تعويم الجنيه ماذا يعنى؟

[MuslimaEgyptian]

معلش عارفه إن الموضوع ده صعب علينا حبتين...ولكن نفسى أعرف يعنى إيه "تعويم الجنيه"....هل معناه ان مستواه نزل جدا لدرجه انه بقى بيعوم بدل ما يمشى؟؟؟ ولا التعويم ده مصطلح فى علم الاقتصاد...ولا إيه؟

هممم...متهيألى ان حد شرح دى قبل كده بس مش لقياها فين...أفيدونى أفادكم الله...

[Lancelot]

مسلمة إيجيبشان .... شكرا علي إنك فتحتي الموضوع الجميل ده ... و إنك أعدتي تنشيطه ... لأني جديد هنا نسبيا و ما شفتوش قبل كده .....

تعويم الجنيه ... الموضوع كبير شوية و معلوماتي فيه معلومات واحد غاوي قراءة مش متخصص.....

شوفي يا ستي.... في البداية كانت الحكومة تقوم بتحديد سعر صرف الجنيه أمام العملات الأجنبية ... و سعر الصرف هو سعر العملة الوطنية أمام العملات الأجنبية ... يعني لما أحول من مصري لأمريكاني يبقي السعر كام ... و تحديد سعر الصرف من قبل الحكومة يتم لأسباب من ضمنها الحفاظ علي هيبة الجنيه و كرامته و الحفاظ علي توازن الإقتصاد .... و لكن الحكومة برضه محكومة بالسوق .... و السوق هنا هي السوق السودا .... الحكومة بتقوم بتصريف الدولارت عن طريق البنوك ... و لأن السعر في البنك بيكون قليل لأنه سعر الحكومة ... بتكون الكمية اللي البنك بيعرضها قليلة علشان ما يخسرش كتير .... و لما تلاقي مفيش دولارات في البنك تروحي تدوري علي دولارات في أي حتة .... أي حتة ديه هي السوق السودا .... أنا معايا شوية دولارات و عايز أغيرها و إنتي عايزة دولارات ... أقوم أنا أقولك خدي الدولارات لكن بسعر أغلي من البنك شوية ... ماهو أنا عايز أستفيد .... و تبدأ العملية كده ... و ألاقي إن غيري بيبيع بسعر أعلي مني أقوم أنا معلي لسعره ... و النتيجة يوصل السعر لأعلي من البنوك بكتير شوية إتنين حسب التساهيل و فيه أد إيه دولارات في البلد و كده .....

تقوم الحكومة علشان تقضي علي السوق السودا .... و علشان تدي للجنيه سعره الحقيقي بصرف النظر عن هيبته و نعرته الكدابة .... تقوم "تعوم" سعر الصرف ... يعني بدل ما تحدده و تقول الدولار النهارده بشلن .. لا تسيبها سداح مداح .... و السوق هو اللي يحدد .... زي الطماطم مثلا يوم تلاقيها غالية نار و يوم برخص التراب .... ليه علشان العرض و الطلب .... يوم تكون الطماطم (الدولار في حالتنا) شاحة من السوق و مش موجودة ... يقوم التجار يغالوا سعرها علشان عليها طلب و عرضها قليل ... و يوم تاني العكس ....

[Lancelot]

طيب إحنا إستفادنا إيه من الموضوع ده ....

أولا نوصل للسعر الحقيقي للدولار .... يعني مفيش لازمة للنعرة الكدابة و إن إحنا نضحك علي نفسنا ...

تانيا نوصل لإستقرار في سعر الصرف ... لما نعوم الجنيه هتحصل هوجة و الدولار يغلي فجأة و يطلع و ينزل شويتين كده و بعدين يوصل للإستقرار و التغييرات بعد كده تتوقف علي التغييرات الإقتصادية .... و لما يستقر سعر الصرف الإستثمار يتحسن ... إزاي ... واحد مستثمر أجنبي جاي مصر يعمل مشروع عمل دراساته إن المشروع هيكسب مليون دولار .... جه بدأ المشروع و بدأ الربح و فجأة الحكومة قررت خفض قيمة الجنيه .... يبقي المليون دولار بقت تلات أرباع فقط ... و الحسابات باظت و المشروع خسر ......

ثالثا .... إعطاء ميزة تنافسية للمنتجات الوطنية في الأسواق الأجنبية .... لأن المنتج اللي بمئة جنيه بدل ما هو بعشرة دولار أصبح بخمسة دولار فقط .... و الكلام ده لا ينطبق تماما في حالة مصر لأن منتجتنا تعتمد علي مكون أجنبي يتم إستيراده أو علي الأقل ألات يتم جلبها من الخارج ....

رابعا القضاء علي السوق السودا .... و إعطاء مزيد من الرقابة علي الأسواق بجعلها أسواق قانونية ...

خامسا نكسب نقطة عند الأوروببيين و الأمريكان إن إحنا ناس بتوع سوق حر و مش إشتراكيين و لا دياولوه...

خامسا تقليل الصادرات من السلع الزائدة عن الحاجة لأن الناس هتلاقي إن السلع غالية علي الفاضي و مالهاش لازمة ..... يعني لما الأكل بتاع الكلب بتاعي يغلي أقوم أنا دابح الكلب و أتغدي بيه أحسن ...

كويس أوي لكن الموضوع ما يصحش نسيبه كده علي الغارب للناس .... لازم الحكومة تعمل حاجة علشان تظبط الأسعار علشان الجنيه حاله ما يدهورش ... تقوم الحكومة تضخ مبالغ كبيرة من إحتياطي النقد الأجنبي علشان يغطي حاجة السوق و يستقر السعر عند حد معقول و يحصل توازن ......

القرار كان جاي جاي ... إحنا داخلين علي شراكة مع أوروبا و مش معقول أوروبا هترضي بتحديد سعر الصرف .... لكن اللي عاب القرار فعلا هو التوقيت .... لأن إحنا في حالة ركود و داخلين علي حرب و قبل موسم حج يعني طلب كبير علي الدولار و ده مش كويس للجنيه لأن سعره هينزل تأثرا بالعوامل ديه .... كان المفروض إن التوقيت يكون أحسن من كده ....

ده بالنسبة التعويم .... أما تحرير الجنيه .... و ليس تحرير سعره .... فهو حرية تدوال العملة خارج البلاد ... الواحد ما ينفعش يخرج غير ألف جنيه فقط معاه و هو مسافر .... يخرج ألف جنيه يعني ياخد جينهات معاه ... لأن الجنيه غير محرر ... علي عكس الدولار اللي بيتلاقيه هنا في مصر عادي .... يعني بره أمريكا .....

ده اللي أنا أعرفه من خلال قراءاتي و متابعتي للأحداث ... و ياريت الأخوة المتخصصين يصححوا أي حاجة غلط علشان محدش ياخد معلومة غلط ......

[MuslimaEgyptian]

جزاك الله خيرا يا أخ lanclot من غير e :D

بصراحه مكنتش متوقعه رد وافى كده ..ده ولا رساله دكتوراه فى الاقتصاد ما شاء الله :D :D

بس اللى فهمته من كلامك هو ان الحكومه على كده هى اللى جعلت الوضع كذلك بالنسبه لحال الجنيه...ولكن كنت أحسب ان الحال كده لأنها مش فاهمه هى بتعمل إيه وتمشى بالبركه بدون خطه، زائد ان الاقتصاد صعب الآن وذلك تلقائيا نزل قيمه الجنيه، الى جانب ان تقدم الدولار واليورو طبيعى هيفوق الجنيه وخصوصا اننا مبقيناش نورد حاجه بره ، الخ..

وبحسب السوق السوده دى حاجه موجوده فى كل حته ووقت بغض النظر عن قيمه العمله...

متهيألى حان وقت الاعتراف إنى مفهمتش ولا حاجه :lol: وخصوصا

علاقه الجنيه بالسباحه والعوم...همممم...

معلش يا أخ لانس، دى غلطه فهمى مش شرحك وجهدك المشكور جدا..

[Lancelot]

يا ست مسلمة إيجيبشان .... سامحيني علي الـ e .... أصلها تعبتني و الدكتور قال لازم تتشال ... يا دوك بس ما ينفعش شكلي هيبقي وحش في المنتدي ... مفيش فايدة ... أعمل إيه ... شلتها ...

شوفي حضرتك .... الحكومة مش قصدها طبعا إنها تنزل من سعر صرف الجنيه ... لكن نزول السعر ده كان متوقع و طبيعي .. بصي لحال الإقتصاد و إنتي تعرفي ليه ... و لو الإقتصاد إتحسن ممكن سعر الجنيه يتحسن و ممكن لا حسب الطلب عليه ....

تعاملي مع الدولار علي أنه سلعة لو الناس طلبتها بكترة ... سعرها هيزيد .... الفرق إن سعرها هيزيد أمام العملة اللي بيزيد الطلب منها .... مثال الدولار نزل أمام اليورو في الفترة اللي فاتت ... لكنه لم ينزل أمام الجنيه لأن الناس بتحول من دولار ليورو ... علشان كده اليورو بيغلي أمام الدولار .... يعني السعر بيتغير حسب قاعدة العرض و الطلب زي السلع العادية ... لكن الفرق هو إن الزيادة بتكون نسبية بين كل عملتين ......

لوسمحتي يا أخت مسلمة ... أعيدي قراءة الشرح و أنا تحت أمرك في أي جزء عايز تبسيط ....في حدود معرفتي...

و يا شباب ............... أفيدونا .....

[se_ Elsyed]

معليش سيبلي الطالعة دى يا لانسلوت ،

- تعويم الجنية القصد منه ان احنا نسيبه يواجه مصيره فى السوق الاقتصادية المطلاطمة الامواج واللى لازم الواحد فيها يبقى قوي علشان يقدر يواجه هذه الامواج ، والعملة تبقى قوية إزاى إلا إذا كانت الحكومة عندها سياسات واضحة للتصدير والإنتاج وذلك يؤدي لزيادة الطلب على عملتها ، وحيث اننا ماعندناش لا تصدير ولا إنتاج .

فقد لجات الحكومة منذ زمن طويل الى تحديد سعر الصرف وليكن على سبيل المثال زى ما قعد عدة سنوات الدولار = 3.40 جنية ، لكن ده ماكنش سعره الحقيقي لذلك كانت الدولة بتدفع الفرق بين السعر المحدد والسعر الحقيقي اللى كان من المفترض لو كان فيه تعويم ده من ميزانيتها أو من جيبها ( اللى هو جيبنه ) وذلك منعاً لمشاكل إرتفاع الأسعار نتيجة تدهور العملة وبالتالي الناس هاتشتكي وتطلب زيادة مرتبات والديون اللى على الدولة تزيدر و و و و و و و و و أبواب جهنم هاتتفتح على الحكومة والمستخبي يبان وكل العالم يشهد على فشلهم.

طيب هما عملوا كده ليه دلوقت ؟ لأن سياسات 20 سنة فاتوا أبتدت تؤتي ثمارها ( الحنضل طبعاً ) والوضع خرج عن سيطرتهم فكان لازم يحصل كده .

[Lancelot]

حلوة أوي الطلعة ديه يا سي السيد....

لكن دعني أقول إن سعر العملة مش مقياس لنجاح إقتصاد أي دولة .... يعني مش علشان دولة عملتها غالية يبقي إقتصادها قوي .. يعني مثلا اليابان ... عملتها الين ... و لكن إحنا بنتعامل بالمئة ين علي طول لأن الين مش بيساوي حاجة ... و كذلك إيطاليا و الليرة ... قبل اليورو طبعا ..... الإقتصاد قوته يتم قياسها بحاجات تانية ... مش عارف إيه بالضبط ... أنا مش خبير إقتصادي ... لكن ممكن أخمن ... مثلا تحمله للأزمات الطارئة .... الميزان التجاري يعني الدولة بتصدر أد إيه و بتستورد أد إيه ... إحنا مثلا بنصدر بحوالي 6 مليار و بنستورد بـ 12 .... يعني الضعف ... لكن بنجيب الباقي منين ... السياحة .. قناة السويس ... تحويلات المصريين من الخارج اللي كانت في يوم من الأيام بتساوي 8 مليار دولار ..... الحاجات ديه لا تدخل ضمن الميزان التجاري ... لكن بتعمل توازن في الطلب علي النقد الأجنبي ... يعني لو يوم تأخر أهل السياحة في توريد حصيلتهم من الدولارات للبنوك ... تلاقي الدولار ينط نطتين فوق ....

القرار – من وجهة نظري – كويس و كان لازم يجي ... ده مش حل لأي مشكلة ... لكنه تحول من الإقتصاد الموجه للإقتصاد الحر و من المركزية لللا مركزية و من حاجات كتير لحاجات كتير ...... و ده لازم يحصل النهارده أو/قبل بكره .... القرار طبعا كان لازم يكون فيه حاجة غلط و إلا ميكونش طالع من الحكومة و هي التوقيت و أنا ذكرت قبل كده ليه .....

حاجة كمان مهمة و هي إن ده لوحده مش كفاية ... و ده مش هيحل مشاكلنا و لا حاجة إلا إذا جه معاه سلسلة من القرارات الأخري ... منها إن الجنيه يربط بسلة عملات و ليس بالدولار فقط .... و ياريت حد يشرح لنا إيه معني ده لأن كل اللي أعرف عنه إنه أحسن من الوضع الحالي مع الدولار فقط .....

[Lancelot]

الحاجة اللي تجنن ... ليه الأسعار نطت فجأة كده ... كل حاجة غليت علي حس الدولار ... و ده غير مبرر ... أنا إتفرجت علي حمدي قنديل في رئيس التحرير يوم الإتنين اللي فات و كان بيتكلم عن الموضوع ده ..... ما هو حاجة من الإتنين .... التجار كانوا بيتعاملوا بسعر الدولار اللي في السوق السودا ... وده معناه إن السلع مش هيزيد سعرها إلا بحاجة بسيطة أوي .... أو إن التجار كانوا بيتعاملوا بسعر البنوك (و ديه حاجة مستحيلة التنفيذ علي مستوي القاعدة العريضة ) ... و لو بتعاملوا بسعر البنوك يبقي الأسعار مش هتزيد إلا بعد شهرين لما المخزون من البضائع الموجودة و التجار يجيبوا بضائع جديدة بالسعر الجديد للدولار ... لكن إن الأسعار تزيد تاني يوم .. ده غير مبرر .... ده جشع و طمع و ركوب للموجة و إستعباط للناس .... حرام عليكوا يا ناس اللي إنتوا بتعملوه فينا ده ... إتقوا ربنا شوية ... و حسبي الله و نعم الوكيل .....

حد يفهمني .... أنا هأتجنن ....

[se_ Elsyed]

... إحنا مثلا بنصدر بحوالي 6 مليار و بنستورد بـ 12 .... يعني الضعف ...

يا ريتها الضعف بس يا لانسلوت ياخويا السنة اللى فاتت مصدرين بـ 7 مليار دولار ومستوردين بحوالي 18 مليار ........... شفت الخيبة .

بالنسبة لموضوع الأسعار ، طبعاً هو جشع من التجار إضافة الى عدم رقابة من أجهزة الدولة ،

يعني بالبلدي كده الموضوع عامل زى فيلم شارع الحب فاكر اللقطة لما وقفوا كلهم جنب بعض وعبد السلام النابلسي قالهم كل واحد يضرب اللى جنبه بالقلم ، أهو ده اللى بيحصل فى مصر الحكومة بتبهدل المستوردين والمستوردين بيبهدلوا تجار الجملة وتجار الجملة بيبهدلوا تجار التجزئة وتجار التجزئة بيبهدلوا المستهلك اللى هو أحنا ... علشان كده أحنا اللى بندفع الثمن فى الأخر.

[crossfield]

ايه يا جماعه؛انتوا ما سمعتوش بيان الحكومة من يومين فى مجلس الشعب؟ تيفة أكد ان مافيش مشاكل خالص و ان اللى حاصل ده مش حاصل وان احنا اللى بنتبطر على نعمة ربونا ؛شعب واطى وما بيطمرش فيه لان الحكومه بتتف اللقمة من بقها عشان تحطها فى بق الشعب :neutral: و الا سعار لازم هتنزل هتنزل... بس طبعا بعد ما روحنا تطلع :shock: وكله بالقانون و بالدستور و بالصلاتو على النبى وحبة فووووووووووق و حبة تحت! لدرجة انى ابتديت اقتنع بينى وبين نفسى ان الحكومة لازم تغير الشعب ده مش العكس!.هاه؛لسة ما عرفتوش الراجل بيشتغل اية؟

*******************

[Mohammad Abouzied]

اسلوب الاتحاد الاشتراكي في تصريح عاطف عبيد امام مجلس الشعب

سوف نضرب بيد من حديد

ابقى قابلني

[Salwa]

صح.

هو ده الكلام الصح......

الحكومه....تغير الشعب.

شعب مش عاجبه العجب...

طيب شوفوا الحكومات اللى قبلها؟؟؟؟

شعب...نمرود...فرعون...لازم يمشى على نظام،العصا لمن عصى،

اليورو يساوى دولار و10 سنتيم.

اوروبا بجلالة قدرها....حاتشوفلها حل .

عندنا......الحل...لاحل.

انهاردة،المستور،.....يعنى شحات.

وطالع/عاطف بك/يتشدق وهو نافخ اوداجه....وآثار النعمه تكاد تقفز

من وجهه.

ماذا يعرف/هذا الرجل/عن الانسان المصرى،المتوسط،/الطبقه المتوسطه ،والمتوسطه العليا،/اللى اتلغت....واصبحت شبه معدمه.

اما الطبقه البسيطه،فتتسول،

اى يد من حديد يارجل.

اتقوا الله يجعل لكم مخرجا.

والله عوموا الشعب كله مش الجنيه.

وبيصبروه بكلام...عائم برضه.

اليس لكل هذا ،الهزر،آخر.

لك الله يامصر.

[Spider]

والله عوموا الشعب كله مش الجنيه.

.

أسمحيلى أختلف معكى يا أخت سلوى

ببساطة لأنهم عوموا الجنية وغرقوا الناس

[MuslimaEgyptian]

إيه ده، أنا جيت هنا إزاى :D...

عقلى الباطن (trademark حشيش :D ):

الواحد لازم يبطل سهر علشان علشان بدأ يدخل أبواب لم يعتادها

وهو مش واخد باله

بس بجد شكرا للسيد المنسق ، فعلا، موضوع "عندك سؤال" كان المراد به أسئله بسيطه تستدعى ردود بسيطه واى شئ أطول من كده يذهب لبابه المستقل ويبقى شئ جميل اوى لو حد تكرم و فعل كده مع باقى الموضوع وممكن أتطوع لفعل ذلك لو احببتم..

نرجع للموضوع،

شكرا للأخوه على مشاراكاتهم والحمدلله على الاقل فهمت ان موضوع التعويم ده حاجه مش كويسه :cry: :cry:

(طب فيه لغه من غير المصطلحات الاقتصاديه تبسط الموضوع ...؟ أصل ثقافتى موزمبيقى :cool: )

[se_ Elsyed]

مسلمة إجيبشاناية كتبت

طب فيه لغه من غير المصطلحات الاقتصاديه تبسط الموضوع ...؟ أصل ثقافتى موزمبيقى  

شوفي يا ستي ببساطة كده

تعويم فى ظل إقتصاد قوي يبقى حلو وسكر

تعويم فى ظل الخيبة اللى فيها مصر دلوقت يبقى وحيش وكوخه

[White heart]

في 3/12/2003 at 17:51, se_ Elsyed said:

 لجات الحكومة منذ زمن طويل الى تحديد سعر الصرف وليكن على سبيل المثال زى ما قعد عدة سنوات الدولار = 3.40 جنية ، لكن ده ماكنش سعره الحقيقي لذلك كانت الدولة بتدفع الفرق بين السعر المحدد والسعر الحقيقي اللى كان من المفترض لو كان فيه تعويم ده من ميزانيتها أو من جيبها ( اللى هو جيبنه ) وذلك منعاً لمشاكل إرتفاع الأسعار نتيجة تدهور العملة وبالتالي الناس هاتشتكي وتطلب زيادة مرتبات والديون اللى على الدولة تزيدر و و و و و و و و و أبواب جهنم هاتتفتح على الحكومة والمستخبي يبان وكل العالم يشهد على فشلهم.

طيب هما عملوا كده ليه دلوقت ؟ لأن سياسات 20 سنة فاتوا أبتدت تؤتي ثمارها ( الحنضل طبعاً ) والوضع خرج عن سيطرتهم فكان لازم يحصل كده .

رأيت إستكمالاً لمسيرة التوثيق التاريخية تلك التى كان قد بدأها هنا بعض الزملاء الأعزاء لمسئولية المنظومة الحاكمة عن مراحل "صراع" الجنيه المصري أمام النقد الأجنبي بوجه عام، والدولار الأمريكي بوجه خاص .. رأيت أن أضع بعض الأرقام المُعاصرة، لعل وعسى تُصبح بدورها مادة للبحث أو التندر مُستقبلاً ....

اقتباس

14 % زيادة فى أسعار العملات العربية والأجنبية بعد تعويم الجنيه

الإثنين 14/مارس/2016 - 10:13 م

منة الله أشرف
ارتفعت جميع العملات الأجنبية والعربية مقابل الجنيه المصرى فى التعاملات الرسمية بالبنوك المحلية، بعد قرار  البنك المركزى برفع قيمة الدولار أمام العملة المحلية، بأكثر من 14% ليصل إلى 8.85 جنيه مقابل الدولار الأمريكي، في أول تخفيض رسمي في عهد محافظ البنك الجديد طارق عامر.

 وتراوحت نسبة الزيادة فى العملات الأجنبية مقابل الجنيه المصرى ما بين 13.4% إلى 14.42%.

وزادت قيمة العملة الأوروبية اليورو، لتصل إلى 10 جنيهات، مقابل 8.77 جنيه خلال تعاملات اليوم الإثنين، وارتفعت قيمة الجنيه الإسترلينى بنحو 1.57 جنيه، ليصل إلى 12.87 جنيه.

وصعدت العملات العربية مقابل الجنيه، حيث وصل الدرهم الإماراتى إلى 2.43 جنيه، مقابل 2.13 جنيه خلال تعاملات اليوم، وزاد الريال السعودى مقابل الجنيه المصرى، بنحو 30 قرشا، ليصل إلى 2.38 جينه، فى حين قفز الدينار الكويتى بقيمة 3.71 جنيه ليصل إلى 29.76 جنيه.

وارتفع الين اليابانى مقابل الجنيه المصرى، بنسبة 13.4%، ليصل إلى 7.87 جنيه، مقابل 6.94 جنيه.

وكان البنك المركزي أعلن طرحه لعطاء استثنائي بقيمة 200 مليون دولار للبنوك بالسعر الجديد، فيما كان آخر عطاءات المركزي للبنوك الأسبوع الماضي بسعر 7.73 جنيهات مقابل الدولار.

يأتي التخفيض الجديد للجنيه المصري أمام الدولار كأحد الإجراءات التي يتخذها البنك المركزي المصري   للسيطرة على سعر الدولار في السوق الموازي.