ما تيجوا نحارب الفساد بجد

[إيزيس]

وبعدين يا جماعة هنفضل نشتكي من الفساد كده كتير

ماحدش هينفعنا هنسلم أولادنا حمل تقيل ومن غير أي مساعدة مننا

إيه رأيكم نقترح اقتراحات على أدنا يعني إيه اللي نقدر نعمله ععلشان نحارب الفساد

الحقيقة إني مع تحفظي على أسلوب عمر خالد عجبتني فكرة صناع الحياة لأنها فيها إيجابية لو نقدر نخلي أولادنا يكون لهم أثر في تغيير المجتمع للأحسن ونبدأ بطرح

أفكار ونشوف إيه القابل للتنفيذ منها

إيه رأيكم؟؟؟

مثلا لو عندك في الحي مسن أو مسنة تنتظر رعاية من أولادها أو من الدولة و مش لاقية نعلم أولادنا يتكفلوا بالناس دي إزاي معنويا وماديا على الكبار

يعني ماعنديش أفكار حاضرة حالا لأني لسة راجعة من الشغل وباحضر الغدا يمكن بعد شوية تيجي لي فكرة وانتوا ياريت تتفضلوا بأفكاركم الحلوة

[إيزيس]

ما حدش عايز يحارب ؟؟

يعني أنا لوحدي هاحارب

اقفل يا سمسم وهات المفاتيح

تم تعديل 25 فبراير 2008 بواسطة قرنفل

[the egyptian]

فكرة محاربة الفساد.... بلا اي شك فكرة يتمناها كل مصري و لكن يختلف الاسلوب من شخص لآخر

و هناك فكرة تدور برأسي و لعلها تكتمل اليوم و سأضعها في موضوع جديد

و ليس هذا خروجا علي موضوعك.... فانا اؤيد المبدأ لكل من يستطيع

و لعل الكثيرين يقوموا بهذا في الخفاء

و أهي نواية تسند الزير

مع خالص تحياتي و تقديري للموضوع

[إيزيس]

أيوة كدة ياللا اتشجعوا يمكن يطلع معانا مشروع كويس

[م.سامح المصرى]

جميل جدا جدا يا استاذة قرنفل

بقالى كام يوم ادور في النت عن البلاد الى كانت تحت الارض وبقت من دول العالم الاول

بس على فكرة الموضوع كبييييييييييير جدا جدا

بس في امل

انا ممكن اجيب امثلة لدول اتبعت نظام معين وفي خلال سنين قليلة اقتصادها بقي قوى جدا وغنية

اية رأيك

وسلامى لكى وتسلمى على موضوعك الرائع

[إيزيس]

كل اللي تقولة حكم ياباشا

لكن عاوزين أفكار على أدنا إحنا ننفذها بنفسنا

[م.سامح المصرى]

معلشى اصل انا دبلوم صنايع

حضرتك تقصدى اية بأفكار على ادنا

[vipwithyou]

اكيد هى تقصد يا سيدى مش زى الدول اللى كانت تحت الأرض

وانا كنت بأقول من زمان ابدأ بنفسك .. كل حاجة هتتحل

موضوع جميل ومتبلور فى شكل رائع لكنه بيناقش قضية كبيرة جدا ً يا أخت قرنفل

بالنسبة للاجتماعيات فعلا الأطفال لازم يتربوا من وهما صغيرين على رعاية كبار السن والفقراء اللى يستحقوا طبعا ً

مش اللى مرصوصين فى الشارع بيشتغلوا شحاتين ويعملوا على قلبهم

لكن كل واحد فعلا فى الحى بتاعة عارف الناس الكبيرة والفقيرة واللى محتاجة العون

ولو هنيجى لمحاربة الفساد بقى بمعناه الدقيق

وهو الفساد الكبير

فأنا بأحاول جاهدا ً انى أعمل اكتفاء ذاتى وأحاول ما أكونش محتاج حاجة من البلد غير أقل القليل

حاليا ً بأدور فى مشروع زراعة الصحراء مش الصحراء قوى يعنى لكن اللى برضوا تكون قريبة من البلد

يعنى لما اشترى قطعة ارض كبيرة أعملها مزرعة وأزرع فيها محاصيل كويسة مش بس فاكهة هأقدر أوفر على الأقل العيش

وممكن فى المستقبل أربى شوية ( حيوانات اليفة ) توفر ليا اللبن واللحمة الى حد ما

وكمان بأفكر فى عمل مشروع استثمارى زراعى ( عيش غراب ) ودا مربح جدا ً

بس كل دا افكار لسة ما فيش حاجة تحققت لكن بأحاول فعلا انى اوصل لدرجة الاكتفاء اللى بيها ماحتجش حاجة من حد

وجارى البحث عن احلام جديدة

شكرا

اخوكم

تامر السيد

[إيزيس]

معلشى اصل انا دبلوم صنايع

حضرتك تقصدى اية بأفكار على ادنا

أقصد أفكار إحنا نقدر ننفذها كأفراد و مواطنين من غير الحكومة تغير من اتجاهات سيئة في المجتمع أو تخلق فرص عمل أو تغير ثقافة أولادنا

حاليا ً بأدور فى مشروع زراعة الصحراء مش الصحراء قوى يعنى لكن اللى برضوا تكون قريبة من البلد

يعنى لما اشترى قطعة ارض كبيرة أعملها مزرعة وأزرع فيها محاصيل كويسة مش بس فاكهة هأقدر أوفر على الأقل العيش

وممكن فى المستقبل أربى شوية ( حيوانات اليفة ) توفر ليا اللبن واللحمة الى حد ما

وكمان بأفكر فى عمل مشروع استثمارى زراعى ( عيش غراب ) ودا مربح جدا ً

بس كل دا افكار لسة ما فيش حاجة تحققت لكن بأحاول فعلا انى اوصل لدرجة الاكتفاء اللى بيها ماحتجش حاجة من حد

وجارى البحث عن احلام جديدة

الحلم ده هايل فعلا لو بتتكلم جد أتمنى تقدر تنفذه وما ينكسرش حلمك مع وجود المعوقات اللي بتخلقها الأجهزة الحكومية اللي هي عين

الفساد وعايزين نحاربها ولو حتى بالإصرار على التصدي لها

[vipwithyou]

انا فعلا يا اخت قرنفل مقتنع تماما بفكرتى لكن المشكلة حاليا ً هى الماديات لكن ربنا يسهل

الموضوع فى دماغى وفعلا ناوى أعمل الاكتفاء الذاتى دة وما أحتجش للحكومة غير فى حاجات بسيطة وبس

وربنا ييسر

[shawshank]

انا ممكن اجيب امثلة لدول اتبعت نظام معين وفي خلال سنين قليلة اقتصادها بقي قوى جدا وغنية

إيه رأي حضرتك في ماليزيا ؟

أنا أتصور أن الموضوع أكبر من محاولات فردية ... يحتاج الموضوع لإرادة دولة : شعب وحكومة . إرادة نظام حاكم وإرادة أفراد .

لكني أؤمن كذلك بأن فردًا واحدًا من الممكن أن يصنع فرقًا . ولعل الفاضلة/ قرنفل تكون هذا الفرد .

[نانا]

جميل جدا إننا نثير الموضوع ده بجد الموضوع ده خطير لازم نهتم بمستقبل أولادنا من كل الجوانب

وأنا شايفة إن الموضوع ده محتاج يتفرع لكذا نقطة لأننا بنتكلم عن كيان هييجي في مجتمع في نظري غير مثالي (فاسد)

بجد لازم نهتم أوي بالموضوع ده نقطة الإصلاح لازم تبدأ مننا إحنا وبجد لو بدأنا بنفسنا هنأثر في المجتمع كله

وأنا دلوقتي هتكلم عن نقطة التربية والأخلاقيات اللي بعتبرها جزء في تنشأة جيل مثالي واللي بعتبرها نقطة الصفر والأساس اللي هبني عليه كيان كامل هييجي بعد كدة والي بتمنى من ربنا اني اقدر احقق ده في اولادي وبتمني كلنا نجتهد عشان خاطر ولادنا

أحب أنقلكم كلام للشاعر الجميل فاروق جويدة بجد عجبني أوي وحاسة انه هيوصف كل حاجة عايزة أوصلهالكم بس طبعا بأسلوب أرقى وأجمل وبيبتدي بالآتي

ماذا أعلم ابني في هذا الزمان؟

لاتعلم ابنك لغة هذا الكلام ولو لم ينطق

ولا تعلمه القبح ولو أصبح كل شيئ في الحيياة قبيحا

إننا لا نستمد الجمال من خارجنا وإنما نستمده من داخلنا ولأننا نرى العالم من خلالنا قبل أن نراه من حولنا

قد يصبح الشرف عملة نادرة ولكنه سيظل صالحا لكل زمان لأن العملات الرديئة أشياء طارئة في حياة الناس لا يمكن أن يكتب لها الدوام

علم ابنك أن يقول الحق ولو دفع الثمن لأن الأشياء العظيمة تستحق أن يتحمل من أجلها آلاما عظيمة .....

علمه أن يكون صاحب مبدأ وقضية ولو تحولت الحياة حوله إلى مجموعة من سماسرة المباديء وتجار القضايا

علمه أن يتمسك بالصبح ولو أظلمت كل الأشياء حوله .......

علمه أن عذاب الحق أجمل كثيرا من كل متع الضلال ........

وأن إنتظار الصبح لا يقل جمالا عن رؤيته .........

وأن القبح سيظل هو القبح ولو غير ثيابه عشرات المرات.........

علم ابنك ألا يخاف ولو تحولت الحياة إلى مدينة أشباح .......

علمه أن يتكلم ولو أصيب العالم بالصمم ........

علمه أن ينطق ولو صارت الحياة كهوفا للخرس

زماننا القبيح لن يدوم

سيأتي زمان يدرك قيمة الإنسان ويصبح الإنسان إنسانا

سيأتي زمان ينطق فيه الناس مرة أخرى ويتكلمون ويتحاورون

سيأتي زمان جديد للشرف والنزاهة والأمانة والخلق ...........

سوف تنفجر شلالات وأنهار لتطهرنا من المستنقع الذي غرقنا فيه

علم ابنك الفضيلة لأن الزمن الساقط لن يدوم

[نانا]

ماذا أعلم ابني في هذا الزمان؟

لاتعلم ابنك لغة هذا الزمان ولو لم ينطق

ولا تعلمه القبح ولو أصبح كل شئ في الحياة قبيحا

إننا لا نستمد الجمال من خارجنا وإنما نستمده من داخلنا ولأننا نرى العالم من خلالنا قبل أن نراه من حولنا

قد يصبح الشرف عملة نادرة ولكنه سيظل صالحا لكل زمان لأن العملات الرديئة أشياء طارئة في حياة الناس لا يمكن أن يكتب لها الدوام

علم ابنك أن يقول الحق ولو دفع الثمن لأن الأشياء العظيمة تستحق أن يتحمل من أجلها آلاما عظيمة .....

علمه أن يكون صاحب مبدأ وقضية ولو تحولت الحياة حوله إلى مجموعة من سماسرة المباديء وتجار القضايا

علمه أن يتمسك بالصبح ولو أظلمت كل الأشياء حوله .......

علمه أن عذاب الحق أجمل كثيرا من كل متع الضلال ........

وأن إنتظار الصبح لا يقل جمالا عن رؤيته .........

وأن القبح سيظل هو القبح ولو غير ثيابه عشرات المرات.........

علم ابنك ألا يخاف ولو تحولت الحياة إلى مدينة أشباح .......

علمه أن يتكلم ولو أصيب العالم بالصمم ........

علمه أن ينطق ولو صارت الحياة كهوفا للخرس

زماننا القبيح لن يدوم

سيأتي زمان يدرك قيمة الإنسان ويصبح الإنسان إنسانا

سيأتي زمان ينطق فيه الناس مرة أخرى ويتكلمون ويتحاورون

سيأتي زمان جديد للشرف والنزاهة والأمانة والخلق ...........

سوف تنفجر شلالات وأنهار لتطهرنا من المستنقع الذي غرقنا فيه

علم ابنك الفضيلة لأن الزمن الساقط لن يدوم

[إيزيس]

لكني أؤمن كذلك بأن فردًا واحدًا من الممكن أن يصنع فرقًا . ولعل الفاضلة/ قرنفل تكون هذا الفرد .

دي ثقة عظيمة يافندم باعتز بيها ............. إوعى لاصدق نفسي

اسمح لي أختلف معاك فرد لوحده ممكن يكون عنده الحلم أو النية لكن يحقق لوحده هدف ماعتقدش إلا لو كان شخص عنده شعبية أو مواهب

قيادية عالية واللي زي دول في مجتمعنا لهم حالتين إما مشغولين بمصالح شخصية وأهداف ذاتية أو مكبلين و مكممين

اللي شجعني أقول الكلام ده إني تيقنت إن المحاورات تضم مجموعة من المصريين الحقيقيين و المحترمين ومش عاجبهم كتير من الأوضاع الغلط

لكن لحد هنا ويقف الكلام خلينا نكمل ونحاول لأن الندم بعدين ممكن يكون عظيم وباختصار تدهور الأوضاع خاصة الأخلاقية سوف يقع حتما

على رؤوسنا و رؤوس أولادنا وهذا ما نحاول أن نتفاداه

بجد لازم نهتم أوي بالموضوع ده نقطة الإصلاح لازم تبدأ مننا إحنا وبجد لو بدأنا بنفسنا هنأثر في المجتمع كله

وأنا دلوقتي هتكلم عن نقطة التربية والأخلاقيات اللي بعتبرها جزء في تنشأة جيل مثالي واللي بعتبرها نقطة الصفر والأساس اللي هبني عليه كيان كامل هييجي بعد كدة والي بتمنى من ربنا اني اقدر احقق ده في اولادي وبتمني كلنا نجتهد عشان خاطر ولادنا

أنا موافقة نانا جدا جدا لأني مؤمنة إن إنحدار الأخلاق هو أكبر مصيبة بنقابلها من يوم ما بطلنا نشجع أولادنا يحفظوا القرآن ويروحوا

الكنيسة وسمعناهم بيسخروا من كل الرموز الدينية والثقافية وبيصنعوا لنفسهم رموز من اللعيبة والفنانين وسكتنا وبعضنا شجعهم على

أساس واحنا خدنا إيه من القيم والمباديء

علم ابنك الفضيلة لأن الزمن الساقط لن يدوم

أجمل كلمة و أعظم حلم

[م.سامح المصرى]

إيه رأي حضرتك في ماليزيا ؟

أنا أتصور أن الموضوع أكبر من محاولات فردية ... يحتاج الموضوع لإرادة دولة : شعب وحكومة . إرادة نظام حاكم وإرادة أفراد .

لكني أؤمن كذلك بأن فردًا واحدًا من الممكن أن يصنع فرقًا . ولعل الفاضلة/ قرنفل تكون هذا الفرد .

فعلا حضرتك استشهد ببلد اكثر من رائعة

وانا ببحث عن معلومات عن اقتصاد كوريا الجنوبية لقيت دي ومعومات عنها

بجد حاجة روعة

رئيس الوزراء كان لية دور كبير جداً

قال انه هايحول ماليزيا الى بلد صناعى وفعلا عملها

امتى احنا نلاقى واحد زى الراجل دا

لاكن فعلا الموضوع اكبر من محاولات فردية بس فى امل ... وان شاء الله يكون الفرد دا استاذة قرنفل يا ريت

وسلامى لكم جميعاً

[vipwithyou]

يا سموحة شعب ماليزي كام ؟ واحنا كام ؟

هتقولى طيب ما الصين ؟

أقولك الصين كل واحد بيعمل بنفسة وبينتج

لو كل واحد مننا فكر انه يكون منتج مش مستهلك وبس هنبقى كويسين قوى والله

[م.سامح المصرى]

اوكى ما اختلفناش يا استاذى تامر

تعرف بلدنا دي عاملة زي اية بجد

بلدنا عاملة زي الكمبيوتر العادى

مليانة فيرس .... حتي في ملفات السيستم نفسة

اول فيرس ... تعرف انتا فيرس الى بعمل هايد للفولدر اوبشن وما تعرفش تجيب الحاجات الى كنت عملها اخفاء

دا فى الحكم وكلها ملفات ملهاش لزمة وفيرس بجميع انواعه واختلاف اشكاله

وإلا بقي التروجان والباتش

دول حاجات بتخلى ممكن اى حد يخترق جهازك

مثل الجهاز دا مثل مصر نسبياً

الحل بقي اية .... نفرمت الجهاز دا وننزلة ويندوز من اول وجديد (حكومة جديدة يعنى ) بس يكون وندوز اصلى مترخص كمان

هاتلاقي حماس والله وشغل وهانبقي من اوائل الدول في الصناعة ونبقي بلد مفيش بعد كدة

بس احنا ناقصنا القدوة بس وواحد يكون عندة ضمير وبيخاف على البلد دي

[vipwithyou]

طيب ايه رأيك يا سموحة فى فيروس بمجرد نزولة على الجهاز تلاقيه انتشر فى كل الجهاز وبقى أى ملف أو فولدر تفتحة أصبح به الفيروس

دا ميكونش الحل بتاعه بس ويندوز ( حكومة جديدة مترخصة ) لأن مهما نزلت حكومة جديدة الفيروس خلاص منتشر فعلا فى الجهاز

يبقى الحل اننا نلغى الحكومة خالص وناخد الهارد على جهاز تانى ونعمل عليه انتى فيروس كويس من غير ما نفتح اى ملف من ملفاته وبعد كدة نغير الحكومة وكدة تتحل المشكلة

يبقى لازم كل واحد يعمل لنفسة انتى فيروس ويموت الفيروس اللى جواه

بعد كدة اى حكومة محترمة هتمشى معانا

دا رأيي

وبعدين انا تخصص كمبيوتر يعنى عارف مشكلة الفيروس فين

[م.سامح المصرى]

حضرتك ما اخدتش بالك من كلمة فورمات

دا انا كتبتها كذا مرة يا باشمهندز :lol:

نشيل كل الحكومة ... انسب حل ....بس مين

يلة ادينا بنتمنا ....

[vipwithyou]

والشعب يا ريس اللى الفيروس مسك فيه

انت مش معايا فى انت الشعب كمان متفيرس وفينا ناس كتير نفوسها ضعيفة بتساعد الحكومة على اللى بيتعمل فينا

ولا ايه ؟