دعاء

[galaxy]

مفيش شك في اهميه الدعاء في حياتنا (الدعاء مخ العباده) :lol: ..........وطبعا لما بندعي بندعي عن يقين و ثقه ان الاجابه قريبه ..........و اذا ربنا ابدل دعوتنا بخير من نوع اخر لازم نحس بالرضا....ونعرف ان انشاءالله دا الخير. :blink:

(وعسي ان تكرهوا شيئاو خيرلكم و عسي ان تحبوا شيئا وهو شر لكم)

انا من اشد محبي الدعاء و ليا صولات وجولات وحكايات كتيره معاه من دعوات اتحققت بسرعه او ربنا ابدلني افضل منها او حتي ماكنتش خير خالص و استعجلت عليها بس ربنا اكرمني بعدم استجابته لها و تبصيري بالخير ولو بعد فتره عشان ماازعلش)

و من كتر اعتمادي علي الدعاء اني لما بقابل حد من اصحابي او قرايبي و بعدين اسيبه بتكون الكلمه اللي علي لساني هي ادعيلي .وخصوصا دعوات الجدات و الامهات و الناس البركه دي

حتي لما حد من اصحابي بيقولي علي مشكله او ياخد رايي في حاجه اول حل عندي بيكون التوصيه بالدعاء.

عايزه اعرف منكم (وخصوصا اهل الخبره في المنتدي اللي اثلجوا صدري بالرد و المسانده في اول مداخلاتي)اكتر المواقف اللي مرت بيكوا و ماكانش لها حل و م اتحلتش غير بالدعاء (طبعا الدعاء دا لازم بس انا اقصد ان ما كنش في اي فعل يتعمل و الفرج جه بالدعاء بدون عمل بجانبه)..او مرة دعيتوا بحاجه و ربنا انعم عليكوا بالاحسن منها من غير ما تتخيلوا.......او اتمنيتوا شيء و دعيتوا بيه و ماكنش خير من الاصل الا في خيالكم بس....من الاخر كدا عايزة اعرف حكايتكوا مع الدعاء.....................وربنا يرزقكنا جميعا اليقين و ................ادعولي wst::

[سهران]

تحياتي

باختلف مع حضرتك شوية ..... كام مليون مسلم بيدعوا ليل و نهار على كل من ظلم الأمة و رمل نسائها و يتم أولادها و نهب خيراتها و أهانها و أستباح كرامتها و كرامتنا ..... أعذريني لسة شايف أوبريت الضمير العربي و لتالت مرة و في كل مرة أبكي كما تبكون من فرط الأحساس بالقهر ... أكيد حضرتك برضة بتبكي و بتدعي زينا و زي ملايين العرب و المسلمين و ز ي ما بكينا و دعينا من عشر سنين يوم ما شوفنا الحلم العربي ... فاكرينه .......و النتيجة ؟؟؟؟؟؟؟؟؟؟؟؟!!! أفتكرت كلمة قالهالي صديق من عشر سنين أن لو كل المسلمين دعوا في توقيت واحد أكيد فينا حد مستجاب الدعوة و يخلص الكرب اللي أحنا فيه ؟؟؟؟؟؟؟؟؟؟؟؟؟؟؟؟ طبعا و احنا قاعدين متنفخين زي الفل تنتصر الأمة و تنفرج الأزمة ؟؟؟؟ تخيلوا فيه رسائل كانت بتيجي على الموبايل في رمضان تحمل نفس الفكر .. هاندعي كلنا ساعة أذان المغرب و تنحل كل أزماتنا.... قناعتي أنه لا فائـــــــــــــــــــــدة من دعـــــــاء بدون عمــــــــــــــــــــــــــــــــــــــل ................

ربنا ما خلقناش عشان نتدروش و نهمهم بالدعاء ليل و نهار و نتقاعس عن نصرة دينه و تحقيق الخلافة في الأرض و أعمارها و الأخذ بأسباب النجاح و كذلك تحقيق أحلامنا الشخصية .......... الرسول صلى الله عليه و سلم أعد للهجرة الأعداد الرائع من التمويه على الكفار و أعداد الزاد و دليل للصحراء و أسماء بنت أبي بكر و هي حامل و خطة تزويدهم بالغذاء و غار ثور بأعلى قمة جبل تسلقه يتعدي يمكن ساعتين زمن و طريق غير معتاد للمدينة .. ثم الدعاء بعد ذلك ليكلل الله عز وجل كل ذلك بالنجاح بأرادته و مشيئته العليا .... في غزوة بدر الأعداد للمعركة و تغوير آبار و السيطرة على بأر بدر و استطلاع موقع و عتاد الكفار ... ثم دعى ربه و رفع يديه للسماء حتى قال له الصحابة هون عليك يا رسول الله فجاء نصر الله ........عدم التزام الرماة بغزوة أحد درس قاسي يعلم أنه لا أنتصار بغير عمل حتى لو كان هناك دعــــــــــــــــــــــــــــــــــــــــــــــــــاء .

الأمثلة كثيرة من السنة النبوية و من حياتنا الخاصة و لو راجعتي نفسك هاتلاقي ......... عمرك شوفتي زميلة ليكي جابت أمتياز لانها كانت بتدعي كويس ؟؟؟؟!!!

لكن لو رسبت بعد ما دعت طول السنة هاتقول معلهش ربنا لم يأذن بالنجاح .... أكيد الفايدة في السقوط مش في النجاح و التفوق و مش هاتتعب نفسها في السؤال أنا ليه ما نجحتش ؟؟

أأسف للأطالة لكن الموضوع ده في غاية الأهمية لزرع فكرة الأجتهاد و العمل و التجويد في كل ما نقوم به

تم تعديل 28 مارس 2008 بواسطة سهران

[galaxy]

ازيك يا استاذ سهران............انا معاك في كل كلامك والله و مش معني ايماني المطلق بالدعاء.اني مش بعمل........في المذاكره بعمل اللي عليا و بذاكر و بركز وبرضه بدعي بكل ما اوتيت من يقين............في شغلي.......بعمل اللي عليا و زياده شويه عشان ضميري المهني و خصوصا ممكن يكون في مصير او مصلحه حد في ايدي و ده في حد ذاته ايمان و عباده................و ربنا يعلم في كل و قت بحرص اني اكون واجهه مشرفه لبلدي و ديني و خصوصا اني في بلد غربه و بعمل بالقاعده الشرعيه الدين المعامله..........عشان لما الناس تتعامل معايا يعرفوا ان المسلمين و المصريين ناس محترمين ...ودي حاجه اخدتها من واحد هندي مسلم كان معايا في الشغل ان الواحد لازم يكون واجهه مشرفه لاسلامه وبلده..........و دي والله دعوة للجميع عشان احنا البدايه و لازم فعلا نبدأ بنفسنا.

بس انا من مداخلتي مش بقصد اننا نتدروش و ما نقومش من ع السجاده و نبخر والكلام دا............انا بقصد ان من رحمه ربنا بينا ساعات نتمني و ندعي بشئ ظنا منا انه الخير كله............و ربنا بيعافينا منها و بينعم علينا بالافضل ..........وممكن نبتلي و لا ندري ما العمل و لن يكون الخلاص من الابتلاء بالدعاء وحده ولكنه جانب مهم ..............اسعي يا عبد و انا اسعي معاك........ولكن لا يمكن اغفال التوكل علي الله و ليس التواكل.انا شخصيا اعرف بعض الناس اذا المت بهم مصيبه او مشكله من الممكن ان يتعايشو مع المشكله لدرجه اهمال الصلاة و تركها تماما.........زعلي اعتبار الانشغال بالهموم..........الا ان معرفه الله في اشد اوقات البلاء هو اجمل معرفه و ادومها................................فما اقصده هنا هو معرفه تجارب من حولي في الدعاء و الرضا و عما اذا كانت هذه الفضيله نتمتع بها في حاله ما اذا انعم الله علينا بما نتمناه او ابتلانا بنقصانه........وهل ندرك رحمه الله في عدم استجابته لدعائنا او تاخيره......لحكمته او لاعطائنا ما هو افضل.وهل ندرك ما في هذا الافضل من خير ام نتمسك بما في نفسنا من رغبه متناسيين ما في قضاء اله من رحمه...........هي دعوة لليقين و الرضا لا للدروشه و التواكل.

والحمد لله انك تفضلت بأضافه هذا الجانب القيم للحديث..........الذي اثري الموضوع فعلا..........و ياريت يشاركنا الجميع الرأي في كل ما سبق..........و شكرا بجد اوي.واسفه للاطاله ;) :lol:

وشكرا للمرور الكريم

[سهران]

[b]شاكر جدا مداخلتك و أطرائك يا آنسة galaxy و طبعا لم أقصد أطلاقا ان حضرتك مكتفية بالدعاء و اجتهادك في العمل أولوية تانية بالعكس من مداخلات حضرتك واضح أجتهادك و تفوقك كطبيبة صيدلانية ( طب فيه أيه أكتر من كدة ما شاء الله عليكي ) ... أنا بس لقيتها فرصة أعرض وجهه نظري في موضوع الدعاء و أقترانه حسب فهمي أقتران وثيق بالعمل لان الموضوع فيه لغط كبير عند البعض .

بس حبيت أوضح أن الدعاء مخ العبادة زي حضرتك ما قلتي و العمل و الأجتهاد هما سنة الله في خلقه و بالتالي الدعاء مع الأجتهاد ليسا بديلين و لكنهما متلازمتين .... فدعاء بلا عمل لن يسفر عن أي نتائج ومع العمل مشيئة الله العليا و أرادته هي الفيصل و ليس بأعمالنا فقط فللتوفيق دائما أسبابه من العمل و الأجتهاد .... صلى الله عليه و سلم أجتهد في التخطيط و الأستعداد للهجرة و أخذ بكل الأسباب الدنوية .. ولكن كفار مكة رغم ذلك وصلوا حتى باب الغار ( لو نظر أحدهم تحت قدميه لرآنا) فتأتي أرادة الله و مشيئته و قدره ... و أجتهد المسلمون و الصحابة في غزوة بدر فيأتي المطر للتثبيت و نزول الملائكة و التأييد من المولى عز وجل ... دعواتي للجميع و ما تنسيناش في دعواتك .

[galaxy]

شكرا يا سهران :) ..........وجهه نظرك واضحه والله :) ............اما بالنسبه للدعاء.........حاضر..............من عنيا :blink:

[رمضان]

روح يا شيخة منك له ربنا يصلح حالكم يارب

[امانى]

جلاكسى انا فاهمة وجهة نظرك تماما . امتى الواحد ميبقاش امامه الا الدعاء؟

احيانا كثيرة نقع امام مشاكل كثيرة ونعمل ما فى وسعنا لحلها ولكن لا يوجد حل لها هنا نبقى عملنا اللى علينا

زى ما قال الاخ سهران ونترك الباقى لربنا ولكن علينا بالدعاء له لفك الكرب ومن يفك كرب المهموم الا الله وحتى

لو عن طريق أى حد فى اى وقت كيفما يشاء كل شئ بامره وهو المستعان . وعلشان انتى طالبه امثلة لكدة

هقولك تعرض احد افراد اسرتى لأزمة حقيقية وهى الاحتياج الى نقل دم من فصيلة o سالب ودوخت السبع دوخات

زى المثل ما بيقول فى المستشفيات وفى الجمعيات الخيرية وفى افراد اسرتنا والمعارف للحصول على اكياس

الدم دون جدوة لا يوجد منها السالب والجميع كان بجوارى دون فائدة ووقفت موقف لا احسد عليه واتجهت بكربى

لله ليلا ونهارا ادعوه ان يفك كربى ويزيل همى وتتحل المشكلة وكان الله هو الكريم العالم بخفايا الامور وساعة الفرج

ربى لم يطول عليا الكرب وفرجت من اوسع ابوابها باكثر ما كنا نتمنى ومن متبرعين اغلبهم لا نعرفهم وهى دى حكمة

ربنا نجرب العسر علشان يشوف قوة ايمانا بيه ونعرف فضله علينا الواسع المجيب الدعوات

وكتير دعينا ربنا لحاجت تحصل ومحصلتش لكن بعد مرور فترة نجد ان الله اكرمنا بعم حدوثها وانه مخبى لنا احسن منها

امثلة وامثلة كتير المهم الواحد يسعى ويطلب الدعاء من الله ان يستجب فالله قريب مجيب دعوة الداع اذا دعاه

موضوعك جميل جلاكسى تشكرى عليه

امانى

[galaxy]

اماني العزيزة..............شكرا علي مرورك الكريم و مشاركتك الرائعه............ :closedeyes: :blink:

انتي الي فاهماني .............دا صحيح و كمان امتلاك فضيله الرضا من اجمل الفضائل و اكثرها بركه.......... :lol: :lol:

ربنا ييسر لنا و لكم جميعا الحال و ما تحرميناش من تجربك.........بجد ممتعه ومفيده..........ربنا يخلييك ويباركلك في كل اللي بتحبيهم

رمضان..............الله يكرمك.......ع الدعوة و المرور الرقيق

[nash]

شكولاته...

امرنا الله سبحانه وتعالي بالدعاء...الدعاء أساس العبادة وسر قوتها وروح قوامها؛ لأن الداعي إنما يدعو الله وهو عالم يقينا أنه لا أحد يستطيع أن يجلب له خيرا أو يدفع عنه ضرا إلا الله جل وعلا، وهذه هي حقيقة التوحيد والإخلاص، ولا عبادة أعظم منهما.

الحمد لله والصلاة والسلام على رسول الله وعلى آله وصحبه، أما بعـد:

فقد صح عن رسول الله – صلى الله عليه وسلم- أنه قال: الدعاء هو العبادة. ثم قرأ: وقال ربكم ادعوني أستجب لكم إن الذين يستكبرون عن عبادتي سيدخلون جهنم داخرين" رواه أحمد وأصحاب السنن وغيرهم

وأما لفظ "الدعاء مخ العبادة" فقد رواه الترمذي وغيره وضعفه أهل العلم.

ومخ العبادة معناه: خالصها وسر قوتها. قال المباركفوري في تحفة الأحوذي: "الدعاء مخ العبادة: المخ بالضم نقي العظم والدماغ وشحمة العين وخالص كل شيء، والمعنى أن الدعاء لب العبادة وخالصها لأن الداعي؛ إنما يدعو الله عند انقطاع أمله مما سواه وذلك حقيقة التوحيد والإخلاص ولا عبادة فوقهما.

قال ابن العربي: وبالمخ تكون القوة للأعضاء فكذا الدعاء مخ العبادة به تتقوى عبادة العابدين فإنه روح العبادة.

وقال بعض المفسرين في قوله تعالى: إِِنَّ الَّذِينَ يَسْتَكْبِرُونَ عَنْ عِبَادَتِي: أي عن دعائي"

وعلى هذا فالدعاء هو أساس العبادة وهذا الحديث مثل حديث: الحج عرفة. أي معظمه وأساسه. ومثل حديث : الدين النصيحة. أي لا يخرج شيء منه عنها.

فمن أكثر من الدعاء وداوم عليه أحس بلذة القرب من الله تعالى والصلة به والتعلق به والإخلاص له في كل ما يعمل.

والله أعلم.

دائما ما أدعوا ...اللهم أجعلني في عيني صغيرا وفي أعين الناس كبيرا

دمتي في رعايه الله وحفظه

[جويرية]

ساعات يا اختي الناس بتقول انا بدعي بس مش بيستجاب ليه عشان ايه

لأن احنا في حاجات مش بنفذها في ديننا ده غالبا ده مش علي مستوي الفرد علي مستوي المجتمع

يعني في اوامر في القرأن للفرد و في اوامر للجماعة

اوامر الجماعة دي بقي هيا المشكلة

[galaxy]

نيشو...........شريكتي العزيزة.............ايه الثقافه الجامدة دي............ :sad:

بجد استفدت جدا ..............بس السؤال........ماذا عن فضيله الرضا؟

جويريه الغاليه.............شرفتيني بمداخلتك والله...........رأيك تمام و وجهه جديده للحوار.....................فعلا قبل ما نطلب من رب العالمين انه يستجيب دعانا..............نتبع تعاليمه اولا و بنفس راضيه بقضاءه تعالي و مؤمنه انه لن يصيبنا الا ما كتبه الله لها.......................و ان ما يصيبها لم يكن ليخطئها و ان ما اخطأها لم يكن ليصيبها.........الا بأذن الله وحده.

و الاوامر للجماعه......فعلا زي ما قولتي............هي المشكله..............ربنا يخليكي يا جويريه بجد اضافه مثمرة mfb:

[galaxy]

معلش انا بس حابه اضيف حاجه يا جويريه..................... mfb:

مقوله .........بدعي و مش بيستجيب ...........ممكن يكون سببها مش بس عدم الانصياع لاوامر الله تعالي.

ساعات الانسان مش بياخد باله من كرم ربنا ليه في حاجات تانيه و بيفضل ينتظر الدعوة اللي في باله..........مع الدعوة ليها اكثر من حاله..........ان الدعوة ممكن تستجاب كما هي وكما تمناها الانسان.

..............او ان ربنا بيدي الانسان ما هو افضل مما تمني اجلا و لكن قصور تفكير الانسان يجعله لا يلتفت لما انعمه الله عليه و يفضل يتحسر علي ما فاته مع انه لو يعلم ما انعمه الله عليه لما التفت لما فاته.

"و يدعو الانسن بالشر دعاءه بالخير"........وقد يكون ايضا استجابه الدعوة بأن يجنبه الله السوء الذي كان يدعو به دزن ان يدري او اي شر اخر.

...........او ان يبتلي الانسان ويفوز بعد اجتيازة الاختبار الرباني برضا الله عنه في الاخرة.

و ساعات كمان يتعجل الانسان الاجابه..........و اذا تأخرت عنه.......يأس من الاجابه و توقف عن الاجتهاد في الدعاء...و قد تكون الدعوة قاربت علي الاستجابه فتتوقف بيأس العبد من الاجابه.

نيشو ........مع كل الثقافه دي .........متأكده كنتي ادبي؟ :sad:

[سهران]

[size="4"]تحياتي للأخ رمضان و شكرا جزيلا لدعوتك الجميلة .

عبد الله بن عمر الصحابي الجليل يقول : أنا أعلم متى يستجاب الدعاء.......... عندما يخشع القلب و تدمع العين و تهتز الجوارح أوقن بالأجابة ..........

و شروط أجابة الدعاء أربعة ........اليقين في الأجابة........عدم الأستعجال......الخشوع و الأنكسار..... أكل الحلال

و في النهاية أدعوا الله لي و لكم أن يرزقنا الرضـــــــــــــــــــــا بما قسمه الله لنا و كما قالوا الرضا جنة الدنيا .......... و ان شاء الله من دخل بالرضا جنة الدنيا سيدخله الله برحمته ان شاء الله جنة الآخرة ...

تم تعديل 30 مارس 2008 بواسطة سهران