الحكومة تبحث تكليف وزارة الداخلية بتوزيع الخبز للسيطرة على الأزمة

[mira]

السلام عليكم ورحمة الله وبركاته اخوتي في الله :blush2:

مش عارفة والله ابتد

ي منين حأقول ايه لكي الله يامصر حضارة ترامنتاشر ستة وتعامد الشمس على وجه رمسيس التاني واهرامات وخوفو وابوالهول وابو سمبل وثورات وقلنا حنبني وادي احنا بنينا السد العالي وصورة صورة كلنا عايزين صورة تحت الراية المنصورة لغاية ماوصلنا للاسف لهذه الصورة المقهورة الى..... طاااااابور وكوارثه اليوميه اما الطامة الكبرى في موضوع العيش فهو هذ الخبر الكارثة

الحكومة تبحث تكليف وزارة الداخلية بتوزيع الخبز للسيطرة على الأزمة

يعني الشرطة التي اصبحت في خدمة السلطة مش في خدمة الشعب حتوزع علينا العيش لنصبح اول شعب في التاريخ الشرطة بتاعته بتوزع العيش

ايه ده ؟؟؟؟؟ هو فيه ايه؟؟؟؟

وحندخل الاقسام عشان ناخد بونات للعيش لكي الله يامصر حضارة ايه وزفت ايه شكل غير حضاري اطلاقا

ولو مش مصدقين اقروا الخبر

هنا http://www.masrawy.com/News/Egypt/Politics...ch/8/bread.aspx

واخيرا

1عجبى عليك يا شعب :blush2:

____________ _________ _________

عجبى عليك يا شعب

إمتى تفوق من غفوتك

إمتى ح تفرد طولك

وتقوم من كبوتك

حتى رغيف العيش

ذلك .... وإيه غيره لقمتك

واللى حاكمينك .. مضيقين

عليك حتى ف أكلتك

ومعريين كرامتك

وحارمينك من هدمتك

طنطنوا وقالوا ع الهوا

الفقرا دول همنا

ياما أكلنا كلام وشبعنا

كذب من حضرتك

وزير اتنك قوى ..ووعد

مفيش طابور... أوعدك

ع الهوى وفى الهوا ...

مش كله كذب بذمتك

أكيد ح ييجى اللى يقولك

يا فرعون مين فرعنك

بندعى فى كل وقت

يجمع بلاوى الشعب لبلوتك

عقبال ما نشوفك كده

زى شارون فى رقدتك

بتوع الطابونه الكبار

باعونى وباعوا .. حضرتك

2فى طابور العيش

____________ ________

خارج لصلاة الفجر

والهم راكبنى

ع اللى بعد الصلاة

من وقفة ح تتعبنى

عندى اقتراح لوزير

وبجد... صدقنى

تيجى ليوم واحد

نتبادل الأدوار

تاخد إنت دورى

وف دورك بحق

مش طمعان

بشرط لا تضرب كسل

وتعمل فيها مرضان

ولما تكون فى الطابور

أنصح جنابك نصيحة

فوق وأوعى تنام

لو حاولت تخش

شويه جوة الطابور

ح تكون ندمان

واللى ح يجرالك

ما تشوفه حتى ف الأحلام

ح تندعك دعكه سودا

وع القفا ح تاخد إقلام

وتحت الجزم تتهرس

ويحولوك لهلام

وتتلت وتتعجن ومش

بعيد يخبزوك كمان

ياااا إبن الللللللوزير يا همام

متفتكرش يا أبو كرش

إنك فى الكرسى ع الدوام

إشعر شوية بغيرك

لأن غيرك برضه كمان إنسان

وفيه فكر شوية ...لويعنى

كنت مكانه ولو ايام

كان إيه يكون شعورك

ده لو كنت إنت كمان إنسان

ده اللى خلقه هو اللى خلقك

بدون فرق وهو رب الأكوان

وفى يوم بقيت إنت اللى حاكم

وانت اللى راعى كمان

ومسئول عن رعية .. لا تنام

والغلب راكب عليها

وقريب الجوع كمان

طول ما جنابك عليها

مسلطك الزمان

ويمكن قريب نقول ونحكى

كان يما كان

كان فيه زمان سلطان

زى اللى كانوا

فى غابر الزمان

بس سيرته ما يعلم

بيها غير خالق الأكوان

منقول

[se_ Elsyed]

الحكومة تبحث تكليف وزارة الداخلية بتوزيع الخبز للسيطرة على الأزمة

حصل يا فندم وبدأ الموضوع يُطبق في محافظة أسيوط

وبهذه المناسبة السوداء ..

أُهدي أعضاء المنتدى الكرام .. وأخص بالذكر إبننا " واحد بك تاني " هذه القصة عسى أستطيع أن أُسري عنه وأدخل على قلبة البهجت والفرحت والسرور

كتبت قصة النهاردة مستوحاه من موضوع تدخل وزارة الداخلية في عملية بيع الخبز وسمتها " عيش وتشبيه " زي فيش وتشبيه كده ..

معليش القصة لسه بتخمر .. ومش عايز استعجل وأنشرها بسرعه عشان ما تطعلش معجنة .. عايز أشوف جمهوري الحبيب من القُراء واقف طوابير ... وما تخافوش كله هاياكل ويروح مرضي بإذن الله . بإذن الله هاحاول أنشرها النهاردة

[mira]

لاحول ولا قوة الا بالله

[The Coder]

قبل ما تتكلموا عن الخبر كأنه كارثه كده.. و صعبان عليكم الحال بتاع البلد دلوقتي

سؤال بسيط بس : حد فيكم جرب ووقف في طابور عيش الأيام ديه ....؟؟؟

وطبعاً هيكون ليكم العذر لو إنتم مغتربين و بعيد عن البلد.

علشان كده أحب أقولكم و بمنتهى الأمانه إن ده أسعد خبر سمعته الأيام ديه و نفسي إنه يتطبق إنهارده قبل بكره

أيوه متستغربوش ده خبر سعيد جداً جداً

يا جماعه أصلكم مش عارفين

لما تقوم كل يوم الفجر.. قبل الصلاه تروح تحجز دور .. تصلي وترجع تلاقي بقى وراك يجي خمسين واحد

و الخمسين بقدرة قادر يبقوا سبعين أصل ده حاجز لإبن خالته و ده لأخوه و ده لواحد بيجيب عيش من فرنه تانيه و يمكن جاي كمان ساعتين

تسمع بعد شويه زعيق : ده مش واقف .. لأ ده حاجز

شويه شويه يعلى الصوت.. بشتايم من عيل واقف ..لواحد قدامه قد جده ..ماهو زي ما قلنا.. فيه أزمة أخلاق .. لا صغير بيحترم كبير.. و لا كبير حتى عنده ضمير

كل ده و الفرنه لسه مشتغلتش ..تخيلوا..

على الساعه 6:30 يخرج أول رغيف عيش.. و بعده تتقلب الأحوال و تلاقي جنب الطابور طوابير

طابور إخترعوه جديد إسمه طابور الخمسه و حبه ينادو على البياع: يللا يا باشا فين العيش .. أه ده البيه صاحب القهوه جايب لسيادته

كباية شاي في الخمسينه .. وعلطول يخرجله قفص العيش أبو 5 جنيه ..

وده برضه صاحب المطعم.. وده بقى جارهم و كتير غيرهم من أصحاب المقامات العاليه الممنوع يقفوا ولا ثانيه..

و المشكله بعد ده كله تلاقي نفسك واقف في طابور مبيتحركش .. وغير الكوسه هتلاقي الفرنه شغاله ببطئ بمعدل قفص عيش كل 10 دقايق ده غير إنها كل شويه تبطل

تسأل فيه إيه يقولولك : بقى متعرفش.. أه ده إنت أكيد بقى مستجد.. أصبر و هتعرف فيه إيه

أستنى شويه ألاقى الفرنه خرج منها واحد.. ماشي يتلفت في الشارع .. بعد شويه ألاقي عربيه جايه بتركن جنب الفرنه

يفتح باب الفرنه بسرعه .. يخرج منه تلات عمال ..كل واحد شايل فوق ضهره شوال .. و في العربيه في ثانيه يروحوا حادفين

أه دول بيبيعوا الدقيق المدعم أبو 60 يتباع ب 200

كل ده و أنا واقف لسه مستني أوصل للشباك .. آخد العيش من غير إصابات و لا تعكير و لا خناقات .. بس ده طبعاً عمره ما يحصل .. لازم منه .. غصبن عنك

و لما توصل للشباك تلاقي البيه.. يقولك مديش أكتر من بجنيه .. لأ بصراحه عنده ضمير ..مهما عملت مستحيل يديك أكتر من بجنيه .. هو إنت أحسن من غيرك يعني.

و في النهايه طبعاً تلاقي إنه كده مش هيكفي بس تعمل إيه بعد ده كله لازم تجري بسرعه من غير لا فطار و لا حاجه.. علشان تلحق ميعاد شغلك

ده غير إنك ممكن أيام كتيره متلحقش تجيب و في الحاله ديه يا إما ماتكلش يا إما تجيب العيش أبو ربع جنيه اللي لا يسمن ولا يغني من جوع

ده يا إخوانا الجدول اليومي لناس كتير في البلد و الله

فبعد ده كله شايفين إن توزيع العيش عن طريق الشرطه .. شكل غير حضاري

يا نهار أبيض ده مش حضاري .. أمال اللي بيحصل في الأفران ده هو اللي حضاري

يعني لما كل يوم نسمع عن كام شهيد عيش و إصابات و بلاوي كتيره

على الأقل كده هيبقى فيه نظام ومش هيكون فيه سرقه و لا بهدله و لا خناقات

مش كده ولا إيه.

[Ghost]

بص يا كودر

انت مفكر ان وزاره الداخليه هتحكم الطابور و كل واحد هيعرف دوره و الالتزام هيكون تمام

لا يا حبيبي

العسكري اللي واقف ده له معارفه و جبايبه و خمسين باشا فوق راسه

يعني هو عمل لنفسه طابور بالدراع و اللي مش عاجبه يوريني نفسة

و بعدين انت متخيل ان هو هيتعب نفسه و اعصابه خمس ست ساعات مع الناس و الزعيق و .........

لا يا باشا

ده هيعقعد و كوبايه الشاي هتجي ببلاش من صاحب القهوه اللي عاوز خمسين رغيف على الماشي

و السندوتشات هتيجي من صاحب المطعم المجاور علشان عاوز ......

و تبقى سبوبه حلوه قوي للداخليه

فهمت يا كودر ... الحكايه هتمشي ازاي

انا و الله بضحك و اموت من الضجك لما كانوا بيقولوا مشروع العيش دليفري من 6 -7 اشهر

و اللي عاوز عيش يرفع سماعة التليقون و هو هيكون عنده

و المشروع ده هيفتح فرص عمل .....الخ

احنا شعب بينسى و طيب و على نياته قوي و متفكرش ان في جد هيرفع صوته لان الشعب من ايام الفراعنه متربي على السمع و الطاعة للفرعون

و للجديث بقيه

تم تعديل 11 مارس 2008 بواسطة Ghost

[النجم الثاقب]

السلام عليكم و رحمة الله و بركاته

اللواء نبيل العزبي محافظ أسيوط هو صاحب الفكرة التى تمت تجربتها مؤخراً في محافظة أسيوط حيث تقوم مديرية الأمن هناك بإصدار "بونات" بواقع ثمانية أرغفة لكل مواطن علي أن يقوم الفران بالتوقيع علي البون بما يفيد أنه قام بتسليم الخبز للمواطن الذي يعود بعد ذلك لقسم الشرطة التابع للحي الذي يقيم فيه ليخبرهم بإتمام عملية التسليم.

اعتقد اللى بيحصل ده تهريج ، يعنى ايه المواطن ياخد بون بـ 8 ارغفه و الفران يوقع و المواطن يرجع قسم الشرطه عشان يقولهم ان العمليه تمت بنجاح و مفيش خساير الحمدلله ، الناس بقى تسيب اشغالها و تعمل الحوار ده كل يوم او كل يوم ويوم ، وبما ان المواطن ليه 8 ارغفه يبقى كل واحد من الاسره هيروح بنفسه يجيب العيش بتاعه

وكمان يعنى هيه الداخليه اللى هتنظم الموضوع ده ، ده الكوسه كلها فى الداخليه

اعتقد ان الحل ده فاشل من قبل التنفيذ

[النجم الثاقب]

تمام كده زى ما ghost قال

[هشام الكندي ان شاء الله]

حل فاشل بامتياز, لابد من حل جذري لازمه العيش

من وجهه نظري رفع الدعم كليه عن الخبز و الفرن يشتري الدقيق ب 2 جنيه مش ب 60 قرش

صحيح ان ثمن الرغيف هيبقي بربع جنيه بس اهو احسن لان الفلوس اللي بتدفع للدعم تروح للناس في ايديهم احسن

اخ......... نسيت ان مفيش حاجه هتروح للشعب الطيب في ايديه, لو فيه حاجه رايحاله يبقي فوق دماغه

لك الله ايها الشعب الطيب المسكين

[Abofady]

توزيع الخبز من قبل الشرطة ،فكرة سيئة وفاشلة وتدل على مدى انحدار وضحالة تفكير المسئولين الذين اؤتمنوا على تقدم ورقى المجتمع ، هذا تفكير المباحث وامن الدولة ، هم يعتقدون انهم سيقبضون على معارضى النظام عندما يذهبون لشراء الخبز ، مثل الاكمنة الثابتة التى نصبوها فى مداخل القاهرة ، وتجد راكبى السيارات يتركونها قبل الوصول الى الكمين ثم يسير على الاقدام حتى يركب سيارته بعد الكمين ، الا يوجد رجل عاقل يقول لهم عيب ، ان هذا الشعب لا يستحق كل هذا الظلم منكم ايها الجبابرة ، سبعة وعشرون عاما اصلاح اقتصادى واخرتها الشرطة توزع رغيف الخبز ، بئس الاصلاح ، وبئس رجاله

المثل يقول ( ان خرج العيب من اهل العيب ميبقاش عيب )

[Scorpion]

مع التحفظ و نقلآ عن العربية ... قرأت في سياق الأجتماع الذي دار بين رئيس الجمهورية و الوزراء بحثآ عن حل لتلك المشكلة تلك الجملة التي أستوقفتني كثيرآ :

ونقل عواد عن الرئيس قوله "إين المشكلة؟ إذا كانت في الإنتاج فيجب زيادته وإذا كانت في التوزيع فيجب زيادة منافذ التوزيع".

أين المشكلة ؟؟؟؟؟؟؟؟؟؟؟؟؟؟؟؟؟؟!!!!!!!

بعد كل هذا الوقت .. و تطورات تلك الأزمة المأساوية ... مازال رئيس جمهوريتنا لا يعلم أين المشكلة ؟

و لكن عندما يكون من ضمن الخيارات التي طرحها هو " زيادة الأنتاج " فيجب بالفعل أن أقف متعجبآ لهذا الأكتشاف الخطير ...

و أتسائل بفضول شديد عن رؤيته لكيفية زيادة هذا الأنتاج .... فهو الذي يملك الحلول السحرية لكل مشاكلنا ... من أول عقود اللاعبين الإحترافية ... الي شراء غازنا من الذين نصدره اليهم ....

فهل سيستطيع بقرار أن يقضي علي سلسلة اختفاء الأراضي الزراعية ...

ثم سيستطيع بقرار العثور علي حل يمنع الفلاح المصري من هجرة أرضه ...

ثم سيستطيع بقرار العثور علي حل يجد فيه الفلاح أن زراعة القمح مجزية ...

ثم سيستطيع بقرار العثور علي حل يمنع تصاعد اسعار السمدة و هو منتج لا نستورده ...

ثم سيستطيع بقرار العثور علي حل يمنع تسرب الدقيق المدعم الي السوق السوداء ....

هل سيستطيع بقرار إصلاح ضمائرنا .. و بعث الأمل في نفوس شبابنا ؟؟؟

[أسد]

القادم أقسى .. وأصعب ...

ما يحدث في مصر اليوم . وصعوبة الحصول على القدر الكافي من الخبز هو جزء من مشكلة عالمية كبرى .. وغير مسبوقة ...

والكل يعاني بسبب إرتفاع أسعار القمح بشكل غير طبيعي .. والمشكلة الحالية هي كارثة قومية .. يجب أن تقوم الدولة بالإضافة إلى كل ما يقومون به بدعوة الشعب المصري ومصارحته بالحقيقة .. ويجب علينا جميعاً أن نتكاتف للتغلب على تلك الأزمة .. وأن يعمل الجميع على سد إحتياجاته فقط دون زيادة وترشيد الإستهلاك وتفهم الأزمة ..

هذا ما يجب على الحكومة فعله .. فلو لم يصارحوا الشعب ويطرحوا الأزمة بحجمها الحقيقي فلا يلوموا إلا أنفسهم ...

الشعب المصري يعاني من غلاء كل شئ في مصر .. وحتى الخبز أصبح المواطن يعاني معاناة الأمرين للحصول عليه .. فمن كان يضطر بأن يأكل الخبز بكل عيوبه ورداءته .. الآن أصبح يتمناه .. ولا يستطيع الحصول عليه بسهولة .. والحياة أصبحت صعبة جداً .. فوق تحمل الناس .. للأسف الشديد ..

ولكن يجب أن نتوقع القادم .. والقادم في هذا الشأن أسوأ للأسف الشديد

وهذا الموضوع قد نشر على موقع بي بي سي منذ أكثر من شهر ويتحدث عن الموضوع

بلغت أسعار القمح في الأسواق العالمية أسعارا قياسية مع تضاؤل المعروض منه، مما يثير مخاوف من زيادة التضخم في أسعار الغذاء.

وقد ارتفع سعر القمح في غرفة التجارة في شيكاغو في شهر آذار/مارس بأقصى نسبة مسموح بها (90%) ليبلغ 11.99 دولارا للمكيال، ويبلغ المكيال = 32.5 لتر.

كما ارتفع سعر محصول القمح عالي البروتين في بورصة مينابوليس للحبوب الإثنين بنحو 25% ليبلغ أرقاما قياسية.

وقد فرضت كازاخستان قيودا على تصدير القمح في محاولة لمكافحة التضخم لتصبح الأخيرة في سلسلة من الدول تقوم بهذه الإجراءات.

وكانت روسيا والأرجنتين قد فرضتا من قبل قيودا مماثلة.

قلق بسبب الطقس

وجاء ارتفاع سعر القمح في بورصة مينوليس بنسبة الربع بعد رفع جميع القيود المفروضة على التعاملات.

وأقفلت التعاملات على العقود المستقبلية على ارتفاع بنسبة 4.75 دولارا ليبلغ 24 دولارا للمكيال، وهو رقم قياسي بالنسبة لأي محصول أمريكي من القمح.

وارتفع سعر محصول القمح الربيعي بنسبة تفوق الضعف منذ كانون الثاني/يناير الماضي.

ومما فاقم من ارتفاع الأسعار ما يتم تداوله من تقارير عن حدوث قحط في شمالي الصين، الذي ينتج معظم محصول البلاد من القمح.

وأدت قسوة الطقس إلى تدمير المحاصيل في مناطق أخرى من العالم، ويتوقع أن ينخفض المخزون الأمريكي من القمح إلى أدنى مستوى له خلال ستين عاما.

وبالإضافة إلى تناقص العرض من محصول القمح فإن الزيادة في الطلب عليه قد أدت إلى ارتفاع أسعاره.

فتضخم الثروة في الصين على سبيل المثال قد أدى إلى زيادة استهلاك اللحوم، مما يعني ازدياد الطلب على الحبوب كأعلاف للمزارع الحيوانية.

تحذير حول المعونة

وقد أصدرت منظمة الأغذية والزراعة التابعة للأمم المتحدة تحذيرا من أنها ستضطر إلى تقليص المعونة التي ستقدمها أو تخفيض عدد الذين يتلقون المعونة منها ما لم تحصل على تمويل إضافي.

وعزت الهيئة الدولية تضاؤل إمكانياتها إلى ارتفاع أسعار الغذاء والنفط في العالم، بالإضافة إلى ارتفاع عدد الأشخاص الذين هم بحاجة إلى معونتها.

http://news.bbc.co.uk/hi/arabic/business/n...000/7264555.stm

والناس في كل أرجاء المعمورة يعانون بسبب إرتفاع أسعار القمح .. ويخشى من تفاقم الأزمة خلال الشهور القادمة .. وبالطبع تعاني مصر من تلك الأزمة أكثر من غيرها لأننا نعد من أكبر مستوردي القمح في العالم ... وكذلك المشكلة قائمة على مستوى مختلف بالسعودية .. وموجودة في دول أخرى .. متمثلة في إرتفاع أسعار الخبز بدرجة كبيرة ..

ولقراءة المزيد عن الأزمة الكارثة

http://www.moheet.com/show_news.aspx?nid=96890&pg=3

http://www.aawsat.com/details.asp?section=...25&feature=

الأزمة تحتاج تكاتف من الجميع .. وعلى الحكومة في مصر أن تقوم بواجبها تجاه تلك الأزمة .. وألا تخذل الشعب كعادتها دائماً ..

[vipwithyou]

يلا يا جماعة خليهم يوصلوا لحل علشان المصريين يقدروا يحصلوا على العيش من مصر ( كفاية احنا هنطمع ولا ايه )

[رحاب]

السلام عليكم

طب يا جماعه احنا عايزين نفهم

يعنى الشرطه حتنظم الطوابير

ولا الناس حتستلم العيش من القسم

ولا العساكر هيشتغلوا فى الافران يعنى ولا ايه بالظبط

والله دى حاجه غريبه خالص

صحيح

وكم بمصر من المضحكات ولكنه ضحك كا البكاء

مع الاعتذار للشاعر

[se_ Elsyed]

السلام عليكم

طب يا جماعه احنا عايزين نفهم

يعنى الشرطه حتنظم الطوابير

ولا الناس حتستلم العيش من القسم

ولا العساكر هيشتغلوا فى الافران يعنى ولا ايه بالظبط

والله دى حاجه غريبه خالص

صحيح

وكم بمصر من المضحكات ولكنه ضحك كا البكاء

مع الاعتذار للشاعر

رداً على سؤال الإبنه العزيزية رحاب ..

أفاد اللواء سين سين قائد المنطقة المركزية لشئون المُعجنات بالرد التالي :

- الإبنة الغالية رحاب تتسائل مثلما تتسائل جموع المواطنين من الرعية عن الآلية التي ستتبعها الشُرطة في توزيع الغذاء نود ان نقول لها ...

بسم الله الرحمن الرحيم ...

إن للشُرطة دوراً رائداً لا يخفي على أحد في حفظ الامن بكافة أنواعها سواء الأمن والأمان ... أو الأمن الغذائي ... ومشاركة من الشُرطة في عيد الأم 21 مارس وعيد الشرطة 25 يناير وعيد الفران وده لسه ما جاش فقد قررنا الآتي ...

1- يتم تقسيم الشعب إلى فئات حسب الحروف الأبجدية .. فمن الألف للسين هايبقى يومهم هو يوم السبت ... ومن الشين للطاء يوم الحد ... ومن الظاء للام ألف وبعديها الياء هايبقى يومهم يوم الإثنين ...

2- كل فئة من دول هاتاخد بطاقة أو بون لصرف الجرايه ... أيوه جرايه يا رحاب يا ماما إنتي ما دخلتيش جيش ولا شوفتيه فيديو ؟

3- الجرايه عبارة عن وجبة من أفخر انواع المأكولات والطبيخ الحلو اللي له نفس ومعمول من قِبل أفخر الطُهاه بسالح الأمن المركزي ... وسمينا الوجبة دي ( كُل وأشكُر ) والصورة أهي تفتح النفس ويصحبها رغيف عيش واحد مفقع وسخن ولسه خارج من أفران مصلحة السجون التابعة لوزارة الداخلية ..

طبعاً هاتسأليني طب وبقيت الأسبوع يا سيادة اللوا ؟

هاقولك ما هو ده اللي ودانا في داهية ... إيه قاعدين نلوغ طول الإسبوع لحد ما جبنا البلد ورا ....

ما تنسيش أيها الإبنة العزيزة المقولة الخالدة " جوعوا تصحوا "

[Ghost]

بص و شوف يا سي السيد و شوفوا يا عالم ,, هذا الخبر موجود على موقع مصراوي نقلا عن رئاسه الجمهوريه

السيد الريس لسه مش عارف المشكله فين - فكرني بسمير غانم و هو بيقول هي الكوره فين -

ونقل الناطق باسم رئاسة الجمهورية السفير سليمان عواد عن مبارك قوله خلال الاجتماع ان الاحتياطات النقدية في البنك المركزي ارتفعت إلى مستوى لم تصل إليه من قبل، وهي تكفي لاستيراد حاجة مصر من السلع الغذائية، كما أن مخصصات الدعم تمت زيادتها ومتوافرة وكذلك الاستيراد يتوالى، فأين المشكلة إذاً؟

هياخد من تحويشه العمر علشان العيش

هي ديه السياسه الاقتصاديه الحكيمه لسيادته

و زي ما نقل اخونا اسكروبين ,, جاء الريس بالحل العبقري الذي تفتقئ ذهنه له بعد معرفه ابعاد المشكله

وقال عواد إن مبارك أوضح أنه لو كانت المشكلة في الإنتاج فلابد من زيادته، وإن كانت المشكلة في التوزيع فلابد من زيادة منافذه.

و جاء بالحل الذي تاخر كثيرا و هو الحل السحري الذي لم نرى له مثيلا الا في مصر على يد هذه الحكومه المشئومه

وتحدث رئيس مجلس الوزراء ووزير التضامن الاجتماعي عن خطة الحكومة لفصل الإنتاج عن التوزيع خلال ثلاثة شهور، فعلق الرئيس بأن هذه الفترة أطول مما يتطلع إليه.

و رهان على الجيش و الشرطه - بعقليه المحارب القديم طبعا- على حل المشكله

واقترح الرئيس مبارك الاستعانة بجهاز الخدمة الوطنية التابع للقوات المسلحة والمخابز التابعة لوزارة الداخلية، مؤكداً أن الاعتمادات المالية تم تخصيصها لزيادة الدعم وبالتالي فإن المشكلة هي مشكلة إدارة ورقابة ومحاسبة

الغريبه بص على الشله اللي جايه علشان تحل الازمه

و اللي رابطه في ذيله كلما ذهب الى حفله و لا اجتماع و لا صلاه العيد

وزير الدفاع - مش عارف ايه لازمته اصلا

و طبعا الداخليه

و التعليم

و التعليم العالي و و الاستثمار و الاقتصاد و البترول - اللي انفجر له حفار بكام مليون و هو متكتم على الخبر-

ناقش الرئيس حسني مبارك في اجتماعين وزاريين، عقدهما أمس بمقر رئاسة الجمهورية، قضيتي السيطرة علي الأسعار والخبز في السوق المصرية، وتطوير منظومة التعليم. حضر الاجتماع الأول رئيس مجلس الوزراء، ووزراء: المالية، والداخلية، والبترول، والاستثمار، والإسكان، والتجارة، والصناعة، والتضامن الاجتماعي، والدولة للتنمية المحلية، ورئيس ديوان رئيس الجمهورية.

فيما حضر الاجتماع الثاني رئيس الوزراء، ووزراء: الدفاع، والإنتاج الحربي، والتنمية الإدارية، والإسكان، والتربية والتعليم، والتعليم العالي، والصحة والسكان، والقوي العاملة، ورئيس ديوان رئيس الجمهورية

الدوله ما فيهاش غير وزراء يقولوا تمام يا فندم - باللغة العسكريه - وكله تمام

و الوجه الاخر هو سيادته

حكم مصر لا يصح الا ان يطلق عليه one man show

[~Heba~]

حصل يا فندم وبدأ الموضوع يُطبق في محافظة أسيوط

اللى بيحصل فى اسيوط ان الواحد بيعمل اشتراك شهرى بمقدار 5 جنيهات للاسرة كلها طبعا و بعد كده يوصله كل يوم بجنيه عيش يعنى 20 رغيف طبعا بيدفع الجنيه ده (متحسبوش انه تبع الاشتراك)يعنى 5 جنيه+30 جنيه للشهر كله=35 جنيه و يوصلك كل يوم 20 رغيف لغاية بيتك

و مش الشرطة اللى بتقوم بيه ده تبع المحافظة و الاشتراك بيدفع فى مصلحة حكومية تابعه للمحافظة

و انا كل مرة اروح الفرن الاقيه من الصبح بدرى بيجهز العيش للناس المشتركة فى اكياس وعربية بتحمل الاكياس دى توزع العيش للناس فى بيوتها

ده بيحصل كل يوم ماعدا يوم الجمعه الفرن بيكون مفتوح للناس كذلك من فترة لاخرى لما بيفيض عيش فى الفرن بيبيع للناس و بيفضل شغال لغاية الساعة 3او 4

اظن طريقة جديدة و جيدة جدا و ياريتها تعمم

بقى شئ واحد انى انا هنا اعتبر مغتربة و طلعت روحى على بال ما عرفت بموضوع الاشتراك ده و تصدقوا انى مش عارفة مكان المصلحة اللى بيدفعوا فيها الاشتراك

بقى انى اجرب تجربة اخيره فى اول شهر 4 عشان اشترك انا وزميلاتى فى السكن

[vipwithyou]

بالفعل يا ENG.Heba الكلام دة مطبق فى محافظات كتيرة وانا بنفسى شفته فى المنيا

عندما كنت ازور صديق لى وكانت هذة المرة اول معرفتى بهذة الطريقة

فوجئت بصديقى يشرح لى ذلك انه يدفع 4 حـ شهريا ً ويصل له الخبز حتى البيت

بمعنى ان المبلغ دة مقابل التوصيل للمنزل وانا فى رأيي انه مبلغ تافه جدا ً جدا ً جدا ً مقابل الراحة

وتوفير الخبز فعلا يوميا ً وتبقى اول مشكلة فى مصر تتحل

وربنا يسهل وتتطبق فى باقى المحافظات

لكن هما جربوها فى محافظات صغيرة علشان عدد السكان

تم تعديل 17 مارس 2008 بواسطة vipwithyou

[رحاب]

السلام عليكم

طب يا جماعه احنا عايزين نفهم

يعنى الشرطه حتنظم الطوابير

ولا الناس حتستلم العيش من القسم

ولا العساكر هيشتغلوا فى الافران يعنى ولا ايه بالظبط

والله دى حاجه غريبه خالص

صحيح

وكم بمصر من المضحكات ولكنه ضحك كا البكاء

مع الاعتذار للشاعر

رداً على سؤال الإبنه العزيزية رحاب ..

أفاد اللواء سين سين قائد المنطقة المركزية لشئون المُعجنات بالرد التالي :

- الإبنة الغالية رحاب تتسائل مثلما تتسائل جموع المواطنين من الرعية عن الآلية التي ستتبعها الشُرطة في توزيع الغذاء نود ان نقول لها ...

بسم الله الرحمن الرحيم ...

إن للشُرطة دوراً رائداً لا يخفي على أحد في حفظ الامن بكافة أنواعها سواء الأمن والأمان ... أو الأمن الغذائي ... ومشاركة من الشُرطة في عيد الأم 21 مارس وعيد الشرطة 25 يناير وعيد الفران وده لسه ما جاش فقد قررنا الآتي ...

1- يتم تقسيم الشعب إلى فئات حسب الحروف الأبجدية .. فمن الألف للسين هايبقى يومهم هو يوم السبت ... ومن الشين للطاء يوم الحد ... ومن الظاء للام ألف وبعديها الياء هايبقى يومهم يوم الإثنين ...

2- كل فئة من دول هاتاخد بطاقة أو بون لصرف الجرايه ... أيوه جرايه يا رحاب يا ماما إنتي ما دخلتيش جيش ولا شوفتيه فيديو ؟

3- الجرايه عبارة عن وجبة من أفخر انواع المأكولات والطبيخ الحلو اللي له نفس ومعمول من قِبل أفخر الطُهاه بسالح الأمن المركزي ... وسمينا الوجبة دي ( كُل وأشكُر ) والصورة أهي تفتح النفس ويصحبها رغيف عيش واحد مفقع وسخن ولسه خارج من أفران مصلحة السجون التابعة لوزارة الداخلية ..

طبعاً هاتسأليني طب وبقيت الأسبوع يا سيادة اللوا ؟

هاقولك ما هو ده اللي ودانا في داهية ... إيه قاعدين نلوغ طول الإسبوع لحد ما جبنا البلد ورا ....

ما تنسيش أيها الإبنة العزيزة المقولة الخالدة " جوعوا تصحوا "

الوالد العزيز سى السيد

(منتش شايف ان الاسم دا راح زمنه باختفاء الست امينه)

اشكرلى سيادة اللواء لاننى شبعت خلاص

والفقراء يدخلون الجنه

على رأى عادل باشا امام

وشكرااااااااااااااااااااااااااااااااااااااااااااااااااا

على التوضيح

انا لله وانا اليه راجعون

[vipwithyou]

تمهيدا لتعميم التجربة بجميع المحافظات

البدء في توزيع‏7‏ ملايين رغيف مدعم بالقاهرة والجيزة يوميا

بدأت وزارة التضامن الاجتماعي أمس في توزيع سبعة ملايين رغيف مدعم في عدة مناطق حيوية بمحافظتي القاهرة والجيزة‏,‏ في تجربة عملية للوصول برغيف الخبز المدعم للمواطنين‏,‏ والقضاء علي ظاهرة تكدس الطوابير بالمناطق المزدحمة‏.‏ وصرح الدكتور علي المصيلحي وزير التضامن الاجتماعي بأن عملية التوزيع تمت بمعاونة سيارات الوزارة ومديريات التموين‏,‏ حيث تم توزيع الرغيف بشكل متواز علي الأكشاك المخصصة‏,‏ فضلا عن وقوف هذه السيارات داخل المناطق وقيامها بالبيع مباشرة للجمهور‏.‏ وأضاف أن توزيع الرغيف سيتم يوميا بهذه الطريقة لمنع تهريب الدقيق المدعم وبيعه بالسوق السوداء‏,‏ سعيا وراء الاستفادة من فارق السعر بين الدقيق المدعم والحر‏,‏ مشيرا إلي أن المناطق المحرومة‏,‏ وتلك التي تعاني الزحام‏,‏ سيكون لها الأولوية القصوي في خطة التوزيع اليومية‏,‏ تمهيدا لتعميم التجربة قريبا علي مستوي جميع المحافظات‏.‏ ومن جانبها‏,‏ بدأت الإدارة العامة لشرطة التموين والتجارة الداخلية‏,‏ بالاشتراك مع الأجهزة الرقابية بالوزارة في عمل حملات مكثفة للتصدي لتهريب الدقيق‏,‏ حيث أوضح اللواء الدكتور محمد أبوشادي مدير الإدارة أن الحملات أسفرت عن ضبط‏190‏ طنا من الدقيق

تم تهريبها‏,‏ فضلا عن تحرير‏30‏ محضرا لمخابز غير مرخصة‏,‏ وقضايا نقص حصص‏,‏ وإنتاج رغيف غير مطابق للمواصفات‏.‏

[ابتسامة رضا]

السلام علينا وعلي عباد الله الصالحين

الموضوع يوجع القلب لكن المشكلة مش في العيش لوحده

حتي البدائل أسعارها ولعت نار الارز والمكرونة حتي الخضار

وبناسبة الشرطي اللي هينظم طوابير العيش

هم كانو فلحوا في تنظيم المرور في الشوارع ؟

يا اخواني الحل ده اتعمل علشان زيادة دخل الشرطي لان كل واحد هيعمل زي سواق الميكروباس

هيطبق ايده علي ربع جنيه يغمز بيه العسكر واللي ميدفع ياخد علي دماغه ويخرج من الطابور

ويبتدي الدور من الاول

داحنا هنشوف أيااااااااااااااام ربنا يستر

وحسبنا الله ونعم الوكيل