اتكلمنا كتير قوي ........... حد يقولي اخره الكلام ايه

[Ghost]

انا هنا اتكلم عن احساسي الخاص و اعلم ان هناك الكثيرون يشاركونني هذا الاحساس

لا اتكلم عن اعضاء منتدي محاورات المصرين بخصوصيه

لكن اتكلم عن عموم الناس و الشباب و انا واحد منهم

تناول الكثيرون في المنتديات و المدونات و المواقع الشخصيه الكثير من القضايا التي يصلح ان يطلق عليها قضايا رأي عام

تناولتها الاقلام و الالسن في الصحافة و الاعلام بكل اشكاله و انواعة

ثم ماذا

ما فائده الحوار اذا كان الطرف الاخر هو صاحب القرار دائما و قد يكون القرار مبيتا سلفا و يكون الحوار و النقاش لاظهار ان هناك حوار

انا فعلا اصابتني حالة من عدم احتمال فتح الاخبار و سماع ما يجري فيها ,,, يعني قرفت بجد

الاخبار المعتاده عن قتلى و جرحى في تفجيرات بالعراق و اعتداء اسرائيلي على .....

و زياره للسيد الرئيس او محادثات تناولت العلاقات الثنائيه بين البلدين و .... الخ

الاخبار من قبيل الغلاء و الفساد و المظاهرات و احباط محاوله لمتطرفين حاولوا ........الخ

و اخبار زي مجلس الشعب اللي غاب فيه المعارضة و الاخوان احتجاجا على منع عضو من المجلس كشف تجاوزات ضباط الداخليه

و راح النواب الوطنيون - و هم و الله ما عندهم وطنيه و لا حتى المروءة و الرجوله - عدلوا 19 ماده في نصف ساعة عملوا فيها كل اللي هم عاوزينوه .....

انا فعلا بسأل طب ايه لازمه الكلام من الاصل و وجع الدماغ ما دام النقاش و الحوار ما لوش اي نتيجة

ايه لازمه الاخوان - و انا أحيي لهم مواقفهم النضاليه الكثيرة بالرغم من اختلافي معهم- يدخلوا المجلس و المحليات و يتبهدلوا و ما فيش امل ظاهر

ايه لازم الكلام و النقاش في المنتدى زي المحاورات و احنا ما اخدنا غير تبادل الحلول و الردود على المستوى الشخصي ثم مصمصة الشفياف و الحوقله و الدعاء باصلاح الحال

حد يقولي اخره الكلام ايه

[se_ Elsyed]

حد يقولي اخره الكلام ايه

للاسف الشديد يا جوست اللي المفروض يسأل السؤال ده هو الطرف الاخر عشان ييأسنا ويحرمنا من الأمل

فحتى إذا كان لا يستجيب .. فيجب ألا نتوقف عن الكلام

لإن الكلام بالنسبة لنا كضربات المطارق على رأسه ... إذا لم تحقق هدفها .. فهي على الأقل تقض مضجعه

وهو يتمنى في كل لحظه ان نيأس ونكف عن الكلام

عارف يا جوست .. إحنا المفروض .. ده المفروض يعني .. نتعلم من القرآن .. بالذات قيمة الكلمة

تعرف إن سيدنا نوح قعد يتكلم ومتمسك بكلمته والطرف الأخر لا يسمع له .. لمدة كام سنة ؟

950 سنة بيكلم نفس الناس كل ييوم وكل ساعة وعن نفس الموضوع

وياريت بعد ده كله سمعوا كلمته - بالمناسبة ما كانش في بني أدمين على الأرض كلها غير اللي مع سيدنا نوح لإنه كان في بداية الخلق .. لذا يُقال عليه أبو البشر الثاني بعد سيدنا ادم وعشان كده ربنا قال " إنا لما طغا الماء حملناكم في الجارية " يعني إحناأنا وغنت وهو وهي كنا هناك على لاسفينة في صورة اجدادنا وأباءنا اللي إحنا من نسلهم وكانت هاتبقى النتيجة هايلة ومُرضية لو كانوا امنوا له .. لكن مع ذلك وبعد ألف سنة إلا شويه أمن معه 80 شخصاً كما يقول إبن عباس وهو عدد مُحبط للغاية وييأس أي حد

ومع ذلك لما ييأس وبدأ الأرض والبشر اللي بالمليارات اللي إنت شايفهم دول بهؤلاء الثمانين وأستمر بعدها سنوات كثيرة جداً متمسكاً بكلمته .

عارف لو الناس لا تتمسك بكلامها وتؤمن به ؟ .. ما كانش الصهاينة يبقى عندهم النفس الطويل ده والتمسك بكلمتهم وحلمهم لألاف السنين عشان يبقى لهم وطن ... وقد تحقق ذلك سنة 1971 في وعد بلفور .. حتى لو كانت الكلمة دي باطلة وتقوم على إغتصاب الأرض ...

إنت شايف الأحوال اللي إحنا فيها دي ؟

كانت هاتبقى أسوء من ذلك لو ما كانش في ناس بتتكلم

وكان مبارك ما غصبش على نفسه وصحته لحد ما بقى عنده 80 سنة دلوقت وهايبدأ الـ 81 بعد شهرين .. وكان زمانه مورثها لإبنه وخلصنا ... بس الناس بتتكلم وتقول لأ ...

الخلاصة : لا تتوقع رد فعل لحظي او فوري لكلامك ... لكن أصبر وتمسك بكلمتك وكل شيء له آوان وما ضاع حق وراءه مُطالب .

[Ghost]

الخلاصة : لا تتوقع رد فعل لحظي او فوري لكلامك ... لكن أصبر وتمسك بكلمتك وكل شيء له آوان وما ضاع حق وراءه مُطالب .

و الله يا سي السيد انت هونت عليا بقصة سيدنا نوح و بكلماك

انا فعلا وصلت لمرحله اكتئاب و حزن على حال البلد و مش عاوز اتكلم و لا اسمع تاني و شويه الحزن يروح و انسى و شويه يكون متمكن مني تماما

الصبر مطلوب زي ما بتقول

الحق مش هيضيع حتى لو الاجيال التانيه هي اللي هتشوفة

و الواحد نفسة يشوف الحال معدول و مستعجل عاوز يشوف شويه من الحق دوه

الله المستعان

[shawshank]

... وقد تحقق ذلك سنة 1971 في وعد بلفور ...

سي السيد ... عشان بس التاريخ والأجيال الحالية والأجيال اللي جاية :unsure:

تصحيح غلطة مطبعية : وعد بلفور كان سنة 1917 .

[~Heba~]

و الله عندك حق و فيه حكمة جميلة اوى بتقول ان كنت ذا رأى فكن ذا عزيمة فإن فساد الراى ان تترددا

[vipwithyou]

فضفض يا راجل يمكن يوم كلنا نفضفض فى نفس واحد وكل الهم ينزاح من على قلبنا

[Ghost]

سي السيد ... عشان بس التاريخ والأجيال الحالية والأجيال اللي جاية

تصحيح غلطة مطبعية : وعد بلفور كان سنة 1917 .

قفشة منك ظريفة بس هي سرعة الكتابه بتعمل كده ساعات

ان كنت ذا رأى فكن ذا عزيمة فإن فساد الراى ان تترددا

شكرا على هذا البيت الجميل

الواحد فعلا محتاج الصبر في كل شئون حياته

في البيت و في العمل و في الشارع و عند الجلوس على النت و قراءه الاخبار الي تغم

ربنا يعنا بالصبر و الاحتمال لان للاسف الواحد عاوز كل حاجة بسرعة

تم تعديل 27 فبراير 2008 بواسطة Ghost

[Nina Hussien]

أنا بتكلم علشان 3 أسباب،

1- أن من رأى منكم منكرا فليغيره بيده فإن لم يستطع فبلسانه " و طالما عندي لسان فأتكلم يمكن في يوم من الأيام يفيد أي حد بأي حاجة

2- أفضفض قبل ما أطق من جنابي و لا يجيلي نقطة من القهر و الغيظ

3- لو علمنا جيل يتكلم من غير ما يخاف يمكن هو يعلم جيل يعمل من غير ما يخاف و مافيش حاجة بعيد عن ربنا :lol:

[لؤلؤة]

هو أخرة الكلام كلام بردة

و الكلام اللي بعدة بردة اخرة كلام

ومفيش حاجة حتتغير غير لما فين ناس حتقول أحنا مش حنتكلم احنا حنغير

نقعد نستني الناس دول لما ييجوا

يمكن لسة متولدوش لغاية دلوقتي

اما الكلام فدة مفيد لينا جدا

بدل ما ننفجر من الأحوال اللي شايفنها

وندعي

نقول يا رب ييجي الناس دول أن شاء االله بعد 100 سنة بعد 500 سنة

بس يبقي فيه أمل

[Ghost]

وندعي

نقول يا رب ييجي الناس دول أن شاء االله بعد 100 سنة بعد 500 سنة

يا رب يا لؤلؤه يا يارب

بس باين اليوم ده مش معاده خالص

و الي يشوف التاريح يقول ان التغير يكون على مستوى القرون

تروح دولة و تيجي اخري

بس القرون اللي احنا عايشنها بقلها كتير و شكلها كده مكتوبه علينا

[ابو جيداء]

الحرية الممنوحة فى عالمنا العربى حرية كلامية فقط

فى مصر تكلم كيف شأت وأنتقد ماتشاء

لكن لاتنتظر ان يكون لكلامك صدى

فأولى الأمر لديهم قناعة بأن المصريين لم ينضجوا سياسيا

وقد اعترف بذلك احمد نظيف فى احد اللقاءآت مع الجمعيات الحقوقية

فى الولايات المتحدة . ونسى ان المصريين سعد زغلول .. واحمد عرابى

وجمال عبد الناصر .. والسادات .. واسماء كثيرة محفورة فى جدار الزمن

من وقت ان كان يعيش العالم فى الغابات والصحارى كانت مصر دولة ترفع

راياتها ولكن لسيادتة رأى آخر ..

[freemind]

وندعي

نقول يا رب ييجي الناس دول أن شاء االله بعد 100 سنة بعد 500 سنة

يا رب يا لؤلؤه يا يارب

بس باين اليوم ده مش معاده خالص

و الي يشوف التاريح يقول ان التغير يكون على مستوى القرون

تروح دولة و تيجي اخري

بس القرون اللي احنا عايشنها بقلها كتير و شكلها كده مكتوبه علينا

الزميل جوست لقد طرحت سؤالا مهما و لكن الاجابه لن تكون بالسهله و لكن اعلم انه كلما زاد عدد الافراد الذين يريدون ان يغيروا مجتمعهم تغييرا للافضل و زادت جهودهم فى فعل ذلك تقلص الزمن اللازم للنهضة و لكن اعلم ان بدون تحويل الاقوال الى افعال فلن يحدث شيىء و انا هنا لا اريد من الشعوب العربيه ان تحمل العصى و تهجم على حكوماتها لتغييرها و لكنى اقصد بالافعال ان يغير كل منا ما بنفسه فمن يكذب يتوقف عن الكذب و من لا يخلص فى العمل يحاول ان يتقن عمله و اولا و قبل كل شىء ان نغير من طريقة تفكيرنا لتصبح ايجابية و صالحة لهذا العصر بدلا من ان نعيش فى امجاد الماضى .

لا تياس فاليأس لن يفيد و اذا كان الوضع حاليا صعب فاعلم ان التغيير سنه الحياه و الواقع لن يظل هكذا الى الابد و اقرأ التاريخ و سوف تاخذ منه العظه .

لقد تقدمت جميع الدول المتقدمه عبر مراحل كان اولها تغيير الفكر العتيق و احلال فكر متطور يناسب العصر و لا تنسى ان اوروبا كانت ترزح فى عصور الظلام لقرابه تسع قرون و الان هم كما تعرف متقدمون .

المهم ان لا ندفن رؤسنا فى الرمال و ان نعترف ان فى الاربع قرون الماضيه قد تغلغلت الينا سلبيات كثيرة تتعلق بطرائقنا فى التفكير و بدايه حل اى معضله ان نعترف بوجودها اولا ثم نبحث بموضوعية بعيدة عن العصبيه و الانفعال عن الاسباب الحقيقيه الجذرية لهذا المرض و نحاول ان نعالجه و لا نجعل غرورنا يمنعنا من الاستفاده من كل ما سبقونا من الدول الاخرى بحجه انهم مختلفين عنا فى العقيدة لان التفوق ليس له عقيدة ، نعم يجب ان نتعلم من المتفوقين لماذا تفوقوا و نترك الفاشلين بافكارهم المتحفيه ينقرضوا بعيدا عنا .

[ابو محمود]

أخى جوست صباح الخير ...

اذا امنا ان الحياة بيد اللة

أن الرزق يملكة اللة

وان الموت سوف يأتى فى النهاية

وان ما ينتظرنا خير مما نحن فية

سنتحرر من عبودية الطاغوط وسنكشر عن انيابنا ونعمل ونجتهد لكى نعلى أمتنا بالعلم والصناعة لأننا نأخذ بالأسباب كما فعل اسلافنا العظام فهل من سبيل