هل مصر أم الدنيا

[ragab2]

سمعنا

كثيرا عن جملة وقول مصر أم الدنيا

وأتذكر عندما كنا فى الخليج ثارت بيننا وبين أحد الصحفيين العرب ثورة عارمة عندما انتقد مصر والتلوث بالقاهرة وفساد الأخلاق والذمم والرشوة والمحسوبية وذكر أن مصر أم الدنيا مجرد تخاريف ونرجسية من المصريين وهى أصلا مقولة كانت تتردد على شفاه القرويين الذين يزوروا القاهرة للمرة الأولى تعبيرا عن الدهشة والانبهار للعاصمة القاهرة العامرة واختلاف معالمها عن معالم قريته البكر التى كانت تنام بعد المغرب لغياب الكهرباء وشحة مياه الشرب واختفاء شبكة المواصلات بها وكان يقصد القروى بمصر العاصمة القاهرة وليس مصر كلها

وخاصة أن مقالة الصحفى العربى هذا جاءت فى عصر السادات وبعد المقاطعة العربية لمصر وقابلت مصر وقتها هجوما شديدا عليها وعلى كل ماهو مصرى كما أن الانتقاد والنقد لم يكن على لسان مصرى وهذا ما أثار مشاعرنا حيث شعرنا فيه بنبرة تشفى وحقد

فهل

مصر فعلا أم الدنيا أم أن هذه جملة كانت تردد على شفاه القرويين والقصد بها القاهرة وليس مصر والانبهار بأضوائها وشوارعها وأزيائها .. ؟

[بنت شعنونة]

:)

مرة كنا مجموعة و واقفين في بارك ومش عارفا مين فتح السيرة دي وابتدى الكلام تريقا وبعدين قلب جد

منا اللي قال ام الدنيا عشان تلاقي فيها كل حاجا من اول الفراعنة والتاريح لحد الحضارة والتكنولوجيا

ومن مين قال عشان ما حدش بيموت فيها من الجوع

ومنا اللي قال عشان فيها كل الأجناس والأشكال سواء تحت مسمى مصريين (زي المنصورة سلالة فرنسا) والقاهرة اتراك على انجليز وغيره وغيره دا غير الأصول القديمة طبعا

واحنا بنتكلم كان فيه سواق قاعد في عربيته لقيناه بيقرب مننا ويقولنا

نسيتوا حاجا مهمة

فكلنا استغربنا وسكتنا؟

فقال

عشان كل ما فيه ميبة بتحصل في اي بلد عربي

يجروا يقولوا الحقينا يا مصر

زي لما بنصرخ الحقينا يا ماما

بيني وبينكم

عجبتني فعلا..:D

لكن السؤال

امال مين ابوها؟؟؟ :roll:

[BenNeal]

...........هى أصلا مقولة كانت تتردد على شفاه القرويين الذين يزوروا القاهرة للمرة الأولى تعبيرا عن الدهشة والانبهار للعاصمة القاهرة العامرة واختلاف معالمها عن معالم قريته البكر التى كانت تنام بعد المغرب لغياب الكهرباء وشحة مياه الشرب واختفاء شبكة المواصلات بها وكان يقصد القروى بمصر العاصمة القاهرة وليس مصر كلها

انا اميل لهذا الرأى.

[Lancelot]

معلهش كان لازم أرد .... ده اللوكيشن بتاعي ... مصر أم الدنيا ... زي ما بيروت ست الدنيا علي رأي الست ماجدة الرومي ....

يا رجب باشا ... كل واحد بيحب بلده و بيتغني بجمالها حتي لو كانت أعفش بلد في العالم ... مش علشان مصر مش عارف عاملة إيه ... مش هتكون أم الدنيا ديه مش ميدالية في الأوليمبياد هنديها لأحسن واحد ....

و لو مصر مش حلوة علشان تكون أم الدنيا فديه غلطة المصريين ....

أما أبوها يا شانا .... فهو مهاجر الخليج من سنين....

[حشيش]

مصر كانت أم الدنيا بلا منازع أيام الفراعنة...لكنها الأن للأسف أبعد ما تكون عن ذلك.

[Lancelot]

مصر كانت أم الدنيا بلا منازع أيام الفراعنة...لكنها الأن للأسف أبعد ما تكون عن ذلك.

ما كله بسبب الحشيش ... :lol: :lol: :lol: :D :D

أسف يا حشيش بيه .... لكن القافية حكمت ....

[الطفشان]

مصر كانت ام الدنيا

هي حضارة عتيقة جدا، استمرت 2500 سنة متصلة (المملكة القديمة، الوسطى، الحديثة، الفترة المتأخرة، قبل دخول الاسكندر و اغرقة مصر)

بعد ذلك اضمحلت فترة الرومان المتاخرة

ثم انتعشت فترات كثيرة تحت الاخشيديين و الطولونيين و الايوبيين و المماليك، و اسرة محمد علي، و حتى في عهد ناصر)

يعني كان ينظر لها انها رائدة في الحضارة و التقدم و سباقة يتم تقليدها في كل شئ

كان ابناء الخليج يأتون ليتعلموا عندنا

و يتزوجون مننا

و تغير الحال بعد ظهور البترول ثم بعد القطيعة العربية

سبقونا في التكنولوجيا و انشاوا حضارات خاصة بهم (اعلام، فن، تراث، الخ)

و كما قال الاخوة، احنا الان عندنا "فقر و عنطزة"

نعيش في امجاد الماضي و نظل نتعالى على باقي العرب

مع اننا تخلفنا في العقدين الماضيين بشدة

شئ من الفخر بالوطن ضروري و محمود

اما ان يكون على الفاضي (الريادة الاعلامية، واحة الاستقرار، ازهى عصور الديمقراطية، حضارة سبعة الاف سنة، الخ) فهذا لا يجدي

ليس الشريف من قال كان ابي *** و لكن الشريف من قال ها انا ذا

[Elham]

اتفق مع الاخ طفشان فى كل كلمه قالها فنحن نعيش فى حاله من النوم فى العسل و لا نفعل اى شئ الا التغنى بحضاره السبعه الاف سنه و نحن الان من اكثر الدول تخلفا على كافه المستويات :oops: :oops: , ربنا يصلح الحال.

[ابو يوسف]

يا جماعة ....

هل تذكرون ما حفظوه لنا - سامحهم الله - فى كتب التربية القومية ؟؟؟

تتمتع مصر بموقع جغرافى جنان !! :D

تطل على البحر من كل حتة - يعنى الهوا يرد الروح

تتوسط تلات قارات - مش عارف ايه الميزة فى ده ؟؟؟

عندنا آثار - آثار كدمات من الضرب فى السجون

و عندنا سياحة و نياحة و كلاحة ...

عندنا قناة السويس و الفضائية الاولى و التانية

عندنا قطن ... شاش ... مكركروم ...

عندنا فوسفات و مافاتشى !!!

و عندنا كل حاجة و الاشية معدن و الحمد لله !!!

تاريخنا عريق و بيشر عرق !!!

حاربنا كل الحروب .... من ايام حرب الباسوس لحد حرب العرقسوس !!!

جونا حار جاف صيفاً ... مطير دافىء شتاءً ... و الدنيا ربيع و الجو بديع ..

عندنا زعماء .... ماء ماء ماء مآآآآآآآآآآآآآآء

كل ده و مش عوزينا نقول مصر هى ام الدنيا - و ابوها كمان لو كان عاجبكم !!!

الجميل انك لو مسكت كتاب التربية القومية بتاع موزمبيق ح تلاقى نفس الكلام ...

يعنى نقدر نقول ان موزمبيق هى ام الدنيا برضو .... بس من اب تانى !!!

:D :D :D

[الطفشان]

حلوة قوي يا ابو يوسف

بالذات المااااااااااء

[ابو يوسف]

و الله يا اخى طفشان انا بأقول كدة من غلبى ....

احنا بنحب البلد دى بترابها و طينها و عبلها !!

بنحبها كدة من غير زواق ...

بنحبها زى ما الصومالى بيحب الصومال

و الهندى بيحب الهند ...

تبقى ام الدنيا ... تبقى ام اربعة و اربعين .... ح نحبها برضو

[achnaton]

="بنت شعنونة"]:D

ومنا اللي قال عشان فيها كل الأجناس والأشكال سواء تحت مسمى مصريين (زي المنصورة سلالة فرنسا) والقاهرة اتراك على انجليز وغيره وغيره دا غير الأصول القديمة طبعا

واحنا بنتكلم كان فيه سواق قاعد في عربيته لقيناه بيقرب مننا ويقولنا

نسيتوا حاجا مهمة

فكلنا استغربنا وسكتنا؟

فقال

عشان كل ما فيه ميبة بتحصل في اي بلد عربي

يجروا يقولوا الحقينا يا مصر

زي لما بنصرخ الحقينا يا ماما

بيني وبينكم

عجبتني فعلا..:D

لكن السؤال

امال مين ابوها؟؟؟ :roll:

ايوه يا أخت شعنونة .. مصرنا هى أم الدنيا لأنها هى أحد معلمى البشرية كيف يعيشون وحتلاقى لو راجعت التاريخ أكثرية الرسل والأنبياء مروا بها أو أوصوا عليها .. أما حكاية المنصورة دى .. فقد جانبك المرة دى الصواب .. المنصورة دى حسب معلوماتى أهلها هم اللى أسرو الملك الفرنسى لويس التاسع عشر .. وأهلها يتمتعون بطيبة بالغة وذكاء حاد وقرأت فى أحد المراجع أن عظماء مصر فى كثير من العهود كانوا من الدقهلية ممكن يكون فيها قرية أو أثنين نزل بها الفرنسيون أيام الحملة الفرنسية وأبتلعهم المجتمع هناك وتمصروا وهذا الإنصهار فى المجتمع المصرى دليل واضح أننا شعب جدير بالإنتماء الى أم الدنيا اللى بيتسع حضنها للجميع .. حتى إعدائها حتى يفيقوا ويصيحوا أصدقاء وعندنا فى المنيا قرية بأكملها شعرهم أصفر وعيونهم زرقاء .. ويرضه .. بنقول أنهم مصريين .. وهم أنفسهم بيفخروا بمصريتهم ..

صحيح ومعاكى حق ... مجتمعنا المصرى حذب الكثيرين من الشعوب الأخرى .. وأكثرهم من العرب .. ولكن هذا لا يمكنع من القول أن حضن الأم الكريمة أتسع لهم .. ورضعوا إنتماءا .. وحب .. من المنبع ولذلك فكلنا مصريون .. ولو لم أكن مصريا لوددت أن أكون مصريا قالها الزعيم المصرى مصطفى كامل وده ياستى كان دقهلاوى نازح الى ام الدنيا .. وكان معاه حق .. ولا يحس بأم الدنيا وخيرها وعطفها وحبها الا من غاب عنها وعصرته أحاسيس الإغتراب ..

وبكرة إن شاء الله لما تتأهلى وتجيبى لنا صبيان وبنات وترضعيهم الإنتماء لأم الدنيا حتسى أن مصر أمنا علمتنا الكثير والى إختفى داخلنا .. ويظهر وقت اللزوم ..

وتحياتى لك وتقديرى .. وهو ده الدكتور رجب .. بيسعدنى دائما بالموضوعات اللى بتسعد ربنا يسعده ..

اخناتون

[crossfield]

و الله فعلاً أم الدنيا و مبيعرفش قيمتها فعلاً إلا اللى بيبعد عنها .أنا متغربتش فى حياتى غير حوالى 3 شهور متقطعين و رغم كده كنت بحس إنى مخنوقة و هموت و عايزة أرجع مصر بأى شكل...يا جماعة البلد دى والله أحسن من غيرها كتير قوى ...نحمد ربنا إن عندنا دين غيرنا ميعرفوش حاجة عنه .نحمد ربنا ان لينا تاريخ و حضارة مش شوية رعاة غنم أو أبقار .وكتير منكم عايش برة و بيحاول يصبر نفسه بإن مستوى المعيشة أحسن و إنه حاسس بآدميته...ماشى مختلفناش...لكن برضو البلد دى فيها حاجة بتشدك غصب عنك ليها...بغض النظر عن مشاكلنا و العيشة واللى عايشينها...مكنش أجانب كتير حتى علقوا على الموضوع ده و قالوا إن البلد دى فيها مختلفة...ومكنش صلاح جاهين قال فيها:

أنا مصر عندى أحب و أجمل الأشياء

بحبها بعنف و برقة و على إستحياء

و أسبها و ألعن أبوها

و أسيبها و امشى فى درب

و تبقى هيه الدرب...

معلش أنا مش حفظاها كويس :)

[Salwa]

تعيش كروس فيلد......تعيش....تعيش.......تعيش.

مصر ام الدنيا .

فى صفحه تانيه .....بيسالوا.

مالكم ومال الناس....الناس بتتكلم صح ....مصر...سرقه...مصر....رشوه...مصر...مهازل...ومتاهات.

غلط....قلت غلط...وباعلى صوتى قلت غلط.

مش معنى ان واحد...اتنين...ثلاثه....عشرة.....الف.

غلطوا.

يبقى السبعين مليون غلط

وكل من هب ودب ......يشتم فينا

اللى ميسواش.....واللى مايسواش.

لو احنا قلنا على بلدنا ....اى حاجه...احنا ولادها.

واللى زعلان....لاننا ...بنعترض....على المعترض.

فيه مثل بيقول .....عدو ...عدوى....صاحبى.

ومثل تانى بيقول..صاحب ..صاحبى..صاحبى.

وزمان حكوا لنا ....على قصة ...سيدنا سليمان.

عندما اتت امراتان تتنازعان ...ملكية طفل

هذه تقول...انه ابنى ...والاخرى تقول انه ابنى.

وامر سيدنا سليمان ...ان يقسم الطفل الى جزاين..بين المراتان.

فصرخت امراة منهما ....لا..لالا...اتركه لها.

فعرف سيدنا سليمان ....ان هذه ...هى الام الحقيقية.

الام الحقيقية...حتى لو ابنها بعيد عنها ...وتضمن انه ...يحيا...

تتركه....حتى ولو....مع ام بديلة....

والام البديلة ...مهما كان....لن تكون فى حنان ....الام الحقيقية

المصرى....الحقيقى...

لايقبل....................لايقبل.......ان تسب بلده.........

ويقف مكتوف الايدى

اذا اتت مذمتى من ناقص....فهذا دليل اننى كامل

لك الله يامصر.....

سؤال ساذج.........اصل انا بحب استفسر

فيه حد يقدر.....يشتم فى بلد عربى.........امام مواطن من هذا

البلد العربى .؟

بالطبع لا

ربنا يحمى مصر .....

مصر هى مصر .......ولو كره ..الاخرون

سلام كبير قوى

للمصريين

واللى بيحبوا مصر...من غير المصريين.