الجزء ده عاجبني أصله بقول حاجة مفيدة

[ابتسامة رضا]

السلام علينا وعلي عباد الله الصالحين :D

اخواني أنا عضوة مصرية جديدة ومعجبة جدا بمحاورات المصريين

بعد اذنكم أقترح كل واحد يذكر جزء من فيلم بيعجبه أوي

وهبتدي بنفسي

( فيلم زينب) المشهور بعبارة ( اللي ملوش أهل الحكوووووووووومة أهله)

فيه موقف لزين لما قابلت ابراهيم وقالت له انها مش هتقدر تهرب معاه

وكان مبررها انها لو هربت هتسوق سمعة أختها ومحدش هيرضي يتجوزها

علشان هي دي البنت اللي أختها هربت .. وأبوها محدش هيرد عليه السلام

علشان معرفش يربي بنته اللي هربت غير ماسوف يصيب عمامته من طين العار

وكذلك أمها ستات القرية مش هيستقبلوها في بيوتهم ومش هيزوروها

عجبني أوي الحوار وحماس راقية ابراهيم وهي بتقولهونفسي المقطع ده يتعرض

دايما في التلفزيون يمكن البنات تتعلم وتفهم

[إيزيس]

أهلا بيكي ابتسامة رضا أولا اسمك جميل جدا

إيه رأيك كل واحد يكتب الموقف اللي عجبه في أي فيلم ؟؟

[Scorpion]

الفاضلة ابتسامة رضا ...

بصراحة أختيار الأسم في غاية التوفيق ... و أهلا بيكي معانا في المحاورات ....

بالنسبة لأقتراحك يا قرنفل هانم مع أحترامي ليه طبعآ .. و مع أحترامي برضه لأول أقتراح للفاضلة ابتسامة .. لكن اسمحولي بأقتراح مختلف تمامآ ..

أيه رأيكم اننا نتكلم عن موقف معين عجبنا في فيلم ؟؟؟

حد يروح ينده زوهيري من عالقهوة ... :D

[إيزيس]

أنا بحب فيلم زوجة رجل مهم و أكتر مشهد بيعجبني لما أخدها لمطعم و كان الاسكالوب ني و الدم موجود فيه

اللقطة ليها مغزى مهم جدا في الفيلم وتعبر عن فساد العلاقة بين الزوجين و فساد الجو العام أيضا

مشهد ميرفت أمين وهي تقرأ الأخبار التي لا يريد الزوج أن يسمعها و يصاب بهياج و هي تواصل القراءة كأنها تصدمه بحقيقة يعرفها ولكن يرفضها آداء رااائع جدا

إيه رأيكم نجدد شوية و كل واحد يكتب إيه أكتر مشهد أعجب بيه في فيلم؟ :D

[Scorpion]

فيلم أقل كومبارس فيه كان عملاق سينما

نجيب الريحاني ... سليمان نجيب ... ليلي مراد .. فردوس محمد ... عبد الوارث عسر ... يوسف وهبي ... أنور وجدي ... زينات صدقي ... فريد شوقي ..محمود المليجي ...إستفان روستي و غيرهم كتير

فيلم غزل البنات ...

الفيلم ده من أحب الأفلام الي قلبي و بالذات روعة اداء الريحاني لما اتهموه بسرقة الأسورة .. او و هو بيسمع أغنية عاشق الروح .. او و هو بيعدل الطربوش في نهاية الفيلم ... فعلآ عملاق ... أكتر موقف بقي في الفيلم ده لازق في ذاكرتي ..

ابتدا بمدرس الكلب اللي بياخد 30 جنيه في الشهر و عايز يطلب علاوة .... و بعد ما مشي الريحاني في حسرة قال :

30 جنيه ... أنا لو من 18 سنة بعلم كلاب كنت دلوقتي من الأعيان ...

لكن القمة في المشهد ده :

سليمان نجيب : خلاص قلنالك متأسفين .. عجبك عجبك .. ما عجبكش ان شالله ما عجبك .. مرزوق أفندي أديله حاجة

الريحاني : مش عايز حاجة ( بنفس طبقة صوت الباشا )

سليمان نجيب : مش عايز حاجة عنك ما عوزت ... مرزوق أفندي ما تديلوش حاجة ...

ثم يبدأ الريحاني في ارتداء ملابسه و هو يبرطم

الريحاني: مافيش في الدنيا أنسان يبل الريق

ليلي : أنت ثاير عالدنيا ثورة وحشة قوي يا استاذ

الريحاني : دنيا ؟ أنا بدي أهربد الدنيا أنا بدي أهرس الدنيا ..... ناس ؟؟ هو فيه ناس ؟؟ الناس اللي في الشوارع دول ناس ؟؟؟ اللي في بيتكم ناس ؟؟ أنتم ناس ؟؟؟

ليلي : يا سلام .. هو مافيش ناس غيرك انت ؟

الريحاني : و مين قالك أني أنا ناس .. أنا ناس ؟؟؟

سمك بياكل في بعضه

سمك بطال

سمك عينه فارغة

إخص عليك سمك ...

و أنا اللي كنت جاي هنا علشان لقمة عيش ... تقولي عليا حضرتك حرامي الحلة

ليلي : حلة ؟؟

الريحاني : إسورة إسورة ... مافيش مخ

موت بقي موت

موت و خلصني موت ...

[ابتسامة رضا]

الاخوة الافاضل

قرنفل

Scorpion

شكرا جزيلا علي الترحيب

أقصد من فكرتي محاولة حصر المقاطع الفيدة لنا كمشاهدين

واللي بتقول حاجة .. أقصد بتوصل رسالة مفيدة كالمثال الذي ذكرته

وليس فقط الممتعة وعلي كل حال أنا أحب الديمقراطية وأنا طرحت الفكرة

ومن مشاركات الاعضاء هيبان اللي اختاروه و أنا موافقة عليه

[vipwithyou]

طبعا ً انا اول واحد قلت لإبتسامه رضا ان اسمها حلو

المهم اهلا بيها طبعا ً عضوة جديدة بين اخواتها

طيب ايه رأيكم اللى يقول الموقف الحلو يقول موقف معجبهوش كان فى فيلم

زى ما قالت ابتسامه رضا اننا ناخد منه حاجة مفيدة

كمان ممكن موقف وحش ناخد منه حاجة مفيدة

أصلى واقف فى زورى موقف الندل اللى كان فى فيلم الطريق الى ايلات لما تخاذل عن المهمه فى آخر لحظة كنت عايز اقتله بصراحة

موضوع جميل يا ابتسامه رضا والى الامام

اخوكى

تامر السيد

[ahmedarab]

اولا طبعا اهلا بيكى معانا فى المنتدى

واسمك جميل اوىىى فعلا

انا هتكلم عن الفيلم العملاق الناصر صلاح الدين

فى الحقيقة الفيلم دة بيعجبنى جـــــــــــــــــــدا

وفية مشهدين بالذات فى منتهى القوة

اول مشهد لما صلاح الدين بيقبل الهدنة والتفاوض بعد الخيانة فى عكا وبيروح عشان يتفاوض مع ملوك وامراء اوروبا

بيروح هو واتين من قادته ....... وبعد ربع ساعة -بعد ما كل ملك وكل امير وكل صايع حتى عرف نفسة بكل كبرياء وغرور :blink: .....

اتكلم كملتين: صلاح الدين.. خادم العرب.

المشهد التانى : لما بيقارن المخرج فية بين المحاكمتين اللى منعقدين على طرفى الصراع ..

واحده للويزا (نادية لطفى) عشان هربت عيسى العوام وازاى انها لما فقدت الكرة المقدس هوت. : فعرف الحب طريقة الى قلبك فهويتى.

..والمحاكمة المنعقدة لوالى عكا اللى فتح الابواب للغزاة وازاى انة لما فقد المحبة والقيم النبيلة هوى .: فعرف الكرة طريقة الى قلبك فهويت.

تحياتى وشكرا يا لبتسامة رضا على الموضوع الجميل

[Excellence]

أهلا ابتسامة رضا :blink:

الموضوع جميل والإسم أجمل

بالنسبة للموقف اللي عجبني وبيجي على بالى اليومين دول ..

المشهد الشهير لمحمود المليجي أو محمد أبو سويلم في فيلم الأرض ..

"كنا رجالة وواقفين وقفة رجالة"

بالمناسبة.. يوسف شاهين كان بيتكلم عن المشهد بإعجاب شديد بمحمود المليجي وإنه أعاد المشهد أكثر من 30 مرة رغم إن المليجي ممثل عالمي ويقدر يمثل دفتر التليفون على حد تعبير شاهين

[desert_eagle70]

الأول احب أرحب بالعضوة الجديدة أبتسامة رضا .. وسلام عليكم كل يا مصريين.

انا بحب مشهد نا ا كمان وفعلاً بقتنع بيه كل يوم لما كمال الشناوى قال لعادل إمام فى الإرهاب والكباب .. ( الحكومة ملهاش دراع عشان يتلوى ) .

وفيلم الباشا لأحمد زكى لما أبوه قاله ان القانون ممكن ( يبرىء 100 مجرم بس ميظلمش برىء واحد ).. يا ترى ده حقيقى.

سلام ورحمة الله

[ابتسامة رضا]

الاخوة الافاضل

desert_eagle70

Excellence

ahmedarab

vipwithyou

شكرا جزيلا علي الترحيب وأتمني فكرة الموضوع تعجبكم

تحياتي للجميع

[حسام يوسف]

السلام عليكم

سعداء بك فى منتدانا الجميل

بالنسبة لى

مشهد من فيلم (كله رائع) معالى الوزير

كان فيه بيتكلم أحمد زكى مع هشام عبد الحميد وقال فيه:

( ساعتها طلب منى جهاز أمنى أكتب تقارير فى زمايلى

صرخت

ورديت ورفضت بصوت عالى

كنت مشحون بقيم الاصالة والمبادئ

رد علية المسؤل فى جملة قصيرة ومختصرة

وحسمها فى جملتين

خليك معانا بدل ما تبقى ضدنا

اللى معانا كسبان

واللى ضدنا خسران

احنا لما بنخدم بنخدم بجد

ولما بنئذى بنئذى بجد

فخلينا نخدمك ونساعدك بدل ما نئذيك)

وفى مشهد اخر مع هشام عبد الحميد برضة

(دخلت علية زهرة مراتى ولقيتنى بكتب تقرير فيها

بصتلى وخرجت مذهولة

وطلبت الطلاق

طلقتها عشان الشوشرة

شوفت أسفل من كدة؟

واحد بيكتب تقارير فى مراته؟

وحاول هشام عبد الحميد أن يجاملة قائلا:

ما هو دول أهل الثقة يا فندم

فأصر أحمد زكى على سؤاله:

انا بسألك شفت أسفل من كدة؟

فأشار هشام عبد الحميد برأسة

علامة النفى)

تصفيق حااااااااااااااااااااااااااااااااااااااااااااااااااااااااااااد لوحيد حامد

أدعو من لم ير الفيلم

أن براه

ومن راه

أن يراه كمان عشر مرات

[Ghost]

احلى من الشرف ما فيششششششششششش

امضاء توفيق الدقن

[حسام يوسف]

السلام عليكم

ودى كمان من سيمفونية فيلم الكيف

محمود عبدالعزيز:احنا كان قصدنا خير ياصلاح

يحيى الفخرانى:اخرس مش عايز منك سفسطة والاهضربك بالجزمة

محمود عبدالعزيز:بالجزمة؟

يحيى الفخرانى:ايوة

الشر مش بس ف ارادة السوء

الشر ف سوء الارادة يا قفل

[Salwa]

مرحبا بك..... ابتسامة رضا.... بيننا .

اسمك جميل واتمنى ان يكون نابعا من واقع .

ربنا يديم عليك وعلينا نعمة الرضا .

من ناحية (( الجزء ده عاجبنى اصله بيقول حاجة مفيدة ..))...

هى اجزاء كتير ..

وان اخترت فسوف اختار احد افلام العبقرى .( الاسكندرانى )...محمود مرسى .

فيلم...شئ من الخوف .....

حد ينسى ..(( جواز عتريس من فؤادة باطل ))...وكيف جسد محمود مرسى دور الطاغية صاحب القلب الحنون ( وهو طفل لم يتحمل رؤية الدماء عندما اصر جده على ذبح الحمامة امامه )..؟؟..لاننسى ان القصة لثروت اباظة ..ولهذا كان بالفيلم اسقاطات سياسية كثيرة ...(( طبعا كانوا يقصدوا بعصابة عتريس ( اعضاء مجلس الثورة ) ...قيل ايامها ان المحيطين بالرئيس عبد الناصر طلبوا منه ان يمنع عرض الفيلم لكنه اعترض قائلا ..ما معناه....ان كان عرض فيلم سوف يغير مسار ثورة ...فلا جدوى من الثورة ..

وامر بعرض الفيلم ...

طبعا لاننسى ما قامت به شادية فى هذا الفيلم ...واغنيتها العظيمة ( ياعينى على الولد )...اعتقد كلمات الابنودى ...ايضا دورها اعطى احساس لاغلب النساء ( ايامها ) ...ان المرأة بامكانها تغيير ...اى وضع خاطئ ...وبامكانها التصرف بعيد عن احكام القلب ...

ايضا يعجبنى جدااا ......الفيلم التلفزيونى ..(( الجسر )) ..

رأيت هذا الفيلم اكثر من مرة ....وكل مرة ارى عظمة اداء العبقرى محمود مرسى ...( رحمه الله ) .

كيف استطاع الجد بكل الحب والتفاهم ...والشدة البسيطة احيانا ...ان يصل الجسر بينه وبين الحفيد ..

بل استطاع احتواء الحفيد بأن اخذه الى صومعته واطلعه على ادق اسراره ...(( طبعااااا هو حاول افهام الصبى انه يطلعه على ادق الاسرار ))....عبقرية اداء بصراحة ...

اعجبنى ايضا مشهد استلقاء الجد على العشب بجانب الحفيد ....وكل منهما ينظر فى اتجاه السماء ..

والمشهد الاخير....

الجد فى سيارته...والحفيد على ( مونو باتين ..او... مستعجلة الخال ...بعد اصلاحها )...مشهد رائع يدل على الاستمرارية بنفس المنهاج وان حدث تعديل طفيف....(( او هكذا فهمته انا ))...

و........

لن اتحدث عن عبقريته فى فيلم الليلة الاخيرة ...

الا تقولوا سلوى نسيت نفسها ........مفروض يكون فيلم واحد ..

سلام..

[رحاب]

السلام عليكم انا كمان عضوه جديده وعجبني جدا المشهد بتاع امد زكى فى فيلم ضد الحكومه لما بيقول فى المحكمه (كلنا فاسدون)المشهد دا قوى جدا وصادق جدا ولا انتوا ايه رأيكم با جماعه

[ابتسامة رضا]

الاخوة الافاضل

د. حسام

Ghost

Salwa

رحاب

سعيدة جدا بترحيبكم وبمشاركتكم

دمتم بخير

تم تعديل 15 مارس 2008 بواسطة ابتسامة رضا

[Folana]

السلام عليكم ورحمة الله...

لقطة من فيلم لعماد حمدى وصباح مش متذكرة اسمه للاسف....اتجمع اهل البلد كلهم وهتفوا بصوت جهورى:

"الغازية لازم تنزل...الغازية لازم تنزل"

وكانوا كلهم ماشافوش الغازية دى....يعنى اللى له واللى مالهوش انقاد للقطيع وبدأ يهتف هو كمان....كانت لقطة معبرة جدا بتدل على أثر الاشاعات على النفس البشرية...وازاى الناس ممكن تصدق اى كلام ..اى كلالالالالالالالالام...المهم يشبعوا رغبتهم فى القيل والقال...حتى الكلام ده لو صادر من واحد مريض حقود...

زى الممثل اللى كان عايز ينتقم من صباح علشان هربت منه....بس دى كانت غازيّة فعلا...

المشكلة اللى ممكن تصادف كتير من الناس دلوقت ..انهم مش بيحّكموا عقلهم فى اللى بيسمعوه...ودائما ما يميلون الى تصديق الاسوأ.....

وفيه ناس كل شغلتها الكلام..كلام فى كلام فى كلام...كل سلاحهم هو لسانهم ..مايقدروش يعملوا حاجة غير الكلام...اى كلام ...كلام فى الاعراض ..كلام فى الشرف ...اى حاجة تشد اذن المستمع لها..

يكذبون ويصدقون أنفسهم...ينشرون البغضاء ويهيمون بين الناس بالغيبة والنميمة..ويخوضون فى أعراض ناس غائبين مساكين لا ذنب لهم الا انهم اكتشفوا فجاءة انهم "حديث الناس"...

ولكن لكل من سولت له نفسه بالخوض فى اعراض الناس اذكره بأن هناك رب عادل يعلم ماتخفيه الصدور وقد أقسم بعزته وجلاله لينتصر للمظلوم (على اى ديانة ) ولو بعد حين

وللمظلوم اقول ان الشجر المثمر هو فقط الذى يقذف بالحجارة ...وقد تعلمنا دعاء جميل يقول

"اللهم أرنى فيمن ظلمنى أية "

"اللهم انى مظلوم فانتصر "

فصبر جميل والله المستعان على ماتصفون

قال تعالى :{يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ }الحجرات6

[galaxy]

حبيبتي قرنفله .اللقطه من فيلم ..توبه

ابتسامه رضا .......اختيار جميل و اهلا و سهلا بيكي وتمتعينا دايما بالمواضيع الحلوة دي ..............ربنا يديم عليكي الرضا و يرضينا و يراضينا كلنا .اميين

مشهد المحاكمه من فيلم الناصر صلاح الدين.................بجد ابداع...تناقض فيه معني الفيلم كله.

فيلم الكيف وحوار الاخين عن مدي مشروعيه الخلطه.........محاولات مستميته من الرائع محمود عبد العزيز مع المبدع الفخراني.....اللي بينتهي ب ندفع الغرامه .و يرخصوهالنا.

نفس الفيلم و مشهد السفاح جميل راتب مع الدكتور الفخراني................بحث من بلاد بره..يبقي ما يمشيش عندنا.................بنينا الاهرامات بقوة صحتنا .............

ولما يرد عليه الفخراني...انت شيطان..............(اغزي الشيطان يا حبيبي)

فيلم عن العشق و الهوي.مشهد مني زكي و هي فاكره ان احمد السقا رجع و بتحاول تتكلم عن حياتها الجديده هي و اختها والسعاده ماليه عنيها وهو بيبعت رساله ل منه شلبي و ينتهي ب............انا اسمي عاليه علي فكره.

كمان في فيلم زوجه رجل مهم ....احمد زكي و هو بيكمل الاناقه الكامله و بيصلح شكله و بيشد شعره ظاهرة في انفه ..........الكمال لله وحده.

مشهد نهايه الاخوة الثلاثه في فيلم العار.............شقي عمري........الملاحه........انتحار وكيل النيابه حسين فهمي..........

لما افتكر حاجه تاني هقولك يا ابتسامه رضا........اصل السؤال جه علي غفله...

[galaxy]

فيلم شباب امراءة....................عبد الوارث عسر .من جار علي شبابه ..جارت شيخوخته عليه.

مشهد تحيه و هي راجعه بشكري سرحان .و يشوفهم عبد الوارث عسر يقول ..لا دا مفيش فايده و تقوله.في ايه ...اصل البغل قطع الغومه من علي عنيه ....و ترد ..هخيطهاله بأيدي ..عشان ميقطعهاش تاني .و الربط طول الفيلم بين البغل اللي بيدور الطاحونه و البطل.

فيلم الفتوة.مشهد البدايه و تكراره في النهايه مع تغيير الابطال ...دي دوله السوق.

فيلم الزوجه التانيه و الاراجوز اللي اوحي للزوجه بالموافقه...................مشهد شكري سرحان وهما بيضغطوا عليه للطلاق....و حسن البارودي بيقنعه ...واطيعوا الله و الرسول و اولي الامرمنكم..........يا راجل يا قليل الدين.(النموذج دا منه كتير قوي)

الرائع صلاح منصور و هو شايل بنته زيزي مصطفي بعد ما غسل عاره و علي وشه ابلغ ايات الحزن و مع ذلك بيوري كل اهل البلد انه قنلها و هي وحيدته ...فيلم البوسطجي.

معلش دي بره شويه بس مشاهد الرائع شكري سرحان بعد ما كان قرفان من البلد و بيتسلي بفتح الجوابات و كل اللي هامه مصر و انه يتنقل.و يفجأان البلد فيها قصه حب دايره و لما بيحاول يعرف البطله بتغيير عنوان البطل وشكله بعد ما عرفها و شاف مقتلها قدامه و هوا بيطوح الجوابات علي صوت العاشقان.و

كفايه بقي .بدل ما تزهقوا مني .