لماذا سافر مبارك الى بولنده ؟

[Abofady]

لماذا سافر مبارك الى بولنده فى هذا التوقيت ؟ وهو نادرا ما يتحرك الا للشديد القوى

- هل يرتب ملجآ له بعد اقتلاعة من الحكم قريبا ؟

- ام هو ذاهب لترتيب صفقات قمح لمصر كما اشيع ، بعد ان اصبح المخزون الفعلى من القمح لا يكاد يكفى لمدة شهر واحد ، و بعد ان اصبحت ازمة الخبز وطوابير العيش واعداد القتلى المتزايد يوميا طلبا لرغيف الخبز باتت تهدد النظام وتكاد تضربه في مقتل وهو ما يشكل خطرا داهما عليه مما سيعجل بنهاية حكمه ، عبر تظاهرات عارمة فى جميع المدن المصرية قد يستغلها الجيش او الاخوان او قوى اخرى للخلاص منه

وانا اتسائل اين العلاقات الجيدة التى كان يتباهى بها مع اميركا وفرنسا وكندا وهى الدول المتحكمة فى سوق القمح ، لماذا رفضت الثلاث دول اعطائه القمح الان !! لقدكونوا حلف سرى بعدم اعطائه القمح واحالوه الى بولندا ، هذه الدول ايقنت ان نظام مبارك انتهى ، لذا لفظه الجميع ولا يريدون مساعدته ويتهربون منه ، ولنا فى شاه ايران عبره ، لكن شاه ايران وجد بلدا مثل مصر يخرج اليها ليقيم ، لكن هل يجد مبارك موطنا يدفن فيه مثل الشاه؟

هذه تحليلات جلساتنا بعد ان اصبحنا نفاجأ بزيارات هنا وهناك ، والخارجية لا تعلن شيئا عنها ، والمتحدث الرسمى لا يعلن شيئا ، فهل لديكم اعزائى تحليلات اخرى تفيدنا فى هذا الشان ؟

[رحاب]

يا ابو فادى خليك فى حالك

ولا يعنى علشان بولندا مش راضيه تستقبلك تقوم تشنع على الحاج ابو جمال

الراجل رايح يجيب شوية عيش علشان اهل العزبه مفيش داعى للاشاعات دى

وسلالالالالالالالالالالالالالام

[مزاميزو]

عجبت لك يا زمن

وكانت بتأكل الشعوب ايلي حواليها في فترة الجفاف أيام نبي الله يوسف عليه السلام

كانت مصر سلة الغلال للامبراطورية الرومانية

وفي فترة الحكم الرشيد الشعب مش لاقي رغيف العيش

عمار يا مصر

[nash]

وكانت بتأكل الشعوب ايلي حواليها في فترة الجفاف أيام نبي الله يوسف عليه السلام

نعم...ايام ماكان هناك حاكم عادل....يخشي الله وعقابه...

[AMEIR]

سافر عشان العلاقات الدوباماسية المتبادلة بيت البلدين واجراء بعض الاتفافقيات التي تخدم مصالح ا البلدين ومناقشة اخر مستجات الساحة المحلية والدولية

[إيزيس]

سافر عشان العلاقات الدوباماسية المتبادلة بيت البلدين واجراء بعض الاتفافقيات التي تخدم مصالح ا البلدين ومناقشة اخر مستجات الساحة المحلية والدولية

صح

لكن ما ننساش كمان و مناقشة أوضاع الصراع في الشرق الأوسط و إمكانية رأب الصدع بين أطراف القضية الفلسطينية

[Ghost]

و قد ابرزت الصحف البولنديه زياره السيد الرئيس على صفحاتها الاولى

و قد ادلى سيادته بحديث الى صحيفه عفركوش .........

و اكد على عمق العلاقات بين البلدين و تناول معظم القضايا

و طبعا نصائح الريس محدش يقدر يستغنى عنها

دا بتوع بولندا بيستنوا من السنه الى عشر سنين علشان النصيحة ديه

[إيزيس]

كما و أفردت الصحيفة 35 صفحة للحوار الهام مع الرئيس مبارك و الذي أجاب فيه سيادته بكل شفافية عن رأيه في أحوال

بولندا المتردية و قام بالتعاون مع رئيس حكومته السيد نظيف بوضع خطة طويلة الأجل للنهوض بالاقتصاد البولندي و لخصخصة

كل المخصصات الخاصة و العامة في البلد الشقيق.

[سيف الدين جلال]

جولا ت الشحاتة .....كالمعتاد ......بس يا اخوانا من الستينات على ما اعتقد كنا بنشحت قمح بردك ..بس كان المورد مختلف ..كانو الروس .....يعنى تغير المشحت ..والشحات ثابت.......

[nash]

جولا ت الشحاتة .....كالمعتاد ......بس يا اخوانا من الستينات على ما اعتقد كنا بنشحت قمح بردك ..بس كان المورد مختلف ..كانو الروس .....يعنى تغير المشحت ..والشحات ثابت.......

ليه بس....ما أحنا كنا ماشيين كويس وقاعدين بنحلم...لازم حد يفكرنا :h!!!h:

[إيزيس]

كملي النشرة يا نوشة

[رحاب]

هذا وقد رافق سيادته وفد عالى المستوى لدراسة الاوضاع الاقتصاديه لدولة بولندا الشقيقه

وتقديم النصائح الانتخابيه للسيد رئيس بولندا الشقيقه

على اساس 30 سنه حكم اطال الله فى اعمار الجميع

وقصف عمر اللى فى بالى

قولوا جميعا

ااااااااااااااااااااااااااااااااااااااااااامين :h!!!h: :P

[ابو محمود]

بس الكلام لا عن عيش اوقمح أوحتى ذرة بضم الذال

دة فى أخبار بتقول ان بولندا فيها واحدبيقرا الكف مشهود لة بالكفاءة وكان عمنا البولندى شاف فى المنام ان مصر سيحكمها مبارك حتى سنة 2030 قوم صاحبنا ما صدق وخطف رجلة وقابل الراجل بس ياخسارة يادوب وصل والراجل دخلوة الأنعاش أصل صاحبنا وش السعد ولهذا نهيب على جموع المواطنين عدم الدعاء بزوال حكم سيادتة حتى لا نقع فى حيص بيص حيث انة من المنتظر ان ينتهى العصر المباركى فى حدودالساعة الواحدة ظهرآ يوم عيد المصريين القدماء اللى هما أحنا هنا القاهرة سنة 2030 مرشات عسكرية وقرأن

[رحاب]

حرام عليك والله يا استاذ محمود

انت بتفول (مش فول) على الحاج ابو جمال طب قول 2040 يا راجل

[~Heba~]

يا جماعه معلش سامحونى بدل السخرية والاستهزاء خلينا نحاول نلاقى حل لمشكلة القمح و اساسا المشكلة دى شئ طبيعى حدوثها لانه شوفوا حال مصر ...عدد سكان كبير (76 مليون) ...ارض زراعية بتتناقص مساحتها يوم بعد يوم...ارض زراعية قلت انتاجيتها بعد بناء السد .... نقص الضمير و همه العمل لايجاد حلول جديدة

و النقطة الاخيرة دى انا ذكرتها لانى قرأت من فترة انه كان فيه مشروع لانتاج نوع جديد من القمح عالى الانتاجيه لكن المشروع اتحط طبعا فى الادراج وده كان ايام الوزير(يوسف والى) يبقى اذا عرف السبب بطل العجب

ربنا يصلح الحال ..."ليس لها من دون الله كاشفة"

[desert_eagle70]

للأسف الرئيس راح بولندا عشان النموذج البولندى فى السنين الأخيرة أثبت نموه الإقتصادى وحققوا أرباح هايلة جداً فراح يتعلم شوية أزاى يمشى إقتصاد بلده .. يا رب الصبر من عندك بولندا على عينى وراسى بس بولندا ازاى اللى روسيا وألمانيا كانوا يقولوا صباح الخير لبعض كانوا بيحتلوها وطول عمرها ضايعة بين الاتنين . فعلاً عسكرى بكالوريوس صفا وإنتباه إيه اللى فهمه فى إقتصاد وعيش وشعب تعبان .. بجد رئيس وحكومة معندهمش دم . ده واحد يقول حاضر يا فندم أوامرك يا فندم يمسك بلد أزاى ؟؟؟؟؟؟؟؟؟؟

وبالنسبة للقمح ما السودان جنبى يعنى الهند والصين يروحوا السودان يستثمروا فيها وانا اخرى مع السودان افرقع بمب فى حلايب وشلاتين . وهلاقى تربة زيها فين وجو ونيل أبيض وأزرق . واحلى لحم خرفان.

[Abofady]

اعلنت جريدة المصرى اليوم 19/3/2008 عن سقوط ضحية جديدة لطوابير الخبز فى الاسكندرية، والجديد فى الموضوع هى استعمال قنابل المولوتوف فى الحصول على الرغيف ، اذ القى شقى على واجهة الفرن زجاجة بنزين فاشعل بها واجهته مما اصاب سيدة مسنة بحروق كثيرة فى جسدها الامر الذى ادى الى وفاتها اليوم.

اما فى المنصورة فمازالت مديرية التموين مشغولة بتوزيع منشورات لااخذ راى المواطنين بتوزيع الخبز على البيوت او فى اكشاك او اماكن اخرى ( هكذا يفكر المسئولين ) المعركة دايرة والشهداء يتساقطون يوميا ومدير المديرية ما زال يسأل !!!!! ياعم اخلص ووزع ...الناس بتموت بعض ، يا راجل يارخم ، يا بارد ، يا لكع ، لسه النهارده هتاخد راى المواطنين ، ماعملتش حسابك من سنة ليه ؟ والوزير المسئول ما عملش حسابه ليه ، والرئيس اللى بوظ علاقتنا بجميع الدول المصدرة للقمح الم يعمل حسابه هو الاخر ، نحن ندفع ثمن تحكم الجاهلين فينا ، ومخطىء من يعتقد ان هؤلاء الافراد يعملون لصالحنا ، سوف يتزايد قتلانا وشهدائنا يوما بعد يوم طالما هذه الفئة الفاشلة تحكمنا .

[علي البدري]

انا اعتقد انه سافر علشان يشوف ليخ فاونسا ...... ويشوفه حلق شنبه ولا لسه........

وبعدين الراجل مذنوق في بدل سفر...... العيشه بقت غاليه ومش عارف يشتري عيش من المدعم يعمل ايه يعني ........

قام سافر علشان يجيب شوالين دقيق لأهل بيته ....... ولا تنسوا شم النسيم جاي وهو بيحب الرنجه والُملوحه وبيكفهوش طولتين

عيش

تم تعديل 24 مارس 2008 بواسطة علي البدري