحد يروح البيت بعد كده الساعة إتنين بالليل .. أخته/مرأته تفتح له الباب يقولها إيه اللي أخرك لحد دلوقتي ......

المصدر : معجم الوحشة للألفاظ الروشة .. (و هو معجم سماه المؤلف تيمنا بصفة زوجته الحبيبة)

[darker19]

أولا أحب أن أوضح أني لست بناقد أدبي لكني مطلع على الأعمال الأدبية كأعمال الأستاذ نجيب محفوظ و الأستاذ حشيش و الأستاذ يوسف السباعي و الأستاذ إحسان عبد القدوس و غيرهم من أدبائنا الكبار.

المهم أردت أن أخبركم أني اليوم إستيقظت على هتاف صديقي الفلسطيني الذي أراد أن يطلعني على ما في التلفاز, حيث كان عرض شجار كبير بين كبار المخرجين العالميين على من سيحصل على حق إخراج مسلسل (((هيثم و تامر و وليد))) للكاتب الكبير الأستاذ حشيش, الذي حسمه القضاء الأسترالي لصالح المخرج الأسترالي الفذ جيم شانك مدبولي الذي قرر أن يختصر المسلسل ليعرض في 365 حلقة. وإذيع اللقاء مباشرة على جميع شاشات التلفزة الأسترالية المحلية. وكوني مصري مغترب صرت أمشي مرفوع الرأس فخور ببلدي الذي أنتج أديبنا الفذ الأستاذ حشيش. و أدركت أن النصر قريب ورأيت صديقي الفلسطيني ودموع الفرح تنهال من عينية هاتفا دي أول خطوة في تحرير فلسطين.

و لكن عندي ملاحظة ألم يكن من الأفضل أن تعطي أحقية الإخراج لأحد المخرجين المصرين فتسمو به للنجومية العالمية وما تخدش في بالك من كلام النقاد ده حقد وحسد مش أكتر وشكرا.

[ragab2]

ابن مصر

واقلك منقوله يا حشيش تقولى ...... مافهمتش المعنى

مااعتقدش أنها منقولة

لأن كل الأحداث فيها جديدة ومحبوكة ومشوقة

وميزتها انها القصة الوحيدة بالمستردة

يعنى مظبوطة

ودى

حاجة جديدة لم يتطرق أو يلتفت لها أى قصصى من قبل

[إبن مصر]

لا انا اعترض يا د.رجب !!!!!!!!!!

انا قلتله قبل كده دى منقوله من قصه جريمه فى كنتاكى للكاتب هوت اس دوج !!!!!!!!!!!

وكل الى عمله انه غير فى الطلبات ... قصدى فى المواقف ... وكمان .. وكمان ... دى قصه خياليه وفيها اطاله وتطنيب ..و..و..و.. كمان لم يلتزم بالخط الدرامى بالرغم من اقتباسه القصه ..و..و..و.. انا قولتله يحاول مره اخرى .. بس هه

ابن مصر

[Elham]

القصه دى مش بس اظهرت موهبه الاخ حشيش الفذه فى التأليف :wink: :wink: لأ اظهرت كمان مواهب مدفونه لكثير من الاخوه فى النقد البناء الذى يعتمد على القراءه المتعمقه للمعانى المستخبيه التى لا يستطيع القارئ العادى ان يصل اليها :roll: :roll: :shock: :shock:

لى سؤال بعد كل الردود دى فين الاستاذ حشيش :?: :?: :?:

[Excellence]

الزميل الأديب البارع حشيش :shock:

زميل؟؟

يعني إنت كمان يا رابسو؟؟؟؟؟؟

هي ناقصة

أنا هابطّل أقرا قصص و هابقى إنسان جديد

[se_ Elsyed]

يعني بإختصار كده وفى النهاية أستطيع الأن ان أقولها بصراحه بإننا ممكن أن نضع كاتبنا الكبير - فى السن - حشيش بجانب عمالقة الأدب العربي والأجنبي كمان - بمناسبة الكنتاكي والمسطرده والكاتشب - وبذلك يكون عندنا من الكتاب الذين نفخر بهم حشيشو يوسف السباعي ويحى حقى ونجيب محفوظ وجمال غيطاني وأبو أشرف ..... طبعاً فيه ناس هاتسألني مين أبو أشرف ده ؟!!! .. لأنى عارف فضولكم القاتل ، أبو أشرف ده ي أخواننا هو ...

واحد بيقف بعربية كبده على أول شارعنا لكن عنده برضوا موهبة التأليف ( أشمعنى هوت أس دوج وحشيش ك. تاكي )

[freefreer]

القصه دى مش بس اظهرت موهبه الاخ حشيش الفذه فى التأليف :wink:  :wink: لأ اظهرت كمان مواهب مدفونه لكثير من الاخوه فى النقد البناء الذى يعتمد على القراءه المتعمقه للمعانى المستخبيه التى لا يستطيع القارئ العادى ان يصل اليها :roll:  :roll:  :shock:  :shock: 

لى سؤال بعد كل الردود دى فين الاستاذ حشيش :?:  :?:  :?:

الأستاذ مكسووف .. :oops: :oops: :oops: :D

انتم عارفين انه طول عمرة يكره الأضواء ..

[Masrawy Abroad]

.. اما البانيو .. فهو السر الكبييييييير قوى .. اللى لسة بفكر فيه ..

عزيزي فري ...رمز البانيو واضح جداً :idea: :idea: ...لو كنت طفيت المونيتور بتاع الكمبيوتر عندك وولعته خمس مرات كنت ها تلاقي مكتوب على الشاشة ماذا يعني.... :idea: ....لأن القصة تندرج أيضاً تحت أدب الجاسوسية زي ما شفنا...البانيو هو رمز للخليج العربي بدون شك بدفيء مياهه وهدوئه وقد أجاد الكاتب الفذ حشيش محفوظ في ذلك جداً ونجح في تكامل البناء الدرامي وربطه ببقية الرموز الاخرى بالقصة.. :shock: .الأمر الذي صب في الأخر في مواسير صرف بمنطقة الخليج مقاس 45 بوصة حديد زهر وارد الهند :oops: :oops: .وشلولخ .. :oops: ..برافو حشيش... :D :cry:

[حشيش]

عقلى الباطن:أنا ظروفى صعبة :shock:  :shock:  :shock: حصلت لى حادثة وأنا صغير :shock:  :shock:  :shock: جالى إرتجاج شديد فى المخ :shock:  :shock:  :shock: تم عرضى على لجنة طبية :shock:  :shock:  :shock: اللجنة أصدرت توصية بأن أعامل معاملة طفل :shock:  :shock:  :shock: إضطريت أسيب المدرسة وأنا فى تالته إبتدائى :shock:  :shock:  :shock: إتجهت بعدها لكتابة القصص والأناشيد :shock:  :shock:  :shock: إخوانا هنا صدقوا إنى مفكر وأديب بصحيح :shock:  :shock:  :shock:  لازم أجاريهم :shock:  :shock:  :shock: أيوه الدنيا مظاهر :shock:  :shock:  :shock: لا سبيل للتراجع :shock:  :shock:  :shock: 

الأخوة والأخوات الأعزاء

لقد أعادت لى تحليلاتكم النقدية للقصة الأمل فى مستقبل النقد الأدبى بمصر :shock: :shock: :shock: القصة تُعرف عندنا نحن المتخصصون (بالأدب الحُمُصى) نسبة إلى الحُمُص فهى مسلية ومغذية فى آن واحد :shock: :shock: :shock: ...الأدب الحمصى يعتمد على تهييج مشاعر القارئ تدريجياً فى إطار من القلق المشوب بالحذر :shock: :shock: :shock: مع تدافع الأحداث يشعر القارئ عادةً بضيق فى التنفس مصحوب بزيادة فى إفراز اللعاب وتبول لا إرادى :shock: :shock: :shock: الرموز فى القصة لا تنتهى وكل ما تقرا فيها تطلع بمعانى جديدة...هيثم فى القصة يرمز إلى جورج بوش...تامر ووليد همه بليكس والبرادعى...الفتاة كونداليزا رايس...الكتشب هو دم الشعب العراقى...المسطردة أسلحة الدمار الشامل...الإنتحار فى البانيو هو الموت القادم من البحر...ولسه ولسه :shock: :shock: :shock: دعونى أقول أن فرى كان الأقرب إلى فك رموز القصة :shock: :shock: :shock:...يظهر إنه حصلت له حادثة وهوه صغير :oops: :oops: :oops:...على العموم العشرات من الرموز لا زالت فى إنتظار من يكشف عنها :shock: :shock: :shock: