أسئلة تعجيزية .... Ta3gezeeh questions

[se_ Elsyed]

حلوه Ta3gejeeh questions دي .. عامله زي حالة تسمم haleet tasamoom

ما هو المصطلحات الطبية سهلة أهي أومال معقدينها ليه كده ؟

المهم الولا عمر عاملين عندهم مسابقة ثقافية في المدرسة - نركز مع بعض الله يكرمكو .. عُمر عقبال الحبايب في سنة أولى إبتدائي أو بلغة الفرنجة Grade 1 - .. المهم قلت له هات الأسئلة وبعون الله أبوك هايرفع راسك وهاتطلع الألفه يالا عليهم كلهم ..

جابلي الورقة أمبارح وفيها 17 سؤال المفروض أجاوبهم وأرجعهم له تاني وبعدين بعد ما يلموا التعابين يعلنوا مين اللي فايز

نراجع مع بعض المعلومات كده : قولنا عُمر في سنة كام ؟

عليكو نور ... في سنة أولى

المهم جاب لي الورقة ولقيتها كلها بالإنجليزي .. قلت وماله .. ابوك هايرفع راسك يا عُمر وتمشي وسط الكفر وراسك دي بتخبط في عمدان النور ...

ندخل بقى عالأسئلة ومش عايزين رغي كتير .. وإعتبروا عُمر ده إبنكو كلكو ... وتعاطفك لواحده مش كفايه

1- What's Longest Bone in the Human Body ?

نعرفوها ... وربنا يخلي جوجل وخصوصاً www.ask.com وبعون الله طلعت الفخده Thigh bone ويا سلام عليها في الشوربة أو في الباربكيو

-----------------

who invented the Lightning conductor ?

انظر الكتاب صفحة أسك دوت كوم وبعون الله طلع واحد خواجه إسمه بنيامين فرانكلين

------------

who doscovered the Penclillin ?

عارف أمه وكنت باخده حقن وانا صغير .. الخواجه الكسندر فليمنج

----------------

if you paid for somwthing in Yen , which country would you be in ?

سهله.. في الكويت .. قصدي اليابان

-----------

in what continent is Mount Everest ?

ياما طلعته بالعربية هو والمقطم وكنا بنشرب حلبسه فوق وبوليس الأداب بيجري ورانا ... في أسيا طبعاً

------------

Which Metal , Liquied at room Temp. and is often used in Thermometer ؟

سهل برضيكي .. الزئبق الأحمر ... Mercury وفي منه عربيات كمان

------

which Motorway Runs in a Ring Around Lonodn ?

هاضحككم ... جبت واد زميلي في الشغل بريطاني وقلت له تعالى يابا سؤال سهل ومن المقرر .. جاوب يابا ؟

فقالي بكل ثقة .. بص يا سين سين هو إسمه يا M 3 أو M 4 ، الضلالي أدخل على أسك دوت كوم ألاقي الطريق إسمه M 25 والولا راح مخنصر مني 21 إم في غمضة عين .. فقلت له إمشي يا فاشل يابو مُلحق من هنا إنت تلاقيك يالا من أمبابة وعليك احكام كمان ...

---------

which country is Asucion the Capital /

نعرفوها من الكورة وسنينها .. باراجوي اللي منها الولا سانت كلوز المحترف في المانيا وواد حريف قوي .

---------------

in which group of islamds can Sar be Found ?

ما كنتش عارفها زي الباقي وعملت شيرش لقيت سارك دي موجوده في أنجلترا وبالتحديد في

Channel Islands

-----------

what metal , the Symbol is ag , used in Jewellery & Photograph ?

سامحني يابني أبوك كان أدبي ... المهم بالشيرش عرفت إنه الفضة .. شغال يابا

----------

who is the Famous Greek Mathmatician & Inventor ?

نهارو أبيض ... الراجل النضيف اللي كان بيستحمى في البانيو أرشميدس بتاع قانون الطفو اللي بيقب على وش الميه

----------

هاكمل لما أرجع ... زمان الواد واقف على بابا المدرسة ومستني الإجابات

[مزاميزو]

أنا بقول تودي عمر في من سيربح المليون أو وزنك دهب

أي مسابقة بتدي فلوس كويسة ... خلي الواد يأمن مستقبله

وحياتك أنا كنت علمي بس المعلومات دي بتاعة واحد 14 سنة خدمة في ثانوي

[Folana]

السلام عليكم ورحمة الله...

ايه الاثئلة الثاذجة دى؟.....اهو نوع الاسئلة دى هو اللى بيجيب لاولادنا تخلف.....مافيش تنمية مهارات فكرية خالص.... :blink:

فين ايام زمان واسئلة زمان.....فين "هل رأيت الفيل ياخليل؟" التعليم باز باززز....

بنتى الكبيرة اما ماكنتش كبيرة لسه وكانت فى كى جى تو...كانوا بيعملوا لها كل اسبوع حصة املاء ...وفى احد الاجتماعات الشهرية مع اولياء الامور وكنت حريصة جدا على حضورها بعكس اجتماعات بنتى الصغيرة عمرهم ماشافوا وشى...ولا داعى لذكر الاسباب... wst:: ...حضرت والدة بنت وهاتك ياخناق مع المدرسة علشان امتحنت البنات فى كلمة (board)

وتقولها ازاى طفلة عندها 4 سنين تعرف تتملى الكلمة دى...ماتعرفيش ان (oa) دى لها طريقة فى النطق....انا بأدرس انجليش فى الجامعة ورسالة الماجيستير بتاعتى فى ال (oa)

فكرتنى بصلاح ذو الفقار فى فيلم الايدى الناعمة لما كان واخد دكتوارة فى "حتى"

وعملت فعلا مشكلة كبيرة وقالت لها بنتى ماتتملاش انا حاعلمها بمعرفتى...

فينها دلوقت...تشوف التعليم باظ ازاى....قال الارض كرويتون قال..وقال قمة ايفريست فى الدويقة قال...آآشيخ ..

كمل الاسئلة كمل يا ابو الاسيان خلينا نتسئف.... ده العلام حلو جوى ياولالالاد :lol:

[shawshank]

حضرتك بتفكرني بسؤال للصف الرابع الابتدائي في المدارس الحكومية في مصر بيقول :

إذا كان & هي 132 و # هي 512 ، فما ناتج العملية

&5 +3#

؟

تم تعديل 20 مارس 2008 بواسطة shawshank

[سيزيف]

عزيزى سى السيد

ازيك اولا

هو المحروس عمر ف مدرسة ايه بالظبط ؟

و الاسئلة دى بيتم تدريسها للطلبة و لا دى منتظر منهم انهم يكونوا عارفينها كمعلومات عامة ؟

و بعدين ما هى الفائدة العملية المعملية التى تعود على طفل ف اولى ابتدائى من معرفة الطريق الذى يطوق لندن بالكامل - حتى لو افترضنا ان الطفل ده انجليزى و ف مدرسة لندن الابتدائية المشتركة - ؟؟؟

الحمدلله ان الواحد خلص علام من زمان

و لا عزاء للاجيال القادمة

ملحوظة :

بعد الموضوع ده بفكر انى الغى نهائيا فكرة الجواز و الانجاب

منك لله يا س س

-_-

[Modest]

ملحوظة :

بعد الموضوع ده بفكر انى الغى نهائيا فكرة الجواز و الانجاب

منك لله يا س س

-_-

مالكش حق خالص تقول كده يا متر

أديك شايف إن لولا الجواز و الإنجاب ماكانش سي السيد عرف إن الين عملة الكويت و لا إن الفخدة بتتعمل شوربة :Exclam:

كمّل الإجابات يا سين سين .. عايزين نتسأف الله يكرمك wst::

[se_ Elsyed]

أيها الإخوة المواطنون ... أسعد الله صباحكم بكل خير .. معكم مذيعكم الحبوب .. سين سين الدبدوب في برنامجكم اللي بالشقلوب " الثقافة للجميع "

المسابقة الماراثونية دي تندرج تحت مصطلح " جنرال نولديج " معلومات عامة يعني .. واتحدى اللي حاطط الأسئلة يكون عارف إجابتها أساساً فعلى رأي أولادنا اللي شاركوا في الردود على هذا الموضوع : إيه فايدة إن الطفل يبقى عارف إسم طريق المحور بتاع لندن ؟

أينعم هي مسابقة ترفيهيه ومش داخله في أعمال السنة السودا .. لكن برضوا دي عيال لسه في سنة أولى وما يعرفوش حتى إسم باباهم إيه ... ده المحروس عمر كان لحد كي جي تو ، ما كانش عارف إن إسمي الحق وحقيقي احمد .. آه والله .... لإنه شايف الجميع بيقولوا لي يا حماده حتى المودام .. فكان يعيط لما حد ينده له في المدرسة ويقول له عُمر احمد ويقول لهم لأ انا إسمي عُمر حماده ، وتعب قلبي لحد ما أقنعته إن حماده ده الإسم الحركي اللي كنت بأستخدمه في المقاومة الشعبية أيام حرب المعيز ... ما علينا

نكمل يا ولاد ..

انا سايب بقى أسئلة الزبدة في الأخر عشان نحلي بها :

سين

which is pasrt of An Aircrafte ?

ج : وكتاب الله ما حطين إختيارات لدرجة قلت إن الإختيات معمولة بالحبر السري إكمنهم عارفين إني كنت في المقاومة الشعبية .. روحت ماسك القلم الاحمر وكاتب لهم : أين الإختيارات يا صلاح الدين ؟

س تاني :

which of these runs on " Caterpillar Tracks "

ج : تابع أسئلة المقاومة الشعبية التابعة لإدارة شرق القاهرة التعليمية .... ودورت على الزيس اللي بتجري زي الرهوان يمكن تكون متنطورة في الصفحة هنا ولا هنا ... إنسى يا عُمر .. روحت كاتب للي حاطط الأسئلة ( يا بني أنا مطول بالي ومش عايز أمد إيدي عليك )

س س ( سؤال سهل )

How Long does it take for Earth to revolved around the Sun ?

ج : 365 يوم ولو الأرض واخده طريق المحور ممكن توصل في 366

س س س ( سؤال سهلة سهولة )

which continent contains the most people ?

ج : أسيا ونسمع سلام لماوتسي تونج .. ومعاه سلام للمهاتما غاندي ؟

....

إيه رأيكو .... أنفع أدخل مسابقة من سيربح المليوم بس يكون معايا اللاب توب وخط دي إس إل ون جيجا وظابطه على جوجل وأسك دوت كوم ؟

[هشام عباس]

على فكره التعليم فعلا اتغير كتير جدا جدا انا بنتي الي في kg2 بتاخد املاء لك اسبوع لكن والله جمل!!! ومش مجرد كلمات -_-

انا افتكر وانا قدها وعندي 5 سنين يا دوب كنا بناخد ماما وبابا :Exclam:

اما يوسف بقى الي في سنه رابعه فده قصه تانيه خالص

انا اصلا بقرأ كتاب السينس بتاعه بالعافيه

المشكله المهمه جدا !!!!! اني مش شايفهم اصلا حاسين ان فيه مشكله؟

واضح ان المشكله عندي انا

[مزاميزو]

يقطع التعليم المجاني وسنينه