قلوظي لنا العِمه يا ضرايب

[se_ Elsyed]

طبعاً معظمنا ملاحظ ومتابع تلك الحملة الإعلانية التليفزيونية الروشة التي بدأتها منذ فترة مصلحة الضرايب لتحسين سُمعتها العفنة سواء على مستوى هليبة الضرائب ( من مأموري ضرايب و موظفين أو غيرهم ) وصولاً الى القيادات العُليا التي تعمل بطريقة الـ one way يعني هات ضرايب وما فيش خدمات محترمة تساوي هذه الضرايب

وإبتدوا يستعينوا في الإعلانات بالممثل الكوميدي أحمد شومان اللي كان أول ظهور له في فيلم " فول الصين العظيم " وإبتدا يرمز للمتهربين ضريبياً على إنهم أُناس بيلبسوا لنا العمه ... للمجتمع يعني

وطبعاً المصلحة ووزير المالية المُبجل يوسف بطرس غالي لم يذكر شيء عما تفعله بنا مصلحة الضرايب اللي محوطانا من كل مكان من مبيعات لضرايب دخل لدمغات

وبالتالي أصبح هناك ضغوطات علينا كافراد مجتمع إننا لزام نكون ناس " مفوترين "

وهي كلمة عبيطة ومستفزة

يعني أخر إعلان عملوه لنا كان ان إن الممثل ده راحل يحلق ... آه والله يحلق

وطلب فاتورة من الحلاق عشان هو راجل مفوتر ... فالحلاق طبعاً كان هايرشق المقص في قفاه في مشهد كوميدي المفروض إننا نضحط عليه

وكان من الأولى إننا نضحك على خيبة وزارة المالية اللي سمعت إنها بتصرف على الحملة دي حوالي 50 مليون جنيه سنوياً ومدرمغه بيها شاشات التليفزيون في القنوات المختلفة وكذلك صفحات الجرايد

وعيب جداً إننا نصل للدرجة دي وعشان أروح اشتري بربع جنيه عيش يبقى اخد فاتورة .. أو أروح أظبط دقني عند الحلاق يبقى أقوله هات فاتورة ... انا بيتهيألي إن ناقص أفراد العيله الواحده يتعاملوا مع بعض بالفواتير ... آه الحق حق

يعني أجي أدي الولا عُمر إبني جنيه مصروف أقوله إديني فاتورة ووصل إستلام

واجي أجيب لمراتي هدية مثلاً تُمناية شكولاته من أبو 800 ج اللي حكت عنه فولانه ... يبقى أخد منها تعهد مفوتر بالفُرجة على التٌمناية دي من غير اللمس أو الإقتراب ..

وبالتالي لما تحصل عليه كبسه من مصلحة الضرايب في أي وقت اكون مجهز ملف ضخم به كل تحركاتي وفواتيري ... حاكم انا راجل مفوتر ..

هل تعتقدون إن هناك شخص عاقل يرفض دفع ضرايب في بلده طالما يحصل على خدمات لا حصر لها تصل إلى حد " إنجغه إنجغه يا كلبوظه " مثلما تُدلع الدول المحترمة مواطنيها من دافعي الضرايب ؟

لكن المشكلة إننا بندفع ومع ذلك الحكومة بتشيلنا من على الأرض شيل . الحق يتقال عشان نكون حقانين . مش عشان تهشكنا أو تدلعنا لا سمح الله ولكن عشان تهبدنا عالأرض وممكن تدوس علينا كمان عشان تتأكد إننا موتنا ...

فيا سيادة الوزير المُبجل المفتخر ... قبل ما تصرف ملايينك على الإعلانات وعلى المباني الإدارية الفخمة لوزارتك - شوفتوا المبنى المُفتخر اللي بناه سلفه محمد الرزار من فلوسنا في منطقة العباسية واللي كل قطعة فيه مستودرة من بلاد بره ؟ - الاول قدم خطتك وقول إنت هاتعمل إيه للناس بالمليارات اللي قلبتوها من جيبونا ...

وإنزل من عربيتك المصفحة إنت ورئيسك ورئيس وزارتك الطويل وزور أي مستشفى حكومي او قسم شرطة أو مصلحة حكومية خدمية وشوف فلوس الضرايب بتروح فين ؟

في اوروبا والدول المتجدمه - على رأي الراجل باتع فيلم الإرهاب والكباب - دافع الضرايب هو صاحب البلد .. وهو اللي بيدفع مرتب الرئيس ويشتري له بدلته الفخمة والكولونيا اللي بيحطها دي ....

ذات مرة من 4 سنوات مسكت مجموعة موظفين في السنترال التابع له في مصر مسحت بكرامتهم البلاط وكان من ضمنهم واحده ست إستفزتني وفرجت عليها خلق الله .. لإني كمواطن دافع للضرائب ودافع لفواتير التليفون بالغرامات كمان اللي كان مفصول ومش شغال أساساً ..

شوفتوا الإجرام ؟ .. يعني التليفون عطلان وعمال أبلغ وفي نفس الوقت بادفع فواتير لمكالمات أقسم بالله ما كنت انا ولا عائلتي موجودين في مصر بحالها عشان نتكلمها .... وانا الوحيد اللي معاه مفتاح الشقة ... لكن الظاهر العفاريت في مصر من النوع الحريمي اللي بيحب يرغي في التليفون ... فأختارت شقتي لما لقتني غايب وإبتدوا يكلموا بعض من تليفوني برضوا ويذاكروا مع بعض مناهج الثانوية العامة التابعة لإدارة جُهنم التعليمية بنات ... ويدوا لبعض وصفات صواني الزقوم المستعرة واللي عليها مايونيز ...

وإدفع يا معلم س س

وروحت أشتكي بكل أدب ...إن الست الموظفة التخينة اللي قاعدة على شلت ترد على أهلي .. أبداً !!!! وكررت عليها السؤال وقلت لها : يا ست ياللي ماليه كرشك من فلوسنا .. أنا تليفوني مقطوع وانا دلوقت في اجازة لمدة شهر ... ولقيت عليه فواتير مستحقه بمبلغ وقدره ... اعمل إيه ؟

بصت لي من فوق لتحت وما ردتش .. روحت ممرمط بها بلاط السنترال وقلت لها إنتي تردي عليه لما أسألك لإني مواطن بادفع ضرايب وعوايد عقارية ودمغات شتوية وفواتير تليفونية يعني ومن ده كله إنتي بتاخدي مرتبات نقدية

راحت ضاحكه ضحكه رقيعه وقالت لي يعني لو حضرتك ما دفعتش هاروح الخزنة أخر الشهر ومش هاقبض مرتبي ؟

فياريت يا حضرة الوزير المبجل قبل ما تقول هاتوا .. قول هاناخد إيه ؟ وياريت ما ناخدش على دماغنا الله يخليك أحسن دماغنا ورمت من كُتر الضرب .

إمضاء

مواطن متفوتر .. قصدي متوتر

[nash]

وياريت قبل ما يقول هاتوا يقول ياتري هو كمان بيدفع ضرايب علي ممتلكاته من حدائق وقصور واراضي؟؟

وياتري مكاتب تجديد الجوازات وكراسيها اللي اكل عليها الدهر وشرب والمطارات اللي منظرها يكسف هايروح لها جزأ من هذه الضرايب؟؟

وياتري مين أصلا اللي بيدفع الضرايب في مصر؟؟ هل هم رجال الأعمال الكبار والمستثمرين اللي كل واحد فيهم عنده صديق بيظبطله أمورة وكله بثوابه؟؟ أم الشباب الغلبان اللي بيحاول يتنفس بمشروع صغير ويقصقصوا له ريشه؟؟

دائما كل المصائب تقع علي راس المواطن الغلبان ..ولو مش عاجب ...النيل موجود اشرب منه لغايه مايجيلك بلهارسيا ...

ياسي السيد أنت فتحت كذا موضوع في وقت واحد....يعطيك العافيه

[Folana]

لسلام عليكم ورحمة الله....

والله طول عمرى بأقول ابننا سين سين ده ابن حلال...تصدق وتؤمن بالله...قول لا اله الا الله...

انا كل ما أشوف الاعلانات المستفزة دى..اقول حأبعت لابو الاسيان يفتح الموضوع ده...واهو ربنا كريم ..ماعداش عليك اللى بيحصل ...

اللهجة نفسها اللى بيتكلم بها المذيع لهجة مستفزة جدا...بتاعة قطاع طُرق....ادفع والا...

..,حنجيبك يعنى حنجيبك....يانهار مش فايت..هى حصلت تهديد كمان؟

وفين المقابل...حتى الطرق حالتها تصعب على الكافر....المحور مكسر ومش باين له نهار :(

طريق مصر اسكندرية الصحرواى مكسر....ومشغلين ناحية واحدة على اساس التانية بتتصلح..وحلنى بقى....

فين الخدمات....يؤسفنى ان اقول اننا فى بلد بلا خدمات....

موظفات الحكومة بتجد فيهم نسبة كبيرة من العينة دى...بوز شبرين...تجاهل...احتقار

والموظفين بيكونوا الطف علشان انت كمان تكون لطيف وتخلص مصالحك ياسيد....

انا خايفة الاعضاء يطلبوا مننا فواتير مقابل مداخلتهم....

على فكرة الشيكولاتة كانت 800 جرام بـ 1200 جنيه...انا لا نونكن انسى ابددددددددددددددن :Icecream:

ربى اغفر وارحم وانت خير الراحمين...

عليه العوض...

[achnaton]

طبعاً معظمنا ملاحظ ومتابع تلك الحملة الإعلانية التليفزيونية الروشة التي بدأتها منذ فترة مصلحة الضرايب لتحسين سُمعتها العفنة سواء على مستوى هليبة الضرائب ( من مأموري ضرايب و موظفين أو غيرهم ) وصولاً الى القيادات العُليا التي تعمل بطريقة الـ one way يعني هات ضرايب وما فيش خدمات محترمة تساوي هذه الضرايب

وإبتدوا يستعينوا في الإعلانات بالممثل الكوميدي أحمد شومان اللي كان أول ظهور له في فيلم " فول الصين العظيم " وإبتدا يرمز للمتهربين ضريبياً على إنهم أُناس بيلبسوا لنا العمه ... للمجتمع يعني

وطبعاً المصلحة ووزير المالية المُبجل يوسف بطرس غالي لم يذكر شيء عما تفعله بنا مصلحة الضرايب اللي محوطانا من كل مكان من مبيعات لضرايب دخل لدمغات

وبالتالي أصبح هناك ضغوطات علينا كافراد مجتمع إننا لزام نكون ناس " مفوترين "

وهي كلمة عبيطة ومستفزة

فياريت يا حضرة الوزير المبجل قبل ما تقول هاتوا .. قول هاناخد إيه ؟ وياريت ما ناخدش على دماغنا الله يخليك أحسن دماغنا ورمت من كُتر الضرب .

إمضاء

مواطن متفوتر .. قصدي متوتر

شوف يا ابو عمر .. كنا زمان لما ربنا يرزقنا بمدرس او معيد يعمل فيها ابو العريف ويحضر المحاضرة بدل الاستاذ الغائب عشان يحشر فى رؤسنا معلومه تحت عنوان الجديد فى الماده .. كان الخبثاء من الزملاء يعقبون من بعيد بجمله .. " اللهم يرحم جدك " .. ويمكن لأن هذا التعليق لزق فى دماغى .. كان اعجابى بزيارات جدى الشيخ حسن " رحمة الله عليه " واذكر مره جانى فى ليلة اثناء ما كان اعلامنا بيغسل رؤسنا ويحلق لنا بمناسبة تعين المستر بطرس بطرس امينا عاما للأمم المتحده .. ومنعنى حيائى ايامها من التعليق او احكى لكم حكاية هذه الزيارة .. وما زلت .. ولكن موضوعك ده فكرنى بها وليلتها عندما وجدنى جدى الشيخ حسن " رحمة الله عليه " منتشى ومبسوط واقول له اختاروا يا جدى مصرى امينا عاما للأمم المتحده .. فقال لى وده مين يا ولد – كسرة تحت الواو – فقلت له بطرس غالى يا جدى .. فارتسمت الدهشة على وجه وسألنى دا ياولد اغتاله الماوردى من زمان و مات .. مش ده الباشا ابن الخواجه نيروز اللى باع مصر للأنجليز ايام الخدبوى وكان وزير عدليه فى المحروسة ايام محاكمة دنشواى .. فسارعت بالرد .. لأ .. يا جدى ده ابنه ..

وانا لن اتحدث عن المثل المصرى القديم الذى يقول " العرق يمد لسابع جد .. واقول لمعالى الوزير الله يرحم جدك !!! وكفاية كده قبل ما اغلط .. الراجل ده بيحلق لنا يا ابو عمر وكفاية نقول له .. ربنا يسامحك ..

تم تعديل 25 فبراير 2008 بواسطة achnaton

[MOOOM]

بصراحة يا استاذ س س موضوع حضرتك مهم جداً جداً .. وفكرني بالاستفزاز بتاع الإعلان الرخم إلي كل ما أشوفو والله بسأل نفسي نفس سؤال حضرتك .. الفلوس دي بتروح فين .. ومين الناس إلي بتدفعها .. ياترى أحمد باشا عز بيدفع زينا بردو .. ولا ده خدماته الجليلة للبلد تعفيه من الضرائب ؟؟؟.. وياترى كل مأروح أشتري أي حاجة أطلب فاتورة من صاحب المحل .. وياسلام بقه لو واحد بيبني بيت يسكن فيه .. وكان بينزل طوب ولا رمل ويقول لصاحب العربية .. [ أديني فاتورة ] علشان يروح راشقوا بقالب طوب في دماغو ..

أنا متهيألي إن الناس ممكن تدفع جميع الضرائب إلي عليها ويمكن بزيادة كمان .. بس عرفونا بتروح فين الفلوس دي .. [ ولا يمكن الحمامات العامة بتاعة رمسيس دي من ضمن دخل الضرائب ] ولما يقولوا بنقدم لكم بيها خدمات .. فين الجديد الحاصل ؟؟؟ مهي الناس سواء دفعت أو أتهربت .. مهي الخدمات زي الـ .... كدة كدة ..

ولما تقرأ خبر يقول إن دخل قناة السويس اليوم حققت أعلى دخل ووصل كام مليون أو حققت كام مليار في السنة .. بردو الفلوس دي بتروح فين وإيه الجديد إلي حصل سواء الدخل زاد أو قًل ؟؟؟؟؟؟؟؟

تعرف يا أستاذي الفاضل .. أنا ليا صديق عندة تجارة في مصر .. وراجل محترم جداً .. بس بيعمل حاجة أنا صراحة شايف أنها كويسة جداً .. الراجل ده عمرو مدفع ضرائب .. وعندو محاسبين بيطلعوه خسران كل سنة .. بس للأمانة الراجل ده بيخرج قيمة مبلغ الضرائب بالكامل للناس المحتاجة .. ده طبعاً غير الزكاة

أنا واحد من الناس لو كنت في مكانة لكنت عملت كدة .. وتتحرق مصلحة الضرائب على المالية .. ويبقى ييجي حد يثبت عليا حاجة

[vipwithyou]

لو نظرنا للعيوب فهى موجودة من عهد محمد على الى الآن وتتزايد

لكن ,,

ما هو الحل

هل نتكلم فقط ..

كلنا نعرف ان البلد خيرها كتييييييييييييييير

كلنا نعرف ان البلد منهوبة

لكن .. وماذا بعد ؟

ابدأ بنفسك فانهها عن غيها .. فاذا انتهت فأنت حكيم

على مر الزمان اذا بدأنا من الآن كل بنفسه

سيأتى يوم تنضف فيه البلد وخيرها يعود لولادها

اللهم ارحمنا جميعا ً .. واحمى مصر ممن ينهبوها واجعلها محروسة دائما ً

[achnaton]

بسم الله الرحمن الرحيم

شوف يا ابو عمر .. نريح شوية من حكايات جدى الشيخ حسن " رحمة الله عليه " ونذكر بالخير حكايات جده .. بطرس باشا نيروز .. كان محبا – قدس الله روحه – للعزيزة مصر .. حريصا على مركزها المالى .. وعندما احتاج الخديو لمال يبعزقه .. قدم معالى الباشا سنة 1909 مشروع قانون انه يمد عقد امتياز قناة السويس لمدة 40 عاما بعد انتهائه 1968 .. لينتهى 2008 مقابل 4 مليون جنيه يدفعها الانجليز على اربعة اقسط .. يعنى السنة دى ( لو كان ده تحقق كان زمان اعلامنا القومى بيرقص طربا لتحقيق العهد الحاضر انهاء امتياز قناة السويس .. والخير حيعم .. وهنيئا للكل ؟؟؟!!! اجدع من الاعلانات اللى مش عاجباك ) والحمد له لم يتحقق غرضه بعد ان فضحه الزعيم محمد فريد فى الجرائد الوطنية .. فاضطر المسئولين الى رفض البيعة .. كان ايامها الباشا حيدخل لخزنة المحروسة 4 مليون جنيه .. رسم امتياز اضافى لاربعين عام .. والخديوى ايامها كان آخر انبساط .. لغاية ما الماوردى شد من تحت رجلين الباشا .. البساط .. مبسوط يا ابو عمر !!!!!

[shawshank]

ده برده خبر ظريف عن ضرايب الفنانين ...

الضرائب تدلع الفنانين بخصم مصروفات الملابس والانتقالات من إيراداتهم

أوشك ملف مشكلات الفنانين مع الضرائب علي الانتهاء مخلفا وراءه عددا كبيرا من حالات التصالح بعد مبادرة مصلحة الضرائب ونقابة الممثلين علي التوصل لنظام محاسبي خاص بالفنانين لمواجهة إغفالهم لإدراج بيانات لصيقة بمزاولة النشاط. وأكد أشرف العربي رئيس مصلحة الضرائب أنه تمت دعوة الفنانين لإبداء مطالبهم من المصلحة وفقا لما يرونه حلا لمشكلاتهم مع الضرائب حيث تم الاتفاق علي وضع نظام محاسبي خاص بهم لخصم تكاليف المظهر وما تتطلبه مهنة الفن بنسبة 10% كوجه عام من الإيرادات. وقال أنه سيتم عرض المذكرة التي قدمها الاتحاد العام للنقابات الفنية علي د.يوسف بطرس غالي وزير المالية لإصدار قرار وزاري بتنظيم كيفية المحاسبة بعد استثناء الطلبات غير المنطقية مثل خصم المصروفات المدرسية لأبناء الفنانين :unsure: وكذلك نفقات العلاج . من جانبه أوضح المحاسب شريف المنير المستشار المالي لاتحاد النقابات الفنية أن النقابة طالبت بخصم المصروفات اللازمة لمباشرة النشاط وتقدر ب10% كوجه عام وتشمل الملابس والانتقالات وأدوات التجميل وما يلحق بها من عطور وأجور مساعدين "اللبيس" مشيرا إلي أن الفنانين دون غيرهم من أصحاب المهن الحرة يتحملون مصروفات تقلل من صافي ربحهم ...

[MOOOM]

بصراحة يا جماعة معندهمش حق .. لأنه بما أن الفنانين هم أكثر طبقات الشعب طحناً .. فالمفروض إنهم يشيلوا من عليهم مصروفات المدارس والعلاج وتعليم أبنائهم .. لأنهم طبعاً [ أبناء ] ناس .. لكن عيالنا احنا ولاد ... بس بالنسبة لنفقات العلاج فدي معندهمش حق فيها .. لأنهم بيتعالجو خارج مصر على حساب الدولة طبعاً .هما نسيو يقترحوا خصم السهرات والحفلات من الأرباح .

يلا .. حسبي الله ونعم الوكيل

المهم .. أنا عندي أحساس يا جماعة .. ياريت حد يقولي رأيو فيه .. وهو ..

أنا حاسس بخصوص الإعلانات عن الضرائب دي .. إن الدولة كأنها بتستعطف الناس علشان تدفع .. تعرف لما يكون واحد عايز ياخد فلوس منك .. بس ملوش عين يكلمك .. والحكومة حست إن الفلوس إلي بتدخل لمأموري الضرائب أكثر من الفلوس التي تدخل للحكومة [ طبعاً معروف السبب ] علشان كدة قالوا وبما أن الشعب المصري شعب عاطفي وسهل أوي يتحط في الجيب .. يبقى الإيد إلي متعرفش تقطعها .. بوسها .. جايز تجيب نتيجة

بس

تم تعديل 27 فبراير 2008 بواسطة MOOOM

[أسد]

الموضوع في غاية الأهمية ....

اولاً ثقافة دفع الضرائب ... يجب ان ترسخ في مصر ....

طبعاً الحملة الإعلانية التي قامت بها وزارة المالية خلال السنتين الأخيرتين ... كانت جيدة في المراحل الأولى ..

ولكنها في النهاية أصبحت سئيلة وليست ذات معنى أو فحوى منطقي ... وكأن القائمين على مصلحة الضرائب وعلى رأسهم وزير المالية مس من البلد دي أساساً ..

موضوع إنك تطلب فاتورة تثبت بها حقك في أنك صرفت فلوس في الشغل طبعاً هذا أمر جاد وضروري أن نتعلمه ....

طبعاً مش لدرجة الحلاق والكلام الفارغ ده ...

ولكن ...

هل هناك من يوافق على إعطاؤك فاتورة عند شراؤك سلعة أو خدمة من عنده .. وأقصد هنا فاتورة صحيحة ... يعني كاملة البيانات مش أي ورقة وخلاص ...

فاتورة مسجل عليها اسم المحل أو الشركة .. ورقم السجل التجاري ورقم البطاقة الضريبية ... الخ ..

طبعاً الناس مابتوافقش ....

يعني الإعلان بتاع تصليح العربية ... مفيش ميكانيكي في مصر حيديك فاتورة .. ممكن تاخد فاتورة في حالة واحدة فقط عن إصلاح سيارتك إذا أصلحتها في التوكيل .. وطبعأً دفعت ضعف الكلفة الطبيعية للإصلاح ...

الكلام شكله حلو ... وشكله صح .... ولكنه يصبح كلام فارغ إذا ما قارنته مع مايحدث على أرض الواقع ...

في مصر .. مفيش كلام من ده .....

أما حكاية الموظفة إللي في السنترال .. فبصراحة ردها كان فيه سرعة بديهة أضحكتني ...

طبعًا هي تحديداً لا تاخذ مرتبها من الضرائب .. ولكنها بتاخد مرتبها من قيمة الفواتير التي ندفعها ....

فالشركة المصرية للإتصالات .. هي شركة مساهمة يتداول أسهمها في البورصة ... صحيح الأغلبية ملكيتها للدولة .. ولكن لازم يتعاملوا مع المواطن المستفيد كزبون ... ويقدمون له أفضل خدمة متاحة....

وعلى كل الأحوال .. فيه شركة جديدة حتدخل السوق .. يبقوا يورونا حيعملوا ايه في المنافسة ...

وعودة إلى موضوع الضرائب ...

الضرائب في مصر بها نسبة تهرب ضريبي عالي جداً ... من الكبار .. والصغار أيضاً ..

ولنا أن نتخيل أن النسبة العظمى للمحلات التي نراها في شوارعنا .. ليس لهم أصلاً تراخيص أو بطاقات ضريبية ... وبالتالي لا يدفعون ضرائب من الأساس ..

أقصد المحلات التي في كل شوارع مصر .. منها الشعبية .. والعشوائية .. والثرية أيضاً ..

فلا أحد يحصل على التراخيص اللازمة لفتح محل أو منشأة تجارية أو خدمية .. نظراً لصعوبة الإجراءات .. ولا يقوم بهذا الأمر إلا من كان مضطراً إلى ذلك ... إضطراراً شديداً ...

وليس بالإعلانات يتم معالجة الأمر .. أقصد ليس بالإعلان وحده ..

وبالقطع يجب أن يكون القانون صارم في هذا الشأن .. وهو بالفعل صارم ..

ويجب أن يتم إفهام الناس أن من يخالف سيعاقب عقوبة كبيرة بالسجن والغرامة .. ولكن ليس بالأسلوب الفج بتاع حنجيبك يعني حنجيبك ..

يعني مش كل حاجة ينفع فيها الهزار .. والظرف .. وخفة الدم والاستهبال ..

[shawshank]

الكلام شكله حلو ... وشكله صح .... ولكنه يصبح كلام فارغ إذا ما قارنته مع مايحدث على أرض الواقع ...

تمام ... الكلام شكله حلو وصح ، لكن في وسط نظام مفيهوش حاجة صح :blush2:

يعني نظام مصر بشكل عام لا يسير وفق منطق أو عقل أو قانون . فجأة عايزين أحد مكونات هذا النظام يمشي صح وفق منطق وعقل وقانون . مش هنيفع إلا إذا كانت بقية المكونات ماشية صح . ولا أعتقد أن أول المكونات المطلوب تصحيحها هي الشفافية في دفع الضرائب .

[lefilsdunil]

أه شوفت الاعلان على الفضائية فى برنامج البيت بيتهم أمبارح بصراحة موضوع الفواتير مهم ومفيد بس مصر مش جاهزه ليه نفس فكرة النووى كده ؟! هم لازم يشتغلوا على القاعده الاول لان فكرة الضرايب فى اى دولة مبنية على الثقه ويوروا الناس فلوس الضرايب بتروح فين وبتتصرف على ايه وأيه فايدتها بعد كده الفواتير والضرايب امرها سهل جدا بس انك تكون راجل مفوتر ده مش عيب أبدا حتى مع الحلاق لان ده بيحصل فى فرنسا مثلا بس العملية كلها مميكنة اى محل فى كيس تدفع وتاخد ورقه صغيره هى دى الفاتورة وتفضل بأة تجمع فى الورق ده من اول الشهر لاخره لحد علبة الاربيسك المزخرفة ما تتملى ورق وأخر الشهر واللى بيحصل تمأأ عينك على النت وجنبك العلبة وتراجع حسابك البنكى فاتورة فاتوره اليورو ده بتاع ايه الخمسين سنت دولت مش فاكرهم لحد ما تعدل معاك فى الأخر الميزه ان انك بتعرف انت بتصرف أيه بالظبط كل شهر ومتوسطك وتظبط بأه نفسك فى الشهر اللى جاى وهكذا

تم تعديل 27 فبراير 2008 بواسطة lefilsdunil

[achnaton]

بسم الله الرحمن الرحيم

بعد ان اصبح معالى الوزير نجما فى مختلف القنوات التلفزيونية .. ومساء اليوم كان ضيفا على برنامج البيت بيتهم ونفع البرنامج بثلاثة اعلانات .. معالى الوزير شرح واللى قاله من بداية المشوار عاد ليقوله لنا .. واود هنا ان اوضح لمعاليه ان حكاية حصر العقارات بل والاراضى الزراعية ده نظام تعرفه مصر من ايام محمد على

وحتى لا نبعد كثيرا نقول الحال كان ازاى ايام الملك فاروق .. ( الملك الفاسد زى ما بيقول المماليك ) كان عندنا فى المدن والقرى واحد اسمه " الصراف " او " الصريف " وحسب مساحة القرية او المدينة كان عدد الصيارفه وكانت المديرية ( المحافظة حالية ) تستأجر لهم محل وتؤسسه مكتبا مناسبا .. وبدولاب هذا المكتب دفاتر 50X70 .. يطلقون عليها اسم القائمه وكانت تضم اسماء اصحاب العقار ولو عشة او ارض فضاء .. ووصف كامل والعوائد المقرره عليه - آى الضريبة العقارية .. وكان هذا السجل او بمعنى زمان " القائمة " يحرره او يسجل بياناته الصراف افندى ويساعده شيخ الحارة وشيخ البلد .. ويستعينون باخطارات " البلدية " الوقت المجلس المحلى القسم الهندسى عندما يعطى للمالك رخصة بناء او تطوير .. وعادة ما تكون معلومة شيخ الحاره اصدق واهم .. وفى مواسم معينة كان الصراف يهم همه رجال لتحصيل العوائد بمعنى انه كان يشغل نفسه بتصحيح بيانات القوائم قبل الاعياد ودخول المدارس ويسمع لرغبة شيخ الحارة لتأجيل التحصيل من فلان او علان عشان بيجوز ابنه اوابنته .. ولكن كان هناك موعد لتقفيل تحصيل العام يلتزم به الجميع .. والجميل فى هذا النظام ان شيخ الحارة وشيخ البلد كانا من الشخصيات المحببه للمواطنين وللآسف مماليك عبد الناصر عسكروهم واستبدلو شيخ الحارة بمخبر اطلقوا عليه مندوب الشياخة .. وباظت والحمد لله مثل باقى المرافق وفى اختصار ما يردده معالى الوزير دى حاجة موجوده ولكن شابها عيب كبير منذ ايام العهد الناصرى وظلت هذه القوائم قائمه .. وبقوم بتعديلها موظفين الجباية يذهب الواحد منهم تحت العقار ويشوف حلاق او جزمجى ياخد منه المعلومات ولذلك تجد معلومات تلك القوائم ليست معصومه عن الخطأ وعادة ما تكون ملفقة ..

ولك خطوة معالى الوزير فى انشاء بطاقة شخصية لكل عفار خطوه مشكورة .. وحتى يتم حصر تلك العقارات بالصورة الصحيحة فى غياب امثال شيخ الحارة وشيخ البلد امر سياخذ وقتا طويلا ويبقى يقابلنى معالى الوزير اذا حصل مليم ..

وغدا نتكلم عن الفاتورة وحكايتها ان شاء الله

[ابتسامة رضا]

اظبطك ولا افوترك

كانت الكلمة فى البداية غريبة على وداننا

يعنى ايه؟؟

المفهوم مش واضح

وبعدين عرفنا عن قانون الضرايب الجديد

وعن العلاقه الجديده بين العميل وبين مصلحة الضرايب

وبقى الاساس بينهم زى مابيقولو

الثقة

يعنى العميل هو اللى بيكتب اقراره الضريبى والمصلحى بتصدقه

الى ان يثبت العكس

وطلعوا علينا بحمله اعلانات رهيبه وكبيره جدا

لدرجه ان الناس بقو بيستمتعوا وهما بيتفرجوا على الاعلانات دى

ومستنيين يشوفو الراجل الطيب اللى مش قابل خالص انه يتظبط

وقرر انه من هنا ورايح

لابد يتوفتر

كانت الفكره انهم فى البدايه

مش طايلين حاجه خاااااااااااااا لص من اى حد

حتى اللى بيقفشوه متهرب

القضيه بتقعد سنين فى المحاكم ومابتنتهيش

ففكروا بالعقل وقالوا اللى ييجى من الشعب فايدة

مهو لازم............

ومن ساعتها بقو مش سايبين حد فى حاله

والمواطن

بقى مرعوووووووووووووب

وكل الناس بقم خايفين

مهو انت لازم تقدم اقرارك الضريبى

مش مهم على ايه

بس لازم تقدم

يإما كلبوش على رأى الراجل الطيب بتاع الاعلانات

وبقى كل واحد يقابل التانى يقوله

انت وقعتك سووووودة

وكل واحد لازم يدفع

وحتى اصحاب الحرف مش سايبينهم فى حالهم

يعنى سابو الحيتان الكبار

وجايين على الكوافير والميكانيكى

بالله عليك انا لو رحت للميكانيكى ولا الكوافير

وقلتله عاوز فاتوره هيعمل ايه معايا؟؟؟

حتى اخر اشاعه سمعت انهم حتى مش سايبين العفاريت فى حالهم

وعاوزين منهم ضريبة

حتى الراجل الطيب بتاع الاعلانات اللى ياعينى

طالع يتفوتر

نازل يتفوتر

عشان خاطرهم ...ماسابوهوش فى حاله

عشان يقولولنا ان كل الشعب فى التظبيط سواء

طيب وبعدين

اجى اطلب فتوره من حد

يقولى تدفع 10 % زياده

ليه ياعم

يقولى ضرايب

ياسلاااااااااااام

طيب هى مش الضرايب دى بتتحسب من صافى الربح بتاعك؟؟

يقولى هو كده اذا كان عاجبك

طيب وبعيدين

ادفع ال10%

ولا اشتكيه وهو ياعينى راجل غلبان ومش ناقص

ولا اساسا ماشتريش حاجه

لانى طبيعى ماعييش اساسا فلوس اشترى بيها

عاوزين نعرف رأيكم فى الموضوع

ياترى انت مقتنع بموضوع الضرايب دى واهميتها ؟؟

طيب تفتكر ان انت هاتلتزم بدفع ضريبك

زى ما الكتاب بيقول

ولا هاتظبطها قبل ماتظبطهم بفلوسك؟؟

طيب تفتكر ان المفروض كل الناس تدفع ضرايب؟

لو لا يبقى مين اللى يدفع؟؟؟؟

ولو اه يبقى ازاى تفرق بين الغنى واللى فاتح مكان يادوب

بيكفيه عيش حاااااف؟

لو رحت تشترى حاجه وصاحب المحل قالك

تدفع 10% هاتعمل ايه من الاختيارات اللى قلناها

والاهم من ده وده هل حاسس ان الفلوس اللى هتدفعها ضريبة دى هترجعلك خدمات

ولا راحها لاصحاب نصيبها

منقووووووووووووووووووووووووووووووووووووووووووووووووووووووول

الموضوع مطروح لارائكم

تم تعديل 29 مارس 2008 بواسطة ابتسامة رضا

[شموع]

الحقيقة موضوع الاعلانات ده استفزازي جدا بالنسبة لي وعموما انا هرد على اخر سؤال بس عشان اعتقد انه بديهي بيدي الرد على سابق اسئلتك .

عن نفسي لا اثق ان الفلوس اللي هتندفع دي هتحسن او تعمل اي خدمات :wub: .

وسؤالي انا بأه .

هل الاعلانات دي بتتعمل ببلاش ؟؟!! :)