نصيحه لكل شخص يقدم على الهجره الى كندا

[memokokoo]

ارجو من اخوانى فى المنتدى انهم يضيفوا للأسئله اللى كتبتها لأننا كلنا أكيد عايزين نسألها وكمان اكيد فى كتيير حالات متماثله بيننا واكيد يهمهم انهم يعرفوا الاجابات

اختار انزل على اى مدينه ؟

اسعى للحصول على الدلف ولا لأ؟

فى اى مدينه فى كندا اقدر احصل على عمل بسهوله واكمل دراسه؟

انا عندى طفل اجيب الطفل التانى قبل ما اسافر ولا لأ؟

هل انى اجيب الطفل التانى هناك له علاقه بالحصول على الجنسيه؟

هل لو اخدت التأشيره وسافرت انا لوحدى وتركت المدام وابنى وعدت مثلا اول سنه وانا هناك لوحدى هل فى مشكله لو حبيت اجيب المدام و الولد الى كندا بعد مرور فتره طويله ؟

انا عندى اسئله كتيره بس كفايه كده دلوقت

شكررررررا

[Ghost]

معلش

ارجو تغير عنوان الموضوع لانه لا يدل على المضمون

شكرا

[memokokoo]

معلش

ارجو تغير عنوان الموضوع لانه لا يدل على المضمون

شكرا

تقترح ايه؟؟؟؟

[memokokoo]

مش مهم عنوان الموضوع بس المهم ان حد يجاوب على الاسئله wst::

[Ghost]

مش مهم عنوان الموضوع بس المهم ان حد يجاوب على الاسئله

يا انت داخل دخله جامده كده زي ما تكون عاوز بجنيه عيش من الطابونه و تطلع تجري

طب انت لسه جديد

يا ريت تطلب بطريقه هاديه شويه علشان الناس الخبره تدخل ترد عليك

انت مش بتقدم نصيحة هنا - و هذا العنوان للفت النظر و الدليل شوف كام واحد دخل على الموضوع و ما فيش و لا مشاركة

انت هنا بتسأل - و اللي بيسأل لازم يوضح كده من العنوان و يكون احسن من كده

يعني قول استفسار عن الهجره ..........

وبعدين لو انت كلفت نقسك شويه و قريت في المنتدي هتلاقي اجابه لكل سؤال انت اللي عاوز تعرفه مش كل الناس مشاركاك

معلش انا كنت هجاوب على اسئلتك بس الطريقه ديه ما تنفعش للسؤال

شكرا و تقبل خالص احترامي

[memokokoo]

ما شى يا عم العفريت انا متأسف على سوء التعبير فى العنوان

وبعدين انت ليه زغلان وواخد على خاطرك من حكايه طابونه العيش انت ما وقفتش عليها قبل كده؟!!!

كان الاولى بدل ما تكتب محاضره و تفرد عضلاتك و تقول انك قديم انك تجاوب على الاسئله

ياريت المداخله الجايه تجاوب على الاسئله يا عم الخبره

وانا كمان بقولك تقبل جزيل احترامى

[Ghost]

مش مجاوب يا عم الظريف

لان فيه ناس زيك عاوزين يعرفوا المعلومه و يفتقدوا الى الطريقة التي يتم السؤال

عارف انا كده بحس مع ناس معينه اني لو جاوبت على اسئلتهم اني هاخد ذنب

طبعا انت مش منهم

بس ادي دقني ايه لو في واجد من اللي عرفين الاجابه و شاف اسلوبك و راح مجاوبك

مع احترامي لسيادتك

[memokokoo]

يا أستاذ عفريت

خليك فى حالك ومالكش دعوه بالناس يجاوبوا ما يجاوبوش القرار ليهم

أتكلم فى المفيد وطالما انت مش هاتجاوب يبقى تسكت احسن واتمنى ان النقاش بتاعك يبقى موضوعى

له هدف على قد سنك وخبرتك

ولسيادتكم جزيل الشكر والاحترام,,,

[دمياطي]

انا مع رايي الزميل جوست , عنوان الموضوع في ناحيه والموضوع ذات نفسه في ناحيه ثانيه , الاخ صاحب الموضوع

عنوان موضوعك بيقول ( نصيحه لكل شخص يقدم علي الهجره الي كندا ) يعني معناه انك انت عندك نصايح تقولها

للي عايزين يهاجروا , لكن انت في الواقع عايز حد ينصحك ..!!!... , عرفت المقصد يا اخينا ؟

سلام

[capitshino]

فعلا انا دخلت اشوف الاخ اللى بيقول معلومات عند كندا .. بس لاقيت الاخ هو اللى عاوز مساعدة قلت مش مشكلة يمكن غلطة فى العنوان .. جل من لا يسهوا.. لاقيت اخ فاضل بيحاول يعرفه السكة على طريقة من اعطانى سمكة ومن علمنى الصيد.. اى انه جوست يا عم ميمو بيقولك نصيحة هتنفع فى كل حياتك مش علشان تعرف اجابة سؤلاين... المهم يا عم ميمو بالنسبة للاسئلة اتمنى ان يجيبك عليها احد عن قريب واتمنى ان تراجع اسلوبك وكتاباتك ولكم جزيل الشكر..

[memokokoo]

فعلا انا لما كتبت نصيحه قصدت ان حد يقدم ليا النصيحه بدليل انك لما بتدخل بتلاقى مجموعه اسئله

وده مش خطأ جسيم زى ما انت قلت جل من لا يسهو

المشكله ان الاخ جوست قال ليا الكومنت بتاعه وانا اتقبلته واتأسفت كمان لقيته بيقولى انت داخل شمال

ودخل فى موضوع تانى مع انى كنت ديمقراطى جدا وقلتله انه ممكن يقترح العنوان اللى يناسب الموضوع

يعنى انا عدانى العيب وقزح

ولا رأيك ايه؟؟

كان المفروض ان العذر يبقى موجود

على العموم الاخ جوست شايف ان الخطاء فى العنوان جريمه لا تغتفر

مع انى عارف مداخلات الاخ جوست وكان ممكن ان يكون ليا عليها تعليقات كتيره بس ده مش هايفيدنى

كتير

اقدم اعتذارى مجددا واتمنى ان تلتمسوا لى العذر

مع خالص تحياتى و احترامى

[Ghost]

ارجو من اخوانى فى المنتدى انهم يضيفوا للأسئله اللى كتبتها لأننا كلنا أكيد عايزين نسألها وكمان اكيد فى كتيير حالات متماثله بيننا واكيد يهمهم انهم يعرفوا الاجابات

اختار انزل على اى مدينه ؟

اسعى للحصول على الدلف ولا لأ؟

فى اى مدينه فى كندا اقدر احصل على عمل بسهوله واكمل دراسه؟

انا عندى طفل اجيب الطفل التانى قبل ما اسافر ولا لأ؟

هل انى اجيب الطفل التانى هناك له علاقه بالحصول على الجنسيه؟

هل لو اخدت التأشيره وسافرت انا لوحدى وتركت المدام وابنى وعدت مثلا اول سنه وانا هناك لوحدى هل فى مشكله لو حبيت اجيب المدام و الولد الى كندا بعد مرور فتره طويله ؟

انا عندى اسئله كتيره بس كفايه كده دلوقت

شكررررررا

بص يا ميمو

سلام عليكم الاول

خد ديه :blink: و شد نفس ........كمان ............كمان

حلو كده

هجاوبك باختصار من واقع معرفتي

ابعد عن المدن الكبيره قوي زي تورنتو - المنافسه فيها عاليه قوي و الزحمة و الحوادث - يعني مش هتنفع العيال

ممكن تشوف مسيسسوجا - هتشوف فيها المسلمين كتير جدا و هتحس انك في بلاد العرب - و كبيره و جميله

او لندن

عاوز تعليم رخيص تبقى كيبك يا معلم بس العنصريه هناك اجارك الله

عاوز فرص عمل روح ادمنتون او كالجري في البرتا و عموما اوناريو فيها فرص برضوه

لو انت المجموع التراكمي بتاعك عالي و اجادتك الانجليزيه تمام ممكن بسهوله تاخد منحة و تتعلم على حساب البلد

موضوع العيل بقى

لو انت خلفت في كندا الواد راح ياخد الجنسيه فورا -بس ده مش هيفيدك انت في اي حاجة -

لو انت جيت به الي كندا و انت مهاجر هيكون مهاجر زيك و هياخد الجنسيه بعد اربع سنين تقريبا

و طبعا هيتصرف على كل عيل معونه اسمها ال child benefit

و هقولك على نصيحة - مع اني مفقوع منك - لو انت ممعكش فوق السبع العشره الالاف دولار يبقى تعالى لوجدك الاول و اوعى يجيب العيال وامهم

هتتمرمط في الاول كتير و هتشتغل ليل و نهار

و مشكله اللغه ممكن تاخد 5 شهور علشان تفهم الناس بتتكلم ازاي

و بعدين بعد ما تستقر هات العيال

لو انت جيت بالعيال و امهم هتتعب كتير و هتدفع دم قلبك في التامين و السكن و المعيشه ومش هتحس انك عملت حاجه

لكن طبعا لو معاهم فيزا هجره انهم يستنوا اكتر من سنه علشان الفيزا ما تبوزش

يعني قبل السنه يجوا

كفايه عليك كده و روح و ابقى تعالى تاني

سلام

[Muhammad Zidan]

ارجو من اخوانى فى المنتدى انهم يضيفوا للأسئله اللى كتبتها لأننا كلنا أكيد عايزين نسألها وكمان اكيد فى كتيير حالات متماثله بيننا واكيد يهمهم انهم يعرفوا الاجابات

اختار انزل على اى مدينه ؟

اسعى للحصول على الدلف ولا لأ؟

فى اى مدينه فى كندا اقدر احصل على عمل بسهوله واكمل دراسه؟

انا عندى طفل اجيب الطفل التانى قبل ما اسافر ولا لأ؟

هل انى اجيب الطفل التانى هناك له علاقه بالحصول على الجنسيه؟

هل لو اخدت التأشيره وسافرت انا لوحدى وتركت المدام وابنى وعدت مثلا اول سنه وانا هناك لوحدى هل فى مشكله لو حبيت اجيب المدام و الولد الى كندا بعد مرور فتره طويله ؟

انا عندى اسئله كتيره بس كفايه كده دلوقت

شكررررررا

بص يا ميمو

سلام عليكم الاول

خد ديه و شد نفس ........كمان ............كمان

حلو كده

هجاوبك باختصار من واقع معرفتي

ابعد عن المدن الكبيره قوي زي تورنتو - المنافسه فيها عاليه قوي و الزحمة و الحوادث - يعني مش هتنفع العيال

ممكن تشوف مسيسسوجا - هتشوف فيها المسلمين كتير جدا و هتحس انك في بلاد العرب - و كبيره و جميله

او لندن

عاوز تعليم رخيص تبقى كيبك يا معلم بس العنصريه هناك اجارك الله

عاوز فرص عمل روح ادمنتون او كالجري في البرتا و عموما اوناريو فيها فرص برضوه

لو انت المجموع التراكمي بتاعك عالي و اجادتك الانجليزيه تمام ممكن بسهوله تاخد منحة و تتعلم على حساب البلد

موضوع العيل بقى

لو انت خلفت في كندا الواد راح ياخد الجنسيه فورا -بس ده مش هيفيدك انت في اي حاجة -

لو انت جيت به الي كندا و انت مهاجر هيكون مهاجر زيك و هياخد الجنسيه بعد اربع سنين تقريبا

و طبعا هيتصرف على كل عيل معونه اسمها ال child benefit

و هقولك على نصيحة - مع اني مفقوع منك - لو انت ممعكش فوق السبع العشره الالاف دولار يبقى تعالى لوجدك الاول و اوعى يجيب العيال وامهم

هتتمرمط في الاول كتير و هتشتغل ليل و نهار

و مشكله اللغه ممكن تاخد 5 شهور علشان تفهم الناس بتتكلم ازاي

و بعدين بعد ما تستقر هات العيال

لو انت جيت بالعيال و امهم هتتعب كتير و هتدفع دم قلبك في التامين و السكن و المعيشه ومش هتحس انك عملت حاجه

لكن طبعا لو معاهم فيزا هجره انهم يستنوا اكتر من سنه علشان الفيزا ما تبوزش

يعني قبل السنه يجوا

كفايه عليك كده و روح و ابقى تعالى تاني

شفت يا عم ميمو آدي العفريت اللي انت كنت مزعله طلع أجدع ورد عليك رد كافي شافي عافي

ها تلاقي كده فين ...

بس إوعى تعمل كده تاني قول أنا آسف وكلنا ها نسامحك

خلاص

Muhammad Zidan :blink:

[memokokoo]

شكرا يا استاذ جوست ربنا يخليك

انا كمان بهديلك الورده دى

فى استفسار كمان ياريت ما اكونش تقيل عليك

انت قلت فى وسط الكلام ان لو المجموع التراكمى بتاعى كويس و عندى اجاده للغه الانجليزيه يبقى ممكن اتعلم على حساب البلد بس انا عايز اعرف المجموع التراكمى بتاع ايه؟

وفى النهايه بشكرك تانى الموضوع كله كان سوء تفاهم مش محتاج تتفقع منى

مع جزيل الشكر لجميع الاخوه بالمنتدى

[memokokoo]

محمد زيدان

[Ghost]

يا عم لا سوء تفاهم و لا حاجه

اهلا بيك ....... المجموع التراكمي ده GPA هو النسبه التي حصلت عليها في الشهاده الي فيها المواد الدراسيه و اللي بيسموها transcript

مش انت لو جيب في الشهاده 60 % يبقى مقبول و 75% يبقى جيد جدا و كده

هو ده المجموع التراكمي

و بكده يا عم يبقى انت خلصت كل طلباتك من العفريت ........

لا بهزر

لو عاوز حاجه تاني ابقى اسأل

سلام عليكم

[capitshino]

سلام كبير اوى لجوست وميمو

bv:- bv:- bv:- bv:- bv:-

[processor]

شفت بقه يا اخ ميمو الاخ جوست جابلك المفيد ازاي

وما محبة إلا بعد عداوة وربنا ما يجيب عداوة

اتمنى لك التوفيق

[memokokoo]

لا مؤخده يا اخ جوست سؤال كمان

انا حصلت فى مصر على بكاليريوس تجاره

بس انا عندى اجاده فى بعض برامج التصميم الهندسى زى auto cad & 3d max & photo shop

عايز اعرف سوق البرامج دى عامل ايه فى كندا خاصتا انا معنديش شهاده معتمده تقول انى بعرف اشتغل على البرامج دى

ولو حيبت ادرس حاجه تانيه غير التجاره هل ممكن؟ ولو ممكن هل تنصحنى بكده؟

شكرا ليك على سعه صدرك :lol:

[Ghost]

بص يا ميمو

انت زي ما تحب تشتغل هتشتغل

يعني انت معاك طب و حبيت تدرس هندسه ....ما فيش مانع

انا اعرف واحد كان بيدرس هندسه و حب يشوف حظه في الطب و لاقى جامعه ماك ماستر بتقوله ماشي

و انت لو دخلت على الموقع بتاعهم هتلاقي كده

و انا فعلا دخلت و شوفت ازاي الناس ديه ما عندهش اي عقده

بس

كله بحسابه يا حبه عيني

و الدراسه في السنه الواحده ممكن تكلف اكثر من عشره الالاف دولار

و بعدين انت معاك شهاده او غيره

هيقولك ارمي كل ده - طبعا مش في وشك - و تعالى اقعد قدامي على الكمبيوتر و يشوف و يتابع شغلك

تمام يبقى انت معاه

مش قد كده يبقى مع السلامه

و اعتقد ان التجاره بتغمل معادله و تشتغل بيها كويس

بص كل واحد عارف نفسه و عارف هو مقصر فين

يعني تغير المهنه ده قرارك و انت هتحسبها هصرف اد ايه و انا معاي ايه و بعد كده انا هستفيد ايه

ارجو ان الكلام بتاعي ما يكوش فيه لبس و لا غموض

و سلام