إلغاء تخصيص 8.5 مليون متر مربع وسحبها من المسقعين

[se_ Elsyed]

خبر في أهرام اليوم

في مواجهة حاسمة لظاهرة التسقيع والاتجار بأراضي الدولة‏,‏ ومن أجل وقف عملية استخدام تلك الأراضي في غير الهدف المخصصة له‏,‏ سارعت وزارة الإسكان لإلغاء تخصيص نحو‏8,5‏ مليون متر مربع من أراضي المدن الجديدة لمستثمرين غير جادين‏.‏

فقد تم إلغاء تخصيص‏700‏ فدان بمدينة السادس من أكتوبر مقسمة إلي ست قطع‏,‏ و‏15‏ فدانا بمدينة الشيخ زايد‏,‏ وألف فدان بالقاهرة الجديدة مقسمة إلي أربع قطع‏,‏ وجري الحجز الإداري علي‏200‏ فدان بالشيخ زايد‏,‏ و‏150‏ فدانا بالشروق‏.‏ وأكد المهندس أحمد المغربي وزير الإسكان ـ في تصريحاته للصحفيين ـ أنه تم سحب ملايين الأمتار من الذين حصلوا علي الأراضي بغرض الاستثمار دون أن يلتزموا بتعاقداتهم‏,‏ وتقاعسوا عن البناء بهدف الاتجار والتسقيع وإعادة البيع‏.‏

وقال الوزير‏:‏ إن تعليمات الرئيس مبارك كانت واضحة في هذا الشأن‏,‏ وشدد علي ضرورة التعامل مع تلك الظاهرة بحسم‏.‏ وقال‏:‏ إن الوزارة لن تتهاون مع المضاربين في الأراضي‏.‏

طبعاً ده حق أُريد به باطل من الحكومة

يعني هو إجراء ليس المرجو منه القضاء على التسقيع بقدر ما هو عمل سبوبه محترمة قوي قوي من الأراضي دي

يعني الحكومة بايعينها بملاليم من فترة لهؤلاء المستثمرين وواخده فلوسها ضاربها في جيبها

وبعدين إتسحبت وهاتتباع بأسعار اليومين دول ولو قولنا إنها هاتتباع بمتوسط وقدره 500 ج للمتر ... يبقى بنتكلم في مبلغ وقدرة

يا نهار مش فايت

يات نهار مش فايت

كام يا عم

4.250.000.000مليار ج !!!!!!!!!!!!!!!!!!!!!!!!!!!!!!!!!!!!!

[رمضان]

ربنا يخلي لينا الحكومة الرشيدة وتوجيهات سيادة الرئيس

طيب يا سي السيد ما الحكومة بتعمل للمصلحة وطلعت بسبوبة حلوة للناس اهيه

هيه مش الحكومة بتشتغل لحساب المواطنين ولا ايه يعني الوزراء دول مش موظفين عند الشعب

[osaimi]

والله لو صح هذا الكلام يبقى دا شيء كويس وأنا شخصيا أقول أن المغربي ده أول شخصية محترمة تمسك وزارة الإسكان

تم تعديل 16 مارس 2008 بواسطة osaimi

[vipwithyou]

اعتقد ان دة فرقعة اعلامية

واذا كان حدث اولا هنشوف حاجة زى كدة على موقع الهيئة

ثانيا ً اكيد اللى اتسحب منهم او هيتسحب منهم مش مستسمرين كبار ( فاهمينى طبعا ً )

وطبعا ً اذا دا حدث يبقى هدفهم واضح زى سي السيد ما بيقول

شوفوا حوارات الوزير عن الموضوع دة فى القنوات الاعلامية وانتوا تحكموا

[se_ Elsyed]

اعتقد ان دة فرقعة اعلامية

واذا كان حدث اولا هنشوف حاجة زى كدة على موقع الهيئة

ثانيا ً اكيد اللى اتسحب منهم او هيتسحب منهم مش مستسمرين كبار ( فاهمينى طبعا ً )

وطبعا ً اذا دا حدث يبقى هدفهم واضح زى سي السيد ما بيقول

شوفوا حوارات الوزير عن الموضوع دة فى القنوات الاعلامية وانتوا تحكموا

الموضوع بقى له فترة بيتنفذ يا تامر وروح أي جهاز مدينة وأنظر على النشرات الداخلية المُعلقة هناك وكل فترة تلاقي أسامي الناس اللي مسحوب منها أراضي لعدم الجدية ...

[desert_eagle70]

طيب الناس دى مش هتاخد تعويض على الفلوس اللى دفعتها .. ولا ده منصوص عليه أن فى فترة معينة لاززم يقوم نشاط على الأرض المباعة.

وإيه الشهامة دى .. الحمد لله انهم فاقوا بس هل ده هيطبق على الأجانب ولا مستثمرين مصر الغلابة. زى بتوع سينا اللى باعوا الأرض ليهم وبعد كده خدوا تعويضات على ما أعتقد أكتر من اللى دفعوه.

[muslim4ever]

شىء محير

الارض تترك برغم الاشتراطات الحكومية للبناء فى مدة معينة وليس للتجارة ورفع الاسعار يقولوا حكومة حرمية ومرتشين ومتفقين من المستثمرين

الارض تتسحب لعدم الجدية فى البناء يقولوا حق يراد به باطل

افلح ان صدق هذا المغربي هذة الخطوة ان تمت سوف تودى الى زيادة فى المعروض وبالتالى انخفاض الاسعار قليلاً

وان تم وضع اشتراطات اكثر صرامة من الموجودة الان فسوف تودى لانفراج الازمة

[vipwithyou]

والله يبقى كويس

بس يعرضوا بقى الاراضى دى تانى للقرعة مش تتباع من تحت لتحت

وكدة يبقوا عملوا اللى عليهم

[The Coder]

خد عندك الخبر ده كمان بخصوص الموضوع ده

بيقولك إن فيه عضو مرموق في البرلمان و أحد أعمدة الحزب الوثني الإستكرادي ( الحاكم يعني ) و هو هشام طلعت مصطفى

كان واخد حتة أرض في القاهره الجديده

وو الله مش هتصدق لما أقولك إن حتة الأرض ديه مساحتها 20 ألف فدان

و كان خدها زمان أيام إبراهيم سليمان.. لأ و المصيبه كمان إنه كان واخدها ببلاش ومن غير ولا تعريفه مقابل إنه كل ما يبني و حدات سكنيه عليها .. يدي جزء منها للحكومه

و طبعاً مع الوقت بدأ سعر الأرض ديه يرتفع .. و البركه في الوزير الجديد اللي كان بيساهم في ده بإنه يرفع سعر الأراضي ديه في المزادات

لغاية ما وصل تمن المتر في أراضي الباشا ده ل 4 ألاف جنيه

يعني إضرب كده 4000 في 20000 فدان و شوف بقى الوكسه

و المشكله إنهم بيقولوا إنهم سحبوا ألف فدان بس من القاهره الجديده و على إعتبار إن الأرض ديه إتسحبت من العضو المحترم السابق ذكرة طب بقية الأرض يعني ال19 ألف فدان التانيين إيه مصيرهم

و على فكره الكلام ده من برنامج صباح دريم دلوقتي

و السؤال الوجيه اللي طرحوه هل القرار ده هيتطبق على كل اللي إشتروا أراضي و سقعوها و لا برضه هيكون فيه خيار و فقوس ؟

[MOOOM]

تعرف حضرتك لو كان الكلام ده سليم .. يبقى بتتكلم في مبلغ أد إيه ؟؟؟

4000 جنيه للمتر × 20000 فدان × 4200 متر للفدان = 336.000.000.000 جنيه

يعني 336 مليار جنيه ؟؟؟؟؟؟؟؟؟؟؟؟؟؟؟؟؟؟؟؟؟؟؟ يالهوييييييييي

يعني متهيألي تكفي تسديد ديون مصر كلها وبفوائدها كمان

حسبي الله ونعم الوكيل في كل من ينهب ثروات البلد وقوت الشعب

[إيزيس]

يالهوييييييييي

صحيح يعني

[هشام عباس]

يا جماعه انا بقالي فتره تقريبا بعيد عن الدنيا!!! والكلام الي بتقولوه ده صحيح؟ بجد؟ والارقام ديه حقيقيه ؟! ولا احنا بنهزر!!!!! بصراحه ارقام فلكيه وفي الاخر الناس الغلابه يموتوا بعض علشان رغيف عيش!!!!!!!!!

ده معناه انه من وزاره واحده وبس وهيي وزارة الاسكان ممكن نسدد ديون مصر بالكامل

ونزرع الصحرا

ونجيب حديد وندعمه للناس

وكمان نستورد ضعف كمية القمح ونأكل الناس كلها

والدنيا تبقى لونها بمبي

!!!!!!!!!!!!!!!!!!!!!!!!!!!!!!!!!!!

بس طبعا كل ده مش ممكن يحصل لأننا بنتكلم عن مصر ومش عن بولاندا مثلا

لكن بجد يا جماعه مفيش طريقه اننا نوصل الكلام ده للدنيا كلها؟ علشان الناس الي نايمين في العسل زي حالاتي كده ومكنش عندهم اي فكره يعرفوا الي بيحصل في البلد

ياريت المعلومات ديه توصل لأكبر عدد من الناس ويمكن حاجه تتغير

[se_ Elsyed]

لكن بجد يا جماعه مفيش طريقه اننا نوصل الكلام ده للدنيا كلها؟ علشان الناس الي نايمين في العسل زي حالاتي كده ومكنش عندهم اي فكره يعرفوا الي بيحصل في البلد

ياريت المعلومات ديه توصل لأكبر عدد من الناس ويمكن حاجه تتغير

إنت طيب قوي يا عم هشام !!!!

يا ريس الناس كلها عارفه إن البلد فيها فلوس أكتر من دول الخليج نفسها

بدليل

وجود أكثر من 30 مليار جنيه - 30 مليار جنيه - مش لاقيينهم في ميزانية العام الماضي ... يعني إتصرفوا وما فيش لهم بند مُسجلين تحته !!!!!!!!

ولو الفضيحة ريحتها فاحت قوي هايقولوا إنهم إتصرفوا في وزارة الإعلام أو وزارة الدفاع اللي بتدافع عن كرامتنا ومُقدرات ومنجزات الثورة ... اصل بعيد عنك إحنا من الدول النادرة في العالم اللي ميزانية وزارة الإعلام والدفاع ميزانية سرية لا يطلع عليها أحد في البلد غير الراجل الكبير .... هذه حقيقة ... يعني عشان تبقى هي الشماعة اللي بيعلقوا عليها النهايب اللي بينهبوها أو هي البلاعة اللي مليارات البلد بتتكب فيها ...

وده مش كلام سي السيد ولا أبو زيد الهلالي لا سمح الله

ده كلام جودت الملط رئيس الجهاز المركزي للمحاسبات واللي أطلقوا عليه كلابهم المسعورة في مجلس الشعب لتعقره قبل ان يتكلم ويفضحهم

يا عزيزي في خلال أقل من 5 سنوات إتباعت كمية شركات وبنوك وأراضي كانت خلت كل واحد فينا راكب عربية شبح كابورلية 8 سلندر .. وساكن في شقة عالنيل

ولكن كله بيتحول بره على سويسرا بحيث لما تيجي ساعة الجد يركبوا طيارتهم ويقولوا يا فكيك

[osaimi]

هنقول ايه غير حسبنا الله ونعم الوكيل ، أتمني من الجميع أن يقول حسبنا الله ونعم الوكيل فى من ظلمنا ونهب ثروات البلاد وأفقر الشعب المصري وتسبب فى تخلفه لهذا الحد قولوا حسبنا الله ونعم الوكيل فيهم خصوصا قبل صلاة الفجر ، وبإذن الله هنشوف فيهم يوم أسود

[هشام عباس]

عزيزي سي السيد زي ما انا مش فاهم حاجه أأكدلك ان فيه كتير جدا غيري كمان مش فاهمين ومش عارفين حاجه

والله انا سألت امبارح اكتر من حد اعرفه وبالتأكيد كلهم مغتربين هنا زيي وملقيتش ولا واحد فيهم عنده اي معلومه عن الحاجات ديه بالرغم من انهم بيقروا الجائد كل يوم طبعا المصريه لكن واضح ان المصريين بقوا مش بيصدقوا المصايب ديه من كتر ما هيي كتيره وبعيده حتى عن الخيال فالناس بقت بتقول ده كلام تهويل ومش حقيقي ومن كتر الارقام الناس تاهت فيها

حسبنا الله ونعم الوكيل

[se_ Elsyed]

يا عزيزي هشام ... مناقشة تقارير المخالفات الصادر من الجهاز المركزي للمحاسبات تم مناقشته في مجلس الشعب ... وفضح السيد جودت الملط تلك المليارات المنهوبة ....

ولكن سرعان ما اطلقت عليه الحكومة كلابها السعرانه في وسائل الإعلام لتُسكته إلى الأبد ولتؤكد إنها هي التي على حق .