وعليكم السلام من مصر

[ابو حلاوه]

الاستاذ ابو حلاوة قال:

"انا لم افهم من كلام المداخلات ان كاتبها غير مصري "

اخيرا حد خد باله

"هل تفريغ شحنة انفعالية ورائها احساس بالعجز و الظلم و الاحباط اصبح ممنوع .."

بقى انا برده اللى بغمز و بلمز حرام عليكوا

مع اهداء هذا الاقتباس الى رواد قسم الفساد و السياسة وفلسطين....الخ

الست جوولد حقك عليه وانا ميهونش على زعلك و موضوع التعليم ده فيه كلام برضه لكن تأكدى ان شاء الله ان معظم مجهودى شبه متوجه لاصلاحه

أخUnknownPowerSpots :

"فياريت بلاش الحساسية الزائدة دى من بعض الأخوة"

وده المفروض يكون موضوع لوحده ممكن نناقشه هنا او فى موضوع جديد ,وان كان قد بدأ النقاش فيه بالفعل و حتى لو كان اللى كتب غير مصرى دى مصر دى قلب الوطن العربى يعنى ممكن حاجة بسيطة فى مصر تتعرف للعرب قبل حاجة كبيرة عندهم

"وخلوا الراجل يكمل عن الحقائق اللى كلنا عارفنها0"

ثانى ضربة تحت الحزام

هل ضايقك تعليقي بأنك تشعر بالعجز و الاحباط و الظلم

هل يرضيك ان اقول لك انني اشعر بنفس الشعور و انا مصري اعيش خارج مصر و حالها لا يرضي لا عدو و لا حبيب ..و اشعر بها كل يوم بالرغم من غربتي

عبارة لا داعي للحساسية الزائدة عجباني جدا و رأيتها مناسبة للرد علي بعض التعليقات و انا الان اوجه لك نفس العبارة

و يا عزيزي بالنسبة لعبارة الضرب تحت الحزام لا يوجد ضرب و لا يوجد حزام للضرب تحته نحن نتحاور من اجل مستقبل افضل لوطننا و لسنا في حاجة للضرب فوق الحزام او تحته

[عمر بيك]

حساسية....ملهاش علاج.

وهذا ليس ...اهداء للعيوب...حتى نطلب له الرحمه.

الخلاصة....

انا بحب كل ذرة فى هواء مصر...

والموضوع اسمه...السلام عليكم من مصر.

وبرضه......مازلت اقول ...فيه فرق..بين النقد...والتشريح.

وطبعا.....لانبعد عن الموضوعية.

انا....تعلمت منذ نعومة اظفارى...

الاستماع جيدا...للرأى الآخر.

وبموضوعية...

احييك...اخى الفاضل طفشان....على طولة بالك.

لو انا منك....ماأسمعنيش.

عنيدة.

سلام.

الأخت العزيزه سلوي:

انا فوت الرد السابق بتاع الباشا علشان انا بيه بس وكمان علشان عارف انك منفعله وغيوره علي مصر بس دي مش النقطه!

أنا كل ما أشوف الموضوع "سلام عليكم من مصر" ادخل واشوف يمكن حد بينادي علي اقول يمكن عايزني ارجع بس للأسف كله كلام في الفاضي.

أنت بتحبي مصر اكتر مني او اي شخص اخر ازاي يعني عملتي ايه بالضبط لمصر... انا مش بقلل ولا بشكك في مصريتك بس سؤال وخلينا بدون فاعليه يعني تراب مصر وهوا ها كلام جميل ومؤثر بس معملش حاجه لك ولالمصر.

اكتر شئ ضر مصر هو وضع النعامه الذي يعيشه المصريين سواء في الداخل او الخارج الي مش عرفين مصر فين وحالتها ايه. احنا حالتنا تقرف !

يمكن الكلام إلي انتي فاكره تشريح يكون نقد بالنسبه لشخص آخر. انا دايما اسمع أخواتي أولاد ابي وامي واصدقائي عن الفساد في مصر ولما افتح بقي(فمي) واتكلم يتقال عني خواجه وفقدت مصريتي بعد الغربه.

انا خدمت في الجيش مرتين مره متطوع ومره اجباري بعد الكليه اشتغلت في قطاع خاص وسافرت لما الحاله زنقت واتنين اخدوا محلي بعدها يعني اعطيت فرصتي لناس محتاجين. الناس في المجتمع الي انا عايش فيه سواء عرب ام خواجات في الشغل او الجيران يعرفوا اني مصري مع ان شكلي مش مصري :cool:

سلام الي ارض الكنانه....

عمر!

[Salwa]

صباح الخير يا عمر بك ....المحترم.

حاشا لله..لم اكن اقصد السخرية..عندما قلت..باشا.

لكنى ..افتكرت...على ما سيادتك كتبت...وعلى انا ما رديت.

اخدت الباشوية.

ولاتزعل.... ..كلنا أخوة...والا ايه؟

يعنى انا مثلا...مزعلتش والله...لما قلت انتى عملتى ايه لمصر.

بالعكس...انت صح.

بس احنا...ياأخى الفاضل...لانطبل...وليس لدينا مطبلاتية...ينفخوا

فينا عالفاضى.

واللى..بيعمله...اللى زيى..وزى غيرى...كقطرات من المياه فوق صحراء

جرداء...ولكنها تأخذ صفة الاستمرارية..

لانعلق...ميداليات...ولانياشين.

ولكنها...صحراء...

تحتاج ميزانية دولة...لاستصلاحها......ولا ازيد.

وسبق وقلت...انا أفرق...بين مصر كشعب ومصر كحكومة.

عموما....مرة اخرى...حصل خير.

وربنا يعطينا العمر...ونشوف مصر....كما كانت.

كدة الواحد يبقى فاضل له 100...هانت.

سلامى.

[بنت شعنونة]

مصر فيها بلاوي كتير والله..

وكلنا عارفينها وشايفنها..

لكن والله في ناااااااااااس كتيييييييير نفسها تبقى كويسة

واقل دليل لما جه واحد "اسلوووووووبة" كويس زي عمرو خالد

شوف غييييييير نااااااااااااااااس قد ايييييييييييه

وناس كان مافيش منها وامل واستحااااااااااااااالة انك تتخيل انهم يتعدلوا.. :roll: :? :?

انا بحاول ادور ع الجزء الحلو في كل انسان

صحيح اوقات كتييييير بيأس

واوقات اتقلب لوحش كاسر واكل الناس

انما برضه بحاول.. :D

والله العظيم في شغلي الموظف اللي الاقيه ماشي بالروتين باخده بالهداوة الاول

مرة

التانية

ما نفعش

بمارس سلطتي عليه بالترهيب لحد ما يفهم انه تكاسله دا مامنوش فايده

وفيه ناس كتير والله من كلمتين طيبين وابتاسمة يديك عنيه

حرام نطلع كل القطط الفطسانة بس في مصر في موضوع واحد بس

بجد يا اخ محمد

كلامك جابلي حالة اكتئاب وحسستني ان مصر دي مقرفة جدا :(

حط شوية عسل ع السم عشان الواحد يعرف يبلعه طيب :(

[عمر بيك]

صباح الخير يا عمر بك ....المحترم.

حاشا لله..لم اكن اقصد السخرية..عندما قلت..باشا.

لكنى ..افتكرت...على ما سيادتك كتبت...وعلى انا ما رديت.

اخدت الباشوية.

ولاتزعل.... ..كلنا أخوة...والا ايه؟

يعنى انا مثلا...مزعلتش والله...لما قلت انتى عملتى ايه لمصر.

بالعكس...انت صح.

بس احنا...ياأخى الفاضل...لانطبل...وليس لدينا مطبلاتية...ينفخوا

فينا عالفاضى.

واللى..بيعمله...اللى زيى..وزى غيرى...كقطرات من المياه فوق صحراء

جرداء...ولكنها تأخذ صفة الاستمرارية..

لانعلق...ميداليات...ولانياشين.

ولكنها...صحراء...

تحتاج ميزانية دولة...لاستصلاحها......ولا ازيد.

وسبق وقلت...انا أفرق...بين مصر كشعب ومصر كحكومة.

عموما....مرة اخرى...حصل خير.

وربنا يعطينا العمر...ونشوف مصر....كما كانت.

كدة الواحد يبقى فاضل له 100...هانت.

سلامى.

عزيزتي الأخت سلوي : لا واللهي ماحصلش مع اني مقدم علي البشوييه من 24 سنه بس الظاهر انها تمنح لرجال الأمن فقط :D

انا قضيت الصيف الماضي كله- سته اسابيع -في مصر ولما رجعت وحكيت عن احوال مصر اصدقائي اتريقوا علي وقالوا لي اني الظاهر رحت سويسرا.

احنا ينقصنا الكلام وازاي ننقد نفسنا ونسمع فمثلا يمكن لما الكل يحس ان الدروس الخصوصيه مشكله يعملوا حاجه.

المصيبه ان الكل يعرف انها مشكله ولكن مفيش حد بيعمل حاجه ليه؟ الناس بتتفاخر كام دفعوا دروس خصوصيه لأولادهم يعني المشكله اصبحت واقع ونيشان علي الأكتف.

لازم نشتكي ونتكلم ونصرخ واهم شئ نسمع.

عمر!

[MKG]

على فكرة يا جماعة افتكر انى قلت قبل كده فى اول مداخلة

انا هتكلم عن تجربتى و ياريت الواحد يستفيد من خبراتكم

فالاساس فى الموضوع ده ان الواحد يكون سمع و شاف يعنى تجربة من واقع معيشته هنا فى مصر

للاستفادة و الافادة

الراية البيضا

بصراحة بعد الهجوم العنيف اللى تلقيته اعدت افكر و افكر

لقيت فعلاً ان فى شىء من الموضوعية فقدته و ان كنت ناوى استدراكه بس فعلاً لقيت العملية سوداوية حبتين لذا اقرأ المداخلة القادمة

مع محبتى

[MKG]

يا جمال شعبك يا مصر-1

صراحة انا تعاملت مع موظفين وحشين كتير لكن برده شفت موظفين ممتازين كتير (و نعسر الذاكرة و نشوف الفيلم.........

اتذكر لما كنت بطلع البطاقة الجديدة كان الموظفين فى القسم اللى فيه جهاز التصوير(للمقيمين بره من زمان البطاقة اللى انتوا عارفنها بتلفظ انفاسها و بيتم استبداله ببطاقة جديدة شبه كارنيه نادى الاهلى (للاخوة محدودى الدخل شبه كارنيه مركز شباب الجزيرة)و يتم التصوير فى القسم اللى فيه جهاز التصوير للبطاقة مباشرة و ذلك لصعوبة تزويرها )و حاجات زى هات شهادة ميلاد و الختم مش واضح لدرجة انى لما انزلت من القسم قعدت ازعق و مضايق و الكلام ده فى قسم عابدين

فى حين ان الناحية الاخرى فى القسم المجاور لى رحت قلتلهم على موضوع شهادة الميلاد و الموظفة مستغربة ازاى موظفة عابدين طلباها امال صورة استمارة البطاقة القديمة بتعمل ايه قلتلها ان الموظفة التانية صرحت بعدم ثقتها فيهم(حصل بالفعل)التانية اضايقت و طلعت فى قمة الادب و عملت ليه ورقة لاثبات تاريخ الميلاد و قعدت تدور فى الملفات و سلمت ليه الورقة و انا مش مصدق انها وفرت علي وجع دماغ تطليع مستخرج و فلوسه

الموقف التانى

وانا صغير حوالى 2 ابتدائى او 3

و احد نصب على وخد كل اللى معايا و كان معايا فلوس هشترى بيها قصص اطفال لى (مفيناش من تريقة)حاجات للبيت

المهم كان مقنعنى انه حاطط الفلوس بتاعتى جوه كيس و قفله كويس وادهونى

رحت المكتبة اقتح الكيس القيه جواه كيس افتح الكيس القيه جوام ورقة فى الاخر اما الاقى مليم ابدا

طبعا انهرت و قعت اعيط :D (2 3 ابتدائى)الراجل طلع جدع و ادانى القصة ببلاش (برضه عشان متوسعش كانت بربع جنيه)و ادانى على ما اتذكر جنيه

دا مكنش تسول بس انا كنت صغير قوى و حتى مش متأكدتماماً من المعلومة دى. :mad:

الموقف التالت

كنت لسه مدفعتش المصاريف(نسيان على كسل )و كنت عايز اطلع اشتراك المترو راح واحد من الحرس طلع جدع جدا و راح واخد الورق بتاع الاشتراك وختمه و كل الاختام بنفسه و مخدش ولا مليم :D

" :twisted: حته رزالة واحد فى حرس الجامعة مقدم تقريبا حبس واحد من التيار الاسلامى و ضربوه :twisted: "

فيه حكايات كتير جدا بس ده اللى انا فاكره دلوقتى

و السلام عليكم ورحمة الله و بركاته

[MKG]

تم حذف المداخلة بواسطتى مكج

[MKG]

اخى الفاضل ابو حلاوة

صدقنى المشكلة الاحساس انك مش قادر تعمل حاجة

المشكلة انك بتعمل قليل او بمعنى اصح اللى تقدر تعمله قليل جدا

الواحد بيتألم من كل شىء مش قادر يغيره

بس بايدينا ايه يمكن يكون مجرد كون هذا المنتدى بداية لعمل شىء

الاخ الفاضل عمر

وضع النعامة ده للأسف متفشى و اللى يقول عيالى و ظيفتى

يا عم عايز امشى جنب الحيط

و ده اللى بيسبب كبت و بيخلى واحد يمسك مسدس و قنبلة و يضرب اخوه المصرى(احد الاسباب الشعور باليأس والاحباط وليس كل الاسباب طبعاً)

و لكن نفسى نعمل توبيك اسمه نقدر نعمل ايه نناقش اللى نقدر نعمله حتى ولو كان صغير جدا بس احسن من لا شىء

و شكرا جدا لك

الاخت شنشن

صدقينى يا ما الواحد بيحاول و تأكدى انى كتير بحاول اتخذ الاعذار

مصداقا لحديث الرسول (ما تصلى عليه)

لكن الواحد ليه قدرة تحمل و مش كل الجوانب سوداء كده فيه ابيض كتير و ممكن تكتبى عنه

[عمر بيك]

نر جوا لكم غربه سعيده :mad:

من فتره قعدت اتفرج علي برنامج للمغتربيين وكان ضيف الحلقه وزير الهجره -يمكن اسم تاني. المهم السيد الوزير كان عمال يجيب علي تساؤلات المغتربيين من كيفيه تجديد الباسبور واخراج شهاده ميلاد وما الي ذلك من موضيع ممكن يجيب عليها غفير مش وزير.

طبعا انا مستني اسمع من سياده الوزير يقول ايتها حاجه بخصوص عوده المهاجرين ولا كلمه واللهي خايف علي وظفيته. طبعا مخبيش عليكم انا كنت قرفان من البرنامج ونفسي أغير القناه أو اكلمهم واسأل عن الموضوع بس ترددت لآحساسي ان اجابه السيد الوزير ممكن تذود من قرفي.

في نهايه البرنامج كانت الطامه الكبري ومقدمه البرنامج تختتم البرنامج بقولها سيداتي وسادتي نرجو لكم غربه سعيده. غربه .. سعيده ..كلمتان متناقضاتان ولا يمكن ان يوافقوا بعض يعني زي متقول للفقير جوعا هنيئا او السجين وحده جميله.

مع تحياتي وأرجو لكم عوده بطيئه :wink:

عمر!

[Faro]

نر جوا لكم غربه سعيده :mad: 

على ماأظن أن المذيعة الذكية تريد تحذير المغتربين من العودة ولذا ختمت البرنامج بهذه الأمنية .

[Al 7aZeeN]

المغتربين المصريين أصبحوا جزء هام للميزانية المصرية عن طريق تحويلات العاملين فى الخارج وعلى ذلك فأن التعليمات الجديدة للمذيعات أن تقول لكل مغترب " غربة سعيدة " وغصبن عن عين التخين لازم تبق سعيدة0

[MKG]

عزيزى عمر لا تتعجب

فاعتقد ان الدولة تكسر قلة وراء كل مغترب لعدم العودة مع

اطيب التمنيات لاى تحويلات

صحيح شعور الغربة بعد فترة بيزيد فى نفس الواحد

لكن احيانا بيكون فيه غربة فى الوطن

للبعض ازيد

___________________________________________________

لا تتعجب انها مصر (الدولة)

[عمر بيك]

عزيزى عمر لا تتعجب

فاعتقد ان الدولة تكسر قلة وراء كل مغترب لعدم العودة مع

اطيب التمنيات لاى تحويلات

صحيح شعور الغربة بعد فترة بيزيد فى نفس الواحد

لكن احيانا بيكون فيه غربة فى الوطن

للبعض ازيد

___________________________________________________

لا تتعجب انها  مصر (الدولة)

أنا معك وفاهم قصدك.. الدوله دايما تدعو المغتربين بالأسهام في إقتصاد مصر بخبراتهم و استثمارتهم وللأسف كثيرا من المغتربين يصدقون هذه الكذبه ويرجعون وبعد فتره قصيره يندمون.

أنا اعتقد ان الحكومه اولا لابد من معامله أهل البلد افضل علشان تيقي وعدوهم منطقيه ومصدقيه.

عمر!

[MKG]

س

بس

بصوا بقى انا كتبت مداخلتين ظراف خالص اى حد عايز يفتح على نار يقرا الاولى (التانية شلتها مقدرتش الفولت بتاعها كان عالى بالنسبالى 3 حبات)

خلاص اتفقنا

((((افتح السلخانة يا برعى))))))

كان المفروض المرة دى اتكلم عن الشباب و انواعهم واتجاهاتهعم فى مصر

بس دى مش دلوقتى

و الان انقل بحضراتكم

الى مصر

مصر الشموخ مصر الحضارة مصر0000 مصر000 مصر00000 عتبااااااا

الديموقراطية فى مصر

اول حاجة مش عارف ليه مش بحب لما يكون عندنا مصطلح لازم ناخد النظير الاجنبى ليه بس المهم دلوقتى

فى مصر يا سيدى كام حزب ظريف موت

و دول عاملين زى ما قال عبد الحليم شبانة

على حزب وداد قلبى يا بوى

مجرد ديكور وليس الا

1

الحزب الوطنى الديموقراطى

و ده بقه الراس الكبيرة

مكوش على كل حاجة و على كل امكانيات البلد

يعنى خد عندك واحد كان هيمسك فيه منصب مش جامد بس له اهميته وهو حاجة زىلا المسؤل عن الشباب العرب مش فاكر بالضبط

الراجل قلى

ان الحزب بياخد(بيلهف)معظم الرحلات المدعمة وابو بلاش و كل ما كان على شاكلة ذلك و يوفرها لشباب الحزب

و الباقى يتوزع على مراكز الشباب

و الرحلة احد اهم اهدافها

مسح العقول

للشباب

ليه واحد زميلى

راح رحلة مع الحزب الصور اللى اتصورها هناكم كارثة

اشى شيش و قزايز و سجاير عاملة ازاى

و كأن المشرف راح يصطاد صراصير

و المكان مش شط ولا مكان مفتوح

و العوض على الله

و ياما شباب لما بتعرف المواضيع دى بتنبسط موت ....موت

بصراحة لازم اقول ان الحزب بيعمل كام ندوة ايشى سياسة على تاريخ

و كل منطقة تلاقى فرع ليه

نصيحة :اوعىالشيطان يقولك طب الفلوس دى بتتجاب منين

و فلوس اعلانات بالهبل ايام المؤتمر الثامن للحزب

و فلوس المقار الكبرى وفى مناطق السنتى فيها بمرتب .........

المهم ساعتها

قول أعوذ بالله من الشيطان الرجيم

ايه طولت طيب المرة الجاية نكمل موضوع الحزن الوثنى البيروقراطى

مع محبتى

مكج

[MKG]

السلام عليكم ورحمةالله وبركاته

نكمل بقى الكلام عن الحزن الوثنى البيروقراطى

الحزب دى يا سادة عبارة عن مهزلة من هازل التاريخ

فهو عمل زى المنشار طالع واكل نازل واكل وهذا لا يمنع ان احترم بعض النشاطات فيه

او بعض الاشخاص و القيادات فيه

اخر اخبار الحزب موضوع المظاهرة المليونية بالاستاد

و المظاهرة دى كانت عاملة زى كروت التليفون

اى بريبايد

يعنى مدفوعة الثمن مسبقاً

انا اتعرض على اروح مقابل 5 جنيه(ايه العبط ده)

و ده كان تحت اسم بدل ايه

الموظفين بقى كانوا بيخدوا عشرة

و رجال الاعمال كانوا بيخدوا ايه الله اعلم بلاش نظلم الناس

الوطنين بقى اللى راحوا خدوا صابونة

المهم الحزب ده كله قرع فى قرع

اشى قيادات بتنافق فى معرفش ايه

المهم

واحد صاحبى فيه بيقولى انه دخله عشان المصلحة ليس الا

و بتتعلم فيه ازاى تاخد طلبك من المسئولين

(1

حضرتك يا فندم نورتنا و انجازات سعادتك و عفاريت سعادتك

2

بس يا ريت سيادتك تتكرم و تم عطاء سيادتكم لابنائك بان.............)

يا لا يا عم و فرت عليك التعليم

و قلى على مواقف كتير( معلش العمر مش بعزقه)مش هقولهكوا

الحزب كمان ليه قاعدة عريضة من الشباب و الحزب طبعاً علمانى صرف

و العوض على الله

المرة الجاية ان شاء الله

سوف اخبركم عن حزب الوفد

و الى سلخانة اخرى

سورى مداخلة اخرى

يا جماعة حد يتكلم عن اى موضوع بخصوص المنار السياحية اللى محدش شافها

حاضر قريب هكلمكوا عن جمصة وبورسعيد انظف الشواطىء

[nora]

:? :? :?

حزب وثني :cry: :cry: :cry: معلش مش هقدر ارد عليك هنا خليني هناك احسن اصل انا والله مليش في الكلام الكبير ده :lol: :) :)

[1_Nadim]

اتيت لهذا الموضوع متأخرا مما جعلني اقرأ مداخلات كثيره مره واحده

اولا احيي كمج وفعلا اذا كنت لسه بتدرس يعني في العشرينات فانت مؤشر جميل علي ان مصر ولاده

فيما يخص الحكومه وتليفزيون الحكومه وحبايب الحكومه وشرفنطح واهل بيته فالسيده المذيعه عبرت بشكل جميل عن السياسه الحكيمه نتمني لكم غربه سعيده واحنا قاعدين هنا نحرسلكم مصر وكل ماواحد يقول كلمتين مش حلوين في حق مصر نخونه ونلعن سنسنفيل كل حاجه عنده وبعدين نعمل زي صدام ونقول اصل اصوله مش مصريه بدليل انه مش من بلد شرفنطح

في النهايه ياريت كلنا نتعلم اننا نرفض اللي بيجبرونا عليه ان بدل ما نشارك في حكم بلدنا نستعيض عنه باننا نغني بحبك وطن طنطن واطنطن حد شاف فيلم سمع هس

التخويف ده خلي احد اساتذه علم الاجتماع في مصر يألف كتاب سماه تراث العبيد وخاف يحط اسمه عليه

وخلوني في الاخر اعمل زي بتوع الحزب الوطني واقول مصر لن تبني الا بايدي ابنائها اللي مش خايفين

مع خالص تحياتي

[MKG]

:?  :?  :? 

حزب وثني ::cry:  :cry:  :cry:

دى فلتت منى شوية

وسعت حبتين معلش

جارى التعديل

و لا كلا

فيما يخص الحكومه وتليفزيون الحكومه وحبايب الحكومه وشرفنطح واهل بيته فالسيده المذيعه عبرت بشكل جميل عن السياسه الحكيمه نتمني لكم غربه سعيده واحنا قاعدين هنا نحرسلكم مصر وكل ماواحد يقول كلمتين مش حلوين في حق مصر نخونه ونلعن سنسنفيل كل حاجه عنده وبعدين نعمل زي صدام ونقول اصل اصوله مش مصريه بدليل انه مش من بلد شرفنطح

انا مش بخاف

بس مش قوى كده

دااااااانا غلبااااان

مع محبتى

مكج

[masry]

ممكن تنقل للمغتربين زى حالاتى مشاعر الناس فى مصربعد سقوط بغداد؟