استفسار عن الحياه في دبي

[Anceint Egyptian]

اولا اشكرك على اطرائك لي ولكن انا مبسوط فعلا اني باساعد ولو بالنصيحه

المرة دي الموضوع دخل في تفاصيل حساسة شويتين بس باذن الله ربنا يوفقني واقدر ارد عليكي بمعلومات صحيحه الى حد ما

عموما حاقولك دلوقت اللي انا اعرفه وحاسال برده ولو في حاجه غلط في اللي حاقوله دلوقت حابقى اصححهولك بعدين باذن الله

1- بالنسبة للمده اللى بتاخذها الاقامه لا اعتقد انها بتطول للدرجه دي بس في بعض الاحيان ممكن توصل لكده لو في مشكله معينه في ملف الموظف

فالاجراءات العاديه بتخلص بسرعه وخصوصا في دبي ولكن هناك اجراء وخطوة مهمه هي اللي بتاخذ معظم الوقت وهي كشف الامن

وانا في اعتقادي ان خلال شهر باذن الله ممكن اقامتك تكون جاهزة

2- بالفعل كل حياتك وتصرفاتك واجراءاتك اللي تحبي تعمليها متوقفه على استخراج الاقامه بعدها تقدري تسكني - تطلعي رخصه - تفتحي حساب في البنك الخ الخ

3- موضوع السكن قبل استخراج الاقامه مقدور عليه ومش لازم تقضيها فنادق زي ما انتي فاكرة

لان عنك حل من اتنين

تسكني اول فترة في سكن مشترك (مع بنات طبعا) وده ممكن يكلفك بالكهرباء واللذي منه حوالي 1000 الى 1500 في الشهر (ممكن يكون اكتر شوية حسب المكان)

في حل تاني تلاقيه في الانترناشونال سيتي نفسها وهو ان في ناس بتاجر ستوديوهات مفروشه من مجاميعه وده ممكن تلاقيه بحوالي من 4500 درهم في الشهر وانتي طالعه - وانا شخصيا عديلي عمل كده اول ما جاء الى دبي وحتى الان هو هناك حتى بعد ما احضر زوجته لحد مايقدم في شقه غرفه وصاله في الحي الفرنسي (تحفه فنيه) - ساكن في ستوديو مفروش ب 4500 درهم وما اشتراش معلقه وبيدفع بالشهر كمان ( بس عن طريق واحد معرفه )

لو تحبي الحل ده ممكن اسال صاحبنا ده اذا كان عنده حاجه فاضيه نحجزهالك من يوم ماتوصلي بالسلامه

4- اما بالنسبة للتليفونات فانتي تقدري من تاني يوم تشتري خط تليفون مدفوع مقدما وده احسن من الفاتورة ومش لازم يكون عندك اقامه علشان تشتري الخط ده لانك بتلاقيه في اي محل تليفونات عادي

5- نرجع تاني لعم كوماران ده اللى حاسس انه كبر وخرف

سيبك من نص كلامه لانه واضح انه تعبان شويه

عاوز اعرف حاجه مهمه بخصوص شغلك

هل تقدري تقوليلي جهة العمل ايه واذا كانوا هما اللي طالبينك ولا انت اللى حاتيجي على مسئوليتك وتقدمي عندهم بعد وصولك لان المعلومة دي مهمه جدا

اقولك ايه الفرق

لو هما اللي طالبينك (واو) يبقى حيبعتولك تاشيرة عمل وليست زياره وبالتالي حتلاقي مميزات رهيبة في المرتب والبدلات وخلافه - يعني حيبقى العقد بتاعك خارجي

واوعي تقبلي بغير كده لان العقد المحلي مجحف جدا جدا جدا وده تعرفيه لو حيبعتولك تاشيرة زيارة (خللي بالك)

وانا استشفيت من كلامك انك خبيرة او دكتورة (المهم انك شخصيه مهمه) فياريت تخللي بالك من النقطه دي لانها بتفرق جدا في كل شيء

على العموم في حالة ان التاشيرة تكون عمل وليست زياره حيكون اجراءات استخراج الاقامه اسرع شويه

اما لو انتي جايه زياره وحتبحثي عن عمل او حتى الشركه اللي انت جايه عليها حتبعتلك تاشيرة زياره ( وده اللى انا مش عاوزك تقبليه اذا كنت في موضع قوه للتفاوض على هذا الشيء مع الشركه ) وعاوزك تصري على انهم يبعتولك تاشيرة عمل وليست زياره لانها حتفرق معاكي زي ماقلتلك

على العموم لو مافيش نصيب وكانت الفيزا زياره يبقى ممكن تعملي رخصة قياده دوليه للطوارئ فقط لاني لن اشجعك على السواقه لوحدك قبل ما تاخدي رخصة الامارات لان النظام هنا مختلف تماما ومش كفايه انك بتعرفي تسوقي لان في اللي اهم من السواقه - وهو قواعد وانظمة المرور هنا اللي حتلاقيها مختلفه وصعبه ومخالفتها خطيرة جدا هنا لذلك انصحك انك لا تخاطري وتسوقي من اول ما تيجي حتى لو معاكي رخصة دوليه الاحسن انك تستحملي التاكسيات شويه لحد ما تاخذي على نظام البلد

وعلى فكرة لو تاشيرتك عمل يبقى مش حينفع تسوقي في البلد برخصه دوليه (خللي بالك)

اما بخصوص التاكسيات وتكلفتها - انا معاكي انها في الاول حتكون غاليه شويه عليكي وخصوصا في المسافات الطويله او في الزحام (لان العداد بيعد في الحالتين)

بس في حل كويس ممكن برده تعمليه

حتلاقي في الجرائد اليوميه اعلانات كتيرة عن (car lift ) وبيكون حد عنده عربيه وبياخذ معاه ناس في طريقه او بيكون عامل زي التاكسي اللي بالتليفون تتصلي بيه يجيلك في اي حته وكده طبعا ارخص من التاكسيات بكتير

التاكسيات بالتليفون تقدري تجيبيهم بس ممكن يتاخروا عليكي ويضيعوا عليكي وقت الشغل فالحل علشان تريحي نفسك انك تتفقي مع واحد او اكتر على المشاركه في السياره في وقت الدوام رايح جاي وكمان تعرفيلك كام واحد تاني عندهم عربيات بالتليفونات تقدري تجيبيهم زي التاكسي في اي وقت في اي مكان

ويستحسن طبعا لو اشتركتي مع واحده في عربيتها حيكون ده افضل ليكي - هي البلد امان بس الحذر واجب طبعا

وفي حل تاني متعب شوية ومش حيعجبك وهو انك تجربي الاوتوبيسات

اوتوبيساتهم هنا شيء فظيع - مكيف ونظيف وكانك راكبه طياره

بس للاسف مواعيدها وخط سيرها لا يسمح بالاعتماد عليها بس ممكن تجربيها للعلم فقط

6- بالنسبه للعربيه اللي عاوزة تشتريها - سبق وقلتلك ارمي نص كلام عم كامران ودلوقت باقولك ارمي عم كامران نفسه

بصراحه يعني مش عارف جاب الكلام ده منين

المهم اتوكلي على الله واشتري العربيه اللي انتي تشوفيها مناسبه وسيبك من الكلام الفارغ اللي قالهولك ده

العربيات الكبيرة بتكون غاليه ولا انصحك بيها الا اذا كان هناك ضرورة ليها

يعني مثلا لو مهندسه وبتنزلي مواقع يبقى العربيه دي ليها لازمه لانها حتساعدك توصلي المواقع بدون مشاكل الغرز في الرمال والتراب وكده يعني

لكن لو تنقلاتك كلها في البلد وسط الشوارع وكده يبقى ايه لازمة العربيه الكبيرة 4X4 الا اذا كان مزاجك فيها يبقى ساعتها مافيش مكان للمنطق

وبخصوص تخويفه ليكي من الحوادث - طبعا احنا بنعمل اللي علينا وبنسوق بحرص ونسيب الاعمار بيد الله

بس في نصايح اقولهالك تخللي بالك منها وانت سايقه

تلتزمي بتعليمات المرور جدا

لو على طريق سريع ابعدي عن اخر حارتين على الشمال - لان في مجانين بيسوقوا على 180 وانتي طالعه ومابيدوسوش فرامل فالاحسن انك تسيبيلهم الملعب ده خالص

اي حد جاي وراكي بسرعه وبيديكي نور علشان تبعدي - تحاولي تنقلي الحاره اليمين علشان تعديه ومن غير ما تخافي امني نفسك وشوفي مراياتك وانقلي لو الطريق فاضي

اقفي لو الاشارة اللي قدامك بدات تديكي لون اصفر والاحسن انك تهدي السرعه قبل الاشاره من بعيد علشان اللي وراكي ما يفتكرش انك حتخطفيها قبل ما تحمر فيقوم لابس فيكي من ورا لو وقفتي

استعملي الاشارات دايما - يمين وشمال

اربطي حزام الامان حتى لو رايحه تشتري عيش

ماتزوديش السرعه عن الحد المسموح بيه داخل المدينه وعلى الطرق السريعه حتى لو عربيتك نظيفه وتجيب سرعه يستحسن بلاش اكتر من 100

وفي النهايه ربنا يسترها معانا ومعاكي ومع كل اللي بيسوقوا يارب

يارب اكون اجبتك على تساؤلاتك

وياريت تساليني عن اي شيء اخر يدور في بالك علشان تيجي بالسلامه وانت فاهمه البلد دي كويس

الاخ العزيز وائل

فعلا وبجد حضرتك فعلا انسان محترم و مرة تانية بشكرك جدا واسفة للتاخير في الرد لاني كنت مشغولة جدا الفترة اللي فاتت فارجو المعذرة.

بالنسبة لسؤالك فانا مش راحة ادور على شغل انا بالفعل عملت مقابلة شخصية وهما قبلوني وبعتولي عرض وانا قبلته وانا مستنية بقية الاجراءات. صحيح انا مش عارفة هيا ايه بقية الاجراءات بالظبط بس متوقعة انها تكون مثلا اجراءات الفيزا وخلافه ومش عارفة الحقيقة الحاجات دي بتاخد وقت اد ايه؟ ومتشكرة جدا على ملحوظة انه لازم يبعنوا العقد لاني انا كنت فاكرة انه العرض يعتبر عقد بس واضح انه ميعتبرش عقد وواضح انه الوضع مختلف في الخليج. عموما الف شكر مرة تانية ويا ريت ياوائل لو عندك معلومات اكتر عن الفرق بين العرض والعقد او الاجراءات بتاخد عادة اد ايه اكون ممنونة جدا.

[waelbaha]

اختي العزيزة Anceint Egyptian

لا شكر على واجب ---- هذا اولا

اما بخصوص العرض والعقد

فببساطه شديده علشان تدخلي البلد لازم يبعتولك حاجه اسمها تاشيرة دخول

التاشيرة دي نوعين

النوع الاول اسمه تاشيرة عمل - يعني انت باذن الله اصبحت موظفه معاهم خلاص

النوع الثاني اسمه تاشيرة زيارة - يعني انك لسه بره الشركه وممكن لا قدر الله تخلص مدة الزياره ويقولولك شكرا

النوع الاول اقوى بكتير من النوع التاني

لانك بناء عليه ممكن تطلبي ان عقدك يكون خارجي وليس محلي

والعقد الخارجي زي ما سبق وقلتلك افضل بكتير من العقد المحلي

الاجراءات عادة مش بتاخد وقت كتير يعني تاشيرتك ممكن تطلع في اسبوع او اقل

واذا كانت الشركه جديده ممكن الاجراءات تطول شويه يعني ممكن تاخد شهر بس ده مش علشان اوراقك ولكن بتلاقي ان في حاجات معينه للشركه لازم تخلص الاول وبعد كده تقدر الشركه تطلع اوراق الموظفين

ياريت تعرفي موضوع التاشيرة ده قبل ما تسافري وعموما اذا كان العرض المقدم منهم رسمي يعني موقع منهم وعلى اوراق الشركه تقدري تطمئني لان العقد اللي بيتعمل هنا بيكون عباره عن فورمه رسمية بتاعة وزارة العمل والعمال وهو ده المهم

يعني لازم تتاكدي ان كل بنود الاتفاق بينكم مكتوبه في العقد ده (بتاع العمل والعمال) ومايقولولكيش ان العقد ده فورمه ثابته وانك تمضي عليه باللي فيه كده وخلاص ويبقى في عقد تاني مفصل بينك وبينهم وفيه كل حاجه

لا اوعي

العقد اللي بيعتد بيه اوقات الخلاف هو العقد الرسمي بتاع وزارة العمل والعمال وهو يحتمل ان يضاف عليه اي بنود بينكم لان فيه خانه فاضيه تقدري تحطي فيها اي مميزات بتحصلي عليها

علشان كده مهم جدا ان يذكر في العقد ده كل المميزات اللي بتحصلي عليها

[Anceint Egyptian]

الاخ العزيز وائل

يعني افهم من كلامك انه انا اذا جتلي فيزا عمل يبقى مفيش داعي اعمل دوشة معاهم على حكاية عقد العمل واكتفي بالعرض وتاشيرة العمل والا ايه؟

[waelbaha]

على فكرة في معلومه جديده شوية في موضوع العقد الخارجي والداخلي

عرفتها من واحد مندوب في الجوازات هنا

قاللي ان العقد الخارجي مابيتعملش دلوقت الا في الجهات الحكوميه اما القطاع الخاص فالعقود كلها عاديه

وده معناه

انك لو جايه على جهه حكوميه يبقى تتكلمي معاهم في موضوع العقد الخارجي ده

ولو جايه على قطاع خاص يبقى تحرصي على ان العقد الرسمي اللي حتوقعي عليه معاهم (بتاع وزارة العمل والعمال) يكون شامل ومكتوب فيه كل بنود المرتب والبدلات والمزايا بالتفصيل الممل وبكده تضمني حقك معاهم باذن الله

معلش معلومة العقد الخارجي دي اتاخرت شويه بس باذن الله مافيهاش مشكله لو اتكتب في العقد الرسمي كل بنود المرتب الموجوده في العرض