الناموسيـــــــة الكحــــــلي

[shahd]

الناموسيةالكحلي

المكان : اوضة متكركبة , ستاير مقفولة ,ابو خشون نايم ومغطي وشه

الزمان: الساعة 7 الصبح

الأشخاص: مسفنسفنجة هانم, الأستاذ ابو خشون

الحوار:مسفنسفنجه هانم

صباحك عسل يا جميييييل .... يلا اصحى بلاش كسل

الأستاذ ابوخشون: يا فتاح يا عليم يارزاق ياكريم هو يعني الواحد مايعرفش يتخمد .. يعني جتكو البلاوي عايزه ايه ؟؟

مسفنسفنجه هانم تتقمص من ابو خشون

بلاوي لما تاخدك مش كفاية مستحملاك

وتسيبه وتمشي

**********************************

المكان: ثابت (1)

الزمان: الساعه 8 الصبح

الأشخاص: مسفنسفنجة وابو خشون

الحوار:الأستاذ ابوخشون :سايباني وماشية ما تقولي عايزة ايه

مسفنسفنجه هانم:اتخمد وانت زي قلتك

الأستاذ ابوخشون: احسن برضه اقفلي الباب وراكي خخخخخخخخخخخخخ

دببببببببببببببببب ترزع الباب وراها

الأستاذ ابو خشون:هي حصلة لرزع الأبواب كمااااااان .....بصي انا مش حرد عليكي عشان انا الراجل احم احم ؟؟؟؟؟

مسفنسفنجه هانم:مااااااشي يااااااااا راجل

************************************

الزمان: الساعه 9 الصبح

المكان: ثابت (1)

الحوار:ابو خشون بيحلم وبيتكلم في نومه: بقى كده يا ام رابسو هو ده الي اتفقنا عليه

مسفنسفنجة تسمع الكلام تروح طاسه ابو خشون بميه ساااااقعه

الأستاذ ابو خشون:: ايه؟؟ مين ؟؟ليه!! في ايه!! الساعه كام ؟؟؟؟؟

مسفنسفنجه هانم :روح اسأل ام رابسو بتاعتك

الزمان: الساعه 10 الصبح ابو خشون

يلبس robe des chamber

ويخرج من الأوضة ويروح على اوضة السفرة يدور على اكل

****************************************

المكان: اوضة السفرة

الحوار:الأستاذ ابو خشون:طب فطرتوا ايه النهاردة؟؟؟

مسفنسفنجه هانم:المطبخ قدامك.... روح اطفح

المكان: المطبخ قدام الثلاجة

الأشخاص: ابو خشون ومسفنسفنجه

الحوار: الأستاذ ابو خشون: طب مافيش حتة جرنال الواحد يقزقز الأخبار الي فيه

مسفنسفنجه هانم : هو قرطاس لب؟؟ عجايب ؟؟!!!

**********************

المكان: ثابت (2)

الزمان : الساعه11 صباحا

الباب بيخبط بتاع الجرانيل بره

الأشخاص: الأستاذ ابو خشون ومسفنسفنجة هانم

الحوار:الأستاذ ابو خشون :خش الباب مفتوح .. هات الز خبر عندك مش عايز عكننة

البياع: من عنيا ياباشا عايز ايه... فرقعه ولا حريق ولا تقنلاب ؟؟؟؟

مسفنسفنجه هانم : تقنلاب ايه يا ابو مخ طاقق

البياع: الله وانا مالي هما بيقلوا كده قال ايه العمدة بتاع البلاد الي جمبينا زعلو منه قامو عملو عليه تقنلاب

فتكو بعافيه ويقفل الباب ويمشي

**********************************************

الأشخاص: الأستاذ ابو خشون ومسفنسفنجة هانم

الحوار:الأستاذ ابو خشون : لا الخبر ده ما يطمنش دي ام رابسو حتزعل قوي ...

مسفنسفنجه :ما تتفلق اما عالم جبنا بصحيح

المنظر: ابو خشون رايح جاي ماسك الجرنال ورا ضهره وبيفكر

الأشخاص: الأستاذ ابو خشون ومسفنسفنجة هانم

***********************

المكان: في الصالون

الأشخاص: مسفنسنجة, ابو العجايب

الحوار: مسفنسفنجه هانم: ما تهمد خيلتني ..

الأستاذ ابو خشون عندك حق , بس انا الي جبته لنفسي , ماهو الي يهزر مع العياااااااال يستاهل كل الي يجراله

مسفنسفنجه هانم: ههههههههه عيال, ياعم انت طايل تبقى عيل ولا حتى نص .

ابو خشون يلم عزاله ويمشي

مسفنسفنجه تحاول تمسك فيه يزقها ويجري

مسفنسفنجه: هو في ايييييييه .... خبر ايه ده الي خلاه يجري حافي كده

*******************************

المكان: ثابت(3)

الحوار:ابو العجايب: يابرووووودك كل ده ومش عارفة ......... ياجبروتك ..... منك لله يابعيدة.......

مسفنسفنجه هانم: غور كده وانت من غير فيش عامل زي الحمام من غير ريش

ابو العجايب: ياماما لولايا انا وايش ادراك مين اناا ........ ده انا لما بقول........ كله لازمن ولابد يبحلق فيا .....حدش عبرك ؟؟؟؟؟؟!!!!!!

مسفنسفنجه: قال يعني مبحلقين فيك من جمال سحنتك؟؟؟؟؟

************************************************

المكان: اوضة ابو العجايب

الزمان: ثاني يوم

الأشخاص: ابو العجايب ومسفنسفنجة هانم

الحوار:ابو العجايب: يا جمالك ياابو خشون وانت

بتستناني كل يوم وانا.بنشر الغسيل وحشتني ياراجل

مسفنسفنجه هانم: هو الأخ بقى منشر عقبال لما تترقى و تبقى غسالة فول اتوماتيك

ابو العجايبب: باينلك عايزة تتاخدي عايزة تاخد فمين بالمرة مع ا لجماعه يعني

***************************

المكان: ثابت (4)

الأشخاص: ابو العجايب ومسفنسفنجة هانم

يخش عليهم ابو خشون فجأة

الحوار:ابوخشون: انا جيت هل من مرحب ..هو مافيش حد هنا ولا ايه ...

ابو العجايب: انت جيت ياسيد المعلمين

مسفنسفنجه هانم: يا خراشي على البكش الأزلي... ياعم انت مابتزهقش قول كلمة حق ولو مرة في حياتك

الأستاذ ابو خشون: طب انت لسانك متبري منك ...... هو مزوق كده وعنده نظر سيبيه

ابو العجايب: ماتقلها دي دايما قارشة ملحتي

الأستاذ ابو خشون: سيبك منها وقلي ايه اخر اخبار هدوم جيرانا ........ حطيتلوهم شوية كوكو وحبة توتو ولا مش لأقين...... خلصونا اعملوا حاجة لحسن ريحتهم فاحت

مسفنسفنجه هانم: ريحه ؟؟ ريحة ايه دي ؟؟؟؟؟؟ ما تحسن ملافظك ده حتى الملافظ سعد

ابو العجايب: يادي النيلة و الحوسة التقيلة ما تروحي تشوفي شغلك خلينا نعرف نشوف الي ورانا...... عالم فاضيه بصحيح؟؟؟؟

الأستاذ ابو خشون: معلش يا عجب يا اخويا ولا يهمك هي طول عمرها كده حشريه

مسفنسفنجه هانم: طيب يا ناكر الجميل انت وهو ابقوا دورولكو على سفسفايه غيري تلمكم

ابو العجايب: مش عايزين منك حاجة امشي غوري خلينا ناخد قراراتنا

مسفنسفنجه: قرارتكو ؟؟!! هع هع هع ابقى سلم لي على ام رابسوووو

********************************************

المكان: ثابت(4)

الأشخاص: ام رابسو, ابو خشون , مسفسفنجه

الحوار: ام رابسو مين الي بيجيب في سيرتي ؟؟ في حد عايز يتاخد فمين ؟؟

ابو خشون: البت مسفنسفنجه وياخدها يرميها عند ام رابسو

ام رابسو تفضل تعصر فيها وترش عليها شوية كلوريكس على حبة اريل على حبة جاز

**************************

المكان: بيت ام رابسو

الأشخاص: ام رابسو ومسفنسفنجة

ام رابسو تعصر مسفنسفنجة وتقطعها حتة

مسفنسفنجة تصرخ .. الحقني يا ابو العجايب شوف ام رابسوا عملت فيا ايييه

ام رابسوا: اصرخي ان شالله لبكرة ماحدش حيعبرك

وتقفل عليها الباب وتخرج.

************************************

المكان: قدام باب شقة ام رابسو

الأشخاص: ابو العجايب و مسفنسفنجة

الحوار:ابو العجايب يخبط على الباب

ابو العجايب : افتحي يا ماما انت قافلة الباب ليه؟؟

مسفسفنجة: ام رابسوا اللي قافلة عليا اكسر الباب يا ابو العجايب

ابو العجايب: مييييييين اللي قافل عليكي ؟؟ام رابسو ؟؟ طب استني لما اشاور ابوخشون

مسفسفنجة: حتشاور مين يا خي ما هو اللي رماني عندها وغدر بيا اللي ما يتسمى

ابو العجايب: انت يا ابو خشون اسفخس عليك ؟؟ امال فين الشهامة والمرجلة؟؟

ابو خشون:ابقى خلي الشهامة تنفعك لما ام رابسو تشيل عنك الفيش وتقطع خبرك.

ابو العجايب: دي مين دي اللي تقطع خبري .. ده اناااااااااا

يرن جرس التليفون

ابو خشون : طب رد على التليفون رد تلاقيها ام رابسو شمت خبر.

ابو العجايب يرفع سماعة التليفون وايديه بتترعش

الو ايوه مين معايا

ام رابسوا: انا ام رابسوا يا عجب الزفت قال يعني مش عارف صوتي

ابو العجايب: لألألأ ازاي طبعا عارف صوتك تقولش كروان يا خواتيييييييي.

ام رابسو: ايوه كده لم نفسك

ابو العجايب: ده انا الم نفسي وانفاس اللي جابوني كمان . أمريني ياجميل

ام رابسوا: خلاص مش عايزة كتر كلام بكره الصبح العالم كله يعرف مسفسفنجة المجرمة بتعمل فيا ايه ؟؟

ابو العجايب:معلش ولا مؤاخذة مش واخد بالي هيا عملت فيكي ايه ؟؟

ام رابسوا: انت حتستعبط مش شايفها كل يوم والتاني بتشتمني وتبعزق بكرامتي الأرض لحاد ما خلت سمعتي على كل لسان .

ابو العجايب: مسفنسفنجة عملت فيكي كل ده؟؟

ام رابسوا: ايوه طبعا دي حتى عصرتني وقطعتني حتت ة ورمت كل حته فيا في ناحية ؟

ابو العجايب مزبهلاً: مسفنسفجنة؟؟؟؟؟

ام رابسوا: ايوة مسفنهبابة ولا انت حتكدبني؟؟

ابو العجايب: هوانا اقدر أكذبك!!! بكره اقول للعالم كله الخبر ده واخدلك حقك من مسفنسفنجة المجرمة .

ام رابسوا: شاطر يا ابو العجايب يلا اديني ابو خشون

**************************

المكان : ثابت(5)

الأشخاص: ابو خشون وام رابسو على الهاتف

الحوار: ابو خشون: نعم ايو يا ام رابسوا ابو خشون تحت امرك

ام رابسوا: خد المفتاح من تحت عقب الباب وطلع مسفنسفنجة وحطها في شوال وابعتهالي

ابو خشون: حاضر بس انتِ ناوية تعملي فيها ايه؟؟

ام رابسوا: وانت مالك يا حشري .. نفذ الأوامر وانت ساكت

ابو خشون: حاضر حاضر بس اصلي

ام رابسوا: اصل ايه يا طماع .. ما تقلقش ححطلك منابك

**********************

المكان: وكر ام رابسو

الأشخاص: ام رابسوا , ابو خشون,

ابو خشون يوصل مسفنسفنجة لأم رابسوا ويستنى عشان ياخ منابة من الهبرة

ام رابسوا تلطع ابو خشون يجي ساعتين : تقسم مسفنسفنجة على صحابها وحبايبها وتاخد هيا الحتة اللي في النص

وتدي ابو خشون حتت متقطعه .

ابو خشون ياخد الحتة المتقطعة وهو مكشر .

ام رابسوا: ايه مالك مبوز كده ليه مش عاجبك ولا ايه؟؟

ابو خشون: لا عاجبني ونص كمان بس اصلي كنت عايز الحتة دي كمان

ام رابسوا: اما انت طماع بشكل حبقى اشوفلك حتى تانية بس مش دلوقتي

ابو خشون: طب امتى ؟؟

ام رابسوا: بعدين يا أبو خشون بعدييييييييين

وتزق ابو خشون لباب الوكر.

ابو خشون: بتطرديني يا ام رابسوا وانا اللي عملت كل ده علشانك

ام رابسوا: هو من ناحية عملت فانت عملت ومتشكرين على مجهوداتك وورينا عرض كتافك

برررررررررررررررررره.

*******************************************

المكان: قدام باب ام رابسوا

الأشخاص: ابو خشون وابو العجايب

يخرج ابو خشون مقموص وناوي يبهدل ام رابسوا

يروح لأبو العجايب يشتكيلة

الحوار:ابو العجايب: مالك ياابو خشون ايه اللي عمل فيك كده يا اخويا

ابو خشون: اللي ما تتسمى ام رابسو سرقتني

ابو العجايب: وسرقة منك ايه يافالح

ابو خشون: سرقة مسفنسفنجتي حبيبتي

ابو العجايب: يا رااااااااجل .. ايش حال لو ماكنتش شايفاك وانت شايلها في شوال

ورايح تديها لأم رابسوا

ابو خشون: ايوة يا بني ماهو على اساس نتقاسمها انا وام رابسوا واخد حقي

ابو العجايب: اااااااااة وهي ضحكة عليك وقالت لك عليك وااااااااحد مالكش عندي حاجة؟؟

ابو خشون: لا ابدا موش كده هيا ادتني الحتت دي

ابو العجايب : وريني كده.. ياحلاوة ياحلاوة .. امال فين الحتة اللي في النص

ابو خشون : خدتها لنفسها ولما قلت لها ان القسمة مش عاجباني راحت طردتني ورمتني بره

ابو العجايب: ياحرام لالالا مالكيش حق يا ام رابسوا تعملي كده في خشاخيشوا

ابو خشون: هوانا بقلك الكلام ده عشان تقعد تمصمصلي شفافيفك وتقلي ياحرام ومش عارف ايه؟؟

ابو العجايب: هو انا في ايدي ايه يا خشخش يااخويا

ابو خشون: عايزك تاخدلي حقي وتقول للدنيا كلها ام رابسوا الوحشة عملت فيا ايه؟؟

ابو العجايب: عايزني اناااااااا ابو العجايب الغلبان المسكين اقف في وش ام رابسو لا يا عم انا مش مستغني. عن فيشي

ابو خشون: بقى كده يا عجب حتسيبني في الأزمة دي لوحدي

ابو العجايب: انا ممكن اساعدك بس بشرط

ابو خشون: شرط ايه ؟؟

ابو العجايب: تروح تستسمح ام رابسوا وتبوس ايديها وبعد كده ممكن اتوسطلك عندها واخليها تسامحك

ابو خشون: اناااااا... لالالالا.. امبوسيبلللللللللللللللل... موستحيييييييل .. كرااااااااامتي....

ابو العجايب: خلي كرامتك تنفعك يا ابو كرامة.. لما ام رابسوا ترش عليك رشة جاز وتعصرك عصرة محترمة من اللي قلبك يحبها..

ابو خشون: طززززززززز في كرامتي .. وديني لأم رابسو ابوس جزمتها.

***************************************

المكان: قدام باب فيلة ام رابسوا

الأشخاص: ابوخشون , وابو العجايب. ام رابسو

الحوار:ابو العجايب يا خد ابو خشون في ايده ويوديه لأم رابسوا عشان يستسمحها

ابو العجايب: مساء الفل على احلى ام رابسوا في الدنيا كلها

ام رابسوا: اهلا يا عجب ها فيه ايه؟؟

ابو العجايب: ابدا ياست الكل بس ابو خشون جاي يعتذرلك ويبوس على راسك.

ابو خشون يبوس راس ام رابسوا ويوطي على ايدها يبوسها

سامحيني يا ام رابسو حقك عليا مش حزعلك تاني ابدااا

ام رابسوا: هممممممم.. طب ولو ما سمعتش الكلام بعد كده ؟؟

ابو خشون: ابقى قطعيني حتت زي ما عملتي في مسفنسفنجة

ام رابسوا: هاااااااا انت حتبتدي تعك تاني.. انا ما عملتش حاجة فيها.. انا كنت بدافع عن نفسي بسسسسس

ابو العجايب: ايو طبعا طبعا هو في حد يستجري يقول غير كده

ام رابسوا: اخرس انت يا عجب انا زعلانة منك.

ابو العجايب: زعلانة مني انا؟؟ ليه بس ؟؟

ام رابسوا: فين الخبر اللي حتوصلة للعالم كله؟؟؟

ابو العجايب: الخبر جاهز وحينزل بكره الصبح يا ست الكل بس كنت بظبطه عشان يكسر الدنيا.

******************************************

المكان: مقر ابو العجايب

الزمان: الساعة الثامنة صباحاً

الأشخاص: ابو العجايب , ام رابسوا, مسفسفنجة

الحوار:ابو العجايب : سيداتي انساتي سادتي اليكم الخبر الأتي

انهالت اليوم مسفنسنجة المجرمة على ام رابسو المسكينة الغلبانة بالضرب والشتائم الوحشة

وام رابسو يا كبدي ساكتة وصابرة

ولكن وبعد ان طفح الكيل وزاد لسان مسفسفنجة طولا وعرضا واستمرت في الضرب والتخريب

ام رابسوا ما قدرتش تستحمل الأهانة اكثر من كده وقررت ان تأثر لكرامتها

ابو العجايب: معانا على الهواء مباشرة ام رابسوا المغلوبة على امرها المتهانة كرامة اهلها

ام رابسو ماسكة منديل وبتعيط والدم بيخر من جسمها

ام رابسوا: انا مش حتكلم.. بصولي بس وانت تعروفوا

شوفوا الصور وحتتأكدو اهئ اهئ

ابو العجايب:بصوا وشوفوا يا عالم عمايل مسفنسنجة الوووووووحشة

صورة لمسفنسفنجة ماسكة سكينه وبتقطع في ام رابسوا بشكل مرعب

صورة لأم رابسوا وهي بتعيط وتستنجد بالعالم كله عشان ينقذها من مسفنسفنجة المتوحشة.

صورة ابو خشون وهو راكع تحت رجلين ام رابسوا

***********************************************

صوت جاي من بعيييييييييييييد بيصرخ

اصحواااااااااااااااااااااااا يا عاااااااااااااااااااالم

فوقوا يا بشررررررررررررر

الميزان اتقلب .. والبيت اتخرب

ام رابسوا هي اللي يا عيني بتنضرب

ومسفنسنجة المجرمة بتدفنها يوماتي في الترب

كبدي عليها ما ادتهاش حتى فرصة للهرب

اصحاااااااااااااااااااا يا بوخشون

ضيعتني

قطعتني ..

دمرتني ..

ومن تحت راسك بيتي اتخرب .

*******************

اصرخي

ابكي

زعقي

ان شالله حتى تلطمي

ماحدش حيسمعك

ولا حيعبرك

الكل ناااااااااااااااااااايم

كما البهااااااااااااااااااايم

والناموسية كحلييييييييييييييييييييييييي

تمت

ابو خشون:الحكومات العربية

ام رابسوا: اسرائيل

مسفنسفنجه: الأراضي العربية

ابو العجايب: الاعلام العربي

تم تعديل 17 مارس 2008 بواسطة شهد

[Scorpion]

أولآ مساء الفل و الياسمين و كل حاجة حلوة علي احلي شهد في الدنيا ...

ثانيآ ... أخيرآ أقدر أرد عليكي بعيد عن الفهد الأسود و البرق و الرعد اللي كنتي حاطاهم في توقيعك ...

شوفي يا ستي ... انطباعاتي بعد ما قرأت الناموسية الكحلي

واحد .. انتي مش ممكن ما تكونيش مصرية .. ده انتي مصرية و من القللي كمان

اتنين ... اول ما قريتها ما فهمتاش .. كنت حاسس ان فيها رمز بس ما فهمتوش

اول ما وصلت للحتة الأخيرة اللي فيها الشفرة رجعت اقراها مرة تانية

و سطر ورا سطر ابتسامتي بقت بتزيد من ذكاء قلمك .. و تشبيهاتك اللي ما تخرش ميه

و علي آخر سطر قلت : برافو شهد

:unsure:

[Salwa]

صباح سعيد جميل على احلى شهد..

رائعة افكارك ياشهد ...رائعة عفويتك العبقرية ياشهد..

ازاى بكل جدية وتنظيم للافكار تقدرى تقولى اللى انتى عاوزاه بكل السلاسة دى؟؟

بجد يعنى ..

انتى بتتفوقى على نفسك....لانى مش شايفة حد يقدر يتفوق عليكى فى طريقك اللى اخترتيه..

ربنا يوفقك ياشهد..

على فكرة...(( انا ايضا فى الاول لم استوعب تماما ما تقصدين))....!!!

[الحاج فوزى]

من الواضح أن الكل فى الوهلة الاولى لم يفهم ما ترمين إليه على وجه الدقة وإن أدرك أنه بالتأكيد هناك شىء ينتظر فى النهاية ..

كما هو واضح أن كل من سبقنى عاود القرأة مرة أخرى .. لكنى قرأتها ثلاثة مرات .. ونسخت بعضها عندى كمان ..

تحياتى وإصرارى على المتابعة المستمرة لما يتهاوى من قلمك من أحرف وكلمات ..

فشهد الحروف والكلمة .. تصلح هكذا وتصلح أيضاً.. كلمات وحروف كالشهد ..

تم تعديل 12 مارس 2008 بواسطة Huss.

[nash]

ماشاء الله ..

موضوع يجبرك علي قراءته كاملا ...وسلاسه في التعبير وبساطه جميله..

أستمري يا شهد...والله انك موهوبه بالفطرة...

[امانى]

شهد العزيزة

كعهدنا بكى رائعة بكل المقاييس . لقد قمت بقراءتها مرة وزى ما تفضل الاخوة الافاضل لم اصل الى مغزاها الا فى الاخر

بعد حل رموز الالغاز اعدت قراءتها مرة اخرى برؤياكى وكما صورتيها فعلا رائعة يا شهد

اسلوبك السلس والموهبة الطاغية واحساسك الراقى يجعل كلماتك تدخل القلب لصدقها وجمالها

دمتى يا شهد والى المزيد

امانى

[shahd]

أولآ مساء الفل و الياسمين و كل حاجة حلوة علي احلي شهد في الدنيا ...

ثانيآ ... أخيرآ أقدر أرد عليكي بعيد عن الفهد الأسود و البرق و الرعد اللي كنتي حاطاهم في توقيعك ...

شوفي يا ستي ... انطباعاتي بعد ما قرأت الناموسية الكحلي

واحد .. انتي مش ممكن ما تكونيش مصرية .. ده انتي مصرية و من القللي كمان

اتنين ... اول ما قريتها ما فهمتاش .. كنت حاسس ان فيها رمز بس ما فهمتوش

اول ما وصلت للحتة الأخيرة اللي فيها الشفرة رجعت اقراها مرة تانية

و سطر ورا سطر ابتسامتي بقت بتزيد من ذكاء قلمك .. و تشبيهاتك اللي ما تخرش ميه

و علي آخر سطر قلت : برافو شهد

عمووووووووووووو كامل صاحب القلب الطيب مساء الخيرات

ان شاء الله مافيش بعد كده لا فهد اسود ولا برق ولا رعد في التوقيع :sad:

بجد مش عارفة اوصف مدى سعادتي بردك الجميل والرائع على الناموسية

ردك ده اعتبرة وسام على صدري حقيقي مش عارفة اقول ايه

غير اشكرك بكل لغات الدنيا :yahoo:

تم تعديل 18 مارس 2008 بواسطة شهد

[رحاب]

شهد اسمحيلى الناموسيه روووووعه انا قريتها اكتر من مره وبصراحه حاجه جميله فعلا الى الامام يا شهد وربنا يوفقك

[shahd]

صباح سعيد جميل على احلى شهد..

رائعة افكارك ياشهد ...رائعة عفويتك العبقرية ياشهد..

ازاى بكل جدية وتنظيم للافكار تقدرى تقولى اللى انتى عاوزاه بكل السلاسة دى؟؟

بجد يعنى ..

انتى بتتفوقى على نفسك....لانى مش شايفة حد يقدر يتفوق عليكى فى طريقك اللى اخترتيه..

ربنا يوفقك ياشهد..

على فكرة...(( انا ايضا فى الاول لم استوعب تماما ما تقصدين))....!!!

ماما سلوى جميلة القلب رقيقة المشاعر

صبحكم الله بالخير والعافية كما نقولها عندنا في اليمن

مرورك هو الأروع واطلالتك هي الارقى والأجمل..

لا املك من الكلمات الكثير حتى اهديها اليكي

فقط اقول شكراااا بكل ما تعنيه الكلمة

خالص احترامي

تم تعديل 17 مارس 2008 بواسطة شهد

[shahd]

من الواضح أن الكل فى الوهلة الاولى لم يفهم ما ترمين إليه على وجه الدقة وإن أدرك أنه بالتأكيد هناك شىء ينتظر فى النهاية ..

كما هو واضح أن كل من سبقنى عاود القرأة مرة أخرى .. لكنى قرأتها ثلاثة مرات .. ونسخت بعضها عندى كمان ..

تحياتى وإصرارى على المتابعة المستمرة لما يتهاوى من قلمك من أحرف وكلمات ..

فشهد الحروف والكلمة .. تصلح هكذا وتصلح أيضاً.. كلمات وحروف كالشهد ..

أستاذي الفاضل Huss كتبت الناموسية منذ عامين أو عام ماضي.. بالفعل لم اعد أتذكر تاريخ صياغتي الأولى لها.. تركتها إلى أن تكتمل معالمها في مخيلتي .. وبعد أن اكتملت وضعتها بين يديكم ولم أكن اتوقع أن تنال هذه الردود الرائعة.. حقيقة لا ادري كيف أشكركم.

بالفعل هي لن تفهم منذ الوهلة الأولى وهذا ما ارمي إليه...لكن تكرار القراءة من الجميع واهتمامهم أكثر شيء أسعدني ......

شكرا من صميم القلب لكلماتك الراقية

خالص احترامي تيتا شــــــــهد

[shahd]

ماشاء الله ..

موضوع يجبرك علي قراءته كاملا ...وسلاسه في التعبير وبساطه جميله..

أستمري يا شهد...والله انك موهوبه بالفطرة...

ناش الغالية .. اهديتني كلمات عذبة تحمل بين طياتها ارق المشاعر واطيب العبارات

فلك مني باقة محملة بأجمل الزهور .. ومع كل زهرة أهدي اليكي ارقى كلمات الشكر والتقدير

تم تعديل 17 مارس 2008 بواسطة شهد

[shahd]

شهد العزيزة

كعهدنا بكى رائعة بكل المقاييس . لقد قمت بقراءتها مرة وزى ما تفضل الاخوة الافاضل لم اصل الى مغزاها الا فى الاخر

بعد حل رموز الالغاز اعدت قراءتها مرة اخرى برؤياكى وكما صورتيها فعلا رائعة يا شهد

اسلوبك السلس والموهبة الطاغية واحساسك الراقى يجعل كلماتك تدخل القلب لصدقها وجمالها

دمتى يا شهد والى المزيد

امانى

اماني.. نسمة رقيقة .. وهمسة صافيه ..

شكرا بكل حروف الود واسمى المعاني ..

[shahd]

شهد اسمحيلى الناموسيه روووووعه انا قريتها اكتر من مره وبصراحه حاجه جميله فعلا الى الامام يا شهد وربنا يوفقك

رحاب مرحبا بك أختي العزيزة وشكرا على قرائتك واهتمامك خالص تقديري